ᤗᤢᤁᤠ 5 - LIFOTNT

ᤌᤡᤰᤛᤡᤃᤣᤰᤐᤠ ᤜᤢ᤹ᤛᤠᤶᤒᤠᤜᤠ᤹

¹ ᤌᤡᤰᤕᤧᤴ ᤕᤧᤛᤢᤴ ᤃᤏᤧᤛᤖᤧᤋ ᤘᤠᤜᤱᤅᤡᤸᤗᤧ ᤁᤢᤕᤠᤀᤥ ᤛᤢᤏᤠᤀᤡᤱ ᤛᤧᤛᤢᤖ ᤕᤧᤒᤧᤸᤗᤧ ᤂᤧᤵᤔᤥ ᤔᤏᤠᤜᤠ᤹ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤂᤧᤶᤛᤧ ᤔᤧᤍᤩᤧᤀᤠᤱ ᤂᤢᤏᤧ᤹ ᤆᤡᤒᤢ᤺ᤳ ᤔᤧᤒᤴᤇᤢᤖᤥ॥

² ᤂᤧᤵᤔᤥ ᤁᤢᤕᤠᤀᤥ ᤏᤧᤳᤇᤡ ᤂ᤺ᤱᤒᤣᤜᤠ᤹ ᤕᤧᤛᤢᤖᤧ ᤏᤡᤛᤢᤛᤡ. ᤁᤖ ᤁᤢᤒᤣᤛᤠᤱ ᤕᤥ᤺ᤱ ᤁᤧᤗᤧᤵᤐᤠᤜᤠ᤹ ᤂᤢᤏᤡ᤹ ᤕᤥ᤺ᤱ ᤘᤠᤜᤵᤏᤢ ᤔᤧᤕᤠᤃᤧ॥

³ ᤕᤧᤛᤢᤴ ᤛᤡᤔᤥᤏᤖᤧ ᤁᤢᤄ᤺ᤱᤒᤣᤀᤥ ᤗᤠᤛᤧᤀᤠᤱ ᤔᤡᤛᤠᤰ ᤁᤢᤍᤡ᤺ᤶᤒᤣ ᤁᤣ᤺ᤶᤒᤠᤀᤥ ᤋᤣ᤹ᤒᤠᤱᤄᤢ. ᤜᤧᤰᤁᤩᤠᤱ ᤂᤧᤵᤔᤥ ᤕᤢᤱᤛᤡᤱᤅᤠᤱ ᤔᤏᤠᤜᤠ᤹ ᤜᤢ᤹ᤖᤢᤛᤡ॥

⁴ ᤂᤢᤏᤧ᤹ ᤐᤠ᤺ᤵᤔᤠ ᤛᤢᤖᤢᤀᤠᤱ ᤛᤡᤔᤥᤏᤧᤴ ᤔᤧᤳᤋᤢ. “ᤂ᤺ᤱᤒᤣᤴ ᤏᤠ ᤁᤢᤍᤡ᤺ᤶᤒᤣ ᤁᤣ᤺ᤶᤒᤠᤀᤥ ᤋᤣ᤹ᤖᤧᤀᤠᤱ ᤅᤠᤍᤧᤶᤔᤠᤖᤧ ᤗᤠᤃᤡ ᤕᤥ᤺ᤱᤅᤡᤴ ᤗᤧᤵᤋᤧ᤹॥”

⁵ ᤜᤧᤰᤁᤣ᤺ᤸᤗᤧ ᤛᤡᤔᤥᤏᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤀᤠᤏᤡᤃᤧᤃ ᤏᤠᤶᤍᤠ᤺ᤳᤋᤠ᤺ᤳ ᤕᤠᤶᤒᤢᤎᤡᤰᤁᤠᤱ ᤕᤥ᤺ᤱ ᤗᤧᤵᤔᤏᤠᤛᤠᤱ ᤅᤠᤎᤡᤰᤁᤠᤱ ᤔᤧᤕᤠᤱᤄᤢᤶᤒᤧᤴᤗᤥ. ᤜᤧᤰᤁᤣᤛᤠᤱ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣ ᤗᤧᤵᤋᤢᤱᤛᤠ᤹ᤖᤢᤱᤗᤥ॥”

⁶ ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤜᤧᤰᤁᤣ ᤕᤥ᤺ᤱᤅᤡᤴ ᤗᤧᤵᤋᤢᤸᤗᤧ ᤕᤖᤡᤰ ᤅᤠᤜᤠ᤹ ᤔᤧᤎᤩᤧᤀᤠᤱ ᤕᤥ᤺ᤱᤅᤡᤴᤏᤣ ᤋᤧ᤺ᤱᤔᤠ ᤜᤣ᤺ᤰᤋᤧᤖᤥ॥

⁷ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤘᤣ᤹ ᤂᤢᤏᤡ᤹ ᤋᤣ᤺ᤱᤈᤢᤶᤜᤠ᤹ ᤘᤣ᤹ ᤂ᤺ᤱᤒᤣᤴ ᤑᤧᤳᤋᤧᤶᤔᤧ᤹ᤀᤠᤱ ᤀᤠᤓᤠ᤹ᤖᤧᤶᤔᤧ᤹ᤀᤥ ᤗ᤹ᤖᤡᤰ ᤜᤢᤰᤆᤠ᤺ᤸᤁᤡ᤺ᤸᤗᤧ ᤔᤧᤀᤢ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤓᤧᤖᤧᤀᤠᤱ ᤏᤧᤵᤔᤠᤱ ᤂ᤺ᤱᤒᤣᤜᤠ᤹ ᤅᤠ᤺ᤸᤗᤧ ᤋᤡᤶᤛᤧᤀᤠᤱ ᤏᤡ᤺ᤶᤔᤠ ᤀᤡ᤺ᤳᤋᤧ॥

⁸ ᤛᤡᤔᤥᤏ ᤐᤋᤪᤢᤛᤖᤧ ᤁᤴ ᤏᤡᤛᤢᤀᤠᤱ ᤕᤧᤛᤢᤖᤧ ᤁᤢᤍᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ᤃ ᤛᤠ᤹ᤖᤡᤰ ᤗᤠᤕᤥᤒᤠ ᤔᤏᤠᤀᤠᤖᤥ. ᤂᤧᤏᤧ᤹ᤏᤢ ᤘᤠ᤹ᤔᤠ ᤔᤧᤗᤠ᤹ᤀᤠᤴᤗᤥ. ᤗᤧᤖᤠᤱ ᤌᤩᤠᤱᤅᤧ᤹ᤀᤥ॥”

⁹ ᤌᤣᤀᤠᤱᤓᤧᤸᤗᤧ ᤛᤡᤔᤥᤏ ᤏᤢ ᤁᤢᤴᤈᤢᤶᤜᤠ᤹ᤖᤧ ᤔᤧᤎᤠᤛᤢᤛᤡᤒᤠ ᤅᤠᤜᤠ᤹ ᤔᤧᤀᤡ᤺ᤳᤋᤢᤀᤠᤱ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥

¹⁰ ᤛᤡᤔᤥᤏᤖᤧ ᤁᤢᤴᤈᤢᤶ ᤈᤒ᤻ᤍᤡᤕᤠᤖᤧ ᤁᤢᤛ᤻ᤛᤠᤜᤠ᤹ ᤕᤠᤁᤢᤒ ᤏᤢ ᤕᤢᤜᤢᤴᤏᤠᤛᤡᤖᤧᤀᤠᤱ ᤂᤢᤴᤇᤡ᤹ ᤏᤡᤱᤘᤠ᤹ ᤔᤕᤧ॥ ᤕᤧᤛᤢᤖᤧ ᤛᤡᤔᤥᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹. ᤅᤠ ᤁᤧᤍᤧᤶᤛᤢᤒᤠ ᤜᤧᤰᤁᤣᤀᤣ ᤀᤠᤸᤗᤀᤠᤱᤎᤥ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤔᤏᤠ ᤁᤧᤍᤧᤶᤒᤠ ᤁᤧᤍᤠ᤺ᤵᤐᤠ ᤁᤧᤒᤥᤱᤗᤥ॥”

¹¹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂ᤺ᤱᤒᤣᤜᤠ᤹ ᤁᤢᤕᤠᤀᤥ ᤔᤧᤍᤣ᤹ᤖᤢᤛᤡ. ᤜᤧᤰᤁᤩᤠᤱ ᤁᤧᤖᤧᤰ ᤔᤧᤗᤧᤖᤢ ᤔᤧᤎᤀᤠᤱ ᤕᤧᤛᤢᤴ ᤔᤧᤍᤡᤶᤍᤢᤖᤥ॥

ᤕᤧᤛᤢᤖᤧ ᤗᤥᤃᤣ᤹ᤖᤧ ᤋᤖᤢᤒᤠ ᤔᤏᤠᤴ ᤘᤣ᤺ᤴᤍᤢ᤹

¹² ᤌᤡᤰᤕᤧᤴ ᤕᤧᤛᤢᤴ ᤗᤳᤇᤠ ᤐᤠᤱᤈᤢᤶᤔᤥ ᤘᤕᤧᤸᤗᤧ ᤗᤥᤃᤣ᤹ᤖᤧ ᤋᤖᤢᤀᤠᤱ ᤌᤡᤶᤛᤢᤒᤠ ᤔᤏᤠᤎᤡᤰ ᤂᤧᤵᤔᤥ ᤋᤩᤧ॥ ᤂᤧᤸᤗᤧ ᤕᤧᤛᤢᤴ ᤏᤡᤛᤢᤀᤠᤱ ᤁᤢᤍᤃᤡ ᤛᤠᤶᤒᤥᤴ ᤑᤴᤇᤡᤱᤗ ᤐᤣᤗᤡ ᤑᤠᤰᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤗᤥᤃᤣ᤹ᤗᤠᤶ ᤘᤣ᤺ᤶᤔᤠ ᤁᤧᤛᤢᤰᤁᤠᤖᤥ॥”

¹³ ᤕᤧᤛᤢᤖᤧᤀᤠᤱ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤛᤢᤛᤢᤖ ᤂᤧᤴ ᤔᤏᤠᤴ ᤀᤰᤂᤣ ᤔᤧᤳᤋᤢ. “ᤀᤡᤱᤃᤠ᤹ ᤁᤧᤏᤢ᤹ᤖ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤱᤗᤥ॥” ᤜᤧᤰᤁᤩᤠᤱ ᤂᤡᤔᤥ ᤂᤧᤴ ᤗᤥᤃᤣ᤹ᤖᤧ ᤋᤖᤢᤒᤠ ᤔᤏᤠᤴ ᤏᤢᤖᤧᤖᤥ॥

¹⁴ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤏᤠᤴ ᤔᤧᤳᤋᤢ. “ᤁᤴ ᤐᤠ᤺ᤴᤏᤡᤴ ᤜᤠ᤺ᤳᤋᤠᤱ ᤔᤧᤔᤧᤳᤋᤧᤴᤏᤧ᤹. ᤁᤖ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤧᤛᤠ᤹ᤖ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤛᤡᤱᤅᤧ᤹. ᤜᤧᤰᤁᤩᤠᤱ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶ ᤁᤢᤀᤡᤛᤡᤰ ᤔᤏᤠᤜᤠ᤹ ᤏᤢᤖᤠᤱ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤔᤠᤛᤡᤖᤧ ᤗᤠᤃᤡ ᤛᤡᤍᤢᤱᤈᤓᤠ ᤆᤥᤃᤧ᤹ᤀᤥ॥”

¹⁵ ᤁᤖᤛᤠᤱ ᤁᤴ ᤐᤠ᤺ᤴᤏᤡᤴ ᤁᤠᤰ ᤐᤡᤛᤠᤱ ᤛᤧᤖᤧᤀᤠᤱ ᤕᤧᤛᤢᤖᤧ ᤁᤢᤒᤠᤴ ᤂᤧᤶᤛᤧ ᤏᤢ ᤂᤢᤏᤡ᤹ ᤋᤢᤰᤔᤠ ᤕ᤹ᤔᤠᤗᤠᤶ ᤏᤢᤛᤡᤱᤛᤧ ᤕᤖᤡᤰ ᤔᤏᤠᤜᤠ᤹ ᤕᤧᤛᤢᤀᤥ ᤔᤧᤍᤩᤧ॥

¹⁶ ᤁᤖ ᤕᤧᤛᤢᤴ ᤀᤧᤳᤗᤧᤱ ᤔᤏᤠᤗᤢᤶᤔᤥᤗᤠᤶ ᤛᤧᤴᤇᤡᤱᤅᤠᤱ ᤋᤢᤘᤠ ᤆᤥ᤺ᤰᤛᤧ ᤀᤣ᤺ᤰᤛᤠᤍᤧᤴᤜᤠ᤹ᤀᤥ ᤐᤣᤖᤥ॥

ᤗᤱᤗᤧ᤺ᤱᤘᤠ ᤋᤢᤰᤔᤠᤸᤗᤧ ᤋᤖᤢᤒᤠ ᤔᤏᤠᤴ ᤘᤣ᤺ᤳ

¹⁷ ᤌᤡᤰᤕᤧᤴ ᤕᤧᤛᤢᤴ ᤔᤏᤠᤜᤠ᤹ ᤂᤠᤜᤢᤴ ᤜᤢ᤹ᤖᤢᤛᤡᤖ ᤕᤢᤅᤧᤸᤗᤧ ᤂᤧᤵᤔᤥ ᤃᤠᤗᤡᤗ ᤏᤢ ᤕᤜᤢᤍᤡᤕᤠᤛᤔᤠ ᤕᤖᤡᤰ ᤐᤠᤱᤈᤢᤶᤔᤥᤗᤠᤶ ᤜᤧᤰᤁᤩᤠᤱ ᤕᤖᤢᤛᤗᤧᤔᤗᤠᤶ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤀᤠᤱ ᤔᤧᤍᤩᤧᤀᤠᤱ ᤂᤠᤜᤢᤴ ᤔᤧᤄᤧᤵᤛᤢᤖ ᤔᤧᤕᤢᤅᤧ॥ ᤕᤧᤛᤢᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤘᤣ᤺ᤶᤔᤠ ᤁᤢᤔᤢᤰᤛᤠᤶᤔᤡᤴ ᤁᤳᤋᤢᤀᤠᤱ ᤘᤕᤧ.

¹⁸ ᤜᤧᤰᤁᤩᤠᤱ ᤁᤢᤓᤠ ᤔᤏᤠᤜᤠ᤹ᤖᤧ ᤗᤱᤗᤧ᤺ᤱᤘᤠ ᤔᤏᤠᤴ ᤁᤢᤏᤧᤳᤏᤠ᤺ᤴᤏᤢᤀᤣ ᤂᤧᤵᤔᤥ ᤔᤧᤍᤠᤖᤢᤀᤠᤱ ᤕᤧᤛᤢᤖᤧ ᤁᤢᤍᤃᤡ ᤋᤣ᤹ᤔᤠᤀᤠᤱ ᤏᤧᤔᤠ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤈᤥᤃᤢ.

¹⁹ ᤁᤖ ᤂᤧᤵᤔᤥ ᤕᤧᤛᤢᤴ ᤘᤕᤧᤒᤠ ᤜᤡᤶᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤛᤎᤧᤰ ᤔᤧᤎᤡᤶᤛᤢᤀᤠᤱ ᤔᤧᤕᤢᤅᤧᤒᤠᤸᤗᤧ ᤆᤥᤃᤢᤸᤗᤧ ᤛᤡᤃᤠᤱ ᤋᤣ᤹ᤔᤠ ᤔᤧᤴᤇᤢᤰᤋᤢᤴ॥ ᤜᤧᤰᤁᤣ᤺ᤸᤗᤧ ᤌᤥ ᤂᤠᤶᤒᤢᤀᤥ ᤔᤧᤗᤠᤛᤧᤀᤠᤱ ᤂᤠᤶᤒᤢᤴ ᤔᤧᤜᤴᤍᤢ॥ ᤜᤧᤰᤁᤩᤠᤱ ᤗᤱᤗᤧ᤺ᤱᤘᤠᤴ ᤁᤢᤏᤧᤳᤏᤠᤏᤢᤀᤣ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤕᤧᤛᤢᤖᤧ ᤁᤢᤍᤃᤡ ᤕᤥ ᤔᤧᤜᤥᤛᤢ ᤔᤧᤎᤠᤛᤢᤖᤥ॥

²⁰ ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤏᤡᤛᤢᤀᤠᤱ ᤂᤧᤴ ᤗᤱᤗᤧ᤺ᤱᤘᤠ ᤔᤏᤠᤴ ᤔᤧᤳᤋᤢ. “ᤆᤢᤶᤔᤣ. ᤂᤧᤏᤧ᤹ ᤁᤧᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧᤖᤥ॥”

²¹ ᤜᤧᤰᤁᤣ᤺ᤸᤗᤧ ᤂᤧᤵᤔᤥ “ᤁᤴ ᤔᤏᤠᤴ ᤜᤠ᤺ᤵᤐᤣ᥅ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱ ᤆᤧ᤹ᤕᤠᤐᤠᤴ ᤁᤧᤒᤠ᤺ᤵᤐᤠ ᤁᤴ ᤔᤏᤠᤴ ᤜᤠ᤺ᤵᤐᤣ᥅ ᤗᤠᤕᤥᤗᤠᤶ ᤗᤧᤵᤔᤡ ᤐᤡᤔᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤗᤧᤀᤠᤱ ᤔᤧᤛᤢᤰᤋᤢᤴᤗᤥ” ᤑᤠ᤹ᤀᤠᤱ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤔᤧᤀᤡ᤺ᤳᤋᤢ॥

²² ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤌᤧᤔᤠ ᤔᤧᤀᤡ᤺ᤳᤋᤢᤖ ᤔᤧᤕᤢᤱ ᤁᤧᤗ᤹ᤒᤠᤴ ᤕᤧᤛᤢᤖᤧ ᤏᤡᤛᤢᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤰᤋᤱᤒᤠ ᤌᤣᤀᤠᤱ ᤁᤧᤀᤡ᤺ᤳᤋᤢᤶᤒᤠᤒᤣ᥅

²³ ᤁᤴ ᤗᤱᤗᤧ᤺ᤱᤘᤠᤴ ‘ᤁᤧᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧ’ ᤔᤧᤵᤔᤠ ᤀᤢᤛᤢᤖᤢ ᤆᤥ᤺ᤰᤐᤡ᥅ ᤀᤡ ‘ᤐᤥᤃᤧ᤹ᤀᤠᤱ ᤁᤧᤏᤧᤳᤏᤠᤴ ᤂᤵᤛᤧ᤹ᤀᤠᤱ ᤌᤠᤛᤡᤱᤅᤧ᤹’ ᤔᤧᤵᤔᤠ ᤀᤢᤛᤢᤖᤢ ᤆᤥ᤺ᤰᤐᤡ᥅

²⁴ ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤧᤴᤇᤠᤶᤛᤠ᤺ᤸᤗᤧ ᤗᤠᤕᤥ ᤗᤧᤵᤔᤡ ᤐᤡᤔᤠ ᤕᤢᤰ ᤁᤳᤋᤢ᤹ ᤑᤠ᤹ᤀᤠᤱ ᤂᤡᤏᤡ᤹ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ.” ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤗᤱᤗᤧ᤺ᤱᤘᤠ ᤔᤏᤠᤴ ᤔᤧᤳᤋᤢ. “ᤂᤧᤏᤧ᤹ ᤐᤥᤃᤧ᤹ᤀᤠᤱ ᤁᤧᤏᤧᤳᤏᤠᤴ ᤕᤠᤱᤛᤡᤱᤅᤧ᤹ᤀᤠᤱ ᤁᤧᤜᤡᤶᤔᤥ ᤌᤠᤛᤡᤱᤅᤧ᤹॥”

²⁵ ᤂᤡᤔᤥ ᤂᤧᤴ ᤂᤢᤏᤡ᤹ ᤋᤃᤡᤀᤣ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤁᤢᤏᤧᤳᤏᤠᤴ ᤕᤠᤱᤛᤡᤱ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤢᤖ ᤁᤢᤜᤡᤶᤔᤥ ᤌᤠᤛᤡᤱᤗᤥ॥

²⁶ ᤁᤧᤖᤧᤰᤗᤧ ᤂᤢᤏᤡ᤹ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤕᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠᤱ ᤔᤧᤒᤡᤖᤢᤖ ᤔᤧᤒᤠ᤺ᤳᤋᤢ. “ᤀᤰᤋᤱᤒᤠᤃ ᤀᤠᤏᤡᤃᤣ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤡᤀᤣ ᤘᤕᤡᤃᤧᤖᤥ॥”

ᤕᤧᤛᤢᤖᤧ ᤗᤧᤒᤡᤴ ᤀᤢ᤺ᤳᤋᤢ᤹

²⁷ ᤕᤠᤱᤛᤡ ᤕᤧᤛᤢᤴ ᤂᤧᤵᤔᤥᤗᤠᤶ ᤗ᤺ᤴᤍᤧ ᤐᤣᤀᤠᤱ ᤀᤣ᤺ᤱᤕᤠᤱ ᤁᤧᤓᤥᤱᤒᤠ ᤗᤧᤒᤡ ᤔᤡᤱ ᤁᤧᤘᤠ᤺ᤵᤐᤠ ᤔᤏᤠᤴ ᤀᤣ᤺ᤱᤕᤠᤱ ᤑᤥᤱᤔᤠ ᤋᤧᤴᤏᤥ ᤕᤢᤅᤧᤒᤠ ᤏᤡᤛᤢᤀᤠᤱ ᤔᤧᤳᤋᤢ. “ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ॥”

²⁸ ᤜᤧᤰᤁᤩᤠᤱ ᤂᤧᤴᤏᤠᤱ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤁᤧᤖᤧᤰ ᤐᤠ᤺ᤴᤜᤠ᤹ ᤗᤧᤖᤢᤎᤀᤠᤱ ᤂᤢᤏᤧ᤹ᤏᤢ ᤌᤠᤛᤡᤱᤗᤥ॥

²⁹ ᤕᤠᤱᤛᤡ ᤕᤧᤛᤢᤖᤧ ᤁᤢᤗᤠᤃᤡ ᤗᤧᤒᤡ᤺ᤸᤗᤧ ᤁᤢᤜᤡᤶᤔᤥ ᤕᤶᤒᤠ ᤆᤠᤔᤢᤰ ᤌᤡᤔᤢᤰ ᤛᤧᤛᤢ॥ ᤂᤧᤵᤔᤥ ᤕᤖᤡᤰ ᤀᤣ᤺ᤱᤕᤠᤱ ᤁᤧᤓᤥᤱᤒᤠᤜᤠ᤹ ᤏᤢ ᤘᤣ᤹ ᤋᤖᤣᤒᤠᤜᤠ᤹ ᤔᤧᤘᤕᤧᤖᤥ॥

³⁰ ᤂᤧᤵᤔᤥ ᤑᤖᤡᤛᤡᤜᤠ᤹ ᤏᤢ ᤂᤢᤏᤡ᤹ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤏᤧ ᤔᤧᤎᤡᤰᤋᤧᤖ ᤀᤰᤂᤣ ᤔᤧᤔᤧᤳᤋᤢᤛᤡ. “ᤀᤣ᤺ᤱᤕᤠᤱ ᤁᤧᤓᤥᤱᤒᤠᤜᤠ᤹ ᤜᤧᤰᤁᤩᤠᤱ ᤗᤠᤕᤥᤒᤠᤜᤠ᤹ᤏᤢ ᤌᤣᤀᤠᤱ ᤂᤡᤏᤡ᤹ ᤁᤧᤍᤱᤅᤠᤛᤡᤀᤠᤱ ᤆᤠ ᤁᤧᤈᤠᤶᤒᤠᤒᤣ᥅”

³¹ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤛᤡᤍᤠ᤹ᤛᤠᤶᤒᤧᤱᤃ ᤔᤧᤴᤍᤢᤰᤔᤏᤠᤜᤠ᤹ᤖᤧ ᤗᤠᤃᤡ ᤔᤣ᤺ᤴ. ᤁᤖ ᤁᤧᤍᤢᤰᤐᤠᤜᤠ᤹ᤖᤧ ᤗᤠᤃᤡᤖᤥ॥

³² ᤜᤧᤰᤁᤣᤗ᤹ᤖᤡᤰᤁᤣ ᤀᤡᤱᤃᤠ᤹ᤀᤠᤱ ᤛᤠᤶᤕᤥᤒᤠᤜᤠ᤹ ᤔᤣ᤺ᤴ. ᤁᤖ ᤗᤠᤕᤥᤒᤠᤜᤠ᤹ ᤗᤠᤕᤥᤗᤠᤶ ᤔᤧᤜᤡᤴᤗ ᤑᤠ᤹ᤀᤠᤱ ᤀᤢ᤺ᤳᤇᤧ ᤋᤩᤠᤱᤒᤠᤖᤥ॥”

ᤆᤠᤏᤧᤳᤋᤡᤸᤗᤧ ᤁᤢᤕᤠ᤺ᤶᤒᤣᤀᤥ

³³ ᤁᤢᤓᤠᤖᤧ ᤕᤧᤛᤢᤴ ᤔᤧᤔᤧᤳᤋᤢ. “ᤕᤢᤜᤢᤴᤏᤠᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤃ ᤀᤧᤳᤗᤧᤱ ᤆᤠᤏᤧᤳᤋᤥ ᤏᤢ ᤋᤢᤘᤠ ᤆᤥ᤺ᤰᤁᤡ ᤔᤧᤕᤢᤱ. ᤑᤖᤡᤛᤡᤜᤠ᤹ᤖᤧ ᤂᤢᤏᤡ᤹ ᤜᤢ᤹ᤛᤠᤶᤒᤠᤜᤠ᤹ᤀᤠᤱ ᤜᤧᤰᤁᤣ ᤔᤧᤈᤥᤰ. ᤁᤖ ᤂᤧᤏᤧ᤹ ᤁᤧᤜᤢ᤹ᤛᤠᤶᤒᤠᤜᤠ᤹ᤃ ᤆᤠᤏᤧᤳᤋᤥᤀᤠᤱ ᤔᤧᤴᤕᤢᤱᤏᤧᤴ. ᤔᤧᤈᤖ ᤔᤧᤎᤢᤅᤢᤖ ᤔᤧᤘᤠ᤹ᤀᤡᤱᤃ᥄”

³⁴ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤣ᤺ᤰᤂᤡᤶᤛᤠᤒᤧᤴ ᤁᤢᤴᤈᤢᤶᤜᤠ᤹ᤏᤢ ᤘᤠ᤹ᤖ ᤌᤠᤖᤡᤰ ᤂᤧᤱᤜᤠ᤹ ᤆᤠᤏᤧᤳᤋᤥ ᤔᤧᤕᤢᤱᤒᤡ᥅

³⁵ ᤁᤖ ᤂᤧᤱᤜᤠ᤹ᤗᤠᤶ ᤔᤣ᤺ᤰᤂᤡᤶᤛᤠᤒᤧᤴ ᤛᤠᤰᤁᤧᤸᤗᤧᤰ ᤔᤧᤍᤧᤶᤛᤢᤀᤠᤱ ᤔᤧᤍᤣ᤹ᤖᤢᤸᤗᤧ ᤂᤧᤱᤜᤠ᤹ ᤆᤠᤏᤧᤳᤋᤥ ᤔᤧᤕᤢᤱᤗᤥ॥”

³⁶ ᤜᤧᤰᤁᤩᤠᤱ ᤕᤠᤶᤔᤥ ᤂᤢᤏᤧ᤹ ᤁᤴ ᤂᤧᤍᤠ᤹ᤀᤡᤴ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤠ᤺ᤳᤗᤧᤀᤠᤱ ᤁᤢᤛᤱ ᤆᤠᤱᤅᤡᤴ ᤌᤧ᤺ᤰᤂᤢᤀᤠᤱ ᤁᤢᤍᤪᤧᤰ ᤆᤠᤱᤅᤡᤴ ᤔᤧᤗᤧᤶᤍᤢᤴ. ᤗᤧᤶᤍᤢᤏᤧ ᤑᤠ᤹ᤃᤪ ᤁᤢᤛᤱ ᤆᤠᤱᤅᤡᤴ ᤋᤧ᤺ᤱᤒᤣ᤺ᤰᤗᤥ. ᤜᤧᤰᤁᤩᤠᤱ ᤁᤢᤛᤱ ᤆᤠᤱᤅᤡᤸᤗᤧ ᤁᤢᤍᤪᤧᤰ ᤆᤠᤱᤅᤡᤴ ᤔᤧᤄᤧᤶᤍᤢᤴᤏᤠᤱᤗᤥ॥

³⁷ ᤜᤧᤰᤁᤣᤗ᤹ᤖᤡᤰ ᤀᤠᤳᤋᤡᤸᤗᤧᤀᤠᤱ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡᤴ ᤁᤢᤍᤪᤧᤰ ᤛᤧᤜᤥᤒᤠ ᤛᤢ᤺ᤰᤘᤠᤀᤥ ᤔᤧᤕᤢᤰᤂᤢᤴ॥ ᤕᤢᤰᤂᤢᤏᤧ ᤑᤠ᤹ᤃᤪ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤁᤢᤍᤪᤧᤰ ᤛᤧᤜᤥᤒᤠ ᤛᤢᤰᤘᤠᤴ ᤌᤧ᤺ᤰᤂᤢᤍᤣ᤺ᤛᤢ᤹ᤖᤥ॥ ᤜᤧᤰᤁᤩᤠᤱ ᤌᤡᤴ ᤘᤧᤳ ᤐᤣ᤺ᤰ ᤜᤧᤰᤁᤩᤠᤱ ᤛᤧᤜᤥᤒᤠ ᤛᤢᤰᤘᤠ᤺ᤴᤏᤠᤱ ᤆᤠᤛᤥᤰᤗᤥ॥

³⁸ ᤁᤖ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡᤴ ᤁᤢᤛᤱ ᤛᤧᤜᤥᤒᤠ ᤛᤢ᤺ᤰᤘᤠᤀᤥᤀᤣ ᤕᤠᤰᤔᤠ ᤐᤥᤱᤗᤥ॥

³⁹ ᤜᤧᤰᤁᤩᤠᤱ ᤀᤠᤳᤋᤡᤸᤗᤧᤀᤠᤱ ᤁᤧᤍᤢᤶᤒᤠ ᤆᤧᤸᤗᤧᤰᤛᤣ᤹ ᤌᤡᤴ ᤌᤢᤅᤢᤀᤠᤱ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡᤴ ᤌᤢᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢᤴᤗᤥ. ᤌᤣᤀᤠᤱᤓᤧᤸᤗᤧ ᤀᤰᤂᤣ ᤐᤠ᤺ᤳᤋᤢ. ‘ᤁᤧᤍᤢᤶᤒᤠ ᤆᤧᤸᤗᤧᤰᤛᤣ᤹ ᤌᤡ᤺ᤴᤏᤣ ᤁᤢᤈᤠ ᤏᤢ᤹ᤖᤥ॥’”