ᤗᤢᤁᤠ 4 - LIFOTNT

ᤕᤧᤛᤢᤴ ᤏᤡᤱᤘᤠ᤹ ᤛᤠ᤹ᤔᤥ ᤌᤠ᤹᤺

¹ ᤕᤧᤛᤢᤴ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤢᤀᤠᤱ ᤕᤷᤍᤏ ᤕᤱᤄᤱᤗᤠᤶ ᤐᤣ. ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤀᤣ᤺ᤰᤛᤠᤍᤧᤴᤏᤥ ᤗᤠᤶᤗᤥᤛᤢᤀᤠᤱ ᤋᤣ᤹ᤖᤢᤖᤥ॥

² ᤂᤧᤵᤔᤥ ᤗᤡᤒᤥᤱ ᤕᤧᤴ (᥊᥆) ᤌᤠᤖᤡᤰ ᤘᤕᤧᤸᤗᤧ ᤔᤠᤑᤧᤴᤛᤠᤶᤔᤡᤸᤗᤧ ᤂᤢᤏᤧ᤹ ᤗᤠᤕᤥ ᤆᤥ᤺ᤰᤐᤠᤱᤔᤠ ᤑᤠ᤹ᤀᤠᤱ ᤁᤢᤏᤡᤱᤘᤠ᤹ ᤛᤠ᤹ᤖᤢ॥ ᤂᤧᤴ ᤕᤧᤶ ᤂᤠᤖᤠᤰ ᤂᤢᤏᤧ᤹ ᤌᤣᤀᤠᤱ ᤔᤧᤈᤏᤧᤴ. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤁᤢᤛᤧᤳᤗᤠ᤺ᤰᤋᤧ॥

³ ᤂᤧᤒᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤛᤠᤏᤧ ᤑᤠ᤹ᤃᤪ ᤁᤴ ᤗᤢᤱᤅᤡᤴ ᤂᤖᤧ᤺ᤱ ᤐᤥ᤺ᤰᤂᤧ᤹ ᤑᤠ᤹ᤀᤠᤱ ᤔᤧᤳᤋᤧ᤹॥”

⁴ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤜᤧᤰᤁᤣ ᤔᤧᤈᤥᤰᤁᤠᤴ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤔᤥᤛᤠᤖᤧ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤀᤠᤱ ᤐᤳ. ‘ᤔᤧᤴᤇᤠᤶ ᤕᤠᤵᤔᤡ᤺ᤱᤃ ᤁᤢᤈᤠ᤺ᤸᤗᤧᤖᤰ ᤔᤧᤜᤡᤱᤏᤧᤴ॥’”

⁵ ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤂᤢᤏᤧ᤹ ᤌᤠ᤺ᤱ ᤁᤥ᤺ᤰᤔᤠᤸᤗᤧ ᤁᤢᤛᤶᤔᤥ ᤋᤣ᤹ᤖᤢᤀᤠᤱ ᤔᤡᤰᤆᤡᤖᤠᤵᤐᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤜᤠᤱᤈᤢᤶᤜᤠ᤹ ᤀᤥᤛᤣ᤺ᤴᤎᤠᤰᤋᤢᤀᤠᤱ

⁶ ᤔᤧᤳᤋᤢ. “ᤁᤴ ᤕᤠᤱᤛᤠᤁᤢᤴᤎᤣᤜᤠ᤹ ᤏᤢ ᤁᤧᤖᤧᤰ ᤕᤢᤰᤜᤠ᤹ ᤀᤡᤱᤃᤠ᤹ ᤐᤡᤔᤠ ᤛᤢᤰᤏᤧ᤹ᤖᤥ. ᤌᤣᤀᤠᤱᤓᤧᤸᤗᤧ ᤁᤴ ᤛᤶᤍᤠᤱ ᤕᤢᤰ ᤂᤥᤛᤢᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤀᤠᤛᤡᤖᤠ᤹ ᤁᤧᤎᤠᤱᤒᤧᤴ ᤀᤠᤳᤋᤡᤴᤇᤠᤱ ᤐᤡᤔᤠ ᤛᤢᤰᤋᤢᤱᤗᤥ॥

⁷ ᤂᤧᤏᤧ᤹ ᤛᤠᤶᤒᤥᤴ ᤁᤧᤓᤴᤇᤡᤱᤅᤠᤱ ᤛᤧᤘᤠ ᤁᤧᤔᤧᤳᤋᤠᤏᤧ ᤑᤠ᤹ᤃᤪ ᤁᤧᤖᤧᤰ ᤂᤧᤏᤧ᤹ᤀᤡᤴ ᤐᤥᤱᤗᤥ॥”

⁸ ᤕᤧᤛᤢᤖᤧ ᤂᤢᤏᤧ᤹ ᤔᤧᤳᤋᤢ. “ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. ‘ᤂᤧᤏᤧ᤹ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤛᤧᤘᤠ ᤆᤥᤃᤧ᤹ ᤜᤧᤰᤁᤩᤠᤱ ᤂᤢᤏᤧ᤹ᤀᤡᤴᤗᤰ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥᤃᤧ᤹ᤀᤥ॥’”

⁹ ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤂᤢᤏᤧ᤹ ᤕᤖᤢᤛᤗᤧᤶᤔᤥ ᤋᤣ᤹ᤖᤢᤀᤠᤱ ᤔᤠᤱᤜᤡᤶᤔᤥᤒᤠ ᤁᤠᤰᤏᤢ᤺ᤸᤗᤧ ᤁᤣ᤺ᤶᤒᤠ ᤆᤶᤈᤶᤒᤠ ᤋᤧᤴᤏᤥ ᤕᤧᤵᤛᤢᤀᤠᤱ ᤔᤧᤳᤋᤢ. “ᤂᤧᤏᤧ᤹ ᤛᤧᤰᤂᤠᤀᤣ ᤏᤡᤱᤘᤠ᤹ᤑᤢᤛᤠᤏᤧ ᤑᤠ᤹ᤃᤪ. ᤁᤵᤔᤥᤗᤠᤶ ᤕᤥ ᤐᤡᤴᤍᤧ ᤌᤩᤧ᤹.

¹⁰ ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤶᤒᤪᤠᤱ ᤁᤧᤶᤔᤧᤳᤗᤥ॥’

¹¹ ᤜᤧᤰᤁᤩᤠᤱ ‘ᤂᤧᤱᤜᤠ᤹ᤖᤧ ᤂᤧᤏᤧ᤹ ᤂᤢᤏᤡ᤹ ᤜᤢᤰᤁᤥ ᤁᤧᤶᤍᤠ᤺ᤰᤁᤠᤱ ᤂᤧᤏᤧ᤹ ᤁᤧᤗᤠᤱᤅᤡᤴ ᤗᤢᤱᤅᤥ ᤔᤧᤎᤠᤶᤛᤡᤱᤅᤡᤴᤗᤥ॥’”

¹² ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤁᤖ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. ‘ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤔᤧᤛᤠ᤹ᤖᤧᤴᤏᤧ᤹ᤀᤥ॥’”

¹³ ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤏᤡᤱᤘᤠ᤹ ᤛᤠ᤹ᤖᤢ ᤛᤢᤖᤢᤀᤠᤱ ᤛᤵᤑᤠᤖᤧ ᤗᤠᤃᤡ ᤕᤠᤶᤔᤥ ᤛᤢᤕᤧᤶ ᤔᤧᤱᤄᤥᤀᤣ ᤌᤠᤖᤡᤰ ᤂᤢᤏᤧ᤹ ᤗᤧᤖᤢᤎᤀᤠᤱ ᤐᤣᤖᤥ॥

¹⁴ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤁᤢᤎᤡᤶ ᤐᤥ᤺ᤰᤂᤧᤀᤠᤱ ᤕᤧᤛᤢᤴ ᤃᤠᤗᤡᤗ ᤌᤢᤶᤔᤥ ᤏᤢ᤺ᤰᤂᤧ॥ ᤂᤢᤏᤧ᤹ ᤂᤧᤵᤔᤥ ᤋᤩᤧᤒᤠ ᤀᤡᤱᤄᤱᤅᤡᤴ ᤂᤡᤖᤡᤒᤠ ᤁᤠᤰ ᤗᤠᤈᤣ᤹ᤀᤥ ᤛᤧᤖᤧᤖᤥ॥

¹⁵ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤌᤢᤶᤔᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤜᤠ᤹ᤀᤥ ᤐᤣᤖ ᤜᤢ᤹ᤖᤢᤛᤡᤸᤗᤧ ᤁᤧᤖᤧᤰᤗᤧ ᤁᤢᤏᤠᤖᤠ ᤔᤧᤓᤥᤛᤢᤖᤥ॥

ᤏᤠᤛᤖᤋᤀᤥ ᤕᤧᤛᤢᤴ ᤔᤧᤏᤠ᤹ᤖᤢ

¹⁶ ᤜᤧᤰᤁᤩᤠᤱ ᤕᤧᤛᤢᤴ ᤐᤥᤖᤧᤀᤠᤱ ᤌᤠᤱᤒᤧᤴ ᤁᤧᤖᤧᤒᤠ ᤏᤠᤛᤖᤋ ᤐᤠᤱᤈᤢᤶᤔᤥ ᤋᤩᤧ॥ ᤂᤢᤏᤧ᤹ ᤁᤢᤕᤧᤵᤗᤧᤰ ᤁᤢᤀᤡᤛᤡᤰ ᤏᤠ᤺ᤶᤛᤡᤱ ᤕᤧᤴᤏᤥ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤀᤠᤱ ᤛᤠᤶᤕᤥᤛᤠᤵᤗᤠᤴ ᤏᤡ᤺ᤵᤔᤠ ᤑᤠ᤹ᤀᤠᤱ ᤕᤧᤶᤛᤡᤱ॥

¹⁷ ᤂᤧᤵᤔᤥ ᤁᤧᤘᤠ᤹ᤒᤠ ᤛᤠᤶᤕᤥᤛᤠᤵᤗᤠ ᤁᤧᤃᤵᤐᤠᤜᤠ᤹ᤖᤧ ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤛᤠᤵᤋᤢᤒᤠ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤁᤢᤃᤡᤳᤏᤠᤴ ᤔᤧᤒᤡᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤑᤠ᤺ᤰᤂᤢᤀᤠᤱ ᤀᤰᤂᤣᤗ᤹ᤖᤡᤰ ᤁᤧᤒᤵᤐᤧᤴ ᤂᤥᤛᤢᤀᤠᤱ ᤏᤡᤖᤢ—

^18-19 “ᤍᤠᤱᤒᤠᤸᤗᤧ ᤁᤢᤛᤣᤛᤣ ᤕᤠᤶᤛᤠᤶᤔᤡᤴ ᤀᤡᤱᤃᤠ᤹ ᤀᤠᤛᤶᤍᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤕᤠᤱᤃᤧᤛᤠ᤹ᤒᤠᤜᤠ᤹ ᤛᤢᤏᤠᤀᤡᤱ ᤀᤡᤱᤓᤴ ᤆᤥ᤺ᤰᤛᤧ ᤔᤠᤱᤎᤥ᤺ᤰᤏᤠ ᤐᤡᤖᤠᤱᤅᤠᤱ ᤘᤠ᤹ᤀᤠᤖᤥ॥ ᤂᤢᤏᤧ᤹ ᤛᤠᤰᤐᤠ ᤁᤧᤎᤠᤒᤠᤜᤠ᤹ ᤆᤥ᤺ᤰᤕᤢᤶᤓᤥᤖᤧᤴ ᤀᤡᤱᤓᤴ ᤆᤥ᤺ᤰᤛᤧ. ᤔᤡᤰᤑ᤺ᤶᤒᤠᤜᤠ᤹ᤖᤧ ᤂᤢᤏᤡ᤹ ᤔᤡᤰᤛᤠᤴ ᤘᤣ᤺ᤶᤔᤠ ᤀᤡᤱᤓᤴ ᤆᤥ᤺ᤰᤛᤧ. ᤜᤧᤰᤁᤩᤠᤱ ᤀᤣᤵᤗᤧᤰᤂᤧᤀᤥ ᤁᤧᤘᤠ᤹ᤒᤠᤜᤠ᤹ ᤆᤥ᤺ᤰᤕᤢᤶᤓᤥ ᤐᤡᤛᤧ ᤏᤢ ᤍᤠᤱᤒᤠᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤋᤱᤒᤣᤸᤗᤧᤴ ᤀᤡᤱᤓᤴ ᤆᤥ᤺ᤰᤛᤧ ᤀᤡᤱᤃᤠ᤹ ᤐᤠᤱᤄᤠᤱᤅᤠᤱ ᤘᤠ᤹ᤀᤠᤖᤥ॥”

²⁰ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤛᤠᤶᤕᤥᤛᤠᤵᤗᤠᤴ ᤛᤢᤒᤢᤀᤠᤱ ᤂᤧᤵᤔᤥ ᤁᤧᤕᤧᤵᤐᤧᤴ ᤐᤡᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤕᤢᤱᤛᤡᤱ॥ ᤜᤧᤰᤁᤩᤠᤱ ᤁᤧᤖᤧᤰᤗᤧ ᤂᤢᤏᤧ᤹ ᤀᤥᤔᤧᤔᤧᤳᤋᤢᤸᤗᤧ

²¹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤠᤀᤡᤴ ᤁᤴ ᤁᤧᤄᤧᤵᤛᤢᤶᤔᤡᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤁᤧᤒᤵᤐᤠ ᤐᤠ᤺ᤴᤜᤠ᤹ ᤂᤡᤏᤡ᤹ᤀᤥ ᤁᤧᤖᤧᤀᤠᤱ ᤘᤠ᤹ᤖᤥ॥”

²² ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤢᤄᤧᤶ ᤁᤧᤏᤢ᤹ᤒᤠ ᤐᤠ᤺ᤴᤜᤠ᤹ ᤔᤧᤄᤧᤵᤛᤢᤀᤠᤱ ᤁᤧᤖᤧᤰᤗᤧ ᤁᤢᤏᤠᤖᤠ ᤔᤧᤓᤥᤛᤢ. ᤜᤧᤰᤁᤩᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤰᤂᤣ ᤔᤧᤔᤧᤳᤇᤡᤱ. “ᤁᤱᤃ ᤕᤢᤛᤢᤑᤖᤧ ᤁᤢᤛ᤻ᤛᤠ ᤔᤣ᤺ᤶᤒᤡ᥅”

²³ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤡᤛ᤻ᤛᤣᤛᤠᤱ ᤂᤡᤏᤡ᤹ ᤁᤴ ᤂᤧᤍᤠ᤹ᤀᤡᤴ ᤀᤡᤱᤃᤠ᤹ ᤀᤠᤔᤧᤴᤏᤥ ᤁᤧᤒᤠ᤺ᤳᤋᤢᤶᤒᤡᤗᤠ. ‘ᤛᤡᤍᤠ᤹ᤛᤠᤶᤒᤣ. ᤋᤃᤡ ᤂᤧᤏᤧ᤹ ᤏᤢᤛᤡᤱᤅᤧ᤹ᤀᤥ॥’ ᤜᤧᤰᤁᤣᤗ᤹ᤖᤡᤰ ᤁᤐᤷᤏᤜᤢᤶᤔᤥ ᤁᤧᤈᤥᤃᤢᤒᤠ ᤀᤠᤏᤡᤃᤣ ᤂᤧᤵᤛᤢᤶᤒᤧᤒᤠ ᤜᤧᤰᤁᤣᤀᤣ ᤁᤴ ᤁᤧᤒᤠᤱᤈᤢᤶᤔᤥᤀᤠᤱ ᤆᤥᤃᤧ᤹ᤀᤥ॥

²⁴ ᤁᤖ ᤂᤢᤏᤧ᤹ ᤔᤧᤳᤋᤢᤛᤡ. ᤀᤡᤱᤃᤠ᤹ ᤔᤧᤳᤏᤡᤱ. ᤀᤠᤳᤋᤡᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴᤏᤠᤱ ᤁᤢᤒᤠᤱᤓᤣ᤹ᤛᤠᤒᤠᤜᤠ᤹ᤖᤧ ᤔᤧᤴᤍᤠ᤺ᤰᤋᤢᤴᤗᤥ॥

²⁵ ᤛᤧᤰᤂᤠᤀᤣ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤸᤗᤧ ᤁᤢᤕᤧᤶᤔᤥ ᤀᤡᤛᤪᤠᤀᤡᤗᤀᤥ ᤕᤖᤡᤰ ᤔᤣᤔᤣᤍᤢᤔᤠᤜᤠ᤹ ᤔᤧᤘᤕᤧ॥ ᤂᤧᤴ ᤕᤧᤶᤔᤥ ᤋᤠᤱᤛᤠᤰᤐᤧᤴ ᤋᤱᤒᤣ ᤛᤢᤶᤛᤡᤀᤠᤱ ᤁᤢᤓᤪᤧ᤺ᤱ ᤌᤠᤖᤡᤰ ᤛᤢᤵᤛᤡᤱᤅᤠᤱ ᤐᤠᤱᤃᤧᤴᤍᤡᤱ ᤘᤠᤜᤡ᤺ᤳ ᤔᤧᤎᤩᤧᤏᤧᤴᤏᤠᤱ ᤂᤧᤴ ᤗᤠᤈᤣ᤹ᤀᤥ ᤁᤡᤵᤔᤠ ᤁᤧᤄᤢᤒᤠ ᤕᤶᤒᤠ ᤛᤠᤰ ᤐᤥᤃᤧᤖᤥ॥

²⁶ ᤂᤧᤵᤔᤥ ᤕᤖᤡᤰ ᤔᤣᤔᤣᤍᤢᤔᤠᤜᤠ᤹ ᤔᤧᤘᤕᤧᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤣᤗᤡᤕᤠᤴ ᤀᤡᤛᤪᤠᤀᤡᤗᤀᤥ ᤔᤣ᤺ᤴ. ᤁᤖ ᤛᤡᤍᤥᤏ ᤌᤢᤶᤔᤥᤒᤠ ᤛᤠᤖᤑᤋ ᤐᤠᤱᤈᤢᤶᤔᤥᤒᤠ ᤔᤣᤔᤣᤍᤢᤔᤠᤸᤗᤥᤖᤰ ᤐᤠᤱᤄᤢᤖᤥ॥

²⁷ ᤜᤧᤰᤁᤣᤗ᤹ᤖᤡᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤣᤗᤡᤛᤠ᤺ᤸᤗᤧᤀᤠᤱ ᤀᤡᤛᤪᤠᤀᤡᤗᤀᤥ ᤕᤖᤡᤰ ᤗᤥᤃᤣ᤹ᤖᤧ ᤋᤖᤢᤛᤡᤒᤠ ᤔᤏᤠᤜᤠ᤹ ᤔᤧᤘᤕᤧᤛᤠᤱ ᤀᤠᤳᤋᤡᤴᤏᤠᤱ ᤔᤧᤏᤢᤛᤢᤴ. ᤁᤖ ᤛᤡᤖᤡᤕᤠᤛᤔᤠ ᤏᤠᤔᤠᤏᤧᤴᤗᤰ ᤏᤢᤛᤢᤖᤥ॥”

²⁸ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤆᤠ᤹ᤖᤡᤰ ᤂᤢᤏᤡ᤹ ᤛᤡᤰᤐᤥᤃᤧ॥

²⁹ ᤂᤧᤱᤜᤠ᤹ ᤔᤧᤒᤥᤃᤧᤀᤠᤱ ᤕᤧᤛᤢᤴ ᤔᤧᤍᤧᤶᤛᤢᤀᤠᤱ ᤐᤠᤱᤈᤢᤶ ᤗᤠ᤺ᤰᤁᤠᤳ ᤔᤧᤀᤢ᤺ᤰᤂᤢ ᤔᤧᤗ᤺ᤳᤋᤢ॥ ᤜᤧᤰᤁᤩᤠᤱ ᤐᤠᤱᤈᤢᤶᤔᤡᤸᤗᤧ ᤁᤢᤒᤣᤛᤠᤱᤒᤠ ᤕᤠᤰᤁᤣ᤺ᤰᤁᤥᤗᤠᤶ ᤗᤠᤵᤑᤢᤔᤠ ᤌᤠ᤺ᤔᤠ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤔᤧᤍᤣ᤹ᤖᤢ.

³⁰ ᤁᤖ ᤔᤏᤠᤗᤢᤶᤔᤥᤗᤠᤶ ᤂᤢᤏᤧ᤹ ᤑᤡ᤺ᤴᤇᤡᤱᤅᤠᤱ ᤗ᤺ᤴᤍᤧ ᤐᤣᤖᤥ॥

ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠᤴ

³¹ ᤜᤧᤰᤁᤩᤠᤱ ᤕᤧᤛᤢᤴ ᤃᤠᤗᤡᤗ ᤌᤢᤶᤔᤥᤒᤠ ᤁᤐᤷᤏᤜᤢᤔ ᤐᤠᤱᤈᤢᤶᤔᤥ ᤐᤣᤀᤠᤱ ᤏᤠ᤺ᤶᤛᤡᤱ ᤕᤧᤴᤏᤥ ᤂᤧᤵᤔᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤔᤏᤠᤜᤠ᤹ ᤜᤢ᤹ᤔᤠ ᤜᤣ᤺ᤰᤋᤢᤛᤡ॥

³² ᤂᤢᤏᤧ᤹ ᤁᤢᤏᤡᤛᤠᤶᤔᤡᤴ ᤔᤧᤄᤧᤵᤛᤢᤀᤠᤱ ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ. ᤌᤣᤀᤠᤱᤓᤧᤸᤗᤧ ᤕᤧᤛᤢᤴ ᤕᤢᤰ ᤁᤧᤃᤵᤐᤠ ᤁᤢᤀᤡᤛᤡᤰ ᤐᤠᤖᤧᤖᤥ॥

³³ ᤂᤧᤵᤔᤥ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠᤎᤡᤰ ᤘᤕᤧ॥ ᤂᤧᤸᤗᤧ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤀᤰᤂᤣ ᤐᤠ᤺ᤳᤋᤢ.

³⁴ “ᤏᤠᤛᤖᤋᤒᤠ ᤕᤧᤛᤢᤀᤣ. ᤂᤧᤏᤧ᤹ ᤀᤠᤏᤡᤃᤧᤏᤢ ᤌᤣ ᤁᤧᤃᤥ᤺ᤳᤋᤢᤒᤠᤒᤣ᥅ ᤂᤧᤏᤧ᤹ ᤀᤠᤏᤡᤃᤣ ᤔᤧᤱᤛᤧ ᤁᤧᤍᤩᤧᤒᤠᤒᤡ᥅ ᤂᤧᤏᤧ᤹ ᤜᤠ᤺ᤳᤏᤧᤒᤣ ᤑᤠ᤹ᤀᤠᤱ ᤏᤡᤛᤢᤶᤒᤧᤖᤥ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤠᤱᤄᤧᤒᤠ ᤛᤣᤛᤣ ᤁᤢᤔᤏᤠᤏᤧᤖᤥ॥”

³⁵ ᤕᤧᤛᤢᤖᤧ ᤂᤧᤴ ᤑᤧᤴᤛᤠᤶᤔᤡᤴ ᤑᤧ᤺ᤰᤋᤢ. “ᤛᤫᤠ᤺ᤳ᥄ ᤂᤧᤴ ᤔᤏᤠᤴ ᤗᤧᤖᤧ᤹ᤀᤠᤱ ᤐᤣᤃᤧ᤹᥄” ᤜᤧᤰᤁᤩᤠᤱ ᤂᤧᤴ ᤑᤧᤴᤛᤠᤶᤔᤡᤸᤗᤧ ᤂᤧᤴ ᤔᤏᤠᤴ ᤂᤢᤏᤡ᤹ ᤋᤃᤡᤀᤣ ᤐᤡᤷᤎᤠᤵ ᤌᤠᤵᤛᤢᤀᤠᤱ ᤔᤧᤱᤄᤠ᤺ᤴᤏᤣ ᤗᤧᤖᤢᤎᤖᤥ॥

³⁶ ᤜᤧᤰᤁᤩᤠᤱ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. “ᤁᤱᤃ ᤀᤠᤰᤋᤱᤒᤠ ᤏᤡᤛᤠᤶᤒᤣ᥅ ᤁᤴ ᤔᤏᤠ᤺ᤸᤗᤧᤃ ᤕᤢᤰ ᤏᤢ ᤔᤢᤰᤛᤠᤶᤔᤡᤸᤗᤧ ᤑᤧᤴᤛᤠᤶᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡᤸᤗᤧ ᤔᤧᤗᤴ ᤔᤧᤒᤣ᤺ᤰᤗᤥ᥄”

³⁷ ᤁᤴ ᤀᤡᤱᤄᤱᤅᤡᤴ ᤂᤧᤴ ᤌᤢᤶᤔᤥ ᤁᤧᤖᤧᤰ ᤐᤡᤛᤠᤱ ᤛᤧᤖᤧᤖᤥ॥

ᤕᤧᤛᤢᤖᤧ ᤕᤖᤡᤰ ᤔᤏᤠᤜᤠ᤹ ᤘᤣ᤺ᤴᤍᤢᤛᤡ᤹

³⁸ ᤜᤧᤰᤁᤩᤠᤱ ᤕᤧᤛᤢᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤐᤣ॥ ᤛᤡᤔᤥᤏᤖᤧ ᤁᤢᤴᤏᤥ᤺ᤵᤔᤧᤴ ᤋᤢᤱᤅᤡᤸᤗᤧ ᤋᤖᤢᤀᤠᤱ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤧᤸᤗᤧ ᤁᤢᤔᤧᤴᤏᤥ ᤕᤧᤛᤢᤴ ᤔᤧᤔᤧᤳᤋᤢ॥

³⁹ ᤕᤧᤛᤢᤴ ᤁᤧᤍᤢᤰᤔᤠᤸᤗᤧ ᤁᤢᤏᤧᤳᤏᤠ᤺ᤸᤗᤧ ᤁᤢᤒᤣᤛᤠᤱ ᤐᤣᤀᤠᤱ ᤂᤧᤴ ᤋᤢᤱ ᤋᤢᤰᤔᤠᤴ ᤑᤧ᤺ᤰᤋᤢ. ᤜᤧᤰᤁᤩᤠᤱ ᤂᤡᤔᤥ ᤛᤡᤔᤥᤏᤖᤧ ᤁᤢᤴᤏᤥ᤺ᤵᤔᤧᤴ ᤏᤢᤖᤧᤀᤠᤱ ᤂᤧᤱᤜᤠ᤹ ᤋᤖᤣ ᤋᤥᤛᤢᤛᤡᤖᤥ॥

⁴⁰ ᤜᤧᤰᤁᤩᤠᤱ ᤏᤠᤶᤎᤩᤧᤀᤠᤱ ᤔᤏᤠᤜᤠ᤹ᤖᤧ ᤕᤖᤡᤰ ᤐᤖᤡᤰᤐᤠ ᤋᤢᤰᤔᤠᤸᤗᤧ ᤋᤖᤢᤛᤡᤒᤠ ᤔᤏᤠᤜᤠ᤹ ᤕᤧᤛᤢᤀᤥ ᤔᤧᤍᤠᤖᤢᤛᤡ॥ ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤶᤍᤠᤱ ᤜᤢᤰ ᤏᤧᤛ᤻ᤛᤢᤒᤡᤖᤢᤛᤡᤀᤠᤱ ᤏᤢᤛᤢᤛᤡᤖᤥ॥

⁴¹ ᤜᤧᤰᤁᤩᤠᤱ ᤑᤧᤴᤛᤠᤶᤜᤠ᤹ᤃ ᤀᤰᤂᤣ ᤔᤧᤒᤠ᤺ᤳᤋᤢᤖ ᤔᤧᤗ᤺ᤴᤍᤧ ᤔᤧᤒᤣᤖᤥ. “ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤛᤠᤏᤧᤖᤥ॥” ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤑᤧ᤺ᤰᤋᤢᤛᤡᤖ ᤐᤠ᤺ᤵᤔᤠ ᤔᤧᤒᤠᤱᤄᤢᤴᤛᤡᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ ᤑᤠ᤹ᤀᤠᤱ ᤔᤧᤏᤡᤛᤢᤀᤠᤱ ᤔᤧᤘᤕᤧᤖᤥ॥

⁴² ᤜᤧᤰᤁᤩᤠᤱ ᤋᤠᤏᤠᤶᤛᤠ ᤕᤧᤛᤢᤴ ᤀᤣ᤺ᤰᤛᤠᤍᤧᤴᤏᤥ ᤐᤣ. ᤁᤖ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤀᤠᤳᤋᤥ ᤘᤠ᤹ᤒᤣ ᤑᤠ᤹ᤀᤠᤱ ᤔᤧᤃᤥ᤺ᤳᤋᤢ॥ ᤂᤢᤏᤧ᤹ ᤔᤧᤍᤢᤔᤢᤀᤠᤱ ᤂᤢᤏᤡ᤹ᤏᤢᤀᤣ ᤘᤠ᤹ᤖ ᤑᤠ᤹ᤀᤠᤱ ᤛᤠᤰᤔᤠ ᤔᤧᤃᤥ᤺ᤳᤋᤢᤖᤥ.

⁴³ ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤁᤴ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧᤴ ᤛᤢᤏᤠᤀᤡᤱᤅᤡᤴ ᤘᤣ᤹ᤛᤔᤠ ᤐᤠᤱᤈᤢᤶᤜᤠ᤹ᤀᤥᤀᤠᤱ ᤀᤡᤱᤓᤥᤔᤠᤀᤣ ᤐᤥᤱᤗᤥ॥ ᤀᤡᤱᤃᤠ᤹ᤃ ᤒᤠ ᤂᤧᤸᤗᤧ ᤗᤠᤃᤡᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤠᤱᤒᤠᤖᤥ॥”

⁴⁴ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤕᤜᤢᤍᤡᤕᤠ ᤌᤢᤶᤔᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤜᤠ᤹ᤀᤥ ᤐᤣᤀᤠᤱ ᤛᤢᤏᤠᤀᤡᤱ ᤛᤧᤛᤢᤖᤥ॥