ᤗᤢᤁᤠ 3 - LIFOTNTᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠᤖᤧ ᤁᤢᤀᤡᤱᤓᤴ ( ᤔᤳᤋᤡ ᥉:᥇-᥇᥈ ; ᤔᤷᤁᤢ ᥇:᥇-᥎ ; ᤕᤢᤜᤢ ᥇:᥇᥏-᥈᥎ ) 1 ᤀᤠᤸᤗ ᤖᤥᤔᤡ ᤐᤕᤶ ᤜᤠᤱ ᤋᤡᤒᤣᤖᤡᤕᤛᤧᤸᤗᤧ ᤜᤠᤱ ᤆᤥᤃᤢᤒᤠ ᤋᤱᤒᤣ ᤌᤡᤰ ᤅᤠ (᥇᥋) ᤁᤧᤖᤧᤀᤠᤱ ᤘᤕᤧᤸᤗᤧ ᤐᤴᤋᤡᤕᤛ ᤐᤡᤗᤠᤋᤛᤧᤴ ᤕᤜᤢᤍᤡᤕᤠᤒᤠ ᤛᤢᤜᤠᤱᤃᤧᤶᤒᤠ ᤘᤕᤧ॥ ᤂᤧᤴ ᤕᤧᤶᤔᤥ ᤜᤧᤖᤥᤍᤧᤏ ᤃᤠᤗᤡᤗᤛᤔᤠ ᤛᤢᤜᤠᤱᤃᤧᤶᤒᤠ. ᤁᤢᤴᤛᤠ᤹ ᤑᤡᤗᤡᤵᤐᤧᤴ ᤀᤡᤋᤢᤖᤡᤕᤠ ᤏᤢ ᤋᤪᤠᤁᤥᤏᤡᤋᤡᤛ ᤌᤢᤶᤔᤥᤒᤠ ᤛᤢᤜᤠᤱᤃᤧᤶᤒᤠ. ᤜᤧᤰᤁᤩᤠᤱ ᤗᤡᤛᤠᤏᤡᤕᤠᤛᤧᤴ ᤀᤣᤒᤡᤗᤣᤏᤡ ᤌᤢᤶᤔᤥᤒᤠ ᤛᤢᤜᤠᤱᤃᤧᤶᤒᤠ ᤔᤧᤘᤕᤧ. 2 ᤜᤧᤰᤁᤩᤠᤱ ᤜᤴᤏᤠᤛᤧᤴ ᤏᤢ ᤁᤤᤕᤠᤑᤠᤛᤧᤴ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤘᤕᤧᤳᤇᤡ॥ ᤂᤧᤴ ᤕᤧᤶᤔᤥ ᤀᤣ᤺ᤰᤛᤠᤍᤧᤴᤏᤥ ᤈᤁᤖᤡᤕᤠᤖᤧ ᤁᤢᤛ᤻ᤛᤠ ᤕᤢᤜᤢᤴᤏᤠ᤺ᤸᤗᤥ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤋᤩᤧᤀᤠᤱ 3 ᤂᤢᤏᤧ᤹ ᤕᤷᤍᤏ ᤕᤱᤄᤱ ᤂᤡᤖᤡᤒᤠ ᤗᤠᤈᤣ᤹ᤀᤥ ᤂᤠᤖᤠᤰ ᤗᤠᤶᤍᤡᤰ ᤆᤥᤃᤧᤖ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤠᤱ ᤒᤵᤋᤡᤛ᤻ᤔᤠ ᤐᤥ᤺ᤰᤂᤧᤶᤔᤧ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤗᤠᤕᤥᤴ ᤗᤧᤵᤔᤡ ᤁᤧᤒᤡᤖᤡ᤹ ᤗ᤹ᤖᤡᤰ ᤀᤡᤱᤓᤴ ᤆᤥᤃᤢᤖᤥ॥ 4 ᤜᤧᤰᤁᤣᤗ᤹ᤖᤡᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤁᤢᤛᤠᤵᤐᤴᤏᤥ ᤕᤢᤜᤢᤴᤏᤠᤖᤧ ᤁᤢᤕᤠ᤺ᤶᤒᤣᤀᤥ ᤛᤠᤵᤋᤧᤀᤠᤱ ᤐᤳ. “ᤂᤢᤏᤧ᤹ ᤀᤣ᤺ᤰᤛᤠᤍᤧᤴᤏᤥ ᤀᤰᤂᤣᤗ᤹ᤖᤡᤰ ᤁᤧᤀ᤺ᤰᤐᤠ ᤀᤡᤰᤗᤠᤖᤥ. ‘ᤍᤠᤱᤒᤠᤸᤗᤧ ᤁᤢᤔᤠᤖᤠᤶᤔᤡᤴ ᤕᤠᤖᤡᤵ ᤆᤥᤃᤧᤶᤔᤧ᤹ᤀᤠᤱ ᤁᤢᤗᤠᤶᤜᤠ᤹ ᤋᤥ᤺ᤴᤍᤥᤴ ᤆᤥᤃᤧᤶᤔᤧ᤹᥄ 5 ᤁᤧᤖᤧᤰ ᤏᤧᤘᤠᤗᤠᤜᤠ᤹ ᤗᤢᤵᤛᤡᤱᤗ. ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤋᤱᤅᤠᤱ ᤋᤧ᤺ᤶᤒᤣ ᤐᤥᤱᤗ ᤜᤧᤰᤁᤩᤠᤱ ᤀᤡ᤺ᤗᤠᤶᤜᤠ᤹ ᤋᤥ᤺ᤴᤇᤡᤱᤗ ᤋᤠᤵᤑᤧ᤺ᤶᤒᤠ ᤗᤠᤶᤜᤠ᤹ ᤏᤢᤒᤠ ᤐᤥᤱᤗ॥ 6 ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤛᤡᤒᤠ ᤁᤢᤛᤧᤴᤗᤵᤐᤡᤴ ᤁᤧᤖᤧᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤔᤧᤏᤡᤛᤢ᤹ᤖᤥ॥’” 7 ᤔᤏᤠᤜᤠ᤹ ᤕᤢᤜᤢᤴᤏᤠᤗᤠᤶ ᤒᤵᤋᤡᤛ᤻ᤔᤠ ᤐᤥᤱᤛᤧ ᤂᤧ᤹ᤕᤥ ᤔᤧᤍᤩᤧ॥ ᤕᤢᤜᤢᤴᤏᤠᤖᤧ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤑᤧ᤺ᤰᤋᤢᤛᤡ. “ᤀᤛᤣ᤺ᤰᤛᤠᤛᤣ. ᤂᤡᤏᤡ᤹ ᤁᤴ ᤁᤧᤍᤠᤒᤠᤖ ᤁᤧᤒᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱᤗᤠᤶ ᤂᤧᤳᤇᤡᤱᤅᤧᤶᤔᤧ᤹ ᤑᤠ᤹ᤀᤠᤱ ᤜᤠ᤺ᤳᤗᤧ ᤁᤧᤔᤧᤳᤋᤡᤒᤣ᥅ 8 ᤗᤠᤕᤥᤗᤠᤶ ᤁᤧᤜᤡᤴᤍᤡᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤍᤠᤱ ᤆᤥ᤺ᤰᤛᤧ ᤏᤢᤒᤠ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ᤀᤥ॥ ᤀᤠᤏᤡᤃᤧᤃ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠᤛᤡᤃᤧ. ᤂᤧᤸᤗᤧᤆᤥᤃᤢᤸᤗᤧ ᤂᤢᤶᤍᤡᤱᤗᤠᤶ ᤂᤧᤳᤇᤡᤱᤔᤠ ᤛᤢᤰᤋᤡᤃᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤃ ᤁᤴ ᤗᤢᤱᤜᤠ᤹ᤀᤠᤱ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ ᤆᤥ᤺ᤰᤔᤠ ᤛᤢᤰᤋᤢᤛᤡ᤹ᤖᤥ॥ 9 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤠᤛᤧᤴᤏᤡᤸᤗᤧᤴ ᤋ᤺ᤴᤍᤡᤱᤃ ᤛᤡᤱᤒᤢᤱᤜᤠ᤹ᤀᤥ ᤆᤢᤰᤋᤧᤆᤢᤖᤧᤀᤠᤱ ᤘᤠ᤹ᤖᤥ॥ ᤏᤢᤒᤠ ᤛᤡᤱᤛᤣ᤹ ᤔᤧᤴᤎᤥ᤺ᤰᤔᤏᤠᤒᤠ ᤁᤧᤖᤧᤰ ᤛᤡᤱᤒᤢᤱᤜᤠ᤹ ᤔᤧᤍᤠᤅᤢᤀᤠᤱ ᤔᤡᤀᤥ ᤗᤠᤵᤔᤧᤍᤣᤛᤢ᤹ᤖᤥ॥” 10 ᤔᤏᤠᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤜᤧᤰᤁᤣᤃᤪ ᤀᤠᤸᤗᤥ ᤀᤠᤏᤡᤃᤣ ᤌᤣ ᤆᤥᤃᤢᤶᤒᤧᤒᤠᤒᤣ᥅” 11 ᤕᤢᤜᤢᤴᤏᤠᤖᤧ ᤏᤥᤃᤵ ᤐᤡᤖᤢᤛᤡ. “ᤜᤠ᤺ᤳᤗᤧ ᤏᤧᤳᤇᤡ ᤆᤠᤱ ᤁᤳᤋᤢ᤹. ᤂᤧᤸᤗᤧ ᤔᤧᤱᤃᤵᤔᤏᤠᤒᤠᤴ ᤗᤳᤇᤠ ᤐᤡᤖᤢᤖ. ᤜᤧᤰᤁᤩᤠᤱ ᤜᤠ᤺ᤳᤗᤧ ᤆᤠᤔᤠ ᤁᤳᤋᤢ᤹. ᤂᤧᤸᤗᤧ ᤆᤠᤔᤠ ᤔᤧᤱᤃᤵᤔᤏᤠᤒᤠᤴᤏᤢ ᤜᤠᤛᤢ ᤆᤖ॥” 12 ᤜᤧᤰᤁᤩᤠᤱ ᤀᤣ᤺ᤱᤕᤠᤱ ᤁᤧᤓᤥᤱᤒᤠᤜᤠ᤹ᤀᤠᤱ ᤂᤧ᤹ᤕᤥ ᤒᤵᤋᤡᤛ᤻ᤔᤠ ᤐᤥᤱᤛᤧ ᤔᤧᤍᤩᤧᤀᤠᤱ ᤕᤢᤜᤢᤴᤏᤠᤴ ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤀᤠᤸᤗ ᤀᤠᤏᤡᤃᤧᤃ ᤌᤣ ᤆᤥᤃᤢᤶᤒᤧᤒᤠᤒᤣ᥅” 13 ᤕᤢᤜᤢᤴᤏᤠᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤖᤥᤔᤡ ᤌᤡᤶᤔᤥ ᤛᤠᤵᤋᤧᤀᤠᤱ ᤁᤧᤒᤵᤐᤠᤀᤠᤱᤎᤥ ᤔᤏᤠᤜᤠ᤹ᤗᤠᤶ ᤕᤖᤡᤰ ᤀᤣ᤺ᤱᤕᤠᤱ ᤔᤧᤓᤥᤰᤂᤧᤶᤔᤡᤴᤏᤧ᤹॥” 14 ᤜᤧᤰᤁᤩᤠᤱ ᤌᤰᤛᤢᤒᤠᤜᤠ᤹ᤀᤠᤱ ᤂᤧ᤹ᤕᤥ ᤔᤧᤍᤩᤧᤀᤠᤱ “ᤀᤠᤏᤡᤃᤧᤃ᥅” ᤑᤠ᤹ᤀᤠᤱ ᤛᤣ᤺ᤴᤔᤧᤍᤥᤛᤢᤖᤥ॥ ᤂᤧᤱᤜᤠ᤹ ᤕᤢᤜᤢᤴᤏᤠᤖᤧ ᤀᤰᤂᤣ ᤔᤧᤳᤋᤢᤛᤡ. “ᤂᤡᤏᤡ᤹ᤀᤠᤱ ᤘᤣ᤹ ᤔᤏᤠᤜᤠ᤹ᤗᤠᤶ ᤛᤠᤰᤁᤧᤸᤗᤧᤰ ᤏᤢ ᤀᤡᤱᤗᤧᤰᤐᤠ ᤀᤠᤵᤋᤡᤰᤗᤠᤶᤒᤠ ᤕᤠᤱ ᤔᤧᤓᤥᤰᤂᤧᤶᤔᤡᤴᤏᤧ᤹. ᤁᤖ ᤁᤧᤄᤥᤛᤢᤶᤒᤠ ᤑᤠ᤹ᤕᤠᤱᤅᤥ ᤂᤡᤏᤡ᤹ ᤏᤡᤱᤘᤠ᤹ ᤋᤠᤛᤧᤶᤔᤧ᤹॥” 15 ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤋᤠ ᤗ᤹ᤖᤡᤰ ᤔᤧᤜᤠᤱᤄᤢᤖ ᤏᤡᤱᤛᤠᤱ ᤔᤧᤈᤥᤃᤢᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤱᤃ ᤒᤠ ᤁᤴ ᤔᤣ᤺ᤶᤒᤡ ᤑᤠ᤹ᤀᤠᤱ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤔᤧᤔᤧᤳᤇᤡᤱᤗᤥ॥ 16 ᤕᤢᤜᤢᤴᤏᤠᤖᤧ ᤂᤧᤱᤜᤠ᤹ ᤁᤧᤖᤧᤰ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ᤃ ᤂᤡᤏᤡ᤹ ᤆᤫᤠ᤺ᤳᤋᤡᤸᤗᤧ ᤒᤵᤋᤡᤛ᤻ᤔᤠ ᤐᤡᤏᤡᤱ. ᤁᤖ ᤀᤡᤱᤃᤠ᤹ᤏᤢ᤺ᤸᤗᤧ ᤔᤢᤰᤛᤠᤶᤛᤠᤒᤠᤎᤡᤰ ᤋᤠᤖ ᤐᤳ॥ ᤀᤡᤱᤃᤠ᤹ᤃ ᤕᤥᤰ ᤁᤢᤀᤡᤛᤡᤰ ᤁᤢᤗᤠᤱᤛᤢᤵ ᤏᤠᤶᤜᤠ᤹ ᤑᤠ᤺ᤱᤔᤠᤀᤠᤱ ᤔᤧᤗᤠ᤹ᤀᤠᤴᤗᤥ॥ ᤂᤢᤏᤧ᤹ᤃ ᤛᤣᤛᤣᤔᤠᤱ ᤏᤢ ᤔᤡ᤺ᤸᤗᤧ ᤒᤵᤋᤡᤛ᤻ᤔᤠ ᤁᤧᤒᤡᤖᤡ᤹ᤖᤥ॥ 17 ᤁᤢᤓ᤹ᤀᤣ᤺ᤳᤋᤡᤸᤗᤧ ᤛᤡᤴ ᤀᤠ᤺ᤶᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤕᤠᤖᤡᤵ ᤘᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤋᤢᤃᤢᤖ ᤛᤢᤵᤛᤢᤀᤠᤱ ᤛᤡᤴ ᤆᤠᤎᤥ᤺ᤰᤗᤠᤀᤥ ᤆᤡᤰᤂᤢ᤹ ᤜᤧᤰᤁᤩᤠᤱ ᤁᤢᤜᤰᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤡᤔᤏᤠᤒᤠ ᤔᤡᤀᤥ ᤜᤠ᤺ᤴᤍᤢᤍᤣᤛᤢ᤹ᤖᤥ॥” 18 ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤕᤖᤡᤰ ᤐᤖᤡᤰᤗᤧᤴ ᤛᤡᤰᤁᤢᤶᤍᤡᤱ ᤂᤠᤜᤢᤴᤜᤠ᤹ ᤐᤡᤖᤢᤛᤡᤖ ᤛᤢᤏᤠᤀᤡᤱ ᤀᤡᤱᤓᤴ ᤛᤧᤛᤢᤖᤥ॥ 19 ᤁᤖ ᤕᤢᤜᤢᤴᤏᤠᤖᤧ ᤛᤢᤜᤠᤱᤃᤧᤶᤒᤠ ᤜᤧᤖᤥᤍᤧᤏ ᤑᤧ᤺ᤰᤋᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤀᤅᤧ᤺ᤰᤔᤠ ᤜᤧᤖᤥᤍᤡᤕᤠᤛᤧᤴ ᤔᤣ᤺ᤰᤂᤡᤶ ᤔᤧᤳᤋᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤘᤣ᤹ ᤕᤖᤡᤰ ᤑᤧᤴ ᤕᤠ᤺ᤶᤒᤰᤜᤠ᤹ᤀᤠᤱ ᤆᤥᤃᤢᤀᤠᤱ ᤘᤕᤧᤖᤥ॥ 20 ᤜᤧᤖᤥᤍᤖᤧ ᤕᤢᤜᤢᤴᤏᤠᤴ ᤐᤢᤱᤗᤠᤜᤡᤶᤔᤥ ᤛᤠᤰᤋᤢᤀᤠᤱ ᤀᤠᤸᤗᤛᤠᤱ ᤕᤖᤡᤰ ᤑᤧᤴᤕᤠ᤺ᤶᤒᤰᤁᤡᤴ ᤕᤥ᤹ᤖᤢᤖᤥ॥ ᤕᤧᤛᤢᤴ ᤒᤵᤋᤡᤛ᤻ᤔᤠ ᤐᤥᤱ ( ᤔᤳᤋᤡ ᥉:᥇᥉-᥇᥍ ; ᤔᤷᤁᤢ ᥇:᥏-᥇᥇ ) 21 ᤌᤡᤰᤕᤧᤴ ᤁᤠᤰ ᤔᤏᤠᤜᤠ᤹ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤸᤗᤧ ᤕᤧᤛᤢ᤺ᤴᤏᤠᤱ ᤒᤵᤋᤡᤛ᤻ᤔᤠ ᤐᤥ᤺ᤰᤂᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤋᤢᤘᤠ ᤆᤥᤃᤢᤖ ᤐᤳᤇᤧᤸᤗᤧ ᤋᤠᤱᤛᤠᤰᤐᤧᤴ ᤜᤖᤧᤀᤠᤱ 22 ᤛᤣᤛᤣᤔᤠᤱᤅᤡᤴ ᤐᤢᤳᤋᤢ᤺ᤰᤁᤣ ᤜᤧᤰᤁᤣ ᤕᤧᤀᤠᤱ ᤂᤢᤏᤧ᤹ ᤁᤢᤛᤶᤍᤠᤱ ᤆᤢᤰᤋᤧ. ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥᤗᤠᤶ ᤀᤡᤰᤗᤠᤎᤡᤰ ᤕᤧ. “ᤂᤧᤏᤧ᤹ ᤀᤡᤱᤃᤠ᤹ ᤀᤠᤔᤡ᤺ᤶ ᤀᤠᤛ᤻ᤛᤠᤏᤧᤖᤥ॥ ᤂᤧᤏᤧ᤹ᤏᤢ ᤀᤡᤱᤃᤠ᤹ ᤛᤠ᤹ᤖᤡᤰ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥” ᤕᤧᤛᤢᤖᤧ ᤁᤢᤎᤠ᤺ᤰ ᤔᤡᤱᤛᤪᤠᤴ ( ᤔᤳᤋᤡ ᥇:᥇-᥇᥍ ) 23 ᤀᤠᤸᤗ ᤕᤧᤛᤢᤖᤧ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤜᤣ᤺ᤰᤋᤢᤸᤗᤧ ᤂᤢᤏᤧ᤹ ᤋᤱᤒᤣ ᤛᤢᤶᤒᤥᤱ (᥉᥆) ᤁᤧᤖᤧᤀᤠᤱ ᤘᤕᤧ॥ ᤂᤢᤏᤧ᤹ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤀᤡ᤺ᤳᤋᤢᤒᤠ ᤁᤢᤀᤡᤛᤡᤰ ᤕᤢᤛᤢᤑᤖᤧ ᤁᤢᤛ᤻ᤛᤠ ᤘᤕᤧᤖᤥ॥ 24 ᤕᤢᤛᤢᤑᤧᤴ ᤜᤧᤗᤡᤖᤧ ᤁᤢᤛ᤻ᤛᤠ. ᤜᤧᤗᤡᤴ ᤔᤋᤠᤋᤖᤧ ᤁᤢᤛ᤻ᤛᤠ. ᤔᤠᤋᤠᤋᤧᤴ ᤗᤧᤒᤡᤖᤧ ᤁᤢᤛ᤻ᤛᤠ. ᤗᤧᤒᤡᤴ ᤔᤧᤸᤆᤡᤖᤧ ᤁᤢᤛ᤻ᤛᤠ. ᤔᤧᤸᤆᤡ᤺ᤴ ᤈᤴᤏᤤᤖᤧ ᤁᤢᤛ᤻ᤛᤠ. ᤈᤴᤏᤤ᤺ᤴ ᤕᤢᤛᤢᤑᤖᤧ ᤁᤢᤛ᤻ᤛᤠ ᤘᤕᤧᤖᤥ॥ 25 ᤕᤢᤛᤢᤑᤧᤴ ᤔᤳᤋᤠᤌᤡᤕᤠᤛᤖᤧ ᤁᤢᤛ᤻ᤛᤠ. ᤔᤳᤋᤠᤌᤡᤕᤠᤛᤧᤴ ᤀᤠᤔᤥᤛᤖᤧ ᤁᤢᤛ᤻ᤛᤠ. ᤀᤠᤔᤥᤛᤧᤴ ᤏᤠᤜᤢᤔᤖᤧ ᤁᤢᤛ᤻ᤛᤠ. ᤏᤠᤜᤢᤶᤔᤡᤴ ᤀᤡᤛ᤻ᤗᤡᤖᤧ ᤁᤢᤛ᤻ᤛᤠ. ᤀᤡᤛ᤻ᤗᤡᤴ ᤏᤃ᤻ᤃᤠᤀᤡᤖᤧ ᤁᤢᤛ᤻ᤛᤠ. 26 ᤏᤃ᤻ᤃᤠᤀᤡᤴ ᤔᤠᤌᤖᤧ ᤁᤢᤛ᤻ᤛᤠ. ᤔᤠᤌᤧᤴ ᤔᤳᤋᤠᤌᤡᤕᤠᤛᤖᤧ ᤁᤢᤛ᤻ᤛᤠ. ᤔᤳᤋᤠᤌᤡᤕᤠᤛᤧᤴ ᤛᤣᤔᤤᤏᤖᤧ ᤁᤢᤛ᤻ᤛᤠ. ᤛᤣᤔᤤᤏᤧᤴ ᤕᤥᤛᤧᤂᤖᤧ ᤁᤢᤛ᤻ᤛᤠ. ᤕᤥᤛᤧᤂᤧᤴ ᤕᤥᤍᤠᤖᤧ ᤁᤢᤛ᤻ᤛᤠ ᤘᤕᤧ॥ 27 ᤕᤥᤍᤠᤴ ᤕᤥᤀᤠᤏᤖᤧ ᤁᤢᤛ᤻ᤛᤠ. ᤕᤥᤀᤠᤏᤧᤴ ᤖᤣᤛᤠᤖᤧ ᤁᤢᤛ᤻ᤛᤠ. ᤖᤣᤛᤠᤴ ᤕᤖᤢᤒᤠᤒᤣᤗᤖᤧ ᤁᤢᤛ᤻ᤛᤠ. ᤕᤖᤢᤒᤠᤒᤧᤸᤗᤧᤴ ᤛᤠᤗᤋᤡᤀᤣᤗᤖᤧ ᤁᤢᤛ᤻ᤛᤠ. ᤛᤠᤸᤋᤡᤀᤣᤸᤗᤧᤴ ᤏᤣᤖᤡᤖᤧ ᤁᤢᤛ᤻ᤛᤠ ᤘᤕᤧᤖᤥ॥ 28 ᤜᤧᤰᤁᤩᤠᤱ ᤏᤣᤖᤡᤴ ᤔᤧᤸᤁᤡᤖᤧ ᤁᤢᤛ᤻ᤛᤠ. ᤔᤸᤁᤡᤴ ᤀᤍ᤻ᤍᤡᤖᤧ ᤁᤢᤛ᤻ᤛᤠ. ᤀᤍ᤻ᤍᤡᤴ ᤁᤥᤛᤠᤔᤖᤧ ᤁᤢᤛ᤻ᤛᤠ. ᤁᤥᤛᤠᤶᤔᤡᤴ ᤀᤣᤗᤔᤠᤋᤔᤖᤧ ᤁᤢᤛ᤻ᤛᤠ. ᤀᤣᤗᤔᤠᤋᤶᤔᤡᤴ ᤀᤣᤖᤧᤸᤗᤧ ᤁᤢᤛ᤻ᤛᤠ ᤘᤕᤧᤖᤥ॥ 29 ᤜᤧᤰᤁᤩᤠᤱ ᤀᤣᤖᤧᤴ ᤕᤜᤥᤛᤢᤖᤧ ᤁᤢᤛ᤻ᤛᤠ. ᤕᤜᤥᤛᤢᤴ ᤀᤣᤗᤡᤀᤣᤈᤖᤗᤧ ᤁᤢᤛ᤻ᤛᤠ. ᤀᤣᤗᤡᤀᤣᤈᤖᤧᤴ ᤕᤥᤖᤡᤶᤖᤧ ᤁᤢᤛ᤻ᤛᤠ. ᤕᤥᤖᤡᤶᤔᤡᤴ ᤔᤠᤋᤠᤋᤖᤧ ᤁᤢᤛ᤻ᤛᤠ. ᤔᤠᤋᤠᤋᤧᤴ ᤗᤧᤒᤡᤖᤧ ᤁᤢᤛ᤻ᤛᤠ ᤘᤕᤧᤖᤥ॥ 30 ᤜᤧᤰᤁᤩᤠᤱ ᤗᤧᤒᤡᤴ ᤛᤡᤔᤡᤕᤥᤏᤖᤧ ᤁᤢᤛ᤻ᤛᤠ. ᤛᤡᤔᤡᤕᤥᤏᤧᤴ ᤕᤜᤢᤍᤠ᤺ᤸᤗᤧ ᤁᤢᤛ᤻ᤛᤠ. ᤕᤜᤢᤍᤠᤴ ᤕᤢᤛᤢᤑᤖᤧ ᤁᤢᤛ᤻ᤛᤠ. ᤕᤢᤛᤢᤑᤧᤴ ᤕᤥᤏᤠᤔᤖᤧ ᤁᤢᤛ᤻ᤛᤠ. ᤕᤥᤏᤠᤶᤔᤡᤴ ᤀᤣᤗᤡᤕᤠᤁᤡᤔᤖᤧ ᤁᤢᤛ᤻ᤛᤠ ᤘᤕᤧᤖᤥ॥ 31 ᤀᤣᤗᤡᤕᤠᤁᤡᤶᤔᤡᤴ ᤔᤗᤣᤀᤠᤖᤧ ᤁᤢᤛ᤻ᤛᤠ. ᤔᤗᤣᤀᤠ᤺ᤴ ᤔᤡᤴᤏᤠᤖᤧ ᤁᤢᤛ᤻ᤛᤠ. ᤔᤡᤴᤏᤠᤴ ᤔᤳᤋᤠᤌᤠᤖᤧ ᤁᤢᤛ᤻ᤛᤠ. ᤔᤳᤋᤠᤌᤠᤴ ᤏᤠᤋᤠᤏᤖᤧ ᤁᤢᤛ᤻ᤛᤠ. ᤏᤠᤋᤠᤏᤧᤴ ᤍᤠᤀᤢᤍᤖᤧ ᤁᤢᤛ᤻ᤛᤠ ᤘᤕᤧᤖᤥ॥ 32 ᤜᤧᤰᤁᤩᤠᤱ ᤍᤠᤀᤢᤍᤧᤴ ᤕᤡᤛᤤᤖᤧ ᤁᤢᤛ᤻ᤛᤠ. ᤕᤡᤛᤤᤴ ᤀᤥᤒᤣᤍᤖᤧ ᤁᤢᤛ᤻ᤛᤠ. ᤀᤥᤒᤣᤍᤧᤴ ᤒᤥᤀᤈᤖᤧ ᤁᤢᤛ᤻ᤛᤠ. ᤒᤥᤀᤈᤧᤴ ᤛᤸᤔᤥᤏᤖᤧ ᤁᤢᤛ᤻ᤛᤠ. ᤛᤠᤸᤔᤥᤏᤧᤴ ᤏᤜᤛᤥᤏᤖᤧ ᤁᤢᤛ᤻ᤛᤠ ᤘᤕᤧᤖᤥ॥ 33 ᤏᤜᤛᤥᤏᤧᤴ ᤀᤶᤔᤡᤏᤠᤍᤠᤒᤖᤧ ᤁᤢᤛ᤻ᤛᤠ. ᤀᤶᤔᤡᤏᤠᤍᤠᤒᤧᤴ ᤀᤠᤖᤠᤔᤖᤧ ᤁᤢᤛ᤻ᤛᤠ. ᤀᤠᤖᤠᤶᤔᤡᤴ ᤜᤣᤛᤪᤥᤏᤖᤧ ᤁᤢᤛ᤻ᤛᤠ. ᤜᤣᤛᤪᤥᤏᤧᤴ ᤐᤣᤖᤣᤈᤖᤧ ᤁᤢᤛ᤻ᤛᤠ. ᤐᤧᤖᤧᤈᤧᤴ ᤕᤜᤢᤍᤠ᤺ᤸᤗᤧ ᤁᤢᤛ᤻ᤛᤠ ᤘᤕᤧᤖᤥ॥ 34 ᤕᤜᤢᤍᤠᤴ ᤕᤠᤁᤢᤒᤖᤧ ᤁᤢᤛ᤻ᤛᤠ. ᤕᤠᤁᤢᤒᤧᤴ ᤀᤡᤛᤜᤠᤁᤖᤧ ᤁᤢᤛ᤻ᤛᤠ. ᤀᤡᤛᤜᤠᤰᤁᤡᤴ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ. ᤀᤒᤪᤠᤜᤠᤶᤔᤡᤴ ᤋᤣᤖᤜᤖᤧ ᤁᤢᤛ᤻ᤛᤠ. ᤋᤣᤖᤜᤴ ᤏᤠᤜᤥᤖᤗᤧ ᤁᤢᤛ᤻ᤛᤠ ᤘᤕᤧᤖᤥ॥ 35 ᤜᤧᤰᤁᤩᤠᤱ ᤏᤠᤜᤥᤖᤧᤴ ᤛᤖᤢᤃᤖᤧ ᤁᤢᤛ᤻ᤛᤠ. ᤛᤖᤢᤃ᤻ᤃᤧᤴ ᤖᤀᤢᤖᤧ ᤁᤢᤛ᤻ᤛᤠ. ᤖᤀᤢᤴ ᤐᤣᤗᤣᤃᤖᤧ ᤁᤢᤛ᤻ᤛᤠ. ᤐᤣᤗᤣᤃᤧᤴ ᤀᤣᤒᤣᤖᤖᤧ ᤁᤢᤛ᤻ᤛᤠ. ᤀᤣᤒᤣᤖᤧᤴ ᤛᤣᤗᤜᤖᤧ ᤁᤢᤛ᤻ᤛᤠ ᤘᤕᤧᤖᤥ॥ 36 ᤜᤧᤰᤁᤩᤠᤱ ᤛᤣᤗᤜᤴ ᤁᤤᤏᤠᤏᤖᤧ ᤁᤢᤛ᤻ᤛᤠ. ᤁᤤᤏᤠᤏᤧᤴ ᤀᤠᤷᤐᤰᤇᤍᤖᤧ ᤁᤢᤛ᤻ᤛᤠ. ᤀᤠᤷᤐᤰᤇᤍᤧᤴ ᤛᤣᤔᤖᤧ ᤁᤢᤛ᤻ᤛᤠ. ᤛᤧᤶᤔᤡᤴ ᤏᤢᤜᤠᤖᤧ ᤁᤢᤛ᤻ᤛᤠ. ᤏᤢᤜᤴ ᤗᤧᤔᤧᤂᤖᤧ ᤁᤢᤛ᤻ᤛᤠ ᤘᤕᤧᤖᤥ॥ 37 ᤜᤧᤰᤁᤩᤠᤱ ᤗᤧᤔᤧᤰᤂᤧᤴ ᤔᤋᤢᤛᤣᤗᤜᤖᤧ ᤁᤢᤛ᤻ᤛᤠ. ᤔᤋᤢᤛᤣᤗᤜᤴ ᤜᤏᤥᤁᤖᤧ ᤁᤢᤛ᤻ᤛᤠ. ᤜᤏᤥᤰᤁᤧᤴ ᤕᤧᤖᤧᤍᤖᤧ ᤁᤢᤛ᤻ᤛᤠ. ᤕᤧᤖᤣᤍᤧᤴ ᤔᤜᤗᤠᤗᤧᤗᤖᤧ ᤁᤢᤛ᤻ᤛᤠ. ᤔᤜᤗᤠᤗᤧᤴ ᤁᤤᤏᤠᤏᤖᤧ ᤁᤢᤛ᤻ᤛᤠ ᤘᤕᤧᤖᤥ॥ 38 ᤁᤣᤏᤠᤏᤧᤴ ᤀᤣᤏᤥᤛᤖᤧ ᤁᤢᤛ᤻ᤛᤠ. ᤀᤣᤏᤥᤛᤧᤴ ᤛᤣᤋᤖᤧ ᤁᤢᤛ᤻ᤛᤠ. ᤛᤣᤋᤧᤴ ᤀᤠᤍᤔᤖᤧ ᤁᤢᤛ᤻ᤛᤠ. ᤀᤠᤍᤶᤔᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ ᤘᤕᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.