ᤗᤢᤁᤠ 22 - LIFOTNT

ᤕᤧᤛᤢᤴ ᤛᤧᤵᤔᤠ ᤏᤡᤱᤛᤣᤰ

¹ ᤀᤠᤸᤗ ᤛᤡᤍᤠ᤹ ᤔᤧᤶᤓ᤺ᤴᤏᤣᤒᤠ ᤂᤖᤧ᤺ᤱᤅᤡᤸᤗᤧ ᤋᤱᤏᤠᤶᤔᤡᤴ ᤏᤡ᤺ᤳᤋᤠᤱ ᤋᤩᤧᤖ ᤐᤳᤇᤧ॥ ᤂᤧᤴ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤠᤱ ᤔᤧᤔᤧᤳᤋᤢ᤹॥

² ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤕᤧᤛᤢᤴ ᤛᤧᤵᤔᤠ ᤛᤢᤕᤧᤶ ᤔᤧᤃᤥ᤺ᤳᤋᤢᤖ ᤔᤧᤘᤕᤧ. ᤁᤖ ᤔᤏᤠᤜᤠ᤹ᤖᤧ ᤜᤕᤱᤁᤡᤸᤗᤡᤱ ᤔᤧᤈᤥᤃᤢ᤹ ᤑᤠ᤹ᤀᤠᤱ ᤔᤧᤃᤡᤛᤧᤒᤠᤸᤗᤧ ᤆᤥᤃᤢᤸᤗᤧ ᤛᤫᤠ᤺ᤳᤋᤠᤱ ᤛᤧᤵᤔᤠ ᤏᤡᤱᤘᤠ᤹ ᤔᤧᤈᤥᤃᤢ॥

³ ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤴ ᤌᤡᤰ-ᤏᤧᤳ (᥇᥈) ᤜᤢ᤹ᤛᤠᤶᤒᤠᤜᤠ᤹ᤀᤥ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋ ᤔᤧᤵᤔᤏᤠᤒᤠᤸᤗᤧ ᤁᤢᤏᤡᤱᤘᤠ᤹ᤀᤥ ᤗᤠᤛᤧ॥

⁴ ᤜᤧᤰᤁᤩᤠᤱ ᤂᤢᤏᤧ᤹ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤔᤠᤱᤜᤡᤶ ᤁᤧᤃᤥᤒᤠᤜᤠ᤹ᤖᤧ ᤂᤢᤏᤡ᤹ ᤌᤰᤋᤢᤶᤒᤠᤜᤠ᤹ᤖᤥ ᤐᤣᤀᤠᤱ ᤕᤧᤛᤢᤴ ᤂᤡᤏᤡ᤹ ᤜᤢᤰᤁᤥ ᤌᤠᤔᤠ ᤛᤢᤰᤋᤢᤱ ᤑᤠ᤹ᤀᤠᤱ ᤆᤧᤰᤋᤢᤛᤡ॥

⁵ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤔᤧᤛ᤺ᤳᤋᤧᤖ ᤜᤧᤰᤁᤣ ᤁᤧᤈᤥᤃᤢᤸᤗᤧ ᤂᤧᤏᤧ᤹ ᤕᤠᤱ ᤐᤡᤀᤠᤛᤡᤃᤧ᤹ᤖᤥ ᤗ᤹ᤖᤡᤰ ᤔᤧᤔᤧᤳᤋᤢᤖᤥ॥

⁶ ᤂᤢᤏᤧ᤹ᤀᤠᤱ ᤂᤧᤴ ᤐᤠ᤺ᤴᤏᤥ ᤋᤧᤴᤍᤧᤀᤠᤱ ᤔᤏᤠᤜᤠ᤹ ᤔᤧᤜᤥ᤺ᤵᤐᤡᤸᤗᤧ ᤀᤡᤱᤗᤧᤰᤔᤠᤀᤠᤱ ᤋᤧᤶᤔᤠ ᤐᤠᤱᤔᤠᤛᤡ ᤑᤠ᤹ᤀᤠᤱ ᤛᤢᤕᤧᤶ ᤁᤥ᤺ᤵᤔᤠ ᤜᤣ᤺ᤰᤋᤢᤖᤥ॥

ᤍᤠᤱᤒᤠᤸᤗᤧ ᤁᤢᤛᤠᤓᤠᤱᤈᤠ

⁷ ᤜᤧᤰᤁᤩᤠᤱ ᤛᤡᤍᤠ᤹ ᤔᤧᤴᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶᤔᤡᤸᤗᤧ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤔᤧᤸᤗᤢᤰᤛᤠᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤌᤡᤶ ᤘᤕᤧ॥

⁸ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤐᤋᤪᤢᤛ ᤏᤢ ᤕᤢᤜᤢᤴᤏᤠᤴ ᤀᤰᤂᤣ ᤔᤧᤳᤋᤢᤛᤡᤖ ᤐᤠᤱᤄᤢᤛᤡ. “ᤂᤡᤴᤇᤡ᤹ ᤐᤣᤃᤧᤳᤇᤧ᤹ᤀᤠᤱ ᤀᤠᤏᤡ᤹ ᤗᤠᤃᤡ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤆᤠᤔᤠ ᤌᤢᤱᤔᤠ ᤕᤠᤖᤡᤵ ᤆᤥᤃᤧᤳᤇᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤏᤡ᤹ ᤛᤥᤖᤡᤰ ᤆᤠᤶᤗᤥ॥”

⁹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤣ᤺ᤴᤍᤥᤛᤧᤳᤇᤢ. “ᤜᤧᤰᤁᤣ᤺ᤸᤗᤧ ᤀᤠᤳᤋᤠᤴ ᤐᤣ᤺ᤰᤔᤠᤀᤠᤱ ᤕᤠᤖᤡᤵ ᤆᤥ᤺ᤰᤔᤠᤒᤣ᥅”

¹⁰ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤠᤸᤗ ᤀᤥᤔᤧᤳᤋᤧᤳᤇᤧ᤹ᤀᤥ. ᤂᤡᤴᤇᤡ᤹ ᤕᤧᤰᤕᤰᤁᤥ ᤁᤧᤗᤠ᤺ᤳᤇᤡᤖ ᤁᤧᤒᤳᤇᤡᤸᤗᤧ ᤆᤫᤠ᤺ᤳ ᤁᤢ᤺ᤴᤍᤠ ᤁᤧᤒᤱᤒᤠ ᤔᤏᤠᤎᤡᤰᤗᤧ ᤁᤧᤍᤢᤶᤛᤡ᤹॥ ᤂᤧᤴ ᤗᤠ᤺ᤵᤐᤠ ᤜᤡᤶᤔᤥ ᤌᤠᤖᤡᤰ ᤋᤡᤶᤍᤧᤳᤇᤧ᤹॥”

¹¹ ᤜᤧᤰᤁᤩᤠᤱ ᤜᤡᤶᤍᤠᤱᤒᤠᤴ ᤔᤧᤳᤋᤧᤇᤧ᤹. “ᤀᤠᤏᤡᤃᤣ ᤛᤡᤰᤛᤠᤶᤒᤠᤸᤗᤧ ᤂᤧᤏᤧ᤹ ᤀᤰᤂᤣ ᤁᤧᤔᤧᤳᤋᤧᤀᤠᤱ ᤁᤧᤘᤠ᤹ᤖᤥ. ‘ᤋᤖᤣ ᤕᤢᤱᤔᤠ ᤕᤠᤰᤑᤠᤱᤅᤡᤴ ᤀᤠᤳᤋᤥ ᤏᤧᤒᤣ᥅ ᤂᤧᤵᤔᤥ ᤀᤡᤱᤃᤠ᤹ ᤀᤠᤜᤢ᤹ᤛᤠᤶᤒᤠᤜᤠ᤹ᤏᤢ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤆᤠᤔᤠ ᤌᤢᤱᤔᤠᤴ ᤆᤠᤱᤗᤥ॥’

¹² ᤜᤧᤰᤁᤩᤠᤱ ᤂᤧᤸᤗᤧ ᤂᤡᤴᤇᤡ᤹ ᤌᤥᤛᤔᤠ ᤂᤠᤶᤗᤥᤀᤥ ᤕᤠᤖᤡᤵ ᤆᤥ᤺ᤰᤔᤏᤠᤒᤠ ᤗᤳᤇᤠ ᤕᤶᤒᤠ ᤕᤠᤰᤑᤠᤱᤅᤡᤴ ᤀᤥᤛᤣ᤺ᤴᤃᤧᤎᤠᤰᤛᤡ᤹॥ ᤂᤧᤵᤔᤥᤀᤣ ᤀᤠᤏᤡ᤹ ᤆᤠᤔᤠ ᤌᤢᤱᤔᤠᤴ ᤕᤠᤖᤡᤵ ᤆᤥᤃᤧᤳᤇᤧ᤹ᤀᤥ॥”

¹³ ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤣᤛᤧᤳᤇᤡᤸᤗᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤋᤢᤔᤧᤳᤇᤢᤀᤠᤱ ᤂᤧᤱᤜᤠ᤹ᤖᤧ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤆᤠᤔᤠ ᤌᤢᤱᤔᤠᤴ ᤕᤠᤖᤡᤵ ᤆᤥᤃᤧᤳᤇᤢ॥

¹⁴ ᤀᤠᤸᤗ ᤆᤠᤈᤠᤔᤠ ᤕᤧᤶ ᤐᤥ᤺ᤰᤂᤧᤀᤠᤱ ᤕᤧᤛᤢᤴ ᤁᤢᤛᤣ᤺ᤰᤕᤢᤰᤔᤡᤒᤠᤜᤠ᤹ᤏᤢ ᤆᤠᤔᤠ ᤋᤧᤴᤏᤥ ᤕᤢᤱᤛᤡᤱ॥

¹⁵ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤋᤢᤰᤂᤣ ᤆᤠᤔᤠᤏᤢ᤺ᤸᤗᤧ ᤋᤃᤡ ᤁᤴ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤒᤠ ᤛᤠᤓ᤺ᤱᤈᤠᤴ ᤂᤡᤏᤡ᤹ᤏᤢ ᤛᤥᤖᤡᤰ ᤆᤠᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤕᤠᤱ.

¹⁶ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤁᤴ ᤀᤠᤈᤠᤶᤗ ᤀᤠᤒᤵᤐᤠ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤒᤠ ᤛᤠᤓᤠᤱᤈᤠ᤺ᤸᤗᤧ ᤁᤢᤒᤣᤴ ᤔᤧᤱᤃᤧᤳᤋᤣ ᤌᤠᤖᤡᤰ ᤀᤡᤱᤃᤠ᤹ ᤕᤠᤶᤔᤥ ᤔᤧᤈᤠᤀᤠᤴᤗᤥ॥”

¹⁷ ᤜᤧᤰᤁᤩᤠᤱ ᤕᤧᤛᤢᤖᤧ ᤆᤸᤗᤱᤏᤠ ᤂᤥᤷᤕᤠᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖ ᤀᤰᤂᤣ ᤐᤠ᤺ᤳᤋᤢ. “ᤁᤴ ᤋᤠ᤺ᤰᤋᤧᤶᤔᤧ᤹ᤀᤠᤱ ᤂᤡᤏᤡ᤹ ᤗᤢᤶᤔᤥ ᤜᤠ᤺ᤳᤋᤠᤛᤡᤶᤔᤧᤖ ᤆᤧᤶᤔᤧ ᤌᤢᤅᤧᤶᤔᤧ᤹ᤀᤥ॥

¹⁸ ᤂᤡᤏᤡ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤕᤠᤶᤔᤥ ᤔᤧᤴᤍᤠᤀᤣ ᤌᤠᤖᤡᤰ ᤆᤧᤸᤗᤧᤰᤛᤣ᤹ ᤌᤡᤴ ᤀᤡᤱᤃᤠ᤹ ᤕᤠᤶᤔᤥ ᤔᤧᤎᤢᤱᤅᤠᤴᤗᤥ॥”

¹⁹ ᤜᤧᤰᤁᤩᤠᤱ ᤂᤢᤏᤧ᤹ ᤂᤖᤧ᤺ᤱᤅᤡᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ ᤜᤧᤰᤁᤩᤠᤱ ᤂᤧ᤺ᤰᤂᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤡᤖᤢᤛᤡᤖ ᤀᤰᤂᤣ ᤔᤧᤳᤋᤢᤛᤡ. “ᤁᤴ ᤂᤡᤏᤡ᤹ ᤗᤠᤃᤡ ᤐᤡᤖᤧᤒᤠ ᤀᤠᤎᤰᤗᤥ॥ ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤛᤥᤀᤥ ᤀᤰᤂᤣ ᤆᤥᤃᤧᤶᤔᤧ᤹ᤀᤥ॥”

²⁰ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤔᤧᤈ ᤔᤧᤛᤢᤖᤢᤀᤠᤱ ᤆᤸᤗᤱᤏᤠ ᤂᤥᤷᤕᤠᤴ ᤕᤧᤛᤢᤖᤧ ᤐᤰᤂᤢᤖ ᤀᤰᤂᤣ ᤔᤧᤳᤋᤢᤛᤡ. “ᤁᤴ ᤂᤡᤏᤡ᤹ ᤗᤠᤃᤡ ᤀᤠᤔᤠᤰᤂᤡ᤹ᤀᤡᤴ ᤘᤍᤣ᤺ᤴᤍᤧᤀᤠᤱ ᤏᤡ᤺ᤴᤎᤥ ᤐᤥ᤺ᤰᤂᤧᤒᤠ ᤁᤢᤛᤱ ᤔᤠᤱᤜᤢᤵᤐᤡᤴᤗᤥ॥

²¹ “ᤁᤖ ᤀᤥᤔᤧᤳᤋᤧᤶᤔᤧ᤹᥄ ᤀᤡᤱᤃᤠ᤹ ᤕᤠᤵᤔᤡ ᤀᤡᤱᤃᤧᤗᤧᤰᤐᤠᤴ ᤒᤠ ᤁᤴ ᤆᤠᤔᤠ ᤋᤧᤴᤏᤥ ᤀᤡᤱᤃᤠ᤹ᤏᤢᤀᤣ ᤆᤖ ᤕᤢᤱᤗᤥ॥”

²² ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤆᤥᤃᤢᤒᤠ ᤁᤢᤀᤡᤛᤡ᤺ᤰᤁᤣ ᤔᤧᤴᤇᤠᤶᤛᤠ᤺ᤱᤃ ᤛᤡᤔᤠᤀᤣ ᤐᤥᤱᤗᤥ. ᤁᤖ ᤂᤢᤏᤧ᤹ ᤀᤡᤱᤃᤧᤗᤧᤰᤐᤧᤱᤃ ᤆᤡ᤺ᤳᤋᤧᤛᤩᤧᤖᤥ॥

²³ ᤂᤧᤱᤜᤠ᤹ᤖᤧ ᤀᤠᤏᤡ᤹ ᤗᤢᤶᤔᤥ ᤀᤰᤋᤱᤒᤠ ᤕᤠ᤺ᤶᤒᤰ ᤜᤠ᤺ᤳᤗᤧ ᤆᤥᤃᤢ᤹ᤒᤡᤗᤠ ᤗ᤹ᤖᤡᤰ ᤛᤣ᤺ᤴᤍᤥᤛᤡᤱᤔᤠ ᤔᤧᤜᤣ᤺ᤰᤛᤡᤱᤗᤥ॥

²⁴ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤜᤠ᤺ᤳᤏᤡᤒᤣ ᤑᤠ᤹ᤀᤠᤱ ᤐᤠ᤺ᤴᤎᤰᤔᤠ ᤔᤧᤜᤣ᤺ᤰᤋᤢᤖᤥ॥

²⁵ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤠᤱᤜᤠ᤹ᤖᤧ ᤔᤏᤠᤜᤠ᤹ ᤐᤠ᤺ᤵᤐᤠ᤺ᤳ ᤔᤧᤔᤧᤳᤋᤢᤛᤡ ᤜᤧᤰᤁᤩᤠᤱ ᤂᤢᤏᤡ᤹ ᤕᤢᤰᤛᤠᤒᤠᤜᤠ᤹ᤖᤧ ᤀᤠᤏᤡᤃᤣ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤣ᤺ᤱᤛᤡᤃᤧ ᤑᤠ᤹ᤀᤠᤱ ᤔᤧᤔᤧᤳᤇᤡᤱᤗᤥ॥

²⁶ ᤁᤖ ᤂᤡᤏᤡ᤹ᤀᤥᤃ ᤀᤰᤂᤣ ᤔᤧᤒᤥᤱᤏᤧᤸᤗᤥ॥ ᤂᤡᤏᤡ᤹ᤀᤥᤃ ᤀᤠᤳᤋᤡᤴ ᤕᤶᤒᤠ ᤆᤥᤰ. ᤂᤧᤴ ᤆᤢᤰᤛᤠ ᤐᤥᤱᤔᤠ ᤐᤥᤱ ᤜᤧᤰᤁᤩᤠᤱ ᤗᤠᤶᤗᤥᤒᤠᤴ ᤛᤧᤘᤠᤖᤥᤒᤠᤴ ᤜᤧᤰᤁᤣ ᤐᤥᤱᤔᤠ ᤐᤥᤱᤗᤥ॥

²⁷ ᤀᤠᤸᤗ ᤆᤠᤈᤠᤔᤠᤍᤧᤴᤏᤥ ᤁᤧᤕᤢᤱᤒᤧᤴ ᤏᤢ ᤛᤧᤘᤠ ᤁᤧᤈᤥᤰᤐᤧᤴ ᤀᤠᤳᤋᤡᤴ ᤕᤶᤒᤠᤒᤣ᥅ ᤂᤧᤴ ᤆᤠᤈᤠᤔᤠᤍᤧᤴᤏᤥ ᤁᤧᤕᤢᤱᤒᤧᤴ ᤕᤶᤒᤠ ᤔᤣ᤺ᤶᤒᤡ᥅ ᤁᤖ ᤂᤡᤏᤡ᤹ᤀᤥᤃ ᤀᤡᤱᤃᤠ᤹ ᤛᤧᤘᤠ ᤁᤧᤈᤥ᤺ᤰᤐᤠ ᤜᤧᤰᤁᤣ ᤘᤠ᤹ᤀᤠ ᤑᤠ᤹ᤀᤠᤱ ᤔᤧᤳᤏᤡᤱᤗᤥ॥

²⁸ ᤂᤡᤏᤡ᤹ᤃ ᤆᤰᤔᤧᤸᤗ᤹ᤀᤣ ᤀᤡᤱᤃᤠ᤹ ᤀᤠᤍᤢᤰᤂᤣᤀᤥ ᤋᤣ᤺ᤱ ᤕᤠᤵᤔᤡ ᤁᤧᤔᤧᤳᤋᤡᤀᤠᤱ ᤁᤧᤘᤕᤡ᤹ᤖᤥ॥

²⁹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤀᤡᤱᤃᤠ᤹ ᤜᤠᤱᤆᤥ᤺ᤰᤔᤠ ᤕᤢᤰ ᤐᤡᤖᤠᤱᤒᤠ ᤜᤧᤰᤁᤣᤀᤣ ᤂᤡᤏᤡ᤹ᤀᤠᤱ ᤐᤡᤏᤡᤱᤗᤥ॥

³⁰ ᤂᤡᤏᤡ᤹ ᤀᤠᤜᤠᤱᤈᤢᤶᤔᤥ ᤀᤡᤱᤃᤠ᤹ᤏᤢᤀᤣ ᤛᤥᤖᤡᤰ ᤁᤧᤕᤢᤅᤡ᤹ᤀᤠᤱ ᤁᤧᤈᤠᤶ ᤁᤧᤎᤢᤅᤢᤶᤗᤥ॥ ᤜᤧᤰᤁᤩᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤅᤡᤀᤠᤱ ᤀᤡᤛᤪᤠᤀᤡᤗᤒᤠ ᤌᤡᤰᤏᤧᤳ ᤛᤢᤘᤠᤱᤜᤠ᤹ ᤛᤶᤍᤠᤱ ᤜᤠᤱ ᤁᤧᤈᤥᤃᤡ᤹ᤖᤥ॥”

³¹ ᤕᤧᤛᤢᤖᤧ ᤔᤧᤳᤋᤢ. “ᤛᤡᤔᤥᤏᤣ. ᤛᤡᤔᤥᤏᤣ. ᤂᤧᤵᤛᤧ᤹ᤀᤥ᥄ ᤀᤡᤰᤔᤛᤠᤒᤠᤸᤗᤧ ᤆᤠ᤺ᤴᤏᤢ ᤁᤢᤜᤰᤁᤡᤴ ᤛᤧᤶᤔᤠᤖᤧ ᤗᤠᤃᤡ ᤀᤧᤵᤋᤢᤀᤠᤱ ᤛᤧᤴᤍᤢᤒᤠ ᤁᤢᤀᤡᤛᤡᤰ ᤔᤠᤑᤧᤴᤛᤠᤶᤔᤡᤸᤗᤧᤀᤠᤱ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤗᤧᤱᤔᤠ ᤑᤠ᤹ᤀᤠᤱ ᤀᤡᤱᤈᤠᤱ ᤏᤠ᤺ᤰᤋᤢᤀᤠᤱ ᤘᤠ᤹ᤖᤥ॥

³² ᤁᤖ ᤀᤡᤱᤃᤠ᤹ ᤂᤧᤏᤧ᤹ ᤁᤧᤏᤛᤠ᤺ᤴᤏᤡᤴ ᤔᤧᤗᤧᤱᤏᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤢᤱ ᤐᤡᤏᤧᤀᤠᤱ ᤘᤠ᤹ᤀᤠᤖᤥ॥ ᤂᤧᤏᤧ᤹ ᤕᤠᤶᤔᤥ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤐᤥ᤺ᤰᤂᤧᤀᤠᤱ ᤁᤧᤶᤓᤢ᤹ ᤁᤧᤴᤛᤠ᤹ᤛᤡᤀᤠᤱ ᤂᤢᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤆᤥᤃᤧᤛᤧ᤹ᤀᤥ॥”

³³ ᤛᤡᤔᤥᤏᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ᤃ ᤂᤧᤏᤧ᤹ᤏᤢ ᤐᤢᤱᤗᤠᤜᤡᤶᤔᤥ ᤌᤠᤖᤡᤰᤗᤰ ᤔᤣ᤺ᤴ. ᤁᤖ ᤛᤡᤔᤠ ᤐᤥᤱᤛᤠᤱ ᤕᤠᤖᤡᤵ ᤘᤠ᤹ᤀᤠᤖᤥ॥”

³⁴ ᤁᤖ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤋᤪᤢᤛᤣ. ᤀᤡᤱᤃᤠ᤹ ᤐᤠ᤺ᤴᤎᤡᤰ ᤔᤧᤳᤏᤧ᤹ᤖᤥ. ᤀᤠᤀᤡᤴ ᤛᤧᤴᤍᤡᤰ ᤀᤡᤱᤘᤠ ᤁᤠᤔᤠᤏᤢ᤺ᤸᤗᤧ ᤋᤃᤡ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴ ᤁᤧᤒᤠ᤺ᤳᤋᤢᤖ ᤛᤢᤶᤗᤧᤱ ᤁᤧᤏᤠ᤹ᤀᤠᤖᤥ॥”

³⁵ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤂᤡᤏᤡ᤹ ᤛᤢᤏᤠᤀᤡᤱ ᤀᤡᤱᤓᤴ ᤆᤥ᤺ᤰᤛᤧ ᤛᤢᤰᤘᤠ. ᤛᤠᤒᤪᤡ ᤏᤢ ᤗᤠᤱᤛᤢᤵ ᤌᤣᤀᤠᤱ ᤔᤣ᤺ᤴᤏᤣ ᤐᤠᤱᤏᤡᤱᤅᤡᤸᤗᤧ ᤂᤡᤏᤡ᤹ ᤁᤧᤛᤠᤰᤐᤥ ᤁᤧᤎᤩᤧ᤹ᤀᤡᤒᤡ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤔᤧᤎᤩᤧ᤹ᤀᤡᤃᤧᤴᤗᤥ॥”

³⁶ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤖ ᤀᤠᤸᤗᤥ ᤂᤡᤏᤡ᤹ ᤛᤢᤰᤘᤠ ᤛᤠᤒᤪᤡᤜᤠ᤹ ᤕᤠᤱᤛᤡᤱᤅᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤋᤠᤓᤣᤴ ᤔᤧᤱᤃᤵᤔᤏᤠᤒᤠᤸᤗᤧ ᤜᤠᤖᤠ᤹ ᤁᤢᤛᤢᤱᤄᤧ᤹ᤘᤠᤴ ᤛᤱᤄᤢᤀᤠᤱ ᤗᤳᤌᤡᤰ ᤋᤠᤓᤣᤎᤡᤰᤁᤠᤱ ᤀᤡᤅᤢᤖᤖᤥ॥

³⁷ ᤀᤰᤂᤣᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. ‘ᤂᤢᤏᤧ᤹ᤃ ᤜᤠᤱᤒᤡᤑᤩᤢᤱᤒᤠᤜᤠ᤹ᤏᤢ ᤔᤧᤍᤱᤄᤢᤖᤥ॥’ ᤁᤴ ᤐᤠ᤺ᤴᤏᤡᤴ ᤏᤢ ᤔᤠᤱᤏᤡᤱᤘᤠ᤹ᤐᤠᤴᤏᤥ ᤀᤡᤱᤃᤠ᤹ ᤀᤠᤔᤧᤴᤏᤥ ᤛᤠᤵᤋᤧᤀᤠᤱ ᤐᤵᤐᤠ ᤐᤠ᤺ᤴᤜᤠ᤹ ᤁᤧᤖᤧᤰ ᤀᤡᤱᤃᤠ᤹ᤀᤥ ᤁᤧᤳᤗᤥ॥”

³⁸ ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤍᤠᤱᤒᤣ. ᤀᤠᤏᤡᤃᤣ ᤏᤧᤳᤇᤡ ᤋᤠᤓᤣ ᤁᤳᤋᤢᤶᤒᤧᤖᤥ॥” ᤕᤧᤛᤢᤖᤧ ᤔᤧᤳᤋᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤶᤔᤩᤠᤰᤁᤠᤱ ᤐᤥᤱᤗᤥ॥”

ᤕᤧᤛᤢᤴ ᤈᤤᤋᤢᤏ ᤁᤥ᤺ᤰᤔᤠᤀᤥ ᤋᤢᤘᤠ ᤆᤥᤰ

³⁹ ᤜᤧᤰᤁᤩᤠᤱ ᤕᤧᤛᤢᤴ ᤌᤥᤛᤔᤠ ᤕᤠᤰᤑᤠᤱᤅᤥᤏᤢ ᤗ᤺ᤴᤍᤧᤀᤠᤱ ᤛᤍᤠᤍᤡᤱ ᤜᤧᤰᤁᤣ ᤈᤤᤋᤢᤏ ᤁᤥ᤺ᤰᤔᤠᤀᤥ ᤐᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤠᤱ ᤂᤢᤏᤧ᤹ᤏᤢᤀᤣ ᤛᤥᤖᤡᤰ ᤔᤧᤒᤣᤖᤥ॥

⁴⁰ ᤂᤧᤵᤔᤥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤱᤛᤠ᤹ᤔᤠᤀᤥ ᤔᤧᤎᤩᤧ᤹ᤀᤡᤃᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥”

⁴¹ ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤛᤠᤰ ᤏᤠᤏᤠᤰ ᤐᤣᤀᤠᤱ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤢ.

⁴² “ᤐᤠᤏᤢᤍᤡᤱ ᤀᤠᤶᤒᤣ. ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤁᤴ ᤀᤡᤏᤥᤃᤧᤴ ᤋᤢᤰᤂᤣᤖᤧᤴ ᤂᤥᤷᤕᤠᤴ ᤀᤡᤱᤃᤠ᤹ᤀᤥᤗᤠᤶ ᤂᤧᤳᤋᤧᤍᤣᤛᤧ᤹ᤀᤥ॥ ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤀᤠᤏᤡᤱᤘᤠ᤹ ᤜᤧᤰᤁᤣᤃ ᤔᤣ᤺ᤴ. ᤁᤖ ᤁᤧᤏᤡᤱᤘᤠ᤹ ᤜᤧᤰᤁᤣᤀᤣ ᤐᤥᤱᤗᤖᤥ॥”

⁴³ (ᤜᤧᤰᤁᤩᤠᤱ ᤂᤧᤵᤔᤥ ᤔᤠᤱᤗᤠᤀᤡᤱᤒᤠᤎᤡᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤌᤠ᤺ᤶᤛᤡᤱᤅᤠᤱ ᤂᤢᤏᤧ᤹ ᤁᤢᤓᤠ᤹ ᤐᤡᤖᤢᤖᤥ॥

⁴⁴ ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤱᤛᤠᤶᤃᤧᤴ ᤏᤡᤱᤘᤠ᤹ᤖᤧ ᤏᤠᤕᤥ ᤐᤥ᤺ᤰᤂᤧᤀᤠᤱ ᤛᤠ᤹ᤖᤡᤰ ᤏᤡᤱᤘᤠ᤹ ᤐᤡᤖᤢᤀᤠᤱ ᤋᤢᤘᤠ ᤆᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤠ᤺ᤶᤒᤪᤡᤰᤘᤠᤴ ᤕᤶᤒᤕᤶᤒᤠ ᤔᤠᤰᤂᤡ᤹ ᤋᤧᤵᤐᤰᤘᤠ ᤁᤢᤀᤡᤛᤡᤰ ᤂᤠᤶᤔᤥ ᤔᤰᤌᤩᤧᤖᤥ॥)

⁴⁵ ᤕᤧᤛᤢᤴ ᤋᤢᤘᤠᤀᤥᤗᤠᤶ ᤐᤥᤃᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤕᤢᤅᤧᤒᤠ ᤋᤧᤴᤏᤥ ᤐᤣ॥ ᤂᤧᤱᤜᤠ᤹ ᤁᤧᤖᤧᤰ ᤔᤡᤱᤘᤠ᤺ᤸᤗᤧ ᤔᤧᤏᤠᤛᤧᤀᤠᤱ ᤔᤧᤀᤡᤵᤛᤧᤒᤠ ᤋᤢᤔᤢᤛᤡ॥

⁴⁶ ᤂᤧᤱᤜᤠ᤹ ᤑᤥ᤺ᤰᤂᤢᤛᤡᤖ ᤀᤰᤂᤣ ᤔᤧᤳᤋᤢᤛᤡ. “ᤌᤣᤀᤠᤱ ᤁᤧᤀᤡᤵᤛᤡᤖ ᤁᤧᤏᤧᤛ᤻ᤛᤡᤒᤠᤒᤣ᥅ ᤐᤥᤃᤧᤶᤔᤧ᤹ᤀᤠᤱ ᤜᤱᤛᤠ᤹ᤔᤥ ᤔᤧᤎᤩᤧ᤹ᤀᤡᤃᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤧᤶᤔᤧ᤹॥”

ᤕᤧᤛᤢᤴ ᤔᤧᤍᤧᤶᤛᤢ᤹

⁴⁷ ᤁᤖ ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢᤖ ᤐᤳᤇᤧᤸᤗᤧᤛᤠ. ᤌᤡᤰᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥᤒᤠ ᤗᤳᤇᤠ ᤕᤜᤢᤍᤠ ᤔᤧᤵᤔᤏᤠᤒᤧᤸᤗᤧ ᤔᤏᤠᤜᤠ᤹ ᤗᤠᤶᤗᤥᤛᤢᤛᤡᤖ ᤂᤧᤵᤔᤥ ᤋᤠᤖᤢᤛᤡ॥ ᤜᤧᤰᤁᤩᤠᤱ ᤕᤧᤛᤢᤴ ᤆᤢᤵ ᤔᤧᤵᤔᤠᤀᤠᤱ ᤛᤧᤘᤠ ᤔᤧᤳᤇᤧ ᤁᤢᤒᤣᤛᤠᤱ ᤐᤣ॥

⁴⁸ ᤁᤖ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤕᤜᤢᤍᤠᤀᤣ. ᤀᤰᤂᤣᤗ᤹ᤖᤡᤰ ᤀᤡᤱᤃᤠ᤹ ᤔᤧᤴᤇᤠᤶᤛᤠᤴ ᤆᤢᤵ ᤁᤧᤔᤧᤳᤋᤠᤀᤠᤱ ᤂᤧᤏᤧ᤹ ᤀᤡᤱᤃᤧᤗᤧᤰᤁᤠᤒᤠᤒᤡ᥅”

⁴⁹ ᤜᤧᤰᤁᤩᤠᤱ ᤀᤠᤸᤗ ᤂᤧᤵᤔᤥ ᤌᤣ ᤐᤥᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤸᤗᤥ ᤀᤠᤏᤡᤃᤣ ᤋᤠᤓᤣ᤺ᤸᤗᤧ ᤁᤱᤜᤠ᤹ ᤆᤧᤵᤋᤢᤶᤛᤡᤶᤒᤧᤒᤡ᥅”

⁵⁰ ᤜᤧᤰᤁᤩᤠᤱ ᤂᤧᤱᤜᤠ᤹ᤀᤥ ᤌᤡᤰᤁᤡᤸᤗᤧᤃ ᤋᤠᤓᤣᤴ ᤋᤖᤵ ᤑᤡ᤺ᤰᤂᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤧᤘᤠᤖᤥᤒᤧᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱᤒᤠ ᤁᤢᤏᤧᤰᤂᤥ᤹ᤒᤠᤴ ᤐᤧᤳᤋᤢ ᤌᤠᤛᤢᤖᤥ॥

⁵¹ ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗ ᤏᤠ᤹ᤖᤧᤶᤔᤧ᤹ᤀᤥ॥” ᤜᤧᤰᤁᤩᤠᤱ ᤂᤧᤸᤗᤧ ᤁᤢᤏᤧᤰᤂᤥ᤹ᤒᤠᤴ ᤛᤢᤛᤢᤀᤠᤱ ᤏᤢᤛᤢᤖᤥ॥

⁵² ᤜᤧᤰᤁᤩᤠᤱ ᤕᤧᤛᤢᤖᤧ ᤂᤢᤏᤧ᤹ ᤁᤢᤍᤧᤶᤛᤧ ᤁᤧᤍᤠᤒᤠ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤔᤠᤱᤜᤡᤶ ᤁᤧᤃᤥᤒᤠᤜᤠ᤹ᤖᤧ ᤂᤢᤏᤡ᤹ ᤌᤰᤋᤢᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠᤀᤠᤒᤡ᥅ ᤌᤣᤀᤠᤱ ᤀᤡᤱᤃᤠ᤹ ᤀᤠᤍᤧᤶᤛᤧ ᤋᤠᤓᤣᤏᤢ ᤋᤰᤁᤠ᤺ᤳᤏᤢ ᤁᤧᤍᤩᤧ᤹ᤀᤡᤒᤣ᥅

⁵³ ᤀᤡᤱᤃᤠ᤹ᤃ ᤌᤡᤰᤕᤠ᤺ᤴᤎᤰᤛᤠ ᤔᤠᤱᤜᤡᤶ ᤗᤰᤂᤢᤶᤔᤥ ᤏᤡᤛᤠᤶ ᤜᤢ᤹ᤀᤡᤛᤧ ᤘᤕᤠᤱᤒᤠ ᤜᤧᤰᤁᤣᤛᤠᤱ ᤕᤠᤵᤔᤡ ᤁᤧᤴᤍᤧᤶᤛᤡᤴ. ᤁᤖ ᤂᤠᤍᤠᤶᤔᤠ ᤔᤢᤰᤛᤠᤶᤔᤡᤸᤗᤧ ᤕᤢᤰᤋᤢᤸᤗᤧᤀᤣ ᤂᤡᤏᤡ᤹ ᤕᤠ᤺ᤶᤒᤰ ᤆᤥ᤺ᤰᤔᤠ ᤕᤧᤶ ᤐᤥᤱᤗᤥ॥”

ᤐᤋᤪᤢᤛᤖᤧ ᤕᤧᤛᤢᤴ ᤏᤠ᤹ᤖᤢ

⁵⁴ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤍᤧᤶᤛᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤜᤡᤶᤔᤥ ᤔᤧᤍᤠᤖᤢ॥ ᤐᤋᤪᤢᤛᤧᤴᤏᤠᤱ ᤔᤠ᤺ᤱᤄᤠᤗᤠᤶ ᤂᤧᤱᤜᤠ᤹ ᤋᤡᤶᤍᤢᤛᤡᤖ ᤂᤧᤵᤔᤥ ᤋᤩᤧᤖᤥ॥

⁵⁵ ᤂᤧᤱᤜᤠ᤹ᤖᤧ ᤗᤰᤂᤢᤶᤗᤢᤶᤔᤥ ᤔᤡᤔᤧᤍᤢᤵᤋᤢᤀᤠᤱ ᤔᤡᤈᤠ᤹ᤏᤢ ᤔᤧᤕᤢᤅᤧᤸᤗᤧ ᤐᤋᤪᤢᤛᤧᤴᤏᤠᤱ ᤂᤢᤏᤡ᤹ ᤗᤢᤶᤔᤥ ᤐᤣᤀᤠᤱ ᤕᤢᤱᤛᤡᤱ॥

⁵⁶ ᤜᤧᤰᤁᤩᤠᤱ ᤂᤧᤵᤔᤥ ᤛᤣᤘᤠᤖᤥᤔᤠ ᤆᤢᤰᤔᤠᤎᤡᤰᤗᤧ ᤂᤢᤏᤧ᤹ ᤂᤠᤃᤧᤀᤥ᤺ᤵᤐᤠᤀᤥ ᤕᤢᤅᤧᤸᤗᤧ ᤏᤢᤖᤡᤰ ᤀᤥᤔᤧᤳᤋᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤁᤴ ᤔᤏᤠ᤺ᤴᤏᤠᤱ ᤕᤧᤛᤢ᤺ᤴᤏᤢᤀᤣ ᤘᤕᤧᤒᤠ ᤜᤧᤰᤁᤣ ᤗ᤹ᤖᤥ॥”

⁵⁷ ᤁᤖ ᤐᤋᤪᤢᤛᤖᤧ ᤂᤧᤴ ᤏᤠ᤹ᤖᤢᤖ ᤔᤧᤳᤋᤢ. “ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤌᤣ᤺ᤴᤏᤧ ᤐᤠ᤺ᤳᤋᤢᤒᤣ᥅ ᤀᤡᤱᤃᤠ᤹ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴᤗᤥ॥”

⁵⁸ ᤛᤵᤑᤠ ᤀᤣᤃᤠᤱ ᤘᤣ᤹ᤛᤔᤠ ᤌᤡᤰᤗᤧ ᤂᤢᤏᤧ᤹ ᤏᤡᤛᤢᤀᤠᤱ ᤔᤧᤳᤋᤢ. “ᤂᤧᤏᤧ᤹ᤃ ᤂᤧᤱᤜᤠ᤹ᤏᤢᤀᤣ ᤁᤧᤘᤕᤧᤖᤥ॥” ᤁᤖ ᤐᤋᤪᤢᤛᤖᤧ ᤐᤠ᤺ᤳᤋᤢ. “ᤔᤣ᤺ᤴᤗᤥ. ᤀᤡᤱᤃᤠ᤹ᤃ ᤔᤧᤘᤕᤠᤱᤅᤡᤴᤗᤥ᥄”

⁵⁹ ᤕᤠᤱᤛᤡ ᤁᤢᤔᤢᤰ ᤌᤡᤰ ᤀᤣᤃᤠᤱ ᤁᤢᤓᤠᤎᤡᤰᤗᤧ ᤂᤢᤏᤧ᤹ ᤏᤡᤛᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤛᤧᤰᤂᤠᤛᤠᤱ ᤂᤢᤏᤧ᤹ᤃ ᤕᤧᤛᤢ᤺ᤴᤏᤢᤀᤣ ᤘᤕᤧᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤃᤠᤗᤡᤗᤗᤠᤶ ᤁᤧᤍᤠᤒᤠᤖᤥ॥”

⁶⁰ ᤁᤖ ᤐᤋᤪᤢᤛᤖᤧ ᤐᤠ᤺ᤳᤋᤢ. “ᤔᤧ᤺ᤶᤒᤧ ᤜᤦ᥄ ᤌᤧᤔᤠᤏᤡ ᤁᤧᤒᤠ᤺ᤳᤋᤢᤒᤣ᥅ ᤀᤡᤱᤃᤠ᤹ᤃ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤠᤴᤗᤥ॥” ᤂᤡᤔᤥ ᤂᤢᤏᤧ᤹ ᤐᤠᤖᤧᤖ ᤐᤳᤇᤧᤸᤗᤧᤛᤠ ᤀᤡᤱᤘᤠᤴ ᤁᤠᤛᤧ॥

⁶¹ ᤕᤧᤛᤢᤖᤧ ᤂᤡᤖᤡ ᤜᤡᤛᤡᤱᤅᤠᤱ ᤐᤋᤪᤢᤛᤧᤴ ᤀᤥᤔᤧᤳᤋᤢ॥ ᤜᤧᤰᤁᤩᤠᤱ ᤍᤠᤱᤒᤠᤸᤗᤧ. “ᤀᤠᤀᤡᤴ ᤀᤡᤱᤘᤠ ᤁᤠᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤛᤢᤶᤗᤧᤱ ᤁᤧᤏᤠ᤹ᤀᤠᤖᤥ” ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤐᤋᤪᤢᤛᤖᤧ ᤁᤢᤏᤡᤱᤘᤠ᤹ ᤛᤢᤶᤗ᤹ᤖᤧ॥

⁶² ᤜᤧᤰᤁᤩᤠᤱ ᤐᤋᤪᤢᤛᤧᤴ ᤗᤰᤂᤢᤶᤔᤥᤏᤢ ᤗ᤺ᤴᤍᤧᤐᤣᤀᤠᤱ ᤀᤢ᤺ᤰᤁᤠᤱ-ᤀᤢ᤺ᤰ ᤜᤠᤒᤧᤖᤥ॥

⁶³ ᤀᤠᤸᤗ ᤕᤧᤛᤢᤴ ᤁᤧᤃᤥᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤐᤡᤔᤠ ᤔᤧᤜᤣ᤺ᤰᤋᤢᤖ ᤔᤧᤜᤡᤵᤋᤢ॥

⁶⁴ ᤁᤢᤔᤡᤰᤁᤡᤴ ᤋᤣ᤺ᤳᤋᤡᤸᤗᤧ ᤔᤧᤍᤧᤵᤋᤢᤖ ᤔᤧᤜᤡᤵᤋᤢᤀᤠᤱ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ ᤜᤠ᤺ᤳᤗᤧ ᤁᤧᤜᤡᤵᤋᤧᤒᤣ᥅ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤧ᤹ᤀᤥ᥄”

⁶⁵ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤖ ᤘᤣ᤹ᤛᤔᤠ ᤕᤖᤡᤰ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤕᤧᤛᤢᤖᤧ ᤁᤢᤍᤰᤗᤧᤱᤘᤠᤀᤥ ᤔᤧᤒᤠ᤺ᤳᤋᤢᤖᤥ॥

ᤕᤧᤛᤢᤴ ᤕᤧᤈᤢᤶᤓᤥᤀᤥ ᤔᤧᤍᤣ᤹ᤖᤢ᤹

⁶⁶ ᤜᤧᤰᤁᤩᤠᤱ ᤂᤠᤀᤥ᤺ᤳᤋᤧᤀᤠᤱ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹. ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤔᤧᤈᤢᤵᤛᤧ॥ ᤜᤧᤰᤁᤩᤠᤱ ᤕᤧᤛᤢᤴ ᤕᤧᤈᤢᤶᤓᤥᤀᤥ ᤔᤧᤍᤣ᤹ᤖᤢᤀᤠᤱ

⁶⁷ ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤏᤧᤴᤒᤡ᥅ ᤕᤠᤵᤔᤡ ᤀᤠᤔᤧᤳᤋᤧ᤹॥” ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤐᤠ᤺ᤳᤋᤢᤱᤛᤠᤱ ᤕᤠᤵᤔᤡ ᤏᤛᤠᤴ ᤁᤧᤴᤈᤥᤃᤡᤴᤗᤥ॥

⁶⁸ ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤣ᤺ᤴᤍᤥᤏᤡᤱᤛᤠᤱ ᤏᤥᤃᤵ ᤕᤠᤵᤔᤡ ᤁᤧᤶᤒᤡᤖᤡᤴ॥

⁶⁹ ᤁᤖ ᤀᤠᤸᤗᤥᤀᤠᤱᤎᤥ ᤀᤡᤱᤃᤠ᤹ ᤔᤧᤴᤇᤠᤶᤛᤠᤴ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤅᤠ᤹ᤖᤥ॥”

⁷⁰ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ᤀᤣ ᤏᤡᤱᤘᤠ᤹ᤑᤢᤛᤠᤏᤧᤒᤡ᥅” ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠᤴ ᤛᤧᤰᤂᤠᤖᤥ॥”

⁷¹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤸᤗ ᤀᤠᤏᤡ᤹ ᤘᤣ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤥ᤺ᤴᤍᤡ ᤌᤣᤀᤠᤱ ᤆᤠᤜᤠᤒᤠ ᤀᤠᤈᤥᤃᤧᤒᤣ᥅ ᤂᤢᤏᤧ᤹ ᤁᤢᤔᤢᤖᤠᤗᤠᤶᤒᤠᤀᤣ ᤀᤠᤏᤡ᤹ ᤂᤠ ᤀᤠᤄᤧᤵᤛᤢᤶᤗᤥ᥄”