ᤗᤢᤁᤠ 18 - LIFOTNT

ᤔᤣᤔᤣᤍᤢᤔᤠ ᤏᤢ ᤂᤠᤛᤧᤴᤗᤥ᤺ᤶᤒᤠ

¹ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤆᤰᤔᤧᤸᤗ᤹ᤀᤣ ᤋᤢᤘᤠ ᤆᤥ᤺ᤰᤔᤠ ᤐᤥᤱ. ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ ᤛᤥ᤺ᤶᤔᤠ ᤔᤧᤏᤢ᤹ᤏᤧᤴ ᤗ᤹ᤖᤡᤰ ᤜᤢ᤹ᤔᤠᤛᤡ ᤑᤠ᤹ᤀᤠᤱ ᤗᤳᤇᤠ ᤂᤧᤍᤠ᤹ ᤔᤧᤳᤋᤢᤛᤡ॥

² “ᤌᤡᤰ ᤕᤧᤰᤕᤰᤁᤥ ᤗᤳᤌᤡᤰ ᤏᤡᤱᤘᤠ᤹ᤑᤢᤔᤠᤱᤏᤢ ᤔᤧᤱᤃᤡ᤺ᤶᤏᤠᤒᤠ. ᤀᤠᤳᤋᤡᤴ ᤔᤏᤠ᤺ᤴᤏᤠᤱ ᤀᤡᤱᤎᤠᤱ ᤔᤧᤶᤒᤡᤔᤏᤠᤒᤠ ᤂᤠᤛᤧᤴᤗᤥ᤺ᤶᤒᤠᤎᤡᤰ ᤘᤕᤧᤖᤥ॥

³ ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤕᤧᤰᤕᤰᤁᤥ ᤔᤣᤔᤣᤍᤢᤔᤠᤎᤡᤰᤁᤠᤱ ᤘᤕᤧ॥ ᤂᤧᤴ ᤀᤧᤳᤗᤧᤱ ᤂᤠᤛᤧᤴᤗᤥ᤺ᤶᤒᤠᤸᤗᤥ ᤋᤩᤧᤖ ᤀᤠᤵᤋᤡᤰ ᤕᤠᤵᤔᤡ ᤁᤧᤃᤢ᤺ᤵᤐᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤠᤛᤧᤴ ᤗᤥ᤺ᤴᤍᤠᤱ ᤐᤡᤖᤠᤱᤅᤧ᤹ ᤑᤠ᤹ᤀᤠᤱ ᤔᤧᤳᤋᤢᤖ ᤘᤕᤧᤖᤥ॥

⁴ ᤜᤧᤰᤁᤣ᤺ᤸᤗᤧ ᤋᤃᤡᤃ ᤂᤧᤴ ᤂᤠᤛᤧᤴᤗᤥ᤺ᤶᤒᤠᤸᤗᤧ ᤁᤥᤈᤠᤰ ᤔᤧᤔᤧᤳᤋᤢᤴ. ᤁᤖ ᤕᤠᤱᤛᤡ ᤀᤰᤂᤣᤗ᤹ᤖᤡᤰ ᤁᤢᤏᤡᤱᤘᤠ᤹ᤀᤥ ᤀᤡ᤺ᤳᤇᤡᤱ. ‘ᤀᤡᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢᤀᤠᤱ ᤔᤧᤃᤡᤀᤠᤴ. ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤀᤡᤱᤎᤠᤱ ᤔᤧᤒᤡᤖᤢᤱᤛᤡᤱᤅᤡᤴ.

⁵ ᤁᤖ ᤁᤴ ᤔᤣᤔᤣᤍᤢᤔᤠᤴ ᤂᤠᤛᤧᤴ ᤔᤧᤗᤥ᤺ᤴᤍᤢᤱᤅᤡᤴ ᤔᤧᤒᤡᤖᤢᤱᤅᤡᤴᤏᤧ ᤑᤠ᤹ᤃᤪ ᤀᤧᤳᤗᤧᤱ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤺ᤳᤋᤠᤀᤠᤱ ᤛᤧᤳᤋᤠᤒᤠ ᤐᤥ᤺ᤰᤂᤧ॥ ᤀᤠᤸᤗ ᤂᤧᤴ ᤂᤠᤛᤧᤴ ᤗᤥ᤺ᤶᤔᤠ ᤐᤡᤔᤠ ᤐᤥ᤺ᤰᤂᤧᤖᤥ॥’”

⁶ ᤍᤠᤱᤒᤠᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤂᤧᤴ ᤋᤠᤵᤑᤧ᤺ᤶᤒᤠ ᤂᤠᤛᤧᤴᤗᤥ᤺ᤶᤒᤠᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥

⁷ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤁᤢᤔᤏᤠᤜᤠ᤹ ᤛᤧᤴᤍᤡᤰ ᤗᤧᤴᤍᤡᤰ ᤔᤧᤜᤠ᤺ᤵᤗ ᤋᤢᤘᤠ ᤆᤥ᤺ᤰᤁᤡ ᤐᤣᤗᤡ ᤔᤧᤓᤠᤰᤁᤡᤸᤗᤧ. ᤂᤢᤏᤧ᤹ ᤛᤧᤰᤂᤠᤛᤠᤱ ᤁᤢᤔᤏᤠᤜᤠ᤹ ᤂᤠᤛᤧᤴ ᤔᤧᤗᤥ᤺ᤴᤍᤢᤴ ᤔᤧᤒᤡᤖᤢᤴᤛᤡᤴᤏᤠᤱ ᤂᤢᤏᤧ᤹ ᤂᤧᤱᤜᤠ᤹ ᤂᤧᤶᤄᤧᤶᤗᤰ ᤗᤠᤵᤋᤢᤛᤡ᤹ᤒᤡ᥅

⁸ ᤜᤧᤰᤁᤣ ᤔᤣ᤺ᤴᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤜᤠᤖᤠᤀᤣ ᤂᤠᤛᤧᤴ ᤗᤥ᤺ᤴᤍᤢᤒᤡᤖᤢᤛᤡ᤹ᤖᤥ॥ ᤁᤖ ᤔᤧᤴᤇᤠᤶᤛᤠᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤠ᤺ᤸᤗᤧ ᤁᤵᤔᤥ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ ᤋᤢᤔᤢᤛᤡ᤹ᤒᤡ᥅”

ᤑᤖᤡᤛᤡ ᤏᤢ ᤀᤣ᤺ᤱᤕᤠᤱ ᤁᤧᤓᤥᤱᤒᤠᤸᤗᤧᤴ ᤂᤧᤍᤠ᤹

⁹ ᤜᤧᤰᤁᤩᤠᤱ ᤕᤧᤛᤢᤖᤧ ᤀᤡᤱᤃᤠ᤹ᤖᤰ ᤛᤠᤶᤕᤥᤒᤠ ᤁᤧᤗ᤹ᤒᤠᤀᤠᤱ ᤘᤣ᤹ ᤔᤏᤠᤜᤠ᤹ ᤜᤡᤏᤠ᤺ᤶ ᤁᤧᤔᤧᤵᤐᤠ ᤔᤏᤠᤜᤠ᤹ ᤁᤴ ᤂᤧᤍᤠ᤹ᤀᤡᤴ ᤔᤧᤳᤋᤢᤛᤡ

¹⁰ “ᤏᤧᤵᤑᤢ ᤔᤏᤠᤜᤠ᤹ ᤔᤠᤱᤜᤡᤶᤔᤥ ᤋᤢᤘᤠ ᤆᤥ᤺ᤰᤛᤧ ᤐᤣᤛᤡ॥ ᤂᤧᤱᤜᤠ᤹ᤀᤥ ᤗᤳᤌᤡᤰᤁᤡᤴ ᤑᤖᤡᤛᤡ ᤏᤢ ᤘᤣ᤹ᤛᤔᤠᤴ ᤀᤣ᤺ᤱᤕᤠᤱ ᤁᤧᤓᤥᤱᤒᤠ ᤘᤕᤧ॥

¹¹ ᤂᤧᤴ ᤑᤖᤡᤛᤡᤴ ᤀᤣ᤺ᤰ ᤕᤧᤶᤛᤡᤱᤅᤠᤱ ᤋᤢᤘᤠ ᤆᤥᤃᤢ. ‘ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤡᤱᤃᤠ᤹ ᤏᤥᤃᤧᤴ ᤐᤡᤏᤧᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤘᤣ᤹ᤛᤔᤠ ᤔᤏᤠᤜᤠ᤹ ᤜᤧᤰᤁᤣ. ᤛᤠᤰᤁᤧᤸᤗᤧᤰᤁᤠᤱ ᤕᤠᤱ ᤁᤧᤓᤥᤱᤒᤠ. ᤔᤏᤠ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤵᤐᤠ. ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ. ᤜᤧᤰᤁᤩᤠᤱ ᤁᤴ ᤀᤣ᤺ᤱᤕᤠᤱ ᤁᤧᤓᤥᤱᤒᤠ ᤜᤧᤰᤁᤣ ᤀᤡᤱᤃᤠ᤹ ᤔᤧᤈᤥ᤺ᤰᤁᤠᤴᤗᤥ॥

¹² ᤀᤡᤱᤃᤠ᤹ ᤕᤧᤳᤏᤠᤶᤗᤧ ᤏᤡᤗᤧᤱ ᤆᤠᤏᤧᤳᤋᤥ ᤕᤢᤱᤅᤠ᤹. ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤥᤛᤢᤱᤒᤠ ᤌᤃᤢᤱᤒᤠ ᤁᤧᤖᤧᤰᤗᤧᤴ ᤌᤡᤒᤥᤱᤗᤰ ᤐᤡᤏᤧᤖᤥ॥’

¹³ “ᤁᤖ ᤂᤧᤴ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤧᤱᤃ ᤔᤠ᤺ᤱᤄᤠ ᤕᤧᤶᤛᤡᤱᤅᤠᤱ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱᤅᤠᤱ ᤀᤥᤔᤧᤶᤔᤀᤣ ᤁᤢᤛᤱᤒᤧᤴ ᤜᤡᤵᤋᤢᤖ ᤜᤠᤒᤧᤖ ᤀᤰᤂᤣ ᤐᤠ᤺ᤳᤋᤢ. ‘ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ. ᤀᤡᤱᤃᤠ᤹ᤃ ᤗᤠᤕᤥᤒᤠᤀᤠᤖᤥ॥’

¹⁴ ᤀᤥᤔᤧᤳᤋᤧᤶᤔᤧ᤹ᤀᤥ. ᤁᤴ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤧᤱᤃ ᤑᤖᤡᤛᤡ᤺ᤴᤏᤢ᤺ᤸᤗᤧ ᤛᤠᤶᤕᤥᤒᤠ ᤐᤥ᤺ᤰᤂᤧᤀᤠᤱ ᤁᤢᤜᤡᤶᤔᤥ ᤐᤣᤖᤥ॥ ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴ ᤔᤏᤠᤴ ᤌᤠ᤺ᤱᤎᤠ᤺ᤱ ᤕᤶᤒᤠ ᤗᤧᤱᤛᤡᤱ. ᤂᤧᤴ ᤆᤢᤱᤈᤡᤃᤧᤴ ᤐᤥᤱᤗᤥ॥ ᤀᤠᤳᤋᤡᤴ ᤆᤢᤱᤈᤡᤃᤧᤴ ᤗᤧᤱᤛᤡᤱ ᤂᤧᤴᤏᤡᤴ ᤕᤶᤒᤗᤠᤒᤠ ᤐᤥᤱᤗᤥ॥”

ᤕᤧᤛᤢ ᤏᤢ ᤜᤡᤴᤈᤠ᤹ᤒᤡᤳᤇᤠᤜᤠ᤹

¹⁵ ᤀᤠᤸᤗ ᤂᤧᤵᤔᤥ ᤔᤏᤠᤜᤠ᤹ᤖᤧ ᤜᤡᤴᤈᤠ᤹ᤒᤡᤳᤇᤠᤜᤠ᤹ᤀᤠᤱ ᤜᤠᤖᤠ᤹ ᤂᤢᤏᤡ᤹ ᤛᤶᤍᤠᤱ ᤕᤧᤛᤢᤖᤧ ᤜᤢᤰ ᤏᤧᤛ᤻ᤛᤢᤀᤠᤱ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤖ ᤑᤠ᤹ᤀᤠᤱ ᤔᤧᤍᤠᤖᤢᤛᤡ. ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤧᤴ ᤔᤧᤏᤡᤛᤢᤀᤠᤱ ᤂᤧᤴ ᤁᤧᤍᤠ᤺ᤵᤐᤠᤜᤠ᤹ ᤔᤧᤓᤧ᤺ᤰᤋᤢᤛᤡ॥

¹⁶ ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤁᤴ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤀᤡᤱᤃᤠ᤹ᤀᤥ ᤋᤠᤔᤠ ᤑᤠ᤺ᤰᤋᤧᤶᤛᤡᤶᤔᤧ᤹ᤀᤥ. ᤂᤧᤱᤜᤠ᤹ ᤔᤧᤛᤠᤰᤋᤧᤶᤛᤡᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤱᤃ ᤁᤴ ᤜᤡᤴᤈᤠ᤹ᤒᤡᤳᤇᤠ ᤜᤧᤰᤋᤱᤒᤠᤜᤠ᤹ᤖᤧᤴᤏᤣᤖᤥ॥

¹⁷ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤜᤠ᤺ᤳᤗᤧ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤜᤧᤰᤁᤣ ᤁᤢᤍᤥ᤺ᤵᤔᤠ ᤏᤡᤱᤘᤠ᤹ᤀᤡᤸᤗᤧ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤔᤧᤍᤠ᤺ᤰᤋᤢᤴ. ᤂᤧᤴ ᤂᤧᤵᤔᤥ ᤗᤠ᤺ᤵᤔᤠ ᤔᤧᤄᤥᤏᤧᤴᤗᤥ॥”

ᤕᤠᤱᤛᤠᤁᤢᤴᤎᤣᤛᤠᤒᤠ ᤏᤢ ᤏᤡᤱᤘᤠ᤹ᤑᤢᤜᤠᤱᤈᤢᤶ

¹⁸ ᤂᤧᤵᤔᤥ ᤛᤢᤜᤠᤱᤕᤢᤰᤐᤠᤎᤡᤰ ᤋᤩᤧᤀᤠᤱ ᤕᤧᤛᤢᤴ ᤛᤣ᤺ᤴᤍᤥᤛᤢ. “ᤁᤧᤏᤢ᤹ᤒᤠ ᤛᤡᤰᤛᤠᤶᤒᤣ. ᤀᤠᤰᤋᤱᤒᤠ ᤏᤢᤒᤠ ᤕᤠ᤺ᤶᤒᤰ ᤆᤥᤃᤢᤱᤅᤡᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥᤛᤢᤱᤒᤣ᥅”

¹⁹ ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤌᤣᤀᤠᤱ ᤀᤡᤱᤃᤠ᤹ ᤁᤧᤏᤢ᤹ᤒᤠ ᤁᤧᤔᤧᤳᤋᤠᤒᤣ᥅ ᤁᤧᤏᤢ᤹ᤒᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤘᤠ᤹ᤖᤥ॥

²⁰ ᤂᤧᤏᤧ᤹ ᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤁᤧᤗᤧᤛ᤻ᤛᤢᤀᤠᤱ ᤁᤧᤘᤠ᤹—‘ᤕᤠᤵᤔᤡ ᤛᤧᤵᤔᤠ ᤔᤧᤏᤢ᤹ᤏᤧᤴ. ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ. ᤂᤢ᤺ᤶᤔᤠ ᤔᤧᤏᤢ᤹ᤏᤧᤴ. ᤀᤡᤱᤗᤧᤰ ᤐᤠ᤺ᤵᤔᤠ ᤔᤧᤏᤢ᤹ᤏᤧᤴ. ᤜᤧᤰᤁᤩᤠᤱ ᤐᤠ-ᤔᤠ ᤀᤡᤱᤎᤠᤱ ᤐᤡᤔᤠᤛᤡᤀᤣ ᤐᤥᤱ॥’”

²¹ ᤂᤧᤴ ᤔᤏᤠ᤺ᤸᤗᤧ ᤏᤥᤃᤵ ᤐᤡᤖᤢ. “ᤛᤡᤰᤛᤠᤶᤒᤣ. ᤁᤴ ᤁᤧᤖᤧᤰ ᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ᤃ ᤀᤡᤱᤃᤠ᤹ ᤜᤡᤴᤈᤠ᤹ ᤘᤕᤠᤱᤅᤠᤱᤎᤥᤀᤣ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗ ᤘᤠ᤹ᤀᤠᤖᤥ॥”

²² ᤕᤧᤛᤢᤖᤧ ᤂᤧᤴ ᤂᤧᤵᤛᤢᤀᤠᤱ ᤔᤧᤳᤋᤢ. “ᤀᤠᤸᤗᤛᤠᤱ ᤂᤧᤏᤧ᤹ ᤕᤠ᤺ᤶᤒᤰᤌᤡᤰ ᤆᤥ᤺ᤰᤔᤠ ᤁᤧᤃᤳᤋᤢ᤹ᤖᤥ॥ ᤂᤧᤏᤧ᤹ ᤁᤧᤃᤳᤋᤢᤒᤠᤴ ᤁᤧᤖᤧᤰ ᤛᤱᤄᤧᤍᤣᤛᤧ᤹ ᤜᤧᤰᤁᤩᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤡᤖᤧᤛᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤛᤠᤱᤃᤪᤠᤶᤐᤣᤍᤠᤱᤅᤥ ᤕᤠᤱᤛᤠᤁᤢᤴᤎᤣ ᤁᤧᤄᤥᤛᤢ᤹ᤖᤥ॥ ᤜᤧᤰᤁᤩᤠᤱ ᤑᤧᤖᤧ᤹ᤀᤠᤱ ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ॥”

²³ ᤁᤖ ᤂᤢᤏᤧ᤹ ᤂᤧᤴ ᤐᤠ᤺ᤴᤏᤡᤴ ᤂᤧᤵᤛᤢᤸᤗᤧ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤃᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤀᤠᤳᤋᤠᤳᤋᤠᤴᤏᤣ ᤕᤠᤱᤛᤠᤁᤢᤴᤎᤣᤛᤠᤒᤠ ᤘᤕᤧᤖᤥ॥

²⁴ ᤕᤧᤛᤢᤖᤧ ᤂᤧᤴ ᤀᤥᤔᤧᤳᤋᤢᤀᤠᤱ ᤐᤠ᤺ᤳᤋᤢ. “ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ᤃ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠ ᤛᤠ᤹ᤖᤡᤰ ᤛᤠᤰᤗᤥ᥄

²⁵ ᤛᤧᤰᤂᤠᤀᤣ ᤕᤠᤱᤛᤠᤁᤢᤴᤎᤣᤛᤠᤒᤧᤴ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠᤏᤢ᤺ᤸᤗᤧ ᤀᤢᤔᤣ᤺ᤴ ᤛᤶᤔᤣ᤺ᤳᤋᤡᤸᤗᤧ ᤁᤢᤜᤱᤅᤥ ᤗᤠ᤺ᤵᤔᤠ ᤀᤢᤛᤢᤖᤢ ᤆᤥᤰᤗᤥ॥”

²⁶ ᤁᤴ ᤐᤠᤴ ᤁᤧᤄᤧᤶᤒᤠᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤜᤧᤰᤁᤣ᤺ᤸᤗᤧ ᤜᤠᤳ ᤋᤠᤱᤛᤧ᤺ᤵᤔᤠ ᤛᤢᤰᤐᤠᤒᤣ᥅”

²⁷ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤔᤧᤴᤇᤠᤶ ᤕᤠᤵᤔᤡᤖᤧ ᤗᤠᤃᤡ ᤛᤢᤰᤔᤧᤴᤍᤧᤵᤔᤏᤠᤒᤠ ᤐᤠ᤺ᤴᤜᤠ᤹ᤃ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤢᤰᤋᤢ᤹ᤖᤥ॥”

²⁸ ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤐᤠ᤺ᤳᤋᤢ. “ᤀᤠᤏᤡᤃᤣ ᤜᤡᤶᤎᤠ᤺ᤱ ᤗᤧᤖᤢᤶᤒᤧᤀᤠᤱ ᤂᤧᤏᤧ᤹ ᤋᤡᤶᤔᤠᤛᤡᤃᤧᤀᤠᤱ ᤘᤕᤡᤃᤧᤖᤥ॥”

²⁹ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤏᤡᤱᤘᤠ᤹ᤑᤢᤜᤠᤱᤈᤢᤶᤖᤧ ᤗᤠᤃᤡ ᤜᤡᤶᤎᤠ᤺ᤱ. ᤔᤣ᤺ᤳ. ᤑᤢ᤹ᤏᤢᤛᤠ᤹ᤜᤠ᤹. ᤔᤠ-ᤒᤠᤜᤠ᤹. ᤀᤡᤃᤪ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤁᤧᤗᤧᤵᤐᤠᤜᤠ᤹ᤖᤧ

³⁰ ᤁᤴ ᤜᤡᤱᤔᤴᤏᤥ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤔᤧᤄᤥᤛᤢ᤹. ᤜᤧᤰᤁᤩᤠᤱ ᤁᤧᤍᤠᤒᤠ ᤕᤧᤶᤔᤥ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥᤛᤢ᤹ᤖᤥ॥”

ᤕᤧᤛᤢᤖᤧ ᤕᤠᤶᤔᤥ ᤁᤢᤛᤡᤔᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢ᤹

³¹ ᤕᤧᤛᤢᤖᤧ ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤌᤡᤰᤗᤧᤵᤔᤠᤱ ᤋᤣ᤹ᤖᤢᤛᤡᤀᤠᤱ ᤔᤧᤳᤋᤢᤛᤡ. “ᤀᤠᤸᤗ ᤂᤧᤵᤛᤧᤶᤔᤧ᤹ᤀᤥ. ᤀᤠᤏᤡ᤹ᤃ ᤕᤖᤢᤛᤗᤧᤔ ᤌᤥ ᤀᤠᤒᤣ᤺ᤰᤗ ᤀᤠᤒᤳᤗᤥ॥ ᤂᤧᤵᤔᤥ ᤀᤢᤴᤇᤣ᤺ᤴᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤛᤠᤵᤋᤢᤒᤠ ᤁᤧᤖᤧᤰ ᤐᤠ᤺ᤴᤏᤡᤴ ᤁᤧᤳᤗᤥ॥

³² ᤂᤢᤏᤧ᤹ ᤔᤧᤍᤧᤶᤛᤢᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤔᤧᤒᤡᤖᤢ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢ᤹. ᤁᤢᤏᤠᤔᤧᤎᤠᤛᤢ᤹. ᤌᤩᤠ᤺ᤳ ᤔᤧᤎᤥ᤺ᤰᤋᤢ᤹. ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢ᤹. ᤜᤧᤰᤁᤩᤠᤱ ᤂᤢᤏᤧ᤹ ᤋᤧ᤺ᤶᤓᤢᤰ ᤔᤧᤕᤠᤰᤋᤢᤀᤠᤱ ᤔᤧᤛᤧᤖᤢ᤹.

³³ ᤜᤧᤰᤁᤣᤛᤠᤱ ᤛᤢᤶᤕᤧᤴ ᤀᤣᤃᤠᤱ ᤂᤢᤏᤧ᤹ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤗᤥ॥”

³⁴ ᤁᤖ ᤂᤧᤱᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ. ᤌᤣᤀᤠᤱᤓᤧᤸᤗᤧ ᤁᤴ ᤐᤠ᤺ᤴᤏᤡᤸᤗᤧ ᤁᤢᤒᤣᤴ ᤂᤧᤱᤜᤠ᤹ᤖᤥᤗᤠᤶ ᤔᤠ᤹ᤖᤧᤀᤠᤱ ᤘᤕᤧᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤁᤴ ᤐᤠ᤺ᤴᤏᤡᤴ ᤂᤢᤏᤡ᤹ ᤏᤡᤱᤘᤠ᤹ ᤛᤡᤃᤠᤱ ᤔᤧᤒᤣᤏᤧᤴᤗᤥ॥

ᤔᤡᤰᤑ᤺ᤶᤒᤠ ᤆᤠᤃᤧᤏᤠ᤺ᤰᤐᤧᤸᤗᤧ ᤏᤡᤛᤢᤒᤠ

³⁵ ᤕᤧᤛᤢᤴ ᤕᤧᤖᤡᤜᤥ ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱ ᤁᤧᤖᤧᤸᤗᤧ ᤂᤧᤵᤔᤥ ᤔᤡᤰᤑ᤺ᤶᤒᤠᤎᤡᤰ ᤆᤠᤏᤠ᤺ᤰᤁᤡ ᤗᤠᤶᤔᤡᤸᤗᤧ ᤁᤢᤒᤣᤛᤠᤱ ᤕᤢᤅᤧ॥

³⁶ ᤂᤧᤸᤗᤧ ᤁᤢᤒᤣᤛᤠᤱᤏᤢ ᤔᤏᤠᤜᤠ᤹ ᤔᤧᤒᤣ᤺ᤰᤗ ᤔᤧᤒᤳ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤌᤣ᤺ᤴᤏᤧ ᤐᤥᤱᤗ ᤐᤵᤐᤣ ᤑᤠ᤹ᤀᤠᤱ ᤔᤏᤠᤜᤠ᤹ ᤛᤣ᤺ᤴᤍᤥᤛᤢᤛᤡ॥

³⁷ ᤂᤧᤱᤜᤠ᤹ᤖᤧ ᤂᤧᤴ ᤏᤥᤃᤵ ᤔᤧᤒᤡᤖᤢ. “ᤏᤠᤛᤖᤋᤛᤔᤠ ᤕᤧᤛᤢᤴ ᤐᤣ᤺ᤰᤗ ᤐᤳᤗᤥ॥”

³⁸ ᤂᤧᤸᤗᤧ ᤀ᤺ᤰᤋᤧᤖ ᤀᤰᤂᤣ ᤐᤠ᤺ᤳᤋᤢ. “ᤍᤠᤀᤢᤍᤖᤧ ᤁᤢᤛ᤻ᤛᤠ ᤕᤧᤛᤢᤀᤣ. ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ॥”

³⁹ ᤜᤧᤰᤁᤣ᤺ᤸᤗᤧ ᤂᤧᤴ ᤗᤠᤶᤗᤥ ᤁᤧᤒᤣ᤺ᤰᤐᤠ ᤔᤏᤠᤜᤠ᤹ᤖᤧ “ᤛᤫᤠ᤺ᤳ ᤕᤢᤅᤧ᤹” ᤔᤧᤔᤧᤳᤋᤢᤖ ᤂᤧᤴ ᤔᤧᤓᤧ᤺ᤰᤋᤢ. ᤁᤖ ᤂᤧᤸᤗᤧ ᤀᤠᤸᤗᤛᤠᤱ ᤛᤠ᤹ᤖᤡᤰ “ᤍᤠᤀᤢᤍᤖᤧ ᤁᤢᤛ᤻ᤛᤠ᤺ᤀᤣ. ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ” ᤐᤠ᤺ᤳᤋᤢᤖ ᤀ᤺ᤰᤋᤧ॥

⁴⁰ ᤕᤧᤛᤢᤴ ᤂᤧᤵᤔᤥ ᤕᤧᤶᤛᤡᤱᤅᤠᤱ ᤂᤧᤴ ᤆᤠᤃᤧᤏᤠ᤺ᤰᤐᤧᤴ ᤁᤢᤒᤣᤛᤠᤱ ᤔᤧᤍᤠᤖᤢᤏᤡ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ॥ ᤜᤧᤰᤁᤩᤠᤱ ᤂᤧᤴᤏᤠᤱ ᤕᤧᤛᤢᤖᤧ ᤁᤢᤒᤣᤛᤠᤱ ᤋᤩᤧᤀᤠᤱ ᤕᤧᤛᤢᤖᤧ ᤂᤧᤴ ᤛᤣ᤺ᤴᤍᤥᤛᤢ.

⁴¹ “ᤀᤡᤱᤃᤠ᤹ ᤂᤧᤏᤧ᤹ ᤌᤧᤔᤠ ᤆᤥᤃᤢᤱ ᤐᤡᤏᤧ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤒᤣ᥅” ᤂᤧᤸᤗᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤏᤡᤔᤠ ᤁᤧᤛᤢᤰᤐᤠ ᤐᤥᤱᤅᤠᤖ॥”

⁴² ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ ᤏᤡᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤏᤛᤠ᤺ᤴᤏᤡᤸᤗᤧ ᤁᤧᤏᤢᤛᤧᤀᤠᤱ ᤁᤧᤘᤠ᤹ᤖᤥ॥”

⁴³ ᤂᤡᤔᤥ ᤂᤧᤴ ᤏᤡᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖ ᤕᤧᤛᤢᤖᤧ ᤁᤢᤀᤣᤃᤠᤱ ᤌᤠᤛᤡᤱᤗᤥ॥ ᤔᤏᤠᤜᤠ᤹ᤖᤧᤀᤠᤱ ᤂᤧᤴ ᤔᤧᤏᤡᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥᤛᤢᤖᤥ॥