ᤗᤢᤁᤠ 17 - LIFOTNTᤗᤠᤕᤥ ᤏᤢ ᤗᤧᤵᤔᤡ ( ᤔᤳᤋᤡ ᥇᥎:᥌-᥍ . ᥈᥇-᥈᥈ ; ᤔᤷᤁᤢ ᥏:᥊᥈ ) 1 ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤗᤠᤕᤥᤀᤥ ᤁᤧᤎᤠᤒᤠ ᤐᤠ᤺ᤴᤜᤠ᤹ ᤋᤠ᤺ᤀᤣᤖᤥ. ᤁᤖ ᤂᤧᤴ ᤐᤠ᤺ᤴᤜᤠ᤹ ᤁᤧᤍᤠ᤺ᤵᤐᤠ ᤔᤏᤠᤜᤠ᤹ᤃ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ॥ 2 ᤁᤴ ᤆᤢᤰᤛᤠ ᤜᤡᤴᤈᤠ᤹ᤎᤡᤰ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤒᤠᤱᤃ ᤁᤢᤏᤡ᤺ᤱᤔᤥ ᤗᤢᤶᤛᤢᤶᤔᤡᤴ ᤑᤥ᤺ᤶᤔᤠᤀᤠᤱ ᤘᤖᤰᤁᤥ ᤗᤠᤵᤑᤢᤔᤠᤸᤗᤧᤀᤣ ᤏᤢᤒᤠ ᤐᤥᤱᤗᤥ॥ 3 ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ᥄ ᤘᤣ᤹ ᤏᤢᤛᤠ᤹ᤀᤡᤸᤗᤧ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤏᤧ ᤑᤠ᤹ᤃᤪ ᤂᤧᤴ ᤑᤧ᤺ᤰᤋᤧ᤹. ᤜᤧᤰᤁᤩᤠᤱ ᤁᤢᤗᤠᤕᤥᤗᤠᤶ ᤜᤡᤴᤇᤡᤱᤏᤧ ᤑᤠ᤹ᤃᤪ ᤗᤧᤵᤔᤡ ᤐᤡᤖᤧ᤹ᤀᤥ॥ 4 ᤜᤧᤰᤁᤩᤠᤱ ᤂᤢᤏᤧ᤹ ᤌᤡᤰ ᤕᤧᤴᤏᤥ ᤏᤢᤛᤡᤗᤧᤱ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤀᤠᤱ ᤏᤢᤛᤡᤗᤧᤱᤅᤣ ᤀᤡᤱᤃᤠ᤹ ᤜᤡ᤺ᤴᤍᤠᤱ ᤑᤠ᤹ᤀᤠᤱ ᤐᤠ᤺ᤳᤋᤢ᤹ᤏᤧ ᤑᤠ᤹ᤃᤪ ᤗᤧᤵᤔᤡ ᤐᤡᤖᤧ᤹ᤀᤥ॥” ᤏᤛᤠᤴ 5 ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤍᤠᤱᤒᤠ ᤕᤧᤛᤢᤴ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤏᤡᤃᤣ ᤏᤛᤠ᤺ᤴᤏᤡᤴ ᤑᤥᤛᤧ ᤀᤠᤒᤡᤖᤧ᤹ᤀᤥ॥” 6 ᤜᤧᤰᤁᤣ᤺ᤸᤗᤧ ᤍᤠᤱᤒᤠᤸᤗᤧ ᤔᤧᤳᤋᤢᤛᤡ. “ᤂᤡᤏᤡ᤹ ᤏᤛᤠ᤺ᤴᤏᤡᤴ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤎᤡᤰ ᤕᤠ᤺ᤳᤇᤠᤱ ᤁᤴ ᤂ᤺ᤰᤛᤣ᤹ᤒᤢᤱᤔᤠᤴ ‘ᤜᤠ᤹ᤕᤠᤰ ᤀᤠᤃᤧ᤹ᤀᤠᤱ ᤘᤠᤜᤱᤅᤥ ᤗᤠᤵᤑᤢᤛᤡᤱᤅᤧ᤹’ ᤁᤧᤔᤧᤳᤋᤢᤶᤏᤧ ᤑᤠ᤹ᤃᤪ ᤂᤧᤸᤗᤧ ᤁᤧᤔᤧᤳᤋᤢᤶᤒᤠ ᤁᤢᤀᤡᤛᤡᤰ ᤆᤥᤃᤢ᤹ᤖᤥ॥” ᤏᤛᤠ᤺ᤴᤛᤠᤒᤠ ᤛᤧᤘᤠᤖᤥᤒᤠ 7 “ᤂᤡᤏᤡ᤹ᤀᤥ ᤜᤠ᤺ᤳᤗᤧ ᤁᤧᤰᤆᤢ ᤁᤧᤎᤥ᤺ᤱᤒᤠ ᤛᤧᤘᤠᤖᤥᤒᤠᤴ ᤀᤡᤃᤪ ᤔᤧᤸᤗᤢᤰ ᤆᤠᤃᤧᤖᤠᤶᤒᤧᤴ ᤕᤠ᤺ᤶᤒᤰᤁᤥᤗᤠᤶ ᤏᤢ᤺ᤱ ᤋᤠ᤺ᤸᤗᤧ ‘ᤜᤠᤖᤠ᤹ ᤑᤧᤖᤧ᤹ᤀᤠᤱ ᤆᤠᤈᤠᤛᤧ ᤕᤢᤱᤛᤡᤱᤅᤧ᤹’” ᤁᤧᤔᤧᤳᤋᤢᤶᤒᤣ᥅ 8 ᤂᤧᤸᤗᤧ ᤁᤢᤗᤧᤰᤘᤠ “ᤆᤠᤔᤠ ᤌᤢᤱᤔᤠ ᤕᤠᤖᤡᤵ ᤆᤥᤃᤧ᤹ ᤜᤧᤰᤁᤩᤠᤱ ᤑ᤹ᤀᤡ ᤕᤢᤵᤛᤡᤱᤅᤧ᤹ᤀᤠᤱ ᤀᤡᤱᤃᤠ᤹ ᤆᤠᤔᤠ ᤌᤢᤱᤔᤠ ᤔᤧᤴᤇᤢ᤺ᤳᤋᤣ ᤌᤠᤖᤡᤰ ᤜᤠᤱᤄᤠᤱᤅᤧ᤹ ᤜᤧᤰᤁᤩᤠᤱᤗᤰ ᤂᤧᤏᤧ᤹ ᤆᤧ᤹ ᤁᤧᤶᤔᤧᤳᤋᤢᤶᤔᤡᤶᤒᤡ᥅ 9 ᤁᤢᤛᤧᤘᤠᤖᤥᤒᤧᤸᤗᤧ ᤏᤢᤖᤡᤰ ᤕᤠ᤺ᤶᤒᤰ ᤆᤥᤃᤢ ᤑᤠ᤹ᤀᤠᤱ ᤁᤢᤴᤍᤠᤱᤒᤠᤸᤗᤧ ᤁᤧᤛᤧᤘᤠᤖᤥᤒᤠᤴ ᤀᤥᤒᤧ ᤏᤢᤖᤡᤰ ᤛᤧᤘᤠ ᤁᤧᤔᤧᤳᤋᤠᤱᤗᤥ ᤑᤠ᤹ᤀᤠᤱ ᤔᤧᤳᤋᤢᤒᤡ᥅” 10 “ᤂᤡᤏᤡ᤹ᤀᤠᤱ ᤔᤧᤵᤔᤏᤠᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶ ᤁᤧᤛᤢᤖᤢᤶᤏᤧ ᤑᤠ᤹ᤃᤪ ᤀᤰᤂᤣ ᤐᤠ᤺ᤳᤋᤧᤶᤔᤧ᤹. ‘ᤀᤠᤏᤡᤃᤧᤃ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤁᤧᤛᤣᤘᤠᤖᤥᤒᤠᤛᤡᤃᤧᤖᤥ॥ ᤀᤠᤏᤡᤃᤧᤃ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣᤖᤰ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ॥’” ᤕᤧᤛᤢᤖᤧ ᤌᤡᤒᤥᤱ ᤔᤏᤠᤜᤠ᤹ ᤘᤣ᤺ᤴᤍᤢᤛᤡ᤹ 11 ᤜᤧᤰᤁᤩᤠᤱ ᤕᤧᤛᤢᤴ ᤕᤖᤢᤛᤗᤧᤶᤔᤥ ᤐᤣᤖ ᤐᤳᤇᤧᤸᤗᤧ ᤃᤠᤗᤡᤗ ᤏᤢ ᤛᤠᤔᤖᤡᤕᤠᤖᤧ ᤁᤢᤗᤢᤶᤔᤥ ᤐᤥ᤺ᤰᤂᤧᤖ ᤐᤣ॥ 12 ᤜᤧᤰᤁᤩᤠᤱ ᤌᤡᤰ ᤐᤠᤱᤓᤣ᤹ ᤁᤢᤒᤣᤛᤠᤱ ᤁᤧᤖᤧᤸᤗᤧ ᤂᤧᤵᤔᤥ ᤌᤡᤒᤥᤱ ᤗᤥᤃᤣ᤹ ᤋᤢᤰᤔᤠᤸᤗᤧ ᤕᤠᤱᤄᤢᤛᤡᤒᤠᤜᤠ᤹ ᤋᤢᤔᤢᤛᤡ॥ ᤂᤧᤱᤜᤠ᤹ ᤔᤠ᤺ᤱᤄᤠ ᤔᤧᤕᤧᤶᤛᤡᤱᤅᤠᤱ 13 ᤕᤶᤒᤠ ᤀᤡᤰᤗᤠᤀᤥ ᤔᤧᤀ᤺ᤰᤋᤧ. “ᤍᤠᤱᤒᤠ ᤕᤧᤛᤢᤀᤣ. ᤀᤠᤏᤡᤃᤣ ᤗᤢᤱᤔᤠ᤹ ᤀᤠᤍᤢᤰᤋᤧ᤹ᤀᤠᤱ ᤀᤠᤏᤢᤛᤧ᤹ᤀᤥ॥” 14 ᤕᤧᤛᤢᤖᤧᤀᤠᤱ ᤂᤧᤱᤜᤠ᤹ ᤀᤥᤔᤧᤳᤋᤢᤛᤡᤖ ᤔᤧᤳᤋᤢᤛᤡ. “ᤐᤣᤃᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤥ ᤀᤥᤛᤣ᤺ᤴᤎᤠᤰᤁᤠᤛᤡᤶᤔᤧ᤹ᤀᤥ॥” ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤖ ᤔᤧᤒᤳᤇᤧᤸᤗᤧᤛᤠ ᤗᤥᤃᤣ᤹ ᤋᤢᤰᤔᤥᤗᤠᤶ ᤔᤧᤏᤢᤖᤧᤖᤥ॥ 15 ᤜᤧᤰᤁᤩᤠᤱ ᤌᤡᤰ ᤁᤧᤍᤢᤰᤐᤠᤸᤗᤧ ᤂᤢᤏᤧ᤹ ᤏᤢᤖᤧᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤢᤖ ᤏᤢ᤺ᤰᤂᤧ ᤋᤩᤧᤖᤥ॥ 16 ᤂᤧᤴ ᤕᤧᤛᤢᤖᤧ ᤁᤢᤗᤠᤱᤈᤰᤐᤥ ᤛᤠᤶᤒᤥᤴ ᤑᤴᤇᤡᤱᤗ ᤏᤥᤃᤧᤴ ᤐᤡᤖᤢᤖᤥ॥ ᤂᤧᤱᤃ ᤛᤠᤔᤖᤡ ᤛᤢᤘᤠᤱᤛᤔᤠ ᤘᤕᤧᤖᤥ॥ 17 ᤕᤧᤛᤢᤖᤧ ᤐᤠ᤺ᤳᤋᤢ. “ᤁᤴ ᤋᤢᤰᤔᤥᤗᤠᤶ ᤁᤧᤘᤣ᤺ᤵᤐᤠᤜᤠ᤹ᤃ ᤌᤡᤒᤥᤱᤏᤧ (᥇᥆) ᤔᤧᤘᤕᤧ. ᤁᤖ ᤘᤣ᤹ ᤑᤠᤱᤛᤡᤜᤠ᤹ (᥏) ᤀᤠᤳᤋᤠᤴ ᤔᤧᤒᤣᤒᤣ᥅ 18 ᤀᤠᤰᤂᤣᤀᤠᤱ ᤁᤴ ᤗᤳᤇᤠ ᤌᤡᤶᤔᤧᤴᤍᤱ ᤔᤏᤠᤴᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤔᤡᤍᤡᤱ ᤐᤡᤛᤧ ᤏᤢ᤺ᤰᤂᤧ ᤋᤩᤧᤒᤣ᥅” 19 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤥᤃᤧ᤹ᤀᤠᤱ ᤐᤣᤃᤧ᤹ᤀᤥ॥ ᤁᤧᤏᤛᤠ᤺ᤴᤏᤡᤸᤗᤧ ᤂᤧᤏᤧ᤹ ᤁᤧᤏᤢᤛᤧᤖᤥ॥” ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤋᤠᤖ ᤐᤳ ( ᤔᤳᤋᤡ ᥈᥊:᥈᥉-᥈᥎ ) 20 ᤌᤡᤰᤕᤧᤴ ᤑᤖᤡᤛᤡᤜᤠ᤹ᤖᤧ ᤕᤧᤛᤢᤴ ᤛᤣ᤺ᤴᤔᤧᤍᤥᤛᤢ. “ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤀᤠᤵᤑᤠᤸᤗᤧ ᤋᤠᤒᤣ᥅” ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤏᤡ᤺ᤶᤏᤠᤒᤠ ᤔᤡᤰᤛᤣ᤺ᤴᤏᤢ ᤔᤧᤍᤠᤏᤧᤴ॥ 21 ᤜᤠ᤺ᤳᤗᤧᤀᤠᤱ ‘ᤂᤧᤴ ᤂᤧᤳᤏᤠ ᤘᤠ᤹. ᤁᤳᤏᤠ ᤘᤠ᤹’ ᤑᤠ᤹ᤀᤠᤱ ᤐᤠ᤺ᤵᤔᤠ ᤔᤧᤛᤢᤰᤋᤢᤴ॥ ᤀᤥᤔᤧᤳᤋᤧᤶᤔᤧ᤹. ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤱᤃ ᤂᤡᤏᤡ᤹ ᤗᤢᤶᤔᤥᤀᤣ ᤘᤠ᤹ᤖᤥ॥” 22 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤸᤗ ᤀᤰᤋᤱᤒᤠ ᤕᤧᤶᤔᤡᤴ ᤋᤠᤖ ᤐᤳᤗᤥ. ᤂᤧᤴ ᤕᤧᤶᤔᤥᤃ ᤔᤧᤴᤇᤠᤶᤛᤠᤴ ᤁᤢᤕᤧᤴᤏᤥ ᤜᤧᤰᤁᤣᤀᤣ ᤂᤡᤏᤡ᤹ ᤀᤥᤔᤧᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶ. ᤁᤖ ᤁᤧᤱᤄᤥᤛᤢᤶᤔᤡᤴᤗᤥ॥ 23 ᤔᤏᤠᤜᤠ᤹ᤖᤧ ᤂᤢᤏᤧ᤹ ᤂᤧᤳᤏᤠ ᤘᤠ᤹. ᤂᤢᤏᤧ᤹ ᤁᤳᤏᤠ ᤘᤠ᤹ ᤗ᤹ᤖᤡᤰ ᤁᤧᤶᤔᤧᤳᤋᤡᤸᤗᤧ ᤂᤢᤏᤧ᤹ ᤁᤢᤀᤥᤔᤧᤳᤇᤧ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ॥ 24 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤁᤢᤍᤠᤔᤠ ᤕᤧᤴᤏᤥ ᤛᤠ᤺ᤶᤓᤣ ᤗᤧᤰᤁᤡᤸᤗᤧ ᤋᤠᤱᤛᤠᤰᤐᤠᤸᤗᤧ ᤌᤡᤰ ᤁᤢᤕᤠᤀᤥᤏᤢ ᤘᤣ᤹ᤛᤔᤠ ᤁᤢᤕᤠᤀᤥ ᤌᤠᤖᤡᤰ ᤌᤥ᤹ᤖᤢᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤁᤧᤖᤧᤰᤗᤥ ᤀᤢᤛᤣᤴᤎᤠᤰᤛᤡᤱᤀᤠᤖᤥ॥ 25 ᤁᤖ ᤁᤠᤰᤏᤢ ᤋᤃᤡ ᤔᤧᤴᤇᤠᤶᤛᤠᤴ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤹᤺. ᤜᤧᤰᤁᤩᤠᤱ ᤁᤴ ᤕᤧᤶᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤏᤠ᤹ᤖᤢᤖᤥ॥ 26 ᤜᤧᤰᤁᤩᤠᤱ ᤔᤧᤴᤇᤠᤶᤛᤠᤴ ᤏᤢ᤺ᤱ ᤕᤢ᤺ᤸᤗᤧ ᤏᤢᤜᤠᤖᤧ ᤁᤢᤕᤧᤶ ᤜᤧᤰᤁᤣᤀᤣ ᤐᤥᤱᤗᤥ॥ 27 ᤏᤢᤜᤴ ᤘᤠᤗᤠᤎᤠᤀᤥ ᤗᤠᤛᤧᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤶᤒᤠ ᤘᤠᤍᤥ᤺ᤰᤔᤠ ᤌᤠᤅᤧᤀᤠᤱ ᤁᤠᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ ᤔᤧᤏᤡᤒᤧ ᤔᤧᤛᤩᤧ. ᤁᤖ ᤂᤢᤏᤧ᤹ ᤘᤠᤗᤠᤎᤠᤀᤥ ᤗᤠᤛᤧᤒᤠ ᤕᤧᤴ ᤌᤠᤖᤡᤰ ᤔᤏᤠᤜᤠ᤹ ᤔᤧᤈᤖ ᤔᤧᤎᤢᤅᤢᤖ ᤜᤧᤰᤁᤩᤠᤱ ᤔᤣ᤺ᤰᤂᤡᤶ ᤔᤧᤈᤥᤃᤢᤖ ᤔᤧᤘᤕᤧ॥ 28 ᤜᤧᤰᤁᤩᤠᤱ ᤗᤢᤋᤧᤸᤗᤧ ᤁᤢᤕᤧᤶᤔᤥᤀᤠᤱ ᤜᤧᤰᤁᤣᤀᤣ ᤐᤥ᤺ᤰᤂᤧ॥ ᤔᤏᤠᤜᤠ᤹ᤖᤧ ᤔᤧᤈᤖ ᤔᤧᤎᤢᤅᤢᤖ ᤔᤧᤘᤕᤧ. ᤂᤧᤱᤜᤠ᤹ ᤆᤡᤃᤰᤘᤠ ᤛᤱ-ᤀᤡᤱᤏᤢ. ᤀᤡᤰ ᤔᤏᤢ. ᤜᤡᤶᤎᤠ᤺ᤱ ᤆᤥ᤺ᤰᤏᤢ ᤔᤧᤘᤕᤧᤖᤥ॥ 29 ᤁᤖ ᤗᤢᤋᤖᤧ ᤛᤍᤥᤔ ᤕᤧᤰᤕᤰᤁᤡᤴ ᤗᤧᤖᤢᤀᤠᤱ ᤐᤣ᤺ᤸᤗᤧ ᤋᤠᤱᤛᤠᤰᤐᤥᤗᤠᤶ ᤔᤡᤖᤠ᤺ᤰ ᤏᤢ ᤌᤠᤒᤢ᤺ᤴ ᤌᤩᤧᤀᤠᤱ ᤁᤠᤰ ᤔᤏᤠᤜᤠ᤹ ᤔᤧᤰᤂᤢᤛᤡᤖᤥ॥ 30 ᤜᤧᤰᤁᤣᤗ᤹ᤖᤡᤰᤁᤣ ᤔᤏᤠᤜᤠ᤹ ᤕᤠᤖᤡᤵ ᤔᤧᤶᤒᤥᤱᤅᤣ ᤔᤧᤘᤠ᤹ᤀᤡᤸᤗᤧ ᤔᤧᤴᤇᤠᤶᤛᤠᤴ ᤀᤥᤛᤣ᤺ᤴᤍᤠᤱ ᤐᤥᤱᤗᤥ॥ 31 “ᤂᤧᤴ ᤕᤧᤶᤔᤥ ᤜᤡᤶ ᤛᤶᤍᤠᤱ ᤁᤧᤘᤠ᤹ᤒᤠ ᤔᤏᤠᤴ ᤆᤡᤃᤰᤘᤠ ᤗᤠᤛᤧ ᤜᤡᤶᤛᤡᤃᤠᤱ ᤔᤧᤗᤠ᤺ᤳᤏᤧᤴᤗ. ᤜᤧᤰᤁᤩᤠᤱ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤁᤧᤘᤠ᤹ᤒᤠ ᤔᤏᤠᤴ ᤆᤡᤃᤰᤘᤠ ᤗᤠᤛᤧ ᤜᤡᤶᤔᤥ ᤔᤧᤏᤢ᤺ᤱᤏᤧᤴ ᤔᤧᤒᤣ᤺ᤰᤏᤧᤴᤗᤖᤥ॥ 32 ᤗᤢᤋᤖᤧ ᤁᤢᤔᤣ᤺ᤳᤋᤡᤴ ᤕᤢᤶ ᤛᤡᤳᤗᤠᤱ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ᥄ 33 ᤜᤠ᤺ᤳᤗᤧ ᤁᤢᤜᤡᤱᤔᤴᤏᤡᤴ ᤛᤧ᤺ᤵᤋᤢᤱ ᤗ᤹. ᤂᤧᤸᤗᤧ ᤂᤧᤴᤏᤠᤱ ᤔᤠᤛᤢ᤹ᤖᤥ. ᤁᤖ ᤜᤠ᤺ᤳᤗᤧ ᤁᤢᤜᤡᤱᤔᤴᤏᤡᤴ ᤔᤠᤛᤢ᤹. ᤂᤧᤸᤗᤧ ᤛᤧ᤺ᤵᤋᤢ᤹ᤖᤥ॥ 34 ᤂᤧᤴ ᤛᤧᤴᤍᤡᤰ ᤏᤧᤵᤑᤢ ᤔᤏᤠᤜᤠ᤹ ᤛᤥᤖᤡᤰ ᤏᤧᤛᤡ᤹. ᤌᤡᤰᤁᤡᤴ ᤋᤣ᤹. ᤘᤣ᤹ᤛᤔᤠᤴ ᤏᤧ ᤗᤠ᤺ᤳᤗᤥ॥ 35 ᤜᤧᤰᤁᤩᤠᤱ ᤏᤧᤵᤑᤢ ᤔᤧᤴᤇᤢᤔᤠᤜᤠ᤹ ᤗᤢᤱᤛᤢᤶᤔᤥ ᤕᤠ᤹ᤕᤢ᤺ᤳᤏᤢ ᤕᤢᤱᤛᤡᤸᤗᤧ ᤌᤡᤰᤁᤡᤴ ᤋᤣ᤹. ᤘᤣ᤹ᤛᤔᤠᤴ ᤕᤢᤱ ᤗᤠ᤺ᤳᤗᤥ॥ 36 ((ᤏᤧᤵᤑᤢ ᤔᤏᤠᤜᤠ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤆᤥ᤺ᤰᤛᤡᤖ ᤕᤠᤰᤛᤡ᤹. ᤌᤡᤰᤁᤡᤴ ᤋᤣ᤹. ᤘᤣ᤹ᤛᤔᤠᤴ ᤘᤠ᤹ ᤗᤠ᤺ᤳᤗᤥ॥))” 37 ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤧᤛᤢᤴ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤁᤴ ᤀᤠᤳᤋᤥ ᤐᤥᤱᤒᤠᤒᤣ᥅” ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤡᤍᤠᤒᤠᤜᤠ᤹ ᤔᤧᤈᤢᤶᤔᤡᤸᤗᤧ ᤂᤧᤵᤔᤥ ᤛᤠᤃᤡ᤺ᤰᤁᤧᤴ ᤏᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤵᤔᤏᤠᤒᤠ ᤜᤧᤰᤁᤣ. ᤁᤴ ᤔᤡᤰᤛᤣ᤺ᤴᤜᤠ᤹ ᤐᤥᤱᤅᤡᤸᤗᤧ ᤁᤢᤏᤢᤵᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱ ᤘᤠ᤹ ᤑᤠ᤹ᤀᤠᤱ ᤁᤧᤏᤡᤛᤢᤶᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.