ᤗᤢᤁᤠ 15 - LIFOTNT

ᤁᤧᤔᤠᤒᤠ ᤔᤧᤸᤗᤢᤰ

¹ ᤌᤡᤰᤕᤧᤴ ᤕᤖᤡᤰ ᤀᤣ᤺ᤱᤕᤠᤱ ᤁᤧᤓᤥᤱᤒᤠᤜᤠ᤹ ᤏᤢ ᤘᤣ᤹ ᤗᤠᤕᤥᤒᤠᤜᤠ᤹ ᤕᤧᤛᤢᤖᤧ ᤁᤢᤒᤠᤴ ᤂᤧᤶᤛᤧ ᤂᤢᤏᤧ᤹ ᤁᤢᤄᤡᤖᤡ ᤔᤧᤈᤢᤵᤛᤧᤸᤗᤧ

² ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤁᤠᤏᤠᤰᤏᤠᤰ ᤔᤧᤗ᤹ᤖᤧᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤴ ᤔᤏᤠ᤺ᤸᤗᤧᤃ ᤗᤠᤕᤥᤒᤠᤜᤠ᤹ᤀᤠᤱ ᤋᤠ᤺ᤰᤋᤢᤛᤡᤀᤠᤱ ᤛᤥᤖᤡᤰ ᤕᤢᤱᤅᤠᤱ ᤆᤠᤈᤠᤖᤥ॥”

³ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤂᤧᤍᤠ᤹ᤎᤡᤰ ᤔᤧᤳᤋᤢᤛᤡ

⁴ “ᤂᤡᤏᤡ᤹ᤀᤥ ᤁᤡᤵᤌᤡᤰ (᥇᥆᥆) ᤔᤧᤸᤗᤢᤰᤜᤠ᤹ ᤁᤧᤃᤵᤐᤠ ᤔᤏᤠ᤺ᤸᤗᤧ ᤗᤳᤇᤠᤴ ᤔᤠᤛᤢᤸᤗᤧ ᤑᤠᤱ-ᤑᤠᤱ (᥏᥏) ᤔᤧᤸᤗᤢᤰᤜᤠ᤹ ᤆᤠᤖᤠᤶᤔᤠᤍᤧᤴᤏᤥ ᤗᤧᤖᤢᤎᤛᤡᤀᤠᤱ ᤂᤧᤴ ᤁᤧᤔᤠᤒᤧᤴ ᤔᤧᤱᤄᤥᤀᤣ ᤌᤠᤖᤡᤰ ᤔᤧᤃᤥ᤺ᤳᤋᤢᤴᤒᤡ᥅

^5-6 ᤂᤢᤏᤧ᤹ ᤂᤧᤴ ᤁᤧᤔᤠᤒᤠ ᤔᤧᤸᤗᤢᤰᤁᤡᤴ ᤂᤥᤛᤢᤀᤠᤱ ᤁᤢᤓᤰᤋᤠᤱᤅᤥ ᤐᤰᤂᤢᤖ ᤛ᤺ᤳᤗ ᤏᤢ᤺ᤱ ᤋᤠᤖᤥ॥ ᤜᤧᤰᤁᤩᤠᤱ ᤁᤢᤴᤍᤣᤱ ᤁᤢᤴᤈᤢᤶᤜᤠ᤹ ᤏᤢ ᤁᤢᤒᤠᤱᤓᤣ᤹ᤛᤠᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖᤥ. ‘ᤜᤦ᥄ ᤀᤠᤸᤗ ᤀᤠᤏᤡ᤹ ᤛ᤺ᤳᤋᤡᤖᤥ. ᤌᤣᤀᤠᤱᤓᤧᤸᤗᤧ ᤁᤧᤔᤠᤒᤠ ᤀᤠᤔᤧᤸᤗᤢᤰᤁᤡᤴ ᤕᤠᤶᤔᤥ ᤂᤥᤛᤢᤱᤅᤠᤱ ᤘᤠ᤹ᤀᤠᤖᤥ॥’

⁷ ᤂᤧᤵᤛᤧᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰᤁᤣ ᤛᤠᤱᤃᤪᤠᤶᤐᤣᤍᤠᤱᤅᤥ ᤗᤠᤕᤥᤗᤠᤶ ᤜᤡᤶᤔᤠ ᤔᤧᤶᤒᤥᤱᤔᤏᤠᤒᤠ ᤑᤠᤱ-ᤑᤠᤱ (᥏᥏) ᤛᤠᤶᤕᤥᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤗᤠᤕᤥᤗᤠᤶ ᤁᤧᤜᤡᤶᤒᤠ ᤗᤠᤕᤥᤒᤠᤎᤡᤰᤁᤡᤸᤗᤧ ᤗᤠᤃᤡ ᤕᤶᤒᤠ ᤛ᤺ᤵᤔᤠᤴ ᤐᤥᤱᤗᤥ॥”

ᤁᤧᤔᤠᤒᤠ ᤕᤠᤱᤅᤧᤳᤇᤡᤴ

⁸ ᤕᤧᤛᤢᤖᤧ ᤂᤧᤱᤜᤠ᤹ ᤘᤣ᤹ᤛᤔᤠ ᤂᤧᤍᤠ᤹ᤎᤡᤰ ᤔᤧᤳᤋᤢᤛᤡ. “ᤀᤠᤸᤗ ᤌᤡᤒᤥᤱ ᤕᤢᤵᤐᤠ ᤕᤠᤱᤀᤡᤳᤇᤡ ᤁᤧᤃᤵᤔᤠ ᤔᤧᤴᤇᤢᤔᤠ᤹ᤎᤡᤰᤗᤧ ᤕᤠᤱᤎᤡᤰ ᤔᤠᤛᤢᤸᤗᤧ ᤂᤧᤸᤗᤧ ᤛᤣᤔᤡ ᤜᤠ᤺ᤴᤍᤢᤀᤠᤱ ᤂᤧᤴ ᤕᤠᤱᤀᤡᤳᤇᤡᤴ ᤔᤧᤱᤄᤥᤀᤣ ᤌᤠᤖᤡᤰ ᤜᤡᤶᤔᤡᤴ ᤋᤢᤃᤢᤖ ᤔᤧᤃᤥ᤺ᤳᤋᤢᤶᤒᤡ᥅

⁹ ᤜᤧᤰᤁᤩᤠᤱ ᤂᤧᤸᤗᤧ ᤂᤥᤛᤢᤀᤠᤱ ᤁᤢᤴᤍᤣᤱ ᤁᤢᤴᤈᤢᤶᤜᤠ᤹. ᤁᤢᤒᤠᤱᤓᤣ᤹ᤛᤠᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤀᤰᤂᤣ ᤔᤧᤳᤋᤢᤛᤡ. ‘ᤀᤠᤸᤗ ᤀᤠᤏᤡ᤹ ᤛ᤺ᤳᤋᤡᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤔᤠᤛᤢᤱᤒᤠ ᤀᤠᤕᤠᤱᤀᤡᤳᤇᤡᤴ ᤀᤡᤱᤃᤠ᤹ ᤂᤥᤛᤢᤱᤅᤠᤱ ᤘᤠ᤹ᤀᤠᤖᤥ॥’

¹⁰ ᤂᤧᤵᤛᤧᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰᤁᤣ ᤌᤡᤰ ᤗᤠᤕᤥᤗᤠᤶ ᤁᤧᤜᤡᤶᤒᤠᤸᤗᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤀᤠᤱ ᤔᤧᤛ᤺ᤳᤗᤥ॥”

ᤁᤧᤔᤠᤒᤠ ᤛᤠᤴ

¹¹ ᤜᤧᤰᤁᤩᤠᤱ ᤕᤧᤛᤢᤖᤧ ᤕᤠᤶᤔᤥ ᤘᤣ᤹ᤛᤔᤠ ᤂᤧᤍᤠ᤹ᤀᤠᤱ ᤔᤧᤳᤋᤢᤛᤡ. “ᤀᤢᤴᤇᤣ᤺ᤴ ᤏᤧᤵᤑᤢ ᤕᤧᤶᤒᤡᤳᤇᤠ᤹ᤛᤠ ᤁᤧᤃᤵᤐᤠ ᤗᤳᤇᤠ ᤔᤏᤠᤎᤡᤰ ᤘᤕᤧ॥

¹² ᤜᤧᤰᤁᤩᤠᤱ ᤌᤡᤰᤕᤧᤴ ᤑᤥ᤹ᤒᤠᤸᤗᤧ ᤁᤢᤶᤒᤠᤴ ᤀᤰᤂᤣ ᤔᤧᤳᤋᤢ. ‘ᤀᤠᤶᤒᤣ. ᤀᤡᤱᤃᤠ᤹ ᤁᤧᤕᤠᤱᤛᤠᤁᤢᤴᤎᤣᤴ ᤑ᤺ᤰᤂᤧᤀᤠᤱ ᤀᤠᤗᤰᤁᤥ ᤁᤧᤎᤠᤒᤠᤴ ᤐᤡᤖᤠᤱᤅᤧ᤹ᤀᤥ॥’ ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧᤀᤠᤱ ᤁᤢᤕᤠᤱᤛᤠᤁᤢᤴᤎᤣᤴ ᤂᤧᤱᤜᤠ᤹ ᤜᤠ᤺ᤳᤋᤢᤛᤡᤖᤥ॥

¹³ ᤌᤡᤰᤕᤧᤴ ᤏᤡᤕᤧᤴ ᤀᤣᤃᤠᤱ ᤁᤢᤛ᤻ᤛᤠ ᤑᤥ᤹ᤒᤠᤸᤗᤧ ᤁᤢᤗᤰᤁᤥ ᤁᤧᤎᤠᤒᤠ ᤕᤠᤱᤛᤠᤁᤢᤴᤎᤣᤜᤠ᤹ ᤁᤧᤖᤧᤰ ᤁᤰ ᤔᤧᤳᤇᤡᤱᤅᤠᤱ ᤔᤠ᤺ᤱᤄᤠ ᤗᤠᤈᤣ᤹ᤀᤥ ᤐᤣᤖᤥ॥ ᤂᤧᤵᤔᤥ ᤂᤧᤸᤗᤧ ᤁᤢᤕᤠᤱᤛᤠᤁᤢᤴᤎᤣᤜᤠ᤹ ᤜᤏᤧ ᤀᤧ᤺ᤳᤗᤧᤗᤧ ᤗ᤹ᤔᤠ ᤏᤢ ᤆᤠᤔᤠ ᤌᤢᤱᤔᤠᤀᤥ ᤆ ᤔᤠ᤺ᤴᤍᤢᤖᤥ॥

¹⁴ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤕᤠᤱᤛᤠᤁᤢᤴᤎᤣᤜᤠ᤹ ᤔᤠ᤺ᤴᤍᤢᤀᤠᤱ ᤘᤕᤧᤸᤗᤧ ᤂᤧᤵᤔᤥ ᤕᤶᤒᤠ ᤛᤠᤰ ᤌᤩᤧᤀᤠᤱ ᤂᤧᤸᤗᤧ ᤆᤠᤔᤠ ᤌᤢᤱᤔᤠ ᤌᤣᤀᤠᤱ ᤔᤧᤄᤥᤛᤢᤴᤗᤥ॥

¹⁵ ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤜᤠᤒᤠ ᤂᤧᤴ ᤗᤠᤈᤣ᤹ᤀᤥᤒᤠ ᤌᤡᤰ ᤔᤏᤠ᤺ᤸᤗᤥ ᤕᤠ᤺ᤶᤒᤰ ᤆᤥ᤺ᤰᤛᤧ ᤐᤣᤀᤠᤱ ᤂᤧᤴ ᤔᤏᤠ᤺ᤸᤗᤧ ᤂᤢᤏᤧ᤹ ᤑᤠᤰᤆᤠ ᤐᤡᤔᤠ ᤕᤠ᤺ᤶᤒᤰᤁᤥ ᤑᤳᤇᤢ॥

¹⁶ ᤜᤧᤰᤁᤩᤠᤱ ᤂᤧᤴ ᤀᤠᤳᤋᤡᤸᤗᤧᤀᤠᤱ ᤆᤠᤔᤠ ᤌᤢᤱᤔᤠ ᤔᤧᤶᤒᤡᤖᤢᤴᤏᤡᤸᤗᤧ ᤂᤧᤸᤗᤧ ᤑᤠᤰᤆᤠᤴ ᤆᤠᤔᤠ ᤏᤡᤱᤘᤠ᤹ ᤆᤥᤃᤢᤖᤥ॥

¹⁷ “ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤛᤣᤖᤧᤀᤠᤱ ᤀᤰᤂᤣᤗ᤹ᤖᤡᤰ ᤀᤡ᤺ᤳᤇᤡᤱ. ‘ᤀᤠᤶᤒᤠᤖᤧ ᤁᤢᤜᤡᤶᤔᤥᤃ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤂᤠᤄᤠ ᤔᤧᤈ ᤔᤧᤎᤢᤅᤢᤖ ᤔᤧᤏᤴᤇᤢ᤹. ᤁᤖ ᤀᤡᤱᤃᤠ᤹ᤃ ᤁᤵᤔᤥ ᤛᤠᤰᤁᤡᤸᤗᤧ ᤛᤡᤔᤠ ᤀᤡ᤺ᤳᤋᤠᤱᤗᤥ॥

¹⁸ ᤀᤡᤱᤃᤠ᤹ ᤀᤠᤸᤗᤥ ᤀᤠᤶᤒᤠᤖᤧ ᤁᤢᤜᤡᤶᤔᤥᤀᤣ ᤏᤢ᤺ᤱᤅᤠ ᤐᤣ᤺ᤰᤁᤠᤀᤠᤱ ᤔᤧᤳᤋᤢᤱ. ᤀᤠᤶᤒᤣ. ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤁᤧᤍᤰᤗᤧᤱᤘᤠᤀᤥ ᤀᤡᤱᤃᤠ᤹ ᤗᤠᤕᤥ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥

¹⁹ ᤀᤠᤸᤗ ᤀᤡᤱᤃᤠ᤹ ᤁᤧᤛ᤻ᤛᤠᤀᤠ ᤐᤠ᤺ᤵᤔᤠᤀᤠᤱ ᤔᤧᤗᤠ᤹ᤀᤠᤴᤗᤥ॥ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ ᤁᤢᤀᤡᤛᤡᤰ ᤁᤧᤜᤡᤶᤔᤥ ᤁᤳᤋᤠᤱᤅᤧ᤹ᤀᤥ॥’

²⁰ “ᤜᤧᤰᤁᤩᤠᤱ ᤂᤧᤴ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤁᤢᤶᤒᤠᤖᤥ ᤏᤢ᤺ᤰᤂᤧ ᤐᤣ॥ ᤂᤧᤴ ᤑᤧᤖᤧᤖ ᤐᤳᤇᤧᤒᤠ ᤔᤠ᤺ᤱᤄᤠᤗᤠᤶᤏᤢᤀᤣ ᤁᤢᤶᤒᤠᤖᤧ ᤏᤡᤛᤢᤀᤠᤱ ᤔᤡ᤺ᤶᤈᤡᤖᤧ ᤁᤢᤗᤢᤱᤔᤠ᤹ ᤁᤢᤎᤡᤶ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤗᤥ᤺ᤰᤋᤧᤖ ᤐᤣᤀᤠᤱ ᤂᤧᤴ ᤜᤧᤵᤐᤪᤧᤰ ᤜᤧᤵᤋᤢᤀᤠᤱ ᤆᤢᤵ ᤔᤧᤳᤋᤢᤖᤥ॥

²¹ ᤁᤢᤛ᤻ᤛᤠ ᤑᤥ᤹ᤒᤧᤸᤗᤧ ᤁᤢᤶᤒᤠ ᤔᤧᤳᤋᤢ. ‘ᤀᤠᤶᤒᤣ. ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤁᤧᤍᤰᤗᤧᤱᤘᤠᤀᤥ ᤀᤡᤱᤃᤠ᤹ ᤗᤠᤕᤥ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤸᤗ ᤀᤡᤱᤃᤠ᤹ ᤁᤧᤛ᤻ᤛᤠᤀᤠ ᤐᤠ᤺ᤵᤔᤠᤀᤠᤱ ᤔᤧᤗᤠ᤹ᤀᤠᤴᤗᤥ॥’

²² ᤁᤖ ᤁᤢᤶᤒᤠᤖᤧ ᤂᤧᤵᤔᤥ ᤁᤧᤘᤠ᤹ᤒᤠ ᤁᤢᤛᤧᤘᤠᤖᤥᤒᤠᤜᤠ᤹ ᤔᤧᤳᤋᤢᤛᤡ. ‘ᤜᤠᤖᤠ ᤐᤣᤃᤧᤶᤔᤧ᤹ᤀᤠᤱ ᤁᤴ ᤀᤠᤛ᤻ᤛᤠ ᤑᤥ᤹ᤒᤠᤴ ᤁᤠᤰᤏᤢ᤺ᤸᤗᤧ ᤏᤢᤒᤠ ᤋᤣ᤺ᤳᤋᤡᤴ ᤑᤧᤳᤋᤧᤶᤔᤧ᤹ᤀᤠᤱ ᤆᤠᤰᤋᤧᤶᤔᤧ᤹. ᤁᤢᤜᤢᤰᤆᤥᤀᤥ ᤛᤫᤠᤃᤣᤵ ᤘᤠ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤁᤢᤗᤠᤱᤅᤥ ᤗᤠᤱᤛᤢ᤺ᤵ ᤆᤠᤰᤋᤧᤶᤔᤧ᤹ᤀᤥ॥

²³ ᤜᤧᤰᤁᤩᤠᤱ ᤌᤠ᤺ᤱᤅᤥ ᤆᤠᤗᤢᤵᤔᤏᤠᤒᤠ ᤌᤰᤛᤠᤎᤡᤰ ᤑᤧᤳᤋᤧᤶᤔᤧ᤹ᤀᤠᤱ ᤛᤧᤖᤧᤶᤔᤧ᤹. ᤜᤧᤰᤁᤩᤠᤱ ᤆᤠᤔᤢᤰ ᤌᤡᤔᤢᤰ ᤕᤠᤖᤡᤵ ᤆᤥᤃᤢᤶᤔᤠᤱ ᤛ᤺ᤳᤋᤡᤖᤥ॥

²⁴ ᤌᤣᤀᤠᤱᤓᤧᤸᤗᤧ ᤁᤴ ᤀᤠᤛ᤻ᤛᤠᤴ ᤛᤩᤧᤀᤠᤱ ᤘᤕᤧ. ᤁᤖ ᤕᤠᤶᤔᤥ ᤜᤡᤅᤧ॥ ᤂᤢᤏᤧ᤹ ᤔᤕᤧᤀᤠᤱ ᤘᤕᤧ. ᤁᤖ ᤕᤠᤶᤔᤥ ᤀᤡᤱᤃᤠ᤹ ᤂᤥᤛᤢᤱᤅᤠᤱ ᤘᤠ᤹ᤀᤠᤖᤥ॥’ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤶᤒᤠ ᤛᤠᤓᤠᤱᤈᤠ ᤛᤧᤔᤠ ᤔᤧᤜᤣ᤺ᤰᤋᤢᤖᤥ॥

²⁵ “ᤀᤠᤸᤗ ᤂᤧᤴ ᤕᤧᤶᤔᤥ ᤁᤢᤛ᤻ᤛᤠ ᤋᤢᤶᤒᤧᤴ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤆᤥ᤺ᤰᤏᤢ ᤕᤠᤃᤧ॥ ᤂᤧᤴ ᤀᤠᤰᤂᤥ ᤏᤢ᤺ᤰᤂᤧᤀᤠᤱ ᤜᤡᤶᤒᤣᤛᤠᤱ ᤁᤧᤖᤧᤸᤗᤧ ᤜᤡᤶᤔᤥ ᤔᤢᤰᤗᤠᤜᤠ᤹ ᤔᤢᤰᤋᤧᤒᤠ ᤏᤢ ᤔᤏᤠᤜᤠ᤹ ᤔᤧᤗᤠ᤺ᤰᤂᤧᤒᤠ ᤂᤧᤵᤛᤢᤛᤡ॥

²⁶ ᤜᤧᤰᤁᤩᤠᤱ ᤂᤢᤏᤧ᤹ ᤁᤴ ᤌᤣ ᤐᤥᤱᤗ ᤐᤳᤐᤣ᥅ ᤑᤠ᤹ᤀᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤛᤧᤘᤠᤖᤥᤒᤠᤴ ᤛᤣ᤺ᤴᤍᤥᤛᤢ॥

²⁷ ᤜᤧᤰᤁᤩᤠᤱ ᤂᤧᤴ ᤛᤧᤘᤠᤖᤥᤒᤠᤸᤗᤧᤀᤠᤱ ᤏᤥᤃᤵ ᤐᤡᤖᤢ. ‘ᤂᤧᤏᤧ᤹ ᤁᤧᤴᤛᤠ᤹ ᤑᤥ᤹ᤒᤧᤴ ᤌᤣᤀᤠᤱ ᤔᤧᤶᤒᤥᤱᤅᤣ ᤏᤢᤖᤡᤰᤁᤠᤱ ᤏᤢ᤺ᤰᤂᤧ ᤋᤩᤧᤀᤠᤱ ᤘᤠ᤹. ᤂᤧᤸᤗᤧᤆᤥᤃᤢᤸᤗᤧ ᤁᤧᤶᤒᤠᤖᤧ ᤆᤠᤗᤢᤵᤔᤏᤠᤒᤠ ᤌᤰᤛᤠᤎᤡᤰ ᤛᤧᤵᤔᤠ ᤐᤠᤱᤄᤢᤛᤡᤀᤠᤱ ᤁᤵᤔᤥ ᤆᤠᤔᤢᤰ ᤌᤡᤔᤢᤰ ᤛᤧᤛᤢᤒᤠᤖᤥ॥’

²⁸ ᤁᤖ ᤂᤢᤏᤧ᤹ ᤁᤢᤕᤠ᤺ᤰᤗᤧ᤹ᤖᤧᤀᤠᤱ ᤜᤡᤶᤛᤡᤃᤠᤱ ᤗᤠ᤺ᤵᤔᤠᤀᤣ ᤔᤧᤍᤧᤴᤍᤧᤴᤗᤥ॥ ᤜᤧᤰᤁᤣ᤺ᤸᤗᤧ ᤁᤢᤶᤒᤠ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤂᤧᤴ ᤜᤡᤶᤛᤡᤃᤠᤱ ᤐᤡᤳᤇᤡ ᤑᤠ᤹ᤀᤠᤱ ᤗᤧᤔᤢ॥

²⁹ ᤜᤧᤰᤁᤣ᤺ᤸᤗᤧ ᤂᤧᤴ ᤁᤢᤛ᤻ᤛᤠ ᤋᤢᤶᤒᤠᤸᤗᤧ ᤁᤢᤶᤒᤠ ᤀᤰᤂᤣ ᤔᤧᤳᤋᤢ. ‘ᤀᤥᤔᤧᤳᤋᤧ᤹. ᤀᤡᤱᤃᤠ᤹ ᤁᤶᤓᤧᤖᤡᤰ ᤋᤱᤒᤣ ᤌᤠᤖᤡᤰ ᤂᤧᤏᤧ᤹ ᤁᤢᤛᤧᤘᤠ ᤆᤥᤃᤢᤱ. ᤁᤧᤒᤠ᤺ᤳᤋᤢᤒᤠ ᤐᤠᤴ ᤀᤠᤵᤑᤠᤸᤗᤧᤀᤠᤱ ᤀᤡᤱᤃᤠ᤹ ᤔᤧᤴᤀᤵᤐᤧᤴ. ᤜᤧᤰᤁᤣᤛᤠᤱ ᤂᤧᤏᤧ᤹ ᤀᤠᤴᤍᤣᤱ ᤀᤠᤴᤈᤢᤶᤜᤠ᤹ᤏᤢ ᤆᤠᤔᤢᤰ ᤌᤡᤔᤢᤰ ᤆᤥᤃᤢᤱᤏᤡ ᤑᤠ᤹ᤀᤠᤱ ᤔᤧᤴᤍᤠᤰᤛᤠᤎᤡᤰᤁᤠᤱ ᤁᤧᤶᤒᤡᤖᤠᤱᤅᤡᤴᤗᤥ॥

³⁰ ᤁᤖ ᤁᤴ ᤁᤧᤛ᤻ᤛᤠ᤺ᤸᤗᤧ ᤂᤧᤏᤧ᤹ ᤁᤧᤕᤠᤱᤛᤠ ᤁᤢᤴᤎᤣᤜᤠ᤹ ᤁᤧᤳᤏᤡᤔᤠᤜᤠ᤹ᤏᤢ ᤀᤧ᤺ᤳᤗᤧᤗᤧ ᤗ᤹ᤔᤠᤀᤥ ᤁᤧᤖᤧᤰ ᤔᤠ᤺ᤴᤍᤢ॥ ᤁᤖ ᤂᤢᤏᤧ᤹ ᤏᤢ᤺ᤰᤂᤧ ᤋᤩᤧ᤺ᤸᤗᤧ ᤂᤧᤏᤧ᤹ ᤆᤠᤗᤢᤵᤔᤏᤠᤒᤠ ᤌᤰᤛᤠᤴ ᤁᤧᤛᤧᤖᤢᤀᤠᤱ ᤆᤠᤔᤢᤰ ᤌᤡᤔᤢᤰ ᤁᤧᤛᤧᤛᤢᤖᤥ॥’

³¹ ᤜᤧᤰᤁᤣ᤺ᤸᤗᤧ ᤁᤢᤶᤒᤠᤖᤧ ᤁᤢᤛ᤻ᤛᤠᤴ ᤔᤧᤳᤋᤢ. ‘ᤀᤠᤔᤡ᤺ᤶ ᤀᤠᤛ᤻ᤛᤠᤀᤣ. ᤂᤧᤏᤧ᤹ᤃ ᤛᤍᤠᤍᤡᤱ ᤀᤡᤱᤃᤠ᤹ᤏᤢᤀᤣ ᤁᤧᤘᤠ᤹ᤖᤥ. ᤜᤧᤰᤁᤩᤠᤱ ᤀᤡᤱᤃᤠ᤹ ᤁᤳᤋᤢᤱᤒᤠ ᤁᤠᤰ ᤀᤠᤕᤠᤱᤛᤠᤁᤢᤴᤎᤣᤜᤠ᤹ ᤂᤧᤏᤧ᤹ᤀᤡᤴᤏᤣᤖᤥ॥

³² ᤁᤖ ᤁᤧᤴᤛᤠ᤹ ᤏᤢ᤺ᤰᤂᤧ ᤋᤩᤧᤒᤠᤀᤥ ᤀᤠᤏᤡ᤹ ᤛ᤺ᤵᤔᤠ ᤐᤥᤱᤗᤥ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤩᤧᤀᤠᤱ ᤘᤕᤧ. ᤕᤠᤶᤔᤥ ᤜᤡᤅᤧᤀᤠᤱ ᤘᤠ᤹॥ ᤂᤢᤏᤧ᤹ ᤔᤕᤧᤒᤣᤀᤠᤱ ᤘᤕᤧ. ᤁᤖ ᤕᤠᤶᤔᤥ ᤀᤠᤏᤡ᤹ ᤀᤠᤄᤥᤛᤢᤶᤔᤠᤱ ᤀᤠᤘᤠ᤹ᤖᤥ॥’”