ᤗᤢᤁᤠ 14 - LIFOTNTᤕᤧᤛᤢᤴ ᤑᤖᤡᤛᤡ᤺ᤸᤗᤧ ᤁᤢᤜᤡᤶᤔᤥ 1 ᤌᤡᤰ ᤏᤠ᤺ᤶᤛᤡᤱ ᤕᤧᤴᤏᤥ ᤕᤧᤛᤢᤴ ᤗᤳᤇᤠ ᤑᤖᤡᤛᤡ ᤗᤠᤶᤗᤥᤒᤠᤸᤗᤧ ᤁᤢᤜᤡᤶᤔᤥ ᤆᤠᤈᤠᤛᤧ ᤐᤣ॥ ᤂᤧᤵᤔᤥ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤎᤥ᤺ᤵᤛᤢᤀᤠᤱ ᤔᤧᤘᤕᤧ. 2 ᤀᤠᤸᤗ ᤂᤢᤏᤧ᤹ ᤁᤢᤍᤃᤡ ᤁᤢᤗᤠᤱ ᤁᤢᤜᤢᤰ ᤜ᤺ᤵᤛᤢᤒᤠ ᤔᤏᤠᤎᤡᤰ ᤋᤩᤧ॥ 3 ᤜᤧᤰᤁᤩᤠᤱ ᤕᤧᤛᤢᤖᤧ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤛᤠᤶᤕᤥᤌᤡᤶ ᤀᤡᤱᤈᤠᤱ ᤁᤢᤀᤡᤛᤡᤰ ᤏᤠ᤺ᤶᤛᤡᤱ ᤕᤧᤴᤏᤥ ᤁᤧᤍᤢᤰᤐᤠ ᤔᤏᤠᤜᤠ᤹ ᤘᤣ᤺ᤶᤔᤠᤛᤡ ᤏᤢ᤹ᤒᤡ᥅” 4 ᤁᤖ ᤂᤧᤱᤜᤠ᤹ᤖᤧ ᤌᤣᤀᤠᤱ ᤏᤥᤃᤵ ᤔᤧᤶᤒᤡᤖᤢᤴ॥ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤴ ᤔᤏᤠᤴ ᤛᤶᤍᤠᤱ ᤁᤢᤜᤢᤰ ᤏᤧᤛ᤻ᤛᤢᤖ ᤏᤢᤛᤢᤀᤠᤱ ᤐᤠᤱᤄᤢᤍᤣᤛᤢᤖᤥ॥ 5 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤠ᤺ᤶᤛᤡᤱ ᤕᤧᤴᤏᤥ ᤂᤡᤏᤡ᤹ ᤛᤠ ᤀᤡᤃᤪ ᤐᤡᤳ ᤌᤡᤰ ᤁᤣ᤺ᤶᤒᤠ ᤗᤢᤶᤒᤠ᤺ᤳᤋᤥ ᤔᤰᤌᤠ ᤗᤠ᤺ᤳᤋᤡᤸᤗᤧ ᤂᤡᤏᤡ᤹ ᤂᤡᤔᤥ ᤗᤠ᤺ᤰᤁᤠᤳ ᤁᤧᤀᤢ᤺ᤰᤂᤢᤶ ᤁᤧᤗ᤺ᤳᤋᤢᤶᤒᤡ ᤔᤣ᤺ᤶᤒᤡ᥅” 6 ᤁᤖ ᤂᤧᤱᤜᤠ᤹ᤖᤧ ᤌᤣᤀᤠᤱ ᤏᤥᤃᤵ ᤐᤡᤔᤠ ᤔᤧᤴᤇᤢᤰᤋᤢᤴᤗᤥ॥ 7 ᤕᤧᤛᤢᤖᤧ ᤂᤧᤴ ᤛᤠᤓᤠᤱᤈᤠᤀᤥ ᤀᤢ᤺ᤵᤔᤏᤠᤒᤠ ᤔᤏᤠᤜᤠ᤹ᤖᤧ ᤋᤢᤶᤔᤩᤠᤱᤜᤠᤱ ᤕᤢᤰᤏᤠᤜᤠ᤹ ᤔᤧᤛᤣᤃᤢᤖ ᤔᤧᤕᤢᤅᤧᤒᤠ ᤏᤡᤛᤢᤀᤠᤱ ᤂᤧᤱᤜᤠ᤹ ᤁᤴ ᤂᤧᤍᤠ᤹ᤀᤡᤴ ᤔᤧᤳᤋᤢᤛᤡ 8 “ᤂᤡᤏᤡ᤹ ᤔᤣ᤺ᤰᤂᤡᤶ ᤛᤠᤓᤠᤱᤈᤠᤀᤥ ᤋᤖᤣ ᤁᤧᤶᤀᤢ᤺ᤳᤋᤡᤏᤧ ᤑᤠ᤹ᤃᤪ ᤋᤢᤶᤔᤩᤠᤱᤜᤠᤱ ᤕᤢᤰᤏᤠᤀᤥ ᤔᤧᤕᤢᤅᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤏᤢ᤺ᤸᤗᤧᤀᤠᤱ ᤔᤡᤱᤛᤥᤍᤠᤱᤒᤠ ᤔᤏᤠᤴ ᤋᤖᤣ ᤀᤢ᤺ᤳᤋᤧᤀᤠᤱ ᤘᤠ᤹ᤏᤧ ᤑᤠ᤹ᤃᤪ 9 ᤂᤧᤴ ᤜᤡᤶᤍᤠᤱᤒᤠᤴ ᤋᤠᤀᤠᤱ ‘ᤂᤧᤏᤧ᤹ ᤁᤴ ᤕᤢᤰᤏᤠᤴ ᤂᤢᤏᤧ᤹ ᤗᤧᤖᤧᤒᤡᤖᤧ᤹ᤀᤠᤱ ᤕᤥ ᤂᤠᤶᤗᤥᤀᤥ ᤕᤢᤅᤧ᤹ᤀᤥ’ ᤁᤧᤔᤧᤳᤏᤧ ᤑᤠ᤹ᤃᤪ ᤁᤧᤏᤠᤎᤠᤖᤥ॥ 10 ᤂᤧᤸᤗᤧ ᤁᤢᤗᤧᤰᤘᤠ ᤋᤖᤣ ᤁᤧᤶᤀᤢ᤺ᤳᤏᤧ ᤑᤠ᤹ᤃᤪ ᤂᤧᤏᤧ᤹ ᤕᤥ ᤂᤠᤶᤗᤥᤀᤥ ᤕᤢᤱᤛᤡᤱᤅᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤜᤡᤶᤍᤠᤱᤒᤧᤴ ᤋᤠᤀᤠᤱ ‘ᤔᤣ᤺ᤴ ᤀᤠᤍᤠᤱᤒᤣ. ᤂᤧᤏᤧ᤹ ᤌᤥ ᤋᤢᤶᤔᤩᤠᤱᤜᤠᤱ ᤕᤢᤰᤏᤠᤀᤥ ᤕᤢᤅᤧ᤹ᤀᤥ’ ᤁᤧᤔᤧᤳᤏᤧ ᤑᤠ᤹ᤃᤪ ᤂᤧ᤹ᤕᤥ ᤂᤡᤖᤡ ᤁᤧᤘᤠ᤹ᤒᤠ ᤋᤖᤣᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤧᤏᤧ᤹ ᤁᤧᤔᤡᤱᤛᤥ ᤐᤥᤖᤥ॥ 11 ᤌᤣᤀᤠᤱᤓᤧᤸᤗᤧ ᤜᤠᤳ ᤕᤶᤒᤠ ᤗᤧᤱᤛᤡᤱ ᤂᤧᤴ ᤆᤢᤱᤈᤡᤃᤧᤴᤛᤠ ᤐᤥᤱᤗᤥ. ᤜᤧᤰᤁᤩᤠᤱ ᤜᤠᤳ ᤆᤢᤱᤈᤡᤃᤧᤴᤛᤠ ᤗᤧᤱᤛᤡᤱ ᤂᤧᤴ ᤕᤶᤗᤠᤒᤠ ᤐᤥᤱᤗᤥ॥” 12 ᤜᤧᤰᤁᤩᤠᤱ ᤕᤧᤛᤢᤖᤧ ᤜᤡᤶᤍᤠᤱᤒᤠᤴ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤀᤰᤂᤣᤗ᤹ᤖᤡᤰ ᤆᤠᤔᤢᤰ ᤌᤡᤔᤢᤰ ᤁᤧᤛᤧᤛᤢᤸᤗᤧ ᤁᤧᤴᤈᤢᤶᤜᤠ᤹. ᤁᤧᤶᤓᤢ᤹ ᤁᤧᤴᤛᤠ᤹ᤜᤠ᤹. ᤁᤧᤃᤠ᤹ᤀᤡ ᤛᤥᤎᤥ᤺ᤰᤜᤠ᤹ ᤏᤢ ᤕᤠᤱᤛᤠᤁᤢᤴᤎᤣ ᤁᤧᤃᤵᤐᤠ ᤐᤠᤱᤓᤣ᤹ᤛᤠᤒᤠᤜᤠ᤹ ᤔᤧᤀᤢ᤺ᤳᤋᤧᤛᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤀᤠᤱ ᤂᤧᤏᤧ᤹ ᤁᤧᤶᤀᤢ᤺ᤳᤋᤠᤱ ᤆᤠᤔᤢᤰ ᤌᤡᤔᤢᤰ ᤁᤧᤶᤒᤡᤖ ᤕᤠᤱᤏᤠ ᤁᤧᤶᤏᤢ᤺ᤰ ᤁᤧᤶᤒᤡ᤹ᤖᤥ॥ 13 ᤁᤖ ᤂᤧᤏᤧ᤹ ᤆᤠᤔᤢᤰ ᤌᤡᤔᤢᤰ ᤁᤧᤛᤧᤛᤢᤸᤗᤧ ᤕᤠᤱᤃᤧᤛᤠ᤹ᤒᤠᤜᤠ᤹. ᤁᤧᤍᤢᤰᤐᤠᤜᤠ᤹. ᤗᤠᤱᤛᤰᤐᤠᤜᤠ᤹ ᤏᤢ ᤔᤡᤰᤑ᤺ᤶᤒᤠᤜᤠ᤹ ᤀᤢ᤺ᤳᤋᤧᤛᤧ᤹ᤀᤥ॥ 14 “ᤜᤧᤰᤁᤣ ᤁᤧᤈᤥᤃᤢᤸᤗᤧ ᤂᤧᤏᤧ᤹ ᤔᤢ᤹ᤀᤡᤛᤠᤶ ᤁᤧᤄᤥᤛᤢ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤌᤣᤀᤠᤱ ᤔᤧᤴᤃᤳᤋᤢᤴᤏᤠᤱ ᤂᤧᤴ ᤕᤠᤱᤏᤠ ᤜᤢᤱᤔᤠ ᤔᤧᤴᤇᤢᤰᤋᤢᤴᤗᤥ॥ ᤁᤖ ᤛᤠᤶᤕᤥᤒᤠ ᤔᤏᤠᤜᤠ᤹ ᤛᤡᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤠᤰ ᤏᤢ᤺ᤰᤋᤢ ᤁᤧᤒᤡ᤹ᤖᤥ॥” ᤐᤕᤶ ᤛᤠᤓᤠᤱᤈᤠᤖᤧᤴ ᤂᤧᤍᤠ᤹ ( ᤔᤳᤋᤡ ᥈᥈:᥇-᥇᥊ ) 15 ᤂᤢᤏᤧ᤹ᤏᤢᤀᤣ ᤛᤥᤖᤡᤰ ᤁᤧᤕᤢᤱᤒᤠ ᤌᤡᤰᤁᤡᤸᤗᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢ ᤜᤠᤱᤈᤢᤶᤒᤠ ᤆᤠᤔᤢᤰ ᤌᤡᤔᤢᤰᤁᤥ ᤆᤠ ᤁᤧᤈᤠᤒᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡᤖᤥ॥” 16 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤌᤡᤰ ᤔᤏᤠ᤺ᤸᤗᤧ ᤕᤶᤒᤠ ᤛᤠᤓᤠᤱᤈᤠ ᤛᤧᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤕᤖᤡᤰ ᤋᤖᤣᤜᤠ᤹ ᤀᤢ᤺ᤳᤋᤢᤛᤡ॥ 17 ᤜᤧᤰᤁᤩᤠᤱ ᤁᤠᤰ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤁᤢᤛᤣᤘᤠᤖᤥᤒᤠᤎᤡᤰᤁᤡᤴ ᤆᤠᤔᤠ ᤌᤢᤱᤔᤠ ᤕᤠᤖᤡᤵ ᤐᤥ᤺ᤰᤂᤧ. ᤀᤠᤸᤗ ᤋᤩᤧᤶᤔᤧ᤹ᤀᤥ ᤑᤠ᤹ᤀᤠᤱ ᤋᤖᤣ ᤀᤢ᤺ᤳᤇᤧ ᤐᤠᤱᤄᤢᤍᤣᤛᤢᤖᤥ॥” 18 ᤁᤖ ᤂᤧᤴ ᤔᤏᤠᤜᤠ᤹ ᤛᤠᤓᤠᤱᤈᤠᤀᤥ ᤔᤧᤶᤒᤣ᤺ᤰᤔᤏᤠ ᤔᤣᤗᤠᤶᤛᤡᤱᤗᤥ॥ ᤌᤡᤰᤛᤡᤃᤣᤰᤐᤠᤸᤗᤧ ᤔᤧᤳᤋᤢ. “ᤀᤡᤱᤃᤠ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵ ᤀᤡᤅᤢᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤂᤧᤴ ᤀᤥᤔᤧᤳᤇᤧ ᤐᤣ᤺ᤰᤔᤠ ᤐᤥᤱ. ᤜᤧᤰᤁᤣ᤺ᤸᤗᤧ ᤛᤠᤓᤠᤱᤈᤠᤀᤥ ᤋᤠᤔᤠ ᤔᤧᤛᤢᤰᤁᤠᤴᤗᤥ॥ ᤗᤧᤵᤔᤡ ᤐᤡᤖᤠᤱᤅᤧ᤹ᤀᤥ॥” 19 ᤘᤣ᤹ ᤔᤏᤠ᤺ᤸᤗᤧ ᤔᤧᤳᤋᤢ. “ᤀᤡᤱᤃᤠ᤹ ᤁᤢᤃᤠᤵ ᤅᤠᤛᤡ ᤐᤡᤳᤐᤠᤜᤠ᤹ ᤀᤡᤅᤢᤱᤛᤡᤱᤅᤠᤱ ᤘᤠ᤹ᤀᤠ॥ ᤂᤧᤱᤜᤠ᤹ ᤌᤥ᤺ᤱᤔᤠ ᤛᤠ᤹ᤔᤠᤛᤡ ᤐᤥᤱ. ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤛᤠᤓᤠᤱᤈᤠᤀᤥ ᤋᤠᤔᤠ ᤔᤧᤛᤢᤰᤁᤠᤴᤗᤥ॥ ᤗᤧᤵᤔᤡ ᤀᤠᤒᤡᤖᤧ᤹ᤀᤥ॥” 20 ᤜᤧᤰᤁᤩᤠᤱ ᤀᤠᤸᤗᤛᤠᤱ ᤘᤣ᤹ ᤔᤏᤠ᤺ᤸᤗᤧ ᤀᤰᤂᤣ ᤔᤧᤳᤋᤢ. “ᤀᤡᤱᤃᤠ᤹ᤃ ᤂᤠᤖᤰ ᤔᤣ᤺ᤰᤂᤡᤶ ᤆᤥᤃᤢᤱᤅᤠᤱ ᤘᤠ᤹ᤀᤠ. ᤜᤧᤰᤁᤣ᤺ᤸᤗᤧ ᤛᤠᤓᤠᤱᤈᤠᤀᤥ ᤋᤠᤔᤠ ᤔᤧᤛᤢᤰᤁᤠᤴᤗᤥ॥ 21 ᤜᤧᤰᤁᤩᤠᤱ ᤛᤧᤘᤠᤖᤥᤒᤠᤸᤗᤧ ᤐᤣᤀᤠᤱ ᤁᤢᤴᤍᤠᤱᤒᤠᤴ ᤒᤠᤜᤧᤰᤁᤣ ᤂᤧᤴ ᤐᤠ᤺ᤴᤏᤡᤴ ᤔᤧᤳᤋᤢ॥ ᤜᤧᤰᤁᤣ᤺ᤸᤗᤧ ᤂᤧᤴ ᤔᤏᤠ᤺ᤸᤗᤧ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧᤀᤠᤱ ᤂᤧᤴ ᤁᤧᤛᤧᤘᤠᤖᤥᤒᤠᤴ ᤔᤧᤳᤋᤢ. ‘ᤜᤠᤖᤠ ᤐᤣᤃᤧ᤹ᤀᤠᤱ ᤐᤠᤱᤈᤢᤶᤔᤥᤒᤠ ᤗᤠᤶ ᤗᤠᤶ ᤁᤧᤘᤠ᤹ᤒᤠ ᤕᤠᤱᤃᤧᤛᤠ᤹ᤒᤠᤜᤠ᤹. ᤁᤧᤍᤢᤰᤐᤠᤜᤠ᤹. ᤗᤠᤱᤛᤰᤐᤠᤜᤠ᤹ ᤏᤢ ᤔᤡᤰᤑ᤺ᤶᤒᤠᤜᤠ᤹ ᤀᤢ᤺ᤳᤋᤧ ᤋᤠᤖᤧᤛᤧ᤹॥’ 22 ᤜᤧᤰᤁᤩᤠᤱ ᤂᤧᤴ ᤛᤣᤘᤠᤖᤥᤒᤠᤴᤏᤠᤱ ᤐᤣᤀᤠᤱ ᤒᤠᤜᤧᤰᤁᤣ ᤆᤥᤃᤢᤀᤠᤱ ᤏᤢ᤺ᤰᤂᤧ ᤋᤩᤧᤀᤠᤱ ᤔᤧᤳᤋᤢ. ‘ᤀᤠᤍᤠᤱᤒᤣ. ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤀᤡᤱᤃᤠ᤹ ᤆᤥᤃᤢᤱ. ᤀᤠᤸᤗᤛᤠᤱ ᤕᤖᤡᤰ ᤕᤢᤱᤔᤠ ᤋᤧᤴᤜᤠ᤹ ᤏᤧᤖᤥ॥’ 23 ᤜᤧᤰᤁᤣ᤺ᤸᤗᤧ ᤁᤢᤴᤍᤠᤱᤒᤠᤸᤗᤧ ᤂᤧᤴ ᤔᤧᤳᤋᤢ. ‘ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤏᤧ᤹ ᤐᤠᤱᤓᤣ᤹ᤀᤥ ᤐᤣᤃᤧ᤹ᤀᤠᤱ ᤗᤠᤶᤗᤠᤶᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤜᤠᤖᤠ ᤛᤠᤓᤠᤱᤈᤠᤀᤥ ᤔᤧᤍᤠᤖᤀᤣ ᤐᤥᤱ ᤑᤠ᤹ᤀᤠᤱ ᤀᤢ᤺ᤳᤋᤧ ᤋᤠᤖᤧᤛᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤁᤴ ᤀᤠᤜᤡᤶᤔᤡᤴ ᤛᤎᤧᤰ ᤋᤡᤶᤗᤖᤥ॥’ 24 ᤀᤢ᤺ᤵᤔᤏᤠᤒᤠ ᤋᤖᤣᤒᤠ ᤀᤠᤳᤋᤡᤸᤗᤧᤀᤠᤱ ᤀᤡᤱᤃᤠ᤹ ᤛᤧᤛᤢᤱᤒᤠ ᤛᤠᤓᤠᤱᤈᤠᤀᤥ ᤆᤠᤔᤠ ᤔᤧᤄᤥᤛᤢᤴᤗᤥ॥” ᤜᤢ᤹ᤛᤠᤶᤒᤠ ᤐᤥᤱᤔᤠ ᤋᤢᤰᤂᤣᤴ ( ᤔᤳᤋᤡ ᥇᥆:᥉᥍-᥉᥎ ) 25 ᤌᤡᤰᤗᤧᤱ ᤕᤖᤡᤰ ᤕᤖᤡᤰ ᤔᤏᤠᤜᤠ᤹ᤖᤧ ᤕᤧᤛᤢᤖᤧ ᤁᤢᤀᤣ᤺ᤰ ᤁᤢᤀᤣ᤺ᤰ ᤔᤧᤏᤠ᤺ᤳᤋᤢᤖ ᤔᤧᤘᤕᤧᤸᤗᤧ ᤂᤢᤏᤧ᤹ ᤂᤡᤖᤡ ᤜᤡᤛᤡᤱᤅᤠᤱ ᤔᤧᤳᤋᤢᤛᤡ. 26 “ᤀᤡᤱᤃᤠ᤹ ᤕᤠᤵᤔᤡ ᤁᤧᤍᤡᤶᤒᤠᤸᤗᤧ ᤁᤢᤶᤔᤠ-ᤁᤢᤶᤒᤠᤛᤡ. ᤁᤢᤔᤣ᤺ᤳ-ᤁᤢᤛ᤻ᤛᤠᤜᤠ᤹. ᤁᤢᤶᤓᤢ᤹ ᤁᤢᤴᤛᤠ᤹ᤛᤡ. ᤁᤢᤴᤏᤧ᤹ ᤁᤢᤴᤛᤠ᤹ᤛᤡ. ᤜᤧᤰᤁᤩᤠᤱ ᤁᤢᤜᤡᤱᤔᤴᤏᤡᤴ ᤀᤡᤱᤃᤠ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤔᤡ᤺ᤶᤈᤡ ᤔᤧᤳᤋᤢᤏᤧ ᤑᤠ᤹ᤃᤪ ᤂᤧᤱᤃ ᤀᤡᤱᤃᤠ᤹ ᤀᤠᤜᤢ᤹ᤛᤠᤶᤒᤠ ᤐᤥᤱᤔᤠ ᤔᤧᤛᤢᤰᤏᤧᤴᤗᤥ॥ 27 ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤀᤠᤒᤠᤅᤣ ᤁᤧᤒᤱᤛᤡᤱᤅᤠᤱ ᤀᤡᤱᤃᤠ᤹ ᤁᤧᤴᤍᤡᤶᤔᤠᤴᤏᤧ ᤑᤠ᤹ᤃᤪ ᤀᤠᤜᤢ᤹ᤛᤠᤶᤒᤠ ᤐᤥᤱᤔᤠ ᤁᤧᤴᤇᤢᤰᤏᤧᤴᤗᤥ॥ 28 ᤀᤠᤸᤗ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹. ᤂᤡᤏᤡ᤹ᤀᤥ ᤌᤡᤰᤁᤡᤸᤗᤧ ᤕᤶᤒᤠ ᤆᤱᤜᤡᤶ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤸᤗᤧ. ᤆᤥ᤺ᤰᤔᤠᤏᤢ᤺ᤸᤗᤧ ᤋᤃᤡ ᤂᤧᤴ ᤛᤢ᤺ᤵᤔᤠᤸᤗᤧ ᤀᤠᤰᤂᤧᤴ ᤕᤠᤱᤛᤠᤁᤢᤴᤎᤣ ᤆᤠᤜᤠᤒᤠ ᤆᤥᤰ ᤗ᤹ᤖᤡᤰ ᤏᤡᤱᤛᤣᤰ ᤆᤥᤃᤢᤒᤡ ᤔᤣ᤺ᤶᤒᤡ᥅ 29-30 ᤔᤣ᤺ᤴᤏᤣ ᤑᤠ᤹ᤃᤪ ᤜᤡᤶᤐᤠᤱᤕᤰ ᤏᤧᤔᤠᤃ ᤛᤢᤰᤋᤢ. ᤁᤖ ᤂᤧᤴ ᤆᤥ᤺ᤰᤔᤠ ᤛᤢ᤺ᤵᤔᤠ ᤔᤧᤛᤢᤰᤋᤢᤴᤗᤥ॥ ᤜᤧᤰᤁᤩᤠᤱ ᤁᤴ ᤁᤧᤏᤡᤒᤠ ᤁᤧᤄᤧᤶᤒᤠ ᤔᤏᤠᤜᤠ᤹ᤖᤧ ᤂᤧᤴ ᤀᤰᤂᤣ ᤔᤧᤔᤧᤳᤋᤢᤖ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤖᤥ. ‘ᤂᤧᤏᤧ᤹ ᤜᤣ᤺ᤰᤔᤠᤃ ᤁᤧᤜᤣ᤺ᤰᤋᤢ. ᤁᤖ ᤛᤢ᤺ᤵᤔᤠ ᤁᤧᤴᤇᤢᤰᤋᤢᤴᤗᤥ᥄’ 31 “ᤀᤠᤸᤗ ᤗᤳᤇᤠ ᤌᤡᤒᤥᤱ ᤜᤧᤴᤇᤡᤱ (᥇᥆.᥆᥆᥆) ᤌᤰᤛᤢᤒᤠ ᤁᤧᤃᤵᤐᤠ ᤜᤠᤱᤅᤡᤸᤗᤧ ᤘᤣ᤹ᤛᤔᤠ ᤏᤡᤒᤥᤱ ᤜᤧᤴᤇᤡᤱ (᥈᥆.᥆᥆᥆) ᤌᤰᤛᤢᤒᤠ ᤁᤧᤃᤵᤐᤠ ᤜᤠᤱᤅᤡᤴᤏᤢ ᤌᤱ ᤆᤥ᤺ᤰᤛᤧ ᤐᤣ᤺ᤰᤔᤠᤏᤢ᤺ᤸᤗᤧ ᤋᤃᤡ ᤂᤧᤸᤗᤧ ᤕᤢᤱᤛᤡᤱᤅᤠᤱ ᤂᤧᤴ ᤘᤣ᤹ᤛᤔᤠ ᤜᤠᤱᤅᤡᤴ ᤏᤠ᤺ᤶᤔᤠ ᤛᤢᤰᤋᤢᤒᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤏᤢᤖᤡᤰᤁᤠᤱ ᤏᤡᤱᤘᤠ᤹ ᤀᤡ᤺ᤳᤋᤢ᤹ᤖᤥ॥ 32 ᤂᤧᤸᤗᤧ ᤂᤧᤴ ᤜᤠᤱᤅᤡᤴ ᤏᤠ᤺ᤶᤔᤠ ᤔᤧᤛᤢᤰᤋᤢᤴᤒᤠ ᤏᤡ᤺ᤴᤎᤥ ᤆᤥᤃᤢᤏᤧ ᤑᤠ᤹ᤃᤪ ᤂᤧᤸᤗᤧ ᤂᤧᤴ ᤜᤠᤱᤅᤡᤴ ᤗᤠᤶᤔᤥ ᤌᤱ ᤆᤥ᤺ᤰᤛᤧ ᤑᤧᤴᤗ ᤐᤳᤋᤡᤸᤗᤧᤛᤠ ᤜᤠᤱᤗᤠᤀᤡᤱᤒᤠᤴ ᤐᤠᤱᤄᤢᤀᤠᤱ ᤏᤠᤍᤱ ᤆᤥᤃᤢ᤹ᤖᤥ॥ 33 ᤜᤧᤰᤁᤣᤗ᤹ᤖᤡᤰᤁᤣ ᤂᤧᤏᤧ᤹ ᤁᤧᤃᤳᤋᤢᤒᤠ ᤁᤠᤰ ᤐᤠ᤺ᤴᤜᤠ᤹ ᤁᤧᤴᤗᤧᤖᤢᤴᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤀᤠᤜᤢ᤹ᤛᤠᤶᤒᤠ ᤐᤥᤱᤔᤠ ᤁᤧᤴᤇᤢᤰᤏᤧᤴᤗᤥ॥ 34 “ᤕᤢᤶᤔᤡᤱᤃ ᤏᤢᤒᤠᤀᤣ ᤆᤥᤰ. ᤁᤖ ᤕᤢᤶᤔᤡᤸᤗᤧ ᤁᤢᤗᤡᤶᤔᤧᤴ ᤔᤠᤒᤣ᤺ᤰᤏᤧ ᤑᤠ᤹ᤃᤪ ᤕᤠᤶᤔᤥ ᤁᤧᤗᤡᤶᤒᤠ ᤆᤥ᤺ᤰᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥ 35 ᤜᤧᤰᤁᤩᤠᤱ ᤂᤧᤱᤃ ᤀᤡᤰᤋᤠᤵᤐᤥ ᤆᤢᤋᤥᤀᤠᤱ ᤔᤧᤒᤥᤱᤏᤧᤴ ᤔᤏᤠᤜᤠ᤹ᤖᤧ ᤒᤠ ᤜᤧᤰᤁᤣᤀᤣ ᤗᤠᤵᤔᤧᤓᤢᤛᤢ ᤔᤧᤍᤣᤛᤢᤖᤥ॥ ᤜᤧᤰᤁᤩᤠᤱ ᤀᤠᤒᤠ᤺ᤴᤏᤡᤴ ᤏᤢᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.