ᤗᤧᤒᤡ 26 - LIFOTNTᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤸᤗᤧ ᤁᤧᤎᤠᤒᤠ ᤔᤢ᤹ᤀᤡᤛᤠᤶᤜᤠ᤹ ( ᤛᤠᤶᤕᤥ ᤀᤡᤱ ᥍:᥇᥈-᥈᥊ . ᥈᥎:᥇-᥇᥊ ) 1 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “‘ᤂᤡᤏᤡ᤹ ᤀᤠᤒᤠᤅᤣ ᤗᤠᤃᤡ ᤏᤠᤘᤠᤀᤡᤳᤗᤠᤜᤠ᤹ ᤔᤧᤈᤥᤃᤧᤶᤛᤡᤶᤔᤡᤴᤏᤧ᤹॥ ᤜᤧᤰᤁᤩᤠᤱ ᤀᤠᤒᤠᤅᤣ ᤗᤠᤃᤡ ᤁᤢᤓᤠ ᤂᤥ᤺ᤶᤔᤏᤠ ᤗᤰᤔᤏᤠᤒᤠ ᤏᤠᤘᤠᤀᤡᤳᤗᤠ ᤀᤡᤃᤪ ᤛᤣᤛᤣ ᤗᤢᤱᤜᤠ᤹ ᤔᤧᤕᤧᤵᤛᤧᤶᤛᤡᤶᤔᤡᤴᤏᤧ᤹. ᤜᤧᤰᤁᤩᤠᤱ ᤂᤥ᤺ᤶᤔᤏᤠ ᤗᤰᤔᤏᤠᤒᤠ ᤗᤢᤱᤜᤠ᤹ ᤂᤡᤏᤡ᤹ ᤗᤠᤈᤣ᤹ᤀᤥ ᤔᤧᤕᤧᤵᤛᤧᤶᤛᤡᤶᤔᤡᤴᤏᤧ᤹ᤀᤠᤱ ᤛᤧᤘᤠ ᤔᤧᤵᤔᤠᤛᤡᤖᤧ ᤗᤠᤃᤡ ᤛᤠᤶᤒᤥᤴ ᤔᤧᤒᤳᤇᤧᤶᤔᤡᤴᤏᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ 2 ᤂᤡᤏᤡ᤹ ᤀᤠᤱᤃᤠ᤹ ᤀᤠᤛᤠᤒᤠᤌ ᤕᤧᤴᤏᤡᤴ ᤏᤧᤳᤋᤧᤶᤔᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤣᤛᤣᤍᤧᤴᤏᤡᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤧᤶᤔᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ 3 “‘ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤁᤢᤀᤡᤛᤡᤰ ᤂᤡᤏᤡ᤹ ᤁᤧᤘᤕᤡᤀᤠᤱ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧᤓᤃᤪ 4 ᤆᤠᤜᤠ ᤁᤧᤈᤥ᤺ᤰᤐᤠ ᤕᤧᤶᤔᤥ ᤀᤠᤱᤃᤠ᤹ ᤘᤜᤡᤳ ᤌᤠᤖ ᤕᤠ᤺ᤴᤍᤢᤱ᤹. ᤂᤧᤒᤩᤠᤱ ᤀᤡᤰᤋᤠᤵ ᤗᤠᤈᤣ᤹ᤀᤥ ᤐᤥᤃᤢᤃᤧᤴ ᤁᤢᤈᤠ ᤌᤥᤰ. ᤜᤧᤰᤁᤩᤠᤱ ᤐᤩᤠᤱᤛᤡ ᤀᤡᤰᤋᤠᤵᤐᤥᤒᤠ ᤛᤡᤱᤛᤣ᤹ᤒᤢᤱᤜᤠ᤹ᤀᤥ ᤁᤢᤈᤠ᤹ ᤌᤥᤰ॥ 5 ᤆᤧᤸᤗᤧᤰᤛᤣ᤹ ᤋᤢᤵᤔᤠ ᤕᤧᤶ ᤌᤠᤖᤡᤰᤁᤣ ᤂᤡᤏᤡ᤹ ᤐᤥᤃᤢᤃᤧᤴ ᤁᤢᤈᤠ ᤁᤧᤏᤢᤃᤢᤶ ᤁᤧᤎᤠᤵᤛᤢᤶ᤹. ᤜᤧᤰᤁᤩᤠᤱ ᤁᤢᤈᤠ ᤗᤣ᤺ᤵᤔᤠ ᤕᤧᤶ ᤌᤧᤶᤒᤠᤀᤣ ᤆᤧᤸᤗᤧᤰᤛᤣ᤹ ᤁᤧᤛᤢᤵᤛᤢᤶ᤹॥ ᤂᤡᤏᤡ᤹ ᤆᤠᤔᤠ ᤌᤢᤱᤔᤠᤖᤧᤗᤠᤃᤡ ᤁᤧᤛᤠᤰᤐᤠ ᤁᤧᤴᤍᤢᤔᤢᤶᤔᤡᤴ. ᤂᤶᤓᤩᤠᤱ ᤗᤠᤈᤣ᤹ᤀᤥ ᤂᤡᤏᤡ᤹ ᤜᤠᤱᤜᤠᤱ ᤁᤧᤒᤥ᤺ᤰᤂᤡ᤹॥ 6 “‘ᤀᤠᤱᤃᤠ᤹ ᤗᤠᤈᤣ᤹ᤀᤥ ᤛᤏᤠᤖᤢᤱ ᤋᤠᤖᤢᤱ᤹॥ ᤂᤡᤏᤡ᤹ ᤁᤧᤛᤥ᤺ᤴᤏᤠᤛᤡᤀᤠᤱ ᤁᤧᤀᤡᤵᤛᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤜᤠ᤺ᤳᤗᤧᤀᤠᤱ ᤕᤱᤔᤠ ᤁᤧᤴᤇᤧᤖᤡᤴ᤹॥ ᤀᤠᤱᤃᤠ᤹ ᤗᤠᤈᤣ᤹ᤀᤥᤗᤠᤶ ᤔᤏᤠ ᤀᤠᤈᤠᤈᤠᤒᤠ ᤌᤰᤛᤠᤜᤠ᤹ ᤂᤧᤳᤋᤢᤱᤍᤣᤛᤢᤱᤛᤡᤱ᤹ ᤂᤧᤒᤩᤠᤱ ᤂᤡᤏᤡ᤹ ᤗᤠᤈᤣ᤹ᤀᤥ ᤂᤣᤔᤠ ᤌᤰᤔᤠ ᤔᤧᤒᤥᤱᤏᤧᤴ॥ 7 ᤂᤡᤏᤡ᤹ ᤀᤠᤵᤑᤣᤰ ᤏᤡᤱᤔᤡᤜᤠ᤹ ᤁᤧᤏᤠ᤺ᤳᤋᤢᤶᤛᤡᤶᤔᤠᤱ ᤋᤠᤓᤣ᤺ᤸᤗᤧ ᤂᤸᤗᤧ᤺ᤱ ᤂᤸᤗᤧ᤺ᤱ ᤁᤧᤗᤧ᤺ᤰᤂᤢᤶᤛᤡᤶ᤹॥ 8 ᤂᤡᤏᤡ᤹ ᤅᤠᤛᤡ ᤔᤏᤠᤖᤧ ᤁᤡᤵ ᤅᤠᤛᤡ ᤏᤢ ᤁᤡᤵ ᤌᤡᤰ ᤔᤏᤠᤖᤧ ᤜᤧᤴᤇᤡᤱ ᤌᤡᤒᤥᤱ ᤔᤏᤠᤜᤠ᤹ ᤁᤧᤏᤠ᤺ᤳᤋᤢᤶᤛᤡᤶ᤹॥ ᤂᤡᤏᤡ᤹ ᤏᤡᤱᤔᤡᤜᤠ᤹ ᤂᤡᤏᤡ᤹ ᤋᤠᤓᤣ᤺ᤸᤗᤧ ᤂᤸᤗᤧ᤺ᤱ ᤂᤸᤗᤧ᤺ᤱ ᤗᤧ᤺ᤰᤂᤢᤛᤡ᤹॥ 9 ᤀᤠᤱᤃᤠ᤹ ᤂᤡᤏᤡ᤹ ᤔᤢ᤹ᤀᤡᤛᤠᤶ ᤐᤡᤏᤡᤱ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤏᤢᤖᤡ ᤁᤧᤍᤠᤛᤡᤖ ᤕᤠ᤺ᤴᤏᤡᤱᤅᤠᤱ ᤁᤧᤒᤥ᤺ᤴᤍᤡᤖ ᤆᤥ᤺ᤰᤏᤡᤱ᤹. ᤂᤧᤒᤩᤠᤱ ᤀᤠᤱᤃᤠ᤹ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤂᤡᤏᤡ᤹ᤏᤢ ᤕᤥᤎᤥ ᤔᤧᤶᤒᤥᤱᤅᤣ ᤆᤥᤃᤢᤱ᤹॥ 10 ᤂᤡᤏᤡ᤹ ᤁᤧᤃᤳᤋᤢᤶ ᤁᤧᤕᤢᤰᤂᤢᤶᤒᤠ ᤋᤃᤡ ᤁᤧᤍᤢᤶᤒᤠ ᤁᤢᤈᤠᤴ ᤁᤧᤈᤠᤶᤗ ᤁᤧᤘᤕᤡᤖᤛᤠᤱ ᤁᤢᤛᤱ ᤁᤧᤍᤢᤶᤒᤠ ᤁᤢᤈᤠ ᤕᤢᤱᤔᤠᤍᤧᤴ ᤋᤱᤔᤠᤖᤧ ᤗᤠᤃᤡ ᤋᤃᤡᤒᤠ ᤁᤢᤈᤠᤴ ᤂᤧᤵᤔᤠ ᤐᤥᤱ᤹॥ 11 ᤀᤠᤱᤃᤠ᤹ ᤂᤡᤏᤡ᤹ ᤔᤧᤴᤈᤡ᤺ᤳᤋᤣ ᤂᤡᤏᤡ᤹ ᤗᤢᤶᤔᤥᤀᤣ ᤘᤠ᤹ᤀᤠ॥ 12 ᤀᤠᤱᤃᤠ᤹ ᤂᤡᤏᤡ᤹ ᤗᤢᤶᤔᤥ ᤗᤠᤱᤄᤣ᤺ᤰᤁᤠᤖ ᤘᤠ᤹ᤀᤠ. ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠ. ᤂᤧᤒᤩᤠᤱ ᤂᤡᤏᤡ᤹ᤃ ᤀᤠᤱᤃᤠ᤹ ᤀᤠᤔᤏᤠ ᤁᤧᤒᤥ᤺ᤰᤂᤡ᤹॥ 13 ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ ᤂᤡᤏᤡ᤹ ᤔᤡᤛᤪᤡᤜᤠ᤹ᤖᤧ ᤂᤢᤴᤇᤡ᤹ ᤕᤥᤃ᤻ᤒᤠ ᤁᤧᤶᤒᤥ᤺ᤰᤂᤡᤴᤗ ᤑᤠ᤹ᤀᤠᤱ ᤀᤠᤱᤃᤠ᤹ ᤔᤡᤛᤪᤗᤠᤶ ᤂᤡᤏᤡ᤹ ᤗ᤺ᤳᤏᤡᤱ ᤑᤧᤳᤏᤡᤱ॥ ᤀᤠᤱᤃᤠ᤹ ᤂᤡᤏᤡ᤹ ᤁᤧᤶᤃᤢ᤺ᤳᤋᤡᤒᤠ ᤂᤧ᤺ᤵᤛᤡᤱᤅᤡᤴ ᤀᤧᤰᤂᤢᤱᤅᤠᤱ ᤏᤠᤖᤠ ᤆᤠᤱᤈᤠᤱᤅᤠᤱ ᤗᤠᤱᤃᤧᤄᤣ᤺ᤰᤐᤠ ᤆᤥ᤺ᤰᤏᤡᤱᤅᤠᤱ ᤘᤠ᤹ᤖᤥ॥’” ᤀᤡᤱᤈᤠᤱᤜᤠ᤹ ᤔᤧᤴᤀᤡ᤺ᤵᤔᤧᤸᤗᤧᤒᤠ ᤂᤢᤶᤍᤡᤱᤜᤠ᤹ ( ᤛᤠᤶᤕᤥ ᤀᤡᤱ ᥈᥎:᥇᥋-᥌᥎ ) 14 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. “‘ᤁᤖ ᤂᤡᤏᤡ᤹ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤁᤧᤱᤄᤧᤵᤛᤢᤶᤔᤡᤴ᤹. ᤜᤧᤰᤁᤩᤠᤱ ᤁᤴ ᤁᤧᤖᤧᤰ ᤀᤡᤱᤈᤠᤱᤜᤠ᤹ ᤁᤧᤴᤀᤡ᤺ᤳᤋᤢᤶ ᤁᤧᤴᤏᤠ᤺ᤳᤋᤢᤶᤔᤡᤴ᤹. 15 ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤁᤧᤈᤡ᤺ᤳᤋᤢᤶᤔᤠᤱ ᤁᤧᤏᤠ᤹ᤖᤢᤶ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤧᤖᤧᤰ ᤀᤠᤀᤡᤱᤈᤠᤱᤜᤠ᤹ ᤁᤧᤴᤀᤡ᤺ᤳᤋᤢᤶ ᤁᤧᤴᤏᤠ᤺ᤳᤋᤢᤶᤔᤡᤴᤏᤠᤱ ᤀᤠᤱᤃᤠ᤹ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤁᤧᤓᤧ᤺ᤴᤍᤢᤶᤏᤧᤓᤃᤪ. 16 ᤀᤠᤱᤃᤠ᤹ ᤂᤡᤏᤡ᤹ ᤗᤢᤶᤔᤥ ᤁᤡᤔᤠ ᤕᤱᤔᤠ ᤐᤥᤱᤗ ᤆᤥᤃᤢᤱ᤹. ᤂᤶᤓᤩᤠᤱ ᤌᤰᤁᤡᤴ ᤁᤧᤔᤧᤱᤒᤠᤖ ᤁᤧᤍᤣ᤹ᤒᤠ. ᤔᤡᤰᤁᤡᤴ ᤔᤠᤖ ᤁᤧᤈᤥ᤺ᤰᤐᤠ ᤏᤢ ᤛᤰᤔᤠ ᤔᤧᤴᤕᤠᤰᤔᤏᤠᤒᤠ ᤁᤧᤈᤥ᤺ᤰᤐᤠᤖ ᤁᤧᤍᤣ᤹ᤒᤠ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤋᤢᤰᤔᤠᤜᤠ᤹ ᤐᤠᤱᤄᤢᤱ ᤋᤠᤛᤢᤱ᤹॥ ᤂᤡᤏᤡ᤹ ᤁᤧᤗᤣ᤺ᤳᤋᤢᤶᤒᤠ ᤕᤠ᤹ᤖᤡ᤺ᤶᤒᤠᤜᤠ᤹ ᤌᤣᤏᤠᤎᤣᤒᤠ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤁᤢᤈᤠ ᤁᤧᤍᤢᤶᤒᤠᤴ ᤔᤧᤈᤔᤧᤍᤣᤛᤢ ᤁᤧᤶᤒᤡᤖᤡ᤹॥ 17 ᤀᤠᤱᤃᤠ᤹ ᤂᤡᤏᤡ᤹ ᤀᤳᤏᤧᤏᤡᤱ᤹. ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤱᤔᤡᤜᤠ᤹ᤗᤠᤶ ᤜᤠᤖᤡ ᤁᤧᤍᤩᤧ᤹ᤀᤡ॥ ᤂᤡᤏᤡ᤹ ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤠᤜᤠ᤹ᤖᤧ ᤂᤡᤏᤡ᤹ ᤛᤶᤎᤠᤱ ᤕᤢᤰ ᤔᤧᤈᤥᤃᤢ᤹. ᤂᤧᤒᤩᤠᤱ ᤜᤠ᤺ᤳᤗᤧᤀᤠᤱ ᤔᤧᤴᤏᤠ᤺ᤳᤋᤣᤛᤠᤱ ᤂᤡᤏᤡ᤹ ᤁᤧᤄᤧᤳᤋᤠᤛᤡ᤹॥ 18 “‘ᤂᤡᤏᤡ᤹ ᤀᤠᤸᤗᤛᤠᤱ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤁᤧᤱᤄᤧᤵᤛᤢᤶᤔᤡᤴᤏᤧᤓᤃᤪ ᤂᤡᤏᤡ᤹ ᤗᤠᤕᤥᤸᤗᤧ ᤏᤢᤛᤡᤗᤧᤱ ᤌᤠᤖᤡᤰᤏᤢ᤺ᤸᤗᤧ ᤕᤖᤡᤰ ᤂᤢᤶᤍᤡᤱ ᤐᤡᤏᤡᤱ᤹॥ 19 ᤀᤠᤱᤃᤠ᤹ ᤂᤡᤏᤡ᤹ ᤕᤶᤒᤠ ᤜᤧᤴᤇᤡᤱᤔᤠᤴ ᤏᤢ ᤜᤠᤍᤡᤱ ᤌᤰᤔᤠᤴ ᤌᤣᤏᤠᤎᤣᤒᤠ ᤆᤥᤃᤢᤱ᤹॥ ᤂᤡᤏᤡ᤹ ᤛᤶᤎᤠᤱᤒᤠ ᤋᤠᤱᤛᤠᤱᤒᤠᤴ ᤑᤧᤴᤈᤣ᤹ ᤜᤧᤰᤋᤱᤒᤠ ᤏᤢ ᤂᤡᤏᤡ᤹ ᤛᤡᤃᤠᤱᤒᤠ ᤂᤠᤶᤒᤣ᤺ᤰᤔᤠᤴ ᤁᤠᤛᤠ ᤁᤢᤀᤡᤛᤡᤰ ᤁᤧᤛᤠᤰᤐᤠ ᤆᤥᤃᤢᤱ᤹॥ 20 ᤂᤡᤏᤡ᤹ ᤔᤢᤰᤛᤠᤶᤔᤡᤴ ᤆᤠᤛᤥ᤺ᤰᤁᤠᤱ ᤐᤣᤰ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤀᤡᤰᤋᤠᤵ ᤗᤠᤈᤣ᤹ᤀᤥ ᤐᤥᤃᤢᤃᤧᤴ ᤁᤢᤈᤠ ᤔᤧᤎᤥ᤺ᤰᤏᤧᤴ᤹. ᤜᤧᤰᤁᤩᤠᤱ ᤗᤠᤈᤣ᤹ᤀᤥᤒᤠ ᤛᤡᤱᤛᤣ᤹ᤜᤠ᤹ᤀᤥ ᤁᤢᤈᤠ᤹ ᤔᤧᤎᤥ᤺ᤰᤏᤧᤴ॥ 21 “‘ᤂᤡᤏᤡ᤹ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤗᤠᤱᤃᤧᤄᤣᤃᤡᤀᤠᤱ ᤀᤠᤸᤗᤛᤠᤱ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤁᤧᤱᤄᤧᤵᤛᤢᤶᤔᤡᤴᤏᤧᤓᤃᤪ ᤀᤠᤱᤃᤠ᤹ ᤂᤡᤏᤡ᤹ ᤂᤥᤔᤠ ᤁᤧᤒᤥᤱᤒᤠ ᤗᤠᤕᤥᤸᤗᤧ ᤂᤢᤶᤍᤡᤱᤅᤡᤴ ᤏᤢᤛᤡᤗᤣᤱᤏᤢ᤺ᤸᤗᤧ ᤕᤖᤡᤰ ᤕᤠᤶᤔᤥ ᤋᤢᤰᤂᤣ ᤗᤠᤰᤂᤣᤜᤠ᤹ ᤂᤡᤏᤡ᤹ ᤛᤶᤎᤠᤱ ᤋᤠᤖᤢᤱ᤹॥ 22 ᤀᤠᤱᤃᤠ᤹ ᤂᤡᤏᤡ᤹ ᤗᤢᤶᤔᤥ ᤋᤠᤶᤓᤢᤱ ᤌᤰᤛᤠᤜᤠ᤹ ᤐᤠᤱᤄᤢᤱ ᤋᤠᤛᤢᤱᤛᤡᤱ᤹. ᤂᤧᤱᤜᤠ᤹ᤖᤧ ᤂᤡᤏᤡ᤹ ᤀᤅᤧ᤺ᤰᤘᤠ ᤛᤠᤜᤠ᤹ ᤔᤧᤈᤛᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤐᤡᤳᤌᤰᤛᤠᤜᤠ᤹ ᤔᤧᤔᤧᤰᤂᤢᤛᤡ᤹. ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤛᤠ᤹ᤖᤡᤰ ᤁᤧᤛᤢ᤺ᤴᤍᤡᤖ ᤁᤧᤶᤈᤥᤃᤡᤀᤠᤱ ᤂᤡᤏᤡ᤹ ᤗᤠᤶᤜᤠ᤹ᤀᤣ ᤆᤡᤈᤡ ᤂᤰᤂᤰ ᤐᤥᤱᤗ ᤕᤠᤖᤡᤰ ᤂᤧᤱᤜᤠ᤹ ᤛᤠ᤹ᤖᤡᤰ ᤕᤖᤡᤰ ᤔᤧᤒᤥ᤺ᤴ᤹॥ 23 “‘ᤁᤴᤜᤠ᤹ ᤁᤧᤖᤧᤰ ᤐᤥᤱᤅᤠᤱᤛᤠᤱ ᤂᤡᤏᤡ᤹ ᤀᤠᤱᤃᤠ᤹ ᤗᤧᤵᤔᤠᤱ ᤁᤧᤴᤏᤢ᤺ᤰᤂᤡᤴ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤜᤠᤒᤠ ᤗᤠᤱᤃᤧᤄᤣᤃᤡᤀᤠᤱ ᤁᤧᤒᤳᤇᤡᤏᤧᤓᤃᤪ. 24 ᤀᤠᤱᤃᤠ᤹ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤘᤠ᤹ᤀᤠ. ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤏᤢᤛᤡᤗᤧᤱ ᤕᤠᤖᤡᤰ ᤂᤢᤶᤍᤡᤱ ᤐᤡᤏᤡᤱ᤹॥ 25 ᤀᤠᤱᤃᤠ᤹ ᤂᤡᤏᤡ᤹ ᤛᤶᤎᤠᤱ ᤋᤧᤴᤎᤱᤜᤠ᤹ ᤋᤠᤖᤢᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤁᤧᤓᤣ᤺ᤴᤍᤢᤶᤒᤠᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤋᤢᤱ᤹॥ ᤂᤡᤏᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤕᤧᤰᤕᤰᤜᤠ᤹ᤀᤥ ᤁᤧᤈᤢᤵᤛᤡ᤹. ᤀᤠᤱᤃᤠ᤹ ᤂᤧᤵᤔᤥᤀᤠᤱ ᤂᤡᤏᤡ᤹ ᤗᤢᤶᤔᤥ ᤋᤢᤰᤔᤠ ᤗᤠ᤺ᤰᤔᤠ ᤐᤠᤱᤄᤢᤱ᤹. ᤂᤧᤒᤩᤠᤱ ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤁᤧᤎᤩᤧ᤹ᤀᤡ॥ 26 ᤀᤠᤱᤃᤠ᤹ ᤂᤡᤏᤡ᤹ ᤐᤥᤃᤢᤃᤧᤴ ᤁᤢᤈᤠᤜᤠ᤹ ᤛᤠ᤹ᤖᤡᤰ ᤛᤢ᤺ᤸᤗᤡᤰ ᤆᤥᤃᤢᤱ ᤐᤡᤏᤡᤱ᤹ ᤂᤧᤴ ᤁᤢᤈᤠᤴ ᤗᤳᤇᤠ ᤜᤡᤶᤔᤥᤒᤠ ᤔᤡᤜᤠ᤺ᤳᤗᤢᤱᤅᤥ ᤌᤡᤒᤥᤱ ᤜᤡᤶᤔᤥᤒᤠ ᤔᤧᤴᤇᤢᤔᤠᤜᤠ᤹ᤖᤧ ᤔᤧᤎᤥ᤺ᤰᤋᤢ᤹. ᤜᤧᤰᤁᤩᤠᤱ ᤔᤧᤎᤥ᤺ᤰᤋᤢᤀᤠᤱ ᤔᤧᤜᤠᤛᤢᤸᤗᤧ ᤜᤠ᤺ᤳᤋᤠᤱ ᤂᤠᤄᤠ ᤔᤧᤍᤧᤰᤋᤢᤴ᤹॥ 27 “‘ᤁᤴᤜᤠ᤹ ᤁᤧᤖᤧᤰ ᤐᤥᤱᤅᤠᤱᤛᤠᤱ ᤂᤡᤏᤡ᤹ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤁᤧᤱᤄᤧᤵᤛᤢᤶᤔᤡᤴ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤗᤠᤱᤄᤣ᤺ᤰᤔᤠ ᤁᤧᤸᤗᤧᤖᤢᤶᤔᤡᤴᤏᤧᤓᤃᤪ. 28 ᤀᤠᤱᤃᤠ᤹ ᤀᤠᤛᤡᤰ ᤐᤥ᤺ᤰᤔᤥ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤐᤥ᤺ᤰᤁᤠ. ᤂᤧᤒᤩᤠᤱ ᤂᤡᤏᤡ᤹ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤏᤢᤛᤡᤗᤧᤱ ᤕᤠᤖᤡᤰ ᤂᤢᤶᤍᤡᤱ ᤐᤡᤏᤡᤱ᤹॥ 29 ᤂᤡᤏᤡ᤹ ᤀᤠᤒᤠᤅᤣ ᤕᤧᤶᤒᤡᤳᤇᤠ ᤔᤧᤴᤇᤢᤔᤠᤛᤠᤜᤠ᤹ᤖᤧ ᤂᤢᤴᤇᤡ᤹ ᤏᤧᤰᤛᤠᤴ ᤆᤠᤔᤠ ᤁᤧᤒᤥᤱᤒᤠ ᤐᤥᤱ᤹॥ 30 ᤀᤠᤱᤃᤠ᤹ ᤂᤡᤏᤡ᤹ ᤌᤧᤃᤢ ᤔᤠᤱᤘᤠᤀᤥ ᤁᤧᤈᤥᤃᤢᤶᤒᤠ ᤔᤠᤱᤎᤠ᤺ᤴᤜᤠ᤹ ᤔᤧᤰᤂᤢᤱ ᤐᤡᤏᤡᤱ᤹. ᤀᤠᤱᤃᤠ᤹ ᤂᤡᤏᤡ᤹ ᤛᤢᤰᤐᤠ ᤜᤠ᤺ᤶᤔᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤗᤢ᤺ᤴᤍᤢᤱ ᤐᤡᤏᤡᤱ᤹. ᤜᤧᤰᤁᤩᤠᤱ ᤂᤡᤏᤡ᤹ ᤆᤣᤜᤠ᤹ ᤂᤡᤏᤡ᤹ ᤁᤢᤛᤡᤘᤧᤳ ᤏᤠᤘᤠᤀᤡᤳᤗᤠᤜᤠ᤹ ᤛᤶᤎᤠᤱ ᤗᤠᤵᤑᤣᤛᤢᤱ᤹. ᤂᤶᤓᤩᤠᤱ ᤂᤡᤏᤡ᤹ ᤏᤠ᤹ᤏᤡᤱ᤹॥ 31 ᤀᤠᤱᤃᤠ᤹ ᤂᤡᤏᤡ᤹ ᤕᤧᤰᤕᤰᤜᤠ᤹ ᤔᤢᤖᤧᤰ ᤂᤠᤖᤧᤰ ᤆᤥᤃᤢᤱ ᤐᤡᤏᤡᤱ᤹. ᤜᤧᤰᤁᤩᤠᤱ ᤂᤡᤏᤡ᤹ ᤛᤠᤶᤕᤥᤒᤠᤍᤧᤴᤜᤠ᤹ ᤆᤡᤈᤡ ᤂᤰᤂᤰ ᤆᤥᤃᤢᤱ ᤐᤡᤏᤡᤱ᤹. ᤂᤧᤒᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤁᤢᤏᤠᤶᤃᤧᤏᤢ᤹ᤒᤠ ᤛᤡᤍᤢᤱᤈᤓᤠᤴ ᤔᤧᤍᤠ᤺ᤰᤁᤠᤴ॥ 32 ᤀᤠᤱᤃᤠ᤹ ᤗᤠᤈᤣᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤱ᤹॥ ᤁᤴᤜᤠ᤹ ᤁᤧᤖᤧᤰ ᤔᤧᤏᤡᤛᤢᤀᤠᤱ ᤂᤧᤵᤔᤥ ᤁᤧᤕᤢᤱᤒᤠ ᤂᤡᤏᤡ᤹ ᤏᤡᤱᤔᤡᤜᤠ᤹ ᤕᤱᤔᤠ ᤁᤧᤳ॥ 33 ᤀᤠᤱᤃᤠ᤹ ᤆᤠᤀᤣ ᤂᤡᤏᤡ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤑᤢᤳᤇᤡᤱᤈᤩᤠᤱ ᤛᤧᤏᤡᤱᤍᤣᤏᤡᤱ᤹. ᤜᤧᤰᤁᤩᤠᤱ ᤋᤠᤓᤣᤴ ᤋᤖᤵ ᤑᤡ᤺ᤰᤂᤢᤱᤅᤠᤱ ᤏᤠ᤺ᤳᤏᤡᤱ᤹॥ ᤂᤡᤏᤡ᤹ ᤗᤠᤈᤣᤴ ᤆᤡᤈᤡ ᤂᤰᤂᤰᤐᤠ ᤏᤢ ᤂᤡᤏᤡ᤹ ᤕᤧᤰᤕᤰᤁᤡᤴ ᤔᤢᤖᤧᤰ ᤂᤠᤖᤧ᤺ᤰᤐᤠ ᤐᤥᤱ᤹॥ 34 ᤆᤡᤈᤡ ᤂᤰᤂᤰ ᤐᤥᤱᤅᤡᤸᤗᤧ ᤗᤠᤈᤣ᤺ᤸᤗᤧ ᤏᤠ᤺ᤶᤛᤡᤱᤔᤠ ᤛᤒᤠᤌ ᤋᤱᤒᤣᤜᤠ᤹ ᤏᤧᤵᤔᤠ ᤂᤥᤛᤢ᤹ ᤜᤧᤰᤁᤩᤠᤱ ᤂᤡᤏᤡ᤹ᤃ ᤀᤠᤒᤠᤅᤣ ᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤗᤠᤈᤣ᤹ᤀᤥ ᤁᤧᤘᤕᤡ᤹. ᤂᤧᤒᤩᤠᤱ ᤀᤠᤶᤓᤠ ᤂᤧᤴ ᤕᤧᤶᤔᤥ ᤗᤠᤈᤣᤴ ᤏᤠ᤺ᤶᤛᤡᤱᤅᤠᤱ ᤛᤒᤠᤌᤜᤠ᤹ ᤏᤧᤳᤋᤢ᤹॥ 35 ᤀᤠᤰᤂᤩᤠᤖᤡᤰ ᤕᤧᤴ ᤂᤧᤴ ᤆᤡᤈᤡ ᤂᤰᤂᤰ ᤐᤥᤱᤅᤠᤱ ᤏᤧ᤹᤺ ᤗᤠᤈᤣ᤺ᤸᤗᤧ ᤏᤠ᤺ᤶᤛᤡᤱᤔᤠ ᤂᤥᤛᤢ᤹॥ ᤂᤡᤏᤡ᤹ ᤂᤧᤵᤔᤥ ᤁᤧᤕᤢᤅᤡᤸᤗᤧ ᤛᤒᤠᤌ᤻ᤜᤠ᤹ᤀᤥ ᤁᤧᤄᤥᤛᤢᤶᤒᤠ ᤏᤠ᤺ᤶᤛᤡᤱᤔᤠᤴ ᤂᤧᤸᤗᤧ ᤂᤥᤛᤢ᤹॥ 36 “‘ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤱᤔᤠ᤹ᤛᤥ᤺ᤶᤔᤡᤴ ᤆᤠ᤹ᤖᤡᤰ ᤁᤧᤃᤡᤒᤠ ᤆᤥᤃᤢᤱ ᤐᤡᤖᤢᤱᤛᤡᤱ᤹. ᤋᤧᤳᤗᤠᤑᤧᤰᤘᤠ ᤔᤰᤌᤠᤒᤠ ᤀᤡᤰᤗᤠᤎᤡᤰ ᤔᤧᤄᤧᤵᤛᤢᤛᤠᤱ ᤂᤧᤱᤜᤠ᤹ ᤏᤡᤱᤔᤡᤜᤠ᤹ᤖᤧ ᤔᤧᤏᤠ᤺ᤳᤋᤢᤛᤡᤒᤠ ᤜᤧᤰᤁᤣ ᤔᤧᤗᤥᤰ॥ ᤂᤧᤒᤩᤠᤱ ᤂᤧᤱᤜᤠ᤹ ᤁᤢᤓᤠᤖᤧ ᤋᤠᤓᤣ᤺ᤸᤗᤧ ᤛᤧᤵᤔᤠᤛᤡᤖᤧ ᤗᤠᤃᤡ ᤏᤠ᤺ᤳᤋᤢᤛᤡᤒᤠ ᤁᤢᤛᤡᤱ ᤐᤢᤒᤣᤗᤠᤵᤛᤠ ᤔᤧᤄᤧᤳᤇᤡᤱ ᤔᤧᤒᤣᤰ ᤜᤧᤰᤁᤩᤠᤱ ᤜᤠ᤺ᤳᤗᤧᤀᤠᤱ ᤔᤧᤏᤠ᤺ᤳᤋᤢᤛᤡᤴᤇᤠᤱ ᤂᤧᤱᤜᤠ᤹ ᤂᤠᤶᤒᤠᤱᤅᤥ ᤗᤖᤧ᤺ᤱᤓᤖᤧ᤺ᤱ ᤔᤧᤈᤥᤴ᤹॥ 37 ᤜᤠ᤺ᤳᤗᤧᤀᤠᤱ ᤔᤧᤏᤠ᤺ᤳᤋᤢᤛᤡᤴᤇᤠᤱ ᤋᤠᤓᤣ᤺ᤸᤗᤧ ᤔᤧᤏᤠ᤺ᤳᤋᤢᤛᤡᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤔᤧᤗᤥᤰ ᤜᤧᤰᤁᤩᤠᤱ ᤌᤡᤰᤗᤧ ᤁᤢᤛᤶᤎᤠᤱ ᤌᤡᤰ ᤔᤧᤍᤥ᤺ᤰᤗ ᤔᤧᤃᤧᤱ᤹॥ ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤕᤧᤵᤔᤠ ᤁᤧᤴᤇᤢᤰᤋᤡᤴ᤹॥ 38 ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤡᤏᤡ᤹ ᤁᤧᤔᤧᤃᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤺ᤸᤗᤧ ᤂᤡᤏᤡ᤹ ᤔᤡᤱ ᤔᤠᤛᤢ ᤁᤧᤒᤡᤖᤡ᤹॥ 39 ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤀᤠᤒᤠᤅᤣ ᤏᤢ ᤀᤠᤒᤠᤅᤣ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤔᤧᤔᤧᤰᤗ ᤔᤧᤒᤣᤰ॥ 40 “‘ᤁᤖ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤏᤢ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤴ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤂᤧᤱᤜᤠ᤹ᤖᤧ ᤀᤡᤱᤗᤧᤰᤁᤥ ᤌᤠᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤒᤠ ᤑᤧᤴᤕᤠ᤺ᤶᤒᤰᤁᤡᤴ ᤏᤢ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ᤏᤢ ᤏᤡᤱᤔᤡ ᤔᤧᤈᤥᤃᤧᤒᤠ ᤐᤠ᤺ᤴᤏᤡᤴ ᤐᤠ᤺ᤵᤔᤠ ᤔᤧᤍᤧᤴᤏᤧᤓᤃᤪ— 41 ᤂᤧᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤔᤡ ᤐᤥ᤺ᤰᤂᤠᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤗᤠᤈᤣ᤹ᤀᤥ ᤐᤠᤱᤄᤢᤱᤛᤡᤱᤏᤧᤓᤃᤪ—ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤔᤧᤱᤄᤧᤶᤔᤏᤠᤒᤠ ᤏᤡᤱᤘᤠᤴ ᤏ᤺ᤶᤏ᤺ᤶᤒᤠ ᤔᤧᤈᤥᤃᤢᤀᤠᤱ ᤂᤢᤴᤇᤡ᤹ ᤗᤠᤕᤥᤸᤗᤧ ᤁᤢᤗᤧᤰᤘᤠ ᤂᤢᤶᤍᤡᤱᤅᤡᤴ ᤔᤧᤍᤢᤔᤢᤏᤧᤓᤃᤪ. 42 ᤕᤠᤁᤢᤒ. ᤀᤡᤛᤜᤠᤁ ᤜᤧᤰᤁᤩᤠᤱ ᤀᤒᤪᤠᤜᤠᤶᤔᤡᤴᤏᤢ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤜᤧᤰᤁᤩᤠᤱ ᤂᤧᤴᤏᤢ ᤛᤥᤛᤥᤖᤡᤰ ᤂᤧᤴ ᤗᤠᤈᤣ᤺ᤴᤏᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤱ᤹॥ 43 ᤂᤧᤴ ᤗᤠᤈᤣᤴ ᤂᤧᤱᤜᤠ᤹ᤖᤧ ᤔᤧᤗᤧᤖᤢᤔᤧᤎᤀᤠᤱ ᤂᤧᤱᤜᤠ᤹ ᤔᤣ᤺ᤴᤏᤣ ᤆᤡᤈᤡ ᤂᤰᤂᤰ ᤐᤥᤱᤅᤠᤱᤏᤧ᤺ᤸᤗᤧ ᤗᤠᤈᤣ᤺ᤸᤗᤧ ᤛᤒᤠᤌᤜᤠ᤹ ᤏᤧᤵᤔᤠ ᤂᤥᤛᤢ᤹॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤂᤢᤶᤍᤡᤱ ᤔᤧᤍᤢᤔᤢ᤹. ᤂᤧᤴ ᤂᤢᤶᤍᤡᤱᤅᤡᤴ ᤀᤠᤱᤃᤠ᤹ ᤀᤠᤛᤠᤶᤕᤥ ᤌᤡᤶᤔᤡᤴ ᤔᤧᤏᤠ᤹ᤖᤢᤒᤠ ᤏᤢ ᤀᤠᤎᤡᤶᤔᤡᤴ ᤔᤧᤈᤡ᤺ᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤅᤠᤱ ᤘᤕᤧ॥ 44 ᤁᤴᤜᤠ᤹ ᤁᤧᤖᤧᤰ ᤔᤧᤈᤥᤃᤢᤛᤠᤱ ᤀᤠᤸᤗ ᤂᤧᤱᤜᤠ᤹ ᤏᤡᤱᤔᤡ ᤗᤠᤈᤣ᤹ᤀᤥ ᤔᤧᤘᤠ᤹ᤀᤡᤸᤗᤧ ᤀᤠᤱᤃᤠ᤹ ᤏᤠ᤹ᤖᤢᤱᤛᤡᤱᤒᤠ ᤏᤢ ᤀᤳᤋᤢᤱᤛᤡᤱᤒᤠᤀᤥ ᤂᤧᤱᤜᤠ᤹ ᤕᤢᤔᤪᤧᤰᤁ ᤔᤧᤔᤧᤱᤅᤠᤛᤡᤱᤅᤡᤴ. ᤜᤧᤰᤁᤩᤠᤱ ᤀᤠᤱᤃᤠ᤹ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴᤏᤠᤱ ᤔᤧᤗᤧᤱᤅᤠᤱ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ 45 ᤁᤖ ᤀᤠᤱᤃᤠ᤹ ᤂᤧᤱᤜᤠ᤹ᤏᤢ ᤂᤢᤏᤡ᤹ ᤗᤠᤃᤡ ᤆᤥᤃᤢᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤏᤢ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤱ᤹॥ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤔᤡᤛᤪᤗᤠᤶ ᤗ᤺ᤳᤋᤢᤱ ᤑᤧᤳᤋᤢᤱᤛᤡᤱᤅᤠᤱ ᤔᤧᤘᤕᤧ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥’” 46 ᤛᤡᤏᤤ ᤁᤥ᤺ᤰᤔᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤏᤢ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤢᤏᤧ᤹ ᤔᤥᤛᤠᤴ ᤗᤠᤶᤒᤠ ᤀᤡᤛᤪᤠᤀᤡᤗᤡᤜᤠ᤹ ᤐᤡᤖᤢᤛᤡᤒᤠ ᤌᤡᤶᤜᤠ᤹ ᤏᤢ ᤀᤡᤱᤈᤠᤱᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.