ᤗᤧᤒᤡ 24 - LIFOTNTᤛᤣᤔᤡᤕᤢᤱᤍᤧᤴᤜᤠ᤹ ᤕᤠᤱᤕᤠᤱ ᤔᤧᤵᤔᤠ 1 ᤕᤜᤘᤣ ᤍᤠᤱᤒᤠᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣᤗ᤹ᤖᤡᤰ ᤀᤡᤱᤈᤠᤱ ᤐᤡᤖᤧᤛᤧ᤹—‘ᤛᤣᤔᤡᤜᤠ᤹ ᤀᤠᤓᤧᤸᤗᤧᤛᤠᤱ ᤜᤠ᤹ᤖᤢᤀᤠᤱ ᤕᤢᤱᤗ ᤑᤠ᤹ᤀᤠᤱ ᤀᤥ᤺ᤳᤋᤡ᤺ᤸᤗᤧ ᤗᤠᤃᤡ ᤕᤢᤔᤏᤠᤒᤠ ᤛᤣᤛᤣ ᤆᤤᤋᤢᤏ ᤏᤡ᤺ᤱᤃᤣ᤹ ᤀᤡᤛᤣ᤺ᤱᤒᤠ ᤏᤡ᤺ᤱᤃᤣ᤹ ᤋᤠᤖᤧᤶᤔᤧ᤹॥’ 3 ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤋᤥ᤺ᤴᤍᤡ ᤐᤡᤔᤠ ᤑᤥ᤺ᤴᤍᤠ᤺ᤸᤗᤧ ᤗᤠ᤺ᤰᤁᤠᤳ ᤗᤧᤵᤔᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡᤗᤠᤶ ᤕᤢ᤺ᤴᤇᤡᤰᤁᤠᤱᤎᤥ ᤋᤠᤏᤠᤶ ᤌᤠᤖᤡᤰ ᤜᤠᤖᤢᤏᤧᤸᤗᤧ ᤂᤧᤴ ᤛᤣᤔᤡᤜᤠ᤹ ᤀᤥᤔᤧᤳᤋᤢ ᤆᤥᤃᤢᤖ॥ ᤁᤴ ᤂᤡᤏᤡ᤹ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤀᤠᤵᤑᤠᤸᤗᤧᤛᤠᤱ ᤛᤍᤠᤍᤡᤱᤒᤠ ᤌᤡᤶ ᤐᤥᤱᤗ॥ 4 ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤆᤰᤔᤧᤸᤗ᤹ᤀᤣ ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ ᤛᤣᤔᤡᤕᤢᤱᤍᤧᤴᤏᤥ ᤁᤧᤕᤢᤱᤒᤠ ᤛᤣᤔᤡᤜᤠ᤹ ᤀᤥᤔᤧᤳᤋᤢ ᤆᤥᤃᤢᤖᤖᤥ॥ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤶᤔᤏᤠᤒᤠ ᤂᤖᤧ᤺ᤱ 5 “ᤌᤡᤒᤥᤱᤅᤠᤱ ᤏᤧᤳᤇᤡ ᤁᤡᤗᤥ ᤆᤢᤴᤈᤢᤶᤒᤠ ᤑᤣ᤹ᤖᤢᤶ ᤕᤠᤱᤛᤡᤱᤅᤧ᤹ ᤜᤧᤰᤁᤩᤠᤱ ᤁᤡᤗᤥ ᤌᤡᤰ ᤌᤡᤰᤗᤧᤴ ᤌᤡᤒᤥᤱᤅᤠᤱ ᤏᤧᤳᤇᤡ ᤂᤖᤧ᤺ᤱ ᤗᤧ᤺ᤰᤂᤧ᤹॥ 6 ᤌᤧ᤺ᤰᤐᤧᤳ ᤐᤧᤴᤒᤧᤴ ᤋᤢᤰᤛᤡ ᤋᤢᤰᤛᤡ ᤁᤢᤍᤡ᤺ᤰᤗᤠ ᤏᤧᤳᤇᤡ ᤆᤥᤃᤧ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤁᤧᤕᤢᤱᤒᤠ ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ ᤆᤵᤋᤧᤴᤏᤥ ᤐᤧᤴᤇᤧ ᤏᤧᤛ᤻ᤛᤧ᤹॥ 7 ᤗᤳᤇᤠ ᤗᤳᤇᤠ ᤁᤢᤍᤡ᤺ᤰᤗᤠᤀᤥ ᤛᤢᤳᤌᤥᤒᤠ ᤛᤢᤰᤐᤠ ᤕᤠᤰᤋᤧ᤹. ᤜᤧᤰᤁᤩᤠᤱ ᤂᤧᤴ ᤂᤖᤧ᤺ᤱᤅᤡᤸᤗᤧ ᤏᤡᤱᤘᤠ᤹ᤛᤥᤰ ᤁᤢᤀᤡᤛᤡᤰ ᤔᤡᤀᤥᤗᤠᤶ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤶᤔᤏᤠᤒᤠ ᤂᤖᤧ᤺ᤱ ᤐᤥᤱᤗ॥ 8 ᤛᤒᤠᤌ ᤌᤰᤔᤠ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤂᤧᤴ ᤂᤖᤧ᤺ᤱᤜᤠ᤹ ᤀᤠᤵᤑᤠᤸᤗᤧᤛᤠᤱ ᤕᤢᤱᤔᤠ ᤐᤥᤱ᤹॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁᤴ ᤛᤍᤠᤍᤡᤱᤒᤠ ᤔᤠᤱᤜᤢᤵ ᤐᤥᤱᤗ॥ 9 ᤜᤠᤖᤢᤏ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤗᤠᤃᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤣᤛᤣᤍᤧᤴᤏᤥ ᤂᤧᤴ ᤔᤧᤈᤖᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤂᤥᤔᤠ ᤗᤰᤁᤡᤴ ᤛᤠ᤹ᤖᤡᤰ ᤛᤣᤛᤣᤒᤠ ᤆᤥᤰᤗᤥ॥” ᤁᤢᤍᤥ᤺ᤵᤔᤠ ᤂᤠᤛᤧᤴ ᤏᤢ ᤁᤧᤗᤠ᤹ᤒᤠ ᤂᤢᤶᤍᤡᤱᤅᤡᤸᤗᤧ ᤁᤢᤒᤡ 10 ᤔᤡᤛᤪᤡ ᤕᤧᤶᤒᤡᤳᤇᤠ ᤏᤢ ᤀᤡᤛᤪᤠᤀᤡᤗᤡ ᤔᤧᤴᤇᤢᤔᤠ᤺ᤸᤗᤧ ᤂᤢᤴᤇᤡ ᤕᤧᤶᤒᤡᤳᤇᤠ ᤛᤠᤎᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤥ ᤐᤣᤀᤠᤱ ᤘᤕᤧ॥ ᤂᤧᤴ ᤀᤡᤛᤪᤠᤀᤡᤗᤡ ᤔᤧᤴᤇᤢᤔᤠ᤺ᤸᤗᤧ ᤁᤢᤛ᤻ᤛᤠᤴ ᤏᤢ ᤗᤳᤇᤠ ᤀᤡᤛᤪᤠᤀᤡᤗᤡ ᤕᤧᤶᤒᤡᤳᤇᤠᤴ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤂᤢᤴᤇᤡ᤹ ᤏᤧᤳᤇᤡ ᤀᤠᤒᤠᤅᤣ ᤂᤧᤔᤠ᤹ ᤆᤥᤃᤧᤳᤇᤡ॥ 11 ᤂᤧᤴ ᤀᤡᤛᤪᤠᤀᤡᤗᤡ ᤔᤧᤴᤇᤢᤔᤠ᤺ᤸᤗᤧ ᤁᤢᤛ᤻ᤛᤠ᤺ᤸᤗᤧ ᤛᤣᤛᤣ ᤔᤡᤱᤅᤡᤴ ᤛᤠᤱᤃᤪᤠ ᤔᤧᤳᤋᤢᤖ ᤆᤧ᤹ᤕᤠ ᤀᤡᤱᤍᤥ ᤔᤧᤵᤔᤠ ᤜᤣ᤺ᤰᤋᤢ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤧᤴ ᤔᤥᤛᤠᤀᤥ ᤔᤧᤍᤠᤖᤢ॥ ᤂᤧᤸᤗᤧ ᤁᤢᤶᤔᤠᤖᤧ ᤁᤢᤔᤡᤱ ᤛᤗᤥᤔᤡᤋ ᤘᤕᤧ॥ ᤂᤧᤴ ᤍᤠᤏ ᤌᤠ᤺ᤰᤁᤥᤒᤠ ᤍᤡᤒᤪᤡᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤘᤕᤧ॥ 12 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤘᤠᤴ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤱᤄᤥᤀᤣ ᤌᤠᤖᤡᤰ ᤂᤧᤴ ᤔᤧᤛᤠᤰᤋᤢ ᤔᤧᤃᤳᤋᤢ॥ 13 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 14 “ᤂᤧᤴ ᤔᤠᤱᤍᤣ ᤛᤠᤱᤃᤪᤠ ᤁᤧᤒᤠ᤺ᤵᤐᤠ ᤔᤏᤠᤴ ᤛᤠ᤺ᤱᤃᤠᤜᤡᤶᤔᤥᤗᤠᤶ ᤗᤠ᤺ᤰᤁᤠᤳ ᤋᤣ᤹ᤖᤧ᤹. ᤜᤧᤰᤁᤩᤠᤱ ᤂᤧᤸᤗᤧ ᤐᤠ᤺ᤳᤋᤢᤒᤠ ᤐᤠᤴ ᤁᤧᤄᤧᤶᤒᤠ ᤁᤧᤖᤧᤰᤗᤧ ᤂᤢᤴᤇᤡ᤹ ᤜᤢᤰᤜᤠ᤹ ᤂᤧᤸᤗᤧ ᤁᤢᤎᤧᤃᤣ᤺ᤰᤐᤥ ᤔᤧᤏᤧᤛ᤻ᤛᤢᤖ॥ ᤂᤧᤴ ᤀᤣᤃᤠᤱ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ᤖᤧ ᤂᤢᤏᤧ᤹ ᤗᤢᤱᤅᤡᤸᤗᤧ ᤔᤧᤗᤧᤵᤋᤢ ᤔᤧᤛᤧᤖᤢᤖ॥ 15 ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹. ‘ᤀᤠᤳᤋᤡᤸᤗᤧ ᤀᤠᤒᤠᤅᤣ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤍᤣ ᤛᤠᤱᤃᤪᤠ ᤔᤧᤳᤋᤢ᤹. ᤂᤧᤸᤗᤧ ᤂᤢᤏᤧ᤹ ᤁᤢᤗᤠᤕᤥᤸᤗᤧ ᤂᤢᤶᤍᤡᤱ ᤂᤥᤛᤢ᤹॥ 16 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤴ ᤆᤧ᤹ᤕᤠ ᤀᤡᤱᤍᤥ ᤁᤧᤔᤧᤵᤐᤠ ᤔᤏᤠᤴ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ᤖᤧ ᤗᤢᤱᤅᤡᤸᤗᤧ ᤔᤧᤗᤧᤵᤋᤢ ᤔᤧᤛᤧᤖᤢᤖ॥ ᤀᤠᤒᤠᤅᤣ ᤗᤠᤈᤣ᤹ᤛᤠᤒᤠ ᤀᤡᤃᤪ ᤘᤣ᤹ ᤗᤠᤈᤣ᤹ᤒᤠ ᤜᤠ᤺ᤳᤇᤠᤱ. ᤂᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤱᤅᤡᤴ ᤆᤧ᤹ᤕᤠ ᤀᤡᤱᤍᤥ ᤔᤧᤳᤋᤢᤏᤧᤓᤃᤪ ᤂᤧᤴ ᤛᤧᤵᤔᤠᤀᤣ ᤐᤥᤱ᤹॥ 17 “‘ᤁᤢᤓᤠ ᤔᤏᤠ ᤁᤧᤛᤧᤵᤐᤠ ᤔᤏᤠᤴ ᤛᤧᤵᤔᤠᤀᤣ ᤐᤥᤱ᤹॥ 18 ᤌᤰᤛᤠ ᤁᤧᤛᤧᤵᤐᤠ ᤔᤏᤠ᤺ᤸᤗᤧ ᤁᤢᤗᤧᤰᤘᤠ ᤌᤰᤛᤠ ᤁᤢᤗᤧᤰᤘᤠ ᤜᤢᤅᤢᤖ ᤐᤥᤱ᤹॥ 19 ᤁᤢᤓᤠ ᤔᤏᤠ᤺ᤸᤗᤧ ᤂᤢᤏᤧ᤹ ᤀᤠᤒᤠᤅᤣ ᤁᤢᤜᤡᤶᤒᤣᤛᤠᤱᤒᤠᤸᤗᤧ ᤁᤢᤎᤰᤁᤡᤴ ᤂᤠ᤺ᤴᤍᤢᤏᤧᤓᤃᤪ. ᤂᤧᤸᤗᤧ ᤀᤠᤰᤂᤣ ᤆᤥᤃᤢᤀᤠᤱ ᤘᤠ᤹ ᤂᤢᤏᤧ᤹ ᤜᤧᤰᤁᤣᤗ᤹ᤖᤡᤰᤁᤣ ᤂᤠ᤺ᤶᤔᤠ ᤐᤥᤱ᤹॥ 20 ᤕᤧᤳ ᤁᤧᤀᤧᤱᤒᤧᤸᤗᤧ ᤁᤢᤕᤧᤳᤋᤧᤴ ᤀᤣᤱᤔᤠᤀᤣ ᤐᤥᤱ᤹. ᤔᤡᤰᤁᤡᤸᤗᤧ ᤁᤢᤗᤧᤰᤘᤠ ᤔᤡᤰ. ᤜᤠᤒᤥ᤹ᤒᤠᤸᤗᤧ ᤁᤢᤗᤧᤰᤘᤠ ᤜᤠᤒᤥ᤹ᤒᤠ. ᤀᤠᤰᤂᤣᤗ᤹ᤖᤡᤰ ᤂᤧᤸᤗᤧ ᤘᤣ᤹ᤀᤡᤸᤗᤧ ᤁᤢᤎᤰᤁᤡᤴ ᤂᤠ᤺ᤴᤍᤢ ᤂᤢᤏᤧ᤹ᤀᤠᤱ ᤜᤧᤰᤁᤣᤀᤣ ᤔᤧᤵᤔᤠ ᤐᤥᤱ᤹॥ 21 ᤌᤰᤛᤠ ᤁᤧᤛᤧᤵᤐᤠᤸᤗᤧ ᤂᤧᤸᤗᤧ ᤁᤢᤗᤧᤰᤘᤠ ᤜᤢᤅᤢᤖ ᤐᤥᤱ᤹॥ ᤁᤖ ᤔᤏᤠ ᤁᤧᤛᤧᤵᤐᤠᤴ ᤆᤠᤀᤣ ᤛᤧᤵᤔᤠᤀᤣ ᤐᤥᤱ᤹॥ 22 ᤗᤠᤈᤣ᤹ᤛᤠᤒᤠ ᤏᤢ ᤘᤣ᤹ ᤗᤠᤈᤣ᤹ᤒᤠ ᤔᤏᤠ᤺ᤸᤗᤧ ᤗᤠᤃᤡ ᤗᤳᤇᤠ ᤐᤖᤡᤰᤐᤠ ᤁᤢᤓᤠᤱ ᤐᤥᤱᤔᤠ ᤐᤥᤱ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥’” 23 ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤁᤴ ᤐᤠ᤺ᤴᤏᤡᤴ ᤔᤧᤳᤋᤢᤛᤡᤀᤠᤱ ᤀᤣᤃᤠᤱ ᤂᤧᤱᤜᤠ᤹ᤖᤧ ᤂᤧᤴ ᤔᤠᤱᤍᤣ ᤛᤠᤱᤃᤪᤠ ᤁᤧᤒᤠ᤺ᤵᤐᤠᤴ ᤛᤠ᤺ᤱᤃᤠᤜᤡᤶ ᤗᤠ᤺ᤰᤁᤠᤳ ᤔᤧᤍᤣ᤹ᤖᤢᤀᤠᤱ ᤗᤢᤱᤅᤡᤸᤗᤧ ᤔᤧᤗᤧᤵᤋᤢ ᤔᤧᤛᤧᤖᤢ॥ ᤁᤶᤓᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤈᤥᤃᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.