ᤗᤧᤒᤡ 20 - LIFOTNTᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤧᤸᤗᤧ ᤂᤢᤶᤍᤡᤱ ᤂᤥᤛᤢ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤀᤡᤛᤪᤠᤀᤡᤗᤡᤜᤠ᤹ ᤀᤡᤃᤪ ᤂᤧᤱᤜᤠ᤹ᤏᤢ ᤛᤥᤖᤡᤰ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤀᤡᤛᤪᤠᤀᤡᤗᤀᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤀᤥ ᤀᤠᤳᤋᤡᤸᤗᤧ ᤁᤢᤛ᤻ᤛᤠ ᤀᤅᤧ᤺ᤰᤘᤠᤴ ᤔᤥᤗᤥᤂ ᤛᤠᤶᤔᤠᤱᤅᤥ ᤋᤥ᤺ᤴᤍᤢ᤹ ᤂᤧᤴ ᤛᤧᤵᤔᤠ ᤐᤥᤱ᤹॥ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ᤖᤧ ᤂᤧᤴ ᤗᤢᤱᤅᤡᤸᤗᤧ ᤔᤧᤗᤧᤵᤋᤢᤖ॥ 3 ᤂᤧᤱᤜᤠ᤹ᤀᤥ ᤁᤢᤛ᤻ᤛᤠ ᤀᤅᤧ᤺ᤰᤘᤠᤴ ᤔᤥᤗᤥᤂ ᤔᤠᤱᤅᤥ ᤁᤧᤍᤥ᤺ᤶᤒᤧᤸᤗᤧ ᤀᤠᤱᤃᤠ᤹ ᤀᤠᤛᤣᤛᤣᤍᤧᤴᤏᤡᤴ ᤆᤡ᤺ᤴᤍᤢ᤹ ᤜᤧᤰᤁᤩᤠᤱ ᤛᤣᤛᤣᤒᤠ ᤀᤠᤔᤡᤱᤅᤡᤴ ᤑᤧᤳᤗᤠ᤺ᤴᤍᤢ᤹॥ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤴ ᤀᤳᤋᤢᤱᤅᤠᤱ ᤂᤢᤏᤧ᤹ ᤁᤢᤔᤏᤠᤜᤠ᤹ᤗᤠᤶ ᤗ᤺ᤳᤋᤢᤱᤍᤣᤛᤢᤱ᤹॥ 4 ᤂᤧᤸᤗᤧ ᤂᤢᤏᤧ᤹ ᤀᤅᤧ᤺ᤰᤘᤠ ᤁᤢᤛ᤻ᤛᤠᤴ ᤔᤥᤗᤥᤂ ᤔᤠᤱᤅᤥ ᤋᤥ᤺ᤴᤍᤢᤸᤗᤧ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ᤖᤧ ᤂᤧᤴ ᤔᤏᤠᤴ ᤔᤧᤴᤇᤧᤖᤢᤴ ᤜᤧᤰᤁᤩᤠᤱ ᤔᤧᤴᤏᤡ᤺ᤔᤏᤠᤒᤠ ᤔᤧᤗᤧᤅᤡᤛᤡᤱᤏᤧᤓᤃᤪ. 5 ᤂᤧᤴ ᤔᤏᤠᤴ ᤏᤢ ᤂᤧᤸᤗᤧ ᤁᤢᤜᤡᤶᤛᤕᤱᤜᤠ᤹ ᤀᤳᤋᤢᤱᤛᤡᤱ᤹. ᤀᤠᤱᤃᤠ᤹ ᤂᤧᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤛᤥᤛᤥᤖᤡᤰ ᤔᤥᤗᤥᤂ ᤔᤠᤱᤅᤡᤴ ᤁᤧᤍᤡᤶᤒᤠᤀᤠᤱ ᤁᤧᤳᤏᤡᤔᤠ ᤁᤧᤈᤥ᤺ᤰᤛᤡᤱᤒᤠᤜᤠ᤹ ᤁᤧᤖᤧᤰ ᤂᤢᤴᤇᤡ᤹ ᤔᤏᤠᤜᤠ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤖ ᤆᤥᤃᤢᤱ᤹॥ 6 “‘ᤀᤠᤳᤋᤡᤴ ᤔᤏᤠ᤺ᤴ ᤔᤠᤱᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤗᤧᤵᤔᤠᤱ ᤀᤡᤃᤪ ᤁᤧᤛᤡᤒᤠ ᤛᤠᤶᤜᤠ᤹ ᤁᤧᤓᤥᤱᤒᤠ ᤗᤧᤵᤔᤠᤱ ᤗᤠ᤺ᤳᤋᤠᤱ ᤀᤠᤱᤃᤠ᤹ ᤀᤡᤱᤗᤧᤰᤁᤠ. ᤀᤠᤱᤃᤠ᤹ ᤂᤧᤴ ᤀᤳᤋᤢᤱᤅᤠᤱ ᤂᤢᤏᤧ᤹ ᤁᤢᤔᤏᤠᤜᤠ᤹ᤗᤠᤶᤒᤠ ᤗ᤺ᤳᤋᤢᤱᤍᤣᤛᤢᤱ᤹॥ 7 “‘ᤀᤠᤒᤠᤅᤣ ᤋᤥ᤺ᤴᤏᤠᤛᤡᤶᤔᤧ᤹ᤀᤠᤱ ᤛᤣᤛᤣ ᤐᤥ᤺ᤰᤂᤧᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ 8 ᤂᤡᤏᤡ᤹ ᤀᤠᤱᤃᤠ᤹ ᤀᤠᤛᤠᤶᤕᤥ ᤌᤡᤶᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥ ᤀᤠᤱᤃᤠ᤹ᤀᤣ ᤂᤡᤏᤡ᤹ ᤛᤣᤛᤣ ᤁᤧᤈᤥ᤺ᤰᤐᤠ ᤕᤜᤘᤣ ᤍᤠᤱᤒᤠᤀᤠ॥ 9 “‘ᤀᤠᤳᤋᤡᤸᤗᤧ ᤂᤢᤏᤧ᤹ ᤁᤢᤶᤒᤠ ᤁᤢᤶᤔᤠ ᤛᤠᤱᤃᤪᤠ ᤔᤠᤱᤍᤣ ᤔᤧᤳᤋᤢᤛᤡ᤹ ᤂᤧᤴ ᤛᤧᤵᤔᤠᤀᤣ ᤐᤥᤱ᤹॥ ᤂᤢᤏᤧ᤹ ᤀᤠᤒᤠᤅᤣ ᤁᤢᤶᤒᤠ ᤁᤢᤶᤔᤠ ᤔᤠᤱᤍᤣ ᤛᤠᤱᤃᤪᤠ ᤔᤧᤳᤋᤢᤛᤡᤒᤠᤸᤗᤧ ᤆᤥᤃᤢᤒᤠᤸᤗᤧ ᤂᤢᤏᤧ᤹ ᤀᤠᤵᤑᤣᤰ ᤛᤡᤔᤠ ᤁᤧᤒᤥᤱᤒᤠ ᤐᤥᤱᤗᤥ॥ 10 “‘ᤁᤢᤓᤠ ᤔᤏᤠ᤺ᤴ ᤘᤣ᤹ᤀᤡᤸᤗᤧ ᤁᤢᤔᤣ᤺ᤳᤋᤡᤴᤏᤢ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤆᤥᤃᤢᤏᤧᤓᤃᤪ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥᤰᤐᤧᤴ ᤏᤢ ᤕᤠ᤺ᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤧᤴ ᤏᤧᤵᤔᤠᤱ ᤛᤧᤵᤔᤠᤛᤡᤀᤣ ᤐᤥᤱ᤹॥ 11 “‘ᤀᤠᤵᤑᤣᤰ ᤁᤢᤶᤒᤠᤖᤧ ᤁᤢᤔᤣ᤺ᤳᤋᤡᤴᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤧᤸᤗᤧ ᤂᤢᤏᤧ᤹ ᤀᤠᤒᤠᤅᤣ ᤁᤢᤶᤒᤠ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤒᤠ ᤐᤥᤱ᤹॥ ᤂᤧᤱᤜᤠ᤹ ᤏᤧᤵᤔᤠᤱ ᤛᤧᤵᤔᤠᤛᤡᤀᤣ ᤐᤥᤱ᤹॥ ᤂᤢᤴᤇᤡ᤹ ᤆᤥ᤺ᤰᤛᤢᤒᤠ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤛᤡᤔᤠ ᤁᤧᤒᤥᤱᤒᤠ ᤐᤥᤱ᤹॥ 12 “‘ᤁᤢᤓᤠ ᤔᤏᤠ᤺ᤸᤗᤧ ᤂᤢᤏᤧ᤹ ᤀᤠᤵᤑᤣᤰ ᤁᤢᤶᤒᤠᤱᤗᤡ᤺ᤴᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤆᤥᤃᤢᤏᤧᤓᤃᤪ ᤂᤧᤴ ᤕᤧᤶᤒᤡᤳᤇᤠᤴ ᤏᤢ ᤔᤧᤴᤇᤢᤔᤠᤴ ᤏᤧᤵᤔᤠᤱ ᤛᤧᤵᤔᤠᤛᤡᤀᤣ ᤐᤥᤱ᤹॥ ᤂᤢᤴᤇᤡ᤹ ᤆᤥᤃᤧᤛᤢᤒᤠᤴ ᤑᤧᤳᤗᤠ᤹ᤔᤠ ᤕᤠ᤺ᤶᤒᤰᤗᤥ॥ ᤂᤢᤴᤇᤡ᤹ ᤜᤧᤰᤁᤣ ᤆᤥᤃᤧᤛᤢᤒᤧᤸᤗᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤛᤡᤔᤠ ᤐᤥᤱ᤹॥ 13 “‘ᤁᤢᤓᤠ ᤔᤏᤠ᤺ᤸᤗᤧ ᤔᤧᤴᤇᤢᤔᤠᤴᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤆᤥᤃᤢᤒᤠ ᤁᤢᤀᤡᤛᤡᤰ ᤕᤧᤶᤒᤡᤳᤇᤠ᤺ᤴᤏᤢ ᤜᤧᤰᤁᤣ ᤆᤥᤃᤢᤏᤧᤓᤃᤪ ᤂᤧᤴ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰ ᤐᤥᤱ᤹॥ ᤂᤧᤴ ᤏᤧᤵᤔᤠᤱ ᤛᤧᤵᤔᤠᤛᤡᤀᤣ ᤐᤥᤱ᤹॥ ᤂᤢᤴᤇᤡ᤹ ᤜᤧᤰᤁᤣ ᤆᤥᤃᤧᤛᤢᤒᤧᤸᤗᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤛᤡᤔᤠ ᤐᤥᤱ᤹॥ 14 “‘ᤁᤢᤓᤠ ᤔᤏᤠ᤺ᤸᤗᤧ ᤁᤢᤶᤔᤠ ᤁᤢᤛ᤻ᤛᤠ ᤏᤧᤵᤔᤠᤱ ᤔᤣ᤺ᤳ ᤆᤥᤃᤢᤛᤡᤏᤧᤓᤃᤪ ᤂᤧᤴ ᤑᤧᤴᤕᤠ᤺ᤶᤒᤰᤗᤥ॥ ᤂᤧᤴ ᤔᤏᤠᤴ ᤂᤧᤱᤜᤠ᤹ᤏᤢ ᤛᤥᤖᤡᤰ ᤔᤡᤎᤡᤱᤔᤠ ᤐᤥᤱ᤹. ᤜᤧᤰᤁᤩᤠᤱ ᤂᤡᤏᤡ᤹ ᤗᤢᤶᤔᤥ ᤜᤧᤰᤋᤱᤒᤠ ᤕᤠ᤺ᤶᤒᤰ ᤔᤧᤒᤥᤱᤏᤧᤴᤗ॥ 15 “‘ᤁᤢᤓᤠᤖᤧ ᤌᤰᤛᤠ᤺ᤴᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤆᤥᤃᤢᤏᤧᤓᤃᤪ ᤂᤧᤴ ᤔᤏᤠᤴ ᤛᤧᤵᤔᤠᤀᤣ ᤐᤥᤱ᤹. ᤂᤧᤒᤩᤠᤱ ᤂᤧᤴ ᤌᤰᤛᤠ᤺ᤴᤏᤠᤱ ᤛᤧᤵᤔᤠ ᤐᤥᤱ᤹॥ 16 “‘ᤁᤢᤓᤠ ᤔᤧᤴᤇᤢᤔᤠ᤺ᤸᤗᤧ ᤌᤰᤛᤠᤴ ᤕᤧᤶᤒᤠ ᤆᤥᤃᤢᤒᤠ ᤋᤢᤶᤍᤧᤳᤋᤧᤏᤧᤓᤃᤪ ᤂᤧᤴ ᤔᤧᤴᤇᤢᤔᤠᤴᤏᤢ ᤌᤰᤛᤠᤴ ᤏᤧᤵᤔᤠᤱ ᤛᤧᤵᤔᤠᤛᤡᤀᤣ ᤐᤥᤱ᤹॥ ᤂᤢᤴᤇᤡ᤹ ᤜᤧᤰᤁᤣ ᤆᤥᤃᤧᤛᤢᤒᤧᤸᤗᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤛᤡᤔᤠᤀᤣ ᤐᤥᤱ᤹॥ 17 “‘ᤀᤠᤳᤋᤡᤸᤗᤧ ᤀᤠᤒᤠᤅᤣ ᤁᤢᤴᤛᤠ᤹. ᤀᤡᤃᤪ ᤀᤠᤒᤠᤅᤣ ᤁᤢᤶᤒᤠ ᤀᤡᤃᤪ ᤁᤢᤶᤔᤠ ᤗᤧᤵᤔᤠᤱᤒᤠ ᤔᤧᤴᤇᤢᤔᤠᤛᤠᤴ ᤔᤣ᤺ᤰᤂᤡᤶ ᤔᤧᤳᤋᤢᤀᤠᤱ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤆᤥᤃᤢᤏᤧᤓᤃᤪ ᤂᤧᤱᤃ ᤛᤠ᤹ᤖᤡᤰ ᤛᤡᤖᤡᤱᤔᤔᤠ ᤐᤠ᤺ᤴᤗᤥ॥ ᤂᤧᤴ ᤏᤧᤵᤔᤠᤱ ᤔᤏᤠᤜᤠ᤹ᤖᤧ ᤔᤧᤏᤡᤛᤢᤛᤡᤖᤀᤣ ᤂᤢᤴᤇᤡ᤹ ᤀᤠᤵᤑᤣᤰ ᤔᤏᤠᤜᤠ᤹ᤗᤠᤶ ᤗ᤺ᤵᤔᤠᤍᤣᤔᤠᤛᤡ ᤐᤥᤱ᤹॥ ᤂᤧᤸᤗᤧ ᤀᤠᤒᤠᤅᤣ ᤁᤢᤴᤛᤠ᤹ ᤔᤧᤴᤇᤢᤔᤠᤴ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤀᤠᤱ ᤘᤠ᤹॥ ᤂᤢᤴᤇᤡ᤹ ᤜᤧᤰᤁᤣ ᤆᤥᤃᤧᤛᤢᤒᤧᤸᤗᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤛᤡᤔᤠ ᤐᤥᤱ᤹॥ 18 “‘ᤁᤢᤛᤡᤶ ᤘᤠᤜᤵᤔᤠ ᤘᤠ᤹ᤒᤠ ᤕᤧᤶᤔᤥ ᤁᤢᤓᤠ ᤔᤏᤠ᤺ᤸᤗᤧ ᤔᤧᤴᤇᤢᤔᤠᤴᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤆᤥᤃᤢᤏᤧᤓᤃᤪ ᤂᤧᤴ ᤏᤧᤵᤔᤠᤱ ᤂᤢᤴᤇᤡ᤹ ᤔᤏᤠᤜᤠ᤹ᤗᤠᤶᤒᤠ ᤗ᤺ᤵᤔᤠᤍᤣᤔᤠᤛᤡ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤒᤡᤳᤇᤠ᤺ᤸᤗᤧ ᤔᤧᤴᤇᤢᤔᤠ᤺ᤸᤗᤧ ᤁᤢᤔᤠᤰᤂᤡᤸᤗᤧ ᤁᤢᤒᤢᤴᤏᤡᤴ ᤀᤥᤛᤣ᤺ᤴᤎᤠᤱ ᤆᤥᤃᤢ ᤜᤧᤰᤁᤩᤠᤱ ᤔᤧᤴᤇᤢᤔᤠ᤺ᤸᤗᤧᤃ ᤂᤢᤏᤧ᤹ ᤁᤢᤔᤠᤰᤂᤡᤸᤗᤧ ᤁᤢᤒᤢᤴᤏᤡᤴ ᤀᤥ᤺ᤴᤎᤠᤰᤋᤢ॥ 19 “‘ᤂᤧᤏᤧ᤹ ᤀᤠᤒᤠᤅᤣ ᤁᤧᤶᤒᤠ ᤀᤡᤃᤪ ᤁᤧᤶᤔᤠᤖᤧ ᤁᤢᤴᤏᤧ᤹ ᤁᤢᤴᤛᤠ᤹ᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹॥ ᤌᤣᤀᤠᤱᤓᤧᤸᤗᤧ ᤁᤸᤗᤧ ᤏᤡ᤺ᤳᤋᤠᤱᤒᤠ ᤁᤠ᤹ᤀᤡ᤺ᤴ ᤁᤢᤏᤠᤔᤧᤴᤇᤠ᤹ ᤆᤥᤃᤢ᤹॥ ᤂᤧᤴᤇᤡ᤹ ᤜᤧᤰᤁᤣ ᤁᤧᤈᤥᤃᤢᤛᤡᤒᤧᤸᤗᤧ ᤆᤥᤃᤢᤸᤗᤧ ᤂᤧᤴᤇᤡ᤹ ᤀᤠᤵᤑᤣᤰ ᤁᤧᤛᤡᤛᤡᤖ ᤐᤥᤱ᤹॥ 20 “‘ᤁᤢᤓᤠᤖᤧ ᤀᤠᤒᤠᤅᤣ ᤁᤢᤶᤓᤅᤠ ᤀᤡᤃᤪ ᤁᤢᤴᤍᤢᤶᤒᤠᤖᤧ ᤁᤢᤔᤣ᤺ᤳᤋᤡᤴᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤆᤥᤃᤢᤏᤧᤓᤃᤪ ᤂᤧᤸᤗᤧ ᤀᤠᤵᤑᤣᤰ ᤁᤢᤶᤓᤅᤠ ᤀᤡᤃᤪ ᤁᤢᤴᤍᤢᤶᤒᤠ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤖᤥ॥ ᤂᤧᤱᤜᤠ᤹ ᤂᤢᤴᤇᤡ᤹ ᤗᤠᤕᤥᤸᤗᤧ ᤁᤢᤗᤧᤰᤘᤠ ᤂᤢᤶᤍᤡᤱ ᤂᤥᤔᤠ ᤐᤥᤱ᤹॥ ᤂᤧᤱᤜᤠ᤹ ᤂᤢᤴᤇᤡ᤹ ᤛᤠᤔᤧᤴᤘᤠ᤹ᤀᤣ ᤔᤧᤛᤡᤖ ᤐᤥᤱ᤹॥ 21 “‘ᤁᤢᤓᤠᤖᤧ ᤀᤠᤒᤠᤅᤣ ᤁᤢᤴᤛᤠ᤹ᤖᤧ ᤁᤢᤔᤣᤳ ᤁᤢᤀᤅᤧ᤺ᤰᤔᤠᤴ ᤀᤡᤃᤪ ᤁᤢᤶᤓᤢ᤹ᤖᤧ ᤁᤢᤔᤣ᤺ᤳᤋᤧᤴ ᤔᤣ᤺ᤰᤂᤡᤶ ᤔᤧᤵᤔᤠᤃ ᤀᤠᤛᤢᤳᤌᤥ ᤐᤠ᤺ᤴᤗᤥ॥ ᤂᤧᤸᤗᤧ ᤀᤠᤒᤠᤅᤣ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤛᤡᤒᤠ ᤐᤥᤱ᤹॥ ᤂᤧᤱᤜᤠ᤹ ᤂᤢᤴᤇᤡ᤹ ᤛᤠᤔᤧᤴᤘᤠ᤹ᤀᤣ ᤗᤢᤰᤐᤠ ᤂᤰᤐᤠ ᤔᤧᤒᤥᤱᤅᤠᤱ ᤔᤧᤛᤡᤖᤥ॥ 22 “‘ᤀᤠᤱᤃᤠ᤹ ᤁᤧᤖᤧᤰ ᤀᤠᤛᤠᤶᤕᤥ ᤌᤡᤶᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥ ᤔᤣ᤺ᤴᤏᤧᤓᤃᤪ ᤀᤠᤳᤋᤡᤴ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤂᤡᤏᤡ᤹ ᤋᤣ᤹ᤏᤡᤱᤗ ᤐᤳᤋᤠ ᤂᤧᤸᤗᤧ ᤂᤡᤏᤡ᤹ ᤁᤧᤀᤛᤡᤀᤠᤱ ᤗᤠᤵᤁᤧᤓᤢᤛᤡ᤹॥ 23 ᤂᤡᤏᤡ᤹ ᤋᤃᤡ ᤀᤠᤱᤃᤠ᤹ ᤗ᤺ᤵᤔᤠᤍᤣᤔᤠ ᤀᤡ᤺ᤳᤋᤢᤱᤛᤡᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤵᤗᤧᤰᤁᤥ ᤂᤡᤏᤡ᤹ ᤗᤠᤱᤔᤧᤄᤣᤃᤧᤶᤔᤡᤴᤏᤧ᤹॥ ᤂᤧᤱᤜᤠ᤹ᤖᤧ ᤁᤴ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤔᤧᤈᤥᤃᤢᤀᤠᤱ ᤔᤧᤘᤕᤧ. ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤆᤡ᤺ᤳᤋᤢᤱᤛᤡᤱ॥ 24 ᤁᤖ ᤀᤠᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱᤅᤠᤱ ᤘᤠ᤹. “ᤂᤡᤏᤡ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤕᤢᤰ ᤁᤧᤈᤥᤃᤢᤶ᤹. ᤜᤧᤰᤁᤩᤠᤱ ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤗᤠᤈᤣᤴ ᤂᤡᤏᤡ᤹ ᤐᤡᤏᤡᤱ᤹॥” ᤂᤡᤏᤡ᤹ ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤗᤠᤶ ᤁᤧᤛᤧᤶᤒᤠ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ 25 “‘ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤛᤢᤳᤌᤥ ᤏᤢ ᤀᤠᤛᤢᤳᤌᤥ ᤌᤰᤛᤠᤐᤢᤛᤠᤜᤠ᤹ ᤛᤧᤴᤍᤧᤶᤛᤡᤶᤔᤧ᤹॥ ᤀᤠᤱᤃᤠ᤹ ᤀᤠᤛᤢᤳᤌᤥ ᤗᤣ᤺ᤳᤋᤢᤱᤛᤡᤱᤅᤠᤱ ᤀᤥᤛᤣ᤺ᤴᤎᤠᤰᤏᤡᤱᤒᤠ ᤌᤰᤛᤠᤐᤢᤛᤠ ᤀᤡᤃᤪ ᤂᤠᤶᤒᤠᤱᤅᤥ ᤁᤧᤛ᤺ᤴᤇᤡᤱᤒᤠ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠᤜᤠ᤹ᤗᤠᤶ ᤂᤡᤏᤡ᤹ ᤀᤠᤛᤢᤳᤌᤥ ᤔᤧᤈᤥ᤺ᤰᤁᤠᤛᤡᤶᤔᤡᤴᤏᤧ᤹॥ 26 ᤂᤡᤏᤡ᤹ ᤀᤠᤱᤃᤠ᤹ ᤀᤠᤗᤠᤃᤡ ᤛᤣᤛᤣᤒᤠ ᤐᤥ᤺ᤰᤂᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹. ᤕᤜᤘᤣ ᤍᤠᤱᤒᤠᤴ. ᤛᤣᤛᤣᤒᤠ ᤆᤥ᤺ᤰᤁᤠ. ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤱᤃᤠ᤹ ᤀᤠᤔᤏᤠ ᤐᤥᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤂᤡᤏᤡ᤹ ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤀᤣ᤺ᤰ ᤛᤧᤴᤏᤡᤱᤒᤠᤖᤥ॥ 27 “‘ᤂᤡᤏᤡ᤹ᤀᤥᤒᤠ ᤁᤢᤓᤠ ᤕᤧᤶᤒᤡᤳᤇᤠ ᤀᤡᤃᤪ ᤔᤧᤴᤇᤢᤔᤠᤴ ᤔᤠᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤗᤧᤵᤔᤠᤱ ᤀᤡᤃᤪ ᤁᤧᤛᤡᤒᤠ ᤛᤠᤶᤜᤠ᤹ ᤁᤧᤓᤥᤱᤒᤠ ᤗᤧᤵᤔᤠᤱ ᤗᤠ᤺ᤳᤏᤧᤓᤃᤪ ᤂᤧᤴ ᤛᤧᤵᤔᤠᤀᤣ ᤐᤥᤱ᤹॥ ᤂᤧᤱᤜᤠ᤹ ᤗᤢᤱᤅᤡᤸᤗᤧ ᤗᤧᤵᤔᤠ ᤛᤧᤵᤔᤠᤛᤡ ᤐᤥᤱ᤹॥ ᤂᤢᤴᤇᤡ᤹ ᤜᤧᤰᤁᤣ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤛᤡᤔᤠ ᤐᤥᤱᤗᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.