ᤗᤧᤒᤡ 2 - LIFOTNT

ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ

¹ “‘ᤁᤢᤓᤠ ᤔᤏᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤁᤢᤓᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤏᤧᤓᤃᤪ ᤂᤧᤸᤗᤧ ᤋᤥ᤺ᤴᤍᤢᤒᤠ ᤛᤡᤍᤢᤱᤈᤓᤠᤴ ᤆᤢᤴᤈᤢᤶᤒᤠ ᤑᤣ᤹ᤖᤢᤶᤔᤡᤸᤗᤧᤴ ᤐᤥᤱᤔᤠ ᤐᤥᤱ᤹॥ ᤂᤢᤏᤧ᤹ ᤂᤧᤸᤗᤧ ᤁᤢᤛᤶᤎᤠᤱ ᤏᤡ᤺ᤱᤃᤣᤸᤗᤧ ᤗᤧ᤺ᤰᤋᤢᤀᤠᤱ ᤛᤢᤰᤐᤠ ᤕᤠᤰᤋᤢᤖ॥

² ᤂᤧᤒᤩᤠᤱ ᤂᤧᤸᤗᤧ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤀᤥ ᤂᤧᤴ ᤋᤠᤖᤢᤖ॥ ᤂᤧᤴᤗᤠᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤜᤢᤰᤐᤢᤵᤌᤡᤰ ᤁᤠᤱᤃᤠᤱᤒᤠ ᤆᤢᤴᤈᤢᤶᤒᤠ ᤑᤣ᤹ᤖᤢᤶ ᤏᤢ ᤏᤡ᤺ᤱᤃᤣᤴ ᤁᤧᤖᤧᤰ ᤛᤢᤰᤐᤠᤴᤏᤢ ᤛᤥᤖᤡᤰ ᤗ᤺ᤳᤋᤢ ᤗᤠᤖᤢᤖ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤁᤢᤏᤠᤶᤃᤧᤏᤢ᤹ᤒᤠ. ᤔᤡᤗᤠᤶᤒᤠ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ. ᤜᤢᤰᤘᤠ ᤜᤧᤰᤁᤣ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢᤍᤣᤛᤢᤖ॥

³ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤗᤠᤶ ᤁᤧᤏᤶᤒᤠ ᤁᤢᤈᤠᤴ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤰ ᤐᤥᤱᤗ॥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤔᤡᤗᤠᤶᤒᤠ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ᤀᤥ ᤁᤴ ᤛᤠ᤹ᤖᤡᤰ ᤛᤣᤛᤣᤒᤠ ᤛᤡᤍᤢᤱᤆᤓᤠᤖᤥ॥

⁴ “‘ᤔᤡᤜᤠ᤹ᤗᤢᤱᤅᤥ ᤀᤥ᤹ᤔᤏᤠᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤏᤡᤱᤘᤠ᤹ ᤘᤠ᤹ᤏᤧᤓᤃᤪ. ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤗᤧ᤺ᤱᤔᤠ ᤐᤥᤱ᤹॥ ᤂᤧᤴ ᤆᤢᤴᤈᤢᤶᤒᤠ ᤑᤣ᤹ᤖᤢᤶ ᤏᤢ ᤆᤤᤋᤢᤏ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤀᤠᤱ ᤗᤧ᤺ᤱᤔᤏᤠᤒᤠ ᤁᤧᤎᤢᤱᤒᤠ ᤂᤖᤧ᤺ᤱ ᤐᤥᤱᤔᤠ ᤐᤥᤱ᤹ ᤀᤡᤃᤪ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤏᤡ᤺ᤱᤃᤣ᤹ ᤜᤢ᤺ᤵᤔᤏᤠᤒᤠ ᤐᤠ᤹ᤒᤠ᤺ᤶᤒᤠ ᤂᤖᤧ᤺ᤱ ᤐᤥᤱᤔᤠ ᤐᤥᤱ᤹॥

⁵ “‘ᤂᤡᤏᤡ᤹ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤂᤣ᤺ᤰᤕᤠᤀᤥ ᤗᤧ᤺ᤱᤔᤏᤠᤒᤠᤏᤧᤃᤪ. ᤂᤖᤧ᤺ᤱ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤔᤏᤠᤒᤠ ᤆᤢᤴᤈᤢᤶᤒᤠ ᤑᤣ᤹ᤖᤢᤶᤔᤡᤸᤗᤧᤴ ᤐᤥᤱᤔᤠ ᤐᤥᤱ᤹॥

⁶ ᤂᤧᤴ ᤂᤧᤸᤗᤧᤰ ᤂᤧᤸᤗᤧᤰ ᤂᤧ᤺ᤰᤂᤧ᤹ᤀᤠᤱ ᤂᤧᤵᤔᤥ ᤏᤡ᤺ᤱᤃᤣᤴ ᤜᤢᤰᤂᤧ᤹॥ ᤂᤧᤱᤃ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤖᤥ॥

⁷ “‘ᤂᤡᤏᤡ᤹ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤂᤖᤧ᤺ᤱ ᤗᤧ᤺ᤱᤔᤠ ᤂᤣ᤺ᤰᤕᤠᤀᤥ ᤁᤧᤀᤣ᤺ᤵᤛᤢᤶᤒᤠᤏᤧᤓᤃᤪ. ᤂᤧᤴ ᤆᤢᤴᤈᤢᤶᤒᤠ ᤑᤣ᤹ᤖᤢᤶ ᤏᤢ ᤏᤡ᤺ᤱᤃᤣ᤹ᤗᤧᤴ ᤐᤥᤱᤔᤠ ᤐᤥᤱ᤹॥

⁸ ᤁᤴ ᤁᤢᤈᤠᤜᤠ᤹ᤗᤠᤶ ᤁᤧᤈᤥᤃᤢᤶᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤕᤜᤘᤣ ᤍᤠᤱᤒᤠᤀᤥ ᤋᤣ᤹ᤖᤧᤶᤔᤧ᤹॥ ᤏᤡᤱᤘᤠ᤹ᤑᤢᤛᤠᤶᤒᤠᤀᤥ ᤂᤧᤴ ᤋᤠᤖᤧᤶᤔᤧ᤹ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤋᤠᤖᤢᤖ॥

⁹ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤗᤠᤶᤒᤠ ᤜᤢᤰᤘᤠ ᤁᤢᤀᤡᤛᤡᤰ ᤁᤢᤗᤰ ᤗ᤺ᤳᤋᤢᤖ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤁᤢᤏᤠᤶᤃᤧᤏᤢ᤹ᤒᤠ. ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢᤖ॥

¹⁰ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤗᤠᤶ ᤁᤧᤏᤶᤒᤠ ᤁᤢᤈᤠᤴ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤰ ᤐᤥᤱᤗ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ᤀᤥ ᤁᤴ ᤛᤠ᤹ᤖᤡᤰ ᤛᤣᤛᤣᤒᤠ ᤛᤡᤍᤢᤱᤆᤓᤠᤖᤥ॥

¹¹ “‘ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤡᤏᤡ᤹ ᤁᤧᤍᤥ᤺ᤴᤍᤢᤶᤒᤠ ᤀᤠᤳᤋᤡᤴ ᤐᤥᤃᤢᤃᤧᤴ ᤁᤢᤈᤠ᤺ᤴᤏᤠᤱ ᤁᤧᤓᤱᤒᤠ ᤛᤡᤍᤠ᤹ ᤕᤠᤰᤔᤏᤠᤒᤠ ᤐᤥᤱᤔᤠ ᤔᤧᤏᤢ᤹ᤏᤧᤴ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤀᤥ ᤂᤡᤏᤡ᤹ ᤁᤧᤓᤱᤒᤠ ᤛᤡᤍᤠ᤹ ᤏᤢ ᤛᤰᤘᤠᤄᤢᤴ ᤔᤡᤔᤧᤎᤡᤰᤂᤧᤶᤔᤡᤴᤏᤧ᤹॥

¹² ᤂᤧᤱᤃ ᤋᤃᤡ ᤁᤧᤍᤢᤶᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤜᤠ᤹ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤁᤧᤍᤥ᤺ᤴᤍᤢᤶᤔᤡᤸᤗᤧ ᤐᤥᤱ᤹. ᤁᤖ ᤁᤢᤏᤠᤶᤃᤧᤏᤢ᤹ᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤂᤧᤱᤜᤠ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤧᤍᤥ᤺ᤴᤍᤧᤶᤔᤡᤴᤏᤧ᤹॥

¹³ ᤂᤡᤏᤡ᤹ ᤁᤧᤖᤧᤰ ᤐᤥᤃᤢᤃᤧᤴ ᤁᤢᤈᤠ᤺ᤸᤗᤧ ᤛᤡᤍᤢᤱᤈᤓᤠᤴ ᤕᤢᤶᤔᤡᤸᤗᤧ ᤁᤧᤗᤡᤶᤒᤠ ᤆᤥᤃᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤂᤡᤏᤡ᤹ ᤗᤢᤶᤔᤥᤒᤠ ᤔᤠᤱᤜᤢᤵᤐᤡᤴ ᤕᤢᤶᤔᤡᤸᤗᤧ ᤀᤥᤛᤣ᤺ᤴᤎᤠᤱ ᤆᤥᤃᤢ॥ ᤂᤡᤏᤡ᤹ ᤁᤧᤖᤧᤰ ᤛᤡᤍᤢᤱᤈᤓᤠᤀᤥ ᤕᤢᤶᤔᤠᤱ ᤋᤥ᤺ᤴᤍᤧᤶᤔᤧ᤹॥

¹⁴ “‘ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤋᤃᤡ ᤁᤧᤍᤢᤶᤒᤠ ᤂᤡᤏᤡ᤹ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤁᤧᤍᤥ᤺ᤴᤍᤢᤶᤏᤧᤓᤃᤪ. ᤂᤡᤏᤡ᤹ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤕᤢ᤺ᤵᤔᤏᤠᤒᤠ ᤏᤢ ᤔᤡᤀᤥ ᤛᤡᤵᤑᤱᤃᤪᤠ ᤆᤥ᤺ᤰᤔᤏᤠᤒᤠ ᤁᤢᤈᤠ ᤋᤥ᤺ᤴᤍᤧᤶᤔᤧ᤹॥

¹⁵ ᤂᤧᤵᤔᤥ ᤏᤡ᤺ᤱᤃᤣ᤹ ᤕᤠᤰᤋᤧᤶᤔᤧ᤹ ᤜᤧᤰᤁᤩᤠᤱ ᤛᤢᤰᤐᤠ ᤁᤣ᤺ᤳᤋᤧᤶᤔᤧ᤹॥ ᤂᤧᤱᤃ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤖᤥ॥

¹⁶ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤧᤖᤧᤰ ᤛᤢᤰᤐᤠᤴᤏᤢ ᤛᤥᤖᤡᤰ ᤏᤡ᤺ᤱᤃᤣ᤹ ᤏᤢ ᤕᤢ᤺ᤵᤔᤏᤠᤒᤠ ᤁᤢᤈᤠᤗᤠᤶ ᤁᤢᤓᤠ ᤗᤰ ᤕᤠᤱᤛᤡᤱᤅᤠᤱ ᤂᤧᤴ ᤜᤢᤰᤘᤠ ᤁᤢᤀᤡᤛᤡᤰ ᤔᤡᤎᤡᤰᤂᤢᤖ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤧᤴ ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ ᤁᤢᤈᤠ ᤛᤡᤍᤢᤱᤈᤓᤠᤖᤥ॥’”