ᤗᤧᤒᤡ 1 - LIFOTNT

ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ

¹ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤛᤡᤃᤠᤱᤗᤠᤶ ᤀᤢ᤺ᤳᤋᤢᤀᤠᤱ ᤔᤧᤳᤋᤢ.

² “ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤂᤡᤏᤡ᤹ᤀᤥᤗᤠᤶ ᤁᤢᤓᤠ ᤀᤠᤳᤋᤡᤴ ᤔᤏᤠ᤺ᤸᤗᤧᤛᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤸᤗᤧ ᤘᤕᤠᤃᤧᤴ ᤛᤡᤍᤢᤱᤈᤓᤠᤴ ᤂᤡᤏᤡ᤹ ᤐᤡᤳ ᤗᤢᤵᤐᤥᤒᤠ ᤀᤡᤃᤪ ᤔᤧᤸᤗᤢᤰ ᤔᤧ᤺ᤴᤍᤠ ᤗᤢᤵᤐᤥᤗᤠᤶ ᤂᤧᤸᤗᤧ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤖ ᤐᤥᤱ᤹॥

³ “‘ᤂᤧᤸᤗᤧ ᤋᤥ᤺ᤴᤍᤢᤒᤠ ᤛᤡᤍᤢᤱᤈᤓᤠᤴ ᤐᤡᤳᤗᤧᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤏᤧᤓᤃᤪ. ᤔᤧᤱᤃᤠ᤺ᤶᤔᤏᤠᤒᤠ ᤁᤢᤶᤒᤠᤒᤠ ᤐᤡᤳᤛᤠᤳᤋᤡᤴ ᤋᤥ᤺ᤴᤍᤢᤖ ᤐᤥᤱ᤹॥ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤳᤋᤥ ᤂᤢᤏᤧ᤹ ᤂᤧᤴ ᤋᤥ᤺ᤴᤍᤢᤖ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤋᤠ᤺ᤰᤋᤢ᤹॥

⁴ ᤂᤧᤸᤗᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤎᤧᤃᤣ᤺ᤰᤐᤥ ᤂᤢᤏᤧ᤹ ᤁᤢᤜᤢᤰᤁᤡᤴ ᤏᤧᤛ᤻ᤛᤢᤖ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤋᤠ᤺ᤰᤋᤢ᤹॥

⁵ ᤂᤧᤸᤗᤧ ᤂᤧᤴ ᤐᤡᤳᤛᤠᤳᤋᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤆᤩᤧᤵᤋᤢᤀᤠᤱ ᤛᤩᤧᤖᤢᤖ॥ ᤜᤧᤰᤁᤩᤠᤱ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤛᤠᤔᤠᤰᤂᤡᤴ ᤏᤡ᤺ᤳᤋᤠᤱ ᤔᤧᤍᤣ᤹ᤖᤢᤖ ᤜᤧᤰᤁᤩᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤒᤣᤛᤠᤱᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤕᤠᤶᤗᤧᤱᤒᤥ ᤇ᤻ᤘᤠ᤺ᤰ ᤔᤧᤜᤢᤰᤂᤢ ᤔᤧᤍᤣᤛᤢᤖ॥

⁶ ᤂᤧᤴ ᤀᤣᤃᤠᤱ ᤂᤧᤸᤗᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤜᤥᤖᤡᤰᤁᤧᤴ ᤌᤡ᤺ᤰᤋᤢᤀᤠᤱ ᤂᤧᤴ ᤌᤰᤛᤠᤴ ᤁᤢᤈᤰᤋᤠ ᤁᤢᤗᤧᤶᤍᤠ ᤐᤥᤱᤗ ᤌᤠᤖᤡᤰ ᤂᤰᤋᤢᤖ॥

⁷ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠᤜᤠ᤹ᤖᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤛᤡᤱᤜᤠ᤹ ᤔᤧᤒᤧᤴᤇᤢᤀᤠᤱ ᤔᤡ᤺ᤸᤗᤧ ᤁᤢᤛᤶᤎᤠᤱ ᤔᤧᤏᤧᤛ᤻ᤛᤢᤖ ᤜᤧᤰᤁᤩᤠᤱ ᤔᤡ ᤔᤧᤜᤠ᤺ᤴᤍᤢᤖ॥

⁸ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤛᤶᤎᤠᤱ ᤔᤡᤀᤥ ᤔᤧᤏᤧᤛ᤻ᤛᤢᤒᤠ ᤛᤡᤱᤅᤡᤸᤗᤧ ᤁᤢᤛᤶᤎᤠᤱ ᤂᤧᤴ ᤁᤢᤈᤰᤋᤠ ᤁᤢᤗᤧᤶᤍᤠᤜᤠ᤹. ᤁᤢᤎᤧᤃᤣ᤺ᤰᤁᤡᤴ ᤏᤢ ᤁᤢᤛᤥ᤺ᤳᤋᤡᤴ ᤔᤧᤒᤧᤴᤇᤢ ᤔᤧᤏᤧᤛ᤻ᤛᤢᤖ॥

⁹ ᤂᤢᤏᤧ᤹ ᤂᤧᤸᤗᤧ ᤁᤢᤜᤡᤍᤢᤳ ᤁᤢᤎᤧᤅᤠᤱ ᤏᤢ ᤁᤢᤗᤠᤱᤜᤠ᤹ ᤆᤫᤠ᤺ᤳᤋᤡᤸᤗᤧ ᤘᤠᤜᤵᤋᤢᤖ. ᤜᤧᤰᤁᤩᤠᤱ ᤂᤧᤴ ᤁᤧᤖᤧᤰᤁᤣ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢᤍᤣᤛᤢᤖ॥ ᤕᤜᤘᤣ ᤍᤠᤱᤒᤠᤸᤗᤧ ᤁᤴ ᤗᤳᤇᤠ ᤁᤢᤛᤡᤖᤠ᤹ᤃᤧᤎᤠᤱᤒᤠ ᤁᤢᤏᤠᤶᤃᤧᤏᤢ᤹ᤒᤠ. ᤔᤡᤗᤠᤶᤒᤠ ᤋᤥ᤺ᤶᤔᤏᤠᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤖᤥ॥

¹⁰ “‘ᤂᤧᤸᤗᤧ ᤋᤥ᤺ᤴᤍᤢᤒᤠ ᤛᤡᤍᤢᤱᤈᤓᤠᤴ ᤌᤰᤛᤠ ᤗᤢᤵᤐᤥᤗᤠᤶ ᤔᤧᤸᤗᤢᤰ ᤀᤡᤃᤪ ᤔᤧ᤺ᤴᤍᤠ᤺ᤸᤗᤧᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤏᤧᤓᤃᤪ. ᤂᤧᤸᤗᤧ ᤔᤧᤱᤃᤠ᤺ᤶᤔᤏᤠᤒᤠ ᤌᤢ᤺ᤶᤒᤠ ᤀᤡᤃᤪ ᤔᤧ᤺ᤴᤍᤒᤁᤠᤴ ᤋᤥ᤺ᤴᤍᤢᤖ॥

¹¹ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤌᤠᤱᤃᤧᤳ ᤗᤧᤵᤔᤠᤱ ᤂᤧᤴ ᤆᤩᤧᤵᤋᤢ ᤛᤧᤖᤢᤖ ᤜᤧᤰᤁᤩᤠᤱ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤧᤸᤗᤧ ᤁᤢᤔᤠᤰᤂᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤁᤒᤪᤡᤱ ᤔᤧᤛᤠᤰᤂᤢᤖ॥

¹² ᤂᤧᤸᤗᤧ ᤂᤧᤴ ᤌᤰᤛᤠᤴ ᤁᤢᤈᤰᤋᤠ ᤁᤢᤗᤧᤶᤍᤠ ᤂᤰᤋᤢᤖ ᤜᤧᤰᤁᤩᤠᤱ ᤁᤢᤎᤧᤃᤣ᤺ᤰᤁᤡᤴ ᤏᤢ ᤁᤢᤛᤥ᤺ᤳᤋᤡᤴ ᤛᤥᤛᤥᤖᤡᤰ ᤂᤧᤴ ᤁᤢᤈᤰᤋᤠ ᤁᤢᤗᤧᤶᤍᤠ ᤂᤰᤋᤢᤒᤠᤜᤠ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤁᤧᤏᤧᤒᤠ ᤔᤡ᤺ᤸᤗᤧ ᤁᤢᤛᤶᤎᤠᤱᤒᤠ ᤛᤡᤱᤅᤥ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤐᤧᤴᤇᤢ ᤏᤧᤛ᤻ᤛᤢᤖ॥

¹³ ᤂᤧᤸᤗᤧ ᤁᤢᤜᤡᤍᤢᤳ ᤁᤢᤎᤧᤅᤠᤱ ᤏᤢ ᤁᤢᤗᤠᤱᤜᤠ᤹ ᤆᤫᤠ᤺ᤳᤋᤡᤸᤗᤧ ᤘᤠᤜᤵᤋᤢᤀᤠᤱ ᤂᤧᤴ ᤁᤧᤖᤧᤰ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤀᤥ᤹ᤖᤢᤀᤠᤱ ᤔᤡᤎᤡᤰᤂᤢᤍᤣᤛᤢᤖ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤁᤢᤏᤠᤶᤃᤧᤏᤢ᤹ᤒᤠ. ᤔᤡᤗᤠᤶᤒᤠ ᤋᤥ᤺ᤶᤔᤏᤠᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤖᤥ॥

¹⁴ “‘ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤂᤧᤸᤗᤧ ᤋᤥ᤺ᤴᤍᤢᤒᤠ ᤛᤡᤍᤢᤱᤈᤓᤠᤴ ᤐᤢᤛᤠᤗᤠᤶᤒᤠᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤏᤧᤓᤃᤪ. ᤂᤧᤸᤗᤧ ᤋᤥ᤺ᤴᤍᤢᤒᤠᤴ ᤐᤢᤳᤋᤢ᤺ᤰᤁᤣ ᤀᤡᤃᤪ ᤐᤧᤷᤘᤠ᤺ᤸᤗᤧ ᤁᤢᤛ᤻ᤛᤠᤜᤠ᤹ ᤂᤧᤸᤗᤧ ᤛᤡᤍᤢᤱᤈᤓᤠᤴ ᤋᤥ᤺ᤴᤍᤢᤖ॥

¹⁵ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤂᤧᤴ ᤋᤠᤖᤢᤀᤠᤱ ᤂᤧᤸᤗᤧ ᤁᤢᤎᤧᤃᤣᤰᤐᤠᤴ ᤂᤀᤡᤰ ᤀᤡᤃᤢ ᤑᤢ᤹ᤖᤢᤖ ᤜᤧᤰᤁᤩᤠᤱ ᤁᤢᤎᤧᤃᤣ᤺ᤰᤁᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢᤍᤣᤛᤢᤖ॥ ᤜᤧᤰᤁᤩᤠᤱ ᤔᤠᤰᤂᤡᤴᤃ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤕᤠᤶᤗᤧᤱᤒᤥ ᤛᤡ᤺ᤵᤋᤢᤖ॥

¹⁶ ᤂᤧᤸᤗᤧ ᤂᤧᤴ ᤘᤜᤡᤏᤢ ᤛᤥᤖᤡᤰᤐᤠ ᤁᤢᤍᤰᤑᤴ ᤁᤢᤜᤡᤍᤢᤳ ᤁᤢᤶᤒᤪᤡᤰᤜᤠ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤏᤠᤱᤃᤧᤴ ᤗᤧᤵᤔᤠᤱᤒᤠ ᤂᤠᤵᤐᤢ ᤁᤧᤏᤧᤒᤠᤍᤧᤴᤏᤥ ᤗᤠᤵᤑᤣᤛᤢᤖ॥

¹⁷ ᤂᤧᤸᤗᤧ ᤂᤧᤴ ᤔᤧᤱᤄᤰᤁᤣ ᤁᤢᤗᤠᤵᤐᤡᤸᤗᤧ ᤁᤢᤗᤢᤶᤔᤥᤗᤠᤶ ᤌᤧᤛᤢᤖ॥ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤁᤧᤏᤧᤒᤠ ᤔᤡ᤺ᤸᤗᤧ ᤁᤢᤛᤶᤎᤠᤱᤒᤠ ᤔᤡᤀᤥ ᤂᤧᤴ ᤔᤡᤎᤡᤰᤂᤢᤖ. ᤕᤜᤘᤣ ᤍᤠᤱᤒᤠᤸᤗᤧ ᤁᤴ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤁᤢᤏᤠᤶᤃᤧᤏᤢ᤹ᤒᤠ. ᤔᤡᤗᤠᤶᤒᤠ ᤋᤥ᤺ᤶᤔᤏᤠᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤖᤥ॥’”