ᤔᤧᤖᤡᤱ ᤛᤠᤵᤐᤴ 5 - LIFOTNTᤗᤢᤱᤔᤠ᤹ ᤀᤠᤍᤢᤰᤋᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤔᤠ 1 ᤕᤜᤘᤣ ᤍᤠᤱᤒᤠᤀᤣ. ᤀᤠᤏᤡᤃᤣ ᤛᤶᤎᤠᤱ ᤌᤣ ᤐᤥ᤺ᤰᤂᤧᤀᤡ. ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ᤀᤠᤏᤡᤃᤣ ᤀᤰᤋᤱᤒᤠ ᤏᤠᤎᤩᤧᤀᤠᤱ ᤘᤠ᤹. ᤂᤧᤴ ᤀᤥᤔᤧᤳᤋᤧᤶᤔᤧ᤹ᤀᤥ॥ 2 ᤀᤠᤏᤡᤃᤣ ᤕᤠᤱᤛᤠᤁᤢᤴᤎᤣᤜᤠ᤹ ᤘᤣ᤹ᤜᤠ᤹ᤖᤧᤴ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ. ᤀᤠᤏᤡᤃᤣ ᤜᤡᤶᤜᤠ᤹ ᤘᤣ᤹ ᤗᤠᤈᤣ᤹ᤒᤠᤜᤠ᤹ᤖᤧᤴ ᤐᤥ᤺ᤰᤂᤧᤀᤠᤱ ᤏᤧᤖᤥ॥ 3 ᤀᤠᤏᤡᤃᤣ ᤕᤧᤳᤇᤠᤒᤠ ᤏᤢ ᤐᤠᤏᤢᤍᤡᤱ ᤐᤠ ᤔᤣ᤺ᤴᤏᤣᤒᤠ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤖᤥ. ᤀᤠᤏᤡᤃᤣ ᤔᤠᤜᤠ᤹ ᤔᤣᤔᤣᤍᤢᤔᤠ ᤜᤧᤰᤋᤱᤔᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ 4 ᤌᤢᤱᤔᤠ ᤆᤫᤠ᤺ᤳᤋᤡᤴᤏᤠᤱ ᤀᤠᤏᤡᤃᤣ ᤗᤠᤃᤡ ᤜᤢᤱᤔᤠ ᤐᤥᤱᤗᤥ. ᤛᤡᤱᤅᤡᤴᤏᤠᤱ ᤀᤠᤏᤡᤃᤣ ᤀᤠᤵᤑᤣᤰ ᤗᤠᤃᤡ ᤀᤡᤱᤔᤠ ᤐᤥᤱᤗᤥ॥ 5 ᤀᤠᤏᤡᤃᤣ ᤏᤠ᤺ᤳᤁᤢᤒᤠᤱᤜᤠ᤹ ᤀᤠᤏᤡᤃᤣ ᤗᤠᤱᤕᤥ᤺ᤰᤁᤥᤀᤣ ᤔᤧᤘᤠ᤹ᤖᤥ. ᤀᤠᤏᤡᤃᤣ ᤐᤏᤠ ᤏᤠᤛᤡᤃᤧᤀᤠᤱ ᤏᤠ᤺ᤶᤛᤡᤱᤔᤠ ᤔᤧᤱᤄᤥᤀᤣ ᤘᤕᤡᤃᤧᤖᤥ॥ 6 ᤀᤠᤏᤡᤃᤣ ᤛᤠᤵᤐᤥᤰ ᤂᤠᤄᤠ ᤆᤠᤔᤠ ᤏᤢ ᤌᤢᤱᤔᤠᤖᤧᤗᤠᤃᤡ ᤔᤡᤛᤪ ᤏᤢ ᤀᤛ᤻ᤛᤢᤖᤀᤥ ᤀᤠᤏᤡᤃᤣ ᤜᤢᤰᤜᤠ᤹ ᤛᤴᤇᤢᤶᤒᤧᤖᤥ॥ 7 ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ᤖᤧ ᤗᤠᤕᤥ ᤗᤠᤛᤥᤳ ᤔᤧᤈᤥᤃᤢᤖᤥ. ᤜᤧᤰᤁᤩᤠᤱ ᤀᤠᤸᤗᤥ ᤂᤧᤱᤜᤠ᤹ ᤔᤧᤜᤥᤵᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤴ ᤁᤢᤕᤢᤶᤒᤧᤖ ᤘᤕᤡᤃᤧᤖᤥ॥ 8 ᤕᤥ᤺ᤃ᤻ᤒᤠᤜᤠ᤹ᤖᤧ ᤀᤠᤏᤡᤃᤣ ᤛᤶᤎᤠᤱ ᤕᤢᤰ ᤔᤧᤈᤥᤃᤢᤖ ᤔᤧᤘᤠ᤹ᤖᤥ. ᤀᤠᤏᤡᤃᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤥᤗᤠᤶ ᤁᤧᤎᤧ᤹ᤒᤠ ᤜᤠ᤺ᤳᤋᤠᤱ ᤜᤥᤵᤗᤥ॥ 9 ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤀᤠᤱ ᤋᤠᤓᤣ᤺ᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤣ ᤜᤡᤱᤔᤧᤴ ᤁᤧᤛᤠᤰᤐᤥ ᤌᤠᤛᤢᤶᤒᤧᤀᤠᤱ ᤆᤠᤔᤠ ᤁᤢᤈᤠ ᤋᤠ᤺ᤵᤔᤠ ᤐᤥᤱᤗᤥ॥ 10 ᤛᤧᤳᤗᤠ᤺ᤰᤔᤠᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤣ ᤜᤥᤖᤡᤰᤁᤧᤴ ᤔᤡᤜᤠ᤺ᤳᤗᤢᤱ ᤜᤧᤰᤁᤣ ᤐᤕᤧᤶ ᤐᤕᤧᤶ ᤕᤧᤶᤗᤥ॥ 11 ᤛᤡᤕᤥᤏᤒᤠ ᤔᤧᤴᤇᤢᤔᤠᤜᤠ᤹ ᤏᤢ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤀᤥ ᤛᤡᤛᤠᤍᤡᤱ ᤔᤧᤴᤇ᤻ᤕᤠᤜᤠ᤹ ᤔᤣ᤺ᤳ ᤔᤧᤔᤧᤳᤋᤢᤛᤡᤀᤠᤱ ᤘᤠ᤹ᤖᤥ॥ 12 ᤀᤠᤏᤡᤃᤣ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤧᤸᤗᤧ ᤀᤠᤏᤡᤃᤣ ᤋᤢᤶᤔᤩᤠᤱᤜᤠᤱᤜᤠ᤹ ᤔᤧᤓᤥ᤺ᤴᤍᤢᤛᤡᤀᤠᤱ ᤘᤠ᤹ᤖᤥ. ᤀᤠᤏᤡᤃᤣ ᤋᤢᤶᤓᤠᤰᤛᤠᤜᤠ᤹ ᤌᤣᤀᤠᤱ ᤔᤡᤱᤛᤥ ᤀᤡᤱᤎᤠᤱ ᤔᤧᤶᤒᤡᤖᤢᤛᤡᤴᤗᤥ॥ 13 ᤏᤠᤗᤡᤃᤧᤴ ᤌᤠᤱᤒᤧᤴᤜᤠ᤹ᤖᤧ ᤏᤡᤱᤘᤠ᤹ ᤔᤧᤴᤍᤧᤴᤏᤣ ᤗᤢᤱᤛᤢᤶ ᤕᤢ᤺ᤵᤔᤠ ᤐᤥᤱᤗᤥ. ᤆᤵᤐᤪᤰ ᤌᤠᤱᤒᤧᤴ ᤁᤧᤃᤧᤵᤐᤠᤜᤠ᤹ ᤛᤡᤱᤃᤰᤁᤡᤸᤗᤧ ᤁᤧᤵᤋᤢᤛᤡᤖᤥ. ᤂᤧᤒᤩᤠᤱ ᤂᤧᤱᤜᤠ᤹ ᤐᤧ᤺ᤱᤃᤰ ᤐᤧ᤺ᤱᤃᤰ ᤗ᤹ᤖᤡᤰ ᤗᤠᤱᤔᤧᤄᤣ᤺ᤰᤗᤥ॥ 14 ᤁᤠᤵᤐᤥᤒᤠᤜᤠ᤹ ᤕᤧᤰᤕᤰᤁᤥᤒᤠ ᤔᤠ ᤗᤠᤶᤎᤣ᤺ᤵᤐᤥ ᤆᤢᤶᤔᤠ ᤔᤧᤏᤠ᤹ᤖᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤌᤠᤱᤒᤧᤴᤜᤠ᤹ᤖᤧ ᤛᤠᤶᤗᤥ ᤛᤠᤶᤔᤧᤵᤔᤠ ᤀᤡᤰᤗᤠᤴ ᤔᤧᤗᤧᤖᤢ ᤔᤧᤍᤣᤛᤢᤖᤥ॥ 15 ᤀᤠᤏᤡᤃᤣ ᤏᤡᤱᤘᤠ᤹ᤀᤥᤗᤠᤶ ᤏᤡᤱᤘᤠ᤹ ᤋᤠᤔᤠᤴ ᤔᤕᤧᤒᤣᤀᤠᤱ ᤘᤠ᤹ᤖᤥ. ᤀᤠᤏᤡᤃᤣ ᤗᤠ᤺ᤱᤔᤠᤴ ᤔᤧᤖᤡᤱᤅᤥ ᤗᤧᤱᤛᤡᤱᤅᤠᤱ ᤘᤠ᤹ᤖᤥ॥ 16 ᤀᤠᤏᤡᤃᤣ ᤌᤧᤃᤣ᤺ᤰᤁᤥᤗᤠᤶ ᤋᤡᤆ᤺ᤴ ᤔᤰᤌᤩᤧᤀᤠᤱ ᤏᤧᤖᤥ. ᤀᤠᤏᤡᤃᤣ ᤆᤡ᤺ᤳᤋᤧ ᤛᤩᤧ᤹ᤀᤡᤃᤧᤖᤥ. ᤌᤣᤀᤠᤱᤓᤧᤸᤗᤧ ᤗᤠᤕᤥ ᤆᤥᤃᤢᤶᤒᤧᤀᤠᤱ ᤘᤠ᤹ᤖᤥ॥ 17 ᤁᤸᤗᤧᤆᤥᤃᤢᤸᤗᤧ ᤀᤠᤏᤡᤃᤣ ᤛᤡᤰᤗᤢᤱᤔᤧᤴ ᤏᤠᤛᤧᤀᤠᤱ ᤘᤠ᤹ᤖᤥ. ᤀᤠᤶᤓᤠ ᤁᤸᤗᤧᤆᤥᤃᤢᤸᤗᤧ ᤀᤠᤏᤡᤃᤣ ᤔᤡᤰᤜᤠ᤹ ᤂᤠᤎᤠᤵᤋᤢᤀᤠᤱ ᤐᤳᤗᤥ॥ 18 ᤌᤣᤀᤠᤱᤓᤧᤸᤗᤧ ᤛᤡᤕᤥᤏ ᤁᤥ᤺ᤰᤔᤧᤴ ᤆᤡᤈᤡ ᤕᤧᤶᤕᤧᤶ ᤕᤢᤱᤗᤥ. ᤂᤧᤵᤔᤥ ᤛᤩᤠᤗᤠᤜᤠ᤹ ᤀᤢ᤺ᤱᤃᤠ᤺ᤰ ᤀᤢ᤺ᤱᤃᤠ᤺ᤰ ᤋᤠᤰᤔᤧᤃᤴᤏᤠᤱ ᤔᤧᤘᤠ᤹ᤖᤥ॥ 19 ᤁᤖ ᤕᤜᤘᤣ ᤍᤠᤱᤒᤠᤀᤣ. ᤀᤠᤍᤠᤱᤒᤠ. ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤕᤢᤰ ᤁᤧᤈᤥ᤺ᤰᤗᤥ. ᤀᤠᤍᤠᤱᤒᤠᤖᤧ ᤁᤧᤜᤠᤱᤕᤢᤰᤏᤠᤴ ᤛᤍᤠᤍᤡᤱ ᤌᤠᤖᤡᤰ ᤜᤠᤒᤠ ᤘᤠ᤹ᤖᤥ॥ 20 ᤀᤠᤍᤠᤱᤒᤠᤖᤧ ᤌᤣᤀᤠᤱ ᤀᤠᤏᤡᤃᤣ ᤕᤠᤵᤔᤡ ᤛᤢᤎᤠ᤺ᤶ ᤏᤡᤱᤘᤠ᤹ ᤁᤧᤓᤣ᤺ᤶᤒᤠᤒᤣ᥅ ᤀᤠᤍᤠᤱᤒᤠᤖᤧ ᤀᤠᤏᤡᤃᤣ ᤌᤣᤀᤠᤱ ᤁᤶᤓᤩᤠᤖᤡᤰ ᤀᤡᤖᤡᤰ ᤀᤠᤃ᤻ᤏᤠ᤹ᤒᤠᤒᤣ᥅ 21-22 ᤀᤠᤍᤠᤱᤒᤠᤖᤧ ᤀᤠᤏᤡᤃᤣ ᤜᤡᤗᤠᤵᤑᤢ ᤕᤠᤵᤔᤡ ᤁᤧᤏᤠ᤹ᤖᤧᤒᤠ ᤜᤥᤵᤏᤧᤓᤃᤪ ᤜᤧᤰᤁᤩᤠᤱ ᤛᤠ᤹ᤖᤡᤰ ᤁᤧᤕᤠ᤺ᤰ ᤔᤧᤸᤗᤧ᤹ᤀᤣ ᤘᤠ᤹ᤏᤧᤓᤃᤪ ᤕᤜᤘᤣ ᤍᤠᤱᤒᤠᤀᤣ. ᤀᤠᤍᤠᤱᤒᤠ ᤗᤧᤵᤔᤠᤱ ᤀᤠᤏᤡᤃᤣ ᤀᤠᤏᤢ᤺ᤰᤋᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤀᤠᤏᤡᤃᤣ ᤏᤢ᤺ᤱᤔᤠ ᤛᤢᤰᤋᤡᤃᤧᤖᤖᤥ. ᤀᤠᤏᤡᤃᤣ ᤕᤧᤴᤏᤡᤴ ᤋᤃᤡᤒᤠ ᤁᤢᤀᤡᤛᤡᤰ ᤁᤢᤛᤱ ᤆᤥᤃᤧ ᤀᤠᤒᤡᤖᤧ᤹ᤀᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.