ᤔᤧᤖᤡᤱ ᤛᤠᤵᤐᤴ 4 - LIFOTNTᤕᤖᤢᤛᤗᤧ᤺ᤶᤔᤡᤴ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧ 1 ᤀᤠᤕᤠᤰᤁᤥ ᤛᤠᤶᤔᤩᤠᤱᤅᤡᤸᤗᤧ ᤁᤢᤀᤥ᤺ᤵᤔᤠᤴ ᤔᤕᤧᤒᤣᤖᤥ ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠᤴ ᤛᤓᤡᤱᤃᤩᤠ᤺ᤵᤐᤠ ᤐᤥ᤺ᤰᤂᤧᤖᤥ᥄ ᤛᤣᤛᤣ ᤗᤢᤱᤜᤠ᤹ ᤕᤶᤒᤠ ᤔᤠᤖᤠᤶᤜᤠ᤹ ᤌᤰᤔᤠ ᤜᤳᤇᤧ ᤜᤳᤇᤧ ᤔᤧᤛᤧᤛᤢᤀᤠᤱ ᤏᤧᤖᤥ॥ 2 ᤀᤠᤕᤠᤰᤁᤥ ᤛᤠᤶᤔᤩᤠᤱ ᤀᤡᤛᤣ᤺ᤱ ᤁᤢᤛᤡᤱᤒᤠ ᤛᤡᤕᤥᤏᤖᤧ ᤁᤢᤛ᤻ᤛᤠᤜᤠ᤹ᤃ ᤀᤠᤸᤗᤥ ᤁᤢᤓᤠ ᤁᤥ᤺ᤶᤓᤠᤗᤩᤠ᤺ᤸᤗᤧ ᤁᤢᤜᤢᤰᤁᤡᤸᤗᤧ ᤆᤥᤃᤢᤒᤠ ᤂᤠᤶᤂᤵᤐᤩᤠ ᤑᤢᤈᤡᤰᤜᤠ᤹ ᤜᤧᤰᤋᤱᤒᤠ ᤔᤧᤴᤈᤥᤒᤠ ᤔᤧᤗᤣ᤺ᤳᤋᤢᤛᤡᤀᤠᤱ ᤔᤧᤘᤠ᤹ᤖᤥ᥄ 3 ᤁᤢᤶᤔᤠᤔᤠ ᤛᤩᤠᤗᤠᤜᤠ᤹ᤖᤧᤀᤠᤱ ᤂᤢᤴᤇᤡ᤹ ᤏᤢᤛᤣ᤹ᤜᤠ᤹ ᤔᤧᤗ᤺ᤳᤋᤢᤖᤥ ᤜᤧᤰᤁᤩᤠᤱ ᤜᤢᤴᤇᤡ᤹ ᤀᤅᤧ᤺ᤰᤘᤠ ᤛᤠᤜᤠ᤹ᤖᤧ ᤔᤧᤒᤡ᤺ᤳᤋᤢᤖ ᤔᤧᤕᤠ᤺ᤴᤍᤢᤛᤡᤖᤥ. ᤁᤖ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤃ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤒᤠ ᤌ᤺ᤱᤘᤠ ᤐᤢᤜᤠ᤹ ᤜᤧᤰᤋᤱᤒᤠ ᤁᤢ᤹ᤀᤡᤃᤧᤓᤧᤶᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ 4 ᤏᤢᤃᤧᤎᤢᤱᤒᤠ ᤀᤅᤧ᤺ᤰᤘᤠ᤺ᤸᤗᤧ ᤁᤢᤸᤛᤥ᤺ᤳᤋᤧᤴ ᤘᤠᤔᤡ᤺ᤰᤔᤠᤸᤗᤧ ᤁᤢᤄᤠᤶᤍᤠ᤺ᤰᤔᤥ ᤆᤡᤄᤡᤵ ᤂᤡᤵᤋᤢᤖᤥ॥ ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤆᤠᤔᤠ ᤁᤢᤈᤠ ᤔᤧᤏᤠ᤺ᤰᤋᤢᤖᤥ. ᤁᤖ ᤜᤠ᤺ᤳᤗᤧᤀᤠᤱ ᤂᤧᤱᤜᤠ᤹ ᤌᤣᤎᤡᤰᤁᤠᤱ ᤔᤧᤒᤡᤖᤢᤴᤛᤡᤴᤗᤥ॥ 5 ᤁᤢᤈᤠ ᤁᤧᤏᤢ᤹ᤒᤠ ᤁᤢᤈᤠ ᤁᤧᤈᤠᤒᤠᤜᤠ᤹ ᤀᤠᤸᤗ ᤔᤠᤖᤠᤶᤜᤠ᤹ᤀᤥ ᤌᤣᤎᤡᤰᤁᤠᤱ ᤔᤧᤱᤃᤵᤔᤏᤠᤒᤠ ᤕᤠᤱᤃᤧᤛᤠ᤹ᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ. ᤐᤠᤖᤠᤴᤗᤠ ᤋᤣᤳ ᤁᤧᤈᤠᤱᤒᤠᤀᤠᤱ ᤁᤧᤒᤥᤒᤠᤜᤠ᤹ ᤀᤠᤸᤗᤥ ᤂᤠᤵᤐᤢ ᤁᤧᤗᤢᤶᤛᤡᤱᤒᤠᤍᤧᤴᤏᤥ ᤔᤧᤏᤧ ᤔᤧᤃᤴᤗᤥ॥ 6 ᤛᤍᤥᤶᤔᤧᤴ ᤜᤠ᤺ᤳᤗᤧ ᤁᤢᤜᤢᤰᤁᤡᤸᤗᤧᤀᤠᤱ ᤔᤧᤶᤓᤠ᤹ᤀᤣ ᤛᤵᤑᤠᤎᤡᤰᤗᤧᤛᤠ ᤗᤠᤵᤐᤢᤱ ᤔᤧᤍᤣᤛᤢᤖᤥ॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤔᤠ ᤂᤢᤶᤍᤡᤱᤅᤡᤴ ᤛᤍᤥᤔ ᤁᤧᤕᤢᤱᤒᤠᤜᤠ᤹ᤖᤧᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤆᤥᤰᤗᤥ॥ 7 ᤂᤧᤵᤔᤥᤒᤠ ᤋᤢᤶᤔᤩᤠᤱᤜᤠᤱᤜᤠ᤹ ᤏᤠ᤺ᤱᤏᤢ᤺ᤸᤗᤧ ᤛᤣᤛᤣᤒᤠ ᤔᤧᤘᤕᤧᤖᤥ ᤜᤧᤰᤁᤩᤠᤱ ᤐᤡᤳᤏᤢᤏᤢ᤺ᤸᤗᤧ ᤑᤍᤠᤱᤒᤠ ᤔᤧᤈᤥᤃᤧᤖᤥ. ᤂᤢᤴᤇᤡ᤹ ᤌᤰᤜᤠ᤹ ᤔᤢᤎᤡᤱ ᤗᤢᤱᤏᤢ᤺ᤸᤗᤧᤀᤠᤱ ᤜᤧ᤺ᤳᤋᤠᤱᤒᤠ ᤆᤥᤃᤧᤖᤥ. ᤂᤧᤱᤜᤠ᤹ ᤔᤧᤎᤠ᤺ᤶᤛᤡᤱᤒᤠᤴ ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤔᤢᤎᤡᤱᤗᤢᤱ ᤜᤧᤰᤋᤱᤒᤠ ᤆᤥᤃᤧᤖᤥ॥ 8 ᤁᤖ ᤀᤠᤸᤗ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤖᤠᤴ ᤔᤠᤰᤛᤢ᤺ᤴᤍᤠᤏᤢ᤺ᤸᤗᤧᤀᤠᤱ ᤔᤠᤰᤁᤧᤗ᤹ᤒᤠ ᤐᤥ᤺ᤰᤂᤧᤖᤥ. ᤂᤧᤱᤜᤠ᤹ ᤔᤠᤖᤠᤶᤜᤠ᤹ᤀᤥᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤇᤣ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤥᤖᤡᤰᤐᤠᤴ ᤕᤧᤳᤋᤥ ᤂᤡᤵᤋᤢᤀᤠᤱ ᤐᤳᤗᤥ. ᤛᤡᤱ ᤜᤧᤰᤁᤣ ᤂᤧᤴ ᤐᤄᤧᤰ ᤂᤧᤰᤋᤢᤀᤠᤱ ᤐᤳᤗᤥ॥ 9 ᤛᤠᤰᤔᤧᤴᤈᤠ ᤘᤔᤧᤴᤎᤢᤱ ᤁᤧᤛᤡᤒᤠᤜᤠ᤹ᤏᤢ᤺ᤸᤗᤧ ᤋᤠᤓᤣᤗᤠᤶ ᤁᤧᤛᤡᤒᤠᤜᤠ᤹ ᤀᤠᤸᤗᤛᤠᤱ ᤏᤢᤒᤠ ᤔᤧᤒᤥᤱᤗᤥ॥ ᤂᤠᤶᤒᤣ᤺ᤰᤁᤥ ᤁᤧᤎᤥ᤺ᤰᤐᤠ ᤁᤢᤈᤠ ᤜᤥᤵᤐᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤛᤡᤰᤗᤠ᤺ᤰᤁᤠᤱ ᤔᤧᤜᤣᤖ ᤔᤧᤒᤣ᤺ᤰᤗᤥ॥ 10 ᤁᤢᤗᤢᤱᤔᤠ᤹ ᤛᤩᤠ᤺ᤳ ᤁᤧᤗ᤹ᤔᤠ ᤔᤧᤴᤇᤢᤔᤠᤜᤠ᤹ᤖᤧ ᤀᤠᤵᤑᤣᤰ ᤜᤢᤰᤁᤡᤸᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤅᤧ᤺ᤰᤘᤠ ᤛᤠᤜᤠ᤹ ᤔᤧᤎᤥ᤺ᤰᤋᤢᤛᤡᤖᤥ॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤧᤰᤔᤠ ᤛᤡᤔᤠᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤶᤒᤪᤧ᤺ᤱᤘᤠ ᤛᤠᤜᤠ᤹ᤀᤣ ᤆᤠᤔᤠ ᤁᤢᤈᤠ ᤔᤧᤒᤥ᤺ᤰᤂᤧᤖᤥ॥ 11 ᤕᤜᤘᤣ ᤍᤠᤱᤒᤧᤸᤗᤧ ᤛᤠ᤹ᤖᤡᤰ ᤁᤢᤛᤡᤰ ᤐᤥ᤺ᤰᤔᤧᤴ ᤀᤥ᤺ᤴᤎᤠᤰᤋᤢᤛᤡᤖᤥ. ᤂᤢᤏᤧ᤹ ᤔᤡ ᤜᤧᤰᤋᤱᤒᤠ ᤁᤢᤛᤠᤰᤁᤧᤴᤏᤡᤴ ᤌᤠᤛᤢᤖᤥ॥ ᤂᤢᤏᤧ᤹ ᤛᤡᤕᤥᤏᤀᤥ ᤔᤡᤓᤠ᤺ᤳᤋᤪᤠ ᤁᤣ᤺ᤳᤋᤢᤖᤥ. ᤂᤧᤸᤗᤧᤆᤥᤃᤢᤸᤗᤧ ᤂᤧᤸᤗᤧ ᤁᤢᤒᤢᤱᤜᤠ᤹ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤖᤥ॥ 12 ᤕᤖᤢᤛᤗᤧ᤺ᤶᤔᤥᤒᤠ ᤔᤠ ᤗᤠᤶᤎᤣ᤺ᤳᤜᤠ᤹ᤀᤥᤗᤠᤶ ᤏᤡᤱᤔᤡᤜᤠ᤹ ᤏᤢ ᤋᤰᤗᤧᤱᤘᤠᤒᤠᤜᤠ᤹ ᤔᤧᤗᤠᤳ ᤑᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤢᤓᤠ ᤜᤠᤱᤜᤠ᤹ ᤀᤡᤃᤪ ᤕᤥ᤹ᤒᤠ ᤗᤠᤈᤣ᤹ᤀᤥᤒᤠ ᤀᤠᤳᤋᤡᤴ ᤔᤏᤠᤜᤠ᤹ᤖᤧᤀᤠᤱ ᤔᤧᤴᤀᤡ᤺ᤳᤋᤣ ᤔᤧᤘᤕᤧᤖᤥ॥ 13 ᤁᤖ ᤁᤱᤃ ᤂᤧᤸᤗᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤴ ᤏᤢ ᤂᤧᤸᤗᤧ ᤁᤢᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤐᤥ᤺ᤰᤂᤧᤒᤠᤖᤥ. ᤂᤧᤱᤜᤠ᤹ᤖᤧ ᤕᤧᤰᤕᤰ ᤗᤢᤶᤔᤥ ᤛᤠᤶᤕᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡᤴ ᤔᤧᤛᤧᤛᤢᤖᤥ॥ 14 ᤀᤠᤸᤗᤥ ᤔᤠᤖᤠᤶᤜᤠ᤹ᤀᤥ ᤂᤧᤱᤜᤠ᤹ ᤔᤡᤰᤑ᤺ᤶᤒᤠ ᤜᤧᤰᤁᤣ ᤛᤛᤵ ᤛᤛᤵ ᤔᤧᤛᤵᤛᤢᤖ ᤋᤠᤰᤔᤧᤃᤴᤏᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤠᤱᤜᤠ᤹ ᤜᤠ᤺ᤳᤋᤠᤱ ᤛᤢᤔᤠ ᤔᤧᤀᤠ᤺ᤴᤇᤡᤱᤅᤡᤴᤗ ᤕᤠᤖᤡᤰ ᤂᤧᤱᤜᤠ᤹ ᤔᤠᤰᤂᤡᤸᤗᤧ ᤆᤡ᤺ᤴᤍᤢᤛᤡᤀᤠᤱ ᤔᤧᤘᤠ᤹ᤖᤥ॥ 15 “ᤆᤡ᤺ᤴᤈᤡ᤺ᤴᤃᤧᤄᤢᤒᤠᤛᤣ᥄ ᤂᤡᤏᤡ᤹ ᤐᤣᤃᤧᤶᤔᤧ᤹ᤀᤥ᥄” ᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤓᤧ᤺ᤰᤋᤢᤛᤡᤖ ᤔᤧᤔᤧᤳᤋᤢᤛᤡᤖᤥ॥ “ᤔᤠ᤺ᤱᤄᤠ ᤐᤣᤃᤧᤶᤔᤧ᤹᥄ ᤔᤠ᤺ᤱᤄᤠ ᤐᤣᤃᤧᤶᤔᤧ᤹᥄ ᤀᤠᤏᤡᤃᤣ ᤀᤠᤴᤇᤢᤛᤧᤶᤔᤡᤴᤏᤧ᤹ᤀᤥ᥄” ᤂᤧᤱᤜᤠ᤹ ᤁᤧᤄᤧᤳᤇᤡᤱᤒᤠ ᤏᤢ ᤋᤠᤰᤁᤴᤏᤡᤒᤠ ᤔᤧᤒᤥ᤺ᤰᤂᤧᤸᤗᤧ. ᤔᤧᤴᤇᤠᤶ ᤛᤢᤘᤠᤱᤒᤠ ᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤔᤧᤳᤋᤢᤛᤡᤖᤥ. “ᤀᤠᤸᤗ ᤂᤧᤱᤜᤠ᤹ ᤀᤠᤏᤡᤃᤧᤏᤢ ᤁᤵᤔᤥ ᤔᤧᤴᤕᤢᤱᤏᤧᤴᤗᤖᤥ॥” 16 ᤕᤜᤘᤣ ᤍᤠᤱᤒᤧᤸᤗᤧᤀᤣ ᤂᤧᤱᤜᤠ᤹ ᤑᤢᤳᤗᤢᤶ ᤛᤧᤛᤢᤍᤣᤛᤢᤛᤡᤀᤠᤱ ᤔᤧᤘᤠ᤹ᤖᤥ. ᤂᤢᤏᤧ᤹ ᤀᤠᤸᤗ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤂᤧᤱᤜᤠ᤹ ᤏᤡᤏᤡ ᤔᤧᤗᤠᤵᤋᤢᤛᤡᤴᤗᤥ॥ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤔᤡᤱᤛᤥ ᤀᤡᤱᤎᤠᤱ ᤀᤥᤛᤣ᤺ᤴᤔᤧᤎᤠᤰᤋᤢᤛᤡᤴᤗᤥ. ᤜᤧᤰᤁᤩᤠᤱ ᤗᤠᤶᤗᤥᤒᤠᤜᤠ᤹ᤀᤠᤱ ᤗᤢᤱᤔᤠ᤹ ᤔᤧᤍᤢᤰᤋᤢᤛᤡᤴᤗᤥ॥ 17 ᤁᤢᤓᤠ᤹ᤖᤧ ᤗᤠᤃᤡ ᤜᤏᤧ ᤌᤣᤏᤠᤎᤣ ᤗᤠᤶ ᤀᤥᤔᤧᤵᤔᤠᤖᤧ ᤀᤥᤔᤧᤵᤔᤠᤖᤧ ᤀᤠᤏᤡᤃᤣ ᤔᤡᤰᤜᤠ᤹ ᤗᤧᤰᤂᤧᤖᤥ॥ ᤀᤠᤏᤡᤃᤣ ᤆᤱᤜᤡᤶᤜᤠ᤹ᤀᤥᤗᤠᤶ ᤛᤢᤘᤠᤱᤎᤡᤰ ᤔᤡᤰ ᤜᤱ ᤗ᤹ᤖᤡᤰ ᤀᤥᤔᤧᤳᤋᤢᤶᤒᤧᤀᤠᤱ ᤕᤢᤅᤡᤃᤧᤖᤥ ᤂᤧᤸᤗᤧ ᤀᤠᤏᤡᤃᤣ ᤋᤠᤱᤛᤧ᤺ᤵᤔᤠ ᤔᤧᤛᤢᤰᤋᤡᤃᤧᤴᤗᤥ॥ 18 ᤏᤡᤱᤔᤡᤜᤠ᤹ᤖᤧ ᤀᤠᤏᤡᤃᤣ ᤁᤧᤖᤧᤰ ᤗᤠᤱᤕᤥ᤺ᤰᤜᤠ᤹ ᤕᤥ᤺ᤰᤔᤧᤎᤰᤋᤢᤖᤥ. ᤜᤧᤰᤁᤩᤠᤱ ᤀᤠᤏᤡᤃᤣ ᤔᤠᤖᤠᤶᤜᤠ᤹ᤀᤥ ᤗᤠᤱᤄᤣ᤺ᤰᤔᤠ ᤔᤧᤛᤢᤰᤋᤡᤃᤧᤴᤗᤥ॥ ᤀᤠᤏᤡᤃᤣ ᤔᤧᤰᤔᤠᤴ ᤏᤡ᤺ᤳᤋᤠᤱ ᤁᤧᤖᤧ ᤆᤢᤖᤧᤀᤠᤱ ᤘᤕᤧᤖᤥ. ᤀᤠᤏᤡᤃᤣ ᤕᤧᤴᤜᤠ᤹ ᤏᤢᤒᤧ ᤆᤢᤖᤧᤀᤠᤱ ᤘᤕᤧᤖᤥ. ᤀᤠᤏᤡᤃᤣ ᤏᤢᤵᤔᤠᤴ ᤋᤩᤧ ᤆᤢᤖᤧᤀᤠᤱ ᤘᤕᤧᤖᤥ॥ 19 ᤀᤠᤏᤡᤃᤣ ᤁᤧᤏᤠ᤺ᤵᤐᤠᤜᤠ᤹ ᤋᤠᤱᤛᤠᤰᤐᤥᤒᤠ ᤔᤢᤕᤠᤜᤠ᤹ᤏᤢ᤺ᤸᤗᤧ ᤛᤠ᤹ᤖᤡᤰ ᤐᤈᤠᤳ ᤁᤧᤈᤠᤵᤐᤠ ᤔᤧᤈᤥᤃᤧᤖᤥ॥ ᤂᤧᤱᤜᤠ᤹ᤖᤧ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤔᤧᤏᤠ᤺ᤳᤋᤡᤃᤧᤖᤥ. ᤔᤢᤖᤧᤰ ᤂᤠᤖᤧᤰᤐᤠ ᤀᤣ᤺ᤰᤛᤠᤍᤧᤴᤜᤠ᤹ᤀᤥ ᤂᤧᤱᤜᤠ᤹ᤖᤧ ᤔᤧᤛᤢᤃᤡᤃᤧᤖᤥ॥ 20 ᤕᤜᤘᤣ ᤍᤠᤱᤒᤧᤸᤗᤧ ᤛᤣ᤺ᤴᤍᤢᤒᤠ ᤜᤠᤱ. ᤀᤠᤏᤡᤃᤣ ᤜᤡᤱᤔᤴᤏᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤡᤈᤥᤀᤥ ᤌᤩᤧᤖᤥ॥ ᤀᤠᤶᤓᤠ ᤂᤢᤏᤧ᤹ ᤁᤢᤃᤶᤒᤪᤠᤱᤅᤥ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤏᤡᤃᤣ ᤋᤠᤵᤌᤣᤰ ᤕᤠᤶᤎᤣᤰ ᤘᤕᤡᤃᤧ ᤑᤠ᤹ᤀᤠᤱ ᤀᤡ᤺ᤵᤔᤏᤠᤀᤠᤱ ᤘᤕᤧᤖᤥ॥ 21 ᤀᤢᤈ ᤁᤧᤕᤢᤱᤔᤠ ᤀᤣᤍᤥᤔᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤀᤣ. ᤛ᤺ᤳᤋᤧ᤹ᤀᤠᤱ ᤕᤧᤕᤧ ᤗ᤹ᤖᤧᤒᤠ. ᤁᤖ ᤂᤧᤴ ᤆᤸᤗᤠᤱᤏᤠ ᤂᤥᤷᤕᤠᤴ ᤂᤧᤏᤧ᤹ᤀᤠᤱ ᤁᤧᤶᤒᤡᤖᤥ॥ ᤂᤧᤴ ᤛᤣᤈᤱᤘᤠ᤺ᤸᤗᤧ ᤂᤧᤏᤧ᤹ ᤁᤧᤔᤖᤥ॥ ᤜᤧᤰᤁᤩᤠᤱ ᤂᤧᤏᤧ᤹ ᤗᤧᤰᤆᤠᤒᤧᤎᤡ᤺ᤰ ᤁᤧᤶᤈᤥ᤺ᤰᤗᤥ॥ 22 ᤛᤡᤕᤥᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤀᤣ. ᤂᤧᤏᤧ᤹ ᤁᤧᤓᤧᤴᤕᤠ᤺ᤶᤒᤰᤁᤡᤸᤗᤧ ᤂᤢᤶᤍᤡᤱᤅᤡᤴ ᤏᤢᤵᤗᤥ॥ ᤂᤧᤏᤧ᤹ ᤗᤠᤈᤣ᤹ᤗᤠᤶ ᤗᤠ᤺ᤰᤁᤠᤳ ᤗ᤺ᤵᤔᤠᤍᤣᤔᤠ ᤕᤧᤶᤔᤡᤴ ᤂᤢᤏᤧ᤹ ᤔᤧᤓᤥᤛᤢᤴᤗᤥ. ᤁᤖ ᤀᤣᤍᤥᤔᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤀᤣ. ᤂᤧᤏᤧ᤹ ᤁᤧᤗᤠᤕᤥᤸᤗᤧ ᤂᤢᤶᤍᤡᤱᤅᤡᤴ ᤂᤧᤏᤧ᤹ᤀᤣ ᤁᤧᤒᤡᤖᤥ ᤂᤧᤏᤧ᤹ ᤁᤧᤗᤠᤕᤥᤜᤠ᤹ ᤀᤥ᤺ᤴᤃᤧᤎᤠᤰᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.