ᤔᤧᤖᤡᤱ ᤛᤠᤵᤐᤴ 3 - LIFOTNTᤂᤢᤶᤍᤡᤱ. ᤗᤠᤕᤥᤗᤠᤶ ᤜᤡᤶᤔᤠ ᤏᤢ ᤏᤡᤱᤛᤠᤱ 1 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰ ᤐᤥ᤺ᤰᤔᤠ ᤋᤰᤁᤠ᤺ᤳᤗᤠᤶ ᤁᤧᤍᤠᤒᤠ ᤋᤢᤰᤂᤣ ᤗᤠᤰᤂᤣ ᤁᤧᤍᤢᤶᤒᤠ ᤔᤏᤠᤴ ᤀᤠᤱᤃᤠ᤹ᤀᤣᤖᤥ॥ 2 ᤂᤢᤏᤧ᤹ ᤀᤠᤱᤃᤠ᤹ ᤏᤠ᤺ᤳᤋᤠᤱᤍᤣᤛᤠᤱᤅᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤠᤃᤧᤀᤥ᤺ᤵᤐᤧᤸᤗᤧ ᤁᤢᤗᤧᤰᤘᤠ ᤂᤠᤔᤠᤰᤔᤥ ᤀᤠᤱᤃᤠ᤹ ᤗᤠᤱᤄᤣ᤺ᤰᤔᤠ ᤐᤠᤱᤄᤠᤱᤅᤠᤱ ᤘᤠ᤹ᤖᤥ॥ 3 ᤛᤧᤰᤂᤠ᤺ᤸᤗᤧ. ᤂᤢᤏᤧ᤹ ᤁᤢᤜᤢᤰᤁᤡᤸᤗᤧ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤕᤧᤳᤗᤧᤱ ᤕᤧᤳᤗᤧᤱ ᤏᤢ ᤗᤧᤴᤍᤡᤰ ᤏᤠᤶᤎᤠᤎᤠᤀᤣ ᤛᤠ᤺ᤵᤛᤠᤱᤅᤠᤱ ᤘᤠ᤹ᤖᤥ॥ 4 ᤂᤢᤏᤧ᤹ ᤀᤠᤜᤥᤖᤡᤰᤐᤠᤴ ᤏᤢ ᤀᤠᤏᤧᤰᤛᤠᤴ ᤀᤡᤛᤢ᤹ᤖᤢᤖ ᤕᤠ᤺ᤴᤍᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤕᤧᤵᤐᤠᤜᤠ᤹ ᤀᤧᤰᤂᤠᤱ ᤐᤡᤖᤠᤱᤅᤠᤱ ᤘᤠ᤹ᤖᤥ॥ 5 ᤂᤢᤏᤧ᤹ᤃ ᤀᤠᤱᤃᤠ᤹ ᤋᤢᤰᤂᤣ ᤏᤢ ᤗᤠᤰᤂᤣ᤺ᤸᤗᤧ ᤁᤒᤠᤱᤅᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤁᤧᤛᤠᤰᤐᤥ ᤁᤧᤒᤠᤱᤛᤠᤱᤅᤠᤱ ᤘᤠ᤹ᤖᤥ॥ 6 ᤕᤖᤡᤰ ᤕᤧᤴᤏᤠᤱᤎᤥ ᤁᤧᤛᤡᤒᤠᤀᤠᤱ ᤁᤧᤏᤧᤒᤠ ᤆᤣᤎᤰ ᤁᤢᤀᤡᤛᤡᤰ ᤂᤢᤏᤧ᤹ᤃ ᤀᤠᤱᤃᤠ᤹ ᤂᤠᤃᤧᤔᤠᤰᤐᤠᤍᤧᤴᤏᤥ ᤕᤢᤰᤂᤠᤱᤅᤠᤱ ᤘᤠ᤹ᤖᤥ॥ 7 ᤂᤧᤳᤇᤡᤱᤔᤠ ᤔᤧᤛᤢᤰᤁᤠᤴᤗ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤠᤃᤒᤪᤡᤱ ᤗᤢᤱᤎᤠᤰ ᤛᤧᤳᤋᤢᤀᤠᤱ ᤕᤧᤵᤗᤥ. ᤐᤗᤡ᤺ᤵ ᤁᤧᤗᤡ᤺ᤵᤐᤠ ᤑᤧᤴᤈᤣ᤹ ᤌᤰᤁᤪᤱᤅᤡᤸᤗᤧ ᤀᤡᤄᤣ᤺ᤰᤂᤠᤱᤅᤠᤱ ᤐᤳᤗᤥ॥ 8 ᤁᤢᤓᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᤑᤡᤖᤡᤰ ᤑᤡᤖᤡᤰ ᤑᤡ᤺ᤰᤁᤠᤖ ᤀ᤺ᤰᤁᤠᤖᤥ. ᤁᤖᤛᤠᤱ ᤀᤠᤱᤃᤠ᤹ ᤀᤠᤒᤣᤗᤡᤴ ᤂᤢᤏᤧ᤹ ᤂᤧᤶᤄᤧᤶ ᤔᤧᤗᤠᤵᤋᤢᤴᤗᤥ॥ 9 ᤗᤢᤱᤃᤠᤰᤔᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤗᤠᤶᤔᤡᤴ ᤛᤠᤰᤋᤠᤱ ᤐᤡᤖᤠᤱᤅᤠᤱ ᤏᤧᤖᤥ. ᤀᤠᤱᤃᤠ᤹ ᤀᤠᤗᤠᤶᤔᤡᤴ ᤂᤢᤏᤧ᤹ ᤐᤣᤃᤧ᤹ ᤘᤃᤧᤰᤐᤠ ᤆᤥᤃᤠᤱ ᤐᤡᤖᤠᤱᤅᤠᤱ ᤏᤧᤖᤥ॥ 10 ᤔᤏᤠ ᤁᤧᤛᤢᤰᤐᤠᤀᤠᤱ ᤁᤧᤏᤧᤒᤠ ᤔᤠ᤹᤺ᤕᤢ᤺ᤴ ᤁᤢᤀᤡᤛᤡᤰ ᤜᤧᤰᤁᤩᤠᤱ ᤁᤧᤈᤡᤱᤛᤡᤱᤒᤠᤀᤠᤱ ᤁᤧᤏᤧᤒᤠ ᤂᤡᤖᤡᤱᤒᤠᤴ ᤁᤢᤀᤡᤛᤡᤰ. 11 ᤂᤢᤏᤧ᤹ ᤀᤠᤱᤃᤠ᤹ ᤗᤠᤶᤗᤠᤶᤔᤥᤗᤠᤶ ᤑᤳᤋᤠᤱᤅᤠᤱ ᤋᤧᤖᤧᤰ ᤋᤧᤖᤧᤰ ᤌᤧ᤺ᤰᤂᤠᤱᤗᤥ ᤂᤧᤒᤩᤠᤱ ᤂᤢᤏᤧ᤹ᤃ ᤀᤠᤱᤃᤠ᤹ ᤁᤢᤓᤠ᤹ᤒᤠᤱ ᤔᤣ᤺ᤴᤏᤣᤒᤠ ᤆᤥᤃᤠᤱᤗᤥ॥ 12 ᤂᤢᤏᤧ᤹ ᤗᤡᤈᤥ᤺ᤴ ᤑᤳᤇᤢᤀᤠᤱ ᤁᤢᤗᤡᤴ ᤂᤡᤱᤄᤢᤖᤥ ᤜᤧᤰᤁᤩᤠᤱ ᤁᤢᤍᤥ᤺ᤱᤜᤠ᤹ᤖᤧ ᤀᤠᤱᤃᤠ᤹ᤀᤣ ᤛᤥ᤺ᤰᤋᤠᤱᤗᤥ॥ 13 ᤂᤢᤏᤧ᤹ ᤁᤢᤍᤥ᤺ᤱ ᤕᤠᤱᤔᤠ ᤁᤠ᤺ᤴᤍᤩᤠᤀᤥᤒᤠ ᤋᤥ᤺ᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤗᤢᤱᤔᤧᤴ ᤑᤩᤠᤰ ᤗᤛ᤻ᤛᤢᤖ ᤐᤡᤖᤠᤱᤗᤥ॥ 14 ᤁᤧᤖᤧᤰ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤣ᤺ᤵᤔᤠ ᤆᤠᤜᤠᤰ ᤐᤥ᤺ᤰᤂᤠᤱᤗᤥ. ᤂᤧᤱᤜᤠ᤹ᤖᤧ ᤗᤧᤴᤍᤡᤰ ᤏᤠᤶᤎᤠᤎᤠᤀᤣ ᤛᤠᤶᤗᤥᤗᤠᤶ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤠᤖᤥ॥ 15 ᤂᤢᤏᤧ᤹ ᤐᤄᤡ᤺ᤰ ᤁᤧᤄᤡ᤺ᤰᤐᤠ ᤛᤢᤱᤄᤡ᤺ᤱᤒᤧᤸᤗᤧ ᤀᤠᤱᤃᤠ᤹ ᤌᤡᤶᤛᤠᤱᤗᤥ ᤛᤠᤰᤂᤡ᤺ᤰ ᤁᤧᤄᤡ᤺ᤰᤐᤠ ᤂᤡ᤺ᤱᤅᤡᤴ ᤀᤠᤱᤃᤠ᤹ ᤌᤢᤱᤄᤠᤱᤗᤥ॥ 16 ᤂᤢᤏᤧ᤹ ᤗᤢᤱᤈᤣ᤺ᤰᤜᤠ᤹ ᤆᤠ᤺ᤳᤋᤠᤱᤅᤠᤱ ᤀᤠᤜᤠᤒᤥ᤹ᤒᤠᤜᤠ᤹ ᤀᤧᤰᤂᤠᤱ ᤐᤡᤖᤠᤱᤗᤥ. ᤜᤧᤰᤁᤩᤠᤱ ᤂᤠᤶᤜᤡ᤺ᤰᤁᤥ ᤀᤠᤱᤃᤠ᤹ ᤆᤡᤍᤥ᤹ ᤆᤡᤍᤥ᤹ ᤋᤥ᤹ᤖᤠᤱᤗᤥ॥ 17 ᤛᤏᤠᤖᤢᤱᤅᤡᤴ ᤀᤠᤱᤃᤠ᤹ᤗᤠᤶ ᤔᤠ᤺ᤱᤄᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤖᤥ. ᤏᤢ᤹ᤔᤠᤍᤠᤔᤧᤴ ᤌᤣᤀᤡ. ᤂᤧᤴ ᤀᤠᤱᤃᤠ᤹ ᤏᤡᤱᤘᤠ᤹ ᤑᤣ᤺ᤳᤇᤢᤱᤅᤠᤱ ᤘᤠ᤹ᤖᤥ॥ 18 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤰᤂᤣ ᤐᤠ᤺ᤳᤋᤢᤱᤗᤥ. “ᤀᤠᤱᤃᤠ᤹ ᤀᤠᤜᤠᤱᤘᤠ ᤀᤠᤔᤠᤱᤘᤠᤴ ᤐᤣᤗᤠᤛᤧᤖᤥ. ᤕᤜᤘᤣ ᤍᤠᤱᤒᤠᤗᤠᤶ ᤆᤥᤃᤢᤱᤒᤠ ᤏᤡᤱᤛᤠᤱᤅᤡᤴᤏᤠᤱ ᤏᤢᤒᤧᤖᤥ॥” 19 ᤀᤠᤱᤃᤠ᤹ ᤋᤢᤔᤢᤱᤒᤠ ᤁᤢᤈᤠᤃᤧᤓᤧᤶᤒᤠ. ᤀᤠᤍᤢᤰᤂᤣ ᤀᤠᤗᤠᤰᤂᤧᤴ ᤜᤧᤰᤁᤩᤠᤱ ᤀᤠᤱᤃᤠ᤹ ᤋᤠᤵᤐᤧ᤹ᤖᤠᤱᤒᤧᤴ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ 20 ᤀᤠᤱᤃᤠ᤹ ᤂᤧᤱᤜᤠ᤹ ᤆᤰᤔᤧᤸᤗ᤹ᤀᤣ ᤏᤡᤱᤘᤠ᤹ ᤗᤡᤱᤛᤢᤱᤗᤥ. ᤜᤧᤰᤁᤩᤠᤱ ᤀᤠᤕᤠᤶᤛᤠᤶᤔᤡᤴ ᤀᤠᤱᤃᤠ᤹ᤀᤥ ᤁᤢᤛᤰᤔᤠ ᤐᤢ᤹ᤖᤥ॥ 21 ᤁᤖ ᤀᤠᤱᤃᤠ᤹ ᤁᤴ ᤗᤳᤇᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ. ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤏᤡᤱᤛᤠᤱ ᤁᤧᤈᤥ᤺ᤰᤐᤠ ᤐᤥᤱᤅᤠᤖᤥ— 22 ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤕᤶᤒᤠ ᤁᤢᤔᤡ᤺ᤶᤈᤡ ᤏᤢ ᤀᤠᤓᤧᤸᤗᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤁᤢᤗᤢᤱᤃᤢᤶᤔᤡᤸᤗᤧ ᤆᤥᤃᤢᤸᤗᤧ ᤔᤧᤶᤔᤧᤰᤁᤣ ᤘᤕᤡᤃᤧᤖᤥ॥ 23 ᤂᤧᤱᤜᤠ᤹ ᤋᤠᤏᤠᤶ ᤌᤰᤔᤠ ᤁᤢᤛᤱ ᤐᤥᤱᤗᤥ. ᤀᤠᤍᤠᤱᤒᤠ ᤛᤠ᤹ᤖᤡᤰ ᤕᤖᤡᤰ ᤏᤛᤠ᤺ᤴᤛᤠᤒᤠ ᤁᤧᤈᤥ᤺ᤰᤗᤥ॥ 24 ᤀᤠᤱᤃᤠ᤹ ᤀᤠᤕᤠᤶᤛᤠᤶᤔᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤗᤠᤃᤡ ᤁᤧᤖᤧᤰ ᤐᤠ᤺ᤴᤏᤥ ᤕᤜᤘᤣ ᤍᤠᤱᤒᤧᤴᤏᤣ ᤀᤠᤗᤰᤗᤥ. ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤏᤠᤛᤡ ᤌ᤺ᤳᤋᤢᤱᤅᤠᤱ ᤂᤢᤏᤧ᤹ ᤜᤠᤱᤄᤢᤱᤗᤥ॥” 25 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤶ ᤀᤥᤃᤧᤔᤧᤵᤐᤠᤜᤠ᤹. ᤂᤢᤏᤧ᤹ ᤁᤧᤃᤥ᤺ᤵᤐᤠᤜᤠ᤹ᤏᤢᤃ ᤂᤢᤏᤧ᤹ ᤁᤧᤏᤢ᤹ᤒᤠ ᤆᤥᤰᤗᤥ॥ 26 ᤛᤫᤠ᤺ᤳᤋᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤛᤧ᤺ᤵᤛᤧ᤺ᤵᤐᤠ ᤁᤢᤗᤠᤶᤔᤡᤴ ᤀᤥᤔᤧᤵᤔᤠᤀᤣ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤐᤥᤱᤗᤥ॥ 27 ᤔᤏᤠᤴ ᤌᤠᤱᤒᤧᤴ ᤘᤠ᤹ᤖᤀᤣ ᤂᤢᤏᤧ᤹ ᤁᤢᤄᤧ᤺ᤵᤛᤡᤱᤅᤡᤴ ᤁᤢᤔᤠᤃ ᤂᤧᤸᤗᤧ ᤁᤢᤗᤠᤃᤡ ᤆᤠ᤹ᤖᤡᤰ ᤏᤢᤒᤠ ᤐᤥᤱᤗᤥ॥ 28 ᤕᤜᤘᤣ ᤍᤠᤱᤒᤧᤸᤗᤧ ᤔᤏᤠᤀᤥ ᤁᤴ ᤑᤳᤇᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤀᤣ᤺ᤰ ᤔᤧᤶᤒᤠ᤺ᤳᤋᤣ ᤛᤫᤠ᤺ᤳ ᤕᤢᤱᤗᤖᤥ॥ 29 ᤂᤧᤸᤗᤧ ᤁᤢᤶᤒᤪᤠ᤺ᤸᤗᤧ ᤂᤠᤶᤒᤠᤱᤅᤡᤴ ᤛᤢᤛᤢᤖᤖᤥ. ᤁᤶᤓᤗ᤹ᤖᤡᤰ ᤀᤠᤸᤗᤛᤠᤱ ᤕᤠᤶᤔᤥ ᤏᤡᤱᤛᤠᤱ ᤘᤠ᤹ᤖᤖᤥ॥ 30 ᤁᤢᤴᤍᤣ᤺ᤱᤒᤠ ᤁᤧᤓᤱᤒᤠ ᤗᤧᤵᤔᤠᤱᤅᤣ ᤂᤢᤏᤧ᤹ ᤁᤢᤴᤍᤧᤱᤒᤧᤴ ᤜᤡᤛᤢ ᤐᤡᤖᤢᤖᤖᤥ. ᤜᤧᤰᤁᤩᤠᤱ ᤁᤢᤏᤠᤔᤧᤴᤇᤠ᤹ ᤐᤠ᤺ᤴᤏᤡᤴ ᤏᤠᤛᤡ ᤌ᤺ᤳᤋᤢᤖᤖᤥ॥ 31 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤆᤥᤰᤗᤥ ᤜᤧᤰᤁᤩᤠᤱ ᤛᤍᤠᤍᤡᤱᤗᤧ ᤗᤠᤃᤡ ᤂᤢᤏᤧ᤹ ᤀᤠᤴᤏᤠ᤹ᤏᤧᤴᤗᤥ॥ 32 ᤂᤢᤏᤧ᤹ ᤀᤡᤏᤥᤃᤧᤴ ᤋᤢᤰᤂᤣ ᤗᤠᤰᤂᤣᤜᤠ᤹ ᤋᤠᤖᤢᤛᤠᤱ ᤗᤢᤱᤔᤠ᤹ ᤀᤠᤍᤢᤰᤗᤥ. ᤀᤠᤓᤧᤸᤗᤧᤀᤠᤱ ᤆᤰᤔᤧᤸᤗ᤹ᤔᤏᤠᤒᤠ ᤁᤢᤔᤡ᤺ᤶᤈᤡᤴ ᤐᤕᤶ ᤕᤶᤒᤠ ᤆᤥᤰᤗᤥ॥ 33 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤠᤵᤑᤣᤰ ᤁᤢᤛᤡᤰᤗᤢᤱᤔᤠ᤹ᤗᤠᤶ ᤔᤧᤴᤇᤠᤶ ᤕᤠᤵᤔᤡ ᤛᤠᤜᤠ᤹ ᤋᤢᤰᤂᤣ ᤗᤠᤰᤂᤣ ᤔᤧᤈᤠᤖ ᤔᤧᤕᤠ᤺ᤴᤍᤢᤛᤡᤴᤗᤥ॥ 34 ᤁᤢᤓᤠᤖᤧ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤐᤢᤱᤗᤠᤎᤠᤒᤠᤜᤠ᤹ ᤗᤠᤱᤅᤡᤸᤗᤧ ᤆᤡᤍᤥ᤹ ᤆᤡᤍᤥ᤹ ᤔᤧᤍᤥ᤹ᤖᤢᤛᤡᤏᤧᤓᤃᤪ. 35 ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤁᤢᤓᤠᤖᤧ ᤂᤢᤴᤇᤡ᤹ ᤂᤥᤔᤠ ᤗᤰᤁᤡᤴ ᤔᤧᤏᤠᤵᤋᤢᤛᤡᤏᤧᤓᤃᤪ. 36 ᤁᤢᤓᤠᤖᤧ ᤁᤢᤍᤥ᤺ᤵᤔᤠ ᤂᤠᤛᤧᤴ ᤔᤧᤴᤗᤥ᤺ᤴᤍᤢᤴ ᤔᤧᤶᤒᤡᤖᤢᤛᤡᤴᤏᤧᤓᤃᤪ ᤌᤣ ᤕᤜᤘᤣ ᤍᤠᤱᤒᤧᤸᤗᤧ ᤜᤧᤰᤋᤱᤒᤠ ᤐᤠ᤺ᤴᤜᤠ᤹ ᤔᤧᤏᤡᤛᤢᤴᤏᤠᤱᤒᤡ᥅ 37 ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤔᤧᤒᤡᤖᤢᤛᤡᤴᤗ ᤌᤠᤖᤡᤰ ᤜᤠ᤺ᤳᤗᤧ ᤔᤢᤖᤠ ᤔᤧᤳᤋᤢᤛᤡᤒᤠᤴ ᤁᤧᤖᤧᤀᤠᤱ ᤘᤠ᤹ᤒᤣ᥅ 38 ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤶᤒᤪᤠᤀᤥᤗᤠᤶ ᤋᤠᤵᤑᤧ᤺ᤶᤒᤠ ᤏᤢ ᤏᤢᤒᤠ ᤐᤠ᤺ᤴᤜᤠ᤹ ᤔᤧᤗ᤺ᤴᤏᤧᤴᤏᤠᤱᤒᤡ᥅ 39 ᤀᤠᤏᤡ᤹ ᤀᤠᤵᤑᤣᤰ ᤗᤠᤕᤥᤸᤗᤧ ᤂᤢᤶᤍᤡᤱ ᤀᤠᤄᤥᤛᤢᤶᤔᤡᤸᤗᤧ ᤀᤠᤏᤡ᤹ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤌᤣᤀᤠᤱ ᤔᤏᤧᤎᤡᤰᤔᤠᤒᤣ᥅ 40 ᤀᤠᤏᤡ᤹ ᤀᤠᤒᤠᤅᤣ ᤕᤧᤵᤗᤧᤰᤜᤠ᤹ ᤛᤠ᤹ᤖᤢᤶᤔᤠᤱ ᤀᤥᤔᤧᤳᤋᤢᤶᤗᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤀᤥ ᤗᤧᤵᤔᤠᤱ ᤀᤠᤏᤡ᤹ ᤏᤢ᤺ᤰᤂᤡᤖᤥ॥ 41 ᤀᤠᤏᤡ᤹ ᤛᤡᤰᤗᤢᤱᤔᤧᤴ ᤏᤢ ᤀᤠᤏᤡ᤹ ᤜᤢᤰᤜᤠ᤹ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤑᤥ᤺ᤰᤂᤢᤶᤔᤠᤱ ᤐᤠ᤺ᤳᤋᤢᤶᤗᤥ— 42 “ᤀᤠᤏᤡᤃᤣ ᤗᤠᤕᤥ ᤆᤥᤃᤢᤶᤒᤧ. ᤀᤠᤏᤡᤃᤣ ᤐᤡᤑᤩᤢᤱ ᤆᤥᤃᤢᤶᤒᤧᤖᤥ. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤀᤠᤏᤡᤃᤣ ᤗᤧᤵᤔᤡ ᤔᤧᤶᤒᤡᤀᤣ ᤁᤧᤘᤠ᤹ᤖᤥ॥” 43 ᤀᤠᤍᤠᤱᤒᤠ ᤁᤧᤛᤠᤰᤁᤧᤴᤏᤡᤸᤗᤧ ᤔᤡ ᤁᤧᤒᤥ᤺ᤰᤂᤧᤖᤥ. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤀᤠᤏᤡᤃᤣ ᤐᤢᤒᤣᤗᤠᤵᤛᤠ ᤁᤧᤏᤠ᤺ᤳᤋᤧᤖᤥ. ᤂᤶᤓᤩᤠᤱ ᤕᤠᤵᤔᤡ ᤗᤢᤱᤔᤠ᤹ ᤔᤧᤴᤍᤢᤰᤁᤣ ᤀᤠᤏᤡᤃᤣ ᤀᤠᤃ᤻ᤛᤧᤖᤧᤖᤥ॥ 44 ᤀᤠᤍᤠᤱᤒᤠᤖᤧ᤹ᤀᤥ ᤀᤠᤳᤋᤡᤴ ᤐᤣᤗᤡᤴᤏᤠᤱ ᤔᤧᤃᤧᤳᤏᤧᤴᤗ ᤑᤠ᤹ᤀᤠᤱ ᤀᤠᤍᤠᤱᤒᤠ ᤁᤧᤛᤠᤰᤁᤧᤴᤏᤡᤸᤗᤧ ᤁᤧᤛᤢ᤺ᤵᤛᤡᤱᤅᤠᤱ ᤁᤧᤒᤵᤗᤥ॥ 45 ᤀᤠᤍᤠᤱᤒᤠᤖᤧ ᤀᤠᤏᤡᤃᤧᤃ ᤔᤧᤴᤇᤠᤶ ᤛᤢᤘᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤆᤡ᤺ᤴᤈᤡ᤺ᤴᤃᤧᤄᤢᤒᤠ ᤏᤢ ᤛᤠᤰᤆᤡ᤹ ᤜᤧᤰᤋᤱᤒᤠ ᤀᤠᤃ᤻ᤈᤥᤃᤧᤀᤠᤱ ᤘᤠ᤹ᤖᤥ॥ 46 “ᤀᤠᤏᤡᤃᤣ ᤁᤧᤖᤧᤰ ᤏᤡᤱᤔᤡᤜᤠ᤹ᤖᤧ ᤀᤠᤏᤡᤃᤣ ᤋᤰᤗᤧᤱᤘᤠᤀᤥ ᤂᤢᤴᤇᤡ᤹ ᤔᤢᤖᤠ ᤔᤧᤜᤴᤍᤢᤀᤠᤱ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤡᤃᤧᤀᤠᤱ ᤘᤠ᤹ᤖᤥ॥ 47 ᤁᤡᤔᤠ ᤕᤱᤔᤠ ᤏᤢ ᤁᤡᤵᤔᤠ ᤁᤧᤄᤢᤒᤠ. ᤔᤢᤍᤥᤂᤠᤶᤍᤥ ᤏᤢ ᤔᤧᤰᤔᤠᤛᤡᤔᤧᤴ ᤀᤠᤏᤡᤃᤣ ᤛᤶᤎᤠᤱ ᤀᤡᤖᤧᤍᤩᤧᤀᤠᤱ ᤘᤠ᤹ᤖᤥ॥” 48 ᤀᤠᤱᤃᤠ᤹ ᤀᤠᤔᤏᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤧᤰᤔᤠᤛᤡᤔᤧᤴ ᤏᤡᤛᤢᤱᤗᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤡᤰᤁᤥᤗᤠᤶ ᤀᤠᤔᤡᤰᤘᤠ ᤋᤧᤖᤧᤖᤧ ᤌᤠᤵᤗᤥ॥ 49-50 ᤕᤜᤘᤣ ᤍᤠᤱᤒᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤢ ᤀᤥᤔᤧᤔᤧᤳᤋᤢᤴᤗ ᤌᤠᤖᤡᤰ ᤀᤠᤱᤃᤠ᤹ ᤀᤠᤔᤡᤰᤁᤥᤗᤠᤶ ᤋᤧᤖᤧᤖᤧ ᤗ᤹ᤖᤡᤰ ᤔᤧᤴᤈᤡᤵᤐᤣ ᤀᤠᤱᤃᤠ᤹ ᤀᤠᤔᤡᤰᤘᤠ ᤌᤠᤀᤠᤱ ᤐᤳᤗᤥ॥ 51 ᤀᤠᤕᤧᤰᤕᤰᤁᤥᤒᤠ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤳᤋᤢᤰᤂᤣᤴ ᤀᤠᤔᤡᤰᤁᤧᤸᤗᤧ ᤏᤡᤛᤢᤱᤗᤥ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤏᤡᤱᤘᤠᤴ ᤋᤢᤰᤂᤣ ᤆᤠᤖᤥ॥ 52 ᤜᤏᤧ ᤌᤣᤏᤠᤎᤣ ᤀᤠᤏᤡᤱᤔᤡ ᤁᤧᤒᤥᤱᤒᤠᤜᤠ᤹ᤖᤧ ᤐᤢ ᤜᤧᤰᤁᤣ ᤀᤠᤱᤃᤠ᤹ ᤛᤠᤏᤠ᤺ᤳ ᤔᤧᤈᤥᤃᤠᤱ ᤔᤧᤃᤳᤋᤠᤱᤗᤥ॥ 53 ᤂᤧᤱᤜᤠ᤹ᤖᤧ ᤁᤢᤜᤡᤱᤘᤧᤳᤋᤣ ᤗᤢᤶᤒᤠ᤺ᤳᤋᤥ ᤔᤧᤱᤔᤠ ᤔᤧᤃᤥ᤺ᤳᤋᤠᤱᤗᤥ ᤜᤧᤰᤁᤩᤠᤱ ᤗᤢᤱᤜᤠ᤹ᤖᤧ ᤑᤧᤱᤅᤠᤱᤓᤧᤱ ᤔᤧᤍᤧᤵᤋᤠᤱᤗᤥ. 54 ᤆᤫᤠ᤺ᤳᤋᤡᤴ ᤀᤠᤎ᤻ᤃᤣᤰᤁᤥ ᤌᤠᤖᤡᤰᤁᤣ ᤌᤠᤅᤧᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤡᤔᤧᤴ ᤏᤡ᤺ᤳᤋᤠᤱᤅᤣ ᤋᤩᤧᤖᤥ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤇᤡᤅᤠᤖᤥ॥ 55 ᤕᤜᤘᤣ ᤍᤠᤱᤒᤠᤀᤣ. ᤁᤢᤍᤡᤶᤒᤣ ᤁᤣ᤺ᤶᤒᤠ ᤗᤢᤶᤒᤠ᤺ᤳᤋᤥᤗᤠᤶ ᤀᤠᤱᤃᤠ᤹ ᤀᤠᤍᤠᤱᤒᤠ ᤔᤡᤱᤗᤥ᤺ᤱᤏᤧᤀᤠᤱ ᤐᤣᤗᤡ ᤑᤠᤰᤏᤧᤖᤥ॥ 56 ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤀᤠᤒᤣᤗᤡᤴ ᤁᤧᤄᤧᤵᤛᤢᤖᤥ. “ᤁᤢᤓᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧᤸᤗᤧ ᤀᤠᤍᤠᤱᤒᤠ ᤔᤧᤱᤄᤧᤶᤔᤏᤠᤒᤠ ᤔᤧᤒᤥ᤺ᤰᤂᤧᤴᤏᤧ᤹ᤀᤥ॥” 57 ᤀᤠᤍᤠᤱᤒᤠ ᤐᤣᤗᤡ ᤑᤠᤰᤏᤧᤸᤗᤧ ᤀᤠᤍᤠᤱᤒᤠ ᤀᤠᤒᤣᤛᤠᤱ ᤁᤧᤍᤩᤧᤖᤥ. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤒᤠ᤺ᤳᤋᤢ. “ᤔᤧᤃᤡᤛᤧᤴᤏᤧ᤹ᤀᤥ॥” 58 ᤍᤠᤱᤒᤠᤀᤣ. ᤀᤠᤱᤃᤠ᤹ ᤁᤧᤏᤠᤅᤠᤱᤗᤥ ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤜᤡᤱᤔᤧᤴ ᤋᤠᤱᤃᤧᤛᤧ᤺ᤵᤋᤢᤖᤥ॥ 59 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤔᤧᤴᤘᤠ᤹ᤔᤏᤠ ᤔᤧᤔᤧᤳᤋᤠᤱᤒᤧᤴ ᤀᤠᤍᤠᤱᤒᤠᤖᤧ ᤁᤧᤏᤡᤛᤢᤀᤠᤱ ᤁᤧᤘᤠ᤹ᤖᤥ. ᤀᤠᤗᤠᤃᤡ ᤂᤠᤛᤧᤴᤗᤥ᤺ᤶᤒᤠ ᤐᤥ᤺ᤰᤂᤧ᤹ᤀᤥ ᤜᤧᤰᤁᤣᤗ᤹ᤖᤡᤰ ᤀᤠᤱᤃᤠ᤹ ᤁᤢᤍᤥ᤺ᤵᤔᤠ ᤆᤥᤃᤠᤱᤅᤧ᤹ᤀᤥ॥ 60 ᤂᤧᤱᤜᤠ᤹ᤖᤧ ᤁᤢᤗᤧᤰᤘᤠ ᤏᤢ᤺ᤰᤔᤠ ᤏᤡᤱᤘᤠ᤺ᤸᤗᤧ. ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤔᤧᤈᤥᤃᤢᤒᤠ ᤁᤧᤖᤧᤰ ᤆᤧᤶᤓ᤺ᤴᤜᤠ᤹ ᤀᤠᤍᤠᤱᤒᤠᤖᤧ ᤁᤧᤏᤡᤛᤢᤀᤠᤱ ᤘᤠ᤹ᤖᤥ॥ 61 “ᤕᤜᤘᤣ ᤍᤠᤱᤒᤠᤀᤣ. ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤆᤧ᤹ᤕᤠᤀᤡᤱᤍᤥ᤺ᤴ. ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤧᤖᤧᤰ ᤆᤧᤶᤓ᤺ᤴᤜᤠ᤹ ᤀᤠᤍᤠᤱᤒᤠᤖᤧ ᤁᤧᤄᤧᤵᤛᤢᤀᤠᤱ ᤁᤧᤘᤠ᤹ᤖᤥ. 62 ᤂᤧᤱᤃ ᤀᤠᤀᤳᤐᤠᤱᤜᤠ᤹ᤖᤧ ᤗᤧᤴᤍᤡᤰ ᤏᤠᤶᤎᤠᤎᤠ ᤀᤠᤍᤰᤗᤧᤱᤘᤠᤀᤥ ᤀᤠᤱᤃᤠ᤹ ᤛᤫᤠ᤺ᤳ ᤔᤧᤈᤧᤱᤅᤠᤀᤠᤱ ᤔᤧᤒᤠ᤺ᤳᤋᤢᤀᤠᤱ ᤘᤠ᤹ᤖᤥ॥ 63 ᤂᤧᤱᤜᤠ᤹ ᤀᤥᤔᤧᤳᤋᤧᤛᤧ᤹ᤀᤥ. ᤔᤧᤒᤥ᤺ᤰᤛᤠᤱ ᤔᤧᤕᤢᤱᤛᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤗᤥᤀᤥ ᤀᤠᤱᤃᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤠᤖᤥ॥ 64 “ᤕᤜᤘᤣ ᤍᤠᤱᤒᤠᤀᤣ. ᤂᤢᤴᤇᤡ᤹ ᤜᤢᤰᤁᤡᤸᤗᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠᤀᤥ ᤂᤧᤱᤜᤠ᤹ᤖᤧ ᤋᤢᤶᤔᤠ ᤔᤧᤕᤠᤖᤢᤒᤠ ᤂᤢᤶᤍᤡᤱ ᤐᤡᤖᤧᤛᤧ᤹ᤀᤥ॥ 65 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤗᤢᤱᤔᤧᤴ ᤋᤧᤵᤋᤧ ᤐᤡᤖᤧᤛᤧ᤹ᤀᤥ. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤔᤠᤱᤍᤣᤴ ᤂᤢᤴᤇᤡ᤹ ᤛᤶᤎᤠᤱ ᤌᤠᤖᤖᤥ॥ 66 ᤀᤠᤍᤠᤱᤒᤠᤖᤧ ᤁᤧᤛᤡᤰ ᤐᤥ᤺ᤰᤔᤥ ᤂᤧᤱᤜᤠ᤹ ᤏᤠ᤺ᤳᤋᤧᤛᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤀᤣ ᤁᤧᤛᤠᤱᤃᤪᤠᤶᤐᤣᤍᤠᤱᤜᤠ᤹ ᤛᤡᤃᤠᤱᤗᤠᤶ ᤂᤧᤱᤜᤠ᤹ ᤂᤠᤵᤐᤢᤌᤩ᤺ᤱ ᤘᤖᤧᤱᤗᤧᤱ ᤔᤧᤰᤂᤧᤛᤧ᤹ᤀᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.