ᤔᤧᤖᤡᤱ ᤛᤠᤵᤐᤴ 2 - LIFOTNTᤕᤖᤢᤛᤗᤧ᤺ᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤄᤢᤶᤍᤡᤱ 1 ᤀᤠᤕᤠᤰᤁᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰ ᤐᤥ᤺ᤰᤔᤥ ᤛᤡᤕᤥᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤴ ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤂᤠᤔᤠᤰᤔᤧᤸᤗᤧ ᤛᤢ᤺ᤵᤋᤢᤀᤠᤱ ᤐᤳᤗᤥ᥄ ᤀᤡᤛᤪᤠᤀᤡᤗᤖᤧ ᤁᤢᤜᤠᤱᤘᤠ ᤁᤢᤔᤠᤱᤘᤠᤴ ᤂᤢᤏᤧ᤹ ᤋᤠᤱᤛᤠᤱᤒᤥᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤰᤌᤠ᤺ᤴᤍᤢᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤁᤢᤛᤡᤰ ᤐᤥᤃᤧᤒᤠ ᤕᤧᤴᤏᤥ ᤀᤠᤵᤑᤣᤰ ᤁᤢᤗᤠᤱᤋᤥ᤹ᤓᤣᤳ ᤛᤡᤕᤥᤏᤧᤴᤏᤠᤱ ᤂᤢᤏᤧ᤹ ᤏᤡᤱᤘᤠ᤹ ᤀᤡ᤺ᤳᤋᤢᤒᤠ ᤜᤥᤵᤗᤥ॥ 2 ᤕᤠᤁᤢᤒᤖᤧ ᤁᤧᤖᤧᤰ ᤁᤢᤘᤠ᤹ᤔᤠ ᤁᤢᤕᤢᤱᤔᤠᤍᤧᤴᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤰᤂᤧᤴᤏᤠᤱ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤔᤧᤸᤗ᤹ᤀᤣ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ॥ ᤂᤢᤏᤧ᤹ ᤁᤢᤛᤠᤰᤁᤧᤴ ᤐᤥᤃᤧᤒᤠᤀᤥ ᤕᤜᤢᤍᤠ᤺ᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤺ᤸᤗᤧ ᤂᤢᤴᤇᤡ᤹ ᤕᤰᤜᤠ᤹ ᤑᤢᤳᤗᤢᤶ ᤌᤩ᤺ᤱ ᤗᤢ᤺ᤴᤍᤢ ᤐᤡᤖᤢᤛᤡᤖᤥ॥ ᤂᤧᤴ ᤜᤠᤱᤈᤢᤶᤔᤡᤴ ᤏᤢ ᤂᤧᤸᤗᤧ ᤁᤢᤗᤠᤶᤗᤥᤒᤠᤜᤠ᤹ ᤂᤢᤏᤧ᤹ ᤂᤠᤶᤒᤠᤱᤅᤥ ᤛᤥ᤺ᤴᤍᤢᤛᤡᤀᤠᤱ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤛᤡᤖᤥ॥ 3 ᤂᤢᤏᤧ᤹ ᤛᤠ᤹ᤖᤡᤰ ᤁᤡᤵᤔᤠᤃᤧᤄᤢᤒᤠ ᤁᤢᤛᤡᤰ ᤐᤥ᤺ᤰᤔᤥ ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤁᤠᤰ ᤔᤢᤰᤛᤠᤶᤔᤡᤴ ᤑᤢᤳᤗᤢᤶ ᤌᤩ᤺ᤱ ᤆᤥᤃᤢᤖᤥ॥ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤀᤣ ᤂᤢᤏᤧ᤹ ᤁᤢᤈᤢᤰᤘᤠ ᤜᤢᤰᤁᤧᤴ ᤂᤧᤳᤋᤢᤖᤥ. ᤕᤠᤁᤢᤒᤖᤧ ᤁᤢᤛᤶᤎᤠᤱ ᤁᤧᤎᤠᤒᤠ ᤂᤢᤏᤧ᤹ ᤀᤠᤔᤧᤱᤔᤧᤱᤒᤠ ᤁᤢᤛᤠᤰᤁᤧᤴᤏᤡᤴ ᤁᤧᤖᤧᤰ ᤐᤡᤛᤠᤱ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤜᤧᤰᤁᤣ ᤗᤧ᤹ᤖᤧᤖᤥ॥ 4 ᤏᤡᤱᤔᤡ ᤁᤢᤀᤡᤛᤡᤰ ᤂᤢᤏᤧ᤹ ᤗᤡᤀᤥ ᤐᤧᤖᤧ᤺ᤴᤈᤥ᤺ᤴ ᤑᤳᤇᤢᤀᤠᤱ ᤐᤳᤗᤥ. ᤀᤠᤀᤳᤀᤵᤐᤠ ᤁᤢᤀᤡᤛᤡᤰ ᤂᤢᤏᤧ᤹ ᤋᤰᤐᤧᤳ ᤕᤧᤶᤛᤡᤱᤅᤠᤱ ᤕᤧᤵᤗᤥ॥ ᤔᤡᤰᤁᤧᤸᤗᤧ ᤏᤡᤛᤢᤸᤗᤧ ᤁᤧᤘᤠ᤹ᤒᤠ ᤛᤡᤖᤠ᤹ᤃᤧᤎᤠᤱᤒᤠ ᤐᤠ᤺ᤴᤜᤠ᤹ ᤂᤢᤏᤧ᤹ ᤏᤡᤱᤔᤡ ᤜᤧᤰᤁᤣ ᤁᤧᤖᤧᤰ ᤘᤖᤧᤱᤗᤧᤱ ᤔᤧᤰᤂᤢᤖᤥ॥ ᤛᤡᤕᤥᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤛᤠ᤺ᤱᤃᤠᤜᤡᤶᤔᤥ ᤂᤢᤏᤧ᤹ ᤁᤢᤛᤠᤰᤁᤧᤴᤏᤡᤴ ᤔᤡ ᤜᤧᤰᤁᤣ ᤌᤠᤛᤢᤀᤠᤱ ᤘᤠ᤹ᤖᤥ॥ 5 ᤕᤜᤘᤣ ᤍᤠᤱᤒᤧᤴ ᤏᤡᤱᤔᤡ ᤁᤢᤀᤡᤛᤡᤰ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ. ᤂᤢᤏᤧ᤹ ᤀᤡᤛᤪᤠᤀᤡᤗᤧᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤀᤠᤱ ᤏᤧᤖᤥ॥ ᤂᤢᤏᤧ᤹ ᤁᤧᤖᤧᤰ ᤜᤠᤱᤜᤡᤶᤜᤠ᤹ ᤑᤢᤳᤗᤢᤶ ᤌᤩ᤺ᤱ ᤆᤥᤃᤢᤖᤥ. ᤁᤧᤖᤧᤰ ᤕᤰᤜᤠ᤹ ᤌᤢᤵᤛᤢ ᤗᤢ᤺ᤴᤍᤢᤍᤣᤛᤢᤖᤥ॥ ᤂᤢᤏᤧ᤹ ᤕᤜᤢᤍᤠ᤺ᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤏᤡᤱᤘᤠ᤹ ᤋᤢᤰᤂᤣ ᤆᤠᤔᤧᤴ ᤏᤢ ᤁᤢᤔᤧᤖᤡᤱᤅᤧᤴ ᤑᤥᤛᤢ ᤐᤡᤖᤢᤖᤥ॥ 6 ᤂᤢᤏᤧ᤹ ᤔᤠᤱᤛᤧᤘᤠ ᤔᤧᤵᤔᤠ ᤛᤠ᤺ᤱᤃᤠᤜᤡᤶᤔᤡᤴ ᤀᤡᤰᤋᤠᤵᤐᤥᤒᤠ ᤋᤰᤋᤰᤘᤠ ᤜᤡᤶ ᤁᤢᤀᤡᤛᤡᤰ ᤌᤩ᤺ᤱ ᤕᤴᤇᤢᤍᤣᤛᤢᤖᤥ. ᤂᤢᤏᤧ᤹ ᤁᤢᤍᤢᤶᤔᤠᤍᤧᤴᤏᤡᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤛᤡᤕᤥᤏᤀᤥ ᤏᤡ᤺ᤴᤎᤥ ᤁᤧᤒᤥᤱᤒᤠ ᤋᤱᤏᤠᤶ ᤏᤢ ᤛᤒᤠᤌᤜᤠ᤹ ᤁᤧᤖᤧᤰ ᤏᤡᤱᤘᤠ᤹ᤛᤥᤰᤁᤡᤸᤗᤧ ᤁᤢᤔᤡᤱ ᤔᤠᤛᤢᤖᤥ॥ ᤂᤢᤏᤧ᤹ ᤆᤠ᤹ᤖᤡᤰ ᤁᤡᤵᤔᤠᤃᤧᤄᤢᤒᤠ ᤁᤢᤛᤡᤰ ᤐᤥ᤺ᤰᤔᤥ ᤂᤢᤏᤧ᤹ ᤜᤠᤱᤅᤡᤴ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤏᤧᤵᤔᤠᤱ ᤏᤠ᤹ᤖᤢᤛᤡᤖᤥ॥ 7 ᤍᤠᤱᤒᤧᤸᤗᤧ ᤂᤢᤏᤧ᤹ᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤏᤠ᤹ᤖᤢᤀᤠᤱ ᤏᤧᤖᤥ. ᤂᤢᤏᤧ᤹ ᤁᤢᤛᤣᤛᤣᤍᤧᤴᤏᤡᤴ ᤗᤠᤵᤑᤣᤛᤢᤀᤠᤱ ᤏᤧᤖᤥ॥ ᤂᤢᤏᤧ᤹ ᤂᤧᤵᤔᤥ ᤁᤧᤏᤧᤒᤠ ᤜᤠᤱᤜᤡᤶᤔᤥᤒᤠ ᤗᤢᤱᤎᤠᤰᤜᤠ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤐᤡᤖᤢᤛᤡᤀᤠᤱ ᤏᤧᤖᤥ॥ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤀᤣ ᤏᤡ᤺ᤴᤎᤥ ᤁᤧᤒᤥᤱᤒᤠ ᤋᤱᤏᤠᤶᤔᤥᤒᤠ ᤕᤧᤴ ᤁᤢᤀᤡᤛᤡᤰ ᤔᤧᤈᤥᤃᤢᤀᤠᤱ ᤏᤧᤖᤥ॥ 8 ᤕᤜᤘᤣ ᤍᤠᤱᤒᤧᤸᤗᤧ ᤛᤡᤕᤥᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤗᤢᤱᤎᤠᤰᤜᤠ᤹ ᤗᤢ᤺ᤶᤔᤠᤍᤣᤔᤠ ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥᤃᤢᤖᤥ॥ ᤂᤢᤏᤧ᤹ ᤂᤧᤴ ᤁᤢᤛᤡ᤺ᤰᤔᤠ ᤂᤠ᤹ᤏᤠᤶᤔᤡᤸᤗᤧ ᤛᤡ᤺ᤰᤋᤢᤖᤥ. ᤂᤧᤴ ᤂᤠᤵᤐᤢᤌᤩ᤺ᤱ ᤆᤥ᤺ᤰᤔᤠᤗᤠᤶ ᤁᤢᤜᤢᤰᤁᤡᤴ ᤔᤧᤏᤢ᤺ᤰᤋᤢᤴᤗᤥ॥ ᤂᤢᤏᤧ᤹ ᤜᤠᤱᤕᤰ ᤏᤢ ᤗᤢᤱᤎᤠᤰ ᤏᤧᤵᤔᤠᤱ ᤔᤧᤖᤡᤱ ᤌᤰᤋᤧᤖ ᤕᤠ᤺ᤴᤍᤢᤖᤥ. ᤂᤧᤱᤜᤠ᤹ ᤏᤧᤵᤔᤠᤱ ᤌᤡᤰᤗᤧᤱᤗᤧ ᤐᤢᤖᤢ᤺ᤱ ᤗᤢ᤺ᤴᤍᤧᤒᤣᤖᤥ॥ 9 ᤕᤶᤒᤠ ᤗᤠᤶᤎᤣ᤺ᤳᤜᤠ᤹ ᤂᤠᤶᤒᤠᤱᤅᤥ ᤏᤡᤔᤧᤖᤥ. ᤂᤢᤏᤧ᤹ ᤂᤧᤸᤗᤧ ᤁᤢᤀᤧᤵᤔᤠᤜᤠ᤹ ᤕᤛᤢᤀᤠᤱ ᤁᤢᤶᤈᤡᤰᤔᤠ ᤆᤥᤃᤢᤖᤥ॥ ᤜᤠᤱᤅᤡᤴ ᤏᤢ ᤗᤠᤶᤗᤥᤒᤠᤜᤠ᤹ ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣ᤹ᤖᤢᤛᤡᤀᤠᤱ ᤔᤧᤘᤠ᤹ᤖᤥ. ᤜᤧᤰᤁᤩᤠᤱ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤔᤧᤴᤜᤢ᤹ᤖᤢᤴᤛᤡᤴᤗᤥ॥ ᤂᤧᤒᤩᤠᤱ ᤂᤧᤸᤗᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧᤀᤠᤱ ᤕᤜᤘᤣ ᤍᤠᤱᤒᤧᤴᤗᤠᤶ ᤌᤧᤔᤠᤀᤠᤱ ᤛᤢᤑᤥ ᤔᤧᤱᤄᤥᤛᤢᤴᤗᤥ॥ 10 ᤛᤡᤕᤥᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤗᤠᤶᤗᤥᤒᤠᤜᤠ᤹ ᤔᤧᤶᤒᤠ᤺ᤳᤋᤣ ᤛᤫᤠ᤺ᤳᤋᤠᤱ ᤂᤠᤶᤒᤠᤱᤅᤥ ᤜᤷᤈᤢ᤹ ᤔᤧᤕᤢᤱᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤁᤥ ᤂᤠᤶᤜᤡ᤺ᤰᤁᤡᤴ ᤔᤧᤈᤢ᤺ᤳᤋᤢᤀᤠᤱ ᤕᤠᤰᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤃᤡᤋᤣᤳ ᤔᤧᤈᤠᤰᤂᤢᤀᤠᤱ ᤔᤧᤘᤠ᤹ᤖᤥ॥ ᤕᤖᤢᤛᤗᤧ᤺ᤶᤒᤠ ᤔᤧᤴᤇ᤻ᤕᤠᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤜᤠ᤹ ᤂᤠᤶᤒᤠᤱᤅᤥ ᤌᤠᤖᤡᤰ ᤀ᤺ᤰᤂᤢᤶ ᤔᤧᤓᤳᤇᤢᤀᤠᤱ ᤘᤠ᤹ᤖᤥ॥ 11 ᤜᤠ᤺ᤵᤔᤠᤖᤧ ᤜᤠ᤺ᤵᤔᤠᤖᤧ ᤔᤡᤰᤘᤠ᤺ᤸᤗᤧ ᤀᤠᤔᤡᤰᤜᤠ᤹ ᤗᤧᤛᤢᤖᤥ. ᤀᤠᤱᤃᤠ᤹ ᤀᤠᤛᤡᤰᤗᤢᤱᤔᤥ ᤀᤠᤱᤃᤠ᤹ ᤕᤠ᤺ᤳᤋᤠᤖᤥ॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤔᤧᤔᤧᤃᤧᤒᤠᤸᤗᤧ ᤆᤥᤃᤢᤸᤗᤧ. ᤀᤅᤧ᤺ᤰᤘᤠᤜᤠ᤹ ᤏᤢ ᤏᤢᤃᤧᤎᤢᤱᤒᤠ ᤀᤠᤶᤒᤪᤧ᤺ᤱᤘᤠ ᤀᤅᤧ᤺ᤰᤘᤠᤜᤠ᤹ ᤕᤧᤰᤕᤰᤁᤥᤒᤠ ᤔᤠᤖᤠᤶᤜᤠ᤹ᤀᤥ ᤂᤢᤴᤇᤡ᤹ ᤌᤏᤠ ᤗᤧᤰᤂᤧᤒᤧᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤗᤢᤱᤔᤠ᤹ ᤑᤩᤠ᤺ᤱᤓᤩᤠ᤺ᤱ ᤗ᤹ᤖᤧᤖᤥ॥ 12 ᤁᤧᤃᤠ᤺ᤶᤒᤠ ᤔᤏᤠᤜᤠ᤹ ᤜᤧᤰᤁᤣ ᤕᤧᤰᤕᤰᤁᤥᤒᤠ ᤔᤠᤖᤠᤶᤜᤠ᤹ᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤏᤠ ᤗᤧᤱᤗᤥ. ᤂᤢᤴᤇᤡ᤹ ᤔᤠᤜᤠ᤹ᤖᤧ ᤑᤰᤌᤢᤱᤔᤥ ᤂᤢᤴᤇᤡ᤹ ᤛᤰᤔᤠ ᤐᤢ᤹ᤖ ᤐᤣ᤺ᤰᤗᤥ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤖᤥ. “ᤆᤠᤔᤠ ᤁᤢᤈᤠ ᤏᤢ ᤆᤧᤸᤗᤧᤰᤛᤣ᤹ ᤌᤡᤴ ᤀᤠᤳᤋᤡ ᤘᤠ᤹ᤒᤣ᥅” 13 ᤕᤖᤢᤛᤗᤧ᤺ᤶᤔᤡᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤀᤣ. ᤂᤧᤏᤧ᤹ ᤁᤧᤗᤠᤃᤡ ᤀᤠᤱᤃᤠ᤹ ᤌᤣ ᤐᤠ᤺ᤵᤋᤢᤱᤒᤠᤒᤣ᥅ ᤀᤠᤱᤃᤠ᤹ ᤂᤧᤏᤧ᤹ ᤌᤣ᤺ᤴᤏᤢ ᤁᤢᤍᤱᤒᤠ ᤋᤱᤏᤧᤒᤠᤒᤣ᥅ ᤛᤡᤕᤥᤏᤖᤧ ᤁᤢᤛ᤻ᤛᤠ ᤔᤧᤴᤇ᤻ᤕᤠᤀᤣ. ᤜᤠᤱᤜᤠᤱ ᤔᤧᤵᤔᤠᤖᤧ ᤗᤠᤃᤡ ᤂᤧᤏᤧ᤹ ᤌᤣ᤺ᤴᤏᤢ ᤋᤱᤏᤧᤒᤠᤒᤣ᥅ ᤁᤧᤕᤠᤱᤄᤣ᤺ᤰᤁᤡᤴ ᤘᤖ᤺ᤱ ᤜᤧᤰᤁᤣ ᤁᤢᤍᤡᤶᤒᤣ ᤁᤣ᤺ᤶᤒᤠ ᤆᤥᤰᤗᤥ. ᤜᤠ᤺ᤳᤗᤧ ᤂᤧᤏᤧ᤹ ᤁᤧᤏᤢ᤹ᤖ ᤕᤠ᤺ᤶᤔᤠ ᤁᤧᤛᤢᤰᤁᤠᤱᤒᤣ᥅ 14 ᤂᤧᤏᤧ᤹ ᤁᤧᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤏᤡᤛᤢᤒᤠ ᤛᤢᤑᤥᤜᤠ᤹ ᤀᤡᤱᤗᤧᤰᤐᤠ ᤏᤢ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤘᤕᤧᤖᤥ॥ ᤂᤧᤏᤧ᤹ ᤋᤧᤶᤔᤠ ᤋᤣ᤹ᤔᤠ ᤔᤧᤶᤓᤠ᤺ᤰᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤓᤧᤴ ᤕᤠ᤺ᤶᤒᤰᤜᤠ᤹ ᤀᤥ᤺ᤴᤃᤧᤔᤧᤴᤎᤠᤰᤋᤧᤴᤗᤥ॥ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤗᤠᤃᤡ ᤔᤧᤏᤡᤛᤢᤒᤠ ᤛᤢᤑᤥᤴ ᤀᤡᤱᤗᤧᤰᤐᤠ ᤏᤢ ᤔᤡᤰᤗᤧ᤺ᤱᤔᤠ ᤐᤠ᤺ᤴᤗᤰ ᤘᤕᤧᤖᤥ॥ 15 ᤂᤧᤏᤧ᤹ ᤁᤧᤒᤣᤛᤠᤱ ᤁᤧᤒᤥᤱᤒᤠᤀᤠᤱ ᤁᤧᤒᤣ᤺ᤰᤐᤠ ᤁᤧᤖᤧᤰᤗᤧ ᤁᤧᤍᤢᤔᤢᤀᤡ ᤁᤧᤶᤔᤧᤳᤋᤠᤱ ᤂᤢᤴᤇᤡ᤹ ᤜᤢᤰᤜᤠ᤹ ᤜᤡᤵᤗᤠ ᤔᤧᤜᤡᤵᤋᤢᤖᤥ॥ ᤕᤖᤢᤛᤗᤧ᤺ᤶᤔᤡᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤢᤏᤠᤔᤧᤴᤇᤠ᤹ ᤔᤧᤒᤠ᤺ᤳᤋᤢᤖ ᤂᤢᤴᤇᤡ᤹ ᤌᤧᤃᤣ᤺ᤰᤜᤠ᤹ ᤋᤄᤢᤶᤋᤄᤢᤶ ᤔᤧᤔᤧᤳᤋᤢᤖᤥ— “ᤛᤧᤰᤂᤠ ᤛᤠ᤹ᤖᤡᤰ ᤐᤏᤢᤏᤢᤒᤠ ᤏᤢ ᤏᤡᤱᤘᤠ᤹ ᤁᤧᤛ᤺ᤵᤐᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤕᤧᤰᤕᤰ ᤑᤠ᤹ᤀᤠᤱ ᤁᤢᤔᤡᤱ ᤁᤧᤀᤡᤱᤒᤠᤴ ᤜᤠᤒᤠ ᤁᤴ ᤔᤣ᤺ᤴᤒᤡ᥅” 16 ᤂᤧᤏᤧ᤹ ᤁᤧᤖᤧᤰ ᤁᤧᤏᤡᤱᤔᤡᤜᤠ᤹ᤖᤧ ᤔᤧᤒᤠ᤺ᤳᤋᤢᤀᤠᤱ ᤁᤡᤏᤠ᤺ᤴᤍᤡ ᤁᤧᤶᤒᤡᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤒᤥ᤹ᤒᤠᤴ ᤔᤧᤕᤧ᤺ᤰᤂᤢᤖ ᤀᤰᤂᤣ ᤁᤧᤶᤔᤧᤳᤗᤥ. ᤀᤠᤏᤡᤃᤣ ᤂᤧᤴ ᤂᤠᤵᤐᤢᤌᤩ᤺ᤱ ᤔᤧᤰᤂᤢᤶᤒᤧᤖᤥ॥ ᤀᤠᤶᤓᤠ ᤁᤴ ᤕᤧᤴᤏᤡᤴ ᤀᤥᤔᤧᤵᤔᤠᤖᤧ ᤗᤠᤃᤡ ᤜᤠᤱᤄᤢᤶᤒᤧᤀᤠᤱ ᤘᤕᤡᤃᤧᤖᤥ. ᤀᤠᤏᤡᤃᤣ ᤜᤡᤅᤡᤃᤧᤀᤠᤱ ᤁᤴ ᤀᤥᤔᤧᤵᤔᤠ ᤂᤥᤛᤢᤶᤒᤧᤖᤥ᥄ 17 ᤕᤜᤘᤣ ᤍᤠᤱᤒᤧᤸᤗᤧ ᤌᤣ᤺ᤴ ᤆᤥ᤺ᤰᤔᤠ ᤏᤡᤱᤛᤣᤰ ᤆᤥᤃᤢᤀᤠᤱ ᤘᤕᤧ. ᤂᤢᤏᤧ᤹ ᤌᤣ᤺ᤴ ᤀᤢᤘᤠ ᤆᤥᤃᤢᤀᤠᤱ ᤘᤕᤧ. ᤀᤠᤶᤓᤠ ᤂᤧᤴ ᤆᤥ᤺ᤰᤔᤠ ᤀᤡ᤺ᤳᤋᤢᤒᤧᤴ ᤁᤧᤳᤋᤢᤖᤥ॥ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤔᤧᤸᤗ᤹ᤀᤣ ᤂᤧᤏᤧ᤹ ᤆᤡᤸᤗᤧᤰ ᤁᤧᤗᤧᤰᤂᤧ ᤁᤧᤍᤣᤛᤧᤖᤥ. ᤂᤢᤏᤧ᤹ ᤏᤡᤱᤔᤡᤜᤠ᤹ ᤂᤧᤏᤧ᤹ ᤁᤧᤛᤶᤎᤠᤱ ᤔᤧᤛ᤺ᤳᤋᤧᤖ ᤕᤠ᤺ᤴᤍᤢᤛᤡᤖᤥ. ᤂᤶᤓᤩᤠᤱ ᤁᤧᤀᤳ ᤁᤧᤒᤠᤱᤜᤠ᤹ ᤐᤎᤢᤶ ᤁᤧᤎᤢᤶᤒᤠ ᤆᤥᤃᤢᤛᤡᤖᤥ॥ 18 ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤗᤢᤱᤔᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤔᤧᤓᤠᤰᤋᤢᤖᤥ. ᤛᤡᤕᤥᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤗᤢᤱᤎᤠᤰᤁᤣ. ᤘᤜ᤺ᤱ ᤜᤧᤰᤁᤣ ᤛᤧᤴᤍᤡᤰ ᤗᤧᤴᤍᤡᤰ ᤁᤧᤔᤡᤰᤘᤠ ᤌᤠᤛᤧ᤹ᤀᤥ॥ ᤆᤒᤧ᤺ᤳᤇᤡᤰᤁᤠᤱ ᤂᤧᤏᤧ᤹ ᤔᤧᤏᤠ᤺ᤶᤛᤡᤱᤅᤧᤴᤏᤧ᤹ᤀᤥ. ᤂᤧᤏᤧ᤹ ᤁᤧᤔᤡᤰᤁᤧᤴ ᤆᤡᤖᤠᤵ ᤗ᤹ᤖᤡᤰ ᤔᤧᤏᤠ᤺ᤵᤛᤧᤴᤏᤧ᤹ᤀᤥ॥ 19 ᤛᤧᤴᤍᤡᤰ ᤕᤧᤳᤗᤧᤱ ᤕᤧᤳᤗᤧᤱ ᤐᤥᤃᤧᤀᤠᤱ ᤀ᤺ᤰᤋᤧ᤹ᤀᤥ. ᤁᤧᤛᤡᤰᤗᤢᤱᤔᤥᤗᤠᤶ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤑᤠᤰᤋᤧ᤹ᤀᤥ॥ ᤔᤠᤖᤠᤶᤜᤠ᤹ᤖᤧ ᤁᤢᤛᤢᤰᤐᤠᤜᤠ᤹ᤀᤥ ᤛᤠᤰᤁᤧᤸᤗᤧ ᤁᤢᤎᤏᤠ ᤁᤧᤗᤧᤱᤒᤠ ᤁᤧᤛ᤻ᤛᤠᤜᤠ᤹ ᤔᤧᤜᤡᤱᤗ ᤑᤠ᤹ᤀᤠᤱ ᤁᤧᤜᤢᤰᤜᤠ᤹ ᤂᤢᤏᤧ᤹ ᤗᤧᤵᤔᤠᤱ ᤑᤥ᤺ᤰᤂᤧ᤹ᤀᤥ॥ 20 ᤕᤜᤘᤣ ᤍᤠᤱᤒᤠᤀᤣ. ᤀᤥᤔᤧᤳᤋᤧ᤹ᤀᤥ. ᤜᤧᤰᤁᤩᤠᤱ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ᤀᤠᤍᤠᤱᤒᤠᤖᤧ ᤀᤰᤋᤱᤒᤠ ᤋᤢᤰᤂᤣ ᤜᤠᤳ ᤁᤧᤈᤠ᤺ᤳᤋᤢᤀᤠᤱ ᤘᤠ᤹ᤒᤣ᥅ ᤌᤣ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤑᤰᤌᤢᤱᤔᤥ ᤔᤧᤏᤧᤛ᤻ᤛᤢᤛᤡᤒᤠ. ᤂᤢᤴᤇᤡ᤹ ᤀᤠᤵᤑᤣᤰ ᤔᤧᤃᤳᤋᤢᤛᤡᤒᤠ ᤀᤠᤶᤒᤪᤧ᤺ᤱᤘᤠ ᤛᤠᤜᤠ᤹ ᤔᤧᤈᤛᤡᤖᤒᤡ᥅ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣᤍᤧᤴᤏᤥ ᤔᤧᤛᤩᤧᤖᤢᤛᤡᤖᤒᤡ᥅ 21 ᤔᤠᤖᤠᤶ ᤔᤠᤖᤠᤶᤜᤠ᤹ᤀᤥᤒᤠ ᤂᤠᤶᤜᤡ᤺ᤰᤁᤥ ᤁᤠᤵᤐᤥᤒᤠ ᤏᤢ ᤌᤠᤱᤒᤧᤴ ᤔᤏᤠᤜᤠ᤹ ᤗᤧᤖᤧᤶᤓᤧᤏᤠ ᤔᤧᤈᤥ᤺ᤴᤍᤧᤀᤠᤱ ᤔᤧᤏᤧᤖᤥ॥ ᤌᤠᤱᤒᤧᤴ ᤏᤢ ᤔᤧᤴᤇ᤻ᤕᤠ ᤀᤠᤔᤏᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤛᤥ᤺ᤴᤍᤢᤛᤡᤀᤠᤱ ᤏᤧᤖᤥ ᤁᤧᤛᤡᤰ ᤐᤥᤃᤧᤒᤠ ᤕᤧᤴᤏᤥ ᤀᤠᤍᤠᤱᤒᤠᤖᤧ ᤂᤧᤱᤜᤠ᤹ ᤁᤧᤛᤩᤧᤖᤢᤛᤡᤀᤠᤱ ᤘᤠ᤹ᤖᤥ. ᤗᤢᤱᤔᤠ᤹ ᤛᤩᤠ᤺ᤳ ᤔᤧᤸᤗ᤹ᤀᤣ ᤂᤧᤱᤜᤠ᤹ ᤁᤧᤛᤩᤧᤖᤢᤛᤡᤀᤠᤱ ᤘᤠ᤹ᤖᤥ॥ 22 ᤋᤱᤏᤠᤶᤔᤥ ᤔᤏᤠᤜᤠ᤹ ᤔᤧᤈᤢᤶᤒᤠ ᤁᤢᤀᤡᤛᤡ᤺ᤰᤁᤣ. ᤀᤠᤃᤒᤪᤡᤱᤗᤠᤶ ᤀᤠᤍᤠᤱᤒᤠᤖᤧ ᤀᤠᤏᤡᤱᤔᤡᤜᤠ᤹ ᤁᤧᤛᤢᤵᤛᤢᤛᤡᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴ ᤐᤥᤃᤧᤒᤠ ᤕᤧᤴᤏᤥ ᤀᤠᤳᤋᤡᤴᤏᤠᤱ ᤂᤧᤳᤇᤡᤱᤔᤠ ᤔᤧᤄᤥᤛᤧᤴᤗᤥ ᤜᤧᤰᤁᤩᤠᤱ ᤀᤠᤳᤋᤡᤴᤏᤠᤱ ᤋᤠᤱᤔᤠᤀᤠᤱ ᤔᤧᤄᤥᤛᤧᤴᤗᤥ॥ ᤀᤠᤱᤃᤠ᤹ ᤜᤡᤱᤄᤢᤱᤛᤡᤱᤅᤠᤱ ᤕᤶᤒᤠ ᤆᤥᤃᤢᤱᤛᤡᤱᤒᤠ ᤀᤠᤛ᤻ᤛᤠᤜᤠ᤹ ᤀᤠᤱᤃᤠ᤹ ᤀᤠᤏᤡᤱᤔᤡ᤺ᤸᤗᤧ ᤔᤧᤰᤂᤢᤛᤡ ᤐᤡᤖᤠᤱᤅᤠᤱ ᤘᤠ᤹ᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.