ᤕᤜᤥᤛᤢ 9 - LIFOTNTᤃᤡᤒᤥᤏᤡᤜᤠ᤹ᤖᤧ ᤕᤜᤥᤛᤢᤴ ᤀᤡᤱᤔᤧᤗᤧᤰᤋᤢ 1 ᤀᤠᤸᤗ ᤕᤷᤍᤏ ᤘᤜ᤺ᤱ ᤏᤠᤶᤎᤠ ᤐᤡᤛᤠᤱᤒᤠ ᤁᤧᤖᤧᤰ ᤜᤠᤱᤜᤠ᤹ᤖᤧ ᤌᤧᤔᤠ ᤐᤥ᤺ᤰᤂᤧᤀᤠᤱ ᤘᤕᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢ॥ ᤁᤴ ᤜᤠᤱᤜᤠ᤹ᤃ ᤏᤠᤶᤎᤠ ᤐᤡᤛᤠᤱᤒᤠ ᤌᤧᤃᤢ ᤔᤠᤱᤘᤠᤜᤠ᤹ᤀᤥᤒᤠ ᤗᤠᤈᤣ᤹ᤜᤠ᤹ᤀᤥ ᤏᤢ ᤗᤢᤶᤒᤠᤱ ᤘᤖ᤺ᤱᤅᤡᤸᤗᤧ ᤁᤢᤕᤠ ᤁᤢᤕᤠ ᤗᤣᤒᤏᤠᤏ ᤌᤠᤱᤃᤧᤳ ᤗᤧᤵᤔᤠᤱ ᤁᤥ᤺ᤰᤔᤠᤜᤠ᤹ᤀᤥ ᤌᤠᤖᤡᤰ ᤁᤧᤕᤢᤱᤒᤠ ᤜᤡᤳᤋᤡ. ᤀᤣᤔᤥᤖᤡ. ᤁᤏᤠᤏᤡ. ᤐᤖᤡᤈ᤻ᤈᤡ. ᤜᤡᤒ᤻ᤒᤡ ᤏᤢ ᤕᤒᤢᤛᤡᤜᤠ᤹ ᤔᤧᤘᤕᤧ॥ 2 ᤕᤜᤥᤛᤢᤴ ᤏᤢ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤰᤔᤠᤖᤧ ᤗᤠᤃᤡ ᤁᤴ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᤌᤡᤰᤜᤢᤵ ᤔᤧᤈᤥᤃᤢᤛᤡ॥ 3 ᤁᤖ ᤕᤖᤡᤜᤥᤀᤥ ᤏᤢ ᤀᤣᤣᤀᤥ ᤕᤜᤥᤛᤢ᤺ᤸᤗᤧ ᤆᤥᤃᤢᤒᤠ ᤐᤠ᤺ᤴᤏᤡᤴ ᤃᤡᤒᤥᤏ ᤁᤧᤕᤢᤱᤒᤠᤜᤠ᤹ᤖᤧ ᤔᤧᤄᤧᤵᤛᤢ. 4 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤗᤳᤇᤠ ᤀᤡᤱᤗᤧᤰ ᤐᤠᤴ ᤔᤧᤈᤥᤃᤢ॥ ᤂᤧᤱᤜᤠ᤹ ᤗᤠᤈᤣ᤹ᤒᤠ ᤀᤡᤱᤛᤠᤒᤠ ᤔᤧᤗᤧᤱᤛᤡᤱᤛᤠᤱ ᤁᤢᤍᤪᤧᤰ ᤑᤠ᤺ᤱᤃᤪᤡᤔᤠᤜᤠ᤹ ᤏᤢ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤕᤠᤱᤔᤠ ᤁᤧᤍᤧ᤺ᤱᤒᤠ ᤗᤧᤶᤔᤏᤠᤒᤠ ᤛᤡᤜᤥ᤹ᤒᤠ ᤛᤢᤰᤘᤠᤜᤠ᤹ ᤂᤢᤴᤇᤡ᤹ ᤀᤍᤱᤜᤠ᤹ ᤔᤧᤃᤢ᤺ᤳᤋᤢᤛᤡ॥ 5 ᤜᤧᤰᤁᤩᤠᤱ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤅᤥ ᤗᤧᤶᤔᤏᤠᤒᤠ ᤁᤢᤍᤪᤧᤰ ᤗᤠᤱᤛᤢ᤺ᤵᤜᤠ᤹ ᤏᤢ ᤂᤢᤴᤇᤡ᤹ ᤌᤰᤁᤥ ᤁᤢᤍᤪᤧᤰ ᤆᤠᤱᤜᤠ᤹ ᤔᤧᤈᤠᤰᤂᤢ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤠᤔᤠ ᤆᤠᤜᤠ᤹ᤀᤠᤱ ᤁᤧᤖᤧᤰ ᤁᤧᤜᤣᤒᤠ ᤏᤢ ᤛᤢᤰᤏᤠ᤺ᤶ ᤁᤧᤎᤰᤐᤠ ᤆᤥᤃᤧ॥ 6 ᤂᤧᤒᤩᤠᤱ ᤂᤧᤱᤜᤠ᤹ ᤃᤡᤗᤃᤠᤗᤒᤠ ᤛᤠ᤺ᤱᤃᤠᤜᤡᤶᤔᤥ ᤕᤜᤥᤛᤢᤀᤥ ᤔᤧᤍᤩᤧᤀᤠᤱ ᤂᤢᤏᤧ᤹ ᤏᤢ ᤀᤡᤛᤪᤠᤀᤡᤗᤡᤜᤠ᤹ ᤔᤧᤔᤧᤳᤋᤢᤛᤡ. “ᤀᤠᤏᤡᤃᤧᤃ ᤔᤠ᤺ᤱᤄᤠᤒᤠ ᤗᤠᤈᤣ᤹ᤗᤠᤶ ᤋᤩᤧ᤹ᤀᤡᤃᤧᤒᤠᤖᤥ॥ ᤁᤸᤗᤧᤆᤥᤃᤢᤸᤗᤧ ᤀᤠᤏᤡᤃᤧᤏᤢ ᤏᤠᤍᤱ ᤆᤥᤃᤧᤶᤔᤧ᤹॥” 7 ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤧᤴ ᤜᤡᤒ᤻ᤒᤡᤜᤠ᤹ ᤔᤧᤔᤧᤳᤋᤢᤛᤡ. “ᤂᤡᤏᤡ᤹ᤃ ᤀᤠᤏᤡᤃᤣ ᤗᤢᤶᤔᤥᤀᤣ ᤁᤧᤕᤢᤱᤒᤠ ᤔᤏᤠᤏᤡᤱᤒᤡᤗᤠ. ᤂᤡᤏᤡ᤹ᤏᤢ ᤀᤠᤏᤡᤃᤣ ᤀᤠᤰᤂᤣᤗ᤹ᤖᤡᤰ ᤏᤠᤍᤱ ᤆᤥ᤺ᤰᤔᤠ ᤛᤢᤰᤋᤢᤶᤒᤧᤒᤣ᥅” 8 ᤂᤧᤱᤜᤠ᤹ᤖᤧ ᤕᤜᤥᤛᤢᤴ ᤔᤧᤔᤧᤳᤋᤢ. “ᤀᤠᤏᤡᤃᤧᤃ ᤂᤧᤏᤧ᤹ᤀᤣ ᤁᤧᤕᤥ᤺ᤃ᤻ᤒᤠᤍᤡᤃᤧ॥” ᤁᤖ ᤕᤜᤥᤛᤢ᤺ᤸᤗᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤜᤠ᤺ᤳᤏᤡᤱᤒᤣ ᤜᤧᤰᤁᤩᤠᤱ ᤀᤠᤳᤋᤡᤗᤠᤶ ᤁᤧᤍᤩᤧ᤹ᤀᤡᤒᤠᤒᤣ᥅” 9 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤧᤕᤥ᤺ᤃ᤻ᤒᤠᤜᤠ᤹ ᤕᤖᤡᤰ ᤔᤠ᤺ᤱᤄᤠᤒᤠ ᤗᤠᤈᤣ᤹ᤗᤠᤶ ᤕᤜᤘᤣ ᤍᤠᤱᤒᤠ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤡᤴ ᤂᤧᤵᤛᤢᤶᤒᤧᤀᤠᤱ ᤀᤠᤏᤡᤃᤣ ᤋᤩᤧ᤹ᤀᤡᤃᤧᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤧᤀᤡᤱᤒᤠ ᤁᤢᤔᤡᤱᤅᤡᤴ ᤏᤢ ᤔᤡᤛᤪ ᤗᤠᤈᤣ᤹ᤀᤥ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤀᤠᤏᤡᤃᤣ ᤂᤧᤵᤛᤢᤶᤒᤧᤀᤠᤱ ᤘᤕᤡᤃᤧ. 10 ᤕᤷᤍᤏ ᤏᤠᤎᤠ᤺ᤶᤒᤡ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤏᤧᤵᤔᤠᤱ ᤜᤠᤱᤜᤠ᤹. ᤜᤣᤛ᤻ᤒᤥᤏᤒᤠ ᤜᤠᤱ ᤛᤡᤜᤥᤏᤧᤴ ᤏᤢ ᤀᤛ᤻ᤋᤠᤖᤥᤋ ᤁᤧᤕᤢᤱᤒᤠ ᤒᤠᤛᤠᤏᤒᤠ ᤜᤠᤱ ᤀᤥᤃᤧᤴ ᤌᤧᤔᤠ ᤌᤧᤔᤠ ᤔᤧᤳᤋᤢᤛᤡᤀᤠᤱ ᤘᤕᤧ. ᤂᤧᤴ ᤀᤠᤏᤡᤃᤣ ᤂᤧᤵᤛᤢᤶᤒᤧᤀᤠᤱ ᤘᤕᤡᤃᤧ॥ 11 ᤁᤸᤗᤧᤆᤥᤃᤢᤸᤗᤧ ᤀᤠᤏᤡᤃᤣ ᤋᤢᤶᤓᤠᤰᤛᤠᤜᤠ᤹ ᤏᤢ ᤀᤠᤏᤡᤃᤣ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤁᤧᤖᤧᤰᤗᤧ ᤀᤠᤏᤡᤃᤣ ᤀᤰᤂᤣ ᤔᤧᤔᤧᤳᤋᤡᤃᤧ. ‘ᤂᤡᤏᤡ᤹ ᤗᤠᤶᤍᤡᤰ ᤆᤥ᤺ᤰᤔᤠᤖᤧ ᤗᤠᤃᤡ ᤗᤠᤶᤔᤥ ᤆᤠᤔᤠ ᤁᤢᤈᤠ ᤕᤠᤱᤅᤠᤛᤡᤶᤔᤧ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤛᤧ ᤐᤣᤃᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤠᤶᤛᤡᤶᤔᤧ᤹. “ᤀᤠᤏᤡᤃᤧᤃ ᤂᤡᤏᤡ᤹ᤀᤣ ᤕᤥ᤺ᤃ᤻ᤒᤠᤍᤡᤃᤧ. ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤀᤠᤏᤡᤃᤧᤏᤢ ᤏᤠᤍᤱ ᤆᤥᤃᤧᤶᤔᤧ᤹॥”’ 12 “ᤀᤠᤏᤡᤃᤣ ᤂᤡᤏᤡ᤹ᤀᤥ ᤗ᤺ᤶᤔᤏᤠ ᤑᤧᤶᤔᤏᤠ᤺ᤸᤗᤧ ᤕᤠ᤺ᤴᤍᤡᤰ ᤀᤠᤏᤡᤃᤣ ᤜᤡᤶᤔᤥᤗᤠᤶ ᤀᤠᤏᤡᤃᤣ ᤆᤠᤔᤠᤖᤧ ᤗᤠᤃᤡ ᤀᤠᤏᤡᤃᤣ ᤁᤴ ᤂᤖᤧ᤺ᤱᤅᤡᤴ ᤐᤃᤥ ᤁᤥᤛᤧᤖ ᤕᤠᤱᤅᤠᤛᤡᤃᤧᤀᤠᤱ ᤘᤕᤧ. ᤁᤖ ᤀᤠᤸᤗ ᤀᤥᤔᤧᤳᤋᤧᤶᤔᤧ᤹. ᤁᤴ ᤜᤣᤖᤧᤀᤠᤱ ᤛᤢᤰᤏᤠ᤺ᤶᤒᤠ ᤌᤩᤧ ᤆᤢᤖᤧᤀᤠᤱ ᤘᤠ᤹॥ 13 ᤀᤠᤏᤡᤃᤣ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤕᤠᤱᤔᤏᤠᤒᤠ ᤁᤴ ᤛᤡᤜᤥ᤹ᤒᤠ ᤛᤢᤰᤘᤠᤜᤠ᤹ ᤁᤢᤛᤱᤅᤣ ᤘᤕᤧ. ᤁᤖ ᤀᤥᤔᤧᤳᤋᤧᤶᤔᤧ᤹. ᤁᤴᤜᤠ᤹ ᤋᤧ᤺ᤰᤂᤧᤒᤣᤀᤠᤱ ᤘᤠ᤹. ᤂᤶᤓᤩᤠᤱ ᤀᤠᤏᤡᤃᤣ ᤁᤴ ᤆᤠᤱᤜᤠ᤹ ᤏᤢ ᤗᤠᤱᤛᤢ᤺ᤵᤜᤠ᤹ᤀᤠᤱ ᤔᤠ᤺ᤱᤄᤠ ᤗᤠᤶ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤁᤢᤍᤪᤧᤰ ᤐᤥ᤺ᤰᤂᤧᤆᤢᤖᤧᤀᤠᤱ ᤘᤠ᤹॥” 14 ᤕᤜᤘᤣ ᤍᤠᤱᤒᤠᤗᤠᤶ ᤀᤡᤱᤈᤠᤱ ᤐᤠᤴ ᤔᤧᤱᤄᤧᤶᤔᤣ ᤂᤧᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤠᤔᤠ ᤁᤢᤈᤠᤜᤠ᤹ ᤀᤥᤔᤧᤔᤧᤳᤋᤢ ᤔᤧᤛᤠ᤹ᤖᤢ॥ 15 ᤜᤧᤰᤁᤩᤠᤱ ᤕᤜᤥᤛᤢ᤺ᤸᤗᤧ ᤂᤧᤱᤜᤠ᤹ᤏᤢ ᤋᤱᤔᤠᤀᤠᤱ ᤔᤧᤴᤇᤧᤵᤔᤠᤛᤡ ᤏᤠᤍᤱ ᤆᤥᤃᤢ ᤂᤧᤒᤩᤠᤱ ᤂᤧᤱᤜᤠ᤹ᤏᤢ ᤐᤠ᤺ᤴᤍᤱ ᤆᤥᤃᤢᤀᤠᤱ ᤛᤱᤈᤢᤶᤓᤥᤒᤠ ᤗᤠᤶᤗᤥᤒᤠᤜᤠ᤹ᤖᤧᤀᤠᤱ ᤁᤴ ᤐᤠ᤺ᤴᤏᤥ ᤋᤧᤶᤔᤠ ᤔᤠᤱᤜᤧᤰ ᤔᤧᤈᤥᤃᤢ॥ 16 ᤃᤡᤒᤥᤏᤡᤜᤠ᤹ᤏᤢ ᤐᤠ᤺ᤴᤍᤱ ᤔᤧᤈᤥᤃᤢᤒᤠ ᤛᤢᤶᤕᤠᤴ ᤀᤣᤃᤠᤱᤛᤠ ᤂᤧᤱᤜᤠ᤹ᤃ ᤀᤠᤵᤑᤣᤰ ᤜᤡᤶᤒᤣᤛᤠᤱᤒᤠᤛᤡᤖᤧᤳᤇ. ᤜᤧᤰᤁᤩᤠᤱ ᤀᤠᤵᤑᤣᤰ ᤗᤢᤶᤔᤥ ᤁᤧᤕᤢᤱᤒᤠᤛᤡᤖᤧᤳᤇ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤄᤧᤵᤛᤢ॥ 17 ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤗᤠᤱᤔᤧᤄᤣᤃᤧᤀᤠᤱ ᤛᤢᤶᤕᤠᤴᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤜᤠ᤹ᤀᤥ ᤔᤧᤃᤧᤖᤧ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤜᤠ᤹ᤃ ᤃᤡᤒᤥᤏ. ᤁᤐᤡᤖᤠ. ᤒᤣᤖᤥᤋ ᤖ ᤁᤡᤷᤕᤋ-ᤕᤠᤖᤡᤔ ᤏᤧᤛ᤻ᤛᤧ॥ 18 ᤀᤡᤛᤪᤠᤀᤡᤗᤡᤜᤠ᤹ ᤂᤧᤱᤜᤠ᤹ᤏᤢ ᤔᤧᤴᤎᤰᤋᤧᤴ. ᤌᤣᤀᤠᤱᤓᤧᤸᤗᤧ ᤛᤱᤈᤢᤶᤓᤥᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤂᤧᤱᤜᤠ᤹ᤏᤢ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤠᤱᤜᤧᤰ ᤔᤧᤈᤥᤃᤢᤀᤠᤱ ᤘᤕᤧ॥ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤔᤏᤧᤎᤡᤰᤔᤠ ᤔᤧᤜᤣ᤺ᤰᤋᤧ॥ 19 ᤁᤖ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ᤖᤧ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ ᤔᤧᤔᤧᤳᤋᤢᤛᤡ. “ᤀᤠᤏᤡᤃᤣ ᤂᤧᤱᤜᤠ᤹ᤏᤢ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤠᤱᤜᤧᤰ ᤆᤥᤃᤢᤶᤒᤧᤀᤠᤱ ᤘᤠ᤹॥ ᤁᤸᤗᤧᤆᤥᤃᤢᤸᤗᤧ ᤀᤠᤏᤡᤃᤣ ᤂᤧᤱᤜᤠ᤹ ᤛᤢᤔᤠ ᤔᤧᤛᤢᤰᤋᤢᤶᤛᤡᤶᤒᤧᤴ᤹॥ 20 ᤀᤠᤏᤡ᤹ ᤀᤰᤂᤣᤀᤣ ᤆᤥ᤺ᤰᤔᤠ ᤐᤥᤱ᤹—ᤀᤠᤏᤡ᤹ ᤂᤧᤱᤜᤠ᤹ ᤁᤢᤜᤡᤱᤘᤧᤳᤋᤣ ᤗᤧᤵᤔᤠᤛᤡ ᤐᤥᤱ᤹. ᤔᤣ᤺ᤴᤏᤧᤓᤃᤪ ᤀᤠᤏᤡ᤹ ᤀᤠᤈᤥᤃᤢᤶᤒᤠ ᤔᤠᤱᤜᤧᤰᤁᤡᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤴ ᤀᤠᤏᤡ᤹ ᤛᤶᤎᤠᤱ ᤌᤠᤖᤥ॥ 21 ᤂᤧᤱᤜᤠ᤹ ᤁᤢᤜᤡᤱᤘᤧᤳᤋᤣ ᤗᤧᤖᤧᤶᤛᤡᤶᤔᤧ᤹॥ ᤁᤖ ᤂᤧᤱᤜᤠ᤹ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤛᤡᤱ ᤁᤧᤃᤥ᤺ᤵᤐᤠ ᤏᤢ ᤆᤫᤠ᤺ᤳ ᤁᤧᤓᤠ᤺ᤵᤐᤠ ᤔᤧᤒᤥᤱᤅᤠᤱ ᤔᤧᤘᤠ᤹ᤖ ᤕᤠ᤺ᤴᤍᤧᤶᤛᤡᤶᤔᤧ᤹॥” ᤁᤸᤗᤧᤆᤥᤃᤢᤸᤗᤧ ᤗᤠᤶᤗᤥᤒᤠᤜᤠ᤹ᤖᤧ ᤂᤧᤱᤜᤠ᤹ᤏᤢ ᤔᤧᤈᤥᤃᤢᤒᤠ ᤔᤠᤱᤜᤧᤰ ᤁᤢᤀᤡᤛᤡᤰ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤛᤡᤱ ᤁᤧᤜᤱᤒᤠ ᤏᤢ ᤆᤫᤠ᤺ᤳ ᤁᤧᤓᤠ᤺ᤵᤐᤠ ᤔᤧᤒᤥ᤺ᤰᤂᤧ॥ 22 ᤜᤧᤰᤁᤩᤠᤱ ᤕᤜᤥᤛᤢ᤺ᤸᤗᤧ ᤃᤡᤒᤥᤏᤡᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤛᤧᤰᤂᤠ᤺ᤸᤗᤧ ᤂᤡᤏᤡ᤹ᤃ ᤀᤠᤏᤡᤃᤣ ᤗᤢᤶᤔᤥᤀᤣ ᤁᤧᤕᤢᤱᤒᤠᤏᤡᤱᤖᤧᤳᤇ. ᤁᤖ ᤂᤡᤏᤡ᤹ ᤌᤣᤀᤠᤱ ‘ᤀᤠᤏᤡᤃᤣ ᤛᤠ᤹ᤖᤡᤰ ᤔᤠ᤺ᤱᤄᤠᤒᤠ ᤗᤠᤈᤣ᤹ ᤁᤧᤕᤢᤱᤒᤠᤛᤡᤃᤧᤖᤥ’ ᤑᤠ᤹ᤀᤠᤱ ᤀᤡᤱᤗᤧᤰ ᤁᤧᤒᤠ᤺ᤳᤋᤢᤶ᤹᥅ 23 ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤂᤡᤏᤡ᤹ ᤔᤠᤱᤍᤣ ᤛᤠᤱᤃᤪᤠ ᤁᤧᤎᤩᤧ᤹ᤀᤡᤀᤠᤱ ᤁᤧᤘᤕᤡ᤹॥ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤂᤡᤏᤡ᤹ ᤀᤠᤓᤧᤸᤗᤧᤛᤠᤱ ᤔᤠᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤛᤡᤱ ᤁᤧᤜᤱᤒᤠ ᤏᤢ ᤆᤫᤠ᤺ᤳ ᤁᤧᤓᤠ᤺ᤵᤐᤠ ᤐᤥᤱᤔᤠᤀᤠᤱ ᤘᤠ᤹ᤔᤠ ᤐᤥᤱ᤹॥” 24 ᤂᤧᤱᤜᤠ᤹ᤖᤧ ᤕᤜᤥᤛᤢᤴ ᤔᤧᤔᤧᤳᤋᤢ. “ᤕᤜᤘᤣ ᤍᤠᤱᤒᤠ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠᤴ ᤐᤡᤖᤢᤒᤠ ᤁᤴ ᤗᤠᤈᤣᤴ ᤁᤧᤖᤧᤰ ᤂᤡᤏᤡ᤹ ᤐᤡᤔᤠ ᤏᤢ ᤁᤴ ᤗᤠᤈᤣ᤹ᤀᤥ ᤁᤧᤕᤢᤱᤒᤠᤜᤠ᤹ ᤁᤧᤖᤧᤰ ᤔᤧᤱᤔᤠᤛᤡ ᤀᤡᤱᤈᤠᤱ ᤐᤡᤖᤢᤒᤠ ᤐᤠ᤺ᤴᤏᤡᤴ ᤂᤧᤏᤧ᤹ ᤁᤧᤕᤥ᤺ᤃ᤻ᤒᤠᤜᤠ᤹ ᤏᤢᤖᤡᤰᤁᤠᤱ ᤔᤧᤔᤧᤳᤋᤡᤃᤧᤀᤠᤱ ᤘᤕᤧ॥ ᤁᤸᤗᤧᤆᤥᤃᤢᤸᤗᤧ ᤛᤠ᤹ᤖᤡᤰ ᤁᤡᤛᤡᤃᤧᤀᤠᤱ ᤀᤠᤏᤡᤃᤣ ᤜᤡᤱᤔᤴ ᤛᤧ᤺ᤵᤔᤠᤖᤧ ᤗᤠᤃᤡ ᤀᤰᤂᤣ ᤆᤥᤃᤢᤶᤒᤧᤒᤠᤖᤥ॥ 25 ᤀᤠᤸᤗ ᤀᤥᤔᤧᤳᤋᤧ᤹. ᤀᤠᤏᤡᤃᤣ ᤂᤧᤏᤧ᤹ ᤁᤧᤜᤢᤰᤁᤥ ᤘᤕᤡᤃᤧ॥ ᤂᤧᤏᤧ᤹ ᤌᤧᤔᤠ ᤆᤥ᤺ᤰᤔᤠ ᤏᤢᤒᤠ ᤏᤢ ᤁᤧᤗᤠ᤹ᤒᤠ ᤆᤥᤰ. ᤂᤧᤴ ᤀᤠᤏᤡᤃᤧᤏᤢ ᤆᤥᤃᤧ᤹॥” 26 ᤁᤶᤓᤗ᤹ᤖᤡᤰ ᤕᤜᤥᤛᤢ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤗᤠᤶ ᤂᤧᤱᤜᤠ᤹ ᤛᤧ᤺ᤵᤋᤢᤛᤡᤀᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤴᤇᤧᤖᤢᤛᤡᤴ॥ 27 ᤂᤧᤸᤗᤧ ᤕᤠ᤺ᤴᤍᤡᤰ ᤕᤜᤥᤛᤢ᤺ᤸᤗᤧ ᤂᤧᤱᤜᤠ᤹ ᤛᤱᤈᤢᤶᤓᤥᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢᤒᤠᤍᤧᤴᤏᤥ ᤂᤢᤏᤧ᤹ᤀᤥ ᤔᤧᤍᤥᤴᤍᤢᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤗᤠᤃᤡ ᤛᤡᤱ ᤁᤧᤃᤥ᤺ᤵᤐᤠ ᤏᤢ ᤆᤫᤠ᤺ᤳ ᤁᤧᤓᤠ᤺ᤵᤐᤠ ᤆᤥᤃᤢᤛᤡ॥ ᤂᤧᤱᤜᤠ᤹ ᤀᤠᤀᤡᤴ ᤌᤠᤖᤡᤰ ᤜᤧᤰᤋᤱᤒᤠᤀᤣ ᤔᤧᤘᤠ᤹ᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.