ᤕᤜᤥᤛᤢ 8 - LIFOTNTᤀᤤ ᤕᤧᤰᤕᤰᤁᤡᤴ ᤜᤢᤰᤁᤠᤵ ᤔᤧᤈᤥᤃᤢᤀᤠᤱ ᤔᤧᤔᤧᤰᤂᤢ 1 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤛᤢᤴ ᤔᤧᤳᤋᤢ. “ᤔᤧᤃᤡᤛᤧᤴᤏᤧ᤹. ᤁᤧᤏᤡᤱᤘᤠ᤹ ᤛᤪᤥ᤺ᤴ ᤔᤧᤗ᤹ᤖᤧᤴᤏᤧ᤹॥ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤛᤥᤖᤡᤰ ᤋᤣ᤹ᤖᤧᤛᤧ᤹॥ ᤐᤣᤃᤧ᤹. ᤀᤤ ᤕᤧᤰᤕᤰᤁᤥ ᤌᤱ ᤆᤥᤃᤧ᤹॥ ᤀᤥᤔᤧᤳᤋᤧ᤹. ᤀᤤ ᤕᤧᤰᤕᤰᤁᤥᤒᤠ ᤜᤠᤱᤅᤡᤴ. ᤂᤧᤸᤗᤧ ᤁᤢᤔᤏᤠᤜᤠ᤹. ᤂᤧᤸᤗᤧ ᤁᤢᤕᤧᤰᤕᤰᤁᤡᤴ ᤏᤢ ᤂᤧᤸᤗᤧ ᤁᤢᤗᤠᤈᤣᤴ ᤀᤠᤱᤃᤠ᤹ ᤂᤧᤏᤧ᤹ ᤜᤢᤰᤛᤢᤵᤏᤧᤀᤠᤱ ᤘᤠ᤹॥ 2 ᤂᤧᤏᤧ᤹ ᤕᤖᤡᤜᤥᤴ ᤏᤢ ᤂᤧᤵᤔᤥᤒᤠ ᤜᤠᤱᤅᤡᤴ ᤀᤠᤰᤂᤣ ᤁᤧᤈᤥᤃᤢᤀᤠᤱ ᤘᤕᤧ. ᤀᤤ ᤕᤧᤰᤕᤰᤁᤡᤴ ᤏᤢ ᤂᤧᤵᤔᤥᤒᤠ ᤜᤠᤱᤅᤡᤴᤏᤠᤱ ᤜᤧᤰᤁᤣᤀᤣ ᤁᤧᤈᤥᤃᤢ᤹. ᤁᤖ ᤂᤧᤵᤔᤥᤒᤠ ᤕᤠᤱᤛᤠᤁᤢᤴᤎᤣᤜᤠ᤹ ᤏᤢ ᤂᤧᤵᤔᤥᤒᤠ ᤌᤰᤛᤠᤜᤠ᤹ᤖᤰ ᤂᤡᤏᤡ᤹ ᤀᤠᤵᤑᤣᤰ ᤗᤠᤃᤡ ᤋᤣ᤹ᤔᤠ ᤁᤧᤛᤢᤰᤋᤢᤶ᤹॥ ᤂᤧᤴ ᤕᤧᤰᤕᤰᤁᤡᤴ ᤁᤢᤀᤣᤃᤠᤱ ᤗᤧᤵᤔᤠᤱ ᤛᤢᤃᤧᤶᤔᤧ᤹ᤀᤠᤱ ᤕᤢᤅᤧᤶᤔᤧ᤹॥” 3 ᤁᤸᤗᤧᤆᤥᤃᤢᤸᤗᤧ ᤕᤜᤥᤛᤢᤴ ᤁᤧᤖᤧᤰ ᤌᤱ ᤁᤧᤎᤰᤐᤠ ᤔᤏᤠᤜᤠ᤹ᤏᤢ ᤛᤥᤖᤡᤰ ᤀᤤ ᤕᤧᤰᤕᤰᤁᤥ ᤌᤱ ᤆᤥ᤺ᤰᤛᤧ ᤐᤣ᤺ᤰᤔᤠᤖᤧ ᤗᤠᤃᤡ ᤐᤥᤃᤧ॥ ᤕᤜᤥᤛᤢ᤺ᤸᤗᤧ ᤛᤢᤶᤒᤥᤱ ᤜᤧᤴᤇᤡᤱ ᤏᤢᤖᤡᤰ ᤌᤱ ᤁᤧᤎᤰᤐᤠ ᤔᤏᤠᤜᤠ᤹ ᤛᤣᤃᤢᤛᤡᤀᤠᤱ ᤛᤧᤴᤍᤡᤰᤛᤠ ᤑᤥ᤺ᤰᤂᤢᤛᤡ॥ 4 ᤂᤢᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ. “ᤀᤥᤔᤧᤳᤋᤧᤶᤔᤧ᤹. ᤂᤡᤏᤡ᤹ ᤁᤴ ᤕᤧᤰᤕᤰᤁᤡᤸᤗᤧ ᤁᤢᤀᤣᤃᤠᤱ ᤗᤧᤵᤔᤠᤱ ᤛᤢᤃᤧᤶᤔᤧ᤹ᤀᤠᤱ ᤕᤢᤅᤧᤶᤔᤧ᤹॥ ᤕᤧᤰᤕᤰᤗᤠᤶ ᤔᤠ᤺ᤱᤄᤠ ᤔᤧᤒᤣᤃᤧᤶᤔᤡᤴᤏᤧ᤹. ᤜᤧᤰᤁᤩᤠᤱ ᤆᤠ᤺ᤳᤆᤠ᤺ᤳ ᤗ᤹ᤖᤧᤶᤔᤧ᤹॥ 5 ᤀᤠᤱᤃᤠ᤹ᤏᤢ ᤛᤥᤖᤡᤰ ᤁᤧᤘᤠ᤹ᤒᤠ ᤔᤏᤠᤜᤠ᤹ᤏᤢ ᤀᤠᤱᤃᤠ᤹ ᤕᤧᤰᤕᤰ ᤗᤧᤵᤔᤠᤱ ᤋᤃᤡ ᤐᤣ᤺ᤰᤁᤠᤖᤥ. ᤜᤧᤰᤁᤩᤠᤱ ᤀᤠᤸᤗ ᤀᤤᤒᤠ ᤔᤏᤠᤜᤠ᤹ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤔᤧᤓᤧᤴ. ᤂᤧᤒᤩᤠᤱ ᤋᤃᤡ ᤜᤧᤰᤁᤣᤀᤣ ᤂᤧᤱᤜᤠ᤹ᤖᤧ ᤀᤠᤏᤡ᤹ ᤀᤠᤶᤏᤠ᤺ᤳᤋᤧᤸᤗᤧ ᤀᤠᤄᤧᤳᤇᤡᤱ᤹॥ 6 ᤂᤧᤱᤜᤠ᤹ᤖᤧ ᤀᤠᤏᤡ᤹ ᤀᤠᤶᤏᤠᤳ ᤜᤧᤰᤁᤩᤠᤱ ᤀᤠᤏᤡ᤹ ᤂᤧᤱᤜᤠ᤹ ᤕᤧᤰᤕᤰᤗᤠᤶ ᤔᤠᤱᤓᤠ ᤔᤠ᤺ᤱᤄᤠ ᤀᤠᤗ᤺ᤳᤋᤢᤶ ᤀᤠᤓᤧᤳᤋᤢᤶᤛᤡᤶ᤹. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. ‘ᤋᤃᤡᤒᤠ ᤜᤧᤰᤁᤣᤀᤣ ᤀᤡᤛᤪᤠᤀᤡᤗᤡᤜᤠ᤹ ᤀᤠᤏᤡ᤹ ᤋᤃᤠᤱᤗᤠᤶ ᤔᤧᤄᤧᤳᤇᤡᤱᤗ ᤔᤧᤒᤳ॥’ ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤂᤢᤴᤇᤡ᤹ ᤋᤃᤠᤱᤗᤠᤶ ᤀᤠᤄᤧᤳᤇᤡᤱ᤹. 7 ᤂᤧᤒᤩᤠᤱ ᤂᤡᤏᤡ᤹ ᤁᤧᤛᤢᤃᤢᤶᤛᤡᤶᤔᤠᤱ ᤁᤧᤕᤢᤱᤅᤡᤒᤠ ᤋᤧᤴᤏᤥᤗᤠᤶ ᤐᤥᤃᤧᤶᤔᤧ᤹ᤀᤠᤱ ᤂᤧᤴ ᤕᤧᤰᤕᤰᤁᤡᤴ ᤜᤢᤰᤁᤠᤵ ᤆᤥᤃᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤜᤢᤰᤁᤥ ᤂᤧᤴ ᤜᤢᤰᤁᤧᤛᤢ᤺ᤵᤋᤡ᤹॥ 8 ᤕᤧᤰᤕᤰᤁᤡᤴ ᤜᤢᤰᤁᤠᤵ ᤁᤧᤈᤥᤃᤢᤶᤔᤡᤸᤗᤧ ᤂᤡᤏᤡ᤹ ᤂᤧᤵᤔᤥ ᤔᤡ ᤕᤠᤰᤋᤧᤶᤔᤧ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰ ᤀᤡᤛᤡ᤺ᤰ ᤂᤡᤏᤡ᤹ ᤆᤥᤃᤧᤶᤔᤧ᤹॥ ᤀᤥᤔᤧᤳᤋᤧᤶᤔᤧ᤹. ᤀᤠᤱᤃᤠ᤹ ᤂᤡᤏᤡ᤹ ᤁᤴ ᤀᤡᤱᤈᤠᤱᤜᤠ᤹ ᤐᤡᤏᤡᤱᤅᤠᤱ ᤘᤠ᤹॥” 9 ᤁᤶᤓᤗ᤹ᤖᤡᤰ ᤕᤜᤥᤛᤢ᤺ᤸᤗᤧ ᤂᤧᤱᤜᤠ᤹ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤀᤠᤱ ᤀᤤ ᤕᤧᤰᤕᤰ ᤏᤠᤶᤎᤠ ᤗᤧᤵᤔᤠᤱ ᤒᤣᤌᤣᤗ ᤏᤢ ᤀᤤ ᤕᤧᤰᤕᤰᤁᤡᤸᤗᤧ ᤁᤢᤗᤢᤶᤔᤥ ᤔᤧᤛᤢᤃᤢᤛᤡᤀᤠᤱ ᤔᤧᤕᤢᤅᤧ॥ ᤁᤖ ᤕᤜᤥᤛᤢᤴ ᤂᤧᤴ ᤛᤧᤴᤍᤡᤰ ᤛᤠ᤺ᤱᤃᤠᤜᤡᤶᤔᤥᤀᤣ ᤕᤢᤅᤧ॥ 10 ᤕᤜᤥᤛᤢᤴ ᤀᤠᤴᤍᤣᤴ ᤋᤠᤏᤠᤶᤛᤠ ᤐᤥᤃᤧ. ᤜᤧᤰᤁᤩᤠᤱ ᤌᤰᤛᤢᤒᤠᤜᤠ᤹ ᤑᤢᤰᤂᤢᤛᤡᤀᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤋᤃᤡ ᤀᤤ ᤕᤧᤰᤕᤰ ᤗᤧᤵᤔᤠᤱ ᤔᤧᤒᤣ॥ 11 ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤌᤱ ᤁᤧᤎᤰᤐᤠᤜᤠ᤹ ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱ ᤏᤡ᤺ᤳᤋᤠᤱ ᤔᤧᤍᤩᤧ. ᤂᤧᤒᤩᤠᤱ ᤀᤤ ᤕᤧᤰᤕᤰ ᤌᤥᤜᤠᤱ ᤗᤧᤵᤔᤠᤱ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢ॥ ᤂᤧᤱᤜᤠ᤹ ᤏᤢ ᤀᤤ ᤕᤧᤰᤕᤰᤁᤡᤸᤗᤧ ᤁᤢᤗᤢᤶᤔᤥ ᤗᤳᤇᤠ ᤏᤧᤏᤧᤒᤠᤍᤧᤴ ᤏᤧᤛ᤻ᤛᤧ॥ 12 ᤕᤜᤥᤛᤢ᤺ᤸᤗᤧ ᤜᤧᤴᤇᤡᤱ ᤅᤠᤛᤡ ᤕᤠᤖᤡᤰ ᤔᤏᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤕᤧᤰᤕᤰ ᤏᤠᤶᤎᤠ ᤗᤧᤵᤔᤠᤱ. ᤒᤣᤌᤣᤗ ᤏᤢ ᤀᤤ ᤕᤧᤰᤕᤰ ᤗᤢᤶᤔᤥ ᤔᤏᤠᤜᤠ᤹ ᤛᤢᤰᤔᤠ ᤐᤠᤱᤄᤢᤛᤡ॥ 13 ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤕᤶᤒᤠ ᤛᤠ᤺ᤱᤃᤠᤜᤡᤶᤔᤥ ᤕᤠᤖᤡᤵ ᤔᤧᤈᤥᤃᤢᤛᤡᤒᤠ ᤌᤰᤛᤢᤒᤠ ᤌᤠᤱᤃᤧᤳ ᤗᤧᤵᤔᤠᤱ ᤔᤧᤕᤢᤰᤂᤢᤛᤡ ᤜᤧᤰᤁᤩᤠᤱ ᤘᤣ᤹ ᤌᤰᤛᤢᤒᤠᤜᤠ᤹ ᤕᤧᤰᤕᤰᤗᤠᤶ ᤏᤠᤶᤎᤠ ᤗᤧᤵᤔᤠᤱ ᤕᤢᤱᤔᤠ ᤔᤧᤒᤠᤱᤄᤢᤛᤡ॥ ᤕᤜᤥᤛᤢᤴ ᤆᤤᤲ ᤏᤧᤏᤧᤒᤠᤍᤧᤴᤏᤥᤀᤣ ᤏᤠᤶᤍᤠ᤺ᤳᤋᤠᤳ ᤕᤢᤅᤧ॥ 14 ᤀᤠᤸᤗ ᤀᤤ ᤕᤧᤰᤕᤰᤁᤥᤒᤠ ᤜᤠᤱᤅᤡᤸᤗᤧ ᤁᤴ ᤏᤡᤛᤢ ᤂᤧᤒᤩᤠᤱ ᤂᤢᤏᤧ᤹ ᤏᤢ ᤕᤧᤰᤕᤰᤁᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤀᤠᤴᤍᤣᤴ ᤋᤠᤏᤠᤶᤛᤠ ᤔᤧᤒᤥᤃᤧᤀᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤏᤡ᤺ᤴᤎᤥ ᤁᤧᤒᤥᤱᤒᤠᤍᤧᤴᤏᤥ ᤀᤖᤠᤒᤠ ᤋᤃᤡ ᤗᤧᤵᤔᤠᤱ ᤜᤠᤖᤠᤜᤠᤖᤠ ᤔᤧᤗ᤺ᤴᤍᤧ॥ ᤁᤖ ᤕᤧᤰᤕᤰ ᤀᤣᤃᤠᤱ ᤗᤧᤵᤔᤠᤱ ᤀᤠᤵᤑᤣᤰ ᤋᤰᤗᤧᤱᤘᤠᤀᤥ ᤀᤠᤶᤛᤢᤰᤁᤠᤱ ᤔᤧᤕᤢᤱ ᤑᤠ᤹ᤀᤠᤱ ᤂᤧᤸᤗᤧ ᤏᤡᤱᤘᤠ᤹ ᤔᤧᤄᤥᤛᤢᤴ᤹॥ 15 ᤂᤧᤒᤩᤠᤱ ᤕᤜᤥᤛᤢᤴ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤜᤠᤖᤡᤃᤧᤍᤠᤒᤠ ᤔᤧᤗᤧᤱᤛᤡᤱᤅᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤗᤧᤵᤔᤠᤱ ᤔᤧᤄᤧᤳᤇᤡᤱ॥ 16 ᤂᤧᤱᤜᤠ᤹ ᤏᤠ᤺ᤵᤔᤠᤛᤡᤖᤣ ᤗᤠᤃᤡ ᤂᤧᤴ ᤕᤧᤰᤕᤰᤁᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤧᤀᤢ᤺ᤳᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤜᤥᤛᤢᤴ ᤀᤣᤃᤠᤱ ᤀᤣᤃᤠᤱ ᤔᤧᤏᤠ᤺ᤳᤋᤢᤖ ᤔᤧᤒᤣ. ᤂᤶᤓᤩᤠᤱ ᤕᤧᤰᤕᤰᤗᤠᤶ ᤕᤖᤡᤰ ᤔᤠ᤺ᤱᤄᤠ ᤔᤧᤗ᤺ᤴᤍᤧ ᤔᤧᤓᤧᤖᤧ॥ 17 ᤀᤡᤛᤪᤠᤀᤡᤗᤡᤜᤠ᤹ ᤔᤧᤴᤏᤠ᤺ᤵᤔᤏᤠᤒᤠ ᤔᤏᤠ ᤀᤤ ᤕᤧᤰᤕᤰ ᤏᤢ ᤒᤣᤌᤣᤗᤀᤥ ᤗᤳᤇᤠ ᤔᤏᤠᤀᤠᤱ ᤜᤥ᤺ᤵᤋᤧ॥ ᤂᤧᤱᤜᤠ᤹ᤖᤧ ᤕᤧᤰᤕᤰᤁᤡᤴ ᤆᤡᤈᤡ ᤂᤰᤂᤰ ᤔᤧᤏᤧᤛ᤻ᤛᤢᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤔᤧᤏᤠ᤺ᤳᤋᤢᤛᤡ॥ 18 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤛᤢᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤜᤢᤰᤁᤥ ᤁᤧᤃᤳᤋᤢᤒᤠ ᤗᤠ᤺ᤰᤁᤡᤴ ᤀᤤ ᤗᤧᤵᤔᤠᤱ ᤛᤴᤇᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤴ ᤂᤧᤏᤧ᤹ ᤁᤧᤜᤢᤰᤁᤥ ᤐᤡᤏᤧ॥” ᤂᤶᤓᤩᤠᤱ ᤕᤜᤥᤛᤢ᤺ᤸᤗᤧ ᤁᤢᤜᤢᤰᤁᤥ ᤁᤳᤋᤢᤒᤠ ᤗᤠ᤺ᤰᤁᤡᤴ ᤕᤧᤰᤕᤰ ᤗᤧᤵᤔᤠᤱ ᤛᤴᤇᤢ॥ 19 ᤂᤢᤏᤧ᤹ ᤁᤢᤜᤢᤰᤁᤡᤴ ᤛᤴᤇᤢᤏᤢᤔᤧ᤺ᤴᤏᤣ ᤁᤧᤛᤢᤰᤐᤠᤀᤠᤱ ᤁᤧᤕᤢᤱᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤔᤧᤕᤢᤅᤧᤒᤠ ᤀᤠᤵᤑᤣᤰ ᤀᤠᤵᤑᤣᤰ ᤋᤧᤴᤜᤠ᤹ᤀᤥᤗᤠᤶ ᤔᤢᤳᤌᤪᤡᤰ ᤔᤧᤒᤥᤃᤧ. ᤜᤧᤰᤁᤩᤠᤱ ᤕᤧᤰᤕᤰᤁᤥ ᤁᤢᤍᤢᤱᤍᤢᤱ ᤔᤧᤗᤥ᤺ᤰᤋᤧ ᤔᤧᤗᤠᤛᤧᤀᤠᤱ ᤂᤧᤴ ᤜᤢᤰᤁᤠᤵ ᤔᤧᤈᤥᤃᤢ. ᤂᤧᤒᤩᤠᤱ ᤂᤡᤔᤥ ᤂᤧᤵᤔᤥ ᤔᤡ ᤔᤧᤕᤠᤰᤋᤢ॥ 20 ᤀᤠᤸᤗ ᤀᤤᤒᤠ ᤔᤏᤠᤜᤠ᤹ ᤀᤣᤃᤠᤱ ᤔᤧᤜᤡᤛᤡᤱᤅᤠᤱ ᤀᤥᤔᤧᤔᤕᤧᤸᤗᤧ ᤕᤧᤰᤕᤰᤁᤥᤒᤠ ᤔᤡ᤺ᤰᤂᤢᤴ ᤋᤠᤱᤛᤠᤱᤒᤥ ᤐᤥᤃᤧᤀᤠᤱ ᤐᤳᤇᤧᤒᤠ ᤔᤧᤏᤡᤛᤢ. ᤁᤖ ᤂᤢᤴᤇᤡ᤹ ᤗᤠᤃᤡ ᤁᤳᤏᤠ ᤁᤳᤌᤥ ᤂᤧᤳᤇᤡᤱᤔᤠ ᤕᤧᤶᤔᤠᤱ ᤔᤧᤱᤄᤥᤛᤢᤴ. ᤌᤣᤀᤠᤱᤓᤧᤸᤗᤧ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤁᤧᤄᤧᤳᤇᤡᤱᤒᤠ ᤁᤧᤗᤧᤱᤛᤡᤱᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤏᤠ᤺ᤵᤐᤠ ᤀᤤᤒᤠ ᤔᤏᤠᤜᤠ᤹ ᤗᤧᤵᤔᤠᤱ ᤔᤧᤜᤡᤛᤡᤱᤅᤠᤱ ᤑᤵᤔᤠ ᤔᤧᤜᤣ᤺ᤰᤋᤢᤛᤡ॥ 21 ᤌᤣᤀᤠᤱᤓᤧᤸᤗᤧ ᤂᤧᤴ ᤁᤧᤛᤢᤰᤐᤠᤀᤠᤱ ᤁᤧᤕᤢᤱᤒᤠᤜᤠ᤹ᤖᤧ ᤕᤧᤰᤕᤰᤁᤡᤴ ᤜᤢᤰᤁᤠᤵ ᤔᤧᤈᤥᤃᤢᤒᤠ ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤔᤡ᤺ᤰᤂᤢᤴ ᤌᤠ᤺ᤱ ᤐᤥᤃᤧᤀᤠᤱ ᤐᤳᤇᤧᤒᤠ ᤕᤜᤥᤛᤢᤴ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤏᤡᤛᤢ. ᤂᤧᤒᤩᤠᤱ ᤂᤧᤱᤜᤠ᤹ ᤔᤧᤏᤢ᤺ᤰᤂᤧᤀᤠᤱ ᤀᤤᤒᤠ ᤔᤏᤠᤜᤠ᤹ ᤔᤧᤓᤳᤋᤢᤛᤡ॥ 22 ᤕᤧᤰᤕᤰᤁᤥ ᤁᤧᤃᤧᤵᤐᤠ ᤀᤡᤛᤪᤠᤀᤡᤗᤡᤜᤠ᤹ᤀᤠᤱ ᤀᤤᤒᤠ ᤔᤏᤠᤜᤠ᤹ ᤑᤵᤔᤠᤛᤡᤖᤧ ᤗᤠᤃᤡ ᤕᤧᤰᤕᤰᤗᤠᤶ ᤔᤧᤗ᤺ᤴᤍᤧ ᤔᤧᤓᤧᤖᤧ॥ ᤁᤶᤓᤗ᤹ᤖᤡᤰ ᤁᤢᤓᤠ ᤁᤳᤏᤠᤜᤠᤱ ᤗᤧᤵᤔᤠᤱᤗᤠᤶ ᤏᤢ ᤁᤢᤓᤠ ᤏᤠᤜᤠᤱ ᤗᤧᤵᤔᤠᤱᤗᤠᤶ ᤔᤧᤒᤥ᤺ᤰᤂᤧᤀᤠᤱ ᤀᤤᤒᤠ ᤔᤏᤠᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤔᤧᤈᤢᤰᤋᤧ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤱᤜᤠ᤹ ᤗᤳᤇᤠᤀᤠᤱ ᤐᤡᤶᤔᤠ ᤏᤢ ᤜᤡᤱᤔᤠ ᤔᤧᤱᤄᤥᤀᤣ ᤔᤧᤛᤧᤖᤢᤛᤡ॥ 23 ᤁᤖ ᤀᤤᤒᤠ ᤜᤠᤱᤅᤡᤴ ᤂᤧᤱᤜᤠ᤹ᤖᤧ ᤁᤢᤜᤡᤱᤘᤧᤳᤋᤣ ᤔᤧᤍᤧᤶᤛᤢᤀᤠᤱ ᤕᤜᤥᤛᤢᤀᤥ ᤔᤧᤓᤧᤳᤋᤢ॥ 24 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤤᤒᤠ ᤁᤧᤖᤧᤰ ᤕᤰᤕᤢᤱᤒᤠᤜᤠ᤹ ᤂᤢᤴᤇᤡ᤹ ᤔᤧᤏᤠ᤺ᤳᤋᤢᤛᤡᤒᤠ ᤏᤧᤏᤧᤒᤠᤍᤧᤴᤏᤥ ᤏᤢ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤔᤧᤔᤧᤰᤂᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤋᤠᤓᤣ᤺ᤸᤗᤧ ᤕᤢᤔᤪᤧᤰ ᤔᤧᤔᤧᤰᤂᤢᤛᤡ॥ ᤂᤧᤒᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤀᤤ ᤕᤧᤰᤕᤰᤁᤥ ᤔᤧᤏᤢ᤺ᤰᤂᤧ ᤔᤧᤒᤣᤀᤠᤱ ᤂᤧᤵᤔᤥ ᤁᤧᤘᤠ᤹ᤒᤠᤜᤠ᤹ᤀᤠᤱ ᤔᤧᤛᤧᤖᤢᤛᤡ॥ 25 ᤂᤧᤸᤗᤧ ᤕᤠ᤺ᤴᤍᤡᤰ ᤔᤧᤛᤧᤖᤢᤛᤡᤒᤠ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠ ᤁᤧᤖᤧᤰᤗᤧ ᤌᤡᤒᤥᤱᤅᤠᤱ ᤏᤧᤳᤇᤡ ᤜᤧᤴᤇᤡᤱ ᤔᤧᤘᤕᤧ. ᤀᤤ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ ᤁᤧᤖᤧᤰᤗᤧ ᤂᤧᤶᤔᤩᤠᤰᤗᤰ ᤔᤧᤘᤕᤧ॥ 26 ᤌᤣᤀᤠᤱᤓᤧᤸᤗᤧ ᤕᤜᤥᤛᤢ᤺ᤸᤗᤧ ᤀᤤᤒᤠ ᤁᤧᤖᤧᤰ ᤕᤰᤕᤢᤱᤒᤠᤜᤠ᤹ ᤕᤢᤔᤪᤧᤰ ᤔᤧᤶᤔᤧᤱᤛᤡᤱᤅᤣ ᤌᤠᤖᤡᤰ ᤂᤢᤏᤧ᤹ ᤗᤠ᤺ᤰᤁᤡᤴ ᤋᤧᤶᤛᤢᤀᤠᤱ ᤛᤴᤇᤢᤒᤠ ᤁᤢᤜᤢᤰᤁᤡᤴ ᤔᤧᤏᤠ᤺ᤵᤛᤢᤴ॥ 27 ᤁᤖ ᤌᤰᤛᤠᤜᤠ᤹ ᤏᤢ ᤕᤧᤰᤕᤰᤁᤥᤒᤠ ᤕᤠᤱᤛᤠᤁᤢᤴᤎᤣᤜᤠ᤹ᤖᤰ. ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤛᤢᤴ ᤀᤡᤱᤈᤠᤱ ᤐᤡᤖᤢᤒᤠ ᤜᤧᤰᤁᤣ. ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤍᤣ᤹ᤖᤢ॥ 28 ᤁᤶᤓᤗ᤹ᤖᤡᤰ ᤕᤜᤥᤛᤢ᤺ᤸᤗᤧ ᤀᤤ ᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤔᤡᤎᤡᤰᤂᤢᤀᤠᤱ ᤁᤧᤗᤢᤶᤛᤡᤱᤒᤠᤀᤠᤱ ᤁᤧᤏᤧᤒᤠ ᤆᤥᤃᤢ. ᤂᤧᤴ ᤜᤠᤒᤠ ᤀᤠᤀᤡᤴ ᤌᤠᤖᤡᤰᤁᤠᤱ ᤏᤧᤖᤥ॥ 29 ᤜᤧᤰᤁᤩᤠᤱ ᤂᤢᤏᤧ᤹ ᤀᤤᤒᤠ ᤜᤠᤱᤅᤡᤴ ᤕᤢ᤺ᤴᤇᤡᤰ ᤌᤠᤖᤡᤰ ᤗᤳᤇᤠ ᤛᤡᤱᤒᤢᤱᤅᤥ ᤑᤥ᤺ᤴᤍᤢ ᤑᤳᤇᤢ ᤂᤶᤓᤩᤠᤱ ᤏᤠᤶᤎᤩᤧ᤺ᤸᤗᤧ ᤕᤜᤥᤛᤢ᤺ᤸᤗᤧ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤂᤧᤸᤗᤧ ᤁᤢᤈᤣᤴ ᤛᤡᤱᤒᤢᤱᤅᤥᤗᤠᤶ ᤕᤥ ᤔᤧᤎᤠᤛᤢᤀᤠᤱ ᤕᤧᤰᤕᤰᤁᤥ ᤗᤠ᤺ᤵᤔᤠ ᤗᤠᤶᤎᤣ᤺ᤳᤋᤥ ᤗᤠᤵᤔᤧᤍᤣᤛᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤶᤎᤠᤱ ᤕᤖᤡᤰ ᤗᤢᤱᤜᤠ᤹ ᤔᤧᤗᤢᤵᤛᤢ. ᤂᤧᤴ ᤀᤠᤸᤗᤥ ᤌᤠᤖᤡᤰᤛᤠᤱ ᤏᤧᤖᤥ॥ ᤀᤣᤒᤠᤗ ᤁᤥ᤺ᤰᤔᤠᤀᤥ ᤛᤠᤶᤕᤥ ᤛᤠᤰᤌᤡᤶᤜᤠ᤹ ᤔᤧᤏᤡᤖᤢ 30 ᤂᤧᤒᤩᤠᤱ ᤕᤜᤥᤛᤢ᤺ᤸᤗᤧ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤀᤣᤒᤠᤗ ᤁᤥ᤺ᤰᤔᤠᤀᤥ 31 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤁᤢᤀᤡᤛᤡᤰ ᤔᤥᤛᤠ᤺ᤸᤗᤧ ᤐᤡᤖᤢᤛᤡᤒᤠ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤵᤐᤠ ᤜᤧᤰᤁᤣ. ᤔᤧᤱᤄᤰᤁᤣᤒᤠ ᤀᤡᤃᤪ ᤑᤧᤴᤈᤣᤸᤗᤧ ᤔᤧᤴᤇᤢᤀᤣᤒᤠ ᤗᤢᤱᤜᤠ᤹ᤗᤠᤶ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤆᤥᤃᤢ. ᤜᤧᤰᤁᤩᤠᤱ ᤂᤧᤵᤔᤥ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤎᤡᤱᤔᤏᤠᤍᤣ᤺ᤶᤏᤠᤒᤠ ᤛᤡᤍᤢᤱᤈᤓᤠ ᤔᤧᤍᤥᤴᤍᤢ. ᤂᤧᤒᤩᤠᤱ ᤋᤱᤈᤢᤶ ᤛᤡᤍᤢᤱᤈᤓᤠᤀᤠᤱ ᤔᤧᤍᤥᤴᤍᤢ॥ 32 ᤂᤧᤵᤔᤥ ᤕᤜᤥᤛᤢ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤔᤥᤛᤠ᤺ᤸᤗᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤗᤢᤱᤜᤠ᤹ᤀᤥ ᤗᤡᤱᤄᤢ॥ 33 ᤀᤡᤛᤪᤠᤀᤡᤗᤡᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤔᤠᤛᤡ ᤐᤥᤱ᤹ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤋᤃᤡᤀᤣ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤁᤢᤀᤡᤛᤡᤰ. ᤘᤣ᤹ ᤗᤠᤈᤣ᤹ᤒᤠ. ᤀᤠᤵᤑᤣᤰ ᤗᤠᤈᤣ᤹ᤒᤠ. ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤕᤥᤛᤡᤰᤛᤠᤶᤒᤠᤜᤠ᤹. ᤕᤢᤰᤛᤠᤒᤠᤜᤠ᤹. ᤂᤠᤛᤧᤴᤗᤥ᤺ᤶᤒᤠᤜᤠ᤹ ᤂᤧᤱᤜᤠ᤹ᤏᤢ ᤛᤥᤛᤥᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰ ᤁᤧᤒᤱᤒᤠ ᤗᤧᤒᤡ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤛᤴᤍᤥᤰ ᤏᤠᤜᤠᤱ ᤁᤳᤏᤠᤜᤠᤱ ᤁᤢᤓᤪᤧ᤺ᤱ ᤀᤣᤒᤠᤗ ᤁᤥ᤺ᤰᤔᤠ ᤋᤃᤡ ᤏᤢ ᤘᤣ᤹ ᤁᤢᤓᤪᤧ᤺ᤱ ᤃᤡᤖᤡᤈ᤻ᤈᤡᤔ ᤁᤥ᤺ᤰᤔᤠ ᤋᤃᤡ ᤔᤧᤕᤧᤶᤛᤡᤱ॥ 34 ᤂᤧᤴ ᤀᤣᤃᤠᤱ ᤔᤢ᤹ᤀᤡᤛᤠᤶ ᤏᤢ ᤔᤠᤱᤍᤣ ᤛᤠᤱᤃᤪᤠᤖᤧ ᤁᤢᤕᤠ᤺ᤶᤒᤣᤀᤥ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ. ᤁᤧᤖᤧᤰ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤐᤠ᤺ᤴᤈᤠ᤺ᤰᤜᤠ᤹ ᤕᤜᤥᤛᤢ᤺ᤸᤗᤧ ᤏᤡᤖᤢ ᤐᤡᤖᤢᤛᤡ॥ 35 ᤔᤥᤛᤠ᤺ᤸᤗᤧ ᤀᤡᤱᤈᤠᤱ ᤆᤥᤃᤢᤀᤠᤱ ᤘᤕᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤜᤥᤛᤢ᤺ᤸᤗᤧ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹. ᤔᤧᤴᤇᤢᤔᤠᤜᤠ᤹. ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤁᤧᤘᤠ᤹ᤒᤠ ᤘᤣ᤹ ᤗᤠᤈᤣ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤢᤏᤧ᤹ ᤔᤧᤏᤡᤖᤢᤶᤒᤠ ᤐᤠᤴ ᤌᤧᤔᤠᤀᤠᤱ ᤔᤧᤕᤠ᤺ᤰᤋᤧᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.