ᤕᤜᤥᤛᤢ 7 - LIFOTNTᤀᤠᤁᤠᤏᤖᤧ ᤁᤢᤗᤠᤕᤥ 1 ᤁᤖ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤀᤠᤱ ᤕᤜᤘᤣ ᤍᤠᤱᤒᤠᤀᤥ ᤔᤧᤍᤥᤴᤍᤢᤒᤠ ᤐᤠ᤺ᤴᤜᤠ᤹ᤀᤥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢ॥ ᤕᤜᤢᤍᤠ ᤌᤠ᤺ᤰᤁᤥᤒᤠ. ᤈᤣᤖᤜᤖᤧ ᤁᤢᤛ᤻ᤛᤠ ᤈᤒ᤻ᤍᤡᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤁᤠᤷᤔᤡᤖᤧ ᤁᤢᤛ᤻ᤛᤠ ᤀᤠᤁᤠᤏ ᤔᤧᤵᤔᤏᤠᤒᤠ ᤔᤏᤠᤎᤡᤰᤗᤧ ᤁᤴ ᤔᤧᤍᤥᤴᤍᤢᤒᤠ ᤐᤠ᤺ᤴᤜᤠ᤹ ᤁᤢᤓᤠ ᤂᤢ᤺ᤳᤋᤢᤀᤠᤱ ᤘᤕᤧ. ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤴ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧ॥ 2 ᤂᤧᤒᤩᤠᤱ ᤕᤜᤥᤛᤢ᤺ᤸᤗᤧ ᤕᤖᤡᤜᤥᤗᤠᤶ ᤒᤣᤌᤣᤗᤒᤠ ᤏᤠᤱᤃᤧᤴ ᤐᤡᤛᤠᤱ ᤒᤣᤌ-ᤀᤠᤘᤏ ᤏᤡ᤺ᤳᤋᤠᤱᤒᤠ ᤀᤤ ᤕᤧᤰᤕᤰᤁᤥ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤐᤠᤱᤄᤢᤛᤡ. “ᤂᤡᤏᤡ᤹ ᤐᤣᤃᤧᤶᤔᤧ᤹ᤀᤠᤱ ᤂᤧᤴ ᤗᤠᤈᤣᤴ ᤌᤥ᤺ᤵᤛᤧᤶᤔᤧ᤹॥” ᤂᤧᤴ ᤔᤏᤠᤜᤠ᤹ ᤔᤧᤒᤣᤀᤠᤱ ᤀᤤ ᤕᤧᤰᤕᤰᤁᤡᤴ ᤔᤧᤎᤥ᤺ᤵᤛᤢ॥ 3 ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤏᤢ᤺ᤰᤂᤧ ᤔᤧᤓᤧᤖᤧᤀᤠᤱ ᤕᤜᤥᤛᤢᤴ ᤔᤧᤔᤧᤳᤋᤢ. “ᤁᤧᤖᤧᤰ ᤔᤧᤶᤒᤣ᤺ᤰᤔᤠᤛᤠᤱ ᤏᤢ᤹. ᤁᤧᤳᤔᤧᤱᤃᤧᤳ ᤜᤧᤴᤇᤡᤱ ᤏᤧᤳᤇᤡ ᤛᤢᤶᤛᤡ ᤔᤏᤠᤜᤠ᤹ ᤔᤧᤒᤣ᤺ᤰᤁᤠᤱ ᤀᤤ ᤕᤧᤰᤕᤰᤁᤡᤴ ᤔᤧᤓᤳᤋᤢᤖ॥ ᤁᤧᤖᤧᤰ ᤔᤏᤠᤜᤠ᤹ ᤂᤧᤵᤔᤥ ᤐᤣ᤺ᤰᤔᤠᤖᤧ ᤗᤠᤃᤡ ᤋᤢᤰᤂᤣ ᤔᤧᤈᤠ᤺ᤳᤋᤧᤛᤧᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤛᤢ᤺ᤸᤗᤡᤰᤗᤰ ᤔᤏᤠ ᤔᤧᤘᤠ᤹॥” 4 ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤀᤥᤒᤠ ᤜᤧᤴᤇᤡᤱ ᤛᤢᤶᤛᤡ ᤕᤠᤖᤡᤰ ᤔᤏᤠᤜᤠ᤹ ᤔᤧᤒᤣ. ᤁᤖ ᤀᤤ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤏᤠ᤺ᤴᤍᤢᤛᤡᤀᤠᤱ ᤔᤧᤄᤧᤳᤇᤡᤱ॥ 5 ᤀᤤ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ᤖᤧ ᤛᤢᤶᤒᤥᤱᤅᤠᤱ ᤋᤢᤰᤛᤡ ᤕᤠᤖᤡᤰ ᤔᤏᤠᤜᤠ᤹ ᤔᤧᤛᤧᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥᤗᤠᤶ ᤛᤒᤠᤖᤡᤔ ᤌᤠᤖᤡᤰ ᤔᤧᤏᤠ᤺ᤳᤋᤢᤛᤡᤀᤠᤱ ᤛᤱᤔᤠᤱᤒᤠᤍᤧᤴᤏᤥ ᤂᤧᤱᤜᤠ᤹ ᤔᤧᤛᤧᤖᤢᤛᤡ॥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤂᤢᤴᤇᤡ᤹ ᤛᤡᤰᤗᤢᤱᤔᤠ᤹ ᤕᤰᤂᤧ॥ 6 ᤂᤧᤒᤩᤠᤱ ᤕᤜᤥᤛᤢ᤺ᤸᤗᤧ ᤁᤢᤈᤠᤱᤜᤠ᤹ ᤌᤧ᤺ᤰᤂᤢ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤍᤃᤠᤱ ᤕᤢ᤺ᤴᤇᤡᤰ ᤌᤠᤖᤡᤰ ᤂᤠᤶᤒᤠᤱᤅᤥ ᤛᤠᤒᤴ ᤜᤒᤳ ᤑᤴᤇᤡᤱ॥ ᤜᤧᤰᤁᤩᤠᤱ ᤂᤢᤏᤧ᤹ ᤏᤢ ᤀᤡᤛᤪᤠᤀᤡᤗᤒᤠ ᤛᤠᤶᤕᤥᤛᤡᤰᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣᤰᤐᤠᤴ ᤂᤠᤶᤓᤢᤋᤪᤠ᤺ᤸᤗᤧ ᤔᤧᤈᤢ᤺ᤳᤋᤢᤀᤠᤱ ᤀᤠᤶᤓᤠ ᤔᤧᤕᤢᤅᤧ ᤔᤧᤃᤖᤧ॥ 7 ᤜᤧᤰᤁᤩᤠᤱ ᤕᤜᤥᤛᤢ᤺ᤸᤗᤧ ᤐᤠ᤺ᤳᤋᤢ. “ᤏᤠ᤹ᤖᤠᤱᤛᤩᤠᤱᤗᤥ᥄ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤁᤴ ᤔᤏᤠᤜᤠ᤹ ᤕᤷᤍᤏ ᤁᤳᤏᤠᤜᤠᤱᤍᤠᤱ ᤁᤧᤓᤧᤳᤋᤢᤛᤡ ᤜᤧᤰᤁᤩᤠᤱ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤁᤧᤎᤠᤛᤢᤛᤡᤀᤠᤱ ᤀᤠᤏᤡᤃᤣ ᤔᤧᤱᤔᤠᤖᤧ ᤗᤠᤃᤡ ᤌᤣᤀᤠᤱ ᤕᤠᤵᤔᤡ ᤁᤧᤓᤧᤳᤋᤧᤒᤠᤒᤣ᥅ ᤂᤧᤴᤏᤢ᤺ᤸᤗᤧᤃ ᤀᤠᤏᤡᤃᤣ ᤏᤡᤱᤘᤠ᤹ ᤋᤠᤛᤢᤶᤒᤧᤀᤠᤱ ᤕᤷᤍᤏ ᤏᤠᤎᤠ᤺ᤶᤒᤡᤀᤣ ᤘᤕᤡᤃᤧᤔᤧᤴ॥ 8 ᤕᤜᤘᤣ ᤍᤠᤱᤒᤠᤀᤣ. ᤀᤡᤛᤪᤠᤀᤡᤗᤡᤜᤠ᤹ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤗᤠᤶ ᤜᤠᤖᤡᤔᤧᤍᤩᤧᤀᤠᤱ ᤔᤧᤏᤢ᤺ᤰᤂᤧ ᤔᤧᤓᤧᤖᤧ ᤀᤠᤸᤗ ᤀᤠᤱᤃᤠ᤹ ᤌᤧᤔᤠ ᤐᤠ᤺ᤳᤋᤢᤱᤒᤣ᥄ 9 ᤌᤣᤀᤠᤱᤓᤧᤸᤗᤧ ᤁᤏᤠᤏᤡᤜᤠ᤹ ᤏᤢ ᤗᤠᤈᤣ᤹ᤒᤠ ᤁᤧᤖᤧᤰ ᤕᤰᤕᤢᤱᤒᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤀᤠᤏᤡᤃᤣ ᤁᤡᤷᤃᤵ ᤔᤧᤃᤒᤡᤃᤧ᤹. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤀᤠᤏᤡᤃᤣ ᤔᤡᤱ ᤔᤧᤔᤠᤛᤢ᤹ᤖᤥ॥ ᤂᤧᤴ ᤀᤣᤃᤠᤱ ᤂᤧᤏᤧ᤹ ᤐᤕᤶ ᤕᤶᤒᤠ ᤁᤧᤔᤡᤱᤅᤡᤸᤗᤧ ᤗᤠᤃᤡ ᤂᤧᤏᤧ᤹ ᤌᤣ ᤁᤧᤈᤥᤃᤢᤒᤣ᥅” 10 ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤛᤢᤴ ᤔᤧᤳᤋᤢ. “ᤐᤥᤃᤧ᤹᥄ ᤂᤧᤏᤧ᤹ ᤌᤣᤀᤠᤱ ᤁᤶᤓᤗ᤹ᤖᤡᤰ ᤛᤠᤶᤒᤥᤴ ᤜᤒᤳ ᤁᤧᤒᤵᤐᤠᤒᤣ᥅ 11 ᤀᤡᤛᤪᤠᤀᤡᤗᤖᤧ ᤗᤠᤕᤥ ᤆᤥᤃᤢᤀᤠᤱ ᤘᤠ᤹॥ ᤀᤠᤱᤃᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤱᤛᤡᤱᤒᤠ ᤔᤠᤱᤜᤢᤵᤐᤡᤴ ᤂᤧᤱᤜᤠ᤹ᤖᤧ ᤔᤧᤓᤣ᤺ᤴᤍᤢᤀᤠᤱ ᤘᤠ᤹॥ ᤔᤧᤱᤔᤠᤖᤧ ᤗᤠᤃᤡ ᤋᤥ᤺ᤶᤔᤏᤠᤒᤠ ᤁᤢᤓᤠ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤔᤧᤍᤣ᤹ᤖᤢᤀᤠᤱ ᤘᤠ᤹॥ ᤂᤧᤱᤜᤠ᤹ᤖᤧ ᤔᤧᤄᤢ᤺ᤳᤋᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤀᤡᤱᤗᤧᤰᤐᤠ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤂᤧᤱᤜᤠ᤹ᤖᤧ ᤂᤧᤴ ᤛᤠᤔᤠᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤆᤡᤃᤰᤘᤠᤜᤠ᤹ᤏᤢ ᤔᤧᤈᤡᤰᤂᤢᤀᤠᤱ ᤘᤠ᤹॥ 12 ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤀᤠᤸᤗ ᤕᤧᤵᤔᤠ ᤔᤧᤴᤇᤢᤰᤏᤧᤴ॥ ᤂᤧᤱᤜᤠ᤹ ᤔᤠᤱᤍᤣ ᤛᤠᤱᤃᤪᤠᤖᤧ ᤋᤧᤳᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤏᤡᤱᤔᤡᤜᤠ᤹ ᤋᤃᤡ ᤂᤢᤴᤇᤡ᤹ ᤀᤣ᤺ᤰᤌᤠ᤺ᤰᤔᤧᤴ ᤔᤧᤜᤡᤛᤢ॥ ᤂᤡᤏᤡ᤹ ᤀᤠᤵᤑᤣᤰ ᤗᤢᤶᤔᤥᤗᤠᤶ ᤂᤧᤴ ᤔᤧᤱᤔᤠᤖᤧ ᤗᤠᤃᤡ ᤔᤧᤛᤧᤴᤍᤢᤒᤠ ᤆᤡᤃᤰᤘᤠᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤴᤈᤥ᤺ᤰᤁᤣ ᤌᤠᤖᤡᤰ ᤀᤠᤸᤗᤀᤠᤱᤎᤥ ᤀᤠᤱᤃᤠ᤹ ᤂᤡᤏᤡ᤹ᤏᤢ ᤔᤧᤘᤠ᤹ᤀᤠᤴ॥ 13 “ᤐᤥᤃᤧ᤹᥄ ᤔᤏᤠᤜᤠ᤹ ᤛᤣᤛᤣᤛᤠᤱᤛᤠᤱ ᤆᤥᤃᤧᤛᤧ᤹॥ ᤂᤧᤱᤜᤠ᤹ ᤋᤠ᤺ᤴᤍᤡᤰᤗᤧ ᤗᤠᤃᤡ ᤀᤠᤒᤠᤅᤣ ᤛᤢᤳᤌᤥ ᤔᤧᤈᤥᤰᤛᤡᤱᤗᤥ ᤑᤠ᤹ᤀᤠᤱ ᤔᤧᤳᤋᤧᤛᤧ᤹. ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗᤒᤠ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ᤹—‘ᤀᤡᤛᤪᤠᤀᤡᤗᤡᤛᤣ. ᤂᤡᤏᤡ᤹ ᤗᤢᤶᤔᤥ ᤁᤢᤓᤠ ᤋᤥ᤺ᤶᤔᤏᤠᤒᤠ ᤛᤠᤔᤠᤜᤠ᤹ ᤘᤠ᤹॥ ᤂᤡᤏᤡ᤹ ᤗᤢᤶᤔᤥᤗᤠᤶ ᤂᤧᤴ ᤋᤥ᤺ᤶᤏᤠᤒᤠ ᤛᤠᤔᤠᤜᤠ᤹ ᤗᤠᤵᤔᤧᤴᤍᤣᤀᤣ ᤌᤠᤖᤡᤰ ᤂᤡᤏᤡ᤹ ᤏᤡᤱᤔᤡᤜᤠ᤹ ᤏᤠ᤺ᤶᤔᤠ ᤁᤧᤴᤇᤢᤰᤋᤢᤶᤛᤡᤶᤔᤡᤴ॥ 14 “‘ᤁᤸᤗᤧᤆᤥᤃᤢᤸᤗᤧ ᤋᤠᤏᤠᤶ ᤂᤡᤏᤡ᤹ ᤀᤠᤵᤑᤣᤰ ᤌᤠ᤺ᤰᤌᤠ᤺ᤰ ᤁᤢᤀᤡᤛᤡᤰ ᤏᤡ᤺ᤳᤋᤠᤱ ᤋᤩᤧᤶᤔᤧ᤹ ᤜᤧᤰᤁᤩᤠᤱ ᤀᤠᤳᤋᤡᤴ ᤌᤠ᤺ᤰᤁᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢ᤹. ᤂᤧᤱᤜᤠ᤹ ᤔᤢ᤹ᤀᤡᤍᤠᤱᤛᤠ ᤔᤧᤈᤥ᤺ᤰᤛᤡᤱᤅᤠᤱ ᤏᤡ᤺ᤳᤋᤠᤱ ᤔᤧᤍᤠᤖ. ᤂᤧᤒᤩᤠᤱ ᤀᤠᤳᤋᤡᤴ ᤔᤢ᤹ᤀᤡᤍᤠᤱᤛᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢ᤹. ᤂᤧᤱᤜᤠ᤹ ᤜᤡᤶᤛᤕᤱ ᤜᤡᤶᤛᤕᤱ ᤔᤧᤒᤥᤱᤅᤠᤱ ᤏᤡ᤺ᤳᤋᤠᤱ ᤔᤧᤍᤠᤖ. ᤜᤧᤰᤁᤩᤠᤱ ᤀᤠᤳᤋᤡᤴ ᤜᤡᤶᤛᤕᤱᤅᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢ᤹. ᤂᤧᤵᤔᤥᤗᤠᤶ ᤌᤡᤰᤐᤠ ᤌᤡᤰᤐᤠ ᤔᤏᤠ ᤏᤡ᤺ᤳᤋᤠᤱ ᤔᤧᤍᤠᤖ॥ 15 ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠᤴ ᤋᤥ᤺ᤶᤔᤏᤠᤒᤠ ᤛᤠᤔᤠᤜᤠ᤹ᤏᤢ ᤛᤥᤖᤡᤰ ᤔᤧᤛᤣᤃᤢ᤹. ᤂᤧᤴ ᤏᤢ ᤂᤢᤏᤧ᤹ ᤁᤳᤋᤢᤒᤠ ᤁᤧᤖᤧᤰ ᤔᤡᤀᤥ ᤔᤡᤎᤡᤱᤔᤠ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵᤐᤡᤴ ᤑᤣ᤺ᤴᤍᤢᤀᤠᤱ ᤘᤠ᤹. ᤂᤶᤓᤩᤠᤱ ᤂᤧᤸᤗᤧ ᤀᤡᤛᤪᤠᤀᤡᤗᤀᤥ ᤛᤠ᤹ᤖᤡᤰ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹॥’” 16 ᤕᤜᤥᤛᤢᤴ ᤋᤠᤏᤠᤶ ᤀᤠᤴᤍᤣᤴ ᤐᤥᤃᤧᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤌᤠ᤺ᤰᤌᤠ᤺ᤰ ᤆᤥᤃᤢᤛᤡᤀᤠᤱ ᤏᤡ᤺ᤳᤋᤠᤱ ᤋᤠᤖᤢᤛᤡ. ᤜᤧᤰᤁᤩᤠᤱ ᤕᤜᤢᤍᤠᤒᤠ ᤌᤠ᤺ᤰᤁᤡᤴ ᤔᤧᤛᤣᤃᤢ᤹॥ 17 ᤜᤧᤰᤁᤩᤠᤱ ᤂᤧᤸᤗᤧ ᤕᤜᤢᤍᤠᤒᤠ ᤔᤢ᤹ᤀᤡᤍᤠᤱᤛᤠ ᤆᤥᤃᤢᤛᤡᤀᤠᤱ ᤏᤡ᤺ᤳᤋᤠᤱ ᤋᤠᤖᤢᤛᤡ. ᤂᤧᤒᤩᤠᤱ ᤂᤧᤸᤗᤧ ᤈᤣᤖᤜᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤛᤣᤃᤢᤛᤡ॥ ᤜᤧᤰᤁᤩᤠᤱ ᤂᤧᤸᤗᤧ ᤈᤣᤖᤜᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤜᤡᤶᤛᤕᤱ ᤜᤡᤶᤛᤕᤱ ᤆᤥᤃᤢᤛᤡᤀᤠᤱ ᤏᤡ᤺ᤳᤋᤠᤱ ᤋᤠᤖᤢᤛᤡ. ᤜᤧᤰᤁᤩᤠᤱ ᤈᤒ᤻ᤍᤡᤖᤧ ᤁᤢᤜᤡᤶᤛᤕᤱᤅᤡᤴ ᤔᤧᤛᤣᤃᤢ॥ 18 ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤸᤗᤧ ᤁᤢᤜᤡᤶᤛᤕᤱᤅᤥᤒᤠ ᤗᤳᤇᤠ ᤗᤳᤇᤠ ᤔᤏᤠ ᤏᤡ᤺ᤳᤋᤠᤱ ᤋᤠᤖᤢᤛᤡ. ᤂᤶᤓᤩᤠᤱ ᤕᤜᤢᤍᤠ ᤌᤠ᤺ᤰᤁᤥᤒᤠ. ᤈᤣᤖᤜᤖᤧ ᤁᤢᤛ᤻ᤛᤠ ᤈᤒ᤻ᤍᤡᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤁᤠᤷᤔᤡᤖᤧ ᤁᤢᤛ᤻ᤛᤠ ᤀᤠᤁᤠᤏ ᤔᤧᤵᤔᤏᤠᤒᤧᤴ ᤔᤧᤛᤣᤃᤢ॥ 19 ᤂᤧᤒᤩᤠᤱ ᤕᤜᤥᤛᤢ᤺ᤸᤗᤧ ᤀᤠᤁᤠᤏᤧᤴ ᤔᤧᤳᤋᤢ. “ᤀᤠᤛ᤻ᤛᤠᤀᤣ. ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤂᤧᤏᤧ᤹ ᤔᤡᤔᤡᤍᤡᤱ ᤐᤡᤖᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤌᤣ ᤁᤧᤈᤥᤃᤢᤀᤠᤱ ᤘᤠ᤹ ᤂᤧᤴ ᤀᤠᤱᤃᤠ᤹ ᤔᤧᤳᤋᤠᤱᤅᤧ᤹॥ ᤀᤠᤱᤃᤠ᤹ᤗᤠᤶ ᤂᤧᤴ ᤔᤧᤈᤡᤰᤂᤧᤴᤏᤧ᤹॥” 20 ᤀᤠᤁᤠᤏᤖᤧ ᤕᤜᤥᤛᤢᤴ ᤔᤧᤳᤋᤢ. “ᤛᤧᤰᤂᤠᤀᤣᤖᤥ. ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤱᤃᤠ᤹ ᤗᤠᤕᤥ ᤆᤥᤃᤢᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤓᤧᤴ ᤕᤠ᤺ᤶᤒᤰᤁᤡᤴ ᤁᤴᤗᤥ— 21 ᤀᤠᤸᤗ ᤏᤠᤵᤔᤏᤠᤛᤡᤒᤠ ᤕᤠᤱᤛᤠ ᤁᤢᤴᤎᤣᤜᤠ᤹ᤀᤥ ᤒᤣᤒᤡᤗᤥᤏᤡᤕᤠ ᤗᤠᤈᤣ᤹ᤀᤥᤒᤠ ᤗᤳᤇᤠ ᤏᤢᤒᤠ ᤗᤃᤣ᤺ᤳ. ᤁᤡᤵ ᤏᤧᤳᤇᤡ ᤛᤣᤁᤣᤗ ᤕᤠᤖᤡᤰ ᤁᤧᤗᤡ᤺ᤵᤐᤠ ᤕᤢᤵᤐᤠ ᤏᤢ ᤅᤠᤒᤥᤱ ᤛᤣᤁᤣᤗ ᤕᤠᤖᤡᤰ ᤁᤧᤗᤡ᤺ᤵᤐᤠ ᤗᤳᤇᤠ ᤛᤠᤶᤔᤩᤠᤱ ᤋᤰᤁᤠᤳ ᤌᤡᤰ ᤀᤠᤱᤃᤠ᤹ ᤏᤡᤛᤢᤱ. ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤔᤡᤰ ᤗᤠᤛᤧᤀᤠᤱ ᤂᤧᤱᤜᤠ᤹ ᤀᤠᤱᤃᤠ᤹ ᤋᤣ᤹ᤖᤢᤱ॥ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤛᤠ᤺ᤱᤃᤠᤜᤡᤶ ᤗᤢᤶᤔᤥ ᤂᤠᤶᤒᤠᤱ ᤛᤡᤃᤠᤱ ᤗᤢᤵᤋᤢᤱᤅᤠᤱ ᤕᤠᤰ. ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤔᤢ ᤕᤢᤵᤐᤠᤴ ᤕᤠᤰ॥” 22 ᤂᤧᤒᤩᤠᤱ ᤕᤜᤥᤛᤢ᤺ᤸᤗᤧ ᤀᤡᤱᤛᤠᤒᤠᤜᤠ᤹ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤔᤧᤗᤥ᤺ᤰᤋᤧᤀᤠᤱ ᤂᤧᤴ ᤛᤠ᤺ᤱᤃᤠᤜᤡᤶᤔᤥ ᤔᤧᤒᤣ. ᤜᤧᤰᤁᤩᤠᤱ ᤂᤧᤴ ᤆᤡᤃᤰᤘᤠᤜᤠ᤹ ᤂᤧᤸᤗᤧ ᤁᤢᤛᤠ᤺ᤱᤃᤠᤜᤡᤶᤔᤥ ᤗᤢᤵᤋᤢᤀᤠᤱ ᤕᤠᤃᤧ ᤂᤧᤒᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤔᤢ ᤕᤢᤵᤐᤠᤴ ᤕᤠᤃᤧ॥ 23 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤆᤡᤃᤰᤘᤠᤜᤠ᤹ ᤛᤠ᤺ᤱᤃᤠᤜᤡᤶ ᤗᤢᤶᤔᤥᤗᤠᤶ ᤔᤧᤗ᤺ᤳᤋᤢᤀᤠᤱ ᤕᤜᤥᤛᤢᤴ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤔᤧᤍᤠᤖᤢ. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤧᤏᤧᤛ᤻ᤛᤢ॥ 24 ᤂᤧᤒᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤛᤥᤖᤡᤰ ᤕᤜᤥᤛᤢ᤺ᤸᤗᤧ ᤈᤣᤖᤜ ᤌᤠ᤺ᤰᤁᤥᤒᤠ ᤀᤠᤁᤠᤏᤧᤴ ᤏᤢ ᤂᤧᤴ ᤕᤢᤵᤐᤠ᤺ᤴ. ᤗᤃᤣ᤺ᤳᤋᤡᤴ ᤜᤧᤰᤁᤩᤠᤱ ᤛᤠᤶᤔᤩᤠᤱ ᤋᤰᤁᤠ᤺ᤳᤋᤡᤴ. ᤂᤧᤒᤩᤠᤱ ᤂᤧᤸᤗᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤏᤢ ᤔᤧᤴᤇᤢᤔᤠᤜᤠ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤒᤡᤳᤜᤠ᤹. ᤁᤢᤀᤍᤱᤜᤠ᤹. ᤂᤶᤓᤩᤠᤱ ᤁᤢᤔᤧᤸᤗᤢᤰᤜᤠ᤹ ᤏᤢ ᤁᤢᤛᤠ᤺ᤱᤃᤠᤜᤡᤶᤔᤡᤴ ᤜᤧᤰᤁᤩᤠᤱ ᤂᤧᤸᤗᤧ ᤁᤳᤋᤢᤒᤠ ᤁᤧᤘᤠ᤹ ᤔᤧᤴᤘᤠ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤁᤥᤖᤒᤠ ᤏᤧᤏᤧᤒᤠᤍᤧᤴᤏᤥ ᤔᤧᤍᤣ᤹ᤖᤢ॥ 25 ᤕᤜᤥᤛᤢ᤺ᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤀᤠᤏᤡᤃᤣ ᤛᤶᤎᤠᤱ ᤌᤣᤀᤠᤱ ᤀᤰᤋᤱᤒᤠ ᤋᤢᤰᤂᤣ ᤗᤠᤰᤂᤣᤜᤠ᤹ ᤁᤧᤍᤠᤖᤢᤒᤠᤒᤣ᥅ ᤀᤠᤀᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤁᤧᤛᤶᤎᤠᤱ ᤋᤢᤰᤂᤣ ᤗᤠᤰᤂᤣ ᤋᤠᤖᤢᤖᤥ॥” ᤂᤧᤒᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤴ ᤗᤢᤱᤅᤡᤸᤗᤧ ᤔᤧᤗᤧᤵᤋᤢ. ᤜᤧᤰᤁᤩᤠᤱ ᤘᤣ᤹ᤜᤠ᤹ᤀᤠᤱ ᤔᤧᤗᤧᤵᤋᤢ ᤔᤧᤛᤢᤖᤢᤀᤠᤱ ᤑᤢᤳᤗᤢᤶ ᤌᤩ᤺ᤱ ᤔᤡᤔᤧᤎᤡᤰᤂᤢ ᤔᤧᤍᤣᤛᤢᤛᤡ॥ 26 ᤂᤧᤱᤜᤠ᤹ᤖᤧ ᤀᤠᤁᤠᤏᤖᤧ ᤁᤢᤛᤶᤎᤠᤱ ᤕᤖᤡᤰ ᤗᤢᤱᤜᤠ᤹ ᤗᤢ᤺ᤵᤐᤧᤳ ᤔᤧᤗᤢᤵᤛᤢ. ᤂᤧᤴ ᤀᤠᤀᤡᤴ ᤌᤠᤖᤡᤰᤛᤠᤱ ᤜᤠᤒᤠ ᤏᤧᤖᤥ॥ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤴ ᤔᤡ ᤜᤧᤰᤋᤱᤒᤠ ᤁᤢᤛᤡᤰ ᤐᤥ᤺ᤰᤔᤠᤗᤠᤶ ᤏ᤺ᤶᤏ᤺ᤶ ᤐᤥ᤺ᤰᤂᤧ॥ ᤁᤸᤗᤧᤆᤥᤃᤢᤸᤗᤧ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤀᤠᤀᤡᤴ ᤌᤠᤖᤡᤰᤛᤠᤱ ᤀᤠᤁᤥᤖᤒᤠ ᤏᤧᤏᤧᤒᤠᤍᤧᤴ ᤔᤧᤔᤧᤳᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.