ᤕᤜᤥᤛᤢ 6 - LIFOTNTᤕᤖᤡᤜᤥᤴ ᤂᤠᤵᤐᤢᤌᤩ᤺ᤱ ᤐᤥᤱ᤹ 1 ᤀᤠᤸᤗ ᤂᤧᤴ ᤕᤧᤶᤔᤥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤕᤖᤡᤜᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ ᤔᤧᤛᤠᤰᤋᤢᤀᤠᤱ ᤐᤳᤇᤧ॥ ᤀᤠᤳᤋᤡᤴᤜᤠ᤹ᤀᤠᤱ ᤛᤡᤃᤠᤱ ᤗᤠ᤺ᤵᤔᤠ ᤏᤢ ᤗᤠ᤺ᤰᤁᤠᤳ ᤗ᤺ᤶᤔᤠ ᤔᤧᤱᤄᤥᤛᤧᤴ॥ 2 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤛᤢᤴ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤕᤖᤡᤜᤥᤴ. ᤂᤧᤵᤔᤥᤒᤠ ᤜᤠᤱᤅᤡᤴ ᤏᤢ ᤁᤧᤎᤢᤶᤒᤠ ᤌᤰᤛᤢᤒᤠᤜᤠ᤹ᤀᤠᤱ ᤂᤧᤏᤧ᤹ ᤁᤧᤕᤢᤰᤁᤥ ᤌᤠᤛᤢᤱᤛᤡᤱᤅᤠᤱ ᤘᤠ᤹ᤖᤥ॥ 3 ᤁᤧᤖᤧᤰ ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠ ᤁᤧᤜᤣᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤧᤴ ᤕᤧᤰᤕᤰᤁᤡᤴ ᤁᤡᤷᤃᤵ ᤁᤒᤧᤶᤔᤧ᤹ᤀᤠᤱ ᤌᤡᤰᤗᤧᤱ ᤁᤒᤪᤡᤱ ᤀᤡᤖᤧᤶᤔᤧ᤹॥ ᤋᤢᤰᤛᤡ ᤕᤧᤴ ᤌᤠᤖᤡᤰ ᤂᤡᤏᤡ᤹ ᤀᤰᤂᤣ ᤆᤥᤃᤧᤶᤔᤧ᤹॥ 4 ᤏᤢᤛᤡ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤏᤢᤛᤡ ᤌᤢ᤺ᤶᤒᤠ ᤛᤠᤍᤠᤱᤜᤠ᤹ ᤔᤧᤕᤠᤱᤛᤡᤱᤅᤠᤱ ᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤍᤃᤡ ᤁᤢᤍᤃᤡ ᤗᤠᤱᤔᤧᤄᤣ᤺ᤰᤗ॥ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤁᤴ ᤕᤧᤰᤕᤰᤁᤡᤴ ᤂᤡᤏᤡ᤹ ᤏᤢᤛᤡᤗᤧᤱ ᤁᤒᤧᤶᤔᤧ᤹. ᤂᤶᤓᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤛᤠᤍᤠᤱᤅᤡᤴ ᤔᤧᤔᤢ᤺ᤳᤋᤢᤖ॥ 5 ᤜᤧᤰᤁᤩᤠᤱ ᤀᤠᤸᤗ ᤂᤧᤱᤜᤠ᤹ᤖᤧ ᤌᤢ᤺ᤶᤒᤠ ᤛᤠᤍᤠᤱᤅᤡᤴ ᤔᤠᤱᤓᤠ ᤀᤡᤖᤡᤰ ᤔᤧᤔᤢ᤺ᤳᤋᤢ᤹. ᤂᤧᤒᤩᤠᤱ ᤂᤡᤏᤡ᤹ ᤛᤠᤍᤠᤱᤅᤡᤴ ᤔᤢᤰᤐᤠ ᤀᤡᤰᤗᤠᤴ ᤁᤧᤄᤧᤵᤛᤢᤶᤏᤢᤔᤧ᤺ᤴᤏᤣ ᤁᤧᤖᤧᤰ ᤔᤏᤠᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤔᤧᤀ᤺ᤰᤗ॥ ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤁᤡᤴ ᤁᤢᤒᤢᤱ ᤌᤧᤷᤗᤧ ᤆᤥᤴ. ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤕᤧᤰᤕᤰᤁᤥ ᤁᤢᤍᤥ᤺ᤵᤔᤠ ᤔᤧᤗᤥᤰ ᤔᤧᤗᤠ᤺ᤳᤗ॥” 6 ᤁᤸᤗᤧᤆᤥᤃᤢᤸᤗᤧ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢ᤺ᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤔᤠᤱᤜᤢᤵ ᤛᤴᤍᤥᤰᤁᤡᤴ ᤐᤰᤂᤧᤶᤔᤧ᤹. ᤜᤧᤰᤁᤩᤠᤱ ᤏᤢᤛᤡ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤌᤢ᤺ᤶᤒᤠ ᤛᤠᤍᤠᤱ ᤏᤢᤛᤡ ᤔᤧᤜᤣ᤹ᤛᤡᤱᤅᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰ ᤋᤃᤡ ᤗᤠᤱᤔᤧᤄᤣ᤺ᤰᤗ॥” 7 ᤜᤧᤰᤁᤩᤠᤱ ᤂᤢᤏᤧ᤹ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤋᤃᤡ ᤐᤥᤖᤧᤶᤔᤧ᤹ᤀᤠᤱ ᤂᤧᤴ ᤕᤧᤰᤕᤰ ᤁᤧᤖᤧᤰ ᤐᤡᤛᤠᤱ ᤀᤡᤖᤧᤶ ᤐᤣᤃᤧᤶᤔᤧ᤹॥ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠ ᤁᤧᤜᤣᤒᤠᤜᤠ᤹ᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰ ᤋᤃᤡ ᤋᤃᤡ ᤗᤠᤱᤔᤧᤄᤣ᤺ᤰᤗ॥” 8 ᤕᤜᤥᤛᤢ᤺ᤸᤗᤧ ᤁᤴ ᤔᤏᤠᤜᤠ᤹ ᤔᤧᤳᤋᤢ ᤛᤢᤖᤢᤛᤡᤀᤠᤱ ᤀᤣᤃᤠᤱ ᤏᤢᤛᤡ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤌᤢ᤺ᤶᤒᤠ ᤛᤠᤍᤠᤱ ᤏᤢᤛᤡ ᤔᤧᤕᤠᤱᤛᤡᤱ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤗᤠᤱᤔᤧᤄᤣᤃᤧᤀᤠᤱ ᤂᤢᤴᤇᤡ᤹ ᤛᤠᤍᤠᤱᤜᤠ᤹ ᤔᤧᤔᤢ᤺ᤳᤋᤢᤖ ᤋᤃᤡ ᤌᤠᤛᤡᤱᤔᤠ ᤔᤧᤜᤣ᤺ᤰᤋᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥ᤺ᤰᤁᤡᤴᤃ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤣᤃᤠᤱ ᤌᤠᤛᤡᤱ॥ 9 ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠ ᤁᤧᤜᤣᤒᤠ ᤔᤏᤠᤜᤠ᤹ᤃ ᤛᤠᤍᤠᤱ ᤁᤧᤔᤢ᤺ᤵᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤗᤠᤱᤔᤧᤄᤣᤃᤧ. ᤜᤧᤰᤁᤩᤠᤱ ᤀᤣᤃᤠᤱ ᤁᤧᤒᤵᤐᤠ ᤌᤰᤛᤢᤒᤠᤜᤠ᤹ ᤔᤠᤱᤜᤢᤵ ᤛᤴᤍᤥᤰ ᤀᤣᤃᤠᤱ ᤗᤠᤱᤔᤧᤄᤣᤃᤧ. ᤂᤶᤓᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤠᤍᤠᤱᤜᤠ᤹ ᤔᤧᤔᤢ᤺ᤳᤋᤢᤖ ᤗᤠᤱᤔᤧᤄᤣᤃᤧ॥ 10 ᤁᤖ ᤕᤜᤥᤛᤢ᤺ᤸᤗᤧ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤔᤢᤖᤠ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤂᤡᤏᤡ᤹ ᤀ᤺ᤰᤋᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤔᤧᤒᤡᤏᤡᤱᤅᤡᤴᤒᤠ ᤕᤧᤴ ᤌᤠᤖᤡᤰ. ᤂᤡᤏᤡ᤹ ᤔᤧᤀ᤺ᤰᤋᤧᤶᤔᤡᤴᤏᤧ᤹. ᤂᤡᤏᤡ᤹ ᤀᤡᤰᤗᤠ᤺ᤴᤏᤣ ᤂᤧᤶᤔᤧᤍᤧᤳᤏᤧᤴᤗ. ᤂᤡᤏᤡ᤹ ᤔᤢᤖᤠᤀᤥᤗᤠᤶᤔᤠᤱ ᤁᤢᤓᤠ ᤐᤠ᤺ᤴᤇᤣ᤺ᤰᤘᤠ ᤔᤧᤗ᤺ᤳᤋᤧᤶᤔᤡᤴᤏᤧ᤹॥ ᤀᤠᤱᤃᤠ᤹ ᤀ᤺ᤰᤋᤧᤶᤔᤧ᤹ ᤔᤧᤳᤏᤡᤱᤅᤠᤱᤗᤰ ᤂᤡᤏᤡ᤹ ᤀ᤺ᤰᤋᤧᤶᤔᤧ᤹॥” 11 ᤁᤶᤓᤗ᤹ᤖᤡᤰ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤕᤧᤰᤕᤰ ᤁᤒᤪᤡᤱ ᤐᤡᤛᤠᤱ ᤌᤡᤰᤗᤧᤱ ᤀᤡᤛᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤠ᤺ᤱᤃᤠᤜᤡᤶᤔᤥ ᤔᤧᤍᤩᤧ. ᤂᤧᤒᤩᤠᤱ ᤜᤠᤒᤠ ᤂᤧᤵᤔᤥ ᤕᤠᤱᤔᤧᤎᤥ᤺ᤰᤋᤧ॥ 12 ᤕᤜᤥᤛᤢᤴ ᤀᤠᤴᤍᤣᤴ ᤋᤠᤏᤠᤶᤛᤠ ᤐᤥᤃᤧ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤧᤒᤰᤂᤢ॥ 13 ᤂᤧᤴ ᤏᤢᤛᤡ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤌᤢ᤺ᤶᤒᤠ ᤛᤠᤍᤠᤱ ᤏᤢᤛᤡ ᤔᤧᤕᤠᤱᤛᤡᤱᤅᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤍᤃᤠᤱ ᤁᤢᤍᤃᤠᤱ ᤛᤠᤍᤠᤱᤜᤠ᤹ ᤔᤧᤔᤢ᤺ᤳᤋᤢᤖ ᤗᤠᤱᤔᤧᤄᤣᤃᤧᤀᤠᤱ ᤔᤧᤒᤳᤇᤧ॥ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠ ᤁᤧᤜᤣᤒᤠ ᤔᤏᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤠᤱ ᤔᤧᤎᤠᤛᤡᤱ. ᤜᤧᤰᤁᤩᤠᤱ ᤀᤣᤃᤠᤱ ᤗᤠᤱᤃᤧᤄᤣ᤺ᤰᤐᤠ ᤌᤰᤛᤢᤒᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰ ᤀᤣᤃᤠᤱ ᤔᤧᤓᤴᤇᤡᤱ॥ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤠᤍᤠᤱᤅᤡᤴ ᤔᤧᤔᤢ᤺ᤳᤋᤢᤖ ᤗᤠᤱᤔᤧᤄᤣᤃᤧ॥ 14 ᤁᤶᤓᤗ᤹ᤖᤡᤰ ᤏᤡᤛᤡᤃᤣᤰᤐᤠ ᤕᤧᤴᤏᤥᤀᤠᤱ ᤂᤧᤱᤜᤠ᤹ᤖᤧ ᤕᤧᤰᤕᤰᤁᤡᤴ ᤌᤡᤰᤗᤧᤱ ᤔᤧᤃᤒᤢᤀᤠᤱ ᤔᤧᤏᤢ᤺ᤰᤂᤧ॥ ᤋᤢᤰᤛᤡ ᤕᤧᤴ ᤌᤠᤖᤡᤰ ᤂᤧᤱᤜᤠ᤹ᤖᤧ ᤜᤧᤰᤁᤣᤀᤣ ᤔᤧᤈᤥᤃᤢ॥ 15 ᤏᤢᤛᤡᤃᤣᤰᤐᤠ ᤕᤧᤴ ᤋᤠᤏᤠᤶ ᤑᤍᤡ᤹ ᤘᤍᤡ᤹ ᤗ᤹ᤖᤧᤸᤗᤧᤛᤠ ᤂᤧᤱᤜᤠ᤹ ᤔᤧᤒᤥᤃᤧ. ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤐᤖᤡᤰᤗᤧᤀᤣ ᤕᤧᤰᤕᤰᤁᤡᤴ ᤔᤧᤃᤒᤢ. ᤂᤧᤸᤗᤧ ᤕᤠ᤺ᤴᤍᤡᤰᤗᤰ ᤂᤧᤱᤜᤠ᤹ᤖᤧ ᤕᤧᤰᤕᤰᤁᤡᤴ ᤏᤢᤛᤡᤗᤧᤱ ᤔᤧᤃᤒᤢ॥ 16 ᤀᤠᤸᤗ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤛᤠᤍᤠᤱᤅᤡᤴ ᤏᤢᤛᤡᤗᤧᤱ ᤔᤧᤔᤢ᤺ᤳᤋᤢᤸᤗᤧ ᤕᤜᤥᤛᤢ᤺ᤸᤗᤧ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀ᤺ᤰᤋᤧᤶᤔᤧ᤹᥄ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤕᤧᤰᤕᤰᤁᤡᤴ ᤂᤡᤏᤡ᤹ ᤁᤧᤒᤡᤖᤡᤀᤠᤱ ᤏᤧᤖᤥ॥ 17 ᤁᤴ ᤕᤧᤰᤕᤰᤁᤡᤴ ᤏᤢ ᤁᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤰᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤶᤏᤠᤀᤠᤱ ᤘᤠ᤹॥ ᤁᤧᤳᤏᤡᤔᤠ ᤖᤠᤜᤠᤒᤧᤴ ᤏᤢ ᤂᤧᤸᤗᤧ ᤁᤢᤜᤡᤶᤔᤥ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠᤜᤠ᤹ᤖᤰ ᤔᤧᤜᤡᤱ᤹. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤐᤠᤱᤔᤏᤠᤛᤡᤒᤠ ᤌᤥ᤺ᤶᤈᤡᤒᤠᤜᤠ᤹ ᤂᤧᤸᤗᤧ ᤆᤡᤰᤂᤢᤛᤡᤀᤠᤱ ᤘᤕᤧ॥ 18 ᤁᤖ ᤂᤠᤵᤐᤢᤌᤩ᤺ᤱ ᤔᤧᤱᤛᤧ ᤋᤥ᤺ᤶᤔᤏᤠᤒᤠ ᤐᤠ᤺ᤴᤜᤠ᤹ᤗᤠᤶ ᤂᤡᤏᤡ᤹ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹. ᤔᤣ᤺ᤴᤏᤧᤓᤃᤪ ᤂᤧᤴ ᤋᤥ᤺ᤶᤔᤏᤠᤒᤠ ᤐᤠ᤺ᤴᤜᤠ᤹ ᤁᤧᤕᤠᤱᤅᤠᤛᤡᤀᤠᤱ ᤂᤡᤏᤡ᤹ᤀᤥ ᤔᤧᤰᤔᤠᤴ ᤁᤧᤍᤠᤖᤢᤶ᤹. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤛᤠ᤺ᤱᤃᤠᤜᤡᤶᤔᤥ ᤔᤠᤱᤍᤣ ᤛᤠᤱᤃᤪᤠ ᤁᤧᤍᤠᤖᤢᤶ᤹ ᤂᤧᤒᤩᤠᤱ ᤂᤧᤵᤔᤥ ᤋᤢᤰᤂᤣ ᤗᤠᤰᤂᤣ ᤌᤠᤖ ᤁᤧᤈᤥᤃᤢᤶ᤹॥ 19 ᤁᤖ ᤁᤧᤖᤧᤰ ᤕᤢᤵᤐᤠ ᤏᤢ ᤛᤠᤶᤔᤩᤠᤱ. ᤜᤧᤰᤁᤩᤠᤱ ᤁᤠᤛᤠ ᤏᤢ ᤑᤧᤴᤈᤣ᤹ ᤂᤵᤐᤩᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤢᤳᤌᤥ ᤆᤥᤰ॥ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤔᤠ ᤕᤢᤱᤍᤧᤴᤏᤥ ᤁᤧᤍᤠᤖᤢᤶᤗ ᤐᤥᤱ᤹॥” 20 ᤀᤠᤸᤗ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤛᤠᤍᤠᤱᤜᤠ᤹ ᤔᤧᤔᤢ᤺ᤳᤋᤢ. ᤂᤧᤒᤩᤠᤱ ᤔᤏᤠᤜᤠ᤹ ᤔᤧᤀ᤺ᤰᤋᤧ. ᤜᤧᤰᤁᤩᤠᤱ ᤛᤠᤍᤠᤱᤅᤡᤸᤗᤧ ᤁᤢᤀᤡᤰᤗᤠᤴ ᤔᤧᤄᤧᤵᤛᤢᤏᤢᤔᤧ᤺ᤴᤏᤣ ᤂᤧᤱᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤔᤧᤀ᤺ᤰᤋᤧᤸᤗᤧ ᤂᤧᤴ ᤗᤢᤱᤎᤠᤰᤁᤡᤴ ᤁᤢᤒᤢᤱ ᤌᤧᤷᤗᤧ ᤐᤢᤖᤢᤱ ᤗᤢ᤺ᤴᤍᤧ. ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤁᤢᤍᤥ᤺ᤵᤔᤠ ᤋᤃᤡ ᤔᤧᤒᤥᤖᤧᤀᤠᤱ ᤁᤧᤖᤧᤰ ᤕᤧᤰᤕᤰᤁᤥ ᤔᤧᤗᤠᤛᤧ ᤜᤧᤰᤁᤩᤠᤱ ᤂᤧᤴ ᤜᤢᤰᤁᤠᤵ ᤔᤧᤈᤥᤃᤢ॥ 21 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤀᤠᤱ ᤕᤜᤘᤣ ᤍᤠᤱᤒᤠᤀᤥ ᤔᤧᤍᤥᤴᤍᤢ. ᤜᤧᤰᤁᤩᤠᤱ ᤕᤧᤰᤕᤰᤁᤥ ᤁᤧᤘᤠ᤹ᤒᤠ ᤕᤧᤶᤒᤡᤳᤇᤠᤜᤠ᤹. ᤔᤧᤴᤇᤢᤔᤠᤜᤠ᤹. ᤌᤠᤱᤒᤧᤴᤜᤠ᤹. ᤁᤠᤵᤐᤥ ᤋᤢᤶᤛᤠᤜᤠ᤹. ᤂᤶᤓᤩᤠᤱ ᤐᤡᤳᤜᤠ᤹. ᤔᤧᤸᤗᤢᤰᤜᤠ᤹ ᤏᤢ ᤀᤍᤱᤜᤠ᤹ ᤋᤠᤓᤣ᤺ᤸᤗᤧ ᤁᤧᤖᤧᤰ ᤔᤧᤛᤧᤖᤢᤛᤡ॥ 22 ᤜᤧᤰᤁᤩᤠᤱ ᤕᤜᤥᤛᤢ᤺ᤸᤗᤧ ᤂᤧᤴ ᤗᤠᤈᤣ᤹ᤀᤥ ᤌᤥ᤺ᤶᤈᤡᤒᤠ ᤁᤧᤒᤣ᤺ᤰᤐᤠ ᤂᤧᤴ ᤏᤧᤳᤇᤡ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤂᤧᤴ ᤁᤧᤳᤏᤡᤔᤧᤸᤗᤧ ᤁᤢᤜᤡᤶᤔᤥ ᤂᤧᤴᤇᤡ᤹ ᤐᤣᤛᤧ᤹. ᤜᤧᤰᤁᤩᤠᤱ ᤂᤧᤴᤇᤡ᤹ ᤂᤢᤏᤧ᤹ᤏᤢ ᤔᤠᤱᤜᤧᤰ ᤁᤧᤈᤥᤃᤧᤛᤢᤒᤠ ᤁᤢᤀᤡᤛᤡᤰ ᤂᤧᤴ ᤔᤧᤴᤇᤢᤔᤠᤴ ᤂᤧᤒᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠᤜᤠ᤹ ᤁᤧᤖᤧᤰ ᤁ᤹ᤕᤥᤗᤠᤶ ᤗ᤺ᤳᤋᤧᤛᤧᤳᤇᤧ᤹॥” 23 ᤀᤠᤸᤗ ᤂᤧᤴ ᤌᤥ᤺ᤶᤈᤡᤒᤠ ᤁᤧᤈᤥ᤺ᤰᤐᤠ ᤂᤧᤴ ᤏᤧᤵᤑᤢ ᤌᤠᤱᤒᤧᤴᤜᤠ᤹ ᤐᤣᤛᤡ. ᤜᤧᤰᤁᤩᤠᤱ ᤖᤠᤜᤠᤒᤧᤴ ᤏᤢ ᤂᤢᤏᤧ᤹ ᤁᤢᤶᤒᤠ. ᤁᤢᤶᤔᤠ. ᤁᤢᤶᤓᤢ᤹ ᤁᤢᤴᤛᤠ᤹ ᤂᤧᤒᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹. ᤂᤧᤸᤗᤧ ᤁᤧᤖᤧᤰ ᤁᤢᤃᤠ᤹ᤀᤡᤜᤠ᤹ ᤗᤠ᤺ᤰᤁᤠᤳ ᤗᤠᤶᤗᤥᤛᤢ ᤗ᤺ᤳᤋᤧᤛᤢᤛᤡ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤛᤠ᤺ᤱᤃᤠᤜᤡᤶᤗᤠᤶ ᤗᤠ᤺ᤰᤁᤠᤳ ᤕᤢᤰᤂᤧᤛᤢᤛᤡ॥ 24 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤕᤧᤰᤕᤰᤁᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤡᤔᤧᤎᤡᤰᤂᤢ ᤔᤧᤍᤣᤛᤢ. ᤁᤖ ᤛᤠᤶᤔᤩᤠᤱ. ᤕᤢᤵᤐᤠ ᤜᤧᤰᤁᤩᤠᤱ ᤁᤠᤛᤠ ᤏᤢ ᤑᤧᤴᤈᤣ᤹ ᤂᤵᤐᤩᤠᤜᤠ᤹ᤖᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤔᤠ ᤕᤢᤱᤍᤧᤴᤏᤥ ᤂᤧᤱᤜᤠ᤹ᤖᤧ ᤔᤧᤕᤢᤰᤂᤢ॥ 25 ᤁᤖ ᤁᤧᤳᤏᤡᤔᤠ ᤖᤠᤜᤠᤒᤧᤴ. ᤂᤧᤸᤗᤧ ᤁᤢᤶᤒᤠᤖᤧ ᤁᤢᤜᤡᤶᤛᤕᤱᤜᤠ᤹ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠᤜᤠ᤹ ᤁᤧᤖᤧᤰ ᤕᤜᤥᤛᤢ᤺ᤸᤗᤧ ᤋᤠᤱᤛᤧ᤺ᤵᤋᤢᤛᤡ. ᤌᤣᤀᤠᤱᤓᤧᤸᤗᤧ ᤕᤜᤥᤛᤢ᤺ᤸᤗᤧ ᤕᤖᤡᤜᤥᤀᤥ ᤌᤥ᤺ᤶᤈᤡᤒᤠ ᤐᤠᤱᤄᤢᤛᤡᤒᤠ ᤀᤡᤱᤛᤠᤒᤠᤜᤠ᤹ ᤂᤧᤸᤗᤧ ᤆᤡᤰᤂᤢᤛᤡᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤀᤠᤀᤡᤴ ᤌᤠᤖᤡᤰᤁᤣ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤖᤠᤜᤠᤒᤧᤴ ᤘᤠ᤹॥ 26 ᤜᤠᤒᤠ ᤂᤧᤴ ᤕᤧᤶᤔᤥ ᤕᤜᤥᤛᤢ᤺ᤸᤗᤧ ᤂᤧᤱᤜᤠ᤹ ᤔᤠᤱᤜᤧᤰ ᤆᤠ᤺ᤳᤋᤢᤛᤡᤀᤠᤱ ᤀᤰᤂᤣ ᤐᤠ᤺ᤳᤋᤢᤖᤥ. “ᤁᤴ ᤕᤖᤡᤜᤥ ᤕᤧᤰᤕᤰᤁᤡᤴ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤳᤋᤡᤴ ᤕᤧᤶᤛᤡᤱ᤹. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤴ ᤛᤠᤱᤃᤪᤠ ᤔᤠᤱᤍᤣᤖᤧ ᤋᤧᤳᤋᤢᤖᤖᤥ॥ ᤁᤸᤗᤧ ᤁᤢᤒᤢᤱ ᤕᤢᤰᤂᤢᤸᤗᤧ ᤂᤧᤸᤗᤧ ᤂᤢᤏᤧ᤹ ᤁᤢᤛ᤻ᤛᤠ ᤋᤢᤶᤒᤧᤴ ᤛᤡᤖᤥ. ᤂᤧᤸᤗᤧ ᤁᤢᤛ᤻ᤛᤠ ᤑᤥ᤺ᤰᤘᤠ᤺ᤸᤗᤧ ᤁᤢᤔᤧᤴᤏᤥ ᤁᤵᤔᤥᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤠᤴ ᤕᤧᤶᤛᤡᤱᤗᤥ॥” 27 ᤁᤶᤓᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤴ ᤕᤜᤥᤛᤢᤴ ᤏᤢ ᤛᤥᤖᤡᤰ ᤘᤕᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥ ᤗᤠᤈᤣ᤹ ᤁᤧᤖᤧᤰ ᤛᤧᤖᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.