ᤕᤜᤥᤛᤢ 5 - LIFOTNT

¹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤘᤜ᤺ᤱᤅᤡᤴ ᤔᤧᤱᤃᤠ᤺ᤰᤁᤣ ᤌᤠᤖᤡᤰ ᤂᤢᤴᤇᤡ᤹ ᤋᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤕᤷᤍᤏ ᤘᤜ᤺ᤱᤅᤥᤒᤠ ᤆᤫᤠ᤺ᤳᤋᤡᤴ ᤆᤵᤐᤪᤧᤰ ᤆᤒᤧᤖ ᤕᤠ᤺ᤴᤍᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤕᤷᤍᤏ ᤁᤳᤏᤠᤜᤠᤱᤍᤠᤱ ᤏᤠᤶᤎᤠ ᤐᤡᤛᤠᤱᤒᤠ ᤀᤣᤔᤥᤖᤡᤜᤠ᤹ᤖᤧ ᤂᤢᤏᤡ᤹ ᤁᤧᤖᤧᤰ ᤜᤠᤱᤜᤠ᤹ ᤏᤢ ᤂᤠᤶᤍᤥ᤺ᤰᤗᤢᤶ ᤘᤖ᤺ᤱᤅᤡᤸᤗᤧ ᤁᤢᤒᤣᤛᤠᤱᤒᤠ ᤁᤏᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤜᤠᤱᤜᤠ᤹ᤖᤧ ᤔᤧᤄᤧᤵᤛᤢ. ᤂᤧᤒᤩᤠᤱ ᤂᤧᤱᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤔᤧᤃᤡᤛᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤛᤡᤰᤗᤢᤱᤔᤠ᤹ ᤕᤱᤔᤠ ᤜᤣ᤺ᤰᤋᤧ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤌᤰᤔᤠᤖᤧ ᤗᤠᤃᤡ ᤀᤠ᤺ᤴᤇᤡᤱᤔᤠ ᤔᤧᤴᤇᤢᤰᤋᤧᤴᤗᤥ॥

ᤃᤡᤗᤃᤠᤗᤀᤥ ᤜᤷᤍᤥ ᤜᤧᤰᤔᤠ ᤕᤠ᤺ᤶᤒᤰ ᤐᤥ᤺ᤰᤂᤧ

² ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤛᤢᤴ ᤔᤧᤳᤋᤢ. “ᤗᤢᤱᤛᤧᤖᤢᤱᤒᤠᤴ ᤁᤢᤜᤧᤰᤔᤠ ᤆᤥᤃᤧ᤹ᤀᤠᤱ ᤕᤠᤶᤔᤥ ᤀᤡᤛᤪᤠᤀᤡᤗᤡᤜᤠ᤹ ᤜᤷᤍᤥ ᤜᤧᤃᤧ ᤐᤡᤖᤧᤛᤧ᤹॥”

³ ᤂᤧᤒᤩᤠᤱ ᤕᤜᤥᤛᤢ᤺ᤸᤗᤧ ᤗᤢᤱᤛᤧᤖᤢᤱᤒᤠᤜᤠ᤹ ᤁᤢᤜᤧᤰᤔᤠ ᤆᤥᤃᤢᤀᤠᤱ ᤃᤡᤒᤡᤕᤌ-ᤜᤠᤀᤖᤠᤗᤥᤌᤀᤥ ᤀᤡᤛᤪᤠᤀᤡᤗᤡᤜᤠ᤹ ᤜᤷᤍᤥ ᤜᤧᤃᤢ ᤐᤡᤖᤢᤛᤡ॥

⁴ ᤕᤜᤥᤛᤢ᤺ᤸᤗᤧ ᤜᤷᤍᤥ ᤜᤧᤰᤔᤠᤛᤡ ᤐᤡᤔᤠᤛᤡ ᤁᤧᤒᤥᤱᤒᤠ ᤐᤠ᤺ᤴᤏᤡᤴ ᤜᤠᤒᤠ ᤁᤴ ᤘᤕᤧ. ᤔᤡᤛᤪᤗᤠᤶ ᤀᤠᤰᤂᤩᤠᤖᤡᤰ ᤔᤏᤠᤜᤠ᤹. ᤀᤡᤃᤪ ᤌᤰᤛᤢᤒᤠ ᤐᤥᤱᤔᤠ ᤁᤧᤗᤠ᤹ᤒᤠᤜᤠ᤹ ᤔᤧᤗ᤺ᤴᤍᤧ ᤔᤧᤓᤧᤖᤧᤀᤠᤱ ᤔᤧᤘᤕᤧ. ᤂᤧᤱᤜᤠ᤹ ᤁᤧᤖᤧᤰ ᤔᤡᤛᤪᤗᤠᤶ ᤔᤧᤗ᤺ᤴᤍᤧᤀᤠᤱ ᤀᤣᤃᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤔᤧᤛᤩᤧ ᤔᤧᤄᤧᤖᤧ॥

⁵ ᤔᤡᤛᤪᤗᤠᤶ ᤀᤠᤰᤂᤩᤠᤖᤡᤰ ᤔᤧᤗ᤺ᤴᤍᤧ ᤔᤧᤓᤧᤖᤧᤀᤠᤱ ᤔᤧᤘᤕᤧ. ᤂᤧᤱᤜᤠ᤹ ᤁᤧᤖᤧᤰᤗᤧᤴ ᤜᤷᤍᤥ ᤜᤧᤰᤔᤠ ᤕᤠ᤺ᤶᤒᤰ ᤐᤥ᤺ᤰᤂᤧᤀᤠᤱ ᤘᤕᤧ॥ ᤁᤖ ᤔᤡᤛᤪ ᤗᤠᤈᤣ᤹ᤗᤠᤶ ᤔᤧᤗ᤺ᤴᤍᤧ ᤔᤧᤓᤧᤖᤧᤀᤠᤱ ᤀᤣᤃᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤀᤣ᤺ᤰᤛᤠᤍᤧᤴᤏᤥᤒᤠ ᤗᤠᤶᤍᤡ᤺ᤰᤁᤥ ᤛᤠᤃᤧᤘᤠ᤺ᤴᤇᤡᤱᤒᤠ ᤀᤠᤳᤋᤡᤴᤜᤠ᤹ᤖᤧᤴᤏᤠᤱ ᤜᤷᤍᤥ ᤔᤧᤴᤜᤧᤰᤁᤣ ᤘᤕᤧ॥

⁶ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤔᤡᤛᤪᤗᤠᤶ ᤁᤧᤗ᤺ᤶᤒᤠ ᤁᤧᤓᤧᤶᤒᤠ ᤁᤧᤖᤧᤰ ᤔᤏᤠᤜᤠ᤹. ᤀᤡᤃᤪ ᤌᤰᤛᤢᤒᤠ ᤐᤥᤱᤔᤠ ᤁᤧᤗᤠ᤹ᤒᤠᤜᤠ᤹ ᤔᤧᤶᤔᤧᤰᤁᤣ ᤌᤠᤖᤡᤰ ᤂᤧᤱᤜᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤗᤡᤒᤥᤱ ᤋᤱᤒᤣ ᤂᤠᤖᤠᤰ ᤗᤠᤱᤔᤧᤄᤣᤃᤧᤀᤠᤱ ᤔᤧᤘᤕᤧ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤐᤡᤏᤡᤱ ᤔᤧᤳᤋᤢᤛᤡᤀᤠᤱ ᤔᤠᤱᤜᤢᤵ ᤆᤥᤃᤢᤒᤠ ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤗᤠᤈᤣᤴ ᤂᤧᤱᤜᤠ᤹ᤖᤧ ᤏᤡᤔᤠ ᤔᤧᤱᤄᤥᤛᤢᤴ᤹ ᤑᤠ᤹ᤀᤠᤱ ᤂᤢᤴᤇᤡ᤹ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤔᤠᤱᤜᤧᤰ ᤆᤥᤃᤢᤀᤠᤱ ᤘᤕᤧ॥

⁷ ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤧᤰᤘᤠ ᤕᤜᤘᤣ ᤍᤠᤱᤒᤧᤸᤗᤧ ᤕᤠᤶᤔᤥ ᤛᤠᤔᤧᤘᤠ᤺ᤴᤇᤡᤱᤗ ᤕᤠ᤺ᤴᤍᤢᤛᤡᤒᤠ ᤔᤢ᤹ᤀᤡᤍᤠᤱᤛᤠᤜᤠ᤹ ᤕᤜᤥᤛᤢ᤺ᤸᤗᤧ ᤜᤷᤍᤥ ᤜᤧᤃᤢ ᤐᤡᤖᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤗᤠᤶᤍᤡ᤺ᤰᤁᤥ ᤜᤷᤍᤥ ᤔᤧᤴᤜᤧᤰ ᤔᤧᤶᤒᤡᤛᤡᤱᤅᤣ ᤔᤧᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤜᤷᤍᤥ ᤔᤧᤴᤜᤧᤰᤁᤣᤒᤠ ᤔᤏᤠ ᤔᤧᤘᤕᤧ॥

⁸ ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧᤴ ᤜᤷᤍᤥ ᤜᤧᤰᤔᤠ ᤆᤢᤖᤧᤀᤠᤱ ᤀᤣᤃᤠᤱ ᤂᤧᤱᤜᤠ᤹ ᤔᤧᤴᤘᤣ᤺ᤳᤋᤣ ᤌᤠᤖᤡᤰ ᤛᤠ᤺ᤱᤃᤠᤜᤡᤶᤔᤥ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤋᤧᤴᤜᤠ᤹ᤀᤥ ᤔᤧᤕᤢᤅᤧ॥

⁹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤛᤢᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤀᤡᤴ ᤔᤡᤛᤪᤒᤠ ᤂᤡᤏᤡ᤹ ᤀᤡᤱᤍᤥᤴ ᤂᤧᤳᤋᤢᤱ ᤐᤡᤏᤡᤱᤅᤠᤱ ᤘᤠ᤹॥” ᤁᤸᤗᤧᤆᤥᤃᤢᤸᤗᤧ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤀᤠᤀᤡᤴ ᤌᤠᤖᤡᤰᤛᤠᤱ ᤃᤡᤗᤃᤠᤗ ᤔᤧᤔᤧᤳᤋᤢ॥

¹⁰ ᤀᤠᤸᤗ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤃᤡᤗᤃᤠᤗᤀᤥ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢᤀᤠᤱ ᤔᤧᤕᤢᤅᤧ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤕᤧᤴᤏᤡᤸᤗᤧ ᤕᤠ᤺ᤴᤍᤡᤰ ᤕᤢᤛᤡᤰ ᤕᤖᤡᤜᤥᤒᤠ ᤏᤧᤏᤧᤒᤠᤍᤧᤴᤏᤥᤀᤣ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤔᤧᤍᤥᤛᤢ॥

¹¹ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤸᤗᤧ ᤁᤢᤍᤠ᤺ᤴᤍᤡᤰᤔᤠ. ᤜᤠᤒᤠ ᤂᤧᤴ ᤕᤧᤴᤏᤥ ᤂᤧᤱᤜᤠ᤹ᤖᤧ ᤂᤧᤴ ᤗᤠᤈᤣ᤹ᤀᤥ ᤁᤧᤒᤥ᤺ᤰᤐᤠ ᤁᤢᤈᤠᤗᤠᤶᤒᤠ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤔᤏᤠᤒᤠ ᤂᤖᤧ᤺ᤱ ᤏᤢ ᤛᤡᤵᤑᤱᤃᤪᤠ ᤁᤢᤈᤠ ᤔᤧᤈ॥

¹² ᤂᤧᤱᤜᤠ᤹ᤖᤧ ᤂᤧᤴ ᤗᤠᤈᤣ᤹ᤀᤥ ᤁᤧᤒᤥ᤺ᤰᤐᤠ ᤁᤢᤈᤠᤴ ᤔᤧᤈᤒᤠ ᤁᤢᤍᤠ᤺ᤴᤍᤡᤰᤔᤠᤀᤠᤱᤎᤥᤀᤣ ᤔᤴᤏ ᤌᤠᤔᤠ ᤆᤰ ᤗ᤹ᤖᤧ. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤠᤵᤑᤠᤸᤗᤧᤀᤠᤱ ᤔᤴᤏ ᤔᤧᤱᤄᤥᤛᤢᤴ॥ ᤁᤖ ᤂᤧᤴ ᤋᤱᤒᤣᤀᤥ ᤂᤧᤱᤜᤠ᤹ᤖᤧ ᤁᤏᤠᤏ ᤗᤠᤈᤣ᤹ᤀᤥᤒᤠ ᤁᤢᤈᤠᤴ ᤔᤧᤈᤖᤥ॥

ᤕᤜᤥᤛᤢᤴ ᤏᤢ ᤋᤠᤓᤣ ᤁᤧᤜᤣᤒᤠ ᤔᤏᤠ

¹³ ᤕᤜᤥᤛᤢᤴ ᤕᤖᤡᤜᤥ ᤏᤡ᤺ᤳᤋᤠᤱ ᤘᤕᤧᤸᤗᤧ ᤂᤢᤏᤧ᤹ ᤌᤥ ᤀᤥᤔᤕᤧ. ᤜᤧᤰᤁᤩᤠᤱ ᤁᤢᤜᤢᤰᤁᤥ ᤋᤠᤓᤣ ᤁᤧᤒᤱᤒᤠ ᤔᤏᤠᤎᤡᤰ ᤁᤢᤍᤃᤠᤱ ᤕᤧᤒᤧᤃᤖᤧᤒᤠ ᤏᤡᤛᤢ॥ ᤕᤜᤥᤛᤢᤴ ᤂᤢᤏᤧ᤹ᤀᤥ ᤐᤣᤀᤠᤱ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤀᤠᤏᤡᤃᤣ ᤋᤣ᤺ᤱᤒᤠᤏᤧᤒᤡ ᤀᤡ ᤏᤡᤱᤔᤡᤏᤧᤒᤡ᥅”

¹⁴ ᤜᤧᤰᤁᤩᤠᤱ ᤂᤧᤸᤗᤧ ᤐᤠ᤺ᤳᤋᤢ. “ᤋᤣ᤺ᤱᤒᤠᤀᤠᤱ ᤔᤣ᤺ᤴ. ᤏᤡᤱᤔᤡᤀᤠᤀᤠᤱ ᤔᤣ᤺ᤴ. ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤎᤰᤛᤢᤒᤠ ᤌᤰᤔᤥᤒᤠ ᤐᤥ᤺ᤰᤂᤠᤱᤅᤠᤱ ᤁ᤹ᤕᤥ ᤋᤩᤠᤱᤅᤠᤱ ᤘᤠ᤹ᤀᤠ॥” ᤂᤧᤒᤩᤠᤱ ᤕᤜᤥᤛᤢᤴ ᤂᤠᤶᤒᤠᤱᤅᤥ ᤛᤠᤶᤒᤥᤴ ᤜᤒᤳ ᤑᤴᤇᤡᤱ ᤜᤧᤰᤁᤩᤠᤱ ᤛᤧᤘᤠ ᤔᤧᤳᤋᤢᤀᤠᤱ ᤂᤢᤏᤧ᤹ ᤀᤰᤂᤣ ᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤸᤗᤧ ᤌᤧᤔᤠ ᤆᤥᤃᤢᤱᤗ ᤁᤧᤗ᤹ᤒᤠ ᤁᤧᤏᤡᤱᤘᤠ᤹ ᤘᤠ᤹ᤒᤣ᥅”

¹⁵ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤎᤰᤛᤢᤒᤠ ᤌᤰᤔᤥᤒᤠᤸᤗᤧ ᤕᤜᤥᤛᤢᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤗᤠᤱᤜᤠ᤹ᤀᤥᤒᤠ ᤗᤠᤱᤛᤢ᤺ᤵᤜᤠ᤹ ᤑᤧᤴᤍᤧ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤕᤧᤵᤐᤠ ᤍᤧᤴᤏᤡᤴ ᤛᤣᤛᤣᤒᤠ ᤆᤥᤰ॥” ᤂᤧᤒᤩᤠᤱ ᤕᤜᤥᤛᤢ᤺ᤸᤗᤧ ᤜᤧᤰᤁᤣᤀᤣ ᤆᤥᤃᤢᤖᤥ॥