ᤕᤜᤥᤛᤢ 4 - LIFOTNT

ᤀᤡ᤺ᤳᤗᤢᤱ

¹ ᤀᤠᤸᤗ ᤁᤧᤖᤧᤰ ᤔᤏᤠᤜᤠ᤹ᤖᤧ ᤕᤷᤍᤏ ᤘᤜ᤺ᤱᤅᤡᤴ ᤔᤧᤃᤠ᤺ᤰᤋᤢ ᤔᤧᤛᤢᤖᤢ. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤛᤢᤴ ᤔᤧᤳᤋᤢ.

² “ᤔᤏᤠᤜᤠ᤹ᤗᤠᤶ ᤌᤡᤒᤥᤱᤅᤠᤱ ᤏᤧᤳᤇᤡ ᤕᤧᤶᤒᤡᤳᤇᤠᤜᤠ᤹. ᤌᤠ᤺ᤰᤌᤰᤔᤠ ᤗᤳᤇᤠ ᤗᤳᤇᤠ ᤕᤧᤶᤒᤡᤳᤇᤠ ᤋᤣ᤹ᤖᤧᤛᤧ᤹ᤀᤠᤱ

³ ᤂᤧᤱᤜᤠ᤹ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤧᤛᤧ᤹. ‘ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤗᤢᤶᤔᤥ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤍᤠᤵᤐᤣᤸᤗᤧ ᤔᤧᤍᤥ᤹ᤖᤢᤒᤠᤍᤧᤴᤏᤥᤗᤠᤶ ᤌᤡᤒᤥᤱᤅᤠᤱ ᤏᤧᤳᤇᤡ ᤗᤢᤱᤜᤠ᤹ ᤕᤠᤱᤛᤡᤱᤅᤧᤶᤔᤧ᤹ ᤜᤧᤰᤁᤩᤠᤱ ᤂᤡᤏᤡ᤹ ᤂᤧᤱᤜᤠ᤹ ᤐᤰᤂᤧᤶ ᤑᤧᤳᤋᤧᤶᤔᤧ᤹. ᤂᤧᤒᤩᤠᤱ ᤀᤠᤰᤂᤥᤰ ᤛᤧᤴᤍᤡᤰ ᤂᤡᤏᤡ᤹ ᤀᤠᤳᤋᤡ ᤛᤠ᤺ᤱᤃᤠᤜᤡᤶ ᤁᤧᤗᤣ᤺ᤳᤋᤢᤶᤔᤠᤱ ᤁᤧᤕᤢᤅᤡ ᤜᤠᤒᤠ ᤂᤧᤵᤔᤥ ᤂᤧᤱᤜᤠ᤹ ᤏᤧᤛ᤻ᤛᤧᤶ ᤌᤩᤧᤶᤔᤧ᤹॥’”

⁴ ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤗᤠᤶ ᤕᤜᤥᤛᤢ᤺ᤸᤗᤧ ᤌᤠ᤺ᤰᤌᤰᤔᤠ ᤗᤳᤇᤠ ᤗᤳᤇᤠ ᤛᤣᤃᤢᤛᤡᤒᤠ ᤌᤡᤒᤥᤱᤅᤠᤱ ᤏᤧᤳᤇᤡ ᤕᤧᤶᤒᤡᤳᤇᤠᤜᤠ᤹ ᤀᤢ᤺ᤳᤋᤢᤛᤡ॥

⁵ ᤕᤜᤥᤛᤢ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤒᤣᤛᤠᤱ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤗᤢᤶᤔᤥ ᤐᤣᤃᤧᤶᤔᤧ᤹. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡ ᤌᤠ᤺ᤰᤜᤠ᤹ᤖᤧ ᤂᤢᤏᤡ᤹ ᤂᤠᤏᤡ᤺ᤳ ᤁᤢᤀᤡᤛᤡᤰ ᤁᤧᤖᤧᤰᤗᤧ ᤗᤳᤇᤠ ᤗᤳᤇᤠ ᤗᤢᤱ ᤂᤡᤏᤡ᤹ ᤑᤰᤋᤠᤱᤅᤥ ᤕᤢᤰᤂᤧᤶᤔᤧ᤹ᤀᤠᤱ ᤌᤠᤰᤋᤧᤶᤔᤧ᤹॥

⁶ ᤂᤡᤏᤡ᤹ ᤗᤢᤶᤔᤥ ᤁᤴ ᤗᤳᤇᤠ ᤔᤡᤰᤛᤣᤴ ᤐᤥᤱᤗ. ᤜᤧᤰᤁᤩᤠᤱ ᤕᤠᤱᤛᤡ ᤋᤠᤕᤧᤶᤔᤥ ᤂᤡᤏᤡ᤹ ᤛᤠᤀᤣᤜᤠ᤹ᤖᤧ ‘ᤁᤴ ᤗᤢᤱᤜᤠ᤹ᤖᤧ ᤁᤢᤒᤣᤴ ᤌᤧᤔᤠᤒᤣ᥅’ ᤑᤠ᤹ᤀᤠᤱ ᤛᤣ᤺ᤴᤁᤧᤶᤍᤥᤛᤡᤸᤗᤧ.

⁷ ᤂᤡᤏᤡ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤧᤶᤛᤡᤶᤔᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤒᤣᤛᤠᤱ ᤕᤷᤍᤏᤒᤠ ᤆᤫᤠ᤺ᤳᤋᤡᤴ ᤁᤢᤱᤔᤠ ᤏᤠ᤹ᤖᤧᤀᤠᤱ ᤏᤧᤛ᤻ᤛᤧ॥ ᤛᤴᤍᤥᤰᤁᤡᤸᤗᤧ ᤕᤷᤍᤏ ᤘᤜ᤺ᤱᤅᤡᤴ ᤁᤠ᤺ᤰᤋᤢᤸᤗᤧ ᤕᤷᤍᤏᤒᤠ ᤆᤫᤠ᤺ᤳᤋᤡᤴ ᤁᤢᤱᤔᤠ ᤏᤠ᤹ᤖᤧᤀᤠᤱ ᤏᤧᤛ᤻ᤛᤧ॥’ ᤁᤴ ᤗᤢᤱᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤛᤍᤠᤍᤡᤱᤒᤠ ᤀᤡ᤺ᤳᤗᤢᤱ ᤐᤥᤱᤅᤠᤱ ᤕᤧᤵ॥”

⁸ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤛᤢᤴ ᤔᤧᤳᤋᤢᤒᤠ ᤜᤧᤰᤁᤣ ᤕᤜᤥᤛᤢ᤺ᤸᤗᤧ ᤁᤢᤀᤡᤱᤈᤠᤱᤅᤡᤴ ᤔᤧᤄᤧᤵᤛᤢᤀᤠᤱ ᤀᤡᤛᤪᤠᤀᤡᤗᤡ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤂᤠᤏᤡ᤺ᤳ ᤁᤢᤀᤡᤛᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤷᤍᤏ ᤗᤢᤶᤔᤥᤗᤠᤶ ᤌᤡᤒᤥᤱᤅᤠᤱ ᤏᤧᤳᤇᤡ ᤗᤢᤱᤜᤠ᤹ ᤔᤧᤎᤠᤰᤋᤢ ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤧᤕᤢᤅᤧᤒᤠᤍᤧᤴᤏᤥ ᤀᤡ᤺ᤳᤗᤢᤱ ᤔᤧᤕᤢᤰᤂᤢ॥

⁹ ᤔᤠᤱᤜᤢᤵ ᤛᤴᤍᤥᤰ ᤁᤧᤒᤱᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤍᤠᤵᤐᤣᤸᤗᤧ ᤔᤧᤍᤥ᤹ᤖᤢᤒᤠᤍᤧᤴ. ᤀᤡᤃᤪ ᤕᤷᤍᤏ ᤗᤢᤶᤔᤥᤀᤠᤱ ᤘᤣ᤹ ᤌᤡᤒᤥᤱᤅᤠᤱ ᤏᤧᤳᤇᤡ ᤗᤢᤱᤜᤠ᤹ ᤕᤜᤥᤛᤢ᤺ᤸᤗᤧ ᤕᤧᤵᤛᤢ॥ ᤂᤧᤱᤜᤠ᤹ ᤀᤠᤀᤡᤴ ᤌᤠᤖᤡᤰ ᤜᤠᤒᤠ ᤂᤧᤵᤔᤥᤀᤣ ᤕᤧᤵ॥

¹⁰ ᤔᤏᤠᤜᤠ᤹ ᤔᤧᤵᤔᤠᤛᤡᤖᤧ ᤗᤠᤃᤡ ᤔᤥᤛᤠ᤺ᤸᤗᤧ ᤕᤜᤥᤛᤢᤴ ᤔᤢᤖᤠ ᤔᤧᤳᤋᤢᤀᤠᤱ ᤘᤕᤧᤒᤠ ᤜᤧᤰᤁᤣ. ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤛᤢᤴ ᤐᤡᤖᤢᤒᤠ ᤀᤡᤱᤈᤠᤱᤅᤥᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤔᤧᤴᤈᤢ᤺ᤳᤋᤣ ᤌᤠᤖᤡᤰ ᤔᤠᤱᤜᤢᤵ ᤛᤴᤍᤥᤰ ᤁᤧᤒᤱᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤕᤷᤍᤏ ᤗᤢᤶᤔᤥᤀᤣ ᤜᤠᤒᤠ ᤔᤧᤕᤧᤒᤧ ᤔᤧᤃᤖᤧ. ᤂᤧᤒᤩᤠᤱ ᤔᤏᤠᤜᤠ᤹ ᤜᤠᤖᤠᤜᤠᤖᤠ ᤏᤠᤎᤠ᤺ᤶᤒᤡ ᤔᤧᤃᤠ᤺ᤰᤋᤢᤀᤠᤱ ᤔᤧᤒᤣ॥

¹¹ ᤜᤧᤰᤁᤩᤠᤱ ᤀᤠᤸᤗ ᤁᤧᤖᤧᤰ ᤔᤏᤠᤜᤠ᤹ᤖᤧ ᤏᤠᤎᤠ᤺ᤶᤒᤡ ᤔᤧᤃᤠ᤺ᤰᤋᤢ ᤔᤧᤛᤢᤖᤢ. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥ᤺ᤰᤁᤡᤴᤏᤢ ᤛᤥᤖᤡᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤀᤠᤱ ᤔᤏᤠᤜᤠ᤹ᤖᤧ ᤀᤥᤔᤧᤔᤧᤳᤋᤢ ᤔᤧᤓᤳᤇᤢᤛᤡᤖᤀᤣ ᤋᤃᤠᤱ ᤔᤧᤃᤠ᤺ᤰᤋᤢᤀᤠᤱ ᤔᤧᤓᤧᤖᤧ॥

¹² ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡᤀᤠᤱ ᤘᤕᤧᤒᤠ ᤁᤢᤀᤡᤛᤡᤰ ᤖᤢᤒᤣᤏᤖᤧ ᤁᤢᤎᤠ᤺ᤰᤜᤠ᤹. ᤃᤠᤍᤖᤧ ᤁᤢᤎᤠ᤺ᤰᤜᤠ᤹ ᤏᤢ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤁᤢᤎᤠ᤺ᤰᤜᤠ᤹ ᤘᤣ᤹ ᤀᤡᤛᤪᤠᤀᤡᤗᤡᤜᤠ᤹ᤏᤢ᤺ᤸᤗᤧ ᤋᤃᤡ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠ ᤔᤧᤜᤣ᤹ᤛᤡᤱᤅᤠᤱ ᤏᤠᤎᤠ᤺ᤶᤒᤡ ᤔᤧᤃᤠ᤺ᤰᤋᤢ॥

¹³ ᤋᤧᤴᤎᤱᤗᤧ ᤗᤠᤃᤡ ᤜᤵᤔᤧᤴ ᤗᤡᤒᤥᤱ ᤜᤧᤴᤇᤡᤱ ᤕᤠᤖᤡᤰ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠ ᤁᤧᤜᤣ᤹ᤛᤡᤱᤒᤠ ᤕᤧᤶᤒᤡᤳᤇᤠᤜᤠ᤹ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤏᤠᤎᤠ᤺ᤶᤒᤡ ᤔᤧᤃᤠ᤺ᤰᤋᤢᤀᤠᤱ ᤕᤖᤡᤜᤥᤒᤠ ᤏᤧᤏᤧᤒᤠᤍᤧᤴᤏᤥ ᤔᤧᤒᤣ॥

¹⁴ ᤂᤧᤸᤗᤧ ᤕᤠ᤺ᤴᤍᤡᤰ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤏᤡᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤛᤢᤴ ᤕᤶᤒᤠ ᤗᤠᤶᤗᤥᤒᤠ ᤆᤥᤃᤢ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤜᤡᤱᤜᤡᤱ ᤔᤥᤛᤠᤴ ᤜᤧᤰᤁᤣᤀᤣ ᤕᤜᤥᤛᤢᤴ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢ॥

¹⁵ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤛᤢᤴ ᤔᤧᤳᤋᤢ.

¹⁶ “ᤔᤠᤱᤜᤢᤵ ᤛᤠᤵᤗᤢᤱ ᤁᤧᤕᤠᤰᤐᤠ ᤛᤴᤍᤥᤰᤁᤡᤴ ᤁᤧᤒᤱᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤕᤷᤍᤏᤗᤠᤶ ᤔᤧᤎᤥ᤺ᤰᤛᤡᤱ ᤔᤧᤎᤠᤱᤗ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤧᤛᤧ᤹॥”

¹⁷ ᤁᤸᤗᤧᤆᤥᤃᤢᤸᤗᤧ ᤕᤜᤥᤛᤢ᤺ᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤀᤡᤱᤈᤠᤱ ᤐᤡᤖᤢᤛᤡ. “ᤂᤡᤏᤡ᤹ ᤕᤷᤍᤏᤗᤠᤶ ᤌᤥ ᤌᤥ᤺ᤰᤛᤡᤱ ᤌᤠᤅᤧᤶᤔᤧ᤹॥”

¹⁸ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰ ᤁᤧᤒᤱᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤕᤷᤍᤏ ᤗᤢᤶᤔᤥᤗᤠᤶ ᤔᤧᤎᤥ᤺ᤰᤛᤡᤱ ᤔᤧᤈᤢᤖᤧᤀᤠᤱ ᤂᤢᤴᤇᤡ᤹ ᤗᤠᤱᤍᤠᤱᤐᤣᤸᤗᤧ ᤛᤧᤱᤛᤧᤱᤒᤠ ᤂᤠᤶᤒᤠᤱᤅᤡᤴ ᤔᤧᤍᤥ᤹ᤖᤢᤏᤢᤔᤧ᤺ᤴᤏᤣ ᤕᤷᤍᤏᤒᤠ ᤆᤫᤠ᤺ᤳᤋᤡᤴ ᤁᤢᤗᤠᤶᤔᤥ ᤏᤢ᤺ᤰᤂᤧ ᤕᤧ ᤜᤧᤰᤁᤩᤠᤱ ᤋᤃᤡᤒᤠ ᤜᤧᤰᤁᤣᤀᤣ ᤁᤢᤕᤠᤜᤠ᤹ ᤌᤡᤶᤛᤢᤖ ᤁᤢᤱᤔᤠ ᤜᤣ᤺ᤰᤋᤧ॥

¹⁹ ᤌᤡᤰᤛᤡᤃᤣᤰᤐᤠ ᤗᤠᤀᤥᤒᤠ ᤌᤡᤒᤥᤱ ᤕᤧᤴᤏᤥ ᤔᤏᤠᤜᤠ᤹ ᤕᤷᤍᤏᤗᤠᤶ ᤔᤧᤎᤥ᤺ᤰᤛᤡᤱ ᤔᤧᤎᤠᤅᤧᤀᤠᤱ ᤕᤖᤡᤜᤥ ᤏᤠᤱᤃᤧᤴ ᤗᤧᤵᤔᤠᤱ ᤀᤡ᤺ᤴᤍᤥᤀᤥ ᤃᤡᤗᤃᤠᤗ ᤔᤧᤵᤔᤏᤠᤒᤠᤍᤧᤴᤏᤥ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢ॥

²⁰ ᤂᤧᤱᤜᤠ᤹ᤖᤧ ᤕᤷᤍᤏ ᤘᤜ᤺ᤱᤅᤥᤗᤠᤶ ᤔᤧᤗ᤺ᤳᤋᤢ ᤔᤧᤎᤠᤰᤋᤢᤒᤠ ᤂᤧᤴ ᤌᤡᤒᤥᤱᤅᤠᤱ ᤏᤧᤳᤇᤡ ᤗᤢᤱᤜᤠ᤹ ᤕᤜᤥᤛᤢ᤺ᤸᤗᤧ ᤃᤡᤗᤃᤠᤗᤀᤥ ᤜᤠᤃᤢᤕᤢᤰᤛᤢ॥

²¹ ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤕᤠᤱᤛᤡ ᤂᤡᤏᤡ᤹ ᤛᤠᤀᤣᤜᤠ᤹ᤖᤧ ‘ᤁᤴ ᤗᤢᤱᤜᤠ᤹ᤖᤧ ᤁᤢᤒᤣ ᤌᤧᤔᤠᤒᤣ᥅’ ᤑᤠ᤹ᤀᤠᤱ ᤛᤣ᤺ᤴᤁᤧᤶᤍᤥᤛᤡᤸᤗᤧ

²² ᤂᤡᤏᤡ᤹ ᤂᤧᤱᤜᤠ᤹ ᤔᤧᤵᤔᤠ ᤁᤧᤛᤢᤰᤋᤢᤶᤛᤡᤶ᤹. ‘ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤷᤍᤏ ᤘᤜ᤺ᤱᤅᤡᤴ ᤛᤧᤱᤛᤧᤱᤒᤠ ᤂᤠᤶᤒᤠᤱᤅᤥ ᤔᤧᤍᤥ᤹ᤖᤢᤀᤠᤱ ᤔᤧᤃᤠ᤺ᤰᤋᤢᤀᤠᤱ ᤘᤕᤧ॥’

²³ ᤀᤠᤰᤂᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤡᤴ ᤀᤠᤏᤡᤃᤣ ᤔᤧᤱᤃᤠᤰ ᤔᤧᤴᤇᤢ᤺ᤳᤋᤣ ᤌᤠᤖᤡᤰ ᤀᤠᤏᤡᤃᤣ ᤋᤃᤡ ᤆᤵᤐᤪᤧᤰ ᤆᤒᤧᤖ ᤕᤠ᤺ᤴᤍᤢ. ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ ᤋᤃᤡᤀᤣ ᤂᤡᤏᤡ᤹ ᤏᤠᤎᤠ᤺ᤶᤒᤡ ᤔᤧᤱᤃᤠᤰ ᤔᤧᤴᤇᤢ᤺ᤳᤋᤣ ᤌᤠᤖᤡᤰ ᤕᤷᤍᤏᤒᤠ ᤆᤫᤠ᤺ᤳᤋᤡᤴᤏᤠᤱ ᤆᤵᤐᤪᤧᤰ ᤆᤒᤧᤖ ᤕᤠ᤺ᤴᤍᤢᤀᤠᤱ ᤘᤕᤧ॥

²⁴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤥᤒᤠ ᤔᤢᤰᤛᤠᤶᤔᤡᤴ ᤏᤡᤱᤘᤠ᤹ ᤔᤧᤄᤥᤛᤢᤖ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤂᤡᤏᤡ᤹ ᤀᤠᤓᤧᤸᤗᤧᤛᤠᤱ ᤁᤡᤛᤧᤶᤔᤧ᤹ ᤑᤠ᤹ᤀᤠᤱ ᤁᤴ ᤁᤧᤖᤧᤰ ᤐᤥ᤺ᤰᤂᤧᤒᤠᤖᤥ॥”