ᤕᤜᤥᤛᤢ 3 - LIFOTNT

ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤷᤍᤏ ᤘᤜ᤺ᤱᤅᤡᤴ ᤔᤧᤃᤠ᤺ᤰᤋᤢ

¹ ᤕᤜᤥᤛᤢᤴ ᤋᤠᤏᤠᤶ ᤀᤠᤴᤍᤣᤴ ᤐᤥᤃᤧ. ᤜᤧᤰᤁᤩᤠᤱ ᤂᤢᤏᤧ᤹ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤛᤡᤳᤋᤡᤔᤗᤠᤶ ᤕᤷᤍᤏ ᤔᤧᤓᤧᤖᤧ. ᤂᤧᤵᤔᤥ ᤂᤢᤴᤇᤡ᤹ ᤏᤠᤎᤠ᤺ᤶᤒᤡ ᤁᤠ᤺ᤰᤔᤠᤏᤢ᤺ᤸᤗᤧ ᤋᤃᤡ ᤕᤠᤱᤔᤧᤎᤥ᤺ᤰᤋᤧ॥

² ᤛᤢᤶᤕᤠᤴ ᤀᤣᤃᤠᤱ ᤛᤢᤜᤠᤱᤕᤢᤰᤐᤠᤜᤠ᤹ ᤛᤠ᤺ᤱᤃᤠᤜᤡᤶ ᤗᤢᤶᤔᤥ ᤔᤧᤒᤣ.

³ ᤜᤧᤰᤁᤩᤠᤱ ᤔᤏᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤀᤠᤱ ᤀᤡᤱᤈᤠᤱ ᤔᤧᤒᤡᤖᤢᤛᤡ. “ᤀᤠᤸᤗ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤁᤧᤏᤡᤛᤢᤶ᤹. ᤜᤧᤰᤁᤩᤠᤱ ᤂᤧᤴ ᤁᤧᤒᤱᤒᤠᤀᤠᤱ ᤁᤧᤍᤣ᤹ᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤗᤧᤒᤡᤜᤠ᤹ ᤁᤧᤏᤡᤛᤢᤶᤛᤡᤶ᤹. ᤂᤧᤒᤧᤸᤗᤧ ᤂᤡᤏᤡ᤹ ᤁᤧᤕᤢᤅᤡᤒᤠᤍᤧᤴᤜᤠ᤹ ᤗᤧᤖᤧᤶᤔᤧ᤹ᤀᤠᤱ ᤛᤴᤍᤥᤰᤁᤡᤸᤗᤧ ᤁᤢᤀᤣᤃᤠᤱ ᤌᤠᤀᤠᤛᤡᤶᤔᤧ᤹॥

⁴ ᤁᤶᤓᤗ᤹ᤖᤡᤰ ᤐᤣ᤺ᤰᤔᤠ ᤁᤧᤒᤥᤱᤒᤠ ᤗᤠᤶᤔᤡᤴ ᤂᤡᤏᤡ᤹ ᤁᤧᤏᤡᤛᤢᤶ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤗᤠᤶᤔᤥ ᤂᤡᤏᤡ᤹ ᤋᤃᤡ ᤗᤠᤱᤔᤧᤱᤄᤣ᤺ᤰᤁᤣ ᤁᤧᤘᤕᤡ᤹॥ ᤁᤖ ᤂᤡᤏᤡ᤹ ᤏᤢ ᤂᤧᤸᤗᤧ ᤁᤢᤗᤢᤶᤔᤥ ᤜᤵᤔᤧᤴ ᤜᤧᤴᤇᤡᤱ ᤏᤧᤳᤇᤡ ᤜᤢᤰᤛᤡᤰ ᤗᤠ᤺ᤳᤗᤠ᤺ᤳ ᤏᤧᤖ ᤕᤠ᤺ᤴᤍᤧᤶᤔᤧ᤹॥ ᤂᤧᤸᤗᤧ ᤁᤢᤒᤣᤛᤠᤱ ᤔᤧᤒᤣᤃᤧᤶᤔᤡᤴᤏᤧ᤹॥”

⁵ ᤕᤜᤥᤛᤢ᤺ᤸᤗᤧ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤵᤑᤣᤰ ᤛᤣᤛᤣᤒᤠ ᤆᤥ᤺ᤰᤁᤠᤛᤡᤶᤔᤧ᤹. ᤌᤣᤀᤠᤱᤓᤧᤸᤗᤧ ᤋᤠ᤺ᤴᤍᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤗᤢᤶᤔᤥ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢ᤹॥”

⁶ ᤕᤜᤥᤛᤢ᤺ᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤔᤠᤱᤜᤢᤵ ᤛᤴᤍᤥᤰᤁᤡᤴ ᤐᤰᤂᤧᤶᤔᤧ᤹ᤀᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤋᤃᤡ ᤗᤠᤱᤄᤣᤃᤧᤶᤔᤧ᤹॥” ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤧᤒᤰᤂᤢᤀᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤋᤃᤡ ᤔᤧᤒᤣ॥

⁷ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤛᤢᤴ ᤔᤧᤳᤋᤢ. “ᤀᤠᤰᤂᤣᤗ᤹ᤖᤡᤰ ᤀᤠᤱᤃᤠ᤹ ᤔᤥᤛᤠ᤺ᤴᤏᤢ ᤛᤥᤖᤡᤰ ᤘᤕᤠᤱ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤱᤃᤠ᤹ ᤂᤧᤏᤧ᤹ᤏᤢᤀᤠᤱ ᤛᤥᤖᤡᤰ ᤘᤠ᤹ᤀᤠ ᤑᤠ᤹ᤀᤠᤱ ᤁᤴᤜᤠ᤹ᤖᤧ ᤏᤡᤱᤘᤠ᤹ ᤂᤥᤔᤠᤖᤧ ᤗᤠᤃᤡ ᤀᤠᤀᤡᤴᤒᤠ ᤕᤧᤴᤏᤠᤱᤎᤥ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤧᤏᤧ᤹ ᤕᤶᤒᤠ ᤗᤠᤶᤗᤥᤒᤠ ᤆᤥ᤺ᤰᤏᤧᤖᤥ॥

⁸ ᤔᤠᤱᤜᤢᤵ ᤛᤴᤍᤥᤰ ᤁᤧᤒᤱᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤂᤧᤏᤧ᤹ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤧᤛᤧ᤹. ‘ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤂᤡᤏᤡ᤹ ᤁᤧᤃᤧᤖᤡᤀᤠᤱ ᤆᤫᤠ᤺ᤳᤋᤥ ᤗᤠᤛᤠᤶᤔᤧ᤹ᤀᤠᤱ ᤕᤧᤒᤧᤶᤔᤧ᤹॥’”

⁹ ᤕᤜᤥᤛᤢ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤢᤛᤡ. “ᤁᤳᤏᤠ ᤑᤧᤖᤧᤶᤔᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹॥

¹⁰ ᤁᤢᤜᤡᤱᤘᤧᤳ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤗᤢᤶᤔᤥ ᤘᤠ᤹ ᤜᤧᤰᤁᤩᤠᤱ ᤂᤡᤏᤡ᤹ ᤋᤃᤡᤗᤠᤶ ᤁᤏᤠᤏᤡ. ᤜᤡᤳᤋᤡ. ᤜᤡᤒ᤻ᤒᤡ. ᤐᤖᤡᤈ᤻ᤈᤡ. ᤃᤡᤷᤃᤠᤛᤡ. ᤀᤣᤔᤥᤖᤡ ᤏᤢ ᤕᤒᤢᤛᤡᤜᤠ᤹ ᤛᤧᤰᤂᤠᤀᤣ ᤏᤠ᤺ᤳᤋᤢᤍᤣᤛᤢᤛᤡ ᤁᤧᤗ᤹ᤒᤠᤴ ᤜᤠᤒᤠ ᤁᤴᤗᤠᤶᤒᤠᤀᤣ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥

¹¹ ᤀᤥᤔᤧᤳᤋᤧᤶᤔᤧ᤹. ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤂᤡᤏᤡ᤹ ᤋᤃᤡ ᤋᤃᤡ ᤕᤷᤍᤏ ᤏᤠᤎᤠ᤺ᤶᤒᤡ ᤐᤣᤰ॥

¹² ᤀᤠᤸᤗ ᤀᤡᤛᤪᤠᤀᤡᤗᤒᤠ ᤌᤠ᤺ᤰ ᤌᤰᤔᤠᤗᤠᤶ ᤗᤳᤇᤠ ᤗᤳᤇᤠ ᤌᤡᤒᤥᤱᤅᤠᤱ ᤏᤧᤳᤇᤡ ᤕᤧᤶᤒᤡᤳᤇᤠ ᤛᤣᤃᤧᤶᤛᤡᤶᤔᤧ᤹॥

¹³ ᤀᤠᤸᤗ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰ ᤁᤧᤒᤱᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤍᤠᤵᤐᤣᤴ ᤕᤷᤍᤏ ᤘᤜ᤺ᤱᤅᤥᤒᤠ ᤆᤫᤠ᤺ᤳᤋᤥ ᤆᤢᤰᤁᤡᤸᤗᤧ. ᤀᤠᤶᤓᤠ ᤂᤧᤴ ᤕᤧᤶᤔᤥ ᤌᤥ ᤏᤢ ᤁᤧᤃᤢᤱᤒᤠ ᤁᤧᤕᤢᤒᤠ ᤕᤷᤍᤏ ᤘᤜ᤺ᤱᤅᤥᤒᤠ ᤆᤫᤠ᤺ᤳᤋᤡᤴ ᤁᤢᤱᤔᤠ ᤏᤠ᤹ ᤜᤧᤰᤁᤩᤠᤱ ᤗᤢᤶᤛᤡᤱᤅᤠᤱ ᤕᤧᤵᤗᤥ॥”

¹⁴ ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤕᤷᤍᤏ ᤘᤜ᤺ᤱᤅᤡᤴ ᤁᤠ᤺ᤰᤔᤠᤖᤧ ᤗᤠᤃᤡ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤒᤠᤅᤣ ᤀᤠᤒᤠᤅᤣ ᤛᤠ᤺ᤱᤃᤠᤜᤡᤶ ᤂᤠᤵᤔᤠᤜᤠ᤹ ᤔᤧᤕᤠᤱᤛᤡᤱ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤧᤒᤰᤂᤢᤀᤠᤱ ᤂᤧᤱᤜᤠ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤋᤃᤡ ᤔᤧᤎᤠᤛᤡᤱ ᤔᤧᤒᤣ॥

¹⁵ ᤁᤢᤈᤠ ᤛᤢᤶᤔᤠ ᤕᤧᤶ ᤂᤠᤖᤠᤰ ᤕᤷᤍᤏᤒᤠ ᤆᤫᤠ᤺ᤳᤋᤡᤴ ᤁᤢᤱᤕᤢᤀᤠᤱ ᤐᤳ॥ ᤜᤧᤰᤁᤣᤛᤠᤱ ᤔᤠᤱᤜᤢᤵ ᤛᤴᤍᤥᤰ ᤁᤧᤒᤱᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤕᤷᤍᤏᤀᤥ ᤔᤧᤃᤧᤖᤧᤀᤠᤱ ᤂᤢᤴᤇᤡ᤹ ᤗᤠᤱᤍᤠᤵᤐᤣᤸᤗᤧ ᤁᤢᤕᤠᤀᤥᤒᤠ ᤆᤫᤠ᤺ᤳᤋᤡᤴ ᤔᤧᤛᤢᤛᤢᤏᤢᤔᤧ᤺ᤴᤏᤣ

¹⁶ ᤌᤥᤗᤠᤶᤒᤠ ᤁᤧᤕᤢᤒᤠ ᤆᤫᤠ᤺ᤳᤋᤡᤴ ᤛᤠ᤹ᤖᤡᤰ ᤏᤠᤏᤠᤰ. ᤛᤠᤷᤋᤠᤏᤗᤠᤶ ᤏᤡ᤺ᤳᤋᤠᤱ ᤀᤠᤍᤔ ᤔᤧᤵᤔᤏᤠᤒᤠ ᤕᤧᤰᤕᤰᤁᤥᤀᤣ ᤁᤢᤱᤔᤠ ᤏᤠ᤹ᤖᤧ ᤜᤧᤰᤁᤩᤠᤱ ᤗᤢᤶᤛᤡᤱᤅᤠᤱ ᤏᤧᤛ᤻ᤛᤧ᤹. ᤂᤶᤓᤩᤠᤱ ᤀᤖᤠᤒᤠᤒᤠ ᤘᤖ᤺ᤱ. ᤀᤡᤃᤪ ᤕᤢᤶᤗᤠ᤺ᤰᤂᤠᤱ ᤘᤖ᤺ᤱ ᤗᤧᤵᤔᤠᤱ ᤁᤧᤃᤢᤱᤒᤠ ᤁᤧᤒᤣ᤺ᤰᤐᤠ ᤆᤫᤠ᤺ᤳᤋᤡᤴ ᤛᤩᤠᤰ ᤐᤢ᤹ᤖᤧᤀᤠᤱ ᤆᤵᤐᤪᤧᤰ ᤆᤒᤧ॥ ᤁᤸᤗᤧᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤁᤳᤏᤠᤜᤠᤱᤍᤠᤱᤗᤠᤶ ᤕᤖᤡᤜᤥ ᤗᤧᤵᤔᤠᤱ ᤔᤧᤃᤠ᤺ᤰᤋᤢᤀᤠᤱ ᤔᤧᤒᤣ॥

¹⁷ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤛᤧᤱᤛᤧᤱᤒᤠ ᤂᤠᤶᤒᤠᤱᤅᤥᤗᤠᤶ ᤔᤧᤃᤠ᤺ᤰᤋᤢᤀᤠᤱ ᤂᤧᤴ ᤛᤢᤘᤠᤱᤒᤠ ᤁᤠᤰ ᤔᤏᤠᤜᤠ᤹ ᤕᤷᤍᤏ ᤏᤠᤎᤠ᤺ᤶᤒᤡ ᤔᤧᤶᤒᤣ᤺ᤰᤁᤣ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰ ᤁᤧᤒᤱᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤗᤢᤶᤔᤥᤒᤠ ᤛᤧᤱᤛᤧᤱᤒᤠ ᤂᤠᤶᤒᤠᤱᤅᤥ ᤌᤎᤵ ᤔᤧᤸᤗ᤹ᤀᤣ ᤔᤧᤕᤧᤒᤧᤖᤥ॥