ᤕᤜᤥᤛᤢ 24 - LIFOTNT

¹ ᤂᤧᤒᤩᤠᤱ ᤕᤜᤥᤛᤢ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤌᤠ᤺ᤰᤜᤠ᤹ ᤛᤁᤣᤔᤀᤥ ᤑᤢᤰᤂᤢᤛᤡ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤛᤠᤶᤕᤥᤛᤡᤰᤛᤠᤶᤒᤠᤜᤠ᤹. ᤌᤠ᤺ᤰᤗᤠᤶᤗᤥᤒᤠᤜᤠ᤹. ᤂᤠᤛᤧᤴᤗᤥ᤺ᤶᤒᤠᤜᤠ᤹ ᤏᤢ ᤛᤢᤜᤠᤱᤕᤢᤰᤐᤠᤜᤠ᤹ ᤀᤢ᤺ᤳᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤵᤑᤣᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤔᤧᤍᤥ᤺ᤴᤇᤡᤱ॥

² ᤕᤜᤥᤛᤢ᤺ᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ᤹. ‘ᤀᤢᤴᤇᤥᤴ ᤀᤒᤪᤠᤜᤠᤔ ᤏᤢ ᤏᤠᤜᤥᤖᤖᤧ ᤁᤢᤶᤒᤠ ᤋᤣᤖᤜ. ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤕᤢᤑᤪᤣᤋᤡᤛ ᤘᤜ᤺ᤱ ᤏᤠᤎᤠ᤺ᤶᤒᤡ ᤔᤧᤕᤢᤅᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤘᤣ᤹ ᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡ॥

³ ᤁᤖ ᤀᤠᤱᤃᤠ᤹ ᤂᤡᤏᤡ᤹ ᤐᤠᤎᤧᤒᤠ ᤀᤒᤪᤠᤜᤠᤶᤔᤡᤴ ᤕᤢᤑᤪᤣᤋᤡᤛ ᤘᤜ᤺ᤱ ᤏᤠᤎᤠ᤺ᤶᤒᤡᤗᤠᤶ ᤑᤧᤳᤋᤢᤱ. ᤜᤧᤰᤁᤩᤠᤱ ᤂᤢᤏᤧ᤹ ᤁᤏᤠᤏ ᤗᤠᤈᤣ᤹ ᤁᤧᤖᤧᤰ ᤐᤡᤛᤠᤱ ᤗᤠᤶᤗᤥᤛᤢᤱᤅᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤁᤢᤀᤣᤜᤠ᤹ ᤑᤥᤛᤢᤱᤛᤡᤱ॥ ᤀᤠᤱᤃᤠ᤹ ᤂᤢᤏᤧ᤹ ᤀᤡᤛᤜᤠᤰᤁᤧᤴ ᤐᤡᤖᤢᤱ॥

⁴ ᤕᤠᤶᤔᤥ ᤀᤠᤱᤃᤠ᤹ ᤀᤡᤛᤜᤠᤰᤁᤧᤴ ᤕᤠᤁᤢᤒ ᤏᤢ ᤀᤣᤛᤠᤘ ᤏᤧᤵᤑᤢ ᤁᤢᤛ᤻ᤛᤠ ᤐᤡᤖᤢᤱ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤣᤛᤠᤒᤧᤴ ᤗᤰᤂᤥᤔᤠᤖᤧ ᤗᤠᤃᤡ ᤛᤣᤀᤡᤖᤒᤠ ᤁᤥ᤺ᤰᤔᤠ ᤑᤠᤱᤈᤱ ᤗᤠᤈᤣᤴ ᤐᤡᤖᤢᤱ॥ ᤁᤖ ᤕᤠᤁᤢᤒ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤃ ᤔᤡᤛᤪ ᤗᤠᤈᤣ᤹ ᤕᤥ ᤗᤧᤵᤔᤠᤱ ᤔᤧᤒᤣ॥

⁵ “‘ᤂᤧᤒᤩᤠᤱ ᤀᤠᤱᤃᤠ᤹ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤐᤠᤱᤄᤢᤱᤛᤡᤱᤅᤠᤱ ᤂᤧᤵᤔᤥ ᤀᤠᤱᤃᤠ᤹ ᤆᤥᤃᤢᤱᤒᤠ ᤕᤠ᤺ᤶᤒᤰᤗᤠᤶ ᤔᤡᤛᤪ ᤗᤠᤈᤣ᤹ᤀᤥ ᤕᤧᤳᤋᤢᤰᤂᤣ ᤋᤩᤧᤖ ᤕᤠ᤺ᤴᤍᤢᤱ. ᤜᤧᤰᤁᤩᤠᤱ ᤋᤠ᤺ᤴᤍᤡ ᤀᤠᤱᤃᤠ᤹ ᤂᤡᤏᤡ᤹ ᤗ᤺ᤳᤏᤡᤱ ᤑᤧᤳᤏᤡᤱ॥

⁶ ᤀᤠᤱᤃᤠ᤹ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤔᤡᤛᤪᤗᤠᤶ ᤗ᤺ᤳᤋᤢᤱ ᤑᤧᤳᤋᤢᤱᤛᤡᤱᤅᤡᤸᤗᤧ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤥ ᤌᤠᤖᤡᤰ ᤂᤡᤏᤡ᤹ ᤁᤧᤃᤧᤖᤡ ᤁᤧᤓᤧᤖᤡ. ᤔᤡᤛᤪᤡᤜᤠ᤹ᤖᤧ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤀᤴᤗᤠᤎᤠ ᤜᤧᤰᤁᤩᤠᤱ ᤀᤴᤃᤧᤗᤥᤱᤒᤠᤜᤠ᤹ᤏᤢ ᤛᤥᤛᤥᤖᤡᤰ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤥ ᤌᤠᤖᤡᤰ ᤔᤧᤏᤠ᤺ᤳᤋᤢ ᤔᤧᤓᤧᤳᤋᤢᤛᤡ॥

⁷ ᤁᤖ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤔᤧᤓᤠᤰᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤂᤡᤏᤡ᤹ ᤏᤢ ᤔᤡᤛᤪ ᤁᤧᤕᤢᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤠᤔᤠᤰᤋᤧᤖ ᤕᤠ᤺ᤴᤍᤢᤀᤠᤱ ᤔᤡᤛᤪᤡᤜᤠ᤹ᤀᤥ ᤘᤖ᤺ᤱᤅᤡᤴ ᤏᤢ᤺ᤰᤋᤢᤀᤠᤱ ᤂᤧᤱᤜᤠ᤹ ᤜᤢᤶᤛᤢ ᤁᤣ᤺ᤳᤋᤢᤛᤡ॥ ᤔᤡᤛᤪ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤌᤧᤔᤠ ᤆᤥᤃᤢᤱ. ᤂᤧᤴ ᤂᤡᤏᤡ᤹ ᤀᤠᤵᤑᤣᤰ ᤔᤡᤰᤁᤡᤸᤗᤧ ᤁᤧᤏᤡᤛᤢᤶ॥ ᤂᤧᤒᤩᤠᤱ ᤂᤡᤏᤡ᤹ ᤕᤖᤡᤰ ᤕᤧᤴ ᤌᤠᤖᤡᤰ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤁᤧᤘᤕᤡ॥

⁸ “‘ᤀᤠᤱᤃᤠ᤹ ᤕᤷᤍᤏ ᤏᤠᤎᤠ᤺ᤶᤒᤡ ᤁᤧᤕᤢᤱᤒᤠ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤂᤡᤏᤡ᤹ ᤑᤧᤳᤏᤡᤱ॥ ᤂᤧᤱᤜᤠ᤹ ᤂᤡᤏᤡ᤹ᤏᤢ ᤌᤱ ᤔᤧᤈᤥᤃᤧ. ᤂᤧᤒᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤂᤡᤏᤡ᤹ ᤜᤢᤰᤁᤥ ᤌᤠᤛᤢᤱᤛᤡᤱᤅᤠᤱ ᤂᤡᤏᤡ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤁᤧᤕᤢᤰᤋᤢᤶ॥ ᤀᤠᤱᤃᤠ᤹ ᤂᤡᤏᤡ᤹ ᤋᤃᤡ ᤂᤧᤱᤜᤠ᤹ ᤔᤧᤰᤂᤢᤱᤛᤡᤱ॥

⁹ ᤂᤧᤒᤩᤠᤱ ᤔᤥᤀᤠᤒᤒᤠ ᤜᤠᤱ ᤛᤡᤵᤐᤥᤖᤖᤧ ᤁᤢᤛ᤻ᤛᤠ ᤒᤠᤗᤠᤰᤁᤧᤴ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤌᤰᤋᤧ॥ ᤜᤧᤰᤁᤩᤠᤱ ᤂᤡᤏᤡ᤹ ᤔᤠᤱᤍᤣ ᤛᤠᤱᤃᤪᤠ ᤔᤧᤵᤔᤠᤖᤧ ᤗᤠᤃᤡ ᤒᤠᤗᤠᤁᤧᤸᤗᤧ ᤒᤀᤥᤖᤖᤧ ᤁᤢᤛ᤻ᤛᤠ ᤒᤠᤗᤠᤔᤧᤴ ᤀᤢ᤺ᤵᤔᤠ ᤐᤠᤱᤄᤢᤛᤡ॥

¹⁰ ᤁᤖ ᤒᤠᤗᤠᤔᤖᤧ ᤁᤢᤒᤣᤗᤡᤴ ᤀᤠᤱᤃᤠ᤹ ᤔᤧᤱᤄᤧᤶ ᤔᤧᤶᤒᤡᤒᤠ॥ ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ᤃ ᤂᤡᤏᤡ᤹ ᤆᤰᤔᤧᤸᤗ᤹ᤀᤣ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶᤏᤡ ᤁᤧᤒᤡᤖᤡ॥ ᤁᤶᤓᤗ᤹ᤖᤡᤰᤁᤣ ᤀᤠᤱᤃᤠ᤹ ᤂᤡᤏᤡ᤹ ᤒᤠᤗᤠᤁᤧᤸᤗᤧ ᤁᤢᤜᤢᤰᤁᤥᤗᤠᤶ ᤛᤧ᤺ᤵᤏᤡᤱ॥

¹¹ “‘ᤂᤧᤴ ᤀᤣᤃᤠᤱ ᤕᤷᤍᤏ ᤘᤜ᤺ᤱᤅᤡᤴ ᤁᤧᤃᤠ᤺ᤰᤋᤢᤶᤔᤠᤱ ᤕᤖᤡᤜᤥ ᤁᤧᤓᤧᤖᤡ॥ ᤜᤧᤰᤁᤩᤠᤱ ᤕᤖᤡᤜᤥᤒᤠ ᤔᤏᤠᤜᤠ᤹. ᤀᤣᤔᤥᤖᤡ. ᤐᤖᤡᤈ᤻ᤈᤡ. ᤁᤏᤠᤏᤡ. ᤜᤡᤳᤋᤡ. ᤃᤡᤷᤃᤠᤛᤡ. ᤜᤡᤒ᤻ᤒᤡ ᤏᤢ ᤕᤒᤢᤛᤡᤜᤠ᤹ ᤂᤡᤏᤡ᤹ᤏᤢ ᤌᤱ ᤔᤧᤈᤥᤃᤧ॥ ᤁᤖ ᤀᤠᤱᤃᤠ᤹ ᤂᤧᤱᤜᤠ᤹ ᤂᤡᤏᤡ᤹ ᤜᤢᤰᤁᤥ ᤌᤠᤛᤢᤱᤛᤡᤱ॥

¹² ᤀᤠᤱᤃᤠ᤹ ᤂᤡᤏᤡ᤹ ᤋᤃᤡᤋᤃᤡ ᤛᤠᤘᤠ ᤛᤰᤘᤠ ᤌᤡᤰ ᤐᤠᤱᤄᤢᤱᤍᤣᤛᤢᤱ. ᤂᤧᤸᤗᤧ ᤂᤧᤱᤜᤠ᤹. ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤏᤧᤳᤇᤡ ᤜᤠᤱᤜᤠ᤹ᤀᤠᤱ ᤂᤡᤏᤡ᤹ ᤋᤃᤡᤗᤠᤶ ᤏᤠ᤺ᤳᤋᤢᤍᤣᤛᤢᤛᤡ॥ ᤂᤧᤴ ᤂᤡᤏᤡ᤹ ᤀᤠᤵᤑᤣᤰ ᤋᤠᤓᤣ ᤏᤢ ᤗᤡ᤺ᤸᤗᤧ ᤆᤥ᤺ᤰᤔᤠ ᤔᤧᤒᤥ᤺ᤰᤂᤧᤴ॥

¹³ ᤁᤶᤓᤗ᤹ᤖᤡᤰ ᤂᤡᤏᤡ᤹ ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤢᤍᤡᤰ ᤔᤧᤴᤈᤥ᤺ᤰᤁᤣᤒᤠ ᤗᤠᤈᤣᤴ ᤏᤢ ᤂᤡᤏᤡ᤹ ᤀᤠᤵᤑᤣᤰ ᤁᤧᤴᤈᤥᤃᤢᤶᤔᤡᤶᤒᤠ ᤕᤧᤰᤕᤰᤜᤠ᤹ ᤂᤡᤏᤡ᤹ ᤐᤡᤏᤡᤱ॥ ᤂᤡᤏᤡ᤹ ᤂᤧᤵᤔᤥ ᤁᤧᤕᤢᤅᤡᤖ ᤁᤧᤘᤕᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤵᤑᤣᤰ ᤁᤧᤸᤗᤣ᤺ᤳᤋᤢᤶᤔᤡᤶᤒᤠ ᤆᤧᤸᤗᤧᤰᤛᤣ᤹ᤜᤠ᤹ ᤏᤢ ᤆᤤᤋᤢᤏ ᤛᤡᤱᤛᤣ᤹ᤜᤠ᤹ ᤁᤧᤈᤠᤶᤗ ᤁᤧᤘᤕᤡ᤹॥’

¹⁴ “ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤕᤜᤘᤣ ᤍᤠᤱᤒᤧᤴᤏᤢ ᤂᤡᤏᤡ᤹ ᤁᤡᤛᤧᤶᤔᤧ᤹. ᤜᤧᤰᤁᤩᤠᤱ ᤏᤛᤠ᤺ᤴᤛᤠᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤂᤢᤏᤧ᤹ ᤔᤠᤱᤛᤧᤘᤠ ᤔᤧᤳᤋᤧᤶᤔᤧ᤹॥ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤕᤢᤑᤪᤣᤋᤡᤛ ᤘᤜ᤺ᤱ ᤏᤠᤎᤠ᤺ᤶᤒᤡ ᤏᤢ ᤔᤡᤛᤪ ᤗᤠᤈᤣ᤹ᤀᤥ ᤛᤧᤘᤠ ᤔᤧᤔᤧᤳᤋᤢᤛᤡᤒᤠ ᤔᤠᤱᤜᤠ᤹ ᤗᤠᤵᤑᤢᤛᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤀᤥ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥᤃᤧᤶᤔᤧ᤹॥

¹⁵ ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤂᤡᤏᤡ᤹ ᤛᤡᤖᤠ᤹ᤔᤧᤎᤠᤱᤏᤧᤴᤏᤧᤓᤃᤪ ᤂᤡᤏᤡ᤹ ᤜᤠ᤺ᤳᤗᤧ ᤁᤢᤛᤧᤘᤠ ᤕᤠ᤺ᤶᤒᤰ ᤁᤧᤈᤥᤃᤢᤶ᤹. ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤕᤢᤑᤪᤣᤋᤡᤛ ᤘᤜ᤺ᤱ ᤏᤠᤎᤠ᤺ᤶᤒᤡ ᤛᤧᤘᤠ ᤔᤧᤔᤧᤳᤋᤢᤛᤡᤒᤠ ᤔᤠᤱᤜᤠ᤹ ᤛᤧᤘᤠ ᤁᤧᤔᤧᤳᤋᤢᤶᤛᤡᤶᤒᤡ ᤀᤡ ᤂᤡᤏᤡ᤹ ᤀᤠᤸᤗᤥ ᤁᤧᤕᤢᤅᤡᤒᤠ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ ᤛᤧᤘᤠ ᤁᤧᤔᤧᤳᤋᤢᤶᤛᤡᤶᤒᤡ ᤂᤡᤏᤡ᤹ ᤀᤠᤀᤡᤴᤇᤠ ᤏᤡ᤺ᤴᤎᤥ ᤆᤥᤃᤧᤶᤔᤧ᤹॥ ᤁᤖ ᤀᤠᤱᤃᤠ᤹ ᤏᤢ ᤀᤠᤱᤃᤠ᤹ ᤀᤠᤜᤡᤶᤛᤕᤱᤜᤠ᤹ᤖᤧᤃ ᤕᤜᤘᤣ ᤍᤠᤱᤒᤠᤀᤥᤀᤣ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥᤃᤢᤶᤒᤧᤖᤥ॥”

ᤔᤠᤱᤜᤢᤵᤐᤡᤴ ᤕᤠᤶᤔᤥ ᤁᤢᤛᤱ ᤔᤧᤈᤥᤃᤢ

¹⁶ ᤂᤧᤒᤩᤠᤱ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤕᤜᤘᤣ ᤍᤠᤱᤒᤧᤴ ᤗᤧᤵᤔᤠᤀᤠᤱ ᤀᤠᤓᤧᤸᤗᤧᤀᤠᤱ ᤘᤣ᤹ ᤔᤠᤱᤜᤠ᤹ ᤀᤠᤏᤡᤃᤣ ᤛᤧᤘᤠ ᤔᤧᤵᤔᤠᤛᤡ ᤔᤧᤒᤥᤱᤏᤧᤴᤗ॥

¹⁷ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤀᤠᤏᤡᤃᤣ ᤏᤢ ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ ᤔᤡᤛᤪ ᤗᤠᤈᤣ᤹ᤒᤠ ᤕᤥᤰ ᤐᤥᤱᤔᤠ ᤜᤡᤶᤔᤥᤗᤠᤶ ᤆᤥ᤺ᤰᤕᤢᤶᤓᤥ ᤐᤡᤖᤢᤛᤡᤀᤠᤱ ᤗ᤺ᤳᤋᤢ ᤑᤧᤳᤋᤢᤛᤡᤒᤠᤖᤥ. ᤜᤧᤰᤁᤩᤠᤱ ᤀᤠᤏᤡᤃᤣ ᤔᤡᤰᤁᤡᤸᤗᤧ ᤏᤡᤛᤢᤖᤀᤣ ᤜᤧᤰᤋᤱᤒᤠ ᤕᤶᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢ॥ ᤂᤶᤓᤩᤠᤱ ᤀᤠᤏᤡᤃᤣ ᤀᤠᤳᤋᤡ ᤐᤣᤃᤡᤃᤧᤛᤠᤱ. ᤀᤠᤳᤋᤡᤴ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤀᤠᤏᤡᤃᤣ ᤑᤧᤖᤡᤃᤧᤛᤠᤱ ᤂᤢᤏᤧ᤹ ᤀᤠᤏᤡᤃᤣ ᤋᤠᤱᤛᤧ᤺ᤵᤋᤡᤃᤧ॥

¹⁸ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡᤃᤣ ᤋᤃᤡᤗᤠᤶ ᤁᤧᤖᤧᤰ ᤛᤢᤘᤠᤱᤜᤠ᤹ ᤁᤴ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤀᤣᤔᤥᤖᤡᤜᤠ᤹ᤀᤠᤱ ᤏᤠ᤺ᤳᤋᤢᤍᤣᤛᤢᤛᤡ॥ ᤁᤸᤗᤧᤆᤥᤃᤢᤸᤗᤧ ᤀᤠᤏᤡᤃᤧᤀᤠᤱ ᤕᤜᤘᤣ ᤍᤠᤱᤒᤠᤀᤥ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥᤃᤢᤶᤒᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤣ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤗᤥ॥”

¹⁹ ᤕᤜᤥᤛᤢ᤺ᤸᤗᤧ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠᤀᤥ ᤂᤡᤏᤡ᤹ ᤔᤠᤱᤛᤧᤘᤠ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤴ॥ ᤂᤢᤏᤧ᤹ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱ ᤏᤢ ᤁᤢᤏᤠᤃᤧᤜᤧᤶᤒᤠ ᤏᤡᤱᤘᤠ᤹ᤑᤢᤔᤠᤱ ᤆᤥ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤑᤧᤴᤕᤠ᤺ᤶᤒᤰᤜᤠ᤹ ᤏᤢ ᤂᤡᤏᤡ᤹ ᤗᤠᤕᤥᤜᤠ᤹ᤗᤠᤶ ᤗᤧᤵᤔᤡ ᤁᤧᤶᤒᤡᤖᤡᤴ᤹॥

²⁰ ᤕᤜᤘᤣ ᤍᤠᤱᤒᤧᤴ ᤂᤡᤏᤡ᤹ ᤁᤧᤗᤧᤖᤢᤶᤔᤠᤱ ᤘᤣ᤹ ᤔᤠᤱᤜᤠ᤹ ᤛᤧᤘᤠ ᤁᤧᤔᤧᤳᤋᤢᤶᤛᤡᤶᤏᤧᤓᤃᤪ ᤀᤠᤸᤗᤥ ᤌᤠᤖᤡᤰ ᤂᤢᤏᤧ᤹ ᤂᤡᤏᤡ᤹ ᤗᤠᤃᤡ ᤏᤢᤒᤠ ᤆᤥᤃᤢᤛᤠᤱ ᤂᤡᤏᤡ᤹ ᤗᤠᤃᤡ ᤋᤠᤵᤑᤧ᤺ᤶᤒᤠ ᤆᤥ᤺ᤰᤛᤧ ᤂᤢᤏᤧ᤹ ᤏᤢ᤺ᤱᤅᤠᤱ ᤂᤡᤏᤡ᤹ ᤕᤢᤔᤪᤧᤰ ᤁᤧᤔᤧᤰᤂᤡ᤹॥”

²¹ ᤁᤖ ᤔᤏᤠᤜᤠ᤹ᤖᤧ ᤕᤜᤥᤛᤢᤴ ᤔᤧᤔᤧᤳᤋᤢ. “ᤔᤣ᤺ᤴ. ᤕᤜᤘᤣ ᤍᤠᤱᤒᤠᤀᤥᤀᤣ ᤀᤠᤏᤡᤃᤣ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥᤃᤢᤶᤒᤧ॥”

²² ᤂᤧᤒᤩᤠᤱ ᤕᤜᤥᤛᤢ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠᤀᤥ ᤔᤠᤱᤛᤧᤘᤠ ᤆᤥ᤺ᤰᤔᤠ ᤂᤡᤏᤡ᤹ ᤀᤠᤵᤑᤣᤰᤁᤣ ᤏᤡ᤺ᤴᤎᤥ ᤁᤧᤈᤥᤃᤢᤶᤒᤠ ᤐᤠ᤺ᤴᤏᤥ ᤂᤡᤏᤡ᤹ ᤀᤠᤵᤑᤣᤰ ᤋᤥ᤺ᤴᤍᤡ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹॥” ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤏᤡᤃᤣ ᤀᤠᤵᤑᤣᤰᤁᤣ ᤋᤥ᤺ᤴᤍᤡ ᤘᤕᤡᤃᤧᤖᤥ॥”

²³ ᤕᤜᤥᤛᤢ᤺ᤸᤗᤧ ᤔᤧᤳᤋᤢᤛᤡ. “ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤂᤡᤏᤡ᤹ᤏᤢ ᤁᤧᤘᤠ᤹ᤒᤠ ᤘᤣ᤹ ᤔᤠᤱᤜᤠ᤹ ᤗ᤺ᤳᤋᤧᤶᤍᤧᤛᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤱᤘᤠᤴ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤜᤡᤛᤧᤶᤔᤧ᤹॥”

²⁴ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤕᤜᤥᤛᤢᤴ ᤔᤧᤔᤧᤳᤋᤢ. “ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤥ ᤀᤠᤏᤡᤃᤣ ᤔᤠᤱᤛᤧᤘᤠ ᤆᤥᤃᤢᤶᤒᤧ ᤂᤧᤒᤩᤠᤱ ᤀᤠᤏᤡᤃᤣ ᤂᤢᤏᤧ᤹ᤀᤣ ᤀᤡ᤺ᤳᤋᤢᤶᤒᤧ ᤏᤠ᤺ᤳᤋᤢᤶᤒᤧ॥”

²⁵ ᤕᤜᤥᤛᤢ᤺ᤸᤗᤧ ᤀᤠᤶᤓᤠ ᤂᤧᤸᤗᤧ ᤕᤠ᤺ᤴᤍᤡᤰ ᤔᤏᤠᤜᤠ᤹ᤏᤢ ᤔᤠᤱᤜᤢᤵ ᤆᤥᤃᤢ. ᤜᤧᤰᤁᤩᤠᤱ ᤛᤁᤣᤔᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤛᤠᤶᤕᤥᤛᤠᤰᤌᤡᤶ ᤏᤢ ᤀᤡᤱᤈᤠᤱᤜᤠ᤹ ᤛᤠᤵᤋᤢ॥

²⁶ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤜᤥᤛᤢ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥ ᤛᤠᤵᤋᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤕᤶᤒᤠ ᤗᤢᤱᤎᤡᤰ ᤋᤠᤖᤢᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣᤍᤧᤴᤏᤡᤸᤗᤧ ᤁᤢᤒᤣᤛᤠᤱᤒᤠ ᤕᤜᤡᤒᤠ ᤛᤡᤱᤒᤢᤱ ᤛᤡᤃᤠᤱ ᤕᤧᤵᤛᤢ॥

²⁷ ᤕᤜᤥᤛᤢ᤺ᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤥᤔᤧᤳᤋᤧᤶᤔᤧ᤹. ᤁᤴ ᤗᤢᤱᤅᤡᤴ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤋᤥ᤺ᤴᤍᤡ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡ᤹ ᤀᤠᤔᤧᤳᤋᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤸᤗᤧ ᤂᤧᤵᤛᤢᤀᤠᤱ ᤘᤠ᤹॥ ᤂᤡᤏᤡ᤹ ᤀᤠᤒᤠᤅᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤏᤠ᤹ᤖᤢᤶᤏᤧᤓᤃᤪ ᤂᤧᤴ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤋᤥ᤺ᤴᤍᤡ ᤐᤥᤱ᤹॥”

²⁸ ᤁᤶᤓᤗ᤹ᤖᤡᤰ ᤕᤜᤥᤛᤢ᤺ᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤗᤰᤂᤥᤔᤠ ᤗᤠᤈᤣ᤹ᤜᤠ᤹ᤀᤥ ᤐᤠᤱᤄᤢᤍᤣᤛᤢᤛᤡᤖᤥ॥

ᤕᤜᤥᤛᤢᤴ ᤏᤢ ᤀᤣᤗᤠᤈᤠᤖᤧᤴ ᤔᤠᤏᤧᤛᤡ

²⁹ ᤁᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢᤴ ᤁᤡᤵ ᤌᤡᤰᤁᤠᤱ ᤌᤡᤒᤥᤱ ᤋᤱᤒᤣ ᤕᤥᤖᤧᤸᤗᤧ ᤔᤠᤛᤡᤱ॥

³⁰ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤃᤠᤛ ᤁᤥ᤺ᤰᤔᤠᤸᤗᤧ ᤌᤠᤱᤃᤧᤳ ᤗᤧᤵᤔᤠᤱ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤑᤠᤱᤈᤱ ᤗᤠᤈᤣ᤹ᤀᤥᤒᤠ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤰᤂᤥᤔᤠ ᤋᤡᤶᤏᤌ-ᤛᤣᤖᤜ ᤀᤡ᤺ᤴᤍᤥᤀᤥ ᤔᤧᤈᤡᤰᤂᤢ॥

³¹ ᤕᤜᤥᤛᤢ᤺ᤸᤗᤧ ᤁᤢᤜᤡᤱᤜᤡᤱ ᤏᤢ ᤂᤢᤏᤧ᤹ ᤔᤠᤛᤡᤱᤅᤠᤱ ᤀᤣᤃᤠᤱ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ ᤁᤧᤄᤥᤒᤠ ᤛᤠᤶᤕᤥᤛᤡᤰᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤱᤜᤡᤱᤅᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤀᤥᤀᤣ ᤔᤠᤱᤛᤧᤘᤠ ᤔᤧᤈᤥᤃᤢ॥

³² ᤕᤠᤁᤢᤒᤖᤧ ᤁᤡᤵ ᤌᤡᤰ ᤕᤢᤵᤐᤠ ᤁᤢᤀᤠ᤺ᤳᤜᤠ᤹ᤖᤧ ᤛᤁᤣᤔᤖᤧ ᤁᤢᤶᤒᤠ ᤜᤔᤥᤖᤖᤧ ᤁᤢᤛ᤻ᤛᤠᤜᤠ᤹ᤗᤠᤶ ᤀᤡᤅᤢᤒᤠ ᤁᤢᤗᤰ ᤌᤡᤰ ᤗᤠᤈᤣ᤹ᤀᤥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤡᤛᤪ ᤗᤠᤈᤣ᤹ᤗᤠᤶ ᤔᤧᤓᤧᤳᤋᤢᤒᤠ ᤕᤥᤛᤣᤑᤖᤧ ᤁᤢᤕᤧᤵ ᤁᤢᤗᤢᤱᤛᤡᤜᤠ᤹ ᤔᤧᤗᤢᤵᤋᤢ॥ ᤂᤧᤴ ᤋᤧᤴᤏᤡᤴ ᤕᤥᤛᤣᤑᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤥᤔᤥ ᤌᤩᤧ॥

³³ ᤜᤧᤰᤁᤩᤠᤱ ᤜᤠᤖᤢᤏᤖᤧ ᤁᤢᤛ᤻ᤛᤠ ᤀᤣᤗᤠᤈᤠᤖᤧᤴᤏᤠᤱ ᤔᤠᤛᤡᤱ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤐᤡᤏᤜᤠᤛᤧᤴ ᤔᤧᤒᤡᤖᤢᤒᤠ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤑᤠᤱᤈᤱᤒᤠ ᤃᤡᤒᤠᤀᤥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤈᤡᤰᤂᤢᤖᤥ॥