ᤕᤜᤥᤛᤢ 23 - LIFOTNT

ᤕᤜᤥᤛᤢ᤺ᤸᤗᤧ ᤆᤥᤃᤢᤒᤠ ᤁᤢᤏᤢᤵᤔᤠ ᤀᤢᤘᤠ

¹ ᤀᤠᤸᤗ ᤕᤖᤡᤰ ᤕᤧᤴ ᤀᤣᤃᤠᤱ. ᤁᤒᤪᤡᤱ ᤐᤡᤛᤠᤱᤒᤠ ᤁᤧᤖᤧᤰ ᤏᤡᤱᤔᤡᤜᤠ᤹ᤏᤢ ᤌᤱ ᤆᤥ᤺ᤰᤔᤠᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤏᤠ᤺ᤶᤛᤡᤱᤔᤠ ᤐᤡᤖᤢᤛᤡᤀᤠᤱ ᤘᤕᤧ. ᤜᤧᤰᤁᤩᤠᤱ ᤕᤜᤥᤛᤢᤴ ᤕᤖᤡᤰ ᤋᤱᤒᤣ ᤁᤧᤖᤧᤔᤠᤖᤧᤀᤠᤱ ᤁᤠᤵᤐᤥᤒᤠ ᤋᤢᤶᤛᤧᤀᤠᤱ ᤘᤕᤧ.

² ᤕᤜᤥᤛᤢ᤺ᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤕᤥᤛᤡᤰᤛᤠᤶᤒᤠᤜᤠ᤹. ᤌᤠ᤺ᤰᤗᤠᤶᤗᤥᤒᤠᤜᤠ᤹. ᤂᤠᤛᤧᤴᤗᤥ᤺ᤶᤒᤠᤜᤠ᤹ ᤏᤢ ᤕᤢᤰᤛᤠᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤁᤠᤵᤐᤥᤒᤠ ᤋᤢᤶᤛᤠᤱ ᤜᤧᤰᤁᤩᤠᤱ ᤕᤖᤡᤰ ᤋᤱᤒᤣ ᤁᤧᤖᤠᤱ ᤔᤠᤖᤠᤱ॥

³ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤗᤠᤃᤡ ᤁᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤌᤧᤔᤠ ᤌᤧᤔᤠ ᤔᤧᤳᤋᤢᤛᤡ. ᤂᤧᤴ ᤂᤡᤏᤡ᤹ᤀᤣ ᤀᤠᤵᤑᤣᤰ ᤁᤧᤏᤡᤛᤢᤶᤔᤠᤱ ᤘᤠ᤹॥ ᤂᤡᤏᤡ᤹ ᤗᤠᤃᤡ ᤌᤱ ᤁᤧᤈᤥ᤺ᤰᤐᤠ ᤂᤢᤏᤧ᤹ᤀᤣ. ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤗᤥ॥

⁴ ᤂᤡᤏᤡ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹. ᤕᤷᤍᤏᤗᤠᤶ ᤏᤠᤶᤎᤠ ᤗᤧᤵᤔᤠᤱ ᤗᤢᤶᤒᤠ ᤘᤖ᤺ᤱᤅᤥ ᤌᤠᤖᤡᤰ ᤁᤴ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤀᤡᤃᤪ ᤀᤠᤱᤃᤠ᤹ ᤏᤠ᤺ᤴᤍᤢᤱᤛᤡᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤂᤡᤏᤡ᤹ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤥ ᤑ᤺ᤰᤂᤢᤱ ᤐᤡᤖᤢᤱᤛᤡᤱᤅᤠᤱ ᤏᤧᤖᤥ॥

⁵ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤵᤑᤣᤰᤁᤣ ᤂᤡᤏᤡ᤹ ᤋᤃᤡᤗᤠᤶ ᤂᤧᤱᤜᤠ᤹ ᤗ᤺ᤳᤋᤢᤍᤣᤛᤢᤛᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤏᤡᤛᤢᤶᤗ ᤂᤢᤏᤧ᤹ ᤂᤧᤱᤜᤠ᤹ ᤏᤠ᤺ᤳᤋᤢᤍᤣᤛᤢᤛᤡ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤁᤧᤕᤢᤰᤋᤢᤶ᤹॥

⁶ “ᤁᤸᤗᤧᤆᤥᤃᤢᤸᤗᤧ ᤔᤥᤛᤠ᤺ᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤜᤠᤱᤜᤠᤱ ᤗ᤹ᤖᤡᤰ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹ ᤜᤧᤰᤁᤩᤠᤱ ᤋᤡᤶᤍᤧᤶ ᤏᤠ᤺ᤳᤋᤧᤶᤔᤧ᤹. ᤂᤧᤒᤩᤠᤱ ᤂᤧᤵᤔᤥᤗᤠᤶ ᤂᤡᤏᤡ᤹ ᤆᤢᤰᤘᤠ ᤑᤧᤱᤘᤠ ᤔᤧᤒᤣᤃᤧᤶᤔᤡᤴᤏᤧ᤹॥

⁷ ᤂᤡᤏᤡ᤹ ᤗᤢᤶᤔᤥ ᤁᤧᤕᤢᤱᤒᤠ ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ ᤔᤧᤓ᤺ᤴᤏᤠᤛᤡᤶᤔᤴᤏᤧ᤹. ᤂᤢᤴᤇᤡ᤹ ᤔᤠᤱᤜᤠ᤹ᤖᤧ ᤔᤡᤱᤜᤠ᤹ ᤔᤧᤀᤡᤱᤛᤧᤶᤔᤡᤴᤏᤧ᤹. ᤔᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤅᤥ ᤔᤠᤱᤜᤧᤰ ᤔᤧᤈᤥᤃᤧᤶᤔᤧᤴᤏᤧ᤹॥ ᤂᤧᤱᤜᤠ᤹ ᤛᤧᤘᤠ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹ ᤜᤧᤰᤁᤩᤠᤱ ᤛᤠᤶᤒᤥᤴᤏᤠᤱ ᤂᤧᤱᤜᤠ᤹ ᤔᤠᤱᤛᤧᤘᤠ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹॥

⁸ ᤁᤖ ᤂᤡᤏᤡ᤹ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰ ᤁᤧᤘᤕᤡᤒᤠ ᤜᤧᤰᤁᤣ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤌᤎᤵ ᤔᤧᤸᤗ᤹ᤀᤣ ᤘᤕᤧᤶᤔᤧ᤹॥

⁹ “ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤋᤃᤡᤗᤠᤶᤒᤠᤀᤣ ᤛᤠ᤹ᤖᤡᤰ ᤔᤢᤰᤁᤧᤃᤢᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤠ᤺ᤳᤋᤢᤍᤣᤛᤢᤛᤡᤀᤠᤱ ᤘᤠ᤹॥ ᤀᤠᤀᤡᤴ ᤌᤠᤖᤡᤰ ᤂᤡᤏᤡ᤹ ᤋᤃᤡ ᤜᤠ᤺ᤳᤋᤠᤱ ᤕᤧᤵᤔᤠ ᤔᤧᤴᤇᤢᤰᤁᤣ ᤘᤠ᤹॥

¹⁰ ᤂᤡᤏᤡ᤹ᤀᤥᤒᤠ ᤗᤳᤇᤠᤖᤧ ᤜᤧᤴᤇᤡᤱ ᤔᤏᤠᤜᤠ᤹ ᤏᤠ᤺ᤵᤔᤠᤍᤣᤔᤠ ᤛᤢᤰᤋᤢᤛᤡ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤡᤏᤡ᤹ᤏᤢ ᤔᤠᤱᤜᤢᤵ ᤆᤥᤃᤢᤒᤠ ᤀᤡᤛᤡ᤺ᤰ ᤂᤡᤏᤡ᤹ ᤗᤠᤃᤡ ᤋᤧᤴᤎᤱ ᤁᤧᤈᤥ᤺ᤰᤐᤠᤃ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤘᤠ᤹॥

¹¹ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤔᤧᤵᤔᤠᤖᤧ ᤗᤠᤃᤡ ᤛᤠ᤹ᤖᤡᤰ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹॥

¹² “ᤁᤖ ᤁᤢᤓᤠ ᤐᤖᤡᤰᤐᤠ ᤐᤠ᤺ᤴᤏᤥ ᤂᤡᤏᤡ᤹ ᤌᤡᤰᤏᤠᤜᤠᤱ ᤁᤧᤜᤡᤀᤠᤛᤡᤀᤠᤱ ᤂᤧᤴ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ. ᤀᤡᤃᤪ ᤂᤡᤏᤡ᤹ ᤗᤢᤶᤔᤥ ᤁᤧᤕᤢᤱᤒᤠᤜᤠ᤹ᤏᤢ ᤁᤧᤒᤳᤇᤡ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤋᤧᤴᤎᤠᤶ ᤔᤣ᤺ᤰᤂᤡᤶ ᤁᤧᤈᤥᤃᤡᤀᤠᤱ ᤁᤧᤓᤢᤳᤋᤠᤛᤡᤏᤧᤓᤃᤪ.

¹³ ᤁᤴ ᤐᤠ᤺ᤴᤏᤥ ᤏᤡ᤺ᤴᤎᤥ ᤐᤥ᤺ᤰᤂᤧᤶᤔᤧ᤹. ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤡᤏᤡ᤹ ᤋᤃᤡᤗᤠᤶ ᤕᤠᤶᤔᤥ ᤔᤧᤏᤠ᤺ᤳᤋᤢᤴ ᤔᤧᤍᤣᤛᤢᤛᤡᤴ᤹. ᤁᤖ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤒᤡᤖᤡᤒᤠ ᤁᤴ ᤏᤢᤒᤠ ᤗᤠᤈᤣ᤹ᤀᤥᤗᤠᤶ ᤂᤡᤏᤡ᤹ ᤁᤧᤶᤔᤧᤃᤡᤴᤗ ᤌᤠᤖᤡᤰ ᤂᤧᤱᤜᤠ᤹ ᤂᤡᤏᤡ᤹ ᤗᤠᤃᤡ ᤆᤧᤴ ᤏᤢ ᤀᤡᤍᤠᤰ. ᤂᤶᤓᤩᤠᤱ ᤂᤡᤏᤡ᤹ ᤀᤣ᤺ᤰᤌᤠ᤺ᤰᤔᤥ ᤋᤧ᤺ᤶᤓᤢᤰ ᤏᤢ ᤂᤡᤏᤡ᤹ ᤔᤡᤰᤁᤥ ᤛᤠᤰᤆᤡ᤹ ᤔᤧᤒᤥᤱ᤹॥

¹⁴ “ᤀᤠᤸᤗ ᤀᤠᤱᤃᤠ᤹ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤐᤣ᤺ᤰᤔᤠ ᤁᤧᤒᤥᤱᤒᤠ ᤗᤠᤶᤔᤥ ᤐᤣ᤺ᤰᤁᤠᤖ ᤐᤳᤋᤠ॥ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤔᤧᤴᤏᤥ ᤐᤠ᤺ᤳᤋᤢᤒᤠ ᤁᤧᤖᤧᤰ ᤏᤢᤒᤠ ᤐᤠ᤺ᤴᤜᤠ᤹ ᤗᤳᤇᤠᤀᤠᤱ ᤕᤥᤎᤥ ᤔᤧᤶᤒᤥᤱᤅᤣ ᤘᤠ᤹॥ ᤂᤡᤏᤡ᤹ ᤗᤠᤃᤡ ᤁᤧᤖᤧᤰ ᤁᤧᤖᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤗᤳᤇᤠᤀᤠᤱ ᤂᤧᤴ ᤗᤠᤶᤒᤠ ᤔᤧᤃᤧᤖᤧᤶᤒᤠ ᤜᤥᤵ ᤑᤠ᤹ᤀᤠᤱ ᤂᤡᤏᤡ᤹ ᤀᤠᤵᤑᤣᤰ ᤁᤧᤖᤧᤰ ᤛᤡᤰᤗᤢᤱᤔᤠ᤹ ᤏᤢ ᤁᤧᤖᤧᤰ ᤏᤡᤱᤘᤠ᤺ᤸᤗᤧ ᤁᤧᤏᤡᤛᤢᤶᤔᤠᤱ ᤁᤧᤘᤕᤡ᤹॥

¹⁵ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤔᤧᤳᤋᤡᤒᤠ ᤁᤧᤖᤧᤰ ᤏᤢᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ ᤗᤠᤃᤡ ᤁᤧᤖᤧᤀᤠᤱ ᤘᤠ᤹. ᤜᤧᤰᤁᤣᤗ᤹ᤖᤡᤰᤁᤣ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤁᤧᤒᤡᤖᤡᤒᤠ ᤁᤴ ᤏᤢᤒᤠ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤕᤢᤔᤪᤧᤰ ᤁᤧᤶᤔᤧᤰᤂᤡᤴᤗ ᤌᤠᤖᤡᤰ. ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤛᤶᤎᤠᤱ ᤁᤧᤖᤧᤰ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ᤀᤠᤱ ᤋᤠᤖᤢ᤹॥

¹⁶ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤈᤠᤱ ᤁᤧᤒᤡᤖᤡᤒᤠ ᤐᤠ᤺ᤴᤜᤠ᤹ᤗᤠᤶ ᤂᤡᤏᤡ᤹ ᤌᤡᤰᤏᤠᤜᤠᤱ ᤁᤧᤜᤡᤀᤠᤛᤡᤀᤠᤱ ᤘᤣ᤹ ᤔᤠᤱᤜᤠ᤹ ᤛᤧᤘᤠ ᤁᤧᤔᤧᤳᤋᤢᤶᤛᤡᤶ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤠᤱᤛᤧᤘᤠ ᤁᤧᤔᤧᤳᤋᤢᤶᤛᤡᤶᤏᤧᤓᤃᤪ. ᤕᤜᤘᤣ ᤍᤠᤱᤒᤧᤸᤗᤧ ᤔᤡ ᤜᤧᤰᤁᤣ ᤁᤧᤍᤡ᤺ᤵᤐᤠ ᤁᤢᤛᤠᤰᤁᤧᤴᤏᤡᤴ ᤂᤡᤏᤡ᤹ ᤛᤶᤎᤠᤱ ᤌᤠᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤂᤡᤏᤡ᤹ ᤁᤧᤒᤡᤖᤡᤒᤠ ᤁᤴ ᤏᤢᤒᤠ ᤗᤠᤈᤣ᤹ᤀᤥᤗᤠᤶ ᤂᤡᤏᤡ᤹ ᤂᤡᤔᤥ ᤘᤖᤧᤱᤗᤧᤱ ᤁᤧᤔᤧᤃᤡᤖᤥ॥”