ᤕᤜᤥᤛᤢ 22 - LIFOTNTᤕᤜᤥᤛᤢ᤺ᤸᤗᤧ ᤏᤠᤱᤃᤧᤴ ᤐᤡᤛᤠᤱᤒᤠ ᤌᤠ᤺ᤰᤜᤠ᤹ ᤛᤧᤶᤔᤢ᤹ᤀᤡ ᤐᤡᤖᤢᤛᤡ 1 ᤂᤧᤒᤩᤠᤱ ᤕᤜᤥᤛᤢ᤺ᤸᤗᤧ ᤖᤢᤒᤣᤏ. ᤃᤠᤍ ᤏᤢ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤁᤢᤎᤠ᤺ᤰᤜᤠ᤹ ᤀᤢ᤺ᤳᤋᤢᤛᤡ. 2 ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤂᤡᤏᤡ᤹ ᤁᤧᤒᤡᤖᤡᤒᤠ ᤁᤧᤖᤧᤰ ᤀᤡᤱᤈᤠᤱᤜᤠ᤹ ᤂᤡᤏᤡ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤔᤠᤱ ᤁᤧᤘᤕᤡ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ᤀᤠᤱ ᤁᤧᤖᤧᤰ ᤁᤧᤀᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹॥ 3 ᤕᤖᤡᤰ ᤕᤧᤶᤔᤠᤱᤎᤥ ᤀᤠᤀᤡᤴ ᤌᤠᤖᤡᤰ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤜᤠ᤹ ᤔᤧᤸᤗᤧᤳᤋᤣ ᤁᤧᤃᤳᤋᤢᤶᤛᤡᤶ᤹. ᤁᤖ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤒᤠ ᤕᤠ᤺ᤶᤒᤰᤜᤠ᤹ ᤁᤧᤃᤧᤳᤋᤢᤶᤔᤠᤱ ᤁᤧᤘᤕᤡ᤹॥ 4 ᤀᤠᤸᤗ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤜᤠ᤹ ᤏᤠ᤺ᤶᤛᤡᤱᤔᤠ ᤁᤧᤒᤡᤖᤢᤶᤛᤡᤶᤔᤠᤱ ᤘᤠ᤹॥ ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤂᤡᤏᤡ᤹ ᤏᤢ᤺ᤰᤂᤧᤶᤔᤧ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤕᤷᤍᤏ ᤏᤠᤎᤠ᤺ᤶᤒᤡ ᤂᤡᤏᤡ᤹ ᤕᤢᤰᤔᤠᤖᤧ ᤗᤠᤃᤡ ᤁᤧᤒᤡᤖᤡᤒᤠ ᤂᤡᤏᤡ᤹ ᤀᤠᤵᤑᤣᤰ ᤗᤠᤈᤣ᤹ᤀᤥ ᤐᤣᤃᤧᤶᤔᤧ᤹॥ 5 ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤔᤧᤳᤋᤧᤶᤔᤧ᤹. ᤂᤢᤏᤧ᤹ ᤁᤧᤖᤧᤰ ᤁᤢᤗᤠᤶᤜᤠ᤹ᤀᤥ ᤗᤠᤱᤄᤣᤃᤧᤶᤔᤧ᤹. ᤂᤢᤏᤧ᤹ ᤁᤢᤀᤡᤱᤈᤠᤱᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹. ᤂᤢᤏᤧ᤹ᤀᤥᤀᤣ ᤐᤳᤇᤧᤶᤔᤧ᤹. ᤂᤡᤏᤡ᤹ ᤛᤡᤰᤗᤢᤱᤔᤠ᤹ ᤏᤢ ᤏᤡᤱᤘᤠ᤺ᤸᤗᤧ ᤂᤢᤏᤧ᤹ᤀᤥ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤂᤡᤏᤡ᤹ ᤁᤧᤒᤡᤖᤡᤒᤠ ᤀᤡᤱᤈᤠᤱᤅᤡᤴ ᤏᤢ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤀᤠᤱ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥” 6 ᤂᤧᤒᤩᤠᤱ ᤕᤜᤥᤛᤢ᤺ᤸᤗᤧ ᤂᤧᤱᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤀᤠᤱ ᤗᤠᤶᤔᤧᤳᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤂᤢᤴᤇᤡ᤹ ᤜᤡᤶᤜᤠ᤹ᤀᤥ ᤔᤧᤒᤣ॥ 7 (ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤁᤢᤎᤠ᤺ᤰᤜᤠ᤹ᤃ ᤔᤥᤛᤠ᤺ᤸᤗᤧ ᤒᤠᤛᤠᤏᤀᤥ ᤕᤢᤰ ᤐᤡᤖᤢᤛᤡᤀᤠᤱ ᤏᤧᤛ᤻ᤛᤧ. ᤁᤖ ᤘᤣ᤹ ᤁᤢᤓᤪᤧ᤺ᤱᤜᤠ᤹ ᤕᤜᤥᤛᤢ᤺ᤸᤗᤧ ᤕᤷᤍᤏ ᤁᤳᤏᤠᤜᤠᤱᤍᤠᤱ ᤏᤠᤶᤎᤠ ᤗᤧᤵᤔᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤐᤡᤖᤢᤛᤡ॥) ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤡᤶᤜᤠ᤹ᤀᤥ ᤐᤣ᤺ᤰᤔᤠᤖᤧ ᤗᤠᤃᤡ ᤗᤠᤶᤔᤧᤳᤋᤢᤛᤡᤸᤗᤧ ᤕᤜᤥᤛᤢ᤺ᤸᤗᤧ ᤂᤧᤱᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶᤔᤠᤱ ᤐᤡᤖᤢᤛᤡ. 8 ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤕᤖᤡᤰ ᤕᤠᤱᤛᤠᤁᤢᤴᤎᤣ ᤏᤢ ᤕᤖᤡᤰ ᤌᤰᤛᤠᤜᤠ᤹ ᤕᤠᤱᤅᤠᤛᤡᤶᤔᤧ᤹ ᤜᤧᤰᤁᤩᤠᤱ ᤛᤠᤶᤔᤩᤠᤱ. ᤕᤢᤵᤐᤠ. ᤁᤠᤛᤠ. ᤑᤧᤴᤈᤣ᤹ ᤏᤢ ᤕᤖᤡᤰ ᤆᤠᤱᤜᤠ᤹ ᤋᤣ᤹ᤖᤧᤶᤔᤧ᤹ᤀᤠᤱ ᤂᤡᤏᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤡᤶᤜᤠ᤹ᤀᤥ ᤏᤢ᤺ᤰᤂᤧᤶ ᤐᤣᤃᤧᤶᤔᤧ᤹॥ ᤂᤡᤏᤡ᤹ ᤏᤡᤱᤔᤡᤜᤠ᤹ᤀᤥᤗᤠᤶ ᤁᤧᤏᤠᤵᤋᤢᤶᤛᤡᤶᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤀᤠᤵᤑᤣᤰ ᤑᤢ᤹ᤏᤢᤛᤠ᤹ᤜᤠ᤹ᤀᤥ ᤑ᤺ᤰᤂᤧᤶᤔᤧ᤹॥” 9 ᤂᤧᤒᤩᤠᤱ ᤖᤢᤒᤣᤏᤡ. ᤃᤠᤍᤡ ᤏᤢ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤁᤢᤎᤠ᤺ᤰᤜᤠ᤹. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱ ᤀᤡᤛᤡ᤺ᤰ ᤔᤥᤛᤠᤴ ᤗᤠᤶᤒᤠ ᤂᤧᤱᤜᤠ᤹ᤖᤧ ᤕᤢᤰ ᤔᤧᤄᤥᤛᤢᤒᤠ ᤗᤠᤈᤣ᤹ ᤃᤡᤗᤠᤍ ᤐᤣ᤺ᤰᤔᤠᤖᤧ ᤗᤠᤃᤡ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤛᤧᤶᤔᤢ᤹ᤀᤡ ᤔᤧᤒᤥ᤺ᤰᤂᤧᤀᤠᤱ ᤁᤏᤠᤏ ᤗᤠᤈᤣ᤹ᤒᤠ ᤛᤡᤗᤥᤗᤠᤶ ᤂᤧᤱᤜᤠ᤹ ᤔᤧᤏᤢ᤺ᤰᤂᤧᤖᤥ॥ ᤕᤷᤍᤏ ᤁᤢᤕᤠᤀᤥᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ 10 ᤂᤧᤱᤜᤠ᤹ ᤁᤏᤠᤏ ᤗᤠᤈᤣ᤹ᤀᤥᤒᤠ ᤕᤷᤍᤏ ᤁᤢᤕᤠ ᤁᤢᤕᤠ ᤃᤗᤡᤗᤥᤋᤀᤥ ᤔᤧᤃᤧᤖᤧᤸᤗᤧ. ᤖᤢᤒᤣᤏᤡ. ᤃᤠᤍᤡ ᤏᤢ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤁᤢᤎᤠ᤺ᤰᤜᤠ᤹ᤖᤧ ᤕᤷᤍᤏ ᤏᤡ᤺ᤳᤋᤠᤱ ᤀᤥᤔᤧᤵᤔᤧᤸᤗᤧ ᤕᤶᤒᤠ ᤏᤡᤃᤧᤍᤧᤵᤐᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤡᤰ ᤔᤧᤈᤥᤃᤢ॥ 11 ᤜᤧᤰᤁᤩᤠᤱ ᤖᤢᤒᤣᤏᤡ. ᤃᤠᤍᤡ ᤏᤢ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤁᤢᤎᤠ᤺ᤰᤜᤠ᤹ᤖᤧ ᤁᤏᤠᤏ ᤗᤠᤈᤣ᤹ᤒᤠ ᤀᤡ᤺ᤴᤍᤥᤀᤥ ᤕᤷᤍᤏ ᤏᤡ᤺ᤳᤋᤠᤱ. ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤰ ᤗᤧᤵᤔᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤔᤧᤈᤥᤃᤢ ᤁᤧᤗ᤹ᤒᤠ ᤐᤠᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤄᤧᤵᤛᤢ॥ 12 ᤂᤧᤒᤩᤠᤱ ᤏᤠᤱᤃᤧᤴ ᤗᤧᤵᤔᤠᤱᤒᤠ ᤌᤠ᤺ᤰᤜᤠ᤹ᤏᤢ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ ᤛᤡᤗᤥᤀᤥ ᤔᤧᤈᤢᤵᤛᤧ॥ 13 ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤃᤡᤗᤠᤍᤒᤠ ᤗᤠᤈᤣ᤹ᤀᤥ ᤖᤢᤒᤣᤏᤡ. ᤃᤠᤍᤡ ᤏᤢ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤁᤢᤎᤠ᤺ᤰᤜᤠ᤹ᤀᤥ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖᤖᤧ ᤁᤢᤛ᤻ᤛᤠ ᤐᤡᤏᤜᤠᤛᤧᤴ ᤔᤧᤒᤠᤱᤄᤢ. 14 ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤛᤥᤖᤡᤰ ᤏᤠᤶᤎᤠ ᤐᤡᤛᤠᤱᤒᤠ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠ ᤔᤏᤠᤜᤠ᤹ᤀᤥᤒᤠ ᤌᤡᤒᤥᤱ ᤔᤏᤠᤜᤠ᤹ ᤌᤠ᤺ᤰ ᤌᤰᤔᤠᤗᤠᤶ ᤌᤡᤰᤐᤠ ᤌᤡᤰᤐᤠ ᤔᤧᤒᤠᤱᤄᤢᤛᤡ॥ ᤂᤧᤱᤜᤠ᤹ ᤀᤡᤛᤪᤠᤀᤡᤗᤡ ᤌᤠ᤺ᤰᤜᤠ᤹ᤀᤥᤒᤠ ᤗᤳᤇᤠ ᤗᤳᤇᤠ ᤜᤡᤶᤛᤕᤱᤒᤠ ᤗᤠᤶᤗᤥᤒᤠ ᤔᤧᤘᤕᤧ॥ 15 ᤜᤧᤰᤁᤩᤠᤱ ᤖᤢᤒᤣᤏᤡ. ᤃᤠᤍᤡ ᤏᤢ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤁᤢᤎᤠ᤺ᤰᤜᤠ᤹ᤃ ᤃᤡᤗᤠᤍ ᤗᤠᤈᤣ᤹ᤀᤥ ᤔᤧᤒᤣᤀᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡ. 16 “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤁᤢᤛᤱᤈᤢᤶᤓᤥᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ᤹—‘ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤡᤏᤡ᤹ ᤀᤠᤰᤂᤣᤗ᤹ᤖᤡᤰ ᤀᤰᤋᤱᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹᥅ ᤂᤡᤏᤡ᤹ ᤀᤠᤸᤗᤥ ᤀᤠᤰᤂᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤁᤧᤒᤥ᤺ᤰᤂᤡ᤹ ᤜᤧᤰᤁᤩᤠᤱ ᤂᤢᤏᤧ᤹ ᤋᤡᤶᤔᤠ ᤏᤠ᤺ᤵᤔᤠ ᤁᤧᤏᤠ᤹ᤖᤢᤶᤔᤠᤱ ᤂᤡᤏᤡ᤹ ᤀᤠᤵᤑᤣᤰ ᤗᤠᤃᤡ ᤁᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤁᤧᤈᤥᤃᤢᤶᤔᤠᤱ ᤕᤢᤱᤒᤠᤒᤣ᥅ 17 ᤌᤣ ᤐᤥᤖᤒᤠ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤀᤠᤏᤡ᤹ ᤀᤠᤱᤄᤢᤔᤧᤴᤒᤡ᥅ ᤂᤧᤵᤔᤥᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤱᤈᤢᤶᤓᤥᤀᤥ ᤕᤶᤒᤠ ᤔᤡᤱᤍᤣ᤹ ᤐᤥᤃᤧ ᤜᤧᤰᤁᤣᤛᤠᤱ ᤀᤠᤏᤡ᤹ ᤀᤠᤀᤡᤴ ᤌᤠᤖᤡᤰ ᤂᤧᤴ ᤑᤧᤴᤕᤠ᤺ᤶᤒᤰᤁᤥᤗᤠᤶ ᤛᤢᤳᤌᤥ ᤆᤥ᤺ᤰᤛᤡᤱᤔᤠ ᤔᤧᤴᤇᤢᤰᤛᤡᤱᤅᤣ ᤀᤠᤘᤠ᤹॥ 18 ᤌᤣ ᤀᤠᤀᤡᤴ ᤕᤠᤶᤔᤥ ᤕᤜᤘᤣ ᤍᤠᤱᤒᤧᤴ ᤗᤠᤶᤒᤠ ᤂᤡᤏᤡ᤹ ᤔᤠ᤺ᤱᤄᤠ ᤁᤧᤒᤥ᤺ᤰᤂᤡᤖ ᤁᤧᤒᤳᤇᤡᤒᤡ᥅ ᤀᤠᤀᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤡᤏᤡ᤹ ᤐᤡᤑᤩᤢᤱᤒᤠ ᤁᤧᤒᤥᤰᤂᤡᤏᤧᤓᤃᤪ. ᤋᤠ᤺ᤴᤍᤡᤰ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ᤏᤢ ᤂᤢᤏᤧ᤹ ᤁᤢᤕᤠ᤺ᤰᤗᤧ᤹॥ 19 “‘ᤁᤖ ᤂᤡᤏᤡ᤹ ᤁᤧᤕᤢᤰᤋᤢᤶᤒᤠ ᤗᤠᤈᤣᤴ ᤀᤠᤛᤢᤳᤌᤥ ᤆᤥ᤺ᤰᤏᤧᤓᤃᤪ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣᤍᤧᤴ ᤁᤧᤏᤧᤒᤠ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤈᤣ᤹ᤀᤥ ᤂᤡᤏᤡ᤹ ᤂᤧᤵᤔᤥ ᤑᤧᤖᤧᤶᤔᤧ᤹. ᤜᤧᤰᤁᤩᤠᤱ ᤀᤠᤏᤡ᤹ ᤗᤠᤈᤣᤴ ᤁᤢᤍᤱᤒᤠ ᤕᤢᤰᤋᤧᤶᤔᤧ᤹॥ ᤁᤖ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤔᤧᤗᤧᤖᤧᤶᤔᤡᤴᤏᤧ᤹ ᤂᤧᤒᤩᤠᤱ ᤂᤡᤏᤡ᤹ ᤗᤠᤃᤡ ᤘᤣ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤔᤧᤈᤥᤃᤧᤶᤔᤡᤴᤏᤧ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤡᤃᤪ ᤀᤠᤏᤡᤃᤣ ᤋᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹॥ 20 ᤈᤣᤖᤜᤖᤧ ᤁᤢᤛ᤻ᤛᤠ ᤀᤠᤁᤠᤏᤖᤧ ᤂᤠᤵᤐᤢᤌᤩ᤺ᤱ ᤔᤧᤱᤔᤠᤀᤠᤱ ᤋᤥ᤺ᤶᤔᤏᤠᤒᤠ ᤆᤡᤃᤰᤘᤠᤜᤠ᤹ᤀᤥ ᤑᤧᤴᤕᤠ᤺ᤶᤒᤰ ᤆᤥᤃᤢᤸᤗᤧ ᤌᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛ᤻ᤛᤠᤰᤁᤧᤴᤏᤡᤴ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ᤀᤥ ᤔᤧᤎᤩᤧᤏᤧᤶᤒᤡ᥅ ᤁᤢᤓᤧᤴ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤂᤧᤴ ᤔᤏᤠ᤺ᤴᤗᤰ ᤔᤧᤛᤩᤧᤏᤧᤴ॥’” 21 ᤂᤧᤒᤩᤠᤱ ᤖᤢᤒᤣᤏᤡ. ᤃᤠᤍᤡ ᤏᤢ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤁᤢᤎᤠ᤺ᤰᤜᤠ᤹ᤖᤧ ᤀᤡᤛᤪᤠᤀᤡᤗᤡ ᤌᤠ᤺ᤰᤜᤠ᤹ᤀᤥᤒᤠ ᤌᤠ᤺ᤰᤗᤠᤶᤗᤥᤒᤠᤜᤠ᤹ ᤔᤧᤔᤧᤳᤋᤢᤛᤡ. 22 “ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤢᤰᤛᤠᤶᤍᤠᤱᤒᤠ ᤆᤥᤰ᥄ ᤕᤜᤘᤣ ᤍᤠᤱᤒᤧᤴ ᤔᤢᤰᤛᤠᤶᤍᤠᤱᤒᤠ ᤆᤥᤰ᥄ ᤂᤢᤏᤧ᤹ᤀᤣ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤛᤡᤱᤏᤡ᤺ᤳᤋᤢ᤹᥄ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢᤖ᥄ ᤀᤠᤏᤡᤃᤣ ᤐᤡᤑᤩᤢᤱᤒᤠ ᤐᤥ᤺ᤰᤂᤡᤃᤧᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤑᤧᤴᤕᤠ᤺ᤶᤒᤰ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤏᤧᤓᤃᤪ. ᤀᤠᤀᤡᤴ ᤀᤠᤏᤡᤃᤣ ᤁᤢᤜᤡᤱᤘᤧᤳ ᤀᤠᤸᤗᤧᤖᤧᤴᤏᤧ᤹॥ 23 ᤕᤜᤘᤣ ᤍᤠᤱᤒᤧᤴ ᤀᤠᤏᤡᤃᤣ ᤋᤡᤶᤔᤠ ᤏᤠ᤹ᤖᤢᤶᤒᤧᤀᤠᤱ ᤀᤠᤏᤡᤃᤣ ᤀᤠᤵᤑᤣᤰ ᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤆᤥᤃᤢᤶᤒᤧᤀᤠᤱ ᤕᤢᤱᤖᤧᤳᤇ. ᤀᤡᤃᤪ ᤂᤧᤵᤔᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤀᤡᤃᤪ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤜᤠ᤹ ᤁᤡᤃᤪ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤶᤔᤠᤖᤧ ᤗᤠᤃᤡ ᤆᤥᤃᤢᤶᤒᤧᤒᤠᤏᤧᤓᤃᤪ. ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤀᤠᤵᤑᤣᤰ ᤂᤢᤶᤍᤡᤱ ᤐᤡᤖᤡᤃᤧᤖᤖᤥ॥ 24 “ᤜᤧᤰᤁᤣ ᤔᤣ᤺ᤴ. ᤁᤢᤓᤠ ᤕᤧᤶ ᤋᤠᤕᤧᤶᤔᤥ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤀᤠᤏᤡᤃᤣ ᤔᤢ᤹ᤀᤡᤍᤠᤱᤛᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤒᤡᤗᤠ ᤑᤠ᤹ᤀᤠᤱ ᤀᤠᤏᤡᤃᤣ ᤁᤴ ᤆᤥᤃᤢᤶᤒᤧᤒᤠᤖᤥ—‘ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤌᤣᤀᤠᤱ ᤔᤠᤱᤛᤧᤘᤠ ᤁᤧᤔᤧᤳᤋᤢᤶᤒᤠᤒᤣ᥅ 25 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤖᤢᤒᤣᤏᤡᤜᤠ᤹ ᤏᤢ ᤃᤠᤍᤡᤜᤠ᤹ᤖᤧ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤜᤧᤰᤁᤩᤠᤱ ᤀᤠᤏᤡᤃᤣ ᤗᤢᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤕᤷᤍᤏ ᤘᤜ᤺ᤱᤅᤡᤴ ᤀᤡ᤺ᤴᤍᤥ ᤏᤧᤛ᤻ᤛᤢ ᤀᤠᤒᤡᤖᤧᤀᤠᤱ ᤏᤧᤖᤥ॥ ᤕᤜᤘᤣ ᤍᤠᤱᤒᤠᤀᤥ ᤂᤡᤏᤡ᤹ ᤂᤥᤔᤠ ᤗᤰ ᤌᤣᤀᤠᤱ ᤜᤥᤵ॥’ ᤀᤰᤂᤣ ᤔᤧᤔᤧᤳᤋᤢᤛᤡᤀᤠᤱ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤀᤠᤏᤡᤃᤣ ᤔᤢ᤹ᤀᤡᤍᤠᤱᤛᤠᤜᤠ᤹ ᤕᤜᤘᤣ ᤍᤠᤱᤒᤧᤴ ᤔᤠᤱᤛᤧᤘᤠ ᤔᤧᤶᤔᤧᤵᤔᤏᤠᤒᤠ ᤔᤧᤈᤥᤃᤢᤛᤡ᤹ ᤑᤠ᤹ᤀᤠᤱ ᤁᤡᤛᤡᤃᤧ॥ 26 “ᤁᤸᤗᤧᤆᤥᤃᤢᤸᤗᤧ ᤀᤠᤏᤡᤃᤣ ᤀᤰᤂᤣ ᤆᤥᤃᤢᤶᤒᤧᤒᤠᤖᤥ. ‘ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤀᤡᤃᤪ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤔᤣ᤺ᤴᤇᤠᤱ. ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤱᤃ ᤀᤠᤏᤡᤃᤣ ᤆᤥ᤺ᤰᤔᤠᤀᤣ ᤐᤥᤱ᤹॥’ 27 ᤁᤖ ᤀᤠᤏᤡᤃᤣ ᤏᤢ ᤂᤡᤏᤡ᤹ ᤗᤢᤶᤔᤥ ᤜᤧᤰᤁᤩᤠᤱ ᤀᤠᤏᤡ᤹ ᤋᤠ᤺ᤴᤍᤡᤒᤠ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤴ ᤗᤳᤇᤠ ᤋᤥ᤺ᤴᤍᤡᤖᤧ ᤗᤠᤃᤡ ᤐᤥᤱᤗ. ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹. ᤛᤡᤍᤢᤱᤈᤓᤠᤜᤠ᤹ ᤏᤢ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤀᤠᤕᤠᤱᤅᤠᤛᤡᤀᤠᤱ ᤕᤜᤘᤣ ᤍᤠᤱᤒᤠᤀᤥ ᤂᤢᤏᤧ᤹ ᤁᤢᤍᤃᤡᤀᤣ ᤀᤠᤏᤡ᤹ ᤔᤠᤱᤛᤧᤘᤠ ᤀᤠᤈᤥᤃᤢᤶ᤹॥ ᤜᤧᤰᤁᤩᤠᤱ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤀᤠᤏᤡᤃᤣ ᤔᤢ᤹ᤀᤡᤍᤠᤱᤛᤠᤜᤠ᤹ ᤀᤰᤂᤣ ᤔᤧᤵᤔᤠ ᤔᤧᤱᤄᤥᤛᤢᤛᤡᤴᤗ. ‘ᤕᤜᤘᤣ ᤍᤠᤱᤒᤠᤀᤥ ᤂᤡᤏᤡ᤹ ᤂᤥᤔᤠ ᤗᤰ ᤌᤣᤀᤠᤱ ᤜᤥᤵ॥’ 28 “ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤏᤡᤃᤣ ᤀᤡᤃᤪ ᤀᤠᤏᤡᤃᤣ ᤔᤢ᤹ᤀᤡᤍᤠᤱᤛᤠᤜᤠ᤹ ᤋᤠᤕᤧᤶᤔᤥ ᤜᤧᤰᤁᤣ ᤔᤧᤔᤧᤳᤋᤢᤛᤡᤸᤗᤧ ᤀᤠᤏᤡᤃᤣ ᤀᤰᤂᤣ ᤔᤧᤳᤋᤢᤶᤛᤡᤶᤒᤧ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤢᤶᤒᤧ. ‘ᤀᤥᤔᤧᤳᤋᤧᤶᤔᤧ᤹. ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤜᤧᤰᤋᤱᤒᤠ ᤌᤡᤰ ᤔᤧᤈᤥᤃᤢᤀᤠᤱ ᤕᤢᤱ᤹. ᤁᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤏᤢ ᤛᤡᤍᤢᤱᤈᤓᤠᤜᤠ᤹ᤖᤧ ᤗᤠᤃᤡ ᤔᤣ᤺ᤴ. ᤁᤖ ᤀᤠᤏᤡᤃᤣ ᤏᤢ ᤂᤡᤏᤡ᤹ ᤗᤢᤶᤔᤥ ᤋᤥ᤺ᤴᤍᤡᤖᤧ ᤗᤠᤃᤡ ᤔᤧᤈᤥᤃᤢᤒᤠᤖᤥ॥’ 29 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤏᤡᤃᤣ ᤐᤡᤑᤩᤢᤱᤒᤠ ᤐᤥᤱᤔᤠᤀᤠᤱ ᤂᤢᤏᤧ᤹ ᤁᤢᤛᤣᤛᤣᤍᤧᤴᤏᤡᤸᤗᤧ ᤁᤢᤍᤃᤠᤱ ᤁᤧᤕᤢᤱᤒᤠ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤗᤧᤵᤔᤠ. ᤜᤧᤰᤁᤩᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹. ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤜᤠ᤹ ᤏᤢ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤶᤔᤠᤖᤧ ᤗᤠᤃᤡ ᤘᤣ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤆᤥ᤺ᤰᤔᤠᤀᤠᤱ ᤀᤠᤀᤡᤴ ᤕᤜᤘᤣ ᤍᤠᤱᤒᤧᤴ ᤋᤡᤶᤔᤠ ᤏᤠ᤺ᤵᤔᤠ ᤗᤧᤵᤔᤠ ᤕᤧᤴᤃ ᤀᤠᤓᤧᤸᤗᤧᤀᤠᤱ ᤔᤧᤍᤠᤏᤧᤴᤗᤖᤥ॥” 30 ᤀᤠᤸᤗ ᤖᤢᤒᤣᤏ. ᤃᤠᤍ ᤏᤢ ᤔᤏᤛ᤻ᤛᤣᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤡᤏᤜᤠᤛ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤀᤡᤛᤪᤠᤀᤡᤗᤒᤠ ᤌᤠ᤺ᤰᤗᤠᤶᤗᤥᤒᤠᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤛᤠ᤹ᤖᤡᤰ ᤂᤢᤴᤇᤡ᤹ ᤏᤡᤱᤘᤠ᤹ ᤋᤩᤧ॥ 31 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖᤖᤧ ᤁᤢᤛ᤻ᤛᤠ ᤐᤡᤏᤜᤠᤛᤖᤧ ᤖᤢᤒᤣᤏ. ᤃᤠᤍ ᤏᤢ ᤔᤏᤛ᤻ᤛᤣᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤀᤰᤂᤣ ᤔᤧᤳᤋᤧᤛᤢᤛᤡ. “ᤕᤜᤘᤣ ᤍᤠᤱᤒᤧᤴ ᤀᤠᤏᤡ᤹ᤏᤢ ᤘᤠ᤹ᤖᤧᤳᤇ ᤑᤠ᤹ᤀᤠᤱ ᤀᤠᤀᤡᤴ ᤀᤠᤏᤡᤃᤣ ᤏᤡᤱᤘᤠ᤹ ᤂᤥᤛᤢᤶᤒᤧ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤡᤏᤡ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤒᤠ ᤔᤧ᤺ᤴᤗᤳᤇ॥ ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤥᤗᤠᤶ ᤀᤡᤛᤪᤠᤀᤡᤗᤡᤜᤠ᤹ ᤂᤡᤏᤡ᤹ ᤁᤧᤛᤧ᤺ᤵᤋᤢᤶᤛᤡᤶᤔᤠᤱ ᤔᤧᤘᤠ᤹॥” 32 ᤂᤧᤒᤩᤠᤱ ᤃᤡᤗᤠᤍ ᤗᤠᤈᤣ᤹ᤒᤠ ᤖᤢᤒᤣᤏᤡ ᤜᤧᤰᤁᤩᤠᤱ ᤃᤠᤍᤡᤜᤠ᤹ᤗᤠᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖᤖᤧ ᤁᤢᤛ᤻ᤛᤠ ᤐᤡᤏᤜᤠᤛᤧᤴ ᤏᤢ ᤂᤧᤴ ᤌᤠ᤺ᤰᤗᤠᤶᤗᤥᤒᤠᤜᤠ᤹ ᤁᤏᤠᤏ ᤗᤠᤈᤣ᤹ᤀᤥ ᤀᤡᤛᤪᤠᤀᤡᤗᤡᤜᤠ᤹ᤖᤥ ᤔᤧᤏᤢ᤺ᤰᤂᤧ. ᤂᤶᤓᤩᤠᤱ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤱᤜᤠ᤹ ᤔᤧᤈᤧᤰᤋᤢᤛᤡ॥ 33 ᤂᤧᤴ ᤐᤠ᤺ᤴᤏᤡᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤛᤡᤖᤠ᤹ᤌᤠᤅᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤠᤖᤠ ᤔᤧᤓᤥᤛᤢ॥ ᤕᤠᤶᤔᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤐᤣ᤺ᤰᤔᤠ. ᤜᤧᤰᤁᤩᤠᤱ ᤖᤢᤒᤣᤏᤡ ᤏᤢ ᤃᤠᤍᤡᤜᤠ᤹ ᤔᤧᤕᤢᤱᤒᤠ ᤗᤠᤈᤣᤴ ᤂᤠᤵᤐᤢᤌᤩ᤺ᤱ ᤆᤥ᤺ᤰᤛᤧ ᤐᤣ᤺ᤰᤔᤠ ᤐᤠᤴ ᤐᤠ᤺ᤵᤔᤠ ᤔᤧᤏᤠ᤹ᤖᤧ॥ 34 ᤜᤧᤰᤁᤩᤠᤱ ᤖᤢᤒᤣᤏᤡᤜᤠ᤹ ᤏᤢ ᤃᤠᤍᤡᤜᤠ᤹ᤖᤧ “ᤕᤜᤘᤣ ᤍᤠᤱᤒᤧᤴ ᤏᤡᤱᤘᤠ᤹ᤑᤢᤔᤠᤱᤗᤥ ᤁᤧᤗ᤹ᤒᤠ ᤀᤠᤏᤡ᤹ ᤗᤢᤶᤔᤥ ᤋᤥ᤺ᤴᤍᤡᤖᤥ.” ᤑᤠ᤹ᤀᤠᤱ ᤂᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤔᤡᤱ ᤔᤧᤕᤢᤰᤂᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.