ᤕᤜᤥᤛᤢ 20 - LIFOTNT

ᤛᤧ᤺ᤵᤛᤡᤱᤔᤠᤍᤧᤴ ᤕᤧᤰᤕᤰᤜᤠ᤹

¹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤛᤢᤴ ᤀᤰᤂᤣ ᤔᤧᤳᤋᤢ.

² “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹. ‘ᤀᤠᤱᤃᤠ᤹ ᤔᤥᤛᤠᤴ ᤗᤠᤶᤒᤠ ᤂᤡᤏᤡ᤹ ᤔᤧᤳᤏᤡᤱᤒᤠ ᤁᤢᤀᤡᤛᤡᤰ ᤛᤧ᤺ᤵᤛᤡᤱᤍᤧᤴ ᤕᤧᤰᤕᤰᤜᤠ᤹ ᤏᤡ᤺ᤴᤎᤥ ᤆᤥᤃᤧᤶᤔᤧ᤹॥

³ ᤏᤡᤱᤘᤠ᤹ ᤔᤧᤱᤄᤥᤀᤣ ᤀᤡᤃᤪ ᤀᤠᤴᤈᤠᤏᤡ᤺ᤸᤗᤧ ᤁᤢᤓᤠᤖᤧ ᤔᤏᤠ ᤛᤧᤖᤢᤏᤧᤓᤃᤪ ᤂᤧᤴ ᤔᤏᤠ ᤁᤧᤛᤧᤵᤐᤧᤴ ᤂᤧᤳᤇᤡᤱᤅᤠᤱ ᤂᤧᤵᤔᤥ ᤐᤣ᤺ᤰᤗ. ᤜᤧᤰᤁᤩᤠᤱ ᤁᤢᤗᤧᤰᤘᤠ ᤏᤢ᤺ᤰᤔᤠ ᤁᤧᤃᤥ᤺ᤵᤐᤠᤜᤠ᤹ᤗᤠᤶ ᤂᤧᤴ ᤕᤧᤰᤕᤰᤜᤠ᤹ ᤛᤧ᤺ᤵᤛᤡᤱᤔᤠᤍᤧᤴ ᤐᤥᤱ᤹॥

⁴ “‘ᤂᤧᤴ ᤕᤧᤰᤕᤰᤜᤠ᤹ᤀᤥᤒᤠ ᤁᤢᤓᤠ ᤗᤳᤇᤠᤀᤥ ᤂᤧᤴ ᤂᤧᤳᤇᤡᤱ ᤐᤣ᤺ᤰᤗ ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤁᤥ ᤗᤠ᤺ᤵᤔᤠ ᤗᤠᤶᤎᤣ᤺ᤳᤋᤥ ᤕᤧᤶᤛᤡᤱᤗ. ᤂᤧᤒᤩᤠᤱ ᤂᤢᤏᤧ᤹ ᤁᤢᤒᤠ᤺ᤴᤏᤡᤴ ᤕᤧᤰᤕᤰᤁᤥᤒᤠ ᤛᤠᤶᤕᤥᤛᤡᤰᤛᤠᤶᤒᤠᤜᤠ᤹ ᤆᤧᤰᤋᤢᤛᤡᤖ॥ ᤜᤧᤰᤁᤩᤠᤱ ᤕᤧᤰᤕᤰ ᤛᤡᤃᤠᤱ ᤂᤢᤴᤇᤡ᤹ᤀᤥ ᤔᤧᤍᤣ᤹ᤖᤢᤀᤠᤱ ᤂᤧᤴ ᤕᤢᤱᤔᤠᤍᤧᤴ ᤔᤧᤒᤡᤖᤢᤖ ᤜᤧᤰᤁᤩᤠᤱ ᤂᤧᤴ ᤂᤧᤱᤜᤠ᤹ᤏᤢ ᤛᤥᤖᤡᤰ ᤕᤢᤱᤗ॥

⁵ ᤔᤏᤠ ᤛᤧᤖᤢᤒᤠᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤔᤠ ᤁᤧᤃᤥ᤺ᤵᤐᤧᤸᤗᤧ ᤂᤧᤴ ᤏᤠ᤺ᤳᤋᤢᤏᤧᤓᤃᤪ ᤂᤧᤱᤜᤠ᤹ᤖᤧ ᤂᤧᤴ ᤔᤏᤠ ᤁᤧᤛᤧᤵᤐᤧᤴ ᤂᤧᤴ ᤁᤢᤗᤧᤰᤘᤠ ᤏᤢ᤺ᤰᤔᤠ ᤁᤧᤃᤥ᤺ᤵᤐᤧᤴ ᤜᤢᤰᤔᤧᤴᤇᤢᤵᤋᤢᤴᤗ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤜᤡᤶᤒᤣᤛᤠᤱᤒᤧᤴ ᤀᤠᤴᤈᤠᤏᤡ᤺ᤸᤗᤧ ᤛᤧᤖᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤧᤴᤏᤢ ᤂᤢᤏᤧ᤹ ᤌᤧᤔᤠᤀᤠᤱ ᤏᤡᤱᤔᤡ ᤜᤥ᤺ᤵᤋᤧ॥

⁶ ᤜᤧᤰᤁᤩᤠᤱ ᤂᤠᤛᤧᤴᤗᤧ ᤗᤠᤃᤡ ᤛᤱᤈᤢᤶᤓᤥᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤔᤧᤴᤕᤧᤵᤐᤣ ᤌᤠᤖᤡᤰ ᤏᤢ ᤂᤧᤴ ᤕᤧᤶᤔᤥᤒᤠ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤔᤧᤴᤇᤡᤀᤣ ᤌᤠᤖᤡᤰ ᤂᤧᤴ ᤜᤠᤒᤠ ᤂᤧᤴ ᤕᤧᤰᤕᤰᤁᤥ ᤘᤠ᤹ᤖ॥ ᤂᤧᤴ ᤀᤣᤃᤠᤱ ᤂᤧᤴ ᤔᤏᤠ ᤁᤧᤛᤧᤵᤐᤧᤴ ᤂᤢᤏᤧ᤹ ᤀᤠᤵᤑᤣᤰ ᤁᤢᤜᤡᤶᤔᤥ ᤀᤠᤵᤑᤣᤰ ᤁᤢᤕᤧᤰᤕᤰᤁᤥ. ᤀᤠᤳᤋᤡᤏᤢ ᤂᤢᤏᤧ᤹ ᤂᤧᤳᤇᤡᤱᤅᤠᤱ ᤘᤕᤧ. ᤜᤠᤒᤠ ᤂᤧᤴ ᤕᤧᤰᤕᤰᤁᤥ ᤐᤣ᤺ᤰᤗ॥’”

⁷ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤷᤍᤏ ᤏᤠᤶᤎᤠ ᤐᤡᤛᤠᤱ ᤃᤠᤗᤡᤗᤀᤥ ᤏᤵᤋᤠᤗᤡᤒᤠ ᤁᤥ᤺ᤰᤔᤠ ᤑᤠᤱᤈᤱ ᤗᤠᤈᤣ᤹ᤀᤥ ᤁᤣᤍᤣᤛ. ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤑᤠᤱᤈᤱ ᤗᤠᤈᤣ᤹ᤀᤥ ᤛᤁᤣᤔ ᤏᤢ ᤕᤜᤢᤍᤠᤒᤠ ᤁᤥ᤺ᤰᤔᤠ ᤑᤠᤱᤈᤱ ᤗᤠᤈᤣ᤹ᤀᤥ ᤁᤡᤷᤕᤋ-ᤀᤷᤒᤠᤴ (ᤂᤧᤴ ᤜᤣᤒᤪᤥᤏ ᤔᤧᤔᤧᤳᤋᤢ) ᤔᤧᤍᤥᤴᤍᤢ॥

⁸ ᤕᤖᤡᤜᤥᤒᤠ ᤕᤷᤍᤏ ᤏᤠᤱᤃᤧᤴ ᤗᤧᤵᤔᤠᤱ. ᤖᤢᤒᤣᤏᤖᤧ ᤁᤢᤎᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤁᤧᤏᤧᤒᤠ ᤏᤧᤏᤧᤒᤠᤍᤧᤴᤏᤥ ᤒᤣᤛᤧᤖᤧᤴ. ᤃᤠᤍᤖᤧ ᤁᤢᤎᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤃᤡᤗᤠᤍᤀᤥ ᤁᤧᤏᤧᤒᤠ ᤖᤠᤔᤥᤋᤧᤴ. ᤔᤏᤛ᤻ᤛᤣᤖᤧ ᤁᤢᤎᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤒᤠᤛᤠᤏᤀᤥ ᤁᤧᤏᤧᤒᤠ ᤃᤥᤗᤠᤏᤧᤴ ᤂᤧᤱᤜᤠ᤹ᤖᤧ ᤔᤧᤛᤣᤃᤢ॥

⁹ ᤁᤢᤓᤠᤖᤧ ᤁᤢᤓᤠ ᤔᤏᤠᤴ ᤀᤠᤴᤈᤠᤏᤡ᤺ᤸᤗᤧ ᤛᤧᤖᤢᤏᤧᤓᤃᤪ ᤆᤢᤶᤗᤢᤱ ᤋᤃᤡ ᤂᤧᤸᤗᤧ ᤁᤢᤄᤠᤛᤧᤴ ᤔᤧᤶᤒᤥᤱᤅᤣ ᤌᤠᤖᤡᤰ ᤔᤏᤠ ᤛᤧᤖᤢᤒᤠᤸᤗᤧ ᤁᤢᤗᤧᤰᤘᤠ ᤜᤢᤱᤔᤠ ᤁᤧᤃᤥ᤺ᤵᤐᤧᤸᤗᤧ ᤁᤢᤜᤢᤰᤁᤥᤗᤠᤶ ᤛᤡᤔᤠ ᤔᤧᤒᤥᤱᤏᤧᤸᤗ ᤑᤠ᤹ᤀᤠᤱ ᤂᤧᤴ ᤂᤧᤳᤇᤡᤱᤔᤠᤀᤠᤱ ᤐᤣ᤺ᤰᤔᤠᤖᤧ ᤗᤠᤃᤡ. ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤜᤧᤰᤁᤩᤠᤱ ᤂᤢᤴᤇᤡ᤹ᤏᤢ ᤛᤥᤖᤡᤰ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠᤜᤠ᤹ᤖᤧ ᤗᤠᤃᤡ ᤏᤡ᤺ᤴᤎᤥ ᤁᤧᤒᤥᤱᤒᤠ ᤕᤧᤰᤕᤰᤜᤠ᤹ ᤀᤠᤶᤓᤠ ᤁᤴᤜᤠ᤹ᤖᤥ॥