ᤕᤜᤥᤛᤢ 2 - LIFOTNT

ᤕᤜᤥᤛᤢ᤺ᤸᤗᤧ ᤕᤖᤡᤜᤥᤀᤥ ᤌᤥ᤺ᤶᤈᤡᤒᤠ ᤐᤠᤱᤄᤢᤛᤡ

¹ ᤂᤧᤒᤩᤠᤱ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢ᤺ᤸᤗᤧ ᤛᤡᤳᤋᤡᤔᤗᤠᤶ ᤌᤥ᤺ᤶᤈᤡᤒᤠ ᤏᤧᤳᤇᤡ ᤛᤫᤠ᤺ᤳ ᤐᤠᤱᤄᤢᤛᤡᤀᤠᤱ ᤔᤧᤳᤋᤢᤛᤡ. “ᤂᤧᤴ ᤗᤠᤈᤣᤴ ᤏᤢ ᤛᤧᤰᤂᤠ᤺ᤸᤗᤧ ᤕᤖᤡᤜᤥᤒᤠ ᤛᤡᤒᤡ᤹ ᤐᤠ᤺ᤴᤜᤠ᤹ ᤑᤧᤳᤋᤧᤛᤧ᤹ᤀᤠᤱ ᤑᤧᤖᤧᤛᤧ᤹॥” ᤜᤧᤰᤁᤣᤗ᤹ᤖᤡᤰ ᤂᤢᤴᤇᤡ᤹ ᤐᤣᤛᤡ. ᤜᤧᤰᤁᤩᤠᤱ ᤖᤠᤜᤠᤒ ᤔᤡᤱ ᤁᤧᤘᤠ᤺ᤵᤔᤠ ᤁᤧᤳᤏᤡᤔᤧᤸᤗᤧ ᤁᤢᤜᤡᤶᤔᤥ ᤁᤧᤖᤧᤛᤡ. ᤂᤧᤒᤩᤠᤱ ᤀᤠᤶᤓᤠ ᤂᤧᤵᤔᤥ ᤕᤠᤱᤎᤥ᤺ᤰᤋᤧᤛᤡ॥

² ᤜᤧᤰᤁᤩᤠᤱ ᤁᤢᤓᤠᤖᤧ ᤕᤖᤡᤜᤥᤒᤠ ᤜᤠᤱᤅᤡᤴ ᤀᤰᤂᤣ ᤔᤧᤔᤧᤳᤋᤢ. “ᤀᤥᤔᤧᤳᤋᤧ᤹ᤀᤥ. ᤀᤡᤛᤪᤠᤀᤡᤗᤡ ᤌᤠ᤺ᤰᤁᤥᤒᤠ ᤁᤢᤓᤠ ᤔᤏᤠᤜᤠ᤹ ᤁᤴ ᤗᤠᤈᤣᤴ ᤌᤥ᤺ᤶᤔᤠᤖᤧ ᤗᤠᤃᤡ ᤀᤠᤀᤡᤴ ᤛᤧᤴᤍᤡᤰ ᤁᤳᤏᤠ ᤔᤧᤓᤧᤖᤧᤀᤠᤱ ᤔᤧᤘᤠ᤹॥”

³ ᤁᤸᤗᤧᤆᤥᤃᤢᤸᤗᤧ ᤕᤖᤡᤜᤥᤒᤠ ᤜᤠᤱᤅᤡᤸᤗᤧ ᤖᤠᤜᤠᤒᤖᤥ ᤁᤴ ᤀᤡᤱᤄᤱᤅᤡᤴ ᤜᤠᤅᤢᤍᤣᤛᤢ. “ᤂᤧᤏᤧ᤹ᤀᤥ ᤁᤧᤓᤧᤶᤒᤠᤀᤠᤱ ᤁᤧᤜᤡᤶᤔᤥ ᤁᤧᤗᤠ᤺ᤵᤐᤠ ᤔᤏᤠᤜᤠ᤹ ᤗ᤺ᤳᤋᤧ ᤑᤧᤳᤋᤧᤛᤧ᤹. ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤗᤠᤈᤣᤴ ᤌᤥ᤺ᤶᤔᤠᤖᤧ ᤗᤠᤃᤡ ᤂᤧᤱᤜᤠ᤹ ᤔᤧᤓᤧᤖᤧᤀᤠᤱ ᤔᤧᤘᤠ᤹॥”

⁴ ᤁᤖ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤂᤧᤴ ᤏᤧᤳᤇᤡ ᤔᤏᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤆᤡᤰᤂᤢ ᤕᤢᤰᤂᤢᤛᤡᤀᤠᤱ ᤕᤢᤅᤧᤛᤡ॥ ᤂᤧᤸᤗᤧ ᤐᤠ᤺ᤳᤋᤢ. “ᤀᤥᤖᤥ. ᤔᤏᤠ ᤏᤧᤳᤇᤡ ᤀᤠᤱᤃᤠ᤹ᤀᤥ ᤑᤧᤖᤧᤛᤡᤀᤠᤱ ᤘᤕᤧᤛᤡ. ᤁᤖ ᤂᤧᤱᤜᤠ᤹ ᤀᤠᤳᤋᤡᤗᤠᤶ ᤋᤩᤧᤛᤡᤀᤠᤱ ᤘᤕᤧᤛᤡ ᤀᤠᤱᤃᤠ᤹ ᤏᤡᤱᤘᤠ᤹ ᤔᤧᤱᤄᤥᤒᤠ॥

⁵ ᤕᤢ᤺ᤴᤇᤡᤰ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤴ ᤛᤢᤵᤔᤠ ᤕᤧᤶᤔᤥ ᤂᤢᤴᤇᤡ᤹ ᤗ᤺ᤴᤍᤧ ᤐᤣᤛᤡ॥ ᤂᤧᤴ ᤏᤧᤵᤑᤢ ᤔᤏᤠᤜᤠ᤹ ᤀᤠᤳᤋᤠᤴ ᤐᤣᤛᤡ. ᤀᤠᤱᤃᤠ᤹ ᤔᤧᤏᤡᤀᤠᤴ॥ ᤂᤡᤔᤥ ᤂᤢᤴᤇᤡ᤹ ᤀᤣᤃᤠᤱ ᤁᤧᤒᤣᤃᤡᤏᤧᤓᤃᤪ ᤂᤧᤏᤡ᤹ ᤂᤢᤴᤇᤡ᤹ ᤁᤧᤍᤢᤔᤢᤶᤛᤡᤶ᤹॥”

⁶ (ᤁᤖ ᤂᤧᤸᤗᤧ ᤂᤧᤴ ᤏᤧᤳᤇᤡ ᤔᤏᤠᤜᤠ᤹ ᤌᤠ᤺ᤱ ᤁᤦᤛᤡᤀᤥ ᤆᤡᤰᤂᤢ ᤕᤢᤰᤂᤢᤛᤡᤀᤠᤱ ᤕᤢᤅᤧᤛᤡ. ᤜᤧᤰᤁᤩᤠᤱ ᤁᤦᤛᤡᤀᤥ ᤂᤢᤏᤧ᤹ ᤋᤱᤄᤢ ᤏᤧᤛ᤻ᤛᤢᤒᤠ ᤆᤕᤠᤱᤛᤡᤱ ᤗᤠᤱᤜᤠ᤹ᤖᤧ ᤁᤢᤛᤡᤃᤠᤱ ᤂᤧᤴᤜᤠ᤹ ᤆᤡᤰᤂᤢᤛᤡᤀᤠᤱ ᤕᤢᤅᤧᤛᤡ॥)

⁷ ᤁᤧᤏᤠ᤺ᤵᤐᤠ ᤔᤏᤠᤜᤠ᤹ᤃ ᤂᤢᤴᤇᤡ᤹ ᤔᤧᤏᤠ᤺ᤳᤋᤢᤛᤡᤖ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤐᤡᤳᤗᤢᤱᤔᤠᤜᤠ᤹ ᤗᤧᤵᤔᤠᤱ ᤔᤧᤎᤠᤛᤡᤱ॥ ᤁᤧᤏᤠ᤺ᤵᤐᤠᤜᤠ᤹ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧ ᤔᤧᤒᤣᤏᤢᤔᤧ᤺ᤴᤏᤣ ᤕᤖᤡᤜᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤴ ᤆᤡᤛᤢᤵ ᤔᤧᤛᤢᤒᤢ॥

⁸ ᤂᤧᤴ ᤌᤥ᤺ᤶᤈᤡᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤀᤡᤶᤔᤠᤏᤢ᤺ᤸᤗᤧ ᤋᤃᤡ ᤂᤧᤴ ᤔᤧᤴᤇᤢᤔᤠᤴ ᤌᤠ᤺ᤱ ᤁᤦᤛᤡᤀᤥ ᤌᤥ᤺ᤰᤛᤡᤱ ᤌᤠᤅᤧ.

⁹ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤁᤴ ᤗᤠᤈᤣᤴ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤁᤧᤒᤡᤖᤡᤀᤠᤱ ᤏᤧᤖᤥ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱ᤹. ᤂᤧᤒᤩᤠᤱ ᤀᤠᤏᤡᤃᤣ ᤗᤢᤶᤔᤥ ᤂᤧᤏᤡ᤹ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤛᤠ᤹ᤖᤡᤰ ᤁᤡᤔᤠ ᤕᤱᤔᤠ ᤐᤥ᤺ᤰᤂᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤁ᤹ᤕᤥ ᤁᤧᤕᤢᤱᤒᤠ ᤔᤏᤠᤜᤠ᤹ ᤂᤡᤏᤡ᤹ ᤁᤧᤶᤃᤡᤖᤡᤀᤠᤱ ᤕᤱᤔᤠ ᤔᤧᤜᤣ᤺ᤰᤋᤧᤀᤠᤱ ᤔᤧᤘᤠ᤹॥

¹⁰ ᤔᤡᤛᤪ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤁᤧᤗ᤺ᤴᤍᤡ ᤁᤧᤓᤧᤖᤡᤸᤗᤧ ᤂᤡᤏᤡ᤹ ᤋᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤥᤒᤠ ᤆᤫᤠ᤺ᤳᤋᤡᤴ ᤆᤵᤐᤪᤧᤰ ᤆᤒᤧᤖ ᤕᤠ᤺ᤴᤍᤢᤒᤠ ᤏᤢ ᤕᤷᤍᤏ ᤏᤠᤱᤃᤧᤴ ᤐᤡᤛᤠᤱᤒᤠ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤏᤧᤵᤔᤠᤱ ᤜᤠᤱᤜᤠ᤹. ᤛᤡᤜᤥᤏᤏᤢ ᤀᤥᤃᤧᤴ ᤂᤡᤏᤡ᤹ ᤘᤖᤧᤱᤗᤧᤱ ᤁᤧᤔᤧᤰᤂᤢᤶᤛᤡᤶᤒᤠᤴᤏᤠᤱ ᤀᤠᤏᤡᤃᤣ ᤂᤧᤵᤛᤢᤶᤒᤧᤀᤠᤱ ᤘᤠ᤹॥

¹¹ ᤁᤴ ᤂᤧᤵᤛᤢᤶᤒᤧᤏᤢᤔᤧ᤺ᤴᤏᤣ ᤀᤠᤏᤡᤃᤣ ᤁᤡᤛᤡᤃᤧ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤣ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤀᤠ᤺ᤴᤇᤡᤱᤔᤠ ᤔᤧᤛᤢᤰᤋᤡᤃᤧᤴ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤌᤠ᤺ᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤏᤢ ᤔᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤏᤡᤱᤘᤠ᤹ᤑᤢᤔᤠᤱᤗᤥ॥

¹² ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤀᤠᤱᤃᤠ᤹ ᤂᤧᤴᤇᤡ᤹ ᤐᤣᤗᤡ ᤑᤠᤰᤏᤧᤛᤡᤱ. ᤀᤠᤱᤃᤠ᤹ ᤂᤧᤴᤇᤡ᤹ ᤏᤢᤖᤡᤰ ᤔᤧᤳᤏᤧᤛᤡᤱᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ᤏᤢ ᤛᤥᤖᤡᤰ ᤕᤜᤘᤣ ᤍᤠᤱᤒᤧᤴᤏᤢ ᤔᤠᤱᤜᤧᤰ ᤆᤥᤃᤧᤛᤧ᤹. ᤀᤠᤱᤃᤠ᤹ ᤀᤠᤜᤡᤶᤛᤕᤱᤜᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤧᤛᤧ᤹॥ ᤀᤠᤱᤃᤠ᤹ ᤗᤳᤇᤠ ᤛᤧᤰᤂᤠᤒᤠ ᤔᤡᤰᤛᤣ᤺ᤴ ᤀᤠᤒᤡᤖᤧ᤹.

¹³ ᤜᤧᤰᤁᤣᤗ᤹ᤖᤡᤰ ᤀᤠᤱᤃᤠ᤹ ᤀᤠᤶᤔᤠ ᤏᤢ ᤀᤠᤶᤒᤠ. ᤀᤠᤱᤃᤠ᤹ ᤀᤠᤶᤓᤢ᤹ ᤀᤠᤴᤛᤠ᤹. ᤀᤠᤴᤏᤧ᤹ ᤀᤠᤴᤛᤠ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤀᤠᤰᤂᤩᤠᤖᤡᤰ ᤔᤧᤘᤠ᤹. ᤁᤧᤖᤧᤰ ᤁᤢᤜᤡᤱᤘᤧᤳ ᤋᤠᤱᤄᤧᤶᤛᤡᤶᤔᤧ᤹ᤀᤠᤱ ᤀᤠᤏᤡᤃᤣ ᤛᤡᤔᤠᤗᤠᤶ ᤋᤠᤱᤀᤠᤛᤧ᤺ᤵᤋᤧ᤹॥”

¹⁴ ᤂᤧᤴ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤀᤠ᤺ᤴᤇᤡᤱᤔᤠ ᤐᤡᤖᤧᤳᤇᤢ. “ᤂᤡᤏᤡ᤹ ᤜᤡᤱᤔᤠᤖᤧ ᤗᤠᤃᤡ ᤀᤠᤏᤡᤃᤣ ᤛᤡᤔᤠᤛᤠᤱ ᤕᤠᤖᤡᤵ ᤘᤕᤡᤃᤧ॥ ᤀᤠᤏᤡᤃᤣ ᤁᤴ ᤕᤠ᤺ᤶᤒᤰᤁᤡᤴ ᤂᤡᤏᤡ᤹ ᤜᤠ᤺ᤳᤋᤠᤱ ᤁᤧᤶᤔᤧᤳᤋᤢᤶᤔᤡᤴᤏᤣ ᤓᤃᤪ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡᤃᤣ ᤁᤴ ᤗᤠᤈᤣᤴ ᤐᤡᤖᤡᤃᤧᤀᤠᤱ ᤀᤣᤃᤠᤱ ᤂᤡᤏᤡ᤹ ᤀᤠᤏᤡᤃᤣ ᤗᤢᤱᤔᤠ᤹ ᤋᤢᤰᤁᤠᤛᤡᤃᤧ ᤜᤧᤰᤁᤩᤠᤱ ᤏᤛᤠ᤺ᤴᤛᤠᤒᤠ ᤕᤠ᤺ᤶᤒᤰ ᤆᤥᤃᤢᤶ ᤐᤡᤀᤠᤛᤡᤃᤧᤖᤥ॥”

¹⁵ ᤂᤧᤒᤩᤠᤱ ᤂᤧᤸᤗᤧ ᤂᤧᤴᤜᤠ᤹ ᤐᤣᤎᤠ᤺ᤵᤐᤥᤗᤠᤶ ᤌᤠᤰᤐᤠ᤺ᤸᤗᤧ ᤏᤠᤶᤔᤧᤳᤋᤢᤛᤡᤀᤠᤱ ᤕᤥ ᤌᤠᤛᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤴ ᤕᤢᤅᤧᤒᤠ ᤜᤡᤶᤔᤡᤴ ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤁᤥᤀᤥᤀᤣ ᤕᤢᤅᤧ॥

¹⁶ ᤂᤧᤸᤗᤧ ᤂᤧᤴᤜᤠ᤹ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤁᤥ᤺ᤰᤔᤠ ᤗᤧᤵᤔᤠᤱ ᤐᤣᤛᤧ᤹. ᤔᤣ᤺ᤴᤏᤧᤓᤃᤪ ᤁᤧᤏᤠ᤺ᤵᤐᤠᤜᤠ᤹ᤖᤧ ᤁᤧᤶᤛᤡ᤹ᤛᤡ᤹॥ ᤁᤧᤏᤠ᤺ᤵᤐᤠᤜᤠ᤹ ᤔᤧᤴᤏᤢ᤺ᤱᤏᤧᤸᤗ ᤌᤧᤶᤒᤠ ᤛᤢᤶᤕᤠᤴ ᤌᤠᤖᤡᤰ ᤜᤠᤒᤠ ᤂᤧᤵᤔᤥ ᤆᤡᤱᤏᤧᤛᤧ᤹. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤂᤧᤴᤇᤡ᤹ ᤀᤠᤵᤑᤣᤰ ᤗᤠᤶᤔᤡᤴ ᤏᤠ᤺ᤳᤋᤧᤛᤧ᤹॥”

¹⁷ ᤂᤧᤴ ᤏᤧᤳᤇᤡ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤳᤋᤧᤛᤢ. “ᤂᤧᤏᤧ᤹ ᤔᤧᤳᤏᤧᤛᤡᤃᤧᤒᤠ ᤁᤴ ᤐᤠ᤺ᤴᤜᤠ᤹ ᤁᤧᤴᤈᤥᤃᤢᤴᤏᤧᤓᤃᤪ ᤀᤠᤴᤇᤡᤃᤣ ᤆᤥᤃᤧᤛᤢᤃᤧᤒᤠ ᤔᤠᤱᤜᤧᤰᤁᤡᤸᤗᤧ ᤔᤧᤄᤣ᤺ᤱᤛᤡᤃᤧᤴ॥

¹⁸ ᤀᤠᤴᤇᤡᤃᤣ ᤁᤴ ᤗᤠᤈᤣ᤹ᤀᤥ ᤑᤧᤖᤧᤛᤡᤃᤧᤸᤗᤧ ᤀᤠᤳᤋᤡᤴ ᤐᤣᤎᤠ᤺ᤵᤐᤥᤗᤠᤶ ᤕᤠᤵᤔᤡ ᤕᤥ ᤁᤧᤎᤠᤛᤧ. ᤜᤠᤒᤠ ᤂᤧᤴ ᤐᤣᤎᤠ᤺ᤵᤐᤥ ᤁᤴ ᤜᤧ᤺ᤳᤋᤠᤱᤒᤠ ᤌᤠᤰᤐᤠᤴ ᤀᤡᤄᤣ᤺ᤱᤔᤠ ᤑᤶᤔᤠ ᤐᤥᤱ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤶᤒᤠ. ᤁᤧᤶᤔᤠ. ᤁᤧᤶᤓᤢ᤹ ᤁᤧᤴᤛᤠ᤹ ᤏᤢ ᤁᤧᤶᤒᤠᤖᤧ ᤁᤧᤖᤧᤰ ᤁᤢᤜᤡᤶᤛᤕᤱᤜᤠ᤹ ᤁᤧᤜᤡᤶᤔᤥ ᤑᤢᤱᤔᤠᤛᤡᤀᤠᤱ ᤕᤢᤱᤔᤠᤛᤡ ᤐᤥᤱ᤹॥

¹⁹ ᤂᤧᤏᤧ᤹ ᤁᤧᤜᤡᤶᤔᤥᤗᤠᤶ ᤀᤠᤳᤋᤡᤴ ᤗᤠ᤺ᤰᤁᤠᤳ ᤔᤠᤖᤠᤶᤔᤥ ᤗ᤺ᤴ ᤂᤧᤸᤗᤧ ᤁᤢᤔᤠᤰᤂᤡᤴ ᤂᤢᤏᤧ᤹ ᤁᤢᤎᤧᤃᤣ᤺ᤰᤐᤥᤀᤣ ᤌᤠᤖᤥ. ᤜᤧᤰᤁᤩᤠᤱ ᤀᤠᤴᤇᤡᤃᤣ ᤀᤠᤵᤋᤡᤰ ᤔᤧᤎᤠᤛᤡᤃᤧᤴ॥ ᤜᤧᤰᤁᤩᤠᤱ ᤁᤴ ᤜᤡᤶᤔᤥ ᤂᤧᤏᤧ᤹ᤏᤢ ᤀᤠᤳᤋᤡᤴ ᤕᤢᤱ᤹ ᤂᤧᤸᤗᤧ ᤁᤢᤛᤶᤎᤠᤱ ᤁᤢᤓᤠᤖᤧ ᤜᤢᤰ ᤕᤠᤰᤋᤢᤏᤧᤓᤃᤪ ᤂᤧᤸᤗᤧ ᤁᤢᤔᤠᤰᤂᤡᤴ ᤀᤠᤴᤇᤡᤃᤣ ᤛᤶᤎᤠᤱ ᤌᤠᤖᤥ॥

²⁰ ᤁᤖ ᤀᤠᤴᤇᤡᤃᤣ ᤆᤥᤃᤧᤛᤢᤃᤧᤒᤠ ᤕᤠ᤺ᤶᤒᤰᤁᤡᤴ ᤂᤧᤏᤧ᤹ ᤁᤧᤒᤠ᤺ᤳᤋᤢᤏᤧᤓᤃᤪ ᤂᤧᤏᤧ᤹ ᤀᤠᤴᤇᤡᤃᤣ ᤆᤥ᤺ᤰᤔᤠ ᤕᤠᤵᤔᤡ ᤁᤧᤒᤠᤱᤄᤧᤒᤠ ᤁᤴ ᤔᤠᤱᤜᤧᤰᤁᤡᤴᤗᤠᤶ ᤀᤠᤴᤇᤡᤃᤣ ᤆᤥ᤺ᤰᤕᤢᤶᤓᤥ ᤂᤥᤛᤡᤃᤧᤖᤥ॥”

²¹ ᤂᤧᤸᤗᤧ ᤔᤧᤳᤋᤢᤛᤡ. “ᤂᤧᤴᤇᤡ᤹ ᤁᤧᤒᤠ᤺ᤳᤋᤧᤛᤢᤒᤠ ᤁᤢᤀᤡᤛᤡ᤺ᤰᤁᤣ ᤐᤥᤱᤗ॥” ᤜᤧᤰᤁᤩᤠᤱ ᤂᤧᤸᤗᤧ ᤂᤢᤴᤇᤡ᤹ ᤛᤧᤶᤔᤢ᤹ᤀᤡ ᤐᤡᤖᤢᤛᤡ. ᤂᤧᤒᤩᤠᤱ ᤂᤧᤴᤜᤠ᤹ ᤐᤣᤛᤡᤀᤠᤱ ᤂᤧᤸᤗᤧ ᤂᤧᤴ ᤜᤧ᤺ᤳᤋᤠᤱᤒᤠ ᤌᤠᤰᤐᤠᤴ ᤐᤣᤎᤠ᤺ᤵᤐᤥ ᤂᤣ᤺ᤰᤂᤢ॥

²² ᤂᤧᤴ ᤌᤥ᤺ᤶᤈᤡᤒᤠᤜᤠ᤹ ᤐᤣᤛᤡᤀᤠᤱ ᤁᤥ᤺ᤰᤔᤠᤀᤥ ᤁᤧᤖᤧᤛᤡ. ᤂᤢᤴᤇᤡ᤹ ᤏᤠ᤺ᤳᤇᤧ ᤁᤧᤓᤧᤶᤒᤠᤜᤠ᤹ᤖᤧ ᤗᤠᤶ ᤁᤢᤗᤧ᤺ᤶ ᤁᤧᤖᤧᤰ ᤔᤧᤃᤥ᤺ᤳᤋᤢᤛᤡᤛᤠᤱ ᤂᤧᤴᤜᤠ᤹ ᤂᤥᤔᤠ ᤔᤧᤴᤇᤢᤰᤋᤢᤴᤛᤡᤴᤏᤠᤱ ᤔᤧᤴᤏᤢ᤺ᤱ ᤔᤧᤶᤒᤣ᤺ᤰᤁᤣ ᤌᤧᤶᤒᤠ ᤛᤢᤶᤕᤠᤴ ᤌᤠᤖᤡᤰ ᤜᤠᤒᤠ ᤂᤧᤵᤔᤥ ᤕᤢᤅᤧᤛᤡ॥

²³ ᤂᤧᤒᤩᤠᤱ ᤂᤧᤴ ᤏᤧᤵᤔᤠᤱ ᤏᤢ᤺ᤰᤂᤧᤛᤡᤀᤠᤱ ᤁᤥ᤺ᤰᤔᤠᤀᤥᤗᤠᤶ ᤌᤩᤧᤛᤡ. ᤜᤧᤰᤁᤩᤠᤱ ᤏᤠᤎᤠ᤺ᤶᤒᤡ ᤗᤧᤵᤔᤠᤱ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢᤀᤥ ᤐᤣᤛᤡ. ᤂᤶᤓᤩᤠᤱ ᤂᤧᤴᤜᤠ᤹ᤖᤧ ᤋᤢᤔᤧᤛᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤌᤧᤵᤐᤧᤳ ᤂᤢᤏᤧ᤹ ᤆᤧᤰᤋᤧᤛᤢ॥

²⁴ ᤕᤜᤥᤛᤢᤴ ᤂᤧᤴᤜᤠ᤹ᤖᤧ ᤔᤧᤳᤋᤧᤛᤢ. “ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤧᤖᤧᤰ ᤗᤠᤈᤣᤴ ᤀᤠᤏᤡ᤹ ᤜᤢᤰᤁᤥ ᤀᤠᤒᤡᤖᤧᤀᤠᤱ ᤏᤧᤖᤥ॥ ᤀᤠᤏᤡ᤹ ᤀᤠᤈᤥᤃᤢᤶᤔᤡᤸᤗᤧ ᤂᤧᤵᤔᤥ ᤁᤧᤕᤢᤱᤒᤠ ᤁᤧᤖᤧᤰ ᤕᤰᤕᤢᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤡᤔᤠ ᤕᤱᤔᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥”