ᤕᤜᤥᤛᤢ 18 - LIFOTNTᤁᤧᤏᤶᤒᤠ ᤗᤠᤈᤣᤴ ᤔᤧᤓ᤺ᤰᤂᤢ 1 ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ ᤛᤡᤗᤥᤀᤥ ᤔᤧᤈᤢᤵᤛᤧ. ᤜᤧᤰᤁᤩᤠᤱ ᤂᤧᤵᤔᤥ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤔᤧᤄᤡᤱᤄᤢ॥ ᤂᤧᤴ ᤗᤠᤈᤣᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤥ ᤋᤩᤧ ᤆᤢᤖᤧᤀᤠᤱ ᤏᤧᤛ᤻ᤛᤧ. 2 ᤁᤖ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤀᤠᤸᤗᤛᤠᤱ ᤏᤢᤛᤡ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤥᤔᤠ ᤕᤢᤰ ᤔᤧᤱᤄᤥᤀᤣ ᤔᤧᤘᤕᤧ॥ 3 ᤁᤸᤗᤧᤆᤥᤃᤢᤸᤗᤧ ᤕᤜᤥᤛᤢ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤒᤠ ᤗᤠᤈᤣᤴ ᤕᤢᤰᤔᤠᤖᤧ ᤗᤠᤃᤡ ᤂᤡᤏᤡ᤹ ᤀᤠᤰᤂᤩᤠᤰ ᤌᤠᤖᤡᤰ ᤁᤧᤛᤢᤛᤡᤒᤣ᥅ 4 ᤀᤠᤸᤗ ᤌᤠ᤺ᤰᤌᤰᤔᤠ ᤛᤢᤶᤛᤡ ᤛᤢᤶᤛᤡ ᤔᤏᤠᤜᤠ᤹ ᤂᤡᤏᤡ᤹ ᤗᤠᤃᤡ ᤕᤢᤰᤋᤡᤱ ᤆᤥᤃᤧᤶᤛᤡᤶᤔᤧ᤹॥ ᤀᤠᤱᤃᤠ᤹ ᤂᤧᤱᤜᤠ᤹ ᤐᤠᤱᤄᤢᤱᤍᤣᤛᤢᤱᤛᤡᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣ᤺ᤰᤁᤠᤱ ᤗᤠᤈᤣ᤹ᤀᤥ ᤋᤠᤰᤔᤧᤃᤴ ᤂᤧᤒᤩᤠᤱ ᤀᤠᤵᤑᤣᤰ ᤀᤠᤵᤑᤣᤰ ᤂᤢᤴᤇᤡ᤹ ᤗᤰᤂᤥᤔᤠ ᤗᤰᤁᤡᤴ ᤔᤧᤛᤠᤵᤋᤢᤀᤠᤱ ᤀᤠᤱᤃᤠ᤹ᤀᤥ ᤔᤧᤏᤢ᤺ᤱ ᤔᤧᤍᤠᤖᤥ॥ 5 ᤂᤧᤴ ᤗᤠᤈᤣᤴ ᤂᤡᤏᤡ᤹ ᤁᤢᤗᤰ ᤏᤢᤛᤡᤀᤥ ᤑ᤺ᤰᤂᤧᤶᤔᤧ᤹॥ ᤕᤜᤢᤍᤠᤴ ᤗᤠᤱᤃᤧᤳ ᤗᤧᤵᤔᤠᤱ ᤀᤠᤒᤠᤅᤣ ᤁᤢᤀᤡ᤺ᤴᤍᤥ ᤏᤢ ᤕᤥᤛᤣᤑᤖᤧ ᤁᤢᤜᤡᤶᤛᤕᤱᤅᤡᤴ ᤌᤠᤱᤃᤧᤳ ᤗᤧᤵᤔᤠᤱ ᤂᤢᤴᤇᤡ᤹ᤀᤣ ᤀᤡ᤺ᤴᤍᤥᤀᤥ ᤔᤧᤕᤢᤱᤗ ᤐᤥᤱ᤹॥ 6 ᤂᤡᤏᤡ᤹ ᤂᤧᤴ ᤏᤢᤛᤡ ᤁᤢᤗᤰᤜᤠ᤹ᤖᤧ ᤐᤠ᤺ᤴᤜᤠ᤹ ᤛᤠᤵᤔᤠ ᤁᤧᤛᤢᤖᤢᤶᤔᤠᤱ ᤀᤠᤱᤃᤠ᤹ᤀᤥ ᤋᤠᤖᤧᤶᤔᤧ᤹॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤂᤡᤏᤡ᤹ ᤗᤠᤃᤡ ᤀᤠᤱᤃᤠ᤹ ᤋ᤹ᤕᤠ᤺ᤴᤛᤥᤴ ᤁᤧᤛᤢᤱ ᤐᤡᤏᤡᤱ᤹॥ 7 “ᤁᤖ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤡᤏᤡ᤹ᤗᤠᤶ ᤌᤧᤔᤠᤀᤠᤱ ᤗᤰ ᤔᤧᤱᤄᤥᤛᤢᤴ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠ᤺ᤴᤏᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤗᤰᤂᤥᤔᤠᤖᤥ॥ ᤃᤠᤍ. ᤖᤢᤒᤣᤏ ᤏᤢ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤌᤠ᤺ᤰᤜᤠ᤹ᤖᤧ ᤏᤠᤱᤃᤧᤴ ᤐᤡᤛᤠᤱ ᤕᤷᤍᤏ ᤏᤠᤎᤠ᤺ᤶᤒᤡ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤐᤡᤖᤢᤛᤡᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤗᤰᤂᤥᤔᤠᤴ ᤔᤧᤄᤥᤛᤢᤀᤠᤱᤅᤣ ᤘᤠ᤹॥” 8 ᤂᤧᤒᤩᤠᤱ ᤂᤧᤴ ᤔᤏᤠᤜᤠ᤹ ᤔᤧᤒᤥᤃᤧᤀᤠᤱ ᤔᤧᤒᤣ᤺ᤸᤗᤧ ᤕᤜᤥᤛᤢ᤺ᤸᤗᤧ ᤂᤧᤴ ᤗᤠᤈᤣ᤺ᤸᤗᤧ ᤁᤢᤀᤡᤳᤇᤠᤵ ᤆᤥ᤺ᤰᤔᤠᤀᤠᤱ ᤋᤠ᤺ᤵᤔᤠᤖᤧ ᤗᤠᤃᤡ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ. “ᤐᤣᤃᤧᤶᤔᤧ᤹. ᤂᤧᤴ ᤗᤠᤈᤣ᤹ᤀᤥ ᤁᤧᤖᤧᤰ ᤋᤠᤰᤁᤴᤍᤧᤶᤔᤧ᤹. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤐᤠ᤺ᤴᤜᤠ᤹ ᤛᤠᤵᤋᤧᤶᤔᤧ᤹ᤀᤠᤱ ᤀᤠᤱᤃᤠ᤹ᤀᤥ ᤏᤢ᤺ᤰᤂᤧᤶ ᤋᤩᤧᤶᤔᤧ᤹. ᤂᤧᤒᤩᤠᤱ ᤀᤠᤶᤓᤠ ᤁᤴ ᤛᤡᤗᤥᤀᤥᤀᤣ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤂᤡᤏᤡ᤹ ᤗᤠᤃᤡ ᤀᤠᤱᤃᤠ᤹ ᤋ᤹ᤕᤠ᤺ᤴᤛᤥᤴ ᤁᤧᤛᤢᤱ ᤐᤡᤏᤡᤱ᤹॥” 9 ᤂᤧᤒᤩᤠᤱ ᤂᤧᤴ ᤔᤏᤠᤜᤠ᤹ ᤔᤧᤒᤣᤀᤠᤱ ᤂᤧᤴ ᤗᤠᤈᤣᤴ ᤁᤢᤗᤧ᤺ᤶ ᤋᤠᤰᤔᤧᤃᤴᤍᤧ. ᤜᤧᤰᤁᤩᤠᤱ ᤕᤧᤰᤕᤰ ᤕᤧᤰᤕᤰ ᤀᤥᤛᤣ᤺ᤴᤎᤠᤱ ᤔᤧᤈᤥᤃᤢ ᤂᤧᤒᤩᤠᤱ ᤁᤢᤗᤰ ᤏᤢᤛᤡ ᤔᤧᤈᤥᤃᤢᤀᤠᤱ ᤁᤧᤖᤧᤰᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤒᤠ᤺ᤳᤋᤢ ᤔᤧᤈᤧᤰᤂᤢ. ᤜᤧᤰᤁᤩᤠᤱ ᤕᤜᤥᤛᤢᤖᤧ᤹ᤀᤥ ᤛᤡᤗᤥᤀᤥ ᤁᤧᤏᤧᤒᤠ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤔᤥ ᤔᤧᤏᤢ᤺ᤰᤂᤧ॥ 10 ᤜᤧᤰᤁᤩᤠᤱ ᤕᤜᤥᤛᤢ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤛᤡᤗᤥᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋ᤹ᤕᤠ᤺ᤴᤛᤥᤴ ᤁᤧᤛᤢ. ᤜᤧᤰᤁᤩᤠᤱ ᤜᤠᤒᤠ ᤂᤧᤵᤔᤥᤀᤣ ᤕᤜᤥᤛᤢ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤰ ᤁᤢᤀᤡᤛᤡᤰ ᤀᤡᤛᤪᤠᤀᤡᤗᤡᤜᤠ᤹ ᤂᤧᤴ ᤗᤠᤈᤣᤴ ᤑ᤺ᤰᤂᤢ ᤐᤡᤖᤢᤛᤡᤖᤥ॥ ᤒᤣᤏᤩᤠᤔᤡᤏᤖᤧ ᤁᤢᤗᤰ 11 ᤒᤣᤏᤩᤠᤔᤡᤏᤖᤧ ᤁᤢᤎᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱ ᤁᤢᤀᤡᤛᤡᤰ ᤀᤰᤂᤣᤗ᤹ᤖᤡᤰ ᤋ᤹ᤕᤠ᤺ᤴᤛᤥᤴ ᤌᤩᤧ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤰᤁᤡᤸᤗᤧ ᤀᤡ᤺ᤴᤍᤥᤴ ᤕᤜᤢᤍᤠ ᤏᤢ ᤕᤥᤛᤣᤑᤖᤧ ᤂᤢᤴᤇᤡ᤹ ᤌᤠ᤺ᤰᤜᤠ᤹ᤖᤧ ᤗᤢᤶᤔᤥ ᤌᤩᤧ॥ 12 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠᤱᤃᤧᤳ ᤐᤡᤛᤠᤱᤒᤠ ᤀᤡ᤺ᤴᤍᤥᤴ ᤕᤷᤍᤏᤗᤠᤶ ᤜᤣ᤺ᤰᤛᤡᤱᤅᤠᤱ ᤕᤖᤡᤜᤥ ᤏᤡ᤺ᤳᤋᤠᤱᤗᤠᤶ ᤌᤠᤱᤃᤧᤳ ᤐᤡᤛᤠᤱ ᤐᤣᤖ. ᤏᤠᤶᤎᤠ ᤐᤡᤛᤠᤱᤒᤠ ᤁᤥ᤺ᤰᤔᤠ ᤑᤠᤱᤈᤱ ᤗᤠᤈᤣ᤹ᤀᤥ ᤌᤥ᤺ᤰᤛᤡᤱᤅᤠᤱ ᤒᤣᤌ-ᤀᤠᤘᤏᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤁᤧᤖᤧᤀᤠᤱ ᤏᤧᤛ᤻ᤛᤧ॥ 13 ᤂᤧᤴ ᤀᤡ᤺ᤴᤍᤥᤴ ᤂᤧᤵᤔᤥᤗᤠᤶ ᤗᤢᤈ ᤌᤠᤖᤡᤰ (ᤁᤴ ᤒᤣᤌᤣᤗ ᤔᤧᤔᤧᤳᤋᤢ) ᤂᤧᤵᤔᤥᤒᤠ ᤗᤠᤱᤃᤧᤳ ᤗᤧᤵᤔᤠᤱ ᤁᤧᤖᤧᤀᤠᤱ ᤕᤥᤛᤔᤠ ᤒᤣᤌ-ᤜᤥᤖᤥᤏᤒᤠ ᤗᤠᤱᤃᤧᤳ ᤗᤧᤵᤔᤠᤱᤒᤠ ᤁᤥ᤺ᤰᤔᤠ ᤑᤠᤱᤈᤱᤗᤠᤶ ᤀᤋᤠᤖᤥᤋ-ᤀᤍ᤻ᤍᤠᤖ ᤌᤠᤖᤡᤰ ᤌᤩᤧᤀᤠᤱ ᤏᤧᤛ᤻ᤛᤧ॥ 14 ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤂᤧᤴ ᤀᤡ᤺ᤴᤍᤥᤴ ᤏᤠᤶᤎᤠ ᤗᤧᤵᤔᤠᤱ ᤐᤣᤀᤠᤱ ᤗᤠᤱᤃᤧᤳ ᤗᤧᤵᤔᤠᤱ ᤀᤡᤖᤧᤖ ᤒᤣᤌ-ᤜᤥᤖᤥᤏ ᤋᤃᤠᤱᤒᤠ ᤗᤠᤱᤃᤧᤳ ᤗᤧᤵᤔᤠᤱᤒᤠ ᤁᤥ᤺ᤰᤔᤠᤗᤠᤶ ᤕᤜᤢᤍᤠᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤁᤡᤷᤕᤋ-ᤒᤠᤗ ᤌᤠᤖᤡᤰ (ᤀᤠᤶᤓᤠ ᤁᤴ ᤁᤡᤷᤕᤋ-ᤕᤠᤖᤡᤔ ᤔᤧᤔᤧᤳᤋᤢ) ᤁᤧᤖᤧᤀᤠᤱ ᤏᤧᤛ᤻ᤛᤧ॥ ᤏᤠᤶᤎᤠ ᤐᤡᤛᤠᤱᤒᤠ ᤀᤡ᤺ᤴᤍᤥᤴ ᤜᤠᤒᤠ ᤁᤴᤗᤥ॥ 15 ᤗᤠᤱᤃᤧᤳ ᤗᤧᤵᤔᤠᤱᤒᤠ ᤀᤡ᤺ᤴᤍᤥᤴ ᤁᤡᤷᤕᤋ-ᤕᤠᤖᤡᤔ ᤁᤢᤕᤠᤀᤥᤗᤠᤶ ᤏᤠᤶᤎᤠ ᤗᤧᤵᤔᤠᤱ ᤐᤣᤀᤠᤱ ᤏᤣᤵᤋᤥᤜᤒᤠ ᤆᤫᤠ᤺ᤳ ᤘᤠᤒᤢᤴᤍᤠᤰᤘᤠᤜᤠ᤹ᤀᤥ ᤗ᤺ᤴᤍᤧᤀᤠᤱ ᤏᤧᤛ᤻ᤛᤧ॥ 16 ᤂᤧᤴ ᤀᤡ᤺ᤴᤍᤥᤴ ᤒᤣᤏ-ᤜᤡᤴᤏᤥᤔᤒᤠ ᤏᤧᤏᤧᤒᤠᤍᤧᤴᤏᤡᤸᤗᤧ ᤁᤢᤍᤃᤡ ᤏᤢ ᤖᤐᤠᤀᤡᤒᤠ ᤏᤧᤏᤧᤒᤠᤍᤧᤴᤏᤡᤸᤗᤧ ᤌᤠᤱᤃᤧᤳ ᤗᤧᤵᤔᤠᤱᤒᤠ ᤁᤥ᤺ᤰᤔᤠᤸᤗᤧ ᤏᤠᤛᤔᤠ ᤁᤢᤕᤠᤀᤥ ᤌᤠᤛᤡᤱ ᤜᤧᤰᤁᤩᤠᤱ ᤕᤒᤢᤛᤡ ᤕᤧᤰᤕᤰ ᤗᤠᤱᤃᤧᤳ ᤗᤧᤵᤔᤠᤱᤒᤠ ᤜᤡᤴᤏᤥᤔᤒᤠ ᤏᤧᤏᤧᤒᤠᤍᤧᤴᤏᤥᤗᤠᤶ ᤕᤥ ᤌᤠᤛᤡᤱᤗ ᤀᤣᤏ-ᤖᤥᤃᤣᤗ ᤌᤠᤛᤡᤱᤅᤠᤱ ᤏᤧᤛ᤻ᤛᤧ॥ 17 ᤂᤧᤴ ᤌᤠᤱᤃᤧᤳ ᤗᤧᤵᤔᤠᤱ ᤂᤡᤱᤛᤡᤱᤅᤠᤱ ᤀᤣᤏ-ᤛᤣᤔᤣᤛ ᤗᤧᤵᤔᤠᤱ ᤐᤣᤀᤠᤱ ᤀᤍᤢᤶᤔᤡᤔᤒᤠ ᤌᤠᤶᤔᤠᤱᤒᤠᤸᤗᤧ ᤁᤢᤍᤃᤠᤱ ᤃᤗᤡᤗᤥᤋ ᤗ᤺ᤴᤍᤧᤖ ᤖᤢᤒᤣᤏ ᤜᤡᤶᤛᤕᤱᤒᤠ ᤒᤥᤜᤏᤖᤧ ᤁᤢᤗᤢᤱᤅᤥ ᤌᤩᤧᤀᤠᤱ ᤏᤧᤛ᤻ᤛᤧ॥ 18 ᤂᤧᤵᤔᤥᤗᤠᤶ ᤂᤧᤴ ᤒᤣᤌ-ᤀᤖᤠᤒᤠᤒᤠ ᤁᤢᤍᤥ᤺ᤵᤔᤠ ᤌᤠᤱᤃᤧᤳ ᤗᤧᤵᤔᤠᤱ ᤁᤧᤖᤧᤀᤠᤱ ᤀᤖᤠᤒᤠᤀᤥᤀᤣ ᤌᤩᤧᤀᤠᤱ ᤏᤧᤛ᤻ᤛᤧ॥ 19 ᤂᤧᤴ ᤀᤡ᤺ᤴᤍᤥᤴ ᤕᤠᤶᤔᤥ ᤒᤣᤌ-ᤜᤥᤃ᤻ᤗᤠᤒᤠ ᤌᤠᤱᤃᤧᤳ ᤁᤢᤕᤠᤴ ᤗᤛ᤻ᤛᤢᤀᤠᤱ ᤕᤷᤍᤏ ᤏᤠᤶᤎᤠ ᤗᤧᤵᤔᤠᤱ ᤁᤧᤏᤧᤒᤠ ᤕᤢᤶᤗᤠ᤺ᤰᤂᤠᤱ ᤘᤖ᤺ᤱᤅᤥᤒᤠ ᤌᤠᤱᤃᤧᤳ ᤗᤧᤵᤔᤠᤱ ᤁᤢᤕᤠᤀᤥ ᤏᤢᤒᤧᤀᤠᤱ ᤏᤧᤛ᤻ᤛᤧ॥ ᤗᤠᤱᤃᤧᤳ ᤗᤧᤵᤔᤠᤱᤒᤠ ᤀᤡ᤺ᤴᤍᤥᤴ ᤜᤠᤒᤠ ᤁᤴᤗᤥ॥ 20 ᤂᤧᤸᤗᤧ ᤏᤠᤱᤃᤧᤴ ᤐᤡᤛᤠᤱᤒᤠ ᤀᤡ᤺ᤴᤍᤥ᤺ᤴᤃ ᤕᤷᤍᤏ ᤘᤜ᤺ᤱᤅᤡᤴᤏᤧ ᤐᤥ᤺ᤰᤂᤧ॥ ᤒᤣᤏᤩᤠᤔᤡᤏᤖᤧ ᤁᤢᤎᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤥᤔᤠ ᤗᤰᤁᤡᤸᤗᤧ ᤁᤧᤖᤧᤰ ᤐᤡᤛᤠᤱᤒᤠ ᤀᤡ᤺ᤴᤍᤥᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ 21 ᤒᤣᤏᤩᤠᤔᤡᤏᤖᤧ ᤁᤢᤎᤠ᤺ᤰᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹ ᤁᤢᤀᤡᤛᤡᤰ ᤔᤧᤄᤥᤛᤢᤒᤠ ᤕᤧᤰᤕᤰᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ ᤕᤖᤡᤜᤥ. ᤒᤣᤌ-ᤜᤥᤃ᤻ᤗᤠ. ᤀᤣᤔᤣᤁ-ᤁᤛᤡᤛ. 22 ᤒᤣᤌ-ᤀᤖᤠᤒᤠ. ᤛᤔᤠᤖᤤᤔ. ᤒᤣᤌᤣᤗ. 23 ᤀᤒ᤻ᤒᤡᤔ. ᤐᤠᤖᤠ. ᤀᤥᤐᤪᤠ. 24 ᤁᤐᤖ-ᤀᤔᤥᤏᤡ. ᤀᤥᤵᤏᤡ ᤏᤢ ᤃᤣᤒᤠ॥ ᤂᤧᤵᤔᤥᤒᤠ ᤐᤠᤱᤓᤣ᤹ᤜᤠ᤹ᤏᤢ ᤛᤥᤛᤥᤖᤡᤰ ᤌᤡᤒᤥᤱᤅᤠᤱ ᤏᤧᤳᤇᤡ ᤕᤧᤰᤕᤰᤜᤠ᤹ ᤏᤧᤛ᤻ᤛᤧ॥ 25 ᤃᤡᤒᤥᤏ. ᤖᤠᤔᤠ. ᤒᤣᤖᤥᤋ. 26 ᤔᤡᤛ᤻ᤐᤠ. ᤁᤐᤡᤖᤠ. ᤔᤥᤛᤠ. 27 ᤖᤣᤁᤣᤔ. ᤕᤡᤷᤐᤗ. ᤋᤖᤗᤠ. 28 ᤛᤣᤗᤠᤜ. ᤀᤣᤗᤣᤐ. ᤕᤒᤢᤛᤡ ᤕᤧᤰᤕᤰ (ᤀᤡᤃᤪ ᤕᤖᤢᤛᤗᤧᤔ). ᤃᤡᤒᤠ ᤏᤢ ᤁᤡᤷᤕᤋ-ᤕᤠᤖᤡᤔ॥ ᤂᤧᤵᤔᤥᤒᤠ ᤐᤠᤱᤓᤣ᤹ᤜᤠ᤹ᤏᤢ ᤛᤥᤛᤥᤖᤡᤰ ᤌᤡᤒᤥᤱᤅᤠᤱ ᤗᤡᤛᤡ ᤕᤧᤰᤕᤰᤜᤠ᤹ ᤏᤧᤛ᤻ᤛᤧᤖᤥ॥ ᤒᤣᤏᤩᤠᤔᤡᤏᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤥᤔᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹ᤖᤧ ᤗᤠᤃᤡ ᤜᤠᤒᤠ ᤁᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.