ᤕᤜᤥᤛᤢ 17 - LIFOTNT

ᤏᤠᤶᤎᤠ ᤗᤧᤵᤔᤠᤱ ᤔᤏᤛ᤻ᤛᤣᤖᤧ ᤂᤥᤛᤢᤒᤠ ᤋᤧᤱᤃᤵ

¹ ᤕᤥᤛᤣᤑᤖᤧ ᤁᤢᤛ᤻ᤛᤠ ᤋᤢᤶᤒᤠ ᤔᤏᤛ᤻ᤛᤣᤖᤧ ᤁᤢᤓᤠ ᤁᤢᤎᤠ᤺ᤰᤜᤠ᤹ ᤕᤷᤍᤏ ᤏᤠᤶᤎᤠ ᤐᤡᤛᤠᤱᤒᤠ ᤗᤠᤈᤣ᤹ᤒᤠ ᤗᤰᤁᤡᤴ ᤔᤧᤒᤡᤖᤢᤛᤡᤀᤠᤱ ᤏᤧᤛ᤻ᤛᤧ॥ ᤃᤡᤗᤠᤍᤖᤧ ᤁᤢᤶᤒᤠ ᤔᤠᤁᤡᤖ ᤔᤏᤛ᤻ᤛᤣᤖᤧ ᤁᤢᤛ᤻ᤛᤠ ᤋᤢᤶᤒᤧᤴ ᤗᤳᤇᤠ ᤌᤰᤗᤧᤱ ᤘᤕᤧ॥ ᤁᤸᤗᤧᤆᤥᤃᤢᤸᤗᤧ ᤕᤷᤍᤏ ᤏᤠᤱᤃᤧᤴ ᤗᤧᤵᤔᤠᤱ ᤃᤡᤗᤠᤍ ᤏᤢ ᤒᤠᤛᤠᤏ ᤋᤧᤱᤃᤵᤜᤠ᤹ ᤂᤢᤏᤧ᤹ ᤔᤧᤒᤡᤖᤢᤀᤠᤱ ᤏᤧᤛ᤻ᤛᤧ॥

² ᤕᤷᤍᤏ ᤏᤠᤶᤎᤠ ᤐᤡᤛᤠᤱᤒᤠ ᤋᤧᤱᤃᤵᤐᤡᤴ ᤁᤧᤏᤶᤒᤠ ᤔᤏᤛ᤻ᤛᤣᤖᤧ ᤁᤢᤜᤡᤶᤛᤕᤱᤜᤠ᤹ ᤔᤧᤒᤡᤖᤢᤛᤡᤀᤠᤱ ᤏᤧᤛ᤻ᤛᤧ॥ ᤂᤧᤴ ᤜᤡᤶᤛᤕᤱᤜᤠ᤹ ᤀᤒᤡᤀᤣᤈᤣᤖ. ᤜᤣᤗᤣᤁ. ᤀᤛᤪᤡᤀᤣᤗ. ᤛᤁᤣᤔ. ᤜᤣᤐᤣᤖ ᤏᤢ ᤛᤔᤡᤍᤠᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤔᤧᤘᤕᤧ॥ ᤂᤧᤱᤜᤠ᤹ ᤕᤥᤛᤣᤑᤖᤧ ᤁᤢᤛ᤻ᤛᤠ. ᤁᤢᤶᤔᤧᤴᤇᤠ᤹ ᤏᤢ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤡᤶᤛᤕᤱᤅᤥᤒᤠ ᤗᤠᤶᤗᤥᤒᤠ ᤔᤏᤠ ᤔᤧᤘᤕᤧᤖᤥ॥

³ ᤁᤖ ᤔᤏᤛ᤻ᤛᤣᤖᤧ ᤁᤢᤛ᤻ᤛᤠ ᤔᤠᤁᤡᤖ. ᤔᤠᤁᤡᤖᤖᤧ ᤁᤢᤛ᤻ᤛᤠ ᤃᤡᤗᤠᤍ. ᤃᤡᤗᤠᤍᤖᤧ ᤁᤢᤛ᤻ᤛᤠ ᤜᤣᤐᤣᤖ. ᤜᤣᤐᤣᤖᤖᤧ ᤁᤢᤛ᤻ᤛᤠ ᤛᤗᤥᤑᤠᤍ. ᤛᤗᤥᤑᤠᤍᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤖᤰ ᤔᤧᤘᤕᤧ॥ ᤂᤧᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤀᤰᤋᤱᤒᤠ ᤘᤕᤧ—ᤔᤜᤗᤠ. ᤏᤥᤀᤠᤜ. ᤜᤥᤃ᤻ᤗᤠ. ᤔᤡᤸᤁᤠ ᤏᤢ ᤋᤡᤷᤛᤠ॥

⁴ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖ. ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢ ᤏᤢ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤧᤱᤜᤠ᤹ ᤔᤧᤍᤩᤧᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤠᤏᤡᤃᤣ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤀᤣ ᤀᤠᤏᤡᤃᤣ ᤗᤰᤂᤥᤔᤠᤴ ᤔᤧᤒᤡᤖᤡᤃᤧᤖ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧ॥” ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤕᤜᤥᤛᤢ᤺ᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤑᤢ᤹ᤏᤢᤛᤠ᤹ᤜᤠ᤹ᤏᤢ ᤛᤥᤖᤡᤰ ᤗᤰᤂᤥᤔᤠ ᤐᤡᤖᤢᤛᤡ॥

⁵ ᤂᤧᤒᤩᤠᤱ ᤔᤏᤛ᤻ᤛᤣᤖᤧ ᤕᤷᤍᤏ ᤏᤠᤎᤠ᤺ᤶᤒᤡᤒᤠ ᤃᤡᤗᤠᤍ ᤗᤠᤈᤣᤴ ᤏᤢ ᤒᤠᤛᤠᤏ ᤗᤠᤈᤣᤴ ᤛᤥᤛᤥᤖᤡᤰ ᤌᤡᤒᤥᤱᤗᤰ ᤂᤥᤛᤢ.

⁶ ᤌᤣᤀᤠᤱᤓᤧᤸᤗᤧ ᤔᤏᤛ᤻ᤛᤣᤖᤧ ᤁᤢᤎᤠ᤺ᤰᤁᤥᤒᤠ ᤔᤧᤴᤇᤢᤔᤠ ᤛᤠᤜᤠ᤹ᤖᤧᤀᤠᤱ ᤂᤧᤸᤗᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤗᤰᤔᤧᤄᤥᤛᤢᤀᤠᤱ ᤏᤧᤛ᤻ᤛᤧ॥ ᤃᤡᤗᤠᤍ ᤗᤠᤈᤣᤴ ᤔᤏᤛ᤻ᤛᤣᤖᤧ ᤁᤧᤏᤶᤒᤠ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤁᤥ ᤌᤩᤧᤖᤥ॥

⁷ ᤀᤠᤸᤗ ᤔᤏᤛ᤻ᤛᤣᤖᤧ ᤁᤢᤗᤰᤁᤥᤒᤠ ᤀᤡ᤺ᤴᤍᤥᤴ ᤀᤠᤛᤣᤖᤗᤠᤶ ᤛᤁᤣᤔ ᤏᤠᤱᤃᤧᤴ ᤐᤡᤛᤠᤱᤒᤠ ᤔᤡᤰᤔᤋᤠᤋ ᤌᤠᤖᤡᤰ ᤏᤧᤛ᤻ᤛᤧ॥ ᤂᤧᤴ ᤀᤡ᤺ᤴᤍᤥᤴ ᤗᤠᤱᤃᤧᤳ ᤗᤧᤵᤔᤠᤱ ᤐᤣᤀᤠᤱ ᤀᤣᤏ-ᤋᤵᤐᤢᤜᤒᤠ ᤕᤰᤕᤢᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤧᤴᤏᤥ ᤌᤠᤖᤡᤰ ᤁᤧᤖᤧᤀᤠᤱ ᤏᤧᤛ᤻ᤛᤧ॥

⁸ ᤋᤵᤐᤢᤜᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤔᤏᤛ᤻ᤛᤣᤖᤧ ᤁᤢᤗᤰᤁᤥ ᤌᤩᤧ. ᤁᤖ ᤔᤏᤛ᤻ᤛᤣᤖᤧ ᤁᤢᤀᤡ᤺ᤴᤍᤥᤀᤥ ᤁᤧᤕᤢᤱᤒᤠ ᤋᤵᤐᤢᤜ ᤕᤧᤰᤕᤰᤁᤡᤴ ᤀᤣᤑᤪᤠᤀᤡᤔᤖᤧ ᤁᤢᤗᤰᤁᤥ ᤌᤩᤧ॥

⁹ ᤜᤧᤰᤁᤩᤠᤱ ᤂᤧᤴ ᤀᤡ᤺ᤴᤍᤥᤴ ᤗᤠᤱᤃᤧᤳ ᤗᤧᤵᤔᤠᤱ ᤁᤏᤠᤒᤠ ᤕᤜ᤺ᤱᤅᤥ ᤌᤠᤖᤡᤰ ᤐᤣᤀᤠᤱ ᤏᤧᤛ᤻ᤛᤧ॥ ᤔᤏᤛ᤻ᤛᤣᤖᤧ ᤁᤢᤓᤠ ᤁᤢᤕᤧᤰᤕᤰᤜᤠ᤹ ᤀᤣᤑᤪᤠᤀᤡᤔᤖᤧ ᤁᤢᤗᤰᤁᤥ ᤌᤩᤧ. ᤁᤖ ᤔᤏᤛ᤻ᤛᤣᤖᤧ ᤁᤢᤀᤡ᤺ᤴᤍᤥᤴ ᤘᤜ᤺ᤱᤅᤡᤸᤗᤧ ᤌᤠᤱᤃᤧᤳ ᤗᤧᤵᤔᤠᤱ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤗᤢᤶᤒᤠ ᤘᤖ᤺ᤱᤅᤥ ᤂᤧᤴ ᤐᤣᤀᤠᤱ ᤏᤢᤒᤧᤀᤠᤱ ᤏᤧᤛ᤻ᤛᤧ॥

¹⁰ ᤗᤠᤱᤃᤧᤳ ᤗᤧᤵᤔᤠᤱ ᤀᤣᤑᤪᤠᤀᤡᤔᤖᤧ ᤜᤧᤰᤁᤩᤠᤱ ᤌᤠᤱᤃᤧᤳ ᤗᤧᤵᤔᤠᤱ ᤔᤏᤛ᤻ᤛᤣᤖᤧ ᤁᤢᤗᤰ ᤏᤧᤛ᤻ᤛᤧ॥ ᤔᤏᤛ᤻ᤛᤣᤖᤧ ᤁᤢᤀᤡ᤺ᤴᤍᤥᤴ ᤗᤢᤶᤒᤠ ᤘᤖ᤺ᤱᤅᤥ ᤐᤣᤀᤠᤱ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤂᤧᤴ ᤌᤠᤱᤃᤧᤳ ᤗᤧᤵᤔᤠᤱ ᤀᤠᤛᤣᤖ ᤏᤢ ᤏᤠᤱᤃᤧᤴ ᤗᤧᤵᤔᤠᤱ ᤀᤡᤛ᤻ᤛᤠᤂᤠᤖ ᤌᤠᤖᤡᤰ ᤁᤧᤖᤧᤀᤠᤱ ᤏᤧᤛ᤻ᤛᤧ॥

¹¹ ᤀᤡᤛ᤻ᤛᤠᤂᤠᤖ ᤏᤢ ᤀᤠᤛᤣᤖᤀᤥ ᤔᤏᤛ᤻ᤛᤣᤖᤧ ᤁᤶᤔᤩᤠᤰ ᤂᤥᤛᤢ—ᤒᤣᤌ-ᤛᤠᤏ ᤏᤢ ᤂᤧᤵᤔᤥᤒᤠ ᤐᤠᤱᤓᤣ᤹ᤜᤠ᤹. ᤕᤡᤒᤗᤠᤔ ᤏᤢ ᤂᤧᤵᤔᤥᤒᤠ ᤐᤠᤱᤓᤣ᤹ᤜᤠ᤹ ᤜᤧᤰᤁᤩᤠᤱ ᤍᤥᤖᤒᤠ (ᤍᤥᤖᤧᤱᤃ ᤘᤖ᤺ᤱᤅᤡᤸᤗᤧ ᤁᤢᤕᤠ). ᤀᤣᤴᤍᤥᤖᤒᤠ. ᤋᤠᤏᤠᤁᤒᤠ ᤏᤢ ᤔᤃᤡᤍ᤻ᤍᤥᤒᤠ ᤕᤰᤕᤢᤱᤒᤠᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤱᤓᤣ᤹ᤜᤠ᤹॥

¹² ᤜᤧᤰᤁᤣᤛᤠᤱ ᤔᤏᤛ᤻ᤛᤣᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤧᤴ ᤕᤧᤰᤕᤰᤜᤠ᤹ᤀᤥᤒᤠ ᤕᤰᤕᤢᤱᤒᤠᤜᤠ᤹ ᤏᤠ᤺ᤵᤔᤠᤍᤣᤔᤠ ᤔᤧᤴᤇᤢᤰᤋᤢᤛᤡᤴ. ᤌᤣᤀᤠᤱᤓᤧᤸᤗᤧ ᤂᤧᤴ ᤁᤏᤠᤏᤡᤜᤠ᤹ᤖᤧ ᤂᤧᤴ ᤗᤠᤈᤣ᤹ᤀᤥ ᤕᤢᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤘᤕᤧ॥

¹³ ᤁᤖ ᤔᤧᤕᤢᤅᤧᤖ ᤔᤧᤒᤣ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤢᤰᤛᤠᤶᤒᤠ ᤔᤧᤒᤥ᤺ᤰᤂᤧᤀᤠᤱ ᤂᤧᤱᤜᤠ᤹ ᤕᤥᤰ ᤆᤥ᤺ᤰᤔᤠ ᤕᤠ᤺ᤶᤒᤰᤁᤥ ᤑᤶᤔᤠ ᤔᤧᤜᤣ᤺ᤰᤋᤢᤛᤡ. ᤁᤖ ᤂᤰᤐᤧᤳ ᤔᤧᤴᤏᤠ᤺ᤳᤋᤢᤴ ᤔᤧᤴᤍᤣᤛᤢᤛᤡᤴᤗᤥ॥

ᤀᤣᤑᤪᤠᤀᤡᤔ ᤏᤢ ᤏᤠᤶᤎᤠᤒᤠ ᤔᤏᤛ᤻ᤛᤣᤖᤧ ᤕᤖᤡᤰ ᤗᤠᤈᤣ᤹ ᤏᤠ᤺ᤰᤋᤧᤛᤢ

¹⁴ ᤕᤥᤛᤣᤑᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤕᤜᤥᤛᤢᤴ ᤀᤰᤂᤣ ᤔᤧᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡᤃᤣ ᤀᤠᤸᤗᤥ ᤌᤧᤶᤒᤠ ᤕᤖᤡᤰ ᤔᤢ᤹ᤀᤡᤛᤠᤶ ᤐᤡᤖᤡᤃᤧᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤣ ᤂᤠᤏᤡ᤺ᤳᤋᤥ ᤕᤖᤡᤰ ᤕᤥᤖᤡᤃᤧ ᤁᤧᤗ᤹ᤒᤠ ᤁᤧᤏᤡᤛᤢᤛᤠᤱ ᤀᤠᤏᤡᤃᤣ ᤗᤰᤂᤥᤔᤠᤖᤧ ᤗᤠᤃᤡ ᤂᤧᤏᤧ᤹ ᤌᤣᤀᤠᤱ ᤗᤳᤇᤠᤖᤰ ᤁᤢᤗᤰ ᤀᤠᤏᤡᤃᤣ ᤕᤠᤵᤔᤡ ᤁᤧᤒᤧᤖᤧᤒᤣ᥅”

¹⁵ ᤂᤧᤒᤩᤠᤱ ᤕᤜᤥᤛᤢ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤂᤠᤏᤡ᤺ᤳᤋᤥ ᤕᤖᤡᤰ ᤁᤧᤕᤥᤖᤡ. ᤜᤧᤰᤁᤩᤠᤱ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤑᤠᤱᤈᤱᤒᤠ ᤗᤠᤈᤣᤴ ᤂᤡᤏᤡ᤹ ᤗᤠᤈᤣᤴ ᤆᤡᤜᤢ᤹ᤜᤢ᤹ ᤗ᤹ᤏᤧᤓᤃᤪ ᤐᤖᤡᤈ᤻ᤈᤡ ᤏᤢ ᤖᤐᤠᤀᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤒᤠ ᤋᤠᤶᤓᤢᤱᤅᤥ ᤐᤣᤃᤧᤶᤔᤧ᤹ᤀᤠᤱ ᤂᤡᤏᤡ᤹ ᤗᤠᤃᤡ ᤑᤠ᤺ᤳᤗᤧ᤺ᤰᤂᤧᤶᤔᤧ᤹॥”

¹⁶ ᤕᤥᤛᤣᤑᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤁᤥ᤺ᤰᤔᤠ ᤑᤠᤱᤈᤱᤒᤠ ᤗᤠᤈᤣ᤹ᤀᤥ ᤀᤠᤏᤡᤃᤣ ᤔᤧᤜᤳᤋᤡᤃᤧᤴ॥ ᤜᤧᤰᤁᤩᤠᤱ ᤒᤣᤌ-ᤛᤠᤏ ᤏᤢ ᤂᤧᤵᤔᤥᤒᤠ ᤐᤠᤱᤓᤣ᤹ᤜᤠ᤹ᤀᤥ ᤁᤧᤕᤢᤱᤒᤠᤜᤠ᤹ᤖᤧ ᤂᤧᤒᤩᤠᤱ ᤕᤡᤈᤖᤣᤗᤒᤠ ᤏᤧᤏᤧᤒᤠᤍᤧᤴᤏᤥ ᤁᤧᤕᤢᤱᤒᤠ ᤁᤧᤖᤧᤰ ᤁᤏᤠᤏᤡᤜᤠ᤹ᤖᤧ ᤑᤧᤴᤈᤣ᤹ ᤀᤴᤗᤠᤎᤠᤜᤠ᤹ ᤔᤧᤃᤳᤋᤢ॥”

¹⁷ ᤂᤧᤒᤩᤠᤱ ᤕᤜᤥᤛᤢ᤺ᤸᤗᤧ ᤕᤥᤛᤣᤑᤖᤧ ᤁᤢᤜᤡᤶᤛᤕᤱ. ᤀᤡᤃᤪ ᤀᤣᤑᤪᤠᤀᤡᤔ ᤏᤢ ᤔᤏᤛ᤻ᤛᤣᤴ ᤀᤰᤂᤣ ᤔᤧᤳᤋᤢᤛᤡ. “ᤂᤡᤏᤡ᤹ ᤕᤖᤡᤰ ᤁᤧᤘᤕᤡ᤹ ᤜᤧᤰᤁᤩᤠᤱ ᤁᤧᤎᤢᤶᤒᤠᤀᤠᤱ ᤁᤧᤈᤥᤃᤡ᤹॥ ᤂᤡᤏᤡ᤹ ᤗᤠᤃᤡ ᤁᤢᤗᤰ ᤌᤡᤰᤗᤰ ᤔᤣ᤺ᤴ.

¹⁸ ᤁᤖ ᤁᤥ᤺ᤰᤔᤠ ᤑᤠᤱᤈᤱ ᤗᤠᤈᤣ᤹ᤒᤠ ᤋᤠᤶᤓᤢᤱᤅᤡᤴᤏᤠᤱ ᤂᤡᤏᤡ᤹ᤀᤡᤴ ᤐᤥᤱ᤹॥ ᤂᤧᤵᤔᤥᤒᤠ ᤛᤡᤱᤒᤢᤱᤜᤠ᤹ ᤗᤧ᤺ᤰᤂᤧᤶᤔᤧ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤠ ᤁᤢᤍᤡᤱᤒᤠ ᤗᤠᤈᤣ᤺ᤴᤏᤠᤱ ᤂᤡᤏᤡ᤹ᤀᤡᤴᤏᤣ ᤐᤥᤱ᤹॥ ᤂᤧᤴ ᤁᤏᤠᤏᤡᤜᤠ᤹ᤖᤧ ᤑᤧᤴᤈᤣ᤹ ᤀᤴᤗᤠᤎᤠᤜᤠ᤹ ᤔᤧᤃᤳᤋᤢ᤹ ᤂᤶᤓᤩᤠᤱ ᤂᤧᤱᤜᤠ᤹ ᤁᤧᤎᤢᤶᤒᤠ ᤔᤧᤈᤥᤰ ᤜᤧᤰᤁᤣᤛᤠᤱ ᤂᤡᤏᤡ᤹ ᤂᤧᤱᤜᤠ᤹ ᤏᤠ᤺ᤵᤔᤠᤍᤣᤔᤠ ᤁᤧᤛᤢᤰᤋᤢᤶᤛᤡᤶᤗᤥ॥”