ᤕᤜᤥᤛᤢ 14 - LIFOTNT

ᤕᤷᤍᤏ ᤏᤠᤶᤎᤠ ᤐᤡᤛᤠᤱᤒᤠ ᤗᤠᤈᤣ᤹

¹ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖ. ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢᤴ ᤏᤢ ᤀᤡᤛᤪᤠᤀᤡᤗᤒᤠ ᤌᤠ᤺ᤰᤗᤠᤶᤗᤥᤒᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤓ᤺ᤰᤂᤢ ᤔᤧᤒᤡᤖᤢᤛᤡᤒᤠ ᤁᤢᤀᤡᤛᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤏᤠᤏ ᤗᤠᤈᤣ᤹ᤀᤥ ᤗᤰᤂᤥᤔᤠ ᤕᤢᤰ ᤔᤧᤈᤥᤃᤢᤒᤠᤍᤧᤴᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥

² ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤗᤠᤶᤒᤠ ᤂᤧᤴ ᤑᤠᤱᤛᤡᤀᤠᤱ ᤁᤢᤓᤪᤧ᤺ᤱ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤀᤡᤱᤈᤠᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤋ᤹ᤕᤠ᤺ᤴᤛᤥᤴ ᤁᤧᤛᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤰᤜᤠ᤹ ᤑ᤺ᤰᤂᤢ॥

³ ᤏᤧᤳᤇᤡᤀᤠᤱ ᤁᤢᤓᤪᤧ᤺ᤱ ᤌᤠ᤺ᤰᤜᤠ᤹ᤃ ᤕᤷᤍᤏ ᤏᤠᤎᤠ᤺ᤶᤒᤡ ᤏᤠᤱᤃᤧᤴ ᤐᤡᤛᤠᤱ ᤔᤥᤛᤠ᤺ᤸᤗᤧ ᤗᤰᤂᤥᤔᤠ ᤐᤡᤖᤢᤛᤡᤀᤠᤱᤅᤣ ᤏᤧᤛ᤻ᤛᤧ. ᤁᤖ ᤂᤧᤱᤜᤠ᤹ᤀᤥ ᤗᤧᤒᤡᤜᤠ᤹ᤃ ᤌᤧᤔᤠ ᤗᤰᤁᤠᤱ ᤐᤡᤖᤢᤛᤡᤒᤠ ᤜᤥ᤺ᤵᤋᤧ.

⁴ ᤌᤣᤀᤠᤱᤓᤧᤸᤗᤧ ᤕᤥᤛᤣᤑᤖᤧ ᤁᤢᤛ᤻ᤛᤠᤜᤠ᤹ᤀᤣ. ᤔᤏᤛ᤻ᤛᤣ ᤏᤢ ᤀᤣᤑᤪᤠᤀᤡᤔᤖᤧ ᤂᤢᤴᤇᤡ᤹ ᤏᤧᤳᤇᤡ ᤌᤠ᤺ᤰ ᤔᤧᤘᤕᤧ॥ ᤗᤧᤒᤡᤜᤠ᤹ ᤕᤢᤱᤔᤠᤖᤧ ᤗᤠᤃᤡ ᤕᤧᤰᤕᤰᤜᤠ᤹ ᤏᤢ ᤂᤢᤴᤇᤡ᤹ ᤌᤰᤛᤠ ᤆᤠᤖᤠᤶᤔᤠᤍᤧᤴᤗᤧ ᤗᤠᤃᤡ ᤏᤢ ᤆᤡᤃᤰᤘᤠᤜᤠ᤹ᤖᤧ ᤗᤠᤃᤡᤖᤰ ᤗᤠᤈᤣ᤹ ᤔᤧᤒᤡᤖᤢᤛᤡᤀᤠᤱ ᤏᤧᤛ᤻ᤛᤧ. ᤘᤣ᤹ ᤗᤰ ᤔᤧᤶᤒᤡᤛᤡᤱᤅᤣ ᤔᤧᤘᤕᤧ॥

⁵ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧᤒᤠ ᤁᤢᤀᤡᤛᤡ᤺ᤰᤁᤣ. ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤈᤥᤃᤢ ᤜᤧᤰᤁᤩᤠᤱ ᤗᤠᤈᤣᤴ ᤔᤧᤓ᤺ᤰᤂᤢᤖᤥ॥

ᤁᤠᤗᤣᤒᤖᤧ ᤜᤣᤒᤪᤥᤏᤧᤴ ᤂᤥᤛᤢ

⁶ ᤂᤧᤒᤩᤠᤱ ᤕᤜᤢᤍᤠᤒᤠ ᤔᤏᤠᤜᤠ᤹ ᤃᤡᤗᤃᤠᤗᤀᤥ ᤕᤜᤥᤛᤢᤀᤥ ᤔᤧᤍᤩᤧ. ᤜᤧᤰᤁᤩᤠᤱ ᤁᤏᤈ᤻ᤈᤡ ᤕᤐᤢᤴᤏᤣᤖᤧ ᤁᤢᤛ᤻ᤛᤠ ᤁᤠᤗᤣᤒᤖᤧ ᤂᤢᤏᤧ᤹ ᤔᤧᤳᤋᤢ. “ᤁᤠᤍᤣᤛ-ᤒᤷᤏᤣᤀᤥ ᤂᤧᤏᤧ᤹ ᤏᤢ ᤀᤠᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤔᤥᤛᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤏᤧ᤹ ᤏᤡᤱᤘᤠ᤹ ᤁᤧᤄᤥᤛᤢᤀᤠᤱᤅᤣ ᤘᤠ᤹॥

⁷ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤁᤠᤍᤣᤛ-ᤒᤷᤏᤣᤗᤠᤶ ᤁᤴ ᤗᤠᤈᤣᤴ ᤌᤥ᤺ᤶᤔᤠᤖᤧ ᤗᤠᤃᤡ ᤐᤠᤱᤄᤠᤱᤅᤡᤸᤗᤧ ᤀᤠᤱᤃᤠ᤹ ᤋᤱᤒᤣ ᤗᤡᤒᤥᤱ ᤁᤧᤖᤠᤱᤅᤠᤱ ᤘᤕᤠᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤒᤠ ᤁᤢᤀᤡᤛᤡᤰ ᤀᤡᤱᤄᤱ ᤑᤧᤳᤋᤢᤱᤅᤠᤱ ᤂᤢᤏᤧ᤹ ᤔᤧᤳᤋᤢᤱ॥

⁸ ᤁᤖ ᤀᤠᤱᤃᤠ᤹ᤏᤢ ᤛᤥᤖᤡᤰ ᤁᤧᤒᤣ᤺ᤰᤐᤠ ᤀᤠᤱᤃᤠ᤹ ᤀᤠᤶᤓᤢ᤹ ᤀᤠᤴᤛᤠ᤹ᤛᤡᤖᤧ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤀᤥ ᤁᤡᤔᤠ ᤕᤱᤔᤠ ᤐᤥ᤺ᤰᤂᤧᤖ ᤔᤧᤈᤥᤃᤢ. ᤜᤧᤰᤁᤣᤛᤠᤱ ᤀᤠᤱᤃᤠ᤹ᤃ ᤁᤧᤖᤧᤰ ᤀᤠᤏᤡᤱᤘᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤡᤶᤍᤢᤱ ᤏᤠ᤺ᤳᤋᤢᤱ॥

⁹ ᤁᤸᤗᤧᤆᤥᤃᤢᤸᤗᤧ ᤀᤠᤶᤓᤠ ᤂᤧᤸᤗᤧ ᤕᤠ᤺ᤴᤍᤡᤰ ᤔᤥᤛᤠᤴ ᤔᤠᤱᤜᤧᤰᤛᤡᤱᤅᤠᤱ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱ. ‘ᤂᤧᤏᤧ᤹ ᤁᤧᤗᤠᤱᤅᤡᤸᤗᤧ ᤁᤧᤍᤥ᤹ᤖᤢ ᤁᤧᤍᤠᤖᤢᤒᤠ ᤋᤧᤴᤏᤡᤴ ᤛᤧᤰᤂᤠᤛᤠᤱ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤗᤠᤃᤡ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤖᤧᤰ ᤁᤧᤏᤡᤱᤘᤠ᤺ᤸᤗᤧ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤍᤡᤶᤍᤢ ᤁᤧᤏᤠ᤺ᤳᤋᤢᤀᤠᤱ ᤘᤠ᤹॥’

¹⁰ “ᤀᤠᤸᤗ ᤀᤥᤔᤧᤳᤋᤧ᤹. ᤀᤡᤛᤪᤠᤀᤡᤗᤡᤜᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤋᤠᤰᤔᤧᤃᤴᤍᤧᤀᤠᤱ ᤔᤧᤘᤕᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤴᤏᤡᤴ ᤔᤥᤛᤠᤴ ᤔᤧᤳᤋᤢᤒᤠ ᤕᤧᤶᤔᤠᤱᤎᤥ ᤀᤠᤸᤗᤥ ᤗᤡᤒᤥᤱᤅᤠᤱ ᤋᤱᤒᤣ ᤅᤠᤛᤡ ᤁᤧᤖᤧᤔᤠᤖᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰ ᤁᤢᤀᤡᤛᤡᤰ ᤀᤠᤱᤃᤠ᤹ ᤁᤢᤜᤡᤱᤘᤧᤳᤋᤣ ᤁᤳᤋᤠᤀᤠ॥ ᤀᤠᤸᤗ ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤕᤧᤵᤐᤥᤱᤅᤠᤱ ᤋᤱᤒᤣ ᤅᤠᤛᤡ ᤁᤧᤖᤠᤱᤅᤠᤱ ᤘᤠ᤹ᤀᤠ॥

¹¹ ᤜᤧᤰᤁᤣᤛᤠᤱ ᤔᤥᤛᤠ᤺ᤸᤗᤧ ᤀᤠᤱᤃᤠ᤹ ᤐᤠᤱᤄᤠᤱᤒᤠ ᤕᤧᤴᤏᤥ ᤕᤠᤖᤡᤰᤁᤣ ᤀᤠᤸᤗᤥᤀᤠᤱ ᤁᤧᤎᤢᤶᤒᤠ ᤆᤥ᤺ᤰᤁᤠ॥ ᤌᤱ ᤆᤥ᤺ᤰᤛᤧ ᤗᤠ᤺ᤰᤁᤠᤳ ᤐᤣ᤺ᤰᤔᤠᤖᤧ ᤗᤠᤃᤡ ᤂᤧᤴ ᤕᤧᤶᤔᤥ ᤀᤠᤱᤃᤠ᤹ ᤀᤠᤰᤂᤩᤠᤰ ᤁᤧᤎᤢᤶᤒᤠ ᤆᤥᤃᤠᤱ. ᤀᤠᤱᤃᤠ᤹ ᤀᤠᤸᤗᤥᤀᤠᤱ ᤂᤧᤶᤔᤩᤠᤰᤁᤣ ᤌᤢᤶᤀᤠ॥

¹² ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤁᤴ ᤁᤥ᤺ᤰᤔᤠ ᤑᤠᤱᤈᤱᤒᤠ ᤗᤠᤈᤣᤴ ᤀᤠᤱᤃᤠ᤹ ᤐᤡᤖᤠᤱᤅᤧ᤹. ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤸᤗᤧ ᤕᤠ᤺ᤴᤍᤡᤰ ᤐᤠ᤺ᤳᤋᤢᤀᤠᤱ ᤘᤕᤧ॥ ᤂᤧᤵᤔᤥ ᤀᤏᤠᤁᤡᤜᤠ᤹ ᤔᤧᤕᤢᤱ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤶᤒᤕᤶᤒᤠ ᤜᤠᤱᤕᤰ ᤁᤧᤏᤧᤒᤠ ᤕᤧᤰᤕᤰᤜᤠ᤹ ᤔᤧᤈᤥᤃᤢᤀᤠᤱ ᤏᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤴ ᤕᤧᤶᤔᤥ ᤂᤧᤏᤧ᤹ ᤁᤧᤄᤧᤵᤛᤢᤀᤠᤱᤅᤣ ᤘᤕᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤑᤠ᤹ᤀᤠᤒᤠᤗᤠᤶ ᤂᤢᤏᤧ᤹ ᤁᤢᤒᤠ᤺ᤴᤈᤠᤰ ᤁᤢᤀᤡᤛᤡᤰ ᤀᤠᤱᤃᤠ᤹ ᤂᤧᤱᤜᤠ᤹ ᤏᤠ᤺ᤳᤋᤢᤱᤍᤣᤛᤢᤱᤛᤡᤱ᤹॥”

¹³ ᤂᤧᤒᤩᤠᤱ ᤕᤜᤥᤛᤢ᤺ᤸᤗᤧ ᤕᤐᤢᤴᤏᤣᤖᤧ ᤁᤢᤛ᤻ᤛᤠ ᤁᤠᤗᤣᤒᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤀᤠᤱ ᤔᤧᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤗᤰᤂᤥᤔᤠ ᤁᤢᤀᤡᤛᤡᤰ ᤜᤣᤒᤪᤥᤏᤧᤴ ᤐᤡᤖᤢ॥

¹⁴ ᤁᤸᤗᤧᤆᤥᤃᤢᤸᤗᤧ ᤁᤏᤈ᤻ᤈᤡ ᤕᤐᤢᤴᤏᤣᤖᤧ ᤁᤢᤛ᤻ᤛᤠ ᤁᤠᤗᤣᤒᤖᤧ ᤁᤢᤗᤰᤂᤥᤔᤠ ᤗᤰᤁᤡᤴ ᤀᤠᤀᤡᤴ ᤌᤠᤖᤡᤰ ᤜᤣᤒᤪᤥᤏᤧᤴ ᤐᤥ᤺ᤰᤂᤧᤀᤠᤱ ᤏᤧᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤧᤖᤧᤰ ᤁᤢᤏᤡᤱᤘᤠ᤺ᤸᤗᤧ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤠ᤺ᤳᤋᤢ ᤋᤡᤶᤍᤢᤀᤠᤱ ᤘᤕᤧ॥

¹⁵ ᤜᤣᤒᤪᤥᤏᤖᤧ ᤋᤃᤡᤒᤠ ᤁᤢᤔᤡᤱ ᤁᤡᤷᤕᤋ-ᤀᤷᤒᤠ ᤏᤧᤛ᤻ᤛᤧ॥ ᤜᤠᤒᤠ ᤁᤴ ᤀᤷᤒᤠᤴ ᤀᤏᤠᤁᤡᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤔᤏᤠ ᤘᤕᤧ॥ ᤂᤧᤒᤩᤠᤱ ᤂᤧᤴ ᤗᤠᤈᤣᤴ ᤌᤱ ᤐᤥᤱᤔᤠᤗᤠᤶ ᤏᤠ᤺ᤶᤛᤡᤱᤔᤠ ᤂᤥᤛᤧᤖᤥ॥