ᤕᤜᤥᤛᤢ 13 - LIFOTNTᤀᤠᤸᤗᤛᤠᤱ ᤏᤠ᤺ᤶᤔᤠᤛᤡ ᤁᤧᤒᤥᤱᤒᤠ ᤗᤠᤈᤣ᤹ᤜᤠ᤹ 1 ᤀᤠᤸᤗ ᤕᤜᤥᤛᤢᤴ ᤁᤠᤵᤐᤥᤒᤠ ᤋᤢᤶᤛᤧ. ᤜᤧᤰᤁᤩᤠᤱ ᤕᤖᤡᤰ ᤋᤱᤒᤣ ᤁᤧᤖᤧᤔᤠᤖᤧᤀᤠᤱ ᤘᤕᤧ. ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤁᤠᤵᤐᤥᤒᤠ ᤁᤧᤍᤢᤶᤛᤧᤀᤠᤱ ᤕᤖᤡᤰ ᤋᤱᤒᤣ ᤁᤧᤃᤧᤖᤧ. ᤁᤖ ᤀᤠᤸᤗᤛᤠᤱ ᤕᤖᤡᤰ ᤗᤠᤈᤣ᤹ᤜᤠ᤹ ᤕᤢᤰᤁᤥ ᤋᤠ᤺ᤵᤔᤠᤛᤡ ᤕᤠ᤺ᤰᤋᤧᤀᤠᤱ ᤘᤠ᤹॥ 2 ᤀᤠᤸᤗᤛᤠᤱ ᤁᤧᤕᤠ᤺ᤰᤐᤠ ᤗᤠᤈᤣ᤹ᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ—ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤋᤧᤱᤃᤵᤜᤠ᤹ ᤏᤢ ᤃᤛᤢᤖᤡᤜᤠ᤹. 3 ᤔᤡᤛᤪ ᤗᤠᤈᤣ᤹ ᤏᤠᤱᤃᤧᤴ ᤗᤧᤵᤔᤠᤱᤒᤠ ᤛᤡᤜᤥᤖ ᤘᤜ᤺ᤱᤗᤠᤶ ᤁᤳᤏᤠ ᤀᤣᤁᤪᤥᤏᤒᤠ ᤀᤡ᤺ᤴᤍᤥ ᤌᤠᤖᤡᤰ—ᤁᤴᤜᤠ᤹ ᤁᤧᤖᤧᤰ ᤁᤏᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤰᤁᤥ ᤆᤢᤰᤋᤧᤀᤠᤱ ᤏᤧᤖᤥ. (ᤅᤠᤛᤡ ᤐᤗᤡᤛ᤻ᤋᤡ ᤕᤢᤰᤛᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤧᤱᤃᤵᤜᤠ᤹ ᤃᤠᤈᤠ. ᤀᤛ᤻ᤍᤥᤍ. ᤀᤛ᤻ᤁᤗᤥᤏ. ᤃᤠᤋ ᤏᤢ ᤀᤣᤁᤪᤥᤏ). ᤜᤧᤰᤁᤩᤠᤱ ᤗᤠᤱᤃᤧᤳ ᤗᤧᤵᤔᤠᤱᤒᤠ ᤀᤒ᤻ᤒᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤛᤥᤛᤥᤖᤡᤰ. 4 ᤗᤠᤱᤃᤧᤳ ᤗᤧᤵᤔᤠᤱ ᤁᤏᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤗᤠᤈᤣ᤹ᤜᤠ᤹. ᤛᤡᤍᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤀᤠᤖᤠ ᤔᤧᤵᤔᤏᤠᤒᤠ ᤗᤠᤈᤣ᤹ᤗᤠᤶ ᤀᤐᤣᤁ ᤏᤢ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤀᤡ᤺ᤴᤍᤥ ᤌᤠᤖᤡᤰ. 5 ᤕᤠᤶᤔᤥ ᤃᤒᤠᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹. ᤜᤧᤰᤁᤩᤠᤱ ᤏᤠᤱᤃᤧᤴ ᤗᤧᤵᤔᤠᤱ ᤜᤣᤷᤔᤥᤏ ᤁᤥ᤺ᤰᤔᤠ ᤑᤠᤱᤈᤱ ᤁᤢᤛᤡᤃᤠᤱᤒᤠ ᤒᤠᤗ-ᤃᤠᤍᤗᤠᤶ ᤜᤣ᤺ᤰᤛᤡᤱᤅᤠᤱ ᤗᤧᤒᤥ-ᤜᤔᤠᤋᤒᤠ ᤏᤧᤏᤧᤒᤠᤍᤧᤴ ᤌᤠᤖᤡᤰ ᤗᤣᤒᤏᤠᤏ ᤗᤠᤈᤣᤴ ᤁᤧᤖᤧᤰ॥ 6 “ᤜᤧᤰᤁᤩᤠᤱ ᤗᤧᤒᤏᤠᤏᤗᤠᤶ ᤔᤡᤛᤪᤐᤥᤋ-ᤔᤤᤔ ᤌᤠᤖᤡᤰᤐᤠ ᤁᤥ᤺ᤰᤔᤠ ᤑᤠᤱᤈᤱ ᤗᤠᤈᤣ᤹ ᤁᤧᤕᤢᤱᤒᤠ ᤁᤧᤖᤧᤰ. ᤀᤡᤃᤪ ᤛᤡᤍᤥᤏᤡᤜᤠ᤹॥ ᤀᤠᤱᤃᤠ᤹ ᤁᤴᤜᤠ᤹ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤗᤠᤶ ᤗ᤺ᤳᤋᤢᤱᤍᤣᤛᤢᤱᤛᤡᤱ᤹॥ ᤀᤠᤱᤃᤠ᤹ ᤂᤧᤏᤧ᤹ ᤔᤧᤳᤏᤧᤒᤠ ᤁᤢᤀᤡᤛᤡᤰ ᤁᤴ ᤗᤠᤈᤣᤴ ᤗᤰᤂᤥᤔᤠᤖᤧ ᤗᤠᤃᤡ ᤀᤡᤛᤪᤠᤀᤡᤗᤡᤜᤠ᤹ ᤑ᤺ᤰᤂᤧ ᤐᤡᤖᤧᤛᤧ᤹॥ 7 ᤀᤠᤸᤗ ᤁᤴ ᤗᤠᤈᤣᤴ ᤑᤠᤱᤛᤡ ᤌᤠ᤺ᤰᤜᤠ᤹ ᤏᤢ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤌᤠ᤺ᤰᤜᤠ᤹ ᤗᤰᤂᤥᤔᤠᤖᤧ ᤗᤠᤃᤡ ᤑ᤺ᤰᤂᤧ ᤐᤡᤖᤧᤛᤧ᤹ᤀᤥ॥” ᤕᤷᤍᤏ ᤏᤠᤱᤃᤧᤴ ᤐᤡᤛᤠᤱᤒᤠ ᤗᤠᤈᤣᤴ ᤔᤧᤓ᤺ᤰᤂᤢ 8 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤐᤡᤖᤢᤛᤡᤒᤠ ᤁᤢᤀᤡᤛᤡᤰ ᤖᤢᤒᤣᤏᤡᤜᤠ᤹ ᤏᤢ ᤃᤠᤍᤡᤜᤠ᤹ ᤜᤧᤰᤁᤩᤠᤱ ᤔᤏᤛ᤻ᤛᤣᤒᤠ ᤁᤢᤓᤪᤧ᤺ᤱ ᤌᤠ᤺ᤰᤜᤠ᤹ᤖᤧ ᤏᤠᤱᤃᤧᤴ ᤐᤡᤛᤠᤱ ᤕᤷᤍᤏ ᤏᤠᤎᤠ᤺ᤶᤒᤡ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤂᤥᤔᤠ ᤗᤰᤁᤡᤴ ᤔᤧᤄᤥᤛᤢᤖᤥ॥ 9 ᤀᤷᤏᤥᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤀᤖᤥᤀᤣᤖ ᤏᤢ ᤜᤠᤒᤠ ᤂᤧᤴ ᤏᤧᤏᤧᤒᤠᤍᤧᤴᤏᤡᤸᤗᤧ ᤁᤢᤗᤢᤶᤔᤥᤒᤠ ᤕᤧᤰᤕᤰᤁᤥᤏᤢ ᤔᤣᤍᤒᤠᤒᤠ ᤁᤧᤖᤧᤰ ᤋᤧᤸᤗᤰᤁᤡᤴ ᤍᤡᤒᤥᤏ ᤌᤠᤖᤡᤰ. 10 ᤜᤣᤛ᤻ᤒᤥᤏᤀᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤛᤡᤜᤥᤏᤖᤧ ᤁᤧᤖᤧᤰ ᤁᤢᤕᤧᤰᤕᤰᤜᤠ᤹ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤀᤡ᤺ᤴᤍᤥᤀᤥ ᤌᤠᤖᤡᤰ. 11 ᤃᤡᤗᤠᤍ ᤗᤠᤈᤣᤴ ᤜᤧᤰᤁᤩᤠᤱ ᤃᤛᤢᤖᤡ ᤏᤢ ᤔᤠᤁᤠᤋᤡᤒᤠ ᤀᤡ᤺ᤴᤍᤥᤀᤥ ᤌᤠᤖᤡᤰ. ᤂᤧᤒᤩᤠᤱ ᤁᤧᤖᤧᤰ ᤜᤣᤷᤔᤥᤏ ᤁᤥ᤺ᤰᤔᤠᤜᤠ᤹ ᤏᤢ ᤛᤗᤁᤠ ᤌᤠᤖᤡᤰ ᤒᤠᤛᤠᤏ ᤁᤧᤖᤧᤰ— 12 ᤀᤡᤃᤪ ᤂᤧᤴ ᤖᤐᤠᤀᤡᤜᤠ᤹ᤗᤠᤶ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤀᤛ᤻ᤋᤠᤖᤥᤋ ᤏᤢ ᤀᤣᤍᤪᤀᤡᤀᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠ ᤀᤥᤃ ᤜᤠᤱᤅᤡᤸᤗᤧ ᤁᤧᤖᤧᤰ ᤒᤠᤛᤠᤏᤒᤠ ᤁᤢᤜᤠᤱᤈᤢᤶᤔᤥ ᤌᤠᤖᤡᤰ. ᤌᤣᤀᤠᤱᤓᤧᤸᤗᤧ ᤁᤴᤜᤠ᤹ ᤔᤥᤛᤠ᤺ᤸᤗᤧ ᤏᤠ᤺ᤴᤍᤢᤛᤡᤀᤠᤱ ᤏᤠ᤺ᤳᤋᤢᤍᤣᤛᤢᤛᤡᤀᤠᤱ ᤔᤧᤘᤕᤧ॥ 13 ᤁᤖ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤃᤛᤢᤖᤡᤜᤠ᤹ ᤏᤢ ᤔᤠᤁᤠᤋᤡᤜᤠ᤹ ᤔᤧᤴᤏᤠ᤺ᤳᤋᤢᤛᤡᤴ॥ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤃᤛᤢᤖᤡᤜᤠ᤹ ᤏᤢ ᤔᤁᤠᤋᤡᤜᤠ᤹ ᤔᤧᤕᤢᤱᤗᤥ॥ 14 ᤁᤖ ᤔᤥᤛᤠ᤺ᤸᤗᤧ ᤗᤧᤒᤡ ᤌᤠ᤺ᤰᤜᤠ᤹ ᤌᤧᤔᤠᤀᤠᤱ ᤗᤰᤂᤥᤔᤠ ᤕᤢᤰ ᤔᤧᤒᤡᤖᤢᤛᤡᤴ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤔᤧᤍᤥᤴᤍᤢᤒᤠ ᤔᤡ ᤗᤠᤶᤒᤠᤒᤠ ᤛᤡᤍᤢᤱᤈᤓᤠᤜᤠ᤹ ᤂᤢᤏᤧ᤹ ᤁᤢᤒᤠ᤺ᤴᤈᤠᤰ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤥᤔᤠ ᤕᤢᤰᤗᤥ॥ ᤖᤢᤒᤣᤏᤖᤧ ᤂᤥᤛᤢᤒᤠ ᤋᤧᤱᤃᤵ 15 ᤔᤥᤛᤠ᤺ᤸᤗᤧ ᤖᤢᤒᤣᤏᤖᤧ ᤁᤢᤎᤠ᤺ᤰᤜᤠ᤹ ᤜᤡᤶᤛᤕᤱ ᤁᤢᤀᤡᤛᤡᤰ ᤂᤧᤱᤜᤠ᤹ ᤀᤰᤂᤣᤗ᤹ᤖᤡᤰ ᤑ᤺ᤰᤂᤢ ᤐᤡᤖᤢᤛᤡᤖᤥ— 16 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤡ᤺ᤴᤍᤥᤴ ᤀᤰᤋᤱᤒᤠ ᤏᤧᤛ᤻ᤛᤧ—ᤀᤷᤏᤥᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤀᤖᤥᤀᤣᤖ ᤏᤢ ᤜᤠᤒᤠ ᤂᤧᤴ ᤏᤧᤏᤧᤒᤠᤍᤧᤴᤏᤡᤸᤗᤧ ᤁᤢᤗᤢᤶᤔᤥᤒᤠ ᤕᤧᤰᤕᤰᤁᤡᤴ. ᤜᤧᤰᤁᤩᤠᤱ ᤔᤣᤍᤒᤠᤒᤠ ᤁᤧᤖᤧᤰ ᤋᤧᤸᤗᤰᤜᤠ᤹ᤗᤠᤶ ᤜᤣ᤺ᤰᤛᤡᤱᤅᤠᤱ 17 ᤜᤣᤛ᤻ᤒᤥᤏ ᤏᤢ ᤂᤧᤴ ᤋᤧᤸᤗᤰᤁᤥᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹. ᤍᤡᤒᤥᤏ. ᤒᤠᤔᤥᤋ-ᤒᤠᤗ. ᤒᤣᤌ-ᤒᤠᤗ-ᤔᤥᤏ. 18 ᤕᤜᤛᤠ. ᤁᤍᤣᤔᤥᤋ. ᤔᤣᤐᤠᤋ. 19 ᤁᤡᤷᤕᤠᤋᤤᤔ. ᤛᤡᤒ᤻ᤔᤠ ᤏᤢ ᤏᤧᤏᤧᤒᤠᤍᤧᤴᤏᤥᤒᤠ ᤁᤥ᤺ᤰᤔᤠᤀᤥ ᤁᤧᤏᤧᤒᤠ ᤛᤣᤖᤣᤌ-ᤛᤣᤜᤠᤖ. 20 ᤒᤣᤌ-ᤐᤥᤖ. ᤐᤡᤛᤃᤠᤒᤠ ᤕᤠᤰᤁᤣ᤺ᤰᤁᤣ᤺ᤰᤐᤠ ᤋᤧᤴᤏᤡᤴ. ᤜᤧᤰᤁᤩᤠᤱ ᤒᤣᤌ-ᤕᤛᤡᤔᤥᤋ ᤌᤠᤖᤡᤰᤁᤣ— 21 ᤋᤧᤸᤗᤰᤁᤥᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹ ᤏᤢ ᤜᤣᤛ᤻ᤒᤥᤏᤀᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤛᤡᤜᤥᤏᤖᤧ ᤁᤧᤖᤧᤰ ᤁᤢᤜᤠᤱᤈᤢᤶᤔᤡᤴ ᤜᤧᤰᤁᤩᤠᤱ ᤔᤡᤍᤩᤠᤏᤒᤠ ᤕᤢᤰᤛᤠᤒᤠᤜᤠ᤹. ᤀᤡᤃᤪ ᤛᤡᤜᤥᤏᤏᤢ ᤏᤠᤍᤱ ᤁᤧᤈᤥ᤺ᤰᤐᤠ ᤂᤧᤴ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤀᤣᤒᤡ. ᤖᤣᤁᤣᤔ. ᤛᤢᤖ. ᤜᤢᤖ ᤏᤢ ᤖᤣᤒᤠᤒᤠᤜᤠ᤹ᤏᤢ ᤛᤥᤛᤥᤖᤡᤰ ᤔᤥᤛᤠ᤺ᤸᤗᤧ ᤛᤧᤖᤢᤛᤡᤀᤠᤱ ᤘᤕᤧ॥ 22 ᤌᤱᤅᤥ ᤔᤧᤛᤧᤖᤢᤛᤡᤒᤠᤜᤠ᤹ᤏᤢ᤺ᤸᤗᤧ ᤘᤣ᤹ ᤒᤀᤥᤖᤖᤧ ᤁᤢᤛ᤻ᤛᤠ. ᤌᤢᤶᤔᤩᤠ ᤁᤧᤀᤡᤒᤠ ᤒᤠᤗᤠᤶᤔᤧᤴᤏᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤋᤠᤓᤣ᤺ᤸᤗᤧ ᤔᤧᤛᤧᤖᤢ॥ 23 ᤖᤢᤒᤣᤏᤡᤜᤠ᤹ᤖᤧ ᤂᤢᤴᤇᤡ᤹ ᤀᤡ᤺ᤴᤍᤥ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤴ ᤐᤥ᤺ᤰᤂᤧᤀᤠᤱ ᤏᤧᤛ᤻ᤛᤧ॥ ᤖᤢᤒᤣᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤥᤔᤠ ᤗᤰᤁᤡᤴ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹ ᤁᤢᤀᤡᤛᤡᤰ ᤕᤧᤰᤕᤰᤜᤠ᤹ ᤏᤢ ᤐᤠᤱᤓᤣ᤹ᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ ᤃᤠᤍᤖᤧ ᤂᤥᤛᤢᤒᤠ ᤋᤧᤱᤃᤵ 24 ᤕᤠᤶᤔᤥ ᤔᤥᤛᤠ᤺ᤸᤗᤧ ᤃᤠᤍᤖᤧ ᤁᤢᤎᤠ᤺ᤰᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱ ᤁᤢᤀᤡᤛᤡᤰ ᤂᤢᤴᤇᤡ᤹ ᤗᤰᤂᤥᤔᤠ ᤗᤰᤁᤡᤴ ᤁᤶᤓᤗ᤹ᤖᤡᤰ ᤑ᤺ᤰᤂᤢ ᤐᤡᤖᤢᤛᤡᤖᤥ— 25 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤡ᤺ᤴᤍᤥᤴ ᤀᤰᤋᤱᤒᤠ ᤏᤧᤛ᤻ᤛᤧ—ᤕᤠᤈᤣᤖ ᤏᤢ ᤃᤡᤗᤠᤍᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹ ᤜᤧᤰᤁᤩᤠᤱ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤁᤢᤓᤪᤧ᤺ᤱ. ᤖᤒ᤻ᤒᤠ ᤏᤡ᤺ᤳᤋᤠᤱᤒᤠ ᤀᤖᤥᤀᤣᤖ ᤌᤠᤖᤡᤰ. 26 ᤜᤧᤰᤁᤩᤠᤱ ᤜᤣᤛ᤻ᤒᤥᤏᤗᤠᤶ ᤖᤠᤔᤋ-ᤔᤛ᤻ᤐᤠ ᤏᤢ ᤒᤣᤋᤥᤏᤡᤔ ᤌᤠᤖᤡᤰ. ᤜᤶᤓᤩᤠᤱ ᤔᤜᤏᤥᤔᤗᤠᤶ ᤍᤒᤡᤖᤒᤠ ᤀᤡ᤺ᤴᤍᤥ ᤌᤠᤖᤡᤰ 27 ᤜᤧᤰᤁᤩᤠᤱ ᤏᤧᤏᤧᤒᤠᤍᤧᤴᤏᤥᤒᤠ ᤒᤣᤌ-ᤜᤠᤖᤠᤔ. ᤒᤣᤌ-ᤏᤡᤔᤪᤠ. ᤛᤢᤰᤁᤥᤋ. ᤛᤠᤐᤥᤏ ᤏᤢ ᤜᤣᤛ᤻ᤒᤥᤏᤒᤠ ᤜᤠᤱ ᤛᤡᤜᤥᤏᤖᤧ ᤁᤢᤜᤠᤱᤈᤢᤶ ᤁᤧᤏᤶᤒᤠᤀᤠᤱ ᤁᤧᤏᤧᤒᤠ (ᤕᤷᤍᤏ ᤏᤠᤱᤃᤧᤴ ᤐᤡᤛᤠᤱᤒᤠ ᤁᤡᤴᤏᤣᤖᤣᤋ ᤘᤖ᤺ᤱᤅᤡᤸᤗᤧ ᤏᤠᤛᤔᤠ ᤁᤢᤕᤠᤀᤥ ᤌᤠᤖᤡᤰ ᤕᤠᤱᤄᤢ)॥ 28 ᤃᤠᤍᤡᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤥᤔᤠ ᤗᤰᤁᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱ ᤁᤢᤀᤡᤛᤡᤰ. ᤕᤧᤰᤕᤰᤜᤠ᤹ ᤏᤢ ᤐᤠᤱᤓᤣ᤹ᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ ᤔᤏᤛ᤻ᤛᤣᤖᤧ ᤏᤠᤱᤃᤧᤴ ᤐᤡᤛᤠᤱ ᤂᤥᤛᤢᤒᤠ ᤋᤧᤱᤃᤵ 29 ᤕᤠᤶᤔᤥ ᤔᤥᤛᤠ᤺ᤸᤗᤧ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤁᤢᤎᤠ᤺ᤰᤜᤠ᤹. ᤀᤡᤃᤪ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱ ᤁᤢᤀᤡᤛᤡᤰ ᤂᤧᤱᤜᤠ᤹ ᤁᤶᤓᤗ᤹ᤖᤡᤰ ᤑ᤺ᤰᤂᤢ ᤐᤡᤖᤢᤛᤡᤖᤥ— 30 ᤁᤴᤜᤠ᤹ᤖᤧ ᤂᤢᤴᤇᤡ᤹ ᤀᤡ᤺ᤴᤍᤥᤴ ᤀᤰᤋᤱᤒᤠ ᤏᤧᤛ᤻ᤛᤧ—ᤔᤜᤏᤥᤔᤗᤠᤶ ᤒᤠᤛᤠᤏ ᤌᤠᤖᤡᤰ. ᤒᤠᤛᤠᤏᤒᤠ ᤜᤠᤱ ᤀᤥᤃᤖᤧ ᤁᤧᤖᤧᤰ ᤁᤢᤜᤠᤱᤈᤢᤶᤜᤠ᤹. ᤒᤠᤛᤠᤏᤀᤥ ᤁᤧᤏᤧᤒᤠ ᤕᤠᤀᤡᤖᤖᤧ ᤁᤧᤖᤧᤰ ᤁᤢᤒᤠᤱᤓᤣ᤹ᤜᤠ᤹. ᤁᤧᤖᤧᤰ ᤋᤢᤰᤐᤥᤱ ᤕᤧᤰᤕᤰᤜᤠ᤹. 31 ᤜᤧᤰᤁᤩᤠᤱ ᤃᤡᤗᤠᤍᤖᤧ ᤁᤢᤗᤰ ᤁᤢᤓᤪᤧ᤺ᤱ. ᤀᤛ᤻ᤋᤠᤖᤥᤋ ᤏᤢ ᤀᤣᤍᤪᤀᤡ (ᤒᤠᤛᤠᤏᤀᤥ ᤁᤧᤏᤧᤒᤠ ᤀᤥᤃᤖᤧ ᤜᤠᤱ ᤁᤢᤕᤧᤰᤕᤰᤜᤠ᤹)॥ ᤁᤴ ᤁᤧᤖᤧᤰ ᤔᤏᤛ᤻ᤛᤣᤖᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤔᤠᤁᤡᤖᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤗᤠᤃᤡ. ᤀᤡᤃᤪ ᤔᤠᤁᤡᤖᤖᤧ ᤁᤢᤓᤪᤧ᤺ᤱ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤗᤠᤃᤡ ᤂᤢᤴᤇᤡ᤹ ᤜᤡᤶᤛᤕᤱ ᤁᤢᤀᤡᤛᤡᤰ ᤐᤡᤖᤢᤛᤡᤀᤠᤱ ᤏᤧᤛ᤻ᤛᤧ॥ 32 ᤕᤖᤡᤜᤥ ᤏᤠᤱᤃᤧᤴ ᤗᤧᤵᤔᤠᤱ. ᤕᤷᤍᤏ ᤏᤠᤎᤠ᤺ᤶᤒᤡ ᤔᤥᤀᤠᤒᤒᤠ ᤏᤧᤏᤧᤒᤠᤍᤧᤴᤏᤥ ᤔᤥᤛᤠ᤺ᤸᤗᤧ ᤗᤰᤂᤥᤔᤠᤖᤧ ᤗᤠᤃᤡ ᤑ᤺ᤰᤂᤢ ᤐᤡᤖᤢᤛᤡᤒᤠᤴ ᤜᤠᤒᤠ ᤁᤴᤜᤠ᤹ᤖᤥ॥ 33 ᤁᤖ ᤗᤧᤒᤡ ᤌᤠ᤺ᤰᤜᤠ᤹ ᤔᤥᤛᤠ᤺ᤸᤗᤧ ᤌᤧᤔᤠᤀᤠᤱ ᤗᤰᤂᤥᤔᤠ ᤔᤧᤒᤡᤖᤢᤛᤡᤴ॥ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤢᤵ ᤆᤥᤃᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ᤀᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤥᤔᤠ ᤐᤥ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.