ᤕᤜᤥᤛᤢ 11 - LIFOTNTᤀᤡᤛᤪᤠᤀᤡᤗᤡᤜᤠ᤹ᤖᤧ ᤌᤥ ᤗᤧᤵᤔᤠᤱᤒᤠ ᤌᤰᤛᤢᤒᤠᤜᤠ᤹ ᤔᤧᤏᤠ᤺ᤴᤍᤢᤛᤡ 1 ᤜᤠᤛᤥᤖᤒᤠ ᤜᤠᤱ ᤕᤠᤒᤡᤏᤖᤧ ᤁᤴ ᤂᤧᤵᤛᤢᤀᤠᤱ ᤂᤢᤏᤧ᤹ ᤔᤠᤍᤥᤏᤒᤠ ᤜᤠᤱ ᤕᤥᤒᤠᤒ. ᤛᤡᤔᤪᤥᤏᤒᤠ ᤜᤠᤱ. ᤀᤇ᤻ᤕᤠᤐᤒᤠ ᤜᤠᤱ. 2 ᤌᤠᤱᤃᤧᤳ ᤗᤧᤵᤔᤠᤱ ᤁᤥ᤺ᤰᤔᤠ ᤑᤠᤱᤈᤱ ᤗᤠᤈᤣ᤹ᤒᤠ ᤜᤠᤱᤜᤠ᤹ ᤏᤢ ᤁᤡᤴᤏᤣᤖᤣᤋ ᤕᤥ ᤗᤧᤵᤔᤠᤱᤒᤠ ᤀᤖᤠᤒᤠᤒᤠ ᤏᤢ ᤋᤧᤶᤒᤣᤒᤠ ᤜᤧᤰᤁᤩᤠᤱ ᤏᤠᤶᤎᤠ ᤗᤧᤵᤔᤠᤱ ᤍᤥᤖ ᤌᤧᤃᤢ ᤔᤠᤱᤘᤠᤒᤠ ᤜᤠᤱᤜᤠ᤹. 3 ᤏᤠᤱᤃᤧᤴ ᤏᤢ ᤏᤠᤶᤎᤠ ᤏᤧᤵᤔᤠᤱ ᤐᤡᤛᤠᤱ ᤁᤧᤕᤢᤱᤒᤠ ᤁᤏᤠᤏᤡ. ᤁᤥ᤺ᤰᤔᤠ ᤗᤠᤈᤣ᤹ᤒᤠ ᤀᤣᤔᤥᤖᤡ. ᤜᤡᤳᤋᤡ. ᤐᤖᤡᤈ᤻ᤈᤡᤜᤠ᤹. ᤕᤒᤢᤛᤡᤜᤠ᤹ ᤏᤢ ᤔᤡᤛ᤻ᤐᤠ ᤗᤠᤈᤣ᤹ᤒᤠ ᤜᤣᤷᤔᤥᤏ ᤁᤥ᤺ᤰᤔᤠ ᤛᤡᤃᤠᤱ ᤁᤧᤕᤢᤱᤒᤠ ᤜᤡᤒ᤻ᤒᤡᤜᤠ᤹ ᤀᤡᤱᤄᤱ ᤜᤠᤰᤋᤢᤛᤡ॥ 4 ᤂᤧᤱᤜᤠ᤹ ᤏᤢ ᤂᤢᤴᤇᤡ᤹ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤛᤥᤖᤡᤰ. ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤕᤧ᤺ᤱᤄᤠ ᤕᤠᤖᤡᤰᤁᤣ ᤕᤖᤡᤰ ᤀᤴᤜᤠ᤹ ᤜᤧᤰᤁᤩᤠᤱ ᤀᤴᤗᤠᤎᤠᤜᤠ᤹ᤏᤢ ᤛᤥᤛᤥᤖᤡᤰ ᤆᤡᤜᤢ᤹ ᤆᤡᤜᤢ᤹ ᤔᤧᤗ᤺ᤴᤍᤧ ᤔᤧᤕᤧ॥ 5 ᤁᤴ ᤁᤧᤖᤧᤰ ᤜᤠᤱᤜᤠ᤹ ᤔᤧᤈᤢᤵᤛᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤕᤧᤀᤠᤱ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤔᤣᤖᤥᤔ ᤔᤧᤵᤔᤏᤠᤒᤠ ᤘᤖᤰ ᤏᤡ᤺ᤳᤋᤠᤱ ᤛᤥᤖᤡᤰ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢ॥ 6 ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤛᤢᤴ ᤔᤧᤳᤋᤢ. “ᤂᤧᤱᤜᤠ᤹ᤏᤢ ᤔᤧᤃᤡᤛᤧᤴᤏᤧ᤹. ᤌᤣᤀᤠᤱᤓᤧᤸᤗᤧ ᤋᤠ᤺ᤴᤍᤡᤰ ᤜᤠᤒᤠ ᤁᤴ ᤕᤧᤶᤔᤥ ᤂᤧᤱᤜᤠ᤹ ᤁᤧᤖᤧᤰ ᤛᤧᤖᤢᤱᤛᤡᤱᤅᤠᤱ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤜᤢᤰᤛᤢᤵᤋᤢᤱᤛᤡᤱ᤹॥ ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤴᤜᤠ᤹ᤖᤧ ᤂᤢᤴᤇᤡ᤹ ᤛᤠᤘᤣᤳᤜᤠ᤹ ᤆᤩᤧᤵᤋᤧ ᤐᤡᤖᤧᤛᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤴᤗᤠᤎᤠᤜᤠ᤹ ᤔᤡᤎᤡᤰᤂᤧ ᤐᤡᤖᤧᤛᤧ᤹॥” 7 ᤂᤧᤒᤩᤠᤱ ᤕᤜᤥᤛᤢᤴ ᤁᤧᤖᤧᤰ ᤌᤰᤗᤡᤜᤠᤱᤜᤠ᤹ᤏᤢ ᤛᤥᤖᤡᤰ ᤔᤣᤖᤥᤔ ᤔᤧᤵᤔᤏᤠᤒᤠ ᤘᤖᤰᤁᤥ ᤆᤄᤵ ᤁᤧᤖᤧᤀᤠᤱ ᤂᤧᤱᤜᤠ᤹ᤏᤢ ᤌᤰᤔᤠ ᤜᤣ᤺ᤰᤋᤧ॥ 8 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤂᤧᤱᤜᤠ᤹ ᤌᤠᤛᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤏᤠ᤺ᤴᤍᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤶᤒᤠ ᤛᤡᤍᤥᤏ ᤌᤠᤖᤡᤰ ᤏᤢ ᤔᤡᤛᤪᤐᤥᤋ-ᤔᤤᤔ ᤌᤠᤖᤡᤰ. ᤂᤧᤒᤩᤠᤱ ᤏᤠᤱᤃᤧᤴ ᤐᤡᤛᤠᤱ ᤔᤡᤛ᤻ᤐᤠᤒᤠ ᤏᤧᤏᤧᤒᤠᤍᤧᤴ ᤌᤠᤖᤡᤰ ᤔᤧᤏᤠ᤺ᤳᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤗᤳᤇᤠᤀᤠᤱ ᤁᤢᤜᤡᤱᤘᤧᤳ ᤔᤧᤸᤗᤧᤳᤇᤡᤱᤅᤣ ᤂᤧᤱᤜᤠ᤹ ᤔᤧᤛᤧᤖᤢᤛᤡ॥ 9 ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤕᤜᤥᤛᤢ᤺ᤸᤗᤧ ᤂᤧᤱᤜᤠ᤹ ᤛᤧᤖᤢᤛᤡ॥ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤴᤜᤠ᤹ᤖᤧ ᤂᤢᤴᤇᤡ᤹ ᤛᤠᤘᤣᤳᤜᤠ᤹ ᤆᤩᤧᤵᤋᤢ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤴᤗᤠᤎᤠᤜᤠ᤹ ᤔᤡᤎᤡᤰᤂᤢᤍᤣᤛᤢ ᤐᤡᤖᤢᤛᤡ॥ 10 ᤂᤧᤴ ᤕᤧᤶᤔᤥ ᤕᤜᤥᤛᤢ᤺ᤸᤗᤧ ᤜᤠᤛᤥᤖ ᤕᤧᤰᤕᤰᤁᤡᤴ ᤜᤢᤰᤁᤠᤵ ᤆᤥᤃᤢ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤜᤠᤱᤅᤡᤴ ᤋᤠᤓᤣ᤺ᤸᤗᤧ ᤆᤩᤧᤵᤋᤢ. ᤌᤣᤀᤠᤱᤓᤧᤸᤗᤧ ᤋᤃᤡ ᤜᤠᤛᤥᤖᤧᤴ ᤂᤧᤴ ᤁᤧᤖᤧᤰ ᤜᤠᤱᤈᤢᤶᤜᤠ᤹ᤀᤥ ᤗᤠᤶᤗᤥᤒᤠ ᤏᤧᤛ᤻ᤛᤧ॥ 11 ᤜᤧᤰᤁᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤋᤠᤓᤣ᤺ᤸᤗᤧ ᤛᤧᤖᤢᤛᤡ॥ ᤂᤧᤱᤜᤠ᤹ᤖᤧ ᤂᤧᤵᤔᤥ ᤛᤰᤔᤠ ᤁᤧᤛᤥ᤺ᤴᤇᤡᤱᤒᤠ ᤗᤳᤇᤠᤀᤠᤱ ᤔᤧᤸᤗᤧᤳᤇᤡᤱᤅᤣ ᤘᤖᤧᤱᤗᤧᤱ ᤔᤧᤔᤧᤰᤂᤢᤛᤡ॥ ᤜᤧᤰᤁᤩᤠᤱ ᤂᤢᤏᤧ᤹ ᤜᤠᤛᤥᤖᤀᤥ ᤔᤡ ᤕᤠᤰᤋᤢ॥ 12 ᤂᤧᤴ ᤜᤠᤱᤕᤢᤰᤏᤠ ᤕᤧᤰᤕᤰᤜᤠ᤹ ᤏᤢ ᤂᤧᤵᤔᤥᤒᤠ ᤁᤧᤖᤧᤰ ᤜᤠᤱᤜᤠ᤹ᤀᤠᤱ ᤕᤜᤥᤛᤢ᤺ᤸᤗᤧ ᤜᤢᤰᤁᤠᤵ ᤆᤥᤃᤢᤛᤡ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤁᤢᤀᤡᤛᤡᤰ ᤁᤧᤖᤧᤰ ᤋᤠᤓᤣ᤺ᤸᤗᤧ ᤆᤩᤧᤵᤋᤢ ᤛᤧᤖᤢᤛᤡ॥ 13 ᤕᤜᤥᤛᤢ᤺ᤸᤗᤧ ᤜᤠᤛᤥᤖ ᤕᤧᤰᤕᤰᤁᤡᤴᤗᤰ ᤔᤡᤎᤡᤰᤂᤢ ᤁᤖ ᤀᤢ᤺ᤰᤆᤶᤈᤶᤒᤠᤍᤧᤴᤜᤠ᤹ᤀᤥ ᤁᤧᤏᤧᤒᤠ ᤘᤣ᤹ ᤀᤠᤳᤋᤡᤴ ᤕᤧᤰᤕᤰᤁᤡᤴᤏᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤡ ᤔᤧᤴᤎᤡᤰᤂᤢᤴ॥ 14 ᤁᤴ ᤕᤧᤰᤕᤰᤜᤠ᤹ᤀᤥᤒᤠ ᤁᤧᤖᤧᤰ ᤌᤰᤛᤠᤜᤠ᤹ ᤏᤢ ᤕᤠᤱᤛᤠᤁᤢᤴᤎᤣ ᤛᤠᤔᤠᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤠᤵᤑᤣᤰ ᤂᤢᤴᤇᤡ᤹ ᤗᤠᤃᤡ ᤔᤧᤍᤣ᤹ᤖᤢ॥ ᤁᤖ ᤔᤏᤠᤜᤠ᤹ᤃ ᤁᤧᤖᤧᤰ ᤋᤠᤓᤣ᤺ᤸᤗᤧ ᤔᤧᤈᤩᤧᤵᤋᤢᤛᤡᤀᤠᤱ ᤔᤧᤔᤧᤰᤂᤢᤛᤡ॥ ᤛᤰᤔᤠ ᤁᤧᤛᤥ᤺ᤴᤇᤡᤱᤒᤠ ᤌᤧᤔᤠ᤺ᤴᤏᤠᤱ ᤂᤧᤱᤜᤠ᤹ᤖᤧ ᤔᤧᤸᤗᤧᤖᤢᤴ॥ 15 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧᤒᤠ ᤁᤢᤀᤡᤛᤡ᤺ᤰᤁᤣ. ᤔᤥᤛᤠ᤺ᤸᤗᤧ ᤕᤜᤥᤛᤢᤴ ᤔᤢᤖᤠ ᤔᤧᤳᤋᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤕᤜᤥᤛᤢ᤺ᤸᤗᤧ ᤁᤧᤖᤧᤰ ᤀᤡ᤺ᤳᤋᤢ ᤏᤠ᤺ᤳᤋᤢ॥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤐᤡᤖᤢᤒᤠ ᤁᤧᤖᤧᤰ ᤀᤡᤱᤈᤠᤱᤜᤠ᤹ᤀᤥ ᤕᤜᤥᤛᤢ᤺ᤸᤗᤧ ᤀᤠᤳᤋᤡᤴᤏᤠᤱ ᤔᤧᤱᤃᤧᤵᤔᤏᤠᤒᤠ ᤔᤧᤈᤥᤃᤢᤴᤗᤥ॥ ᤕᤜᤥᤛᤢ᤺ᤸᤗᤧ ᤜᤢᤰᤁᤠᤵ ᤆᤥᤃᤢᤒᤠ ᤗᤠᤈᤣ᤹ 16 ᤁᤶᤓᤗ᤹ᤖᤡᤰ ᤕᤜᤥᤛᤢ᤺ᤸᤗᤧ ᤂᤧᤴ ᤁᤧᤖᤧᤰ ᤗᤠᤈᤣ᤹ᤜᤠ᤹. ᤀᤡᤃᤪ ᤁᤥ᤺ᤰᤔᤠ ᤑᤠᤱᤈᤱᤒᤠ ᤋᤧᤱᤃᤵᤜᤠ᤹. ᤏᤣᤃᤣᤘ ᤔᤧᤵᤔᤏᤠᤒᤠ ᤕᤥ ᤗᤠᤱᤃᤧᤵᤐᤠ ᤁᤧᤖᤧᤰ ᤗᤠᤈᤣ᤹ᤜᤠ᤹ ᤏᤢ ᤃᤥᤛᤣᤏᤒᤠ ᤁᤧᤖᤧᤰ ᤗᤠᤈᤣ᤹ᤜᤠ᤹. ᤋᤧᤶᤒᤣ. ᤀᤖᤠᤒᤠ. ᤀᤡᤛᤪᤠᤀᤡᤗᤒᤠ ᤌᤧᤃᤢ ᤔᤠᤱᤘᤠ ᤗᤠᤈᤣ᤹ ᤏᤢ ᤂᤧᤴᤏᤢ ᤛᤥᤖᤡᤰᤐᤠ ᤋᤧᤶᤒᤣ. 17 ᤛᤣᤀᤡᤖᤒᤠ ᤌᤠᤶᤔᤠᤱᤅᤥ ᤁᤧᤏᤧᤒᤠ ᤜᤠᤗᤠᤁ ᤔᤧᤵᤔᤏᤠᤒᤠ ᤁᤥ᤺ᤰᤔᤠᤀᤥᤗᤠᤶ ᤋᤣ᤹ᤖᤢᤀᤠᤱ ᤜᤣᤷᤔᤥᤏ ᤁᤥ᤺ᤰᤔᤠ ᤛᤡᤃᤠᤱ ᤗᤧᤒᤏᤠᤏᤒᤠ ᤏᤧᤏᤧᤒᤠᤍᤧᤴᤏᤥ ᤒᤠᤗ-ᤃᤠᤍ ᤌᤠᤖᤡᤰ ᤏᤠ᤺ᤴᤍᤢᤀᤠᤱ ᤜᤢᤰᤁᤠᤵ ᤆᤥᤃᤢ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤁᤧᤖᤧᤰ ᤜᤠᤱᤜᤠ᤹ ᤋᤧᤶᤛᤢᤛᤡᤀᤠᤱ ᤛᤧᤖᤢᤛᤡ॥ 18 ᤂᤧᤴ ᤁᤧᤖᤧᤰ ᤜᤠᤱᤜᤠ᤹ᤏᤢ ᤕᤖᤡᤰ ᤕᤧᤴ ᤌᤧᤶᤒᤠ ᤕᤜᤥᤛᤢᤴ ᤋᤧᤴᤎᤱ ᤆᤥᤃᤧ॥ 19 ᤀᤡᤛᤪᤠᤀᤡᤗᤡᤜᤠ᤹ᤏᤢ ᤏᤠᤍᤱ ᤁᤧᤈᤥ᤺ᤰᤐᤠ ᤃᤡᤒᤥᤏ ᤁᤧᤕᤢᤱᤒᤠ ᤜᤡᤒ᤻ᤒᤡᤜᤠ᤹ᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴ ᤕᤧᤰᤕᤰᤜᤠ᤹ᤖᤧᤀᤠᤱ ᤐᤠ᤺ᤴᤍᤱ ᤔᤧᤴᤈᤥᤃᤢᤴ. ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤧᤖᤧᤰ ᤕᤧᤰᤕᤰᤜᤠ᤹ ᤌᤱᤗᤠᤶᤒᤠ ᤜᤢᤰᤁᤠᤵ ᤔᤧᤈᤥᤃᤢ॥ 20 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤔᤧᤍᤠᤖ ᤜᤧᤰᤁᤩᤠᤱ ᤗᤢᤱᤔᤠ᤹ ᤛᤩᤠ᤺ᤳ ᤔᤧᤸᤗ᤹ᤀᤣ ᤂᤧᤱᤜᤠ᤹ ᤁᤧᤖᤧᤰ ᤘᤖᤧᤱᤗᤧᤱ ᤔᤧᤔᤧᤰᤗ ᤁᤧᤗ᤹ᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤘᤠ᤹ ᤘᤕᤧ॥ 21 ᤂᤧᤴ ᤕᤧᤶᤔᤥ ᤕᤜᤥᤛᤢᤴ ᤁᤥ᤺ᤰᤔᤠ ᤑᤠᤱᤈᤱᤒᤠ ᤗᤠᤈᤣ᤹ᤀᤥ ᤁᤧᤖᤧ ᤜᤧᤰᤁᤩᤠᤱ ᤜᤣᤒᤪᤥᤏ. ᤍᤒᤡᤖ. ᤀᤏᤠᤒ ᤂᤶᤓᤩᤠᤱ ᤕᤜᤢᤍᤠ ᤏᤢ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤌᤧᤃᤢ ᤔᤠᤱᤘᤠ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤀᤏᤠᤁᤡᤜᤠ᤹ ᤕᤢᤔᤪᤧᤰ ᤔᤧᤰᤂᤢᤛᤡ. ᤕᤜᤥᤛᤢ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤜᤠ᤹ᤏᤢ ᤛᤥᤛᤥᤖᤡᤰ ᤂᤧᤱᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤰᤂᤢᤛᤡ॥ 22 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤗᤳᤇᤠᤀᤠᤱ ᤀᤏᤠᤁᤡᤜᤠ᤹ ᤔᤧᤴᤕᤠ᤺ᤰᤋᤧᤴ. ᤃᤠᤈᤠ. ᤃᤠᤍ ᤏᤢ ᤀᤛ᤻ᤍᤥᤍᤀᤥᤖᤰ ᤁᤢᤓᤠ ᤔᤧᤕᤠ᤺ᤰᤋᤧ॥ 23 ᤁᤶᤓᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤕᤜᤥᤛᤢ᤺ᤸᤗᤧ ᤁᤧᤖᤧᤰ ᤗᤠᤈᤣ᤹ᤜᤠ᤹ ᤏᤠ᤺ᤴᤍᤢᤛᤡᤀᤠᤱ ᤜᤢᤰᤁᤠᤵ ᤆᤥᤃᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤌᤠ᤺ᤰ ᤁᤢᤀᤡᤛᤡᤰ ᤁᤢᤗᤰ ᤁᤢᤗᤰ ᤆᤥᤃᤢᤀᤠᤱ ᤔᤧᤕᤢᤰᤋᤢᤖ ᤑᤠ᤹ᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤑ᤺ᤰᤂᤢ ᤐᤡᤖᤢᤛᤡ॥ ᤜᤧᤰᤁᤩᤠᤱ ᤗᤠᤈᤣᤴ ᤌᤱ ᤆᤥ᤺ᤰᤔᤠᤗᤠᤶ ᤏᤠ᤺ᤶᤛᤡᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.