ᤕᤜᤥᤛᤢ 10 - LIFOTNTᤀᤣᤔᤥᤖᤡᤜᤠ᤹ ᤜᤠᤖᤡᤔᤧᤍᤩᤧ 1 ᤕᤜᤥᤛᤢ᤺ᤸᤗᤧ ᤀᤤ ᤕᤧᤰᤕᤰᤁᤡᤴ ᤜᤢᤰᤁᤠᤵ ᤆᤥᤃᤢᤀᤠᤱ ᤂᤠᤵᤐᤢᤌᤩ᤺ᤱ ᤆᤥᤃᤢᤸᤗᤧ ᤕᤖᤡᤜᤥᤴ ᤏᤢ ᤂᤧᤵᤔᤥᤒᤠ ᤜᤠᤱᤅᤡᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤒᤠ ᤜᤧᤰᤁᤣᤀᤣ ᤀᤤᤒᤠ ᤜᤠᤱᤅᤡᤴ ᤏᤢ ᤕᤧᤰᤕᤰᤁᤡᤴᤏᤠᤱ ᤂᤠᤵᤐᤢᤌᤩ᤺ᤱ ᤆᤥᤃᤢ ᤑᤠ᤹ᤀᤠᤱ ᤕᤖᤢᤛᤗᤧᤔᤒᤠ ᤜᤠᤱ ᤀᤍᤥᤏᤡᤛᤣᤍᤣᤁᤖᤧ ᤂᤧᤵᤛᤢ ᤜᤧᤰᤁᤩᤠᤱ ᤃᤡᤒᤥᤏ ᤁᤧᤕᤢᤱᤒᤠᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤏᤠᤍᤱ ᤔᤧᤈᤥᤃᤢᤀᤠᤱ ᤔᤧᤕᤢᤱ ᤁᤧᤗ᤹ᤒᤠ ᤀᤡᤱᤄᤱᤅᤡᤴᤏᤠᤱ ᤂᤧᤵᤛᤢ॥ 2 ᤂᤢᤏᤧ᤹ ᤏᤢ ᤁᤢᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧ. ᤌᤣᤀᤠᤱᤓᤧᤸᤗᤧ ᤃᤡᤒᤥᤏᤧᤴ ᤗᤳᤇᤠ ᤕᤶᤒᤠ ᤕᤧᤰᤕᤰ ᤏᤧᤛ᤻ᤛᤧ. ᤜᤠᤱᤕᤢᤰᤏᤠ ᤕᤧᤰᤕᤰ ᤜᤧᤰᤁᤣ ᤂᤧᤴ ᤀᤤ ᤕᤧᤰᤕᤰᤁᤡᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤆᤥᤃᤧ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤢᤰᤁᤧᤃᤢᤒᤠ ᤔᤧᤈᤥᤃᤧ॥ 3 ᤁᤸᤗᤧᤆᤥᤃᤢᤸᤗᤧ ᤕᤖᤢᤛᤗᤧᤔᤒᤠ ᤜᤠᤱ ᤀᤍᤥᤏᤡᤛᤣᤍᤣᤁᤖᤧ ᤜᤣᤒᤪᤥᤏᤒᤠ ᤜᤠᤱ ᤜᤥᤜᤠᤔ. ᤕᤷᤔᤢᤋᤒᤠ ᤜᤠᤱ ᤐᤡᤖᤠᤔ. ᤗᤠᤁᤡᤛᤒᤠ ᤜᤠᤱ ᤕᤠᤐᤡ ᤏᤢ ᤀᤣᤃ᤻ᤗᤥᤏᤒᤠ ᤜᤠᤱ ᤍᤒᤡᤖᤧᤴ ᤐᤣᤗᤡ ᤑᤠᤰᤋᤢᤛᤡ. 4 “ᤂᤡᤏᤡ᤹ ᤀᤠᤱᤃᤠ᤹ᤀᤥ ᤑᤧᤖᤧᤶᤔᤧ᤹ ᤜᤧᤰᤁᤩᤠᤱ ᤃᤡᤒᤥᤏᤧᤴ ᤌᤱᤅᤥ ᤑᤵᤔᤠ ᤀᤠᤓᤠ᤹ᤖᤧ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤕᤜᤥᤛᤢᤴ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤏᤠᤍᤱ ᤆᤥᤃᤢᤖᤧᤳᤇ॥” 5 ᤂᤧᤒᤩᤠᤱ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤅᤠᤛᤡ ᤜᤠᤱ. ᤀᤡᤃᤪ ᤕᤖᤢᤛᤗᤧᤔ. ᤜᤣᤒᤪᤥᤏ. ᤕᤷᤔᤢᤋ. ᤗᤠᤁᤡᤛ ᤏᤢ ᤀᤣᤃ᤻ᤗᤥᤏᤒᤠ ᤅᤠᤛᤡ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤁᤧᤖᤧᤰ ᤌᤰᤛᤢᤒᤠᤜᤠ᤹ᤖᤧᤀᤠᤱ ᤃᤡᤒᤥᤏᤖᤧ ᤁᤢᤒᤣᤛᤠᤱ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢᤀᤠᤱ ᤂᤧᤴᤏᤢ ᤌᤱ ᤔᤧᤈᤥᤃᤧ॥ 6 ᤁᤸᤗᤧᤆᤥᤃᤢᤸᤗᤧ ᤃᤡᤒᤥᤏᤒᤠ ᤔᤏᤠᤜᤠ᤹ᤖᤧ ᤃᤡᤗᤃᤠᤗᤒᤠ ᤛᤠ᤺ᤱᤃᤠᤜᤡᤶᤔᤥ ᤔᤏᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤀᤠᤱ ᤕᤜᤥᤛᤢᤀᤥ ᤔᤧᤒᤠᤱᤄᤢ ᤔᤧᤍᤣᤛᤢᤛᤡ. “ᤀᤠᤏᤡᤃᤧᤀᤥ ᤜᤠᤖᤠ ᤑᤧᤖᤧᤶᤔᤧ᤹ᤀᤠᤱ ᤀᤠᤏᤡᤃᤣ ᤀᤠᤛᤧ᤺ᤵᤋᤧ᤹. ᤜᤧᤰᤁᤩᤠᤱ ᤀᤠᤓᤠ᤹ᤖᤧ᤹॥ ᤂᤡᤏᤡ᤹ ᤕᤥ᤺ᤃ᤻ᤒᤠᤜᤠ᤹ ᤗᤠᤵᤀᤠᤶᤓᤣᤛᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤁᤥ᤺ᤰᤔᤠ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤜᤠᤱᤜᤠ᤹ ᤀᤠᤏᤡᤃᤣ ᤋᤰᤗᤧᤱᤘᤠᤀᤥ ᤔᤧᤈᤢᤵᤛᤧᤀᤠᤱ ᤔᤧᤘᤠ᤹॥” 7 ᤁᤸᤗᤧᤆᤥᤃᤢᤸᤗᤧ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤏᤢ ᤔᤢᤰᤁᤧᤃᤢᤒᤠ ᤌᤰᤗᤡᤜᤠᤱᤜᤠ᤹ ᤕᤠᤱᤛᤡᤱᤅᤠᤱ ᤃᤡᤗᤃᤠᤗᤗᤠᤶ ᤕᤜᤥᤛᤢᤴ ᤐᤣ॥ 8 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤛᤢᤴ ᤔᤧᤳᤋᤢ. “ᤂᤧᤏᤧ᤹ ᤂᤧᤱᤜᤠ᤹ᤏᤢ ᤔᤧᤃᤡᤛᤧᤴᤏᤧ᤹ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤂᤧᤏᤧ᤹ ᤁᤧᤜᤢᤰᤁᤥ ᤌᤠᤛᤢᤱᤛᤡᤱᤅᤠᤱ ᤔᤧᤘᤠ᤹॥ ᤂᤧᤏᤧ᤹ ᤁᤧᤍᤃᤡ ᤂᤧᤱᤜᤠ᤹ ᤗᤳᤇᤠᤀᤠᤱ ᤋᤠᤱᤔᤠ ᤔᤧᤴᤇᤢᤰᤏᤧᤴ॥” 9 ᤕᤜᤥᤛᤢᤴ ᤛᤧᤴᤍᤡᤰ ᤏᤠᤶᤍᤠ᤺ᤳᤍᤠ᤺ᤳ ᤃᤡᤗᤃᤠᤗᤗᤠᤶ ᤗᤠᤱᤄᤣᤃᤧ ᤐᤣᤀᤠᤱ ᤌᤡᤰᤗᤧᤱᤔᤧᤸᤗᤧ ᤀᤣᤔᤥᤖᤡᤜᤠ᤹ ᤆᤡᤑᤳ ᤑᤳᤋᤢᤛᤡ॥ 10 ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤧᤱᤜᤠ᤹ ᤔᤧᤏᤠᤰᤋᤧ ᤔᤧᤒᤣᤖ ᤕᤠ᤺ᤴᤍᤢᤛᤡ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤱᤜᤠ᤹ ᤃᤡᤒᤥᤏᤀᤥ ᤌᤩ᤺ᤱ ᤔᤧᤏᤠ᤺ᤴᤍᤢᤛᤡᤀᤠᤱ ᤜᤠᤖᤡᤔᤧᤈᤠ᤺ᤳᤋᤢᤛᤡ. ᤂᤧᤒᤩᤠᤱ ᤒᤣᤌ-ᤜᤥᤖᤥᤏᤒᤠ ᤌᤠᤱᤔᤠᤱᤒᤠ ᤗᤠᤶᤔᤥ ᤔᤧᤏᤠ᤺ᤳᤋᤢᤛᤡᤀᤠᤱ ᤀᤠᤈᤣᤁᤠ ᤏᤢ ᤔᤰᤁᤣᤍᤠ ᤌᤠᤖᤡᤰ ᤔᤧᤛᤩᤧᤖᤢᤛᤡᤖ ᤔᤧᤍᤣ᤹ᤖᤢᤛᤡ॥ 11 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤗᤠᤶ ᤂᤧᤱᤜᤠ᤹ ᤒᤣᤌ-ᤜᤥᤖᤥᤏᤗᤠᤶ ᤀᤠᤈᤣᤁᤠ ᤌᤠᤖᤡᤰᤁᤣ ᤛᤱᤔᤠᤱᤅᤥ ᤔᤧᤄᤧᤳᤇᤡᤱᤗ ᤔᤧᤒᤳᤇᤧᤸᤗᤧ. ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤕᤶᤒᤕᤶᤒᤠ ᤑ᤺ᤴᤜᤠ᤹ ᤌᤠᤛᤢ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤱᤜᤠ᤹ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡᤒᤠᤏᤢ᤺ᤸᤗᤧ ᤕᤖᤡᤰ ᤑ᤺ᤴᤏᤡᤸᤗᤧ ᤌᤃᤢ ᤛᤧᤖᤢᤛᤡᤖᤥ॥ 12 ᤕᤜᤘᤣ ᤍᤠᤱᤒᤧᤸᤗᤧ ᤀᤣᤔᤥᤖᤡᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤛᤢᤛᤡᤸᤗᤧ ᤕᤠ᤺ᤶᤔᤠ ᤕᤜᤥᤛᤢᤴ ᤕᤜᤘᤣ ᤍᤠᤱᤒᤧᤴᤏᤢ ᤐᤠᤖᤧ॥ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤰᤂᤣ ᤐᤠ᤺ᤳᤋᤢᤖᤥ. “ᤏᤠᤶᤔᤣ. ᤂᤧᤏᤧ᤹ ᤃᤡᤒᤥᤏᤖᤧ ᤁᤢᤛᤶᤎᤠᤱ. ᤜᤧᤰᤁᤩᤠᤱ ᤗᤠᤒᤠᤀᤣ. ᤂᤧᤏᤧ᤹ᤃ ᤀᤕᤩᤠᤗᤥᤏᤒᤠ ᤏᤧᤏᤧᤒᤠᤍᤧᤴᤏᤡᤸᤗᤧ ᤁᤢᤛᤶᤎᤠᤱ ᤐᤳᤇᤧ᤹ᤀᤥ॥” 13 ᤜᤧᤰᤁᤣᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤏᤡᤱᤔᤡᤜᤠ᤹ᤀᤥ ᤁᤢᤗᤧᤰᤘᤠ ᤔᤧᤴᤏᤢ᤺ᤰᤁᤣ ᤌᤠᤖᤡᤰ ᤏᤠᤶᤔᤡᤴ ᤏᤢ ᤗᤠᤒᤧᤴ ᤑᤴᤏᤧᤛᤡ॥ ᤁᤴ ᤐᤠ᤺ᤴᤏᤡᤴ ᤕᤠᤛᤠᤖᤖᤧ ᤁᤢᤛᤠᤵᤐᤴᤏᤥᤀᤠᤱ ᤛᤠᤵᤋᤧᤀᤠᤱ ᤐᤳ॥ ᤏᤠᤶᤔᤡᤴ ᤋᤠᤱᤛᤠᤱᤒᤧᤸᤗᤧ ᤁᤢᤗᤢᤶᤔᤥ ᤐᤳᤇᤧᤃᤖᤧ. ᤜᤧᤰᤁᤩᤠᤱ ᤏᤠᤶᤎᤠᤎᤠ ᤌᤠᤖᤡᤰᤁᤣ ᤏᤠᤶᤎᤠᤔᤠ ᤛᤢᤛᤧ॥ 14 ᤕᤜᤘᤣ ᤍᤠᤱᤒᤧᤸᤗᤧ ᤔᤏᤠ ᤐᤠᤴ ᤂᤧᤶᤔᤠ ᤜᤣ᤺ᤰᤋᤢᤀᤠᤱᤎᤥ ᤁᤶᤓᤗ᤹ᤖᤡᤰ ᤀᤠᤓᤧᤸᤗᤧᤀᤠᤱ ᤏᤠᤶᤎᤠᤔᤠ ᤛᤢᤛᤧᤒᤠ ᤕᤧᤴ ᤜᤥ᤺ᤵᤋᤧ॥ ᤛᤧᤰᤂᤠᤛᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤕᤜᤘᤣ ᤍᤠᤱᤒᤧᤴ ᤋᤧᤴᤎᤱ ᤆᤥᤃᤧ॥ 15 ᤂᤧᤒᤩᤠᤱ ᤕᤜᤥᤛᤢᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤛᤥᤖᤡᤰ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤃᤡᤗᤃᤠᤗᤒᤠ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤔᤥ ᤔᤧᤏᤢ᤺ᤰᤂᤧᤖᤥ॥ ᤕᤜᤥᤛᤢ᤺ᤸᤗᤧ ᤅᤠᤛᤡ ᤀᤣᤔᤥᤖᤡ ᤜᤠᤱᤜᤠ᤹ ᤋᤧᤶᤛᤢᤛᤡ 16 ᤀᤠᤸᤗ ᤂᤧᤴ ᤅᤠᤛᤡ ᤀᤣᤔᤥᤖᤡ ᤜᤠᤱᤜᤠ᤹ ᤔᤧᤄᤧᤳᤇᤡᤱᤅᤠᤱ ᤔᤰᤁᤣᤍᤠ ᤑᤢᤰᤁᤢᤀᤥ ᤔᤧᤈᤡᤱᤛᤡᤱᤅᤠᤱ ᤔᤧᤕᤢᤅᤧ॥ 17 ᤔᤰᤁᤣᤍᤠᤒᤠ ᤑᤢᤰᤁᤢᤀᤥ ᤁᤧᤈᤡᤱᤛᤡᤱᤒᤠ ᤂᤧᤴ ᤅᤠᤛᤡᤀᤣ ᤜᤠᤱᤜᤠ᤹ ᤔᤧᤕᤠᤱᤄᤢᤛᤡ ᤁᤧᤗ᤹ᤒᤠ ᤀᤡᤱᤄᤱᤅᤡᤴ ᤕᤜᤥᤛᤢᤀᤥ ᤁᤧᤖᤧ॥ 18 ᤕᤜᤥᤛᤢ᤺ᤸᤗᤧ ᤔᤧᤳᤋᤢᤛᤡ. “ᤕᤶᤒᤕᤶᤒᤠ ᤗᤢᤱᤜᤠ᤹ ᤁᤧᤱᤄᤠᤶᤔᤧ᤹ᤀᤠᤱ ᤂᤧᤴ ᤑᤢᤰᤁᤢ᤺ᤸᤗᤧ ᤁᤢᤜᤱᤅᤥ ᤏᤧᤛ᤻ᤛᤧᤶᤔᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤥᤔᤠᤛᤡᤖᤧ ᤗᤠᤃᤡ ᤔᤏᤠᤜᤠ᤹ ᤏᤡ᤺ᤳᤋᤠᤱ ᤕᤧᤵᤛᤧᤶᤛᤡᤶᤔᤧ᤹॥ 19 ᤁᤖ ᤂᤡᤏᤡ᤹ᤃ ᤂᤧᤱᤜᤠ᤹ ᤔᤧᤜᤠᤱᤄᤧᤶᤛᤡᤶᤔᤡᤴᤏᤧ᤹. ᤂᤡᤏᤡ᤹ ᤏᤡᤱᤔᤡᤜᤠ᤹ ᤂᤢᤴᤇᤡ᤹ ᤀᤣᤃᤠᤱ ᤀᤣᤃᤠᤱ ᤏᤠ᤺ᤳᤋᤧᤶᤛᤡᤶᤔᤧ᤹. ᤂᤢᤴᤇᤡ᤹ ᤀᤣᤃᤠᤱᤗᤠᤶᤒᤠ ᤂᤧᤱᤜᤠ᤹ ᤑᤳᤋᤧᤶᤛᤡᤶᤔᤧ᤹॥ ᤂᤢᤴᤇᤡ᤹ ᤕᤧᤰᤕᤰᤁᤥ ᤗᤠ᤺ᤵᤔᤠ ᤂᤧᤱᤜᤠ᤹ ᤔᤧᤓᤠ᤺ᤰᤋᤧᤶᤛᤡᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤜᤢᤰᤁᤥ ᤂᤧᤱᤜᤠ᤹ ᤌᤠᤛᤢᤛᤡᤀᤠᤱ ᤘᤠ᤹॥” 20 ᤀᤠᤸᤗ ᤕᤜᤥᤛᤢᤴ ᤏᤢ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤈᤩᤧᤵᤋᤢᤛᤡᤀᤠᤱ ᤔᤧᤔᤧᤰᤂᤢᤛᤡ. ᤜᤧᤰᤁᤩᤠᤱ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤀᤠᤱ ᤁᤧᤘᤠ᤹ᤒᤠᤜᤠ᤹ ᤗᤢᤱᤎᤠᤰᤁᤡᤸᤗᤧ ᤁᤒᤢᤒᤠ ᤂᤢᤴᤇᤡ᤹ ᤕᤧᤰᤕᤰᤜᤠ᤹ᤀᤥ ᤔᤧᤗᤠᤛᤧ. 21 ᤂᤧᤒᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤔᤰᤁᤣᤍᤠᤒᤠ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤔᤥ ᤕᤜᤥᤛᤢᤀᤥ ᤌᤣᤀᤠᤱ ᤔᤧᤸᤗ᤹ᤀᤣ ᤔᤧᤏᤢ᤺ᤰᤂᤧ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤐᤠ᤺ᤵᤔᤠ ᤜᤠ᤺ᤳᤋᤠᤱ ᤔᤧᤀᤠ᤺ᤴᤇᤡᤱᤅᤡᤴ॥ 22 ᤕᤜᤥᤛᤢ᤺ᤸᤗᤧ ᤔᤧᤳᤋᤢᤛᤡ. “ᤑᤢᤰᤁᤢ᤺ᤸᤗᤧ ᤁᤢᤜᤱᤅᤡᤴ ᤜᤴᤍᤧᤶᤔᤧ᤹ ᤜᤧᤰᤁᤩᤠᤱ ᤂᤧᤴ ᤅᤠᤛᤡ ᤜᤠᤱᤜᤠ᤹ ᤑᤢᤰᤁᤢᤀᤥᤗᤠᤶ ᤗ᤺ᤳᤋᤧᤶᤛᤡᤶᤔᤧ᤹ᤀᤠᤱ ᤀᤠᤱᤃᤠ᤹ᤀᤥ ᤋᤠᤖᤧᤶᤛᤡᤶᤔᤧ᤹॥” 23 ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤕᤖᤢᤛᤗᤧᤔᤒᤠ ᤜᤠᤱ. ᤜᤣᤒᤪᤥᤏᤒᤠ ᤜᤠᤱ. ᤕᤷᤔᤢᤋᤒᤠ ᤜᤠᤱ. ᤗᤠᤁᤡᤛᤒᤠ ᤜᤠᤱ ᤏᤢ ᤀᤣᤃ᤻ᤗᤥᤏᤒᤠ ᤜᤠᤱ ᤁᤴ ᤅᤠᤛᤡ ᤜᤠᤱᤜᤠ᤹ ᤑᤢᤰᤁᤢᤀᤥᤗᤠᤶ ᤔᤧᤗ᤺ᤳᤋᤢᤛᤡᤀᤠᤱ ᤔᤧᤍᤠᤖᤢᤛᤡ॥ 24 ᤂᤧᤱᤜᤠ᤹ᤖᤧ ᤂᤧᤴ ᤜᤠᤱᤜᤠ᤹ ᤕᤜᤥᤛᤢᤀᤥ ᤔᤧᤍᤠᤖᤢᤛᤡᤀᤠᤱ ᤀᤣᤃᤠᤱ ᤕᤜᤥᤛᤢ᤺ᤸᤗᤧ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ ᤏᤢ ᤂᤢᤴᤇᤡ᤹ᤏᤢ ᤁᤧᤍᤠᤒᤠ ᤌᤱᤅᤥᤒᤠ ᤌᤰᤔᤥᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤁᤳᤏᤠ ᤑᤧᤖᤧᤶᤔᤧ᤹ᤀᤠᤱ ᤂᤡᤏᤡ᤹ ᤗᤠᤱᤅᤡᤸᤗᤧ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤁᤢᤔᤠᤀᤥ ᤋᤥ᤹ᤖᤧᤶᤛᤡᤶᤔᤧ᤹॥” ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤓᤧᤖᤧᤀᤠᤱ ᤗᤠᤱᤅᤡᤸᤗᤧ ᤂᤧᤴᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤁᤢᤔᤠᤀᤥ ᤔᤧᤍᤥ᤹ᤖᤢᤛᤡ॥ 25 ᤕᤜᤥᤛᤢ᤺ᤸᤗᤧ ᤌᤰᤔᤥᤒᤠᤜᤠ᤹ ᤔᤧᤳᤋᤢᤛᤡ. “ᤔᤧᤃᤡᤛᤧᤶᤔᤡᤴᤏᤧ᤹. ᤂᤡᤏᤡ᤹ ᤏᤡᤱᤛᤠᤱ ᤔᤧᤒᤢᤃᤧᤶᤔᤡᤴᤏᤧ᤹॥ ᤀᤠ᤺ᤴᤏᤠᤛᤡᤶᤔᤧ᤹ᤀᤠᤱ ᤁᤧᤎᤢᤶᤒᤠ ᤐᤥ᤺ᤰᤂᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤌᤱ ᤆᤥ᤺ᤰᤔᤠ ᤁᤧᤒᤥᤱᤒᤠ ᤂᤡᤏᤡ᤹ ᤏᤡᤱᤔᤡᤜᤠ᤹ ᤁᤧᤖᤧᤰ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣᤀᤣ ᤔᤧᤳᤋᤢᤛᤡ᤹॥” 26 ᤂᤧᤒᤩᤠᤱ ᤕᤜᤥᤛᤢ᤺ᤸᤗᤧ ᤂᤧᤱᤜᤠ᤹ ᤌᤃᤢ ᤛᤧᤖᤢᤛᤡ. ᤜᤧᤰᤁᤩᤠᤱ ᤅᤠᤛᤡ ᤛᤡᤱᤒᤢᤱᤅᤥ ᤂᤧᤱᤜᤠ᤹ ᤑᤥ᤺ᤴᤍᤢᤛᤡ. ᤂᤶᤓᤩᤠᤱ ᤂᤧᤱᤜᤠ᤹ ᤕᤢ᤺ᤴᤇᤡᤰ ᤌᤠᤖᤡᤰᤁᤣ ᤛᤡᤱᤒᤢᤱᤅᤥ ᤋᤧᤸᤗᤧᤶ ᤔᤧᤓᤥ᤺ᤴᤍᤢᤛᤡᤀᤠᤱ ᤔᤧᤒᤳᤇᤧ॥ 27 ᤏᤠᤶᤎᤩᤧᤒᤠ ᤕᤧᤶᤔᤥ ᤕᤜᤥᤛᤢ᤺ᤸᤗᤧ ᤔᤢᤖᤠ ᤔᤧᤳᤋᤢᤛᤡ. ᤜᤧᤰᤁᤩᤠᤱ ᤛᤡᤱᤒᤢᤱᤅᤥᤏᤢ ᤔᤧᤎᤠᤛᤢᤛᤡᤀᤠᤱ ᤂᤧᤱᤜᤠ᤹ ᤔᤧᤈᤡᤱᤛᤡᤱᤒᤠ ᤜᤠᤒᤠ ᤂᤧᤴ ᤑᤢᤰᤁᤢᤀᤥ ᤗᤠᤵᤔᤧᤍᤣᤛᤢᤛᤡ. ᤜᤧᤰᤁᤩᤠᤱ ᤗᤢᤱᤑᤢᤰᤁᤥ᤺ᤸᤗᤧ ᤁᤢᤜᤱᤅᤥ ᤕᤶᤒᤕᤶᤒᤠ ᤗᤢᤱᤜᤠ᤹ ᤔᤧᤏᤧᤛ᤻ᤛᤢ. ᤂᤧᤴ ᤗᤢᤱᤜᤠ᤹ ᤀᤠᤀᤡᤴ ᤌᤠᤖᤡᤰ ᤜᤠᤒᤠ ᤏᤧᤖᤥ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤥ ᤗᤧᤵᤔᤠᤱᤒᤠ ᤕᤧᤰᤕᤰᤜᤠ᤹ ᤔᤧᤔᤧᤰᤂᤢ 28 ᤜᤧᤰᤁᤩᤠᤱ ᤀᤠᤶᤓᤠ ᤂᤧᤸᤗᤧ ᤕᤠ᤺ᤴᤍᤡᤰ ᤕᤜᤥᤛᤢ᤺ᤸᤗᤧ ᤔᤰᤁᤣᤍᤠ᤺ᤴ ᤜᤢᤰᤁᤠᤵ ᤆᤥᤃᤢ. ᤂᤧᤒᤩᤠᤱ ᤂᤧᤴ ᤗᤠᤈᤣᤴ ᤏᤢ ᤂᤧᤵᤔᤥᤒᤠ ᤜᤠᤱᤅᤡᤴᤏᤠᤱ ᤋᤠᤓᤣ᤺ᤸᤗᤧ ᤆᤩᤧᤵᤋᤢ ᤛᤧᤖᤢ॥ ᤂᤢᤏᤧ᤹ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤧᤰᤂᤢᤛᤡ. ᤂᤢᤏᤧ᤹ ᤁᤢᤜᤡᤱᤘᤧᤳ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤗᤧᤖᤢᤛᤡᤴ॥ ᤂᤢᤏᤧ᤹ ᤕᤖᤡᤜᤥᤒᤠ ᤜᤠᤱᤅᤡᤴ ᤔᤧᤳᤋᤢᤒᤠ ᤜᤧᤰᤁᤣᤀᤣ ᤔᤰᤁᤣᤍᤠᤒᤠ ᤜᤠᤱᤅᤡᤴᤏᤠᤱ ᤔᤧᤳᤋᤢᤖᤥ॥ 29 ᤂᤧᤴ ᤀᤣᤃᤠᤱ ᤕᤜᤥᤛᤢᤴ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤛᤥᤖᤡᤰ ᤔᤰᤁᤣᤍᤠᤗᤠᤶ ᤗᤡᤒ᤻ᤏᤠ ᤐᤣᤀᤠᤱ ᤂᤧᤴ ᤌᤱᤅᤥ ᤑᤳᤋᤢ॥ 30 ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤏᤢ ᤂᤧᤵᤔᤥᤒᤠ ᤜᤠᤱᤅᤡᤴ ᤀᤡᤛᤪᤠᤀᤡᤗᤡᤜᤠ᤹ ᤜᤢᤰᤛᤢᤵᤋᤢᤛᤡ. ᤜᤧᤰᤁᤩᤠᤱ ᤂᤧᤴ ᤏᤢ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤋᤠᤓᤣ᤺ᤸᤗᤧ ᤆᤩᤧᤵᤋᤢ ᤛᤧᤖᤢᤛᤡ॥ ᤂᤢᤏᤧ᤹ ᤂᤧᤵᤔᤥ ᤀᤠᤳᤋᤡᤴᤜᤠ᤹ᤀᤠᤱ ᤁᤢᤜᤡᤱᤘᤧᤳ ᤔᤧᤗᤧᤖᤢᤛᤡᤴ॥ ᤕᤖᤡᤜᤥᤒᤠ ᤜᤠᤱᤅᤡᤴ ᤂᤢᤏᤧ᤹ ᤀᤠᤰᤂᤣ ᤔᤧᤳᤋᤢᤀᤠᤱ ᤘᤕᤧ ᤂᤧᤵᤔᤥᤒᤠ ᤜᤠᤱᤅᤡᤴᤏᤠᤱ ᤂᤢᤏᤧ᤹ ᤜᤧᤰᤁᤣᤀᤣ ᤔᤧᤳᤋᤢ॥ 31 ᤂᤧᤒᤩᤠᤱ ᤕᤜᤥᤛᤢᤴ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤛᤥᤖᤡᤰ ᤗᤡᤒ᤻ᤏᤠᤗᤠᤶ ᤗᤠᤁᤡᤛᤀᤥ ᤐᤣ. ᤜᤧᤰᤁᤩᤠᤱ ᤁᤡᤷᤃᤵ ᤁᤒᤢᤀᤠᤱ ᤂᤧᤴ ᤌᤱᤅᤥ ᤑᤳᤋᤢ॥ 32 ᤕᤜᤘᤣ ᤍᤠᤱᤒᤧᤸᤗᤧ ᤗᤠᤁᤡᤛ ᤕᤧᤰᤕᤰᤁᤡᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤛᤢ. ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤂᤢᤴᤇᤡ᤹ ᤂᤧᤴ ᤜᤢᤰᤁᤠᤵ ᤔᤧᤈᤥᤃᤢ. ᤂᤶᤓᤩᤠᤱ ᤂᤧᤴ ᤏᤢ ᤂᤧᤵᤔᤥ ᤁᤧᤕᤢᤱᤒᤠ ᤁᤧᤖᤧᤰ ᤔᤏᤠᤜᤠ᤹ ᤂᤢᤏᤧ᤹ ᤋᤠᤓᤣ᤺ᤸᤗᤧ ᤔᤧᤰᤂᤢᤛᤡᤀᤠᤱ ᤗᤡᤒ᤻ᤏᤠᤀᤥ ᤆᤥᤃᤢᤒᤠ ᤁᤢᤀᤡᤛᤡ᤺ᤰᤁᤣ ᤔᤧᤳᤋᤢᤛᤡ॥ 33 ᤜᤠᤒᤠ ᤂᤧᤴ ᤕᤧᤶᤔᤥ ᤃᤣᤈᤣᤖᤒᤠ ᤜᤥᤖᤠᤔ ᤜᤠᤱᤅᤡᤴ ᤗᤠᤁᤡᤛᤖᤧ ᤁᤢᤓᤠ᤹ᤛᤧ ᤋᤩᤧ॥ ᤁᤖ ᤕᤜᤥᤛᤢ᤺ᤸᤗᤧ ᤀᤠᤳᤋᤡᤴᤜᤠ᤹ᤀᤠᤱ ᤁᤢᤜᤡᤱᤘᤧᤳ ᤔᤧᤸᤗᤧᤳᤇᤡᤱᤅᤣ ᤂᤧᤴ ᤏᤢ ᤂᤧᤸᤗᤧ ᤁᤢᤎᤰᤛᤢᤒᤠᤜᤠ᤹ ᤏᤠ᤺ᤴᤍᤢᤛᤡ॥ 34 ᤂᤧᤴ ᤀᤣᤃᤠᤱ ᤕᤜᤥᤛᤢᤴ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤛᤥᤖᤡᤰ ᤗᤠᤁᤡᤛᤗᤠᤶ ᤀᤣᤃ᤻ᤗᤥᤏᤀᤥ ᤐᤣ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤁᤡᤷᤃᤵ ᤔᤧᤃᤒᤢᤀᤠᤱ ᤌᤱᤅᤥ ᤔᤧᤓᤳᤋᤢ॥ 35 ᤂᤧᤸᤗᤧ ᤕᤠ᤺ᤴᤍᤡᤰ ᤂᤢᤏᤧ᤹ ᤂᤧᤴ ᤜᤢᤰᤁᤠᤵ ᤆᤥᤃᤢᤀᤠᤱ ᤋᤠᤓᤣ᤺ᤸᤗᤧ ᤔᤧᤰᤂᤢ॥ ᤂᤧᤱᤜᤠ᤹ᤖᤧ ᤗᤠᤁᤡᤛ ᤕᤧᤰᤕᤰᤁᤡᤴ ᤁᤢᤀᤡᤛᤡᤰ ᤂᤧᤵᤔᤥᤒᤠ ᤁᤧᤖᤧᤰ ᤋᤠᤓᤣ᤺ᤸᤗᤧ ᤔᤧᤔᤧᤰᤂᤢᤛᤡ॥ 36 ᤂᤧᤒᤩᤠᤱ ᤕᤜᤥᤛᤢᤴ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤛᤥᤖᤡᤰ ᤀᤣᤃ᤻ᤗᤥᤏᤗᤠᤶ ᤌᤥ ᤌᤥ᤺ᤰᤛᤡᤱᤅᤠᤱ ᤜᤣᤒᤪᤥᤏᤀᤥ ᤐᤣ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤕᤧᤰᤕᤰᤁᤡᤴ ᤌᤱᤅᤥ ᤔᤧᤓᤳᤋᤢ॥ 37 ᤂᤧᤱᤜᤠ᤹ᤖᤧ ᤂᤧᤴ ᤕᤧᤰᤕᤰᤁᤡᤴ ᤜᤢᤰᤁᤠᤵ ᤔᤧᤈᤥᤃᤢ ᤜᤧᤰᤁᤩᤠᤱ ᤂᤧᤴ ᤏᤢ ᤂᤧᤵᤔᤥᤒᤠ ᤜᤠᤱᤅᤡᤴ ᤂᤧᤒᤩᤠᤱ ᤂᤧᤵᤔᤥᤒᤠ ᤁᤧᤖᤧᤰ ᤐᤠᤱᤓᤣ᤹ᤜᤠ᤹ ᤏᤢ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤔᤧᤰᤂᤢᤛᤡ॥ ᤂᤧᤱᤜᤠ᤹ᤖᤧ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤸᤗᤧᤖᤢᤛᤡᤴ॥ ᤀᤣᤃ᤻ᤗᤥᤏᤀᤥ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ᤖᤧ ᤂᤧᤴ ᤏᤢ ᤂᤧᤵᤔᤥ ᤁᤧᤘᤠ᤹ᤒᤠᤜᤠ᤹ ᤁᤧᤖᤧᤰ ᤘᤖᤧᤱᤗᤧᤱ ᤔᤧᤔᤧᤰᤂᤢᤛᤡ॥ 38 ᤂᤧᤒᤩᤠᤱ ᤕᤜᤥᤛᤢᤴ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤛᤥᤖᤡᤰ ᤏᤢ᤺ᤰᤂᤧᤀᤠᤱ ᤍᤒᤡᤖ ᤗᤧᤵᤔᤠᤱ ᤐᤣ. ᤜᤧᤰᤁᤩᤠᤱ ᤂᤧᤴ ᤌᤱᤅᤥ ᤑᤳᤋᤢ॥ 39 ᤂᤧᤱᤜᤠ᤹ᤖᤧ ᤂᤧᤴ. ᤂᤧᤵᤔᤥᤒᤠ ᤜᤠᤱᤅᤡᤴ ᤏᤢ ᤂᤧᤸᤗᤧ ᤁᤧᤖᤧᤰ ᤁᤢᤒᤠᤱᤓᤣ᤹ᤜᤠ᤹ ᤜᤢᤰᤁᤠᤵ ᤔᤧᤈᤥᤃᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤋᤠᤓᤣ᤺ᤸᤗᤧ ᤔᤧᤗᤧ᤺ᤰᤂᤢᤛᤡ॥ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤕᤢᤔᤪᤧᤰ ᤔᤧᤔᤧᤰᤂᤢᤛᤡ॥ ᤂᤧᤱᤜᤠ᤹ᤖᤧ ᤀᤠᤳᤋᤡᤴᤜᤠ᤹ᤀᤠᤱ ᤁᤢᤜᤡᤱᤘᤧᤳ ᤔᤧᤸᤗᤧᤖᤢᤛᤡᤴ॥ ᤂᤧᤱᤜᤠ᤹ᤖᤧ ᤜᤣᤒᤪᤥᤏ ᤏᤢ ᤗᤡᤒ᤻ᤏᤠ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤜᤠᤱᤅᤡᤴ ᤔᤧᤔᤧᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤍᤒᤡᤖ ᤏᤢ ᤂᤧᤵᤔᤥᤒᤠ ᤜᤠᤱᤅᤡᤴᤏᤠᤱ ᤔᤧᤔᤧᤳᤋᤢ॥ 40 ᤁᤶᤓᤗ᤹ᤖᤡᤰ ᤕᤜᤥᤛᤢ᤺ᤸᤗᤧ ᤁᤧᤖᤧᤰ ᤗᤠᤈᤣ᤹. ᤀᤡᤃᤪ ᤁᤥ᤺ᤰᤔᤠ ᤑᤠᤱᤈᤱᤒᤠ ᤋᤧᤱᤃᤵ. ᤏᤣᤃᤣᤘ ᤔᤧᤵᤔᤏᤠᤒᤠ ᤕᤥ ᤗᤧᤵᤔᤠᤱᤒᤠ ᤗᤠᤈᤣ᤹. ᤋᤧᤶᤒᤣ ᤏᤢ ᤌᤧᤃᤢ ᤔᤠᤱᤘᤠ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤁᤧᤖᤧᤰ ᤜᤠᤱᤜᤠ᤹ᤀᤠᤱ ᤏᤠ᤺ᤴᤍᤢᤛᤡ॥ ᤂᤢᤏᤧ᤹ ᤀᤠᤳᤋᤡᤴᤜᤠ᤹ᤀᤠᤱ ᤁᤢᤜᤡᤱᤘᤧᤳ ᤔᤧᤗᤧᤖᤢᤛᤡᤴ॥ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤛᤰᤔᤠ ᤁᤧᤛᤥ᤺ᤴᤇᤡᤱᤒᤠ ᤁᤧᤘᤠ᤹ᤘᤠ᤹ᤒᤠ ᤁᤧᤖᤧᤰ ᤂᤢᤏᤧ᤹ ᤔᤧᤰᤂᤢᤛᤡ॥ 41 ᤕᤜᤥᤛᤢ᤺ᤸᤗᤧ ᤁᤠᤍᤣᤛ-ᤒᤷᤏᤣᤗᤠᤶ ᤃᤠᤈᤠ ᤌᤠᤖᤡᤰ ᤏᤢ ᤃᤥᤛᤣᤏᤗᤠᤶ ᤃᤡᤒᤥᤏ ᤌᤠᤖᤡᤰᤐᤠ ᤁᤧᤖᤧᤰ ᤋᤧᤱᤃᤵᤜᤠ᤹ ᤏᤠ᤺ᤴᤍᤢᤛᤡ॥ 42 ᤁᤴ ᤁᤧᤖᤧᤰ ᤜᤠᤱᤜᤠ᤹ ᤂᤢᤴᤇᤡ᤹ ᤗᤠᤈᤣ᤹ᤜᤠ᤹ᤏᤢ ᤛᤥᤛᤥᤖᤡᤰ ᤕᤜᤥᤛᤢ᤺ᤸᤗᤧ ᤌᤡᤰᤗᤧᤱᤗᤧ ᤏᤠ᤺ᤴᤍᤢᤍᤣ᤹ᤖᤢᤛᤡ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤌᤱ ᤌᤰᤋᤧ॥ 43 ᤂᤧᤴ ᤀᤣᤃᤠᤱ ᤕᤜᤥᤛᤢᤴ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤛᤥᤖᤡᤰ ᤃᤡᤗᤃᤠᤗᤒᤠ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤔᤥ ᤏᤢ᤺ᤰᤂᤧᤍᤩᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.