ᤕᤜᤥᤛᤢ 1 - LIFOTNT

ᤕᤜᤥᤛᤢᤴ ᤗᤠᤶᤗᤥᤒᤠ ᤐᤥᤱ᤹

¹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠᤴ ᤔᤠᤛᤡᤱᤅᤠᤱ ᤀᤣᤃᤠᤱ. ᤔᤥᤛᤠ᤺ᤸᤗᤧ ᤁᤢᤓᤠ᤹ᤒᤠᤱ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢᤴ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤔᤧᤳᤋᤢ.

² “ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤔᤥᤛᤠᤴ ᤔᤠᤛᤡᤱ॥ ᤁᤸᤗᤧᤆᤥᤃᤢᤸᤗᤧ ᤐᤥᤃᤧ᤹. ᤂᤧᤏᤧ᤹ ᤁᤴ ᤁᤧᤖᤧᤰ ᤔᤏᤠᤜᤠ᤹ ᤋᤣ᤹ᤖᤧᤛᤧ᤹ᤀᤠᤱ ᤕᤷᤍᤏ ᤏᤠᤎᤠ᤺ᤶᤒᤡ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤐᤡᤔᤠ ᤀᤡ᤺ᤳᤋᤢᤱᤛᤡᤱᤒᤠ ᤗᤠᤈᤣ᤹ᤀᤥ ᤐᤣᤃᤧ᤹॥

³ ᤀᤠᤱᤃᤠ᤹ ᤔᤥᤛᤠ᤺ᤴᤏᤢ ᤔᤠᤱᤜᤢᤵ ᤆᤥᤃᤢᤱᤒᤠ ᤁᤢᤀᤡᤛᤡᤰ ᤂᤧᤏᤧ᤹ ᤁᤧᤗᤠᤱ ᤋᤠᤵᤐᤣ᤹ᤀᤡᤸᤗᤧ ᤋᤥ᤹ᤖᤢᤒᤠ ᤁᤧᤖᤧᤰ ᤋᤧᤴᤜᤠ᤹ ᤂᤧᤏᤧ᤹ ᤐᤡᤏᤧᤀᤠᤱ ᤏᤧᤖᤥ॥

⁴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤠᤱ ᤁᤳᤌᤥ ᤗᤣᤒᤏᤠᤏ ᤌᤠᤖᤡᤰ ᤐᤣ᤺ᤰᤁᤠᤱ ᤐᤕᤶ ᤕᤶᤒᤠ ᤕᤢᤑᤪᤣᤋᤡᤛ ᤘᤜ᤺ᤱᤅᤠᤱ ᤏᤠ ᤜᤡᤳᤋᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤗᤠᤈᤣᤴ ᤌᤠᤖᤡᤰ ᤏᤠᤶᤎᤠ ᤗᤧᤵᤔᤠᤱ ᤗᤢᤶᤒᤠ ᤘᤖ᤺ᤱ ᤌᤠᤖᤡᤰᤁᤣ ᤂᤡᤏᤡ᤹ ᤀᤡ᤺ᤴᤍᤥ ᤐᤥᤱ᤹॥

⁵ ᤂᤧᤏᤧ᤹ ᤁᤧᤜᤡᤱᤜᤡᤱ ᤌᤠᤖᤡᤰ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤜᤠ᤺ᤳᤋᤠᤱ ᤐᤥ᤺ᤰᤔᤠ ᤔᤧᤛᤢᤰᤏᤧᤴ॥ ᤀᤠᤱᤃᤠ᤹ ᤀᤠᤰᤂᤣᤗ᤹ᤖᤡᤰ ᤔᤥᤛᤠ᤺ᤴᤏᤢ ᤘᤕᤠᤱ. ᤜᤧᤰᤁᤣᤗ᤹ᤖᤡᤰᤁᤣ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤘᤠ᤹ᤀᤠ॥ ᤀᤠᤱᤃᤠ᤹ ᤂᤧᤏᤧ᤹ ᤔᤧᤏᤠ᤹ᤏᤧᤴ᤹. ᤜᤧᤰᤁᤩᤠᤱ ᤂᤧᤏᤧ᤹ ᤗᤠᤵᤔᤧᤓᤢᤏᤧᤴ॥

⁶ “ᤁᤧᤎᤢᤶᤒᤠ ᤏᤢ ᤜᤠᤱᤜᤠᤱ ᤁᤧᤗ᤹ᤒᤠ ᤐᤥ᤺ᤰᤂᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤐᤡᤏᤡᤱ ᤔᤧᤳᤋᤢᤱᤛᤡᤱᤅᤠᤱ ᤔᤠᤱᤜᤢᤵ ᤆᤥᤃᤢᤱᤒᤠ ᤗᤠᤈᤣᤴ ᤁᤴ ᤔᤏᤠᤜᤠ᤹ᤖᤧ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤴᤜᤠ᤹ ᤗᤠᤶᤃᤧᤗᤥᤛᤢᤛᤡ᤹॥

⁷ ᤁᤧᤎᤢᤶᤒᤠ ᤏᤢ ᤛᤠ᤹ᤖᤡᤰ ᤜᤠᤱᤜᤠᤱ ᤁᤧᤗ᤹ᤒᤠ ᤐᤥ᤺ᤰᤂᤧ᤹॥ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤂᤧᤏᤧ᤹ ᤀᤡᤱᤈᤠᤱ ᤁᤧᤒᤡᤖᤧᤒᤠ ᤁᤢᤀᤡᤛᤡᤰ ᤁᤧᤖᤧᤰ ᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤀᤡ᤺ᤳᤋᤧ ᤏᤧᤳᤋᤢ᤹॥ ᤂᤧᤴ ᤗᤠᤶᤒᤠ ᤂᤧᤏᤧ᤹ ᤆᤢᤵᤛᤠᤱ ᤗᤧᤵᤔᤠᤱ ᤀᤡᤃᤪ ᤑᤧᤴᤇᤠᤱ ᤗᤧᤵᤔᤠᤱ ᤔᤧᤒᤣᤃᤧᤴᤏᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤳᤋᤡ ᤁᤧᤒᤣ᤺ᤰᤛᤠᤱ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤁᤧᤒᤥᤱ᤹॥

⁸ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥᤒᤠ ᤁᤴ ᤛᤠᤵᤐᤴᤏᤡᤴ ᤂᤧᤏᤧ᤹ ᤁᤧᤶᤒᤪᤠᤀᤥᤗᤠᤶ ᤔᤧᤔᤠᤏᤧᤴᤗ. ᤁᤖ ᤗᤧᤴᤍᤡᤰ ᤛᤧᤴᤍᤡᤰ ᤛᤧᤘᤠ ᤆᤥᤃᤧ᤹ ᤜᤧᤰᤁᤩᤠᤱ ᤂᤧᤵᤔᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤀᤡ᤺ᤳᤋᤧ ᤏᤧᤳᤋᤢ᤹. ᤂᤶᤓᤩᤠᤱ ᤂᤧᤏᤧ᤹ ᤁᤧᤖᤧᤰ ᤁᤧᤗᤠᤶᤔᤥ ᤌᤥ ᤁᤧᤒᤥ᤺ᤰᤁᤠᤱ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤁᤧᤒᤥᤱ᤹॥

⁹ ᤂᤧᤏᤧ᤹ ᤁᤧᤎᤢᤶᤒᤠ ᤏᤢ ᤛᤠ᤹ᤖᤡᤰ ᤜᤠᤱᤜᤠᤱ ᤁᤧᤗ᤹ᤒᤠ ᤐᤥ᤺ᤰᤂᤧ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤡᤱᤈᤠᤱ ᤐᤡᤏᤧᤀᤠᤱ ᤘᤠ᤹. ᤔᤧᤃᤡᤛᤧᤴᤏᤧ᤹. ᤕᤱᤔᤠ ᤔᤧᤛᤩᤧᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤀᤠᤳᤋᤡ ᤁᤧᤒᤣ᤺ᤰᤛᤠᤱ. ᤕᤜᤘᤣ ᤍᤠᤱᤒᤠ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴ. ᤂᤧᤏᤧ᤹ᤏᤢ ᤘᤠ᤹ᤖᤥ॥”

¹⁰ ᤂᤧᤒᤩᤠᤱ ᤕᤜᤥᤛᤢ᤺ᤸᤗᤧ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤢᤜᤠᤱᤃᤧᤶᤒᤠᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡ.

¹¹ “ᤛᤠ᤺ᤱᤃᤠᤜᤡᤶ ᤗᤢᤶᤔᤥᤗᤠᤶ ᤐᤣᤃᤧᤶᤔᤧ᤹ ᤜᤧᤰᤁᤩᤠᤱ ᤔᤏᤠᤜᤠ᤹ ᤀᤰᤂᤣᤗ᤹ᤖᤡᤰ ᤀᤡᤱᤈᤠᤱ ᤐᤡᤖᤧᤶᤛᤡᤶᤔᤧ᤹. ‘ᤂᤡᤏᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤆᤠᤔᤠ ᤌᤢᤱᤔᤠᤜᤠ᤹ ᤕᤠᤱᤅᤠᤛᤡᤶᤔᤧ᤹. ᤌᤣᤀᤠᤱᤓᤧᤸᤗᤧ ᤀᤠᤸᤗ ᤛᤢᤶᤕᤠᤴᤗᤧ ᤁᤴ ᤕᤷᤍᤏ ᤘᤜ᤺ᤱ ᤏᤠᤎᤠ᤺ᤶᤒᤡ ᤂᤡᤏᤡ᤹ ᤐᤣ᤺ᤰᤔᤠᤀᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤒᤡᤖᤡᤒᤠ ᤗᤠᤈᤣᤴ ᤜᤢᤰᤁᤠᤵ ᤆᤥ᤺ᤰᤔᤠ ᤐᤥᤱ᤹॥’”

¹² ᤂᤧᤒᤩᤠᤱ ᤕᤜᤥᤛᤢ᤺ᤸᤗᤧ ᤖᤢᤒᤣᤏᤡ. ᤃᤠᤍᤡ ᤏᤢ ᤔᤏᤛ᤻ᤛᤣᤒᤠ ᤁᤢᤓᤪᤧ᤺ᤱ ᤌᤠ᤺ᤰᤜᤠ᤹ ᤀᤰᤂᤣ ᤔᤧᤳᤋᤢᤛᤡ.

¹³ “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤂᤡᤏᤡ᤹ ᤁᤧᤒᤡᤖᤡᤒᤠ ᤀᤡᤱᤈᤠᤱᤅᤡᤴ ᤂᤡᤏᤡ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹. ‘ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤏᤠ᤺ᤶᤛᤡᤱᤔᤠ ᤁᤧᤒᤡᤖᤡ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤴ ᤗᤠᤈᤣᤴ ᤁᤧᤒᤡᤖᤡᤀᤠᤱ ᤏᤧᤖᤥ॥’

¹⁴ ᤂᤡᤏᤡ᤹ ᤔᤧᤸᤗᤡᤱᤃᤧᤴ ᤔᤣ᤺ᤳᤜᤠ᤹. ᤀᤅᤧ᤺ᤰᤘᤠ ᤛᤠᤀᤣᤜᤠ᤹ ᤏᤢ ᤌᤰᤛᤠᤜᤠ᤹ ᤔᤥᤛᤠ᤺ᤸᤗᤧ ᤂᤡᤏᤡ᤹ ᤕᤷᤍᤏ ᤏᤠᤱᤃᤧᤴ ᤗᤧᤵᤔᤠᤱ ᤁᤧᤒᤡᤖᤡᤒᤠ ᤗᤠᤈᤣ᤹ᤀᤥ ᤘᤠ᤹ᤔᤠ ᤔᤧᤛᤢᤰ॥ ᤁᤖ ᤂᤡᤏᤡ᤹ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠ ᤜᤣ᤹ᤀᤠᤛᤡᤶᤔᤧ᤹ᤀᤠᤱ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤋᤃᤡ ᤏᤠᤎᤠ᤺ᤶᤒᤡ ᤁᤧᤒᤣᤃᤡᤖ ᤐᤥᤱ᤹॥

¹⁵ ᤜᤧᤰᤁᤩᤠᤱ ᤀᤠᤸᤗ ᤂᤡᤏᤡ᤹ ᤏᤠ᤺ᤶᤛᤡᤱᤔᤠ ᤁᤧᤒᤡᤖᤡᤒᤠ ᤜᤧᤰᤁᤣᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤀᤠᤱ ᤏᤠ᤺ᤶᤛᤡᤱᤔᤠ ᤔᤧᤒᤡᤖᤢᤛᤡᤴᤗ ᤌᤠᤖᤡᤰ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤐᤡᤔᤠ ᤁᤧᤈᤥᤃᤡᤒᤠ ᤗᤠᤈᤣᤴ ᤂᤧᤱᤜᤠ᤹ᤖᤧ ᤕᤢᤰ ᤔᤧᤴᤈᤥ᤺ᤰᤁᤣ ᤌᤠᤖᤡᤰ ᤂᤡᤏᤡ᤹ ᤂᤧᤱᤜᤠ᤹ ᤁᤧᤓᤠ᤹ᤖᤢᤶᤛᤡᤶᤗ ᤐᤥᤱ᤹॥ ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤕᤷᤍᤏ ᤘᤜ᤺ᤱ ᤏᤠᤎᤠ᤺ᤶᤒᤡᤒᤠ ᤏᤠᤱᤃᤧᤴ ᤗᤧᤵᤔᤠᤱ ᤂᤡᤏᤡ᤹ ᤁᤧᤶᤒᤡᤖᤡᤒᤠ ᤗᤠᤈᤣ᤹ᤀᤥ ᤏᤢ᤺ᤱᤔᤠ ᤑᤧᤶᤔᤠᤀᤠᤱ ᤂᤧᤴ ᤕᤢᤰᤔᤠ ᤁᤧᤛᤢᤰᤋᤢᤶ᤹॥”

¹⁶ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤜᤥᤛᤢᤴ ᤀᤰᤂᤣᤗ᤹ᤖᤡᤰ ᤏᤥᤃᤵ ᤔᤧᤒᤡᤖᤢ. “ᤂᤧᤏᤧ᤹ ᤀᤠᤏᤡᤃᤣ ᤀᤠᤃᤧᤒᤡᤒᤠ ᤁᤧᤖᤧᤰ ᤀᤡᤱᤈᤠᤱᤜᤠ᤹ ᤆᤥᤃᤢᤶᤒᤧ᤹. ᤂᤧᤒᤩᤠᤱ ᤂᤧᤏᤧ᤹ ᤀᤠᤏᤡᤃᤣ ᤀᤠᤳᤋᤡ ᤀᤠᤳᤋᤡ ᤕᤠᤵᤔᤡ ᤁᤧᤒᤠᤱ. ᤂᤧᤵᤔᤥ ᤀᤠᤏᤡᤃᤣ ᤐᤣᤃᤡᤃᤧ᤹॥

¹⁷ ᤀᤠᤰᤂᤣᤗ᤹ᤖᤡᤰ ᤔᤥᤛᤠ᤺ᤸᤗᤧ ᤁᤢᤒᤠ᤺ᤴᤜᤠ᤹ ᤁᤧᤖᤧᤰ ᤀᤠᤏᤡᤃᤣ ᤂᤧᤵᤛᤢᤶᤒᤧᤀᤠᤱ ᤘᤕᤧ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤏᤡᤃᤣ ᤂᤧᤏᤧ᤹ ᤁᤧᤒᤠ᤺ᤴᤏᤡᤴᤏᤠᤱ ᤂᤧᤵᤛᤢᤶᤒᤧ᤹॥ ᤕᤜᤘᤣ ᤍᤠᤱᤒᤠ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤰᤂᤣᤗ᤹ᤖᤡᤰ ᤔᤥᤛᤠ᤺ᤴᤏᤢ ᤘᤕᤧ. ᤜᤧᤰᤁᤣᤗ᤹ᤖᤡᤰᤁᤣ ᤂᤧᤏᤧ᤹ᤏᤢᤀᤠᤱ ᤘᤠ᤹ᤖ॥

¹⁸ ᤂᤧᤏᤧ᤹ ᤁᤧᤀᤡᤱᤈᤠᤱᤅᤡᤴ ᤜᤠ᤺ᤳᤗᤧ ᤀᤳᤋᤢ᤹ ᤜᤧᤰᤁᤩᤠᤱ ᤂᤧᤏᤧ᤹ ᤀᤡᤱᤈᤠᤱ ᤁᤧᤈᤥᤃᤢᤒᤠ ᤐᤠ᤺ᤴᤈᤠ᤺ᤰᤁᤡᤴ ᤜᤠ᤺ᤳᤗᤧ ᤔᤧᤀᤡ᤺ᤳᤋᤢᤴ ᤔᤧᤏᤠ᤺ᤳᤋᤢᤴ᤹. ᤂᤧᤴ ᤛᤧᤵᤔᤠ ᤐᤥᤱ᤹॥ ᤂᤧᤏᤧ᤹ ᤁᤧᤎᤢᤶᤒᤠ ᤏᤢ ᤜᤠᤱᤜᤠᤱ ᤁᤧᤗ᤹ᤒᤠᤖᤰ ᤐᤥ᤺ᤰᤂᤧ᤹ᤀᤥ॥”