ᤕᤥᤏᤠ 3 - LIFOTNT

ᤕᤥᤏᤠᤖᤧ ᤀᤡᤱᤈᤠᤱᤅᤡᤴ ᤀᤡ᤺ᤳᤋᤢ

¹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤅᤡᤴ ᤕᤠᤶᤔᤥ ᤌᤡᤰᤗᤧᤱ ᤕᤥᤏᤠᤀᤥ ᤁᤧᤖᤧ॥

² ᤂᤢᤏᤧ᤹ ᤔᤧᤳᤋᤢ. “ᤛᤠ᤹ᤖᤡᤰ ᤕᤶᤒᤠ ᤏᤡᤏᤒᤣ ᤕᤧᤰᤕᤰᤁᤥ ᤂᤧᤏᤧ᤹ ᤐᤣᤃᤧ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤐᤡᤔᤠ ᤀᤡ᤺ᤳᤏᤧᤒᤠ ᤀᤡᤱᤄᤱᤅᤡᤴ ᤂᤧᤵᤔᤥᤒᤠ ᤔᤏᤠᤜᤠ᤹ ᤆᤧᤰᤋᤧᤛᤧ᤹॥”

³ ᤕᤥᤏᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤋᤧᤴᤍᤧ ᤜᤧᤰᤁᤩᤠᤱ ᤏᤡᤏᤒᤣ ᤐᤣ॥ ᤏᤡᤏᤒᤣ ᤕᤧᤰᤕᤰᤁᤡᤴ ᤛᤠ᤹ᤖᤡᤰ ᤕᤶᤒᤠ ᤆᤥᤃᤧ. ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤕᤧᤰᤕᤰᤁᤡᤴ ᤛᤢᤶ ᤕᤧᤴᤗᤧᤖᤰ ᤂᤠᤖᤠᤰ ᤗᤔᤠ ᤛᤢᤰᤁᤧᤍᤧᤵᤐᤠ ᤆᤥᤃᤧ॥

⁴ ᤕᤥᤏᤠᤴ ᤕᤧᤰᤕᤰᤁᤥ ᤗᤠᤛᤧᤀᤠᤱ ᤌᤡᤰᤕᤠ᤺ᤴᤒᤠ ᤗᤠ᤺ᤶᤍᤡᤰ ᤗᤠᤱᤄᤣᤃᤧ ᤂᤧᤒᤩᤠᤱ ᤀᤰᤂᤣ ᤐᤠ᤺ᤳᤋᤢᤖ ᤀᤡᤱᤓᤴ ᤆᤥᤃᤢ. “ᤀᤠᤸᤗ ᤁᤧᤍᤠᤒᤠ ᤗᤡᤒᤥᤱ ᤕᤧᤴᤏᤥ ᤏᤡᤏᤒᤣ᤺ᤴ ᤆᤡᤸᤗᤧᤰ ᤗᤧᤱ॥”

⁵ ᤏᤡᤏᤒᤣᤒᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠ᤺ᤰᤁᤥ ᤏᤛᤠᤴ ᤔᤧᤈᤥᤃᤢ॥ ᤂᤧᤸᤗᤧᤆᤥᤃᤢᤸᤗᤧ ᤂᤢᤴᤇᤡ᤹ ᤏᤡᤱᤘᤠ᤹ ᤗᤥᤖᤧᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤰᤔᤠᤖᤧ ᤗᤠᤃᤡ ᤁᤧᤖᤧᤰ ᤆᤠᤏᤧᤳᤋᤥ ᤕᤢᤱᤔᤠ ᤐᤥᤱ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡ᤺ᤴᤎᤥ ᤔᤧᤈᤥᤃᤢ॥ ᤂᤧᤱᤜᤠ᤹ ᤕᤶᤒᤠ ᤆᤢᤰᤐᤠ ᤁᤧᤖᤧᤰᤗᤧ ᤛᤠᤃᤡ ᤋᤣᤳ ᤔᤧᤈᤠᤰᤂᤢᤀᤠᤱ ᤀᤠᤒᤠᤅᤣ ᤔᤧᤜᤡᤴᤍᤧᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤍᤠᤱ ᤔᤧᤈᤥᤃᤢ॥

⁶ ᤏᤡᤏᤒᤣᤒᤠ ᤜᤠᤱᤅᤡᤸᤗᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤁᤢᤜᤠᤱ ᤕᤢᤰᤏᤠᤀᤥᤏᤢ ᤐᤥᤃᤧ ᤜᤧᤰᤁᤩᤠᤱ ᤁᤢᤜᤠᤱᤈᤠᤱᤅᤡᤴ ᤑᤧᤴᤍᤢ ᤂᤧᤒᤩᤠᤱ ᤛᤠᤃᤡ ᤋᤣᤳ ᤆᤠᤰᤛᤡᤱᤅᤠᤱ ᤂᤠᤵᤐᤢᤀᤥ ᤕᤢᤱᤛᤡᤱ॥

⁷ ᤂᤢᤏᤧ᤹ ᤏᤡᤏᤒᤣᤛᤔᤠ ᤔᤏᤠᤜᤠ᤹ ᤀᤰᤋᤱᤒᤠ ᤀᤡᤱᤈᤠᤱ ᤜᤠᤰᤋᤢᤛᤡ. “ᤁᤴ ᤜᤠᤱᤅᤡᤴ ᤏᤢ ᤜᤠᤱᤕᤶᤒᤢ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤱᤈᤠᤱᤗᤥ॥ ᤜᤠ᤺ᤳᤗᤧᤀᤠᤱ ᤜᤧᤴᤏᤠᤱ ᤔᤧᤈᤏᤧᤴᤗ॥ ᤁᤧᤖᤧᤰ ᤔᤏᤠᤜᤠ᤹. ᤐᤡᤳᤜᤠ᤹ ᤜᤧᤰᤁᤩᤠᤱ ᤔᤧᤸᤗᤢᤰ ᤔᤧ᤺ᤴᤍᤠᤰᤜᤠ᤹ᤖᤧ ᤆᤠᤔᤠ ᤌᤢᤱᤔᤠ ᤔᤧᤏᤢ᤹ᤏᤧᤴ॥

⁸ ᤁᤧᤖᤧᤰ ᤔᤏᤠ ᤏᤢ ᤌᤰᤛᤠᤜᤠ᤹ᤖᤧ ᤔᤧᤖᤡᤱ ᤌᤰᤔᤠᤖᤧ ᤗᤠᤃᤡ ᤛᤠᤃᤡ ᤋᤣᤳ ᤆᤠᤱᤔᤠ ᤐᤥᤱ᤹॥ ᤁᤧᤖᤧᤰᤗᤧ ᤏᤡᤱᤘᤠ᤹ ᤐᤡᤔᤠᤀᤠᤱ ᤋᤢᤘᤠ ᤆᤥ᤺ᤰᤔᤠ ᤐᤥᤱ᤹ ᤜᤧᤰᤁᤩᤠᤱ ᤀᤠᤒᤠᤅᤣ ᤑᤧᤴ ᤕᤠ᤺ᤶᤒᤰᤜᤠ᤹ ᤏᤢ ᤋᤠᤵᤑᤧ᤺ᤶᤒᤠ ᤕᤧᤵᤗᤧᤰᤜᤠ᤹ ᤗᤧᤵᤔᤠ ᤐᤥᤱ᤹॥

⁹ ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠᤴ ᤏᤢ᤺ᤰᤋᤢ᤹ ᤜᤧᤰᤁᤩᤠᤱ ᤀᤠᤏᤡ᤹ ᤗᤧᤵᤔᤠᤱᤒᤠ ᤁᤢᤛᤠᤰᤁᤧᤴᤏᤡᤴ ᤆᤰ ᤌᤠᤛᤢᤒᤡᤗᤠ ᤂᤧᤒᤩᤠᤱ ᤀᤠᤏᤡ᤹ ᤀᤠᤶᤔᤧᤰᤏᤧᤴ॥”

¹⁰ ᤂᤧᤱᤜᤠ᤹ᤖᤧ ᤌᤣ ᤔᤧᤈᤥᤃᤢ ᤜᤧᤰᤁᤩᤠᤱ ᤀᤠᤓᤣᤗ᤹ᤖᤡᤰ ᤂᤢᤴᤇᤡ᤹ ᤋᤠᤵᤑᤧ᤺ᤶᤒᤠ ᤆᤥ᤺ᤰᤔᤠ ᤐᤠ᤺ᤴᤗᤠᤶ ᤔᤧᤏᤢ᤺ᤰᤂᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤛᤢ॥ ᤂᤧᤒᤩᤠᤱ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤗ᤹ᤖᤧ ᤜᤧᤰᤁᤩᤠᤱ ᤂᤡᤏᤡ᤹ ᤂᤠᤵᤐᤢᤌᤩ᤺ᤱ ᤆᤥ᤺ᤰᤏᤡᤱ ᤔᤧᤳᤋᤢᤛᤡᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤔᤧᤈᤥᤃᤢᤴᤗᤥ॥