ᤕᤥᤏᤠ 2 - LIFOTNT

ᤕᤥᤏᤠ᤺ᤸᤗᤧ ᤁᤢᤒᤣᤗᤡᤃᤧᤴ ᤋᤢᤘᤠ

¹ ᤕᤥᤏᤠ᤺ᤸᤗᤧ ᤅᤠ᤺ᤸᤗᤧ ᤁᤢᤛᤠᤵᤐᤥ᤺ᤰᤐᤥᤗᤠᤶ ᤕᤜᤘᤣ ᤍᤠᤱᤒᤠ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤰᤂᤣᤗ᤹ᤖᤡᤰ ᤐᤣᤗᤡ ᤑᤠᤰᤋᤢ—

² “ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤀᤠᤍᤢᤰᤂᤣᤀᤥ ᤂᤧᤏᤧ᤹ ᤐᤣᤗᤡ ᤑᤠᤰᤏᤧᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤏᤢᤃᤵ ᤁᤧᤒᤡᤖᤠᤱᤗᤥ॥ ᤀᤠᤱᤃᤠ᤹ ᤕᤥ ᤗᤢᤶᤒᤠ᤺ᤳᤋᤥᤗᤠᤶᤒᤠ ᤁᤢᤓᤠ᤹ᤖᤧ ᤗᤠᤃᤡ ᤀ᤺ᤰᤋᤠᤱᤅᤠᤱ ᤐᤣᤗᤡ ᤑᤠᤰᤏᤧᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤒᤣᤗᤡᤴ ᤁᤧᤄᤧᤵᤛᤢᤖᤥ॥

³ ᤂᤧᤏᤧ᤹ ᤀᤠᤱᤃᤠ᤹ ᤘᤖ᤺ᤱᤅᤡᤸᤗᤧ ᤁᤢᤛᤡᤃᤠᤱ. ᤂᤧᤸᤗᤧᤀᤠᤱ ᤕᤥ ᤁᤢᤛᤡᤃᤠᤱ ᤗᤧᤵᤔᤠᤱ ᤗᤠᤵᤁᤧᤓᤢᤛᤠᤱᤗᤥ. ᤂᤧ᤹ᤕᤥ ᤀᤠᤱᤃᤠ᤹ ᤆᤫᤠ᤺ᤳᤋᤡᤸᤗᤧ ᤁᤒᤪᤡᤱ ᤁᤒᤠᤱᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤢᤰᤛᤠᤶᤒᤠ ᤘᤠᤓᤧᤸᤗᤧᤱᤜᤠ᤹ ᤀᤠᤛᤶᤎᤠᤱ ᤜᤢ᤺ᤰᤋᤧᤖᤥ॥

⁴ ᤁᤧᤍᤰᤁᤪᤢᤶᤒᤥᤗᤠᤶ ᤁᤧᤏᤠ᤺ᤳᤋᤠᤱ ᤁᤧᤍᤣᤛᤠᤱ ᤁᤧᤗ᤹ᤒᤠ ᤀᤠᤱᤃᤠ᤹ ᤀᤡ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤁᤧᤛᤣᤛᤣ ᤔᤠᤱᤜᤡᤶᤔᤡᤴ ᤔᤧᤏᤡᤀᤠᤴᤒᤡᤗᤠ ᤗ᤹ᤖᤠᤱᤗᤥ॥

⁵ ᤀᤠᤛᤶᤎᤠᤱ ᤆᤫᤠ᤺ᤳᤋᤡᤴ ᤜᤢ᤺ᤰᤋᤧᤀᤠᤱ ᤀᤠᤛᤰᤔᤠ ᤛᤠᤰᤋᤠᤱ ᤐᤡᤖᤠᤱᤗᤥ. ᤘᤖ᤺ᤱᤅᤡᤴᤗᤧ ᤂᤰᤐᤧᤳ ᤏᤡ᤺ᤵᤛᤠᤱᤗᤥ. ᤀᤠᤎ᤻ᤃᤣᤰᤀᤥ ᤘᤖ᤺ᤱᤅᤥᤒᤠ ᤕᤠ᤺ᤴᤜᤠ᤹ ᤁᤡᤳᤇᤡᤱᤗᤥ॥

⁶ ᤀᤠᤱᤃᤠ᤹ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ᤖᤧ ᤁᤢᤛᤡᤃᤠᤱᤒᤠ ᤔᤢ ᤁᤢᤜᤠᤰᤁᤥ ᤁᤧᤖᤠᤱᤗᤥ. ᤀᤡᤰᤛᤠᤍᤡᤱ ᤂᤠᤶᤒᤣᤰ ᤛᤡᤃᤠᤱ ᤁᤧᤖᤠᤱᤗᤥ. ᤂᤧᤸᤗᤧ ᤁᤢᤗᤠᤶᤎᤣ᤺ᤳᤜᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤛᤢᤒᤧᤀᤠᤱ ᤐᤳᤗᤥ॥ ᤁᤖ ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤁᤢᤍᤡ᤺ᤶᤒᤣ ᤁᤣ᤺ᤶᤒᤠ ᤗᤢᤶᤒᤠ᤺ᤳᤋᤥᤗᤠᤶ ᤁᤢᤜᤡᤱᤘᤧᤳ ᤁᤧᤏᤢ᤺ᤰᤋᤠᤱ ᤁᤧᤎᤠᤰᤋᤠᤱᤗᤥ॥

⁷ ᤀᤠᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤐᤣᤖ ᤐᤳᤇᤧᤖᤥ ᤜᤧᤰᤁᤣ᤺ᤸᤗᤧ ᤕᤜᤘᤣ ᤍᤠᤱᤒᤠᤀᤣ ᤀᤠᤱᤃᤠ᤹ ᤂᤧᤏᤧ᤹ ᤐᤣᤗᤡ ᤑᤠᤰᤏᤧᤖᤥ ᤜᤧᤰᤁᤩᤠᤱ ᤁᤧᤛᤣᤛᤣ ᤔᤠᤱᤜᤡᤶᤔᤥ ᤀᤠᤒᤣᤗᤡᤃᤧᤴ ᤋᤢᤘᤠᤴ ᤁᤧᤄᤧᤵᤛᤢᤖᤥ॥

⁸ ᤀᤠᤳᤋᤡᤴᤜᤠ᤹ᤖᤧ ᤜᤏᤧᤒᤠ ᤏᤠᤘᤠ ᤆᤀᤡ᤺ᤳᤜᤠ᤹ ᤔᤠᤱᤔᤧᤄᤕᤢᤛᤡ᤹. ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤛᤧᤘᤠ ᤆᤥ᤺ᤰᤔᤠ ᤔᤧᤗᤧᤖᤢᤀᤠᤱ ᤔᤧᤘᤠ᤹ᤖᤥ॥

⁹ ᤁᤖ ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤠᤖᤠ ᤑᤥᤛᤢᤱᤗᤥ. ᤂᤧᤏᤧ᤹ᤀᤥ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤱᤗᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤁᤧᤳᤋᤢᤱᤗᤥ॥ ᤛᤧᤴᤗᤵᤐᤡᤴ ᤕᤜᤘᤣ ᤍᤠᤱᤒᤠᤴᤗᤠᤶ ᤋᤠᤖᤥ॥”

¹⁰ ᤜᤧᤰᤁᤣ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤅᤠ᤺ᤴ ᤀᤡᤱᤈᤠᤱ ᤐᤡᤖᤢ. ᤜᤧᤰᤁᤩᤠᤱ ᤅᤠ᤺ᤸᤗᤧ ᤕᤥᤏᤠᤴ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤗᤠᤰᤁᤠ᤺ᤳ ᤀᤛᤢ ᤗ᤺ᤳᤋᤢᤖᤥ॥