ᤕᤥᤀᤣᤗ 3 - LIFOTNT

ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧᤴ ᤂᤠᤛᤧᤴ

¹ “ᤂᤧᤴ ᤕᤧᤴᤜᤠ᤹ᤀᤥ ᤏᤢ ᤜᤠᤒᤠ ᤂᤧᤴ ᤕᤧᤶᤔᤥ ᤀᤠᤱᤃᤠ᤹ ᤕᤜᤢᤍᤠᤀᤥ ᤜᤧᤰᤁᤩᤠᤱ ᤕᤖᤢᤛᤗᤧᤔᤀᤥ ᤏᤢ᤹ᤔᤠᤍᤠᤔᤠᤴ ᤏᤢ᤺ᤰᤋᤢᤱᤗᤥ॥

² ᤀᤠᤱᤃᤠ᤹ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤛᤢᤵᤛᤢᤱᤛᤡᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤜᤥᤛᤠᤐᤠᤋᤒᤠ ᤏᤧᤏᤧᤒᤠᤍᤧᤴᤏᤥ ᤋᤠᤖᤢᤱᤛᤡᤱᤗᤥ॥ ᤀᤠᤱᤃᤠ᤹ ᤀᤠᤔᤏᤠ ᤀᤠᤗᤰᤂᤥᤔᤠ ᤀᤡᤛᤪᤠᤀᤡᤗᤡᤜᤠ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤑᤢᤳᤇᤡᤱᤈᤩᤠᤱ ᤁᤧᤛᤧᤒᤠ ᤁᤧᤍᤣᤒᤠ ᤏᤢ ᤀᤠᤱᤃᤠ᤹ ᤀᤠᤗᤠᤈᤣᤴ ᤁᤢᤗᤰ ᤁᤢᤗᤰᤁᤥ ᤁᤧᤓ᤺ᤱᤒᤠᤜᤠ᤹ ᤂᤧᤵᤔᤥ ᤂᤢᤶᤍᤡᤱ ᤐᤡᤖᤢᤱᤛᤡᤱᤗᤥ॥

³ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤀᤥ ᤋ᤹ᤕᤠ᤺ᤴᤛᤥᤴ ᤔᤧᤃᤧᤛᤢᤖᤥ. ᤜᤧᤰᤁᤩᤠᤱ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰᤗᤧ ᤗᤠᤃᤡ ᤌᤠᤱᤒᤧᤴᤜᤠ᤹ ᤗᤧᤱᤜᤱ ᤔᤧᤈᤥᤃᤢᤛᤡᤖᤥ. ᤜᤧᤰᤁᤩᤠᤱ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤜᤠ᤹ ᤔᤧᤛᤱᤄᤢᤛᤡᤀᤠᤱ ᤌᤡ ᤔᤧᤎᤢᤅᤢᤖᤥ॥

⁴ “ᤀᤠᤸᤗ ᤋᤢᤖᤥᤛ ᤏᤢ ᤛᤡᤍᤥᤏ ᤕᤧᤰᤕᤰᤜᤠ᤹ ᤜᤧᤰᤁᤩᤠᤱ ᤐᤗᤡᤛ᤻ᤋᤡ ᤋᤧᤱᤃᤵᤐᤥᤒᤠ ᤔᤏᤠᤛᤣ. ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤂᤡᤏᤡ᤹ ᤌᤣ ᤐᤠᤴ ᤁᤧᤃᤳᤋᤢᤶᤒᤣ᥅ ᤌᤣ ᤀᤠᤱᤃᤠ᤹ ᤆᤥᤃᤢᤱᤒᤠ ᤁᤢᤓᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤔᤠ ᤁᤧᤃᤥ᤺ᤳᤋᤢᤶᤒᤡ᥅ ᤂᤡᤏᤡ᤹ ᤁᤢᤗᤧᤰᤘᤠ ᤁᤧᤏᤢ᤺ᤰᤋᤢᤶᤗ ᤁᤧᤘᤕᤡᤏᤧᤓᤃᤪ. ᤂᤧᤴ ᤀᤠᤱᤃᤠ᤹ ᤂᤡᤏᤡ᤹ ᤌᤧᤃᤣ᤺ᤰᤐᤥ ᤜᤠᤖᤠᤀᤣ ᤆᤢᤰᤗ ᤕᤠ᤺ᤴᤍᤢᤱ᤹॥

⁵ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤛᤠᤶᤔᤩᤠᤱ ᤏᤢ ᤀᤠᤕᤢᤵᤐᤠ ᤜᤧᤰᤁᤩᤠᤱ ᤁᤧᤖᤧᤰ ᤏᤢ᤺ᤒ᤻ᤏᤢᤒᤠ ᤀᤠᤈᤡᤃᤰᤘᤠᤜᤠ᤹ ᤂᤡᤏᤡ᤹ ᤔᤠᤱᤜᤡᤶᤜᤠ᤹ᤀᤥ ᤁᤧᤍᤣ᤹ᤖᤢᤶᤔᤠᤱ ᤘᤠ᤹॥

⁶ ᤂᤡᤏᤡ᤹ ᤕᤜᤢᤍᤠ ᤏᤢ ᤕᤖᤢᤛᤗᤧᤔᤒᤠ ᤔᤏᤠᤜᤠ᤹ ᤜᤡᤶᤎᤠ᤺ᤱᤜᤠ᤹ᤗᤠᤶ ᤔᤠ᤺ᤱᤄᤠ ᤐᤠᤱᤔᤠᤍᤣᤔᤠᤛᤡᤖᤧ ᤗᤠᤃᤡ ᤃᤪᤡᤁᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤁᤧᤛᤱᤄᤢᤶᤛᤡᤶ॥

⁷ “ᤀᤥᤔᤧᤳᤋᤧᤶᤔᤧ᤹. ᤂᤡᤏᤡ᤹ ᤂᤧᤱᤜᤠ᤹ ᤁᤧᤛᤱᤄᤢᤶᤛᤡᤶᤒᤠ ᤋᤧᤴᤜᤠ᤹ᤀᤥᤗᤠᤶ ᤀᤠᤱᤃᤠ᤹ ᤗ᤺ᤳᤋᤢᤱ ᤋᤠᤖᤢᤱᤛᤡᤱ᤹. ᤜᤧᤰᤁᤩᤠᤱ ᤂᤡᤏᤡ᤹ ᤂᤧᤱᤜᤠ᤹ ᤁᤧᤔᤧᤳᤋᤢᤶᤛᤡᤶᤒᤧᤸᤗᤧ ᤁᤢᤗᤧᤰᤘᤠ᤹ ᤀᤠᤱᤃᤠ᤹ ᤂᤡᤏᤡ᤹ᤀᤣ ᤌᤧᤃᤣ᤺ᤰᤐᤥ ᤌᤠᤛᤢᤱ᤹॥

⁸ ᤀᤠᤱᤃᤠ᤹ ᤂᤡᤏᤡ᤹ ᤕᤧᤶᤒᤡᤳᤇᤠ ᤔᤧᤴᤇᤢᤔᤠ ᤛᤠᤜᤠ᤹ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤛᤱᤄᤢᤱᤛᤡᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤴᤜᤠ᤹ ᤔᤠ᤺ᤱᤄᤠ ᤁᤧᤕᤢᤱᤒᤠ ᤗᤳᤇᤠ ᤔᤧᤴᤇᤠᤶ ᤛᤢᤘᤠᤱ ᤛᤒᤠᤒᤠ ᤔᤏᤠᤜᤠ᤹ᤀᤥ ᤔᤧᤛᤱᤄᤢ ᤔᤧᤍᤣᤛᤢᤛᤡ᤹॥” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤀᤠᤱ ᤘᤠ᤹ᤖᤥ॥

⁹ “ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤴ ᤀᤢᤘᤠ ᤆᤥᤃᤧᤶᤔᤧ᤹ᤀᤥ— ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤂᤡᤏᤡ᤹ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ᤀᤥ॥ ᤁᤧᤖᤧᤰᤏᤢ᤺ᤸᤗᤧ ᤁᤧᤀᤠ᤺ᤵᤐᤠ ᤌᤰᤗᤡᤜᤠᤱᤜᤠ᤹ ᤀᤢ᤺ᤳᤋᤧᤶᤛᤡᤶᤔᤧ᤹ᤀᤥ. ᤌᤱ ᤁᤧᤈᤥ᤺ᤰᤐᤠ ᤁᤧᤖᤧᤰ ᤔᤏᤠᤜᤠ᤹ ᤏᤡ᤺ᤳᤋᤠᤱ ᤔᤧᤍᤠᤀᤠᤱ ᤔᤧᤓᤳᤋᤢᤛᤡᤖᤖᤥ॥

¹⁰ ᤂᤡᤏᤡ᤹ ᤁᤧᤰᤆᤢ᤹ᤀᤥᤒᤠ ᤆᤢᤃᤧᤱᤜᤠ᤹ ᤌᤃᤧᤶᤔᤧ᤹ᤀᤠᤱ ᤋᤠᤓᤣ ᤆᤥᤃᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤑᤠ᤺ᤳᤗᤧ᤺ᤱᤔᤠ ᤁᤠᤳᤆᤩᤠᤜᤠ᤹ ᤌᤃᤧᤶᤔᤧ᤹ᤀᤠᤱ ᤗᤠ᤺ᤰ ᤆᤥᤃᤧᤶᤔᤧ᤹ᤀᤥ॥ ᤔᤧᤴᤎᤢᤶᤏᤠᤒᤠᤜᤠ᤹ᤖᤧᤀᤠᤱ ‘ᤀᤠᤱᤃᤠ᤹ ᤁᤧᤎᤢᤶᤒᤠ ᤆᤥᤰᤁᤠ’ ᤔᤧᤒᤠ᤺ᤳᤋᤢᤖᤖᤥ॥

¹¹ ᤁᤧᤖᤧᤰ ᤐᤡᤛᤠᤱᤒᤠ ᤔᤧᤴᤇᤠᤶ ᤛᤢᤘᤠᤱᤛᤣ. ᤜᤠᤖᤠ ᤋᤩᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤡᤏᤡ᤹ ᤂᤧᤵᤔᤥ ᤛᤥᤖᤡᤰ ᤆᤢᤵᤛᤧᤶᤔᤧ᤹ᤀᤥ॥” ᤕᤜᤘᤣ ᤍᤠᤱᤒᤠᤀᤣ. ᤔᤢᤰᤁᤧᤃᤢᤒᤠ ᤁᤧᤔᤏᤠᤜᤠ᤹ ᤕᤥ ᤕᤢᤖᤧᤛᤧ᤹ᤀᤥ॥

¹² “ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤑᤧᤈᤢᤶᤓᤧᤕᤠ ᤔᤧᤃᤠᤵᤛᤡᤱᤅᤠᤱ ᤔᤧᤒᤥᤰᤗᤖᤥ ᤜᤧᤰᤁᤩᤠᤱ ᤕᤜᤥᤛᤠᤐᤠᤋᤒᤠ ᤏᤧᤏᤧᤒᤠᤍᤧᤴᤏᤥ ᤋᤃᤡ ᤔᤧᤒᤥᤖᤖᤥ. ᤌᤣᤀᤠᤱᤓᤧᤸᤗᤧ ᤜᤠᤒᤠ ᤂᤧᤵᤔᤥᤀᤣ ᤁᤧᤖᤧᤰ ᤐᤡᤛᤠᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤠᤛᤧᤴ ᤆᤥ᤺ᤰᤔᤠᤛᤡᤖᤧ ᤗᤠᤃᤡ ᤀᤠᤱᤃᤠ᤹ ᤕᤢᤱᤅᤠᤖᤥ॥

¹³ ᤁᤠᤳᤆᤩᤠᤴ ᤂᤡᤏᤡ᤹ ᤕᤠᤅᤠᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤆᤠᤛᤢᤶᤔᤠ ᤕᤧᤶ ᤐᤥ᤺ᤰᤂᤧᤆᤢᤖᤧᤀᤠᤱ ᤏᤧᤖᤥ॥ ᤋᤩᤧᤶᤔᤧ᤹ᤀᤥ. ᤆᤧᤸᤗᤧᤰᤛᤣ᤹ᤜᤠ᤹ ᤋᤥ᤹ᤖᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤆᤧᤸᤗᤧᤰᤛᤣ᤹ ᤀᤣ᤺ᤵᤔᤠᤍᤧᤴᤏᤡᤴ ᤋᤡᤶᤛᤧᤀᤠᤱ ᤏᤧᤖᤥ॥ ᤜᤧᤰᤁᤩᤠᤱ ᤁᤢ᤺ᤴᤍᤠᤜᤠ᤹ ᤋᤡᤶᤛᤧᤀᤠᤱ ᤘᤧᤵᤐᤣ᤺ᤰᤗ ᤐᤳᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤴ ᤛᤠ᤹ᤖᤡᤰ ᤀᤡ᤺ᤳᤋᤧᤖᤥ॥”

¹⁴ ᤂᤠᤛᤧᤴ ᤆᤥ᤺ᤰᤔᤠ ᤏᤧᤏᤧᤒᤠᤍᤧᤴᤏᤥ ᤆᤡᤀᤧᤳ ᤆᤡᤀᤧᤳ ᤔᤧᤀᤧᤳᤇᤡᤱᤗ ᤔᤧᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤠᤛᤧᤴᤏᤡᤴ ᤏᤡ᤺ᤴᤎᤥ ᤆᤥ᤺ᤰᤔᤠ ᤏᤧᤏᤧᤒᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤧᤴᤏᤡᤴ ᤏᤡ᤺ᤳᤋᤠᤱ ᤋᤩᤧᤀᤠᤱ ᤘᤠ᤹ᤖᤥ॥

¹⁵ ᤏᤠᤶᤔᤡᤴ ᤏᤢ ᤗᤠᤒᤧᤴ ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤐᤥᤱᤗᤥ ᤜᤧᤰᤁᤩᤠᤱ ᤂᤣ᤺ᤶᤛᤡᤰᤐᤠᤜᤠ᤹ ᤔᤧᤴᤀᤥ᤺ᤳᤏᤧᤴᤗᤥ॥

¹⁶ ᤕᤜᤘᤣ ᤍᤠᤱᤒᤧᤴ ᤛᤡᤕᤥᤏ ᤁᤥ᤺ᤰᤔᤠᤗᤠᤶ ᤜᤢ᤺ᤰᤗᤥ. ᤜᤧᤰᤁᤩᤠᤱ ᤕᤖᤢᤛᤗᤧᤔᤗᤠᤶ ᤂᤢᤏᤧ᤹ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤗᤥ. ᤋᤠᤱᤛᤠᤱᤒᤠᤴ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤌᤧᤃᤰᤁᤰᤏᤠ ᤕᤱᤗᤥ॥ ᤁᤖ ᤕᤜᤘᤣ ᤍᤠᤱᤒᤧᤴ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤗᤠᤃᤡ ᤛᤧ᤺ᤵᤛᤡᤱᤔᤠᤍᤧᤴ ᤜᤧᤰᤁᤩᤠᤱ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤗᤠᤃᤡ ᤜᤠᤱᤕᤰ ᤐᤥᤱᤗᤥ॥

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤔᤢ᤹ᤀᤡᤛᤠᤶ ᤐᤡᤖᤢᤛᤡ᤹

¹⁷ “ᤂᤧᤒᤩᤠᤱ ᤛᤣᤛᤣ ᤁᤥ᤺ᤰᤔᤠ ᤛᤡᤕᤥᤏᤀᤥ ᤁᤧᤕᤢᤱᤒᤠ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤱᤃᤠ᤹ᤀᤣ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤄᤥᤛᤢᤶᤗᤥ॥ ᤕᤖᤢᤛᤗᤧ᤺ᤶᤔᤡᤴ ᤛᤍᤠᤍᤡᤱ ᤛᤣᤛᤣ ᤐᤥᤱᤗᤥ. ᤜᤧᤰᤁᤩᤠᤱ ᤘᤣ᤹ ᤗᤠᤈᤣ᤹ᤒᤠ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤧᤴ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤌᤱᤅᤥ ᤔᤧᤶᤓᤳᤋᤢᤴᤗᤥ॥

¹⁸ ᤂᤧᤴ ᤕᤧᤴᤏᤥ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ᤀᤥᤗᤠᤶ ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡᤜᤠ᤹ ᤘᤕᤢ ᤕᤢᤖᤥ. ᤜᤧᤰᤁᤩᤠᤱ ᤌᤧᤃᤢ ᤔᤠᤱᤘᤠᤜᤠ᤹ᤗᤠᤶ ᤐᤡᤳᤏᤢ ᤁᤢᤱᤔᤠ ᤜᤣ᤺ᤰᤗᤥ ᤕᤜᤢᤍᤠᤒᤠ ᤁᤧᤖᤧᤰ ᤐᤠᤰᤗᤢᤶᤗᤢᤶᤒᤠᤍᤧᤴᤜᤠ᤹ᤀᤥ ᤆᤫᤠ᤺ᤳ ᤗᤠᤱᤄᤣ᤺ᤰᤗᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤗᤠᤶ ᤆᤫᤠ᤺ᤳ ᤘᤍᤢᤴᤍᤠᤰᤘᤠ ᤌᤡᤰ ᤗ᤺ᤴᤗᤥ ᤜᤧᤰᤁᤩᤠᤱ ᤛᤡᤳᤋᤡᤔᤒᤠ ᤏᤧᤏᤧᤒᤠᤍᤧᤴᤏᤡᤴ ᤘᤠᤖᤰᤂᤢᤖᤥ॥

¹⁹ “ᤁᤖ ᤕᤜᤢᤍᤠᤒᤠ ᤔᤏᤠᤜᤠ᤹ ᤔᤧᤕᤢᤰᤋᤢᤛᤡᤀᤠᤱ ᤁᤢᤍᤥ᤺ᤵᤔᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡ᤹ ᤔᤧᤛᤧᤛᤢᤀᤠᤱ ᤘᤕᤧᤒᤧᤸᤗᤧ ᤆᤥᤃᤢᤸᤗᤧ. ᤔᤡᤛᤪ ᤗᤠᤈᤣᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤐᤥᤱᤗᤥ. ᤜᤧᤰᤁᤩᤠᤱ ᤀᤣᤍᤥᤔᤧᤴ ᤌᤣᤏᤠᤎᤣᤒᤠ ᤕᤧ᤺ᤱᤄᤠᤍᤧᤴ ᤐᤥᤱᤗᤥ॥

²⁰ ᤁᤖ ᤕᤜᤢᤍᤠᤴ ᤛᤍᤠᤍᤡᤱᤗᤧ ᤗᤠᤃᤡ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤱᤔᤠᤍᤧᤴ ᤐᤥᤱᤗᤥ ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤡᤴ ᤌᤠ᤺ᤰᤌᤠ᤺ᤰ ᤌᤠᤖᤡᤰ ᤕᤢᤰᤏᤠᤍᤧᤴ ᤐᤥᤱᤗᤥ॥

²¹ ᤂᤧᤴ ᤔᤏᤠᤜᤠ᤹ᤖᤧ ᤔᤠᤰᤂᤡ᤹ ᤔᤧᤛᤧᤛᤢᤒᤠ. ᤂᤢᤴᤇᤡ᤹ ᤀᤠᤵᤋᤡᤰᤁᤡᤴ ᤗᤧᤵᤔᤡ ᤔᤧᤶᤒᤡᤀᤣ ᤁᤳᤋᤢᤱᤛᤡᤱᤗᤥ. ᤀᤠᤱᤃᤠ᤹ ᤂᤢᤴᤇᤡ᤹ ᤂᤧᤴ ᤀᤠᤵᤋᤡᤰᤁᤡᤴ ᤗᤧᤵᤔᤡ ᤔᤧᤒᤡᤖᤢᤱᤛᤡᤱᤅᤡᤸᤗᤥ॥” ᤕᤜᤘᤣ ᤍᤠᤱᤒᤧᤴ ᤛᤡᤕᤥᤏ ᤁᤥ᤺ᤰᤔᤠᤀᤥ ᤕᤢᤱᤗᤥ॥