ᤕᤥᤀᤣᤗ 2 - LIFOTNTᤏᤡ᤺ᤱᤄᤢᤰᤘᤠ ᤐᤴᤈᤩᤠᤱᤔᤠ 1 ᤛᤡᤕᤥᤏᤀᤥ ᤌᤢᤳᤋᤢᤖᤡ᤺ᤵᤐᤠ ᤔᤢ᤺ᤳᤋᤧᤶᤔᤧ᤹ᤀᤥ. ᤀᤠᤛᤣᤛᤣ ᤁᤥ᤺ᤰᤔᤠᤗᤠᤶ ᤛᤠᤶᤍᤡᤱ ᤀᤡᤰᤗᤠ ᤛᤧᤛᤧᤶᤔᤧ᤹ᤀᤥ॥ ᤗᤠᤈᤣ᤹ᤀᤥ ᤁᤧᤕᤢᤱᤒᤠᤜᤠ᤹ ᤆᤡᤖᤡᤶᤗᤡᤶᤏᤠ ᤔᤧᤕᤱᤗᤖᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤧᤴᤏᤡᤴ ᤋᤠᤖ ᤐᤳᤗᤥ. ᤂᤧᤴ ᤕᤧᤴᤏᤡᤴ ᤛᤠ᤹ᤖᤡᤰ ᤏᤡ᤺ᤳᤋᤠᤱᤅᤣ ᤘᤠ᤹ᤖᤥ. 2 ᤂᤠᤃᤧᤔᤠᤰᤐᤠ ᤏᤢ ᤔᤢᤍᤥᤂᤠᤶᤍᤥᤒᤠ ᤕᤧᤴ ᤐᤥᤱᤗᤥ. ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤏᤢ ᤔᤢᤃᤧᤍ᤺ᤶᤒᤠ ᤕᤧᤴ ᤐᤥᤱᤗᤥ॥ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢᤜᤠ᤹ᤀᤥ ᤂᤠᤀᤥ᤺ᤵᤔᤠᤴ ᤛᤧᤒᤠ ᤜᤧᤰᤁᤣ ᤔᤢᤰᤁᤧᤃᤢᤒᤠ ᤌᤰᤛᤢᤒᤠᤜᤠ᤹ ᤁᤢᤀᤡᤛᤡᤰ ᤛᤠ᤹ᤖᤡᤰ ᤕᤖᤡᤰ ᤏᤡ᤺ᤱᤄᤢᤰᤘᤠᤜᤠ᤹ ᤔᤧᤍᤠᤖᤥ॥ ᤋᤃᤡ ᤜᤧᤰᤋᤱᤒᤠ ᤀᤠᤵᤑᤠᤸᤗᤧᤀᤠᤱ ᤔᤧᤶᤒᤥᤱᤅᤣ ᤘᤕᤧᤖᤥ ᤜᤧᤰᤁᤩᤠᤱ ᤕᤠᤶᤔᤥ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤀᤠᤓᤧᤸᤗᤧᤀᤠᤱ ᤔᤧᤒᤥᤱᤏᤧᤴᤗᤥ॥ 3 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤋᤃᤡ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤣᤃᤠᤱ ᤀᤣᤃᤠᤱ ᤔᤡᤎᤢᤱ ᤔᤡᤖᤠ᤺ᤰ ᤋᤡ᤺ᤳᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤠᤱ ᤂᤠᤶᤒᤠᤱᤅᤡᤴ ᤀᤍᤏᤒᤠ ᤛᤡᤱᤛᤣ᤹ᤀᤡᤰ ᤜᤧᤰᤋᤱᤒᤠ ᤆᤥᤰᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤣᤃᤠᤱ ᤔᤢᤖᤧ᤺ᤰ ᤂᤧᤖᤧ᤺ᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤜᤧᤰᤋᤱᤒᤠ ᤆᤥᤰᤗᤥ. ᤂᤧᤱᤜᤠ᤹ᤀᤥᤗᤠᤶ ᤌᤣ᤺ᤴᤏᤠᤱ ᤂᤧᤳᤇᤡᤱᤔᤠ ᤔᤧᤛᤢᤰᤏᤧᤴᤗᤥ॥ 4 ᤂᤧᤱᤜᤠ᤹ ᤀᤴᤏᤡᤸᤗᤧ ᤁᤢᤏᤠᤖᤠ ᤜᤧᤰᤋᤱᤒᤠ ᤏᤡᤔᤧᤎᤠ᤺ᤵᤗᤥ ᤜᤧᤰᤁᤩᤠᤱ ᤌᤱᤅᤥᤒᤠ ᤀᤴᤜᤠ᤹ ᤜᤧᤰᤁᤣ ᤔᤧᤗᤥ᤺ᤰᤗᤥ॥ 5 ᤀᤴᤗᤠᤎᤠᤜᤠ᤹ ᤁᤢᤍᤢᤱᤍᤢᤱᤏᤠ ᤔᤧᤗᤥ᤺ᤰᤐᤠ ᤀᤡᤰᤗᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤁᤥ᤺ᤰᤔᤠ ᤑᤠᤱᤈᤱ ᤛᤶᤎᤠᤱ ᤔᤧᤗᤥ᤺ᤰᤗᤥ. ᤛᤡᤱᤔᤢᤈᤡ᤹ᤜᤠ᤹ ᤔᤡᤃᤧᤎᤡᤱᤒᤠ ᤔᤡᤴ ᤗᤠᤀᤡᤰᤐᤠ ᤁᤢᤀᤡᤛᤡᤰ ᤌᤰᤛᤢᤒᤠᤜᤠ᤹ ᤋᤧᤴᤎᤱ ᤆᤥ᤺ᤰᤛᤧ ᤔᤧᤒᤣ᤺ᤰᤁᤡᤸᤗᤧ ᤌᤢᤖᤢᤵᤗᤢᤵ ᤗ᤹ᤖᤡᤰ ᤁᤧᤗ᤺ᤶᤒᤠ ᤀᤡᤰᤗᤠ ᤜᤧᤰᤋᤱᤒᤠ ᤐᤥᤱᤗᤥ॥ 6 ᤂᤧᤱᤜᤠ᤹ ᤔᤧᤏᤡᤛᤢᤛᤡᤀᤠᤱ ᤔᤧᤴᤇᤠᤶ ᤛᤢᤘᤠᤱᤘᤠᤜᤠ᤹ ᤁᤡᤔᤠ ᤕᤱᤔᤥ ᤔᤧᤎᤠᤖᤥ. ᤁᤧᤖᤧᤰᤗᤧ ᤂᤢᤴᤇᤡ᤹ ᤏᤠᤖᤠᤜᤠ᤹ ᤀᤶᤃᤧᤗ᤹ᤒᤠ ᤐᤥᤱᤗᤥ॥ 7 ᤌᤰᤛᤢᤒᤠᤜᤠ᤹ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤔᤧᤓᤳᤋᤢᤛᤡᤖᤥ. ᤌᤰᤗᤡᤜᤠᤱᤜᤠ᤹ ᤜᤧᤰᤁᤣ ᤂᤧᤱᤜᤠ᤹ᤖᤧ ᤗᤢᤱᤎᤠᤰᤁᤡᤴ ᤔᤧᤗᤡᤅᤢᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧ᤺ᤰᤐᤧᤵᤐᤠ ᤋᤡ᤺ᤰᤗᤠ᤺ᤴ ᤑᤧᤳᤔᤧᤴᤗᤠ᤺ᤴᤍᤢᤴᤗᤥ. ᤁᤧᤖᤧᤰ ᤗᤳᤇᤠ ᤋᤡ᤺ᤰᤗᤠᤀᤥ ᤐᤧᤴᤒᤧᤴ ᤗᤠᤱᤔᤧᤄᤣ᤺ᤰᤗᤥ॥ 8 ᤂᤧᤱᤜᤠ᤹ᤖᤧ ᤌᤡᤰᤜᤠ᤹ᤖᤧ ᤘᤣ᤹ᤜᤠ᤹ ᤔᤧᤈᤴᤍᤢᤛᤡᤖ ᤗᤠᤱᤔᤧᤱᤄᤣ᤺ᤰᤏᤧᤴᤗᤥ ᤁᤧᤖᤧᤰ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤋᤡ᤺ᤰᤗᤠᤀᤥ ᤋᤃᤡ ᤔᤧᤒᤣ᤺ᤰᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤋᤡ᤺ᤰᤗᤠᤴ ᤑᤧᤳᤔᤧᤸᤗᤠ᤺ᤴᤏᤣ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤕᤰᤜᤠ᤹ ᤔᤧᤗᤡᤛᤢ ᤔᤧᤍᤣ᤹ᤖᤢᤖᤥ॥ 9 ᤂᤧᤱᤜᤠ᤹ᤖᤧ ᤕᤧᤰᤕᤰᤜᤠ᤹ ᤌᤱᤅᤥ ᤔᤧᤓᤳᤋᤢᤖᤥ. ᤂᤧᤱᤜᤠ᤹ ᤗᤢᤱᤎᤠᤰᤁᤣ ᤗᤢᤱᤎᤠᤰ ᤛᤶᤎᤠᤱ ᤌᤥᤎᤥ ᤔᤧᤗᤥ᤺ᤰᤗᤥ॥ ᤂᤢ᤺ᤴᤍᤪᤡᤰᤐᤠᤜᤠ᤹ ᤐᤣᤎᤠ᤺ᤵᤜᤠ᤹ᤀᤥᤗᤠᤶ ᤛᤡᤃᤠᤱ ᤔᤧᤗᤠ᤺ᤵᤐᤠ ᤜᤧᤰᤁᤣ ᤂᤧᤱᤜᤠ᤹ᤖᤧ ᤜᤡᤶᤜᤠ᤹ ᤁᤢᤛᤶᤎᤠᤱ ᤔᤧᤗᤡᤅᤢᤀᤠᤱ ᤔᤧᤗᤠ᤺ᤳᤗᤥ॥ 10 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤢᤴᤗᤥ. ᤜᤧᤰᤁᤩᤠᤱ ᤋᤠᤱᤛᤠᤱᤒᤧᤴ ᤌᤧᤃᤰᤁᤰᤏᤠ ᤕᤱᤗᤥ॥ ᤏᤠᤶᤔᤡᤴ ᤏᤢ ᤗᤠᤒᤠᤴ ᤔᤠᤰᤛᤡ᤺ᤃᤩᤠ᤺ᤵᤐᤠ ᤐᤥᤱᤛᤡᤖᤥ ᤜᤧᤰᤁᤩᤠᤱ ᤂᤣ᤺ᤶᤛᤡᤰᤐᤠᤜᤠ᤹ ᤀᤥ᤺ᤵᤔᤠ ᤔᤧᤏᤠ᤹ᤖᤥ॥ 11 ᤕᤜᤘᤣ ᤍᤠᤱᤒᤧᤴ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤜᤢ᤺ᤰᤗᤥ. ᤂᤢᤏᤧ᤹ ᤁᤢᤎᤰᤛᤢᤒᤠ ᤋᤢᤖᤠᤜᤠ᤹ ᤏᤡ᤺ᤳᤔᤧᤴᤍᤧᤳᤋᤣ ᤕᤖᤡᤰ ᤔᤧᤘᤠ᤹ᤖᤥ. ᤜᤧᤰᤁᤩᤠᤱ ᤁᤢᤀᤡᤱᤈᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ ᤔᤢᤰᤛᤠᤶᤛᤠᤒᤠ ᤔᤧᤈᤥᤰᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤧᤴᤏᤡᤴ ᤐᤕᤶ ᤕᤶᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤆᤠ᤹ᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤆᤥᤰᤗᤥ॥ ᤂᤧᤴ ᤜᤠ᤺ᤳᤗᤧ ᤌᤶᤔᤠ ᤛᤢᤰᤋᤢᤀᤠᤱᤒᤣ᥅ ᤕᤜᤘᤣ ᤍᤠᤱᤒᤧᤸᤗᤧ ᤔᤏᤠᤜᤠ᤹ ᤗᤠᤕᤥᤗᤠᤶ ᤜᤡᤶᤔᤠᤖᤧ ᤗᤠᤃᤡ ᤀᤢ᤺ᤳᤋᤢᤛᤡ 12 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣᤗ᤹ᤖᤡᤰ ᤀᤢᤘᤠ ᤆᤥᤃᤢᤖᤥ. “ᤀᤠᤸᤗᤥᤛᤠᤱ ᤂᤡᤏᤡ᤹ ᤀᤠᤵᤑᤣᤰ ᤁᤧᤖᤧᤰ ᤏᤡᤱᤘᤠ᤹ᤀᤥ ᤋ᤺ᤰᤏᤧᤳ ᤕᤢᤅᤧᤶᤔᤧ᤹ᤀᤠᤱ ᤜᤠᤒᤧᤶᤔᤧ᤹ᤖ ᤔᤧᤖᤡᤱ ᤌᤰᤋᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤱᤃᤠ᤹ ᤗᤧᤵᤔᤠᤱ ᤏᤢ᤺ᤰᤂᤧᤶᤔᤧ᤹ᤀᤥ॥” 13 ᤂᤡᤏᤡ᤹ ᤆᤠᤱᤅᤡᤴ ᤌᤧ᤺ᤰᤂᤧᤶᤔᤧ᤹ᤀᤠᤱᤃ ᤔᤣ᤺ᤴᤍᤢᤰᤗᤥ. ᤁᤖ ᤂᤡᤏᤡ᤹ ᤏᤡᤱᤘᤠ᤹ᤀᤥ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤢ᤺ᤰᤂᤧᤶᤔᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤁᤧᤗ᤹ᤒᤠ. ᤛᤠ᤹ᤖᤡᤰ ᤁᤧᤏᤢ᤹ᤒᤠ. ᤜᤠᤖᤠ ᤁᤢᤛᤡᤰ ᤔᤧᤶᤒᤥ᤺ᤰᤔᤏᤠᤒᤠ ᤏᤢ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤆᤥᤰᤗᤥ. ᤂᤶᤓᤩᤠᤱ ᤂᤢᤏᤧ᤹ ᤋᤢᤰᤂᤣ ᤗᤠᤰᤂᤣ ᤋᤠᤖᤢᤸᤗᤧ ᤁᤢᤏᤡᤱᤘᤠ᤹ ᤋᤢᤰᤗᤥ॥ 14 ᤜᤠᤃ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤡᤱᤘᤠ᤹ ᤋᤢᤰ ᤜᤧᤰᤁᤩᤠᤱ ᤁᤢᤏᤡᤱᤘᤠ᤹ ᤏᤢ᤺ᤰᤋᤢᤀᤠᤱ ᤂᤡᤏᤡ᤹ ᤔᤢ᤹ᤀᤡᤛᤠᤶ ᤁᤧᤒᤡᤖᤡ᤹— ᤂᤧᤒᤩᤠᤱ ᤂᤢᤏᤧ᤹ ᤁᤢᤗᤠᤃᤡ ᤂᤡᤏᤡ᤹ ᤁᤢᤈᤠ ᤛᤡᤍᤢᤱᤈᤓᤠᤜᤠ᤹ ᤏᤢ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠᤜᤠ᤹ ᤁᤧᤍᤥᤴᤍᤢᤶ᤹ ᤑᤠ᤹ᤀᤠᤱ ᤜᤠ᤺ᤳᤗᤧ ᤏᤡᤛᤢᤒᤣ᥅ 15 ᤛᤡᤕᤥᤏ ᤁᤥ᤺ᤰᤔᤠᤀᤥ ᤌᤢᤳᤋᤢᤖᤡᤵᤐᤠᤴ ᤔᤢ᤺ᤳᤋᤧᤶᤔᤧ᤹ᤀᤥ. ᤛᤣᤛᤣ ᤋ᤺ᤰᤏᤧᤳ ᤕᤢᤱᤔᤠᤖᤧ ᤗᤠᤃᤡ ᤀᤢᤘᤠ ᤆᤥᤃᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤛᤣᤛᤣ ᤆᤢᤶᤗᤢᤱ ᤕᤢᤱᤛᤧ ᤔᤏᤠᤜᤠ᤹ ᤀᤢ᤺ᤳᤋᤧᤶᤛᤡᤔᤧ᤹ᤀᤥ॥ 16 ᤔᤏᤠᤜᤠ᤹ ᤛᤢᤵᤛᤧᤶᤛᤡᤶᤔᤧ᤹. ᤆᤢᤶᤗᤢᤱᤅᤡᤴ ᤛᤣᤛᤣ ᤆᤥᤃᤧᤶᤔᤧ᤹ᤀᤥ. ᤗᤠᤶᤗᤥᤒᤠᤜᤠ᤹ ᤂᤡᤏᤡ᤹ ᤑᤢᤰᤂᤧᤶᤛᤡᤶᤔᤧ᤹ᤀᤥ. ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ ᤏᤢ ᤀᤠᤶᤒᤪᤧ᤺ᤱᤘᤠ ᤀᤅᤧ᤺ᤰᤘᤠᤜᤠ᤹ ᤑᤢᤰᤂᤧᤶᤛᤡᤶᤔᤧ᤹ᤀᤥ॥ ᤔᤣ᤺ᤰᤂᤡᤶ ᤁᤧᤈᤥ᤺ᤰᤐᤠ ᤏᤠᤗᤡᤛᤠᤱᤜᤠ᤹ ᤂᤢᤴᤇᤡ᤹ ᤕᤠᤰᤑᤠᤱᤅᤥᤗᤠᤶ ᤜᤧᤰᤁᤩᤠᤱ ᤛᤡᤛᤠᤔᤣ᤺ᤳᤜᤠ᤹ ᤂᤢᤴᤇᤡ᤹ ᤕᤠᤰᤑᤠᤱᤅᤥᤗᤠᤶ ᤔᤧᤗ᤺ᤴᤗᤖᤥ॥ 17 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤔᤠᤱᤜᤡᤶᤔᤥᤒᤠ ᤀᤠ᤺ᤶᤓᤥ᤹ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤗᤢᤶᤔᤥ ᤔᤧᤜᤠ᤺ᤵᤗᤖᤥ॥ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖ. “ᤕᤜᤘᤣ ᤍᤠᤱᤒᤠᤀᤣ. ᤁᤧᤔᤏᤠᤜᤠ᤹ ᤛᤧ᤺ᤵᤋᤧᤛᤧ᤹ᤀᤥ॥ ᤂᤧᤏᤧ᤹ ᤁᤧᤗᤰᤂᤥᤔᤠ ᤔᤏᤠᤜᤠ᤹ ᤁᤢᤏᤠᤔᤧᤴᤇᤠ᤹ ᤐᤥᤱᤔᤠ ᤆᤠᤜᤠᤰ ᤏᤢ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤗᤢᤶᤔᤥ ᤁᤢᤏᤠᤔᤧᤴᤇᤠ᤹ ᤐᤥᤱᤔᤠ ᤔᤧᤒᤠᤱᤄᤧᤛᤧᤴᤏᤧ᤹ᤀᤥ॥ ᤘᤣ᤹ ᤛᤢᤘᤠᤱᤒᤠ ᤔᤏᤠᤜᤠ᤹ᤖᤧ ᤌᤣᤀᤠᤱ ᤀᤰᤂᤣ ᤐᤠ᤺ᤵᤔᤠ ᤔᤧᤄᤥᤛᤢᤖᤒᤣ᥅ ‘ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤳᤋᤡ ᤘᤠ᤹ᤒᤣ᥅’” ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤠᤶᤔᤡᤴ ᤕᤠᤶᤔᤥ ᤆᤠᤃᤧᤏᤢ᤹ᤒᤠ ᤆᤥᤃᤢ᤹ 18 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤴ ᤁᤢᤗᤠᤈᤣ᤺ᤸᤗᤧ ᤗᤠᤃᤡ ᤁᤢᤏᤠᤃᤧᤜᤧᤶᤒᤠ ᤐᤥᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤒᤠᤅᤣ ᤁᤢᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤖᤥ॥ 19 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤏᤢᤃᤵ ᤐᤡᤖᤢᤛᤡᤖᤥ. “ᤁᤢᤈᤠ. ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡ ᤏᤢ ᤆᤤᤋᤢᤏ ᤏᤡ᤺ᤱᤃᤣ᤹ ᤜᤠᤰᤏᤡᤱᤗᤥ. ᤂᤧᤒᤩᤠᤱ ᤂᤡᤏᤡ᤹ ᤁᤧᤖᤧᤰ ᤛᤡᤰᤀᤣ᤺ᤵᤋᤢᤀᤠᤱ ᤁᤧᤄᤠᤛᤡᤖᤥ॥ ᤀᤠᤱᤃᤠ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤡᤏᤡ᤹ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤆᤠᤜᤠᤰ ᤐᤥᤱᤔᤠ ᤔᤧᤒᤠᤱᤏᤡᤱᤅᤡᤸᤗᤥ॥ 20 ᤌᤠᤱᤃᤧᤳ ᤗᤧᤵᤔᤠᤱᤗᤠᤶ ᤁᤧᤕᤢᤒᤠ ᤌᤰᤛᤢᤒᤠ ᤋᤢᤖᤠᤜᤠ᤹ ᤀᤠᤱᤃᤠ᤹ ᤂᤡᤏᤡ᤹ᤗᤠᤶ ᤔᤠ᤺ᤱᤄᤠ ᤏᤠ᤺ᤳᤋᤢᤱᤍᤣᤛᤢᤱᤛᤡᤱᤗᤥ. ᤔᤧᤴᤎᤥ᤺ᤱᤅᤣ ᤁᤧᤏᤧᤒᤠ ᤏᤢ ᤔᤢᤖᤧᤰ ᤂᤠᤖᤧᤰᤐᤠ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤂᤧᤱᤜᤠ᤹ ᤐᤢᤒᤣᤗᤠᤵᤛᤠ ᤏᤠ᤺ᤳᤋᤢᤱᤍᤣᤛᤢᤱᤛᤡᤱᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤒᤠ ᤋᤡ᤺ᤰᤗᤠᤜᤠ᤹ ᤁᤢᤛᤡᤘᤧᤳ ᤘᤖ᤺ᤱᤅᤥ ᤜᤧᤰᤁᤩᤠᤱ ᤀᤣᤃᤠᤱᤒᤠ ᤋᤡ᤺ᤰᤗᤠᤜᤠ᤹ ᤗᤢᤶᤒᤠᤱ ᤘᤖ᤺ᤱᤅᤥ ᤂᤧᤳᤋᤢᤱᤛᤡᤱᤗᤥ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤶᤛᤢᤔᤠ. ᤁᤡ᤺ᤰ ᤏᤠᤶᤔᤡᤴ ᤌᤠ᤺ᤱ ᤐᤥ᤺ᤰᤗᤥ॥” ᤛᤧᤰᤂᤠᤀᤣ ᤂᤢᤏᤧ᤹ ᤁᤡᤵᤔᤠ ᤁᤧᤄᤢᤒᤠ ᤕᤶᤒᤕᤶᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹ᤖᤥ॥ 21 “ᤗᤠᤈᤣ᤹ᤀᤣ. ᤔᤧᤃᤡᤛᤧᤴᤏᤧ᤹ᤀᤥ. ᤛ᤺ᤳᤋᤧ᤹ᤀᤠᤱ ᤕᤧᤕᤧ ᤗ᤹ᤖᤧᤀᤥ. ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤕᤶᤒᤕᤶᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹ᤖᤥ॥ 22 ᤋᤠᤶᤓᤢᤱ ᤌᤰᤛᤠᤛᤣ. ᤔᤧᤃᤡᤛᤧᤶᤔᤡᤴᤏᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤋᤠᤵᤔᤧᤖᤠ ᤆᤠᤖᤠᤶᤔᤠᤍᤧᤴᤜᤠ᤹ ᤛᤖᤣ᤺ᤰᤕᤠ᤺ᤵᤐᤠ ᤐᤥᤱᤗ ᤐᤳᤗᤥ॥ ᤛᤡᤱᤒᤢᤱᤜᤠ᤹ᤀᤥ ᤁᤢᤈᤠ᤹ ᤌᤥ᤺ᤰᤗ ᤐᤳᤗᤥ. ᤐ᤺ᤳᤇᤣᤸᤗᤧ ᤁᤢᤒᤢᤱᤜᤠ᤹ᤀᤥ ᤏᤢ ᤆᤧᤸᤗᤧᤰᤛᤣᤸᤗᤧ ᤁᤢᤒᤢᤱᤜᤠ᤹ᤀᤥ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤁᤢᤈᤠ᤹ᤜᤠ᤹ ᤌᤥ᤺ᤰᤗ ᤐᤳᤗᤥ॥ 23 ᤛᤡᤕᤥᤏ ᤁᤧᤕᤢᤱᤒᤠ ᤔᤏᤠᤛᤣ. ᤂᤡᤏᤡ᤹ ᤛ᤺ᤳᤋᤧᤶᤔᤧ᤹ᤀᤥ. ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤡᤱᤘᤠ᤹ ᤋᤠᤛᤠᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤆᤢᤱᤘᤠ᤺ᤶᤔᤥ ᤌᤠᤛᤢᤒᤠ ᤘᤜᤡᤳᤋᤡᤸᤗᤧ ᤂᤢᤏᤧ᤹ ᤏᤛᤠ᤺ᤴᤛᤠᤒᤠ ᤆᤥ᤺ᤰᤐᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤱ ᤐᤥᤱᤗᤥ॥ ᤂᤢᤏᤧ᤹ ᤋᤃᤡ ᤜᤧᤰᤁᤣᤀᤣ ᤆᤢᤱᤘᤠ᤺ᤶᤔᤠ ᤏᤢ ᤑᤢᤱᤘᤠ᤺ᤶᤔᤠ ᤕᤧᤶᤔᤥ ᤐᤠᤱᤃᤧᤴᤍᤡᤱ ᤘᤜᤡᤳᤋᤧᤴ ᤌᤩᤧᤖ ᤕᤠ᤺ᤴᤍᤢᤀᤠᤱ ᤘᤠ᤹ᤖᤥ॥ 24 ᤂᤧᤒᤩᤠᤱ ᤆᤠᤎᤠᤶᤔᤠ ᤗᤰᤂᤢᤶᤔᤡᤴ ᤆᤠᤜᤠ᤹ᤖᤧ ᤛᤎᤧᤰ ᤋᤡᤶᤗᤥ. ᤁᤢ᤺ᤴᤍᤠᤜᤠ᤹ ᤆᤧᤸᤗᤧᤰᤛᤣ᤹ ᤌᤡ ᤏᤢ ᤆᤤᤋᤢᤏ ᤏᤡ᤺ᤱᤃᤣᤸᤗᤧ ᤋᤡᤶᤔᤠᤱ ᤘᤧᤳᤗᤥ॥ 25 “ᤂᤧᤴ ᤋᤱᤒᤣᤜᤠ᤹ᤀᤥᤒᤠ ᤂᤡᤏᤡ᤹ ᤁᤢᤈᤠᤜᤠ᤹ ᤁᤢᤒᤴᤈᤩᤠᤱᤔᤠ ᤏᤡ᤺ᤱᤄᤢᤰᤘᤠ ᤆᤩᤠ᤺ᤰᤜᤠ᤹ᤖᤧ ᤔᤧᤈᤒᤠᤴ ᤁᤧᤘᤧᤶᤒᤠ ᤏᤡ᤺ᤱᤄᤢᤰᤘᤠᤜᤠ᤹ᤖᤧ ᤔᤧᤈᤒᤠᤴ. ᤕᤶᤒᤕᤶᤒᤠ ᤏᤡ᤺ᤱᤄᤢᤰᤘᤠᤜᤠ᤹ᤖᤧ ᤔᤧᤈᤒᤠᤴ. ᤜᤧᤰᤁᤩᤠᤱ ᤁᤢᤍᤢᤶᤛᤩᤠᤰ ᤏᤡ᤺ᤱᤄᤢᤰᤘᤠᤜᤠ᤹ᤖᤧ ᤔᤧᤈᤒᤠᤴ ᤀᤠᤱᤃᤠ᤹ ᤂᤡᤏᤡ᤹ ᤗᤢᤶᤔᤥ ᤐᤠᤱᤄᤢᤱᤛᤡᤱᤒᤠ ᤂᤧᤴ ᤕᤖᤡᤰ ᤀᤠᤎᤰᤛᤢᤒᤠᤜᤠ᤹ᤖᤧ ᤔᤧᤈᤒᤠᤴ ᤏᤢ᤺ᤰᤋᤢᤱ ᤐᤡᤏᤡᤱᤗᤥ॥ 26 ᤀᤠᤸᤗ ᤂᤡᤏᤡ᤹ ᤘᤧᤳᤋᤧᤛᤖᤧ ᤂᤠᤄᤠ ᤁᤢᤈᤠ ᤆᤠᤔᤠ ᤁᤧᤄᤥᤛᤢᤶᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤃᤡ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤠᤖᤠ ᤁᤧᤓᤥᤛᤢᤶᤗᤥ. ᤀᤠᤔᤏᤠᤜᤠ᤹ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤛᤡᤖᤡᤱᤔᤔᤥ ᤔᤧᤴᤎᤠᤏᤧᤴᤗᤥ॥ 27 ᤂᤧᤒᤩᤠᤱ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ ᤗᤢᤶᤔᤥ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ. ᤂᤶᤓᤩᤠᤱ ᤀᤠᤱᤃᤠ᤹ᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤋᤠᤱ ᤜᤥᤵ ᤑᤠ᤹ᤀᤠᤱ ᤁᤧᤏᤡᤛᤢᤶᤗᤥ. ᤀᤠᤔᤏᤠᤜᤠ᤹ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤛᤡᤖᤡᤱᤔᤔᤥ ᤔᤧᤴᤎᤠᤏᤧᤴᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤧᤴ 28 ᤂᤧᤴ ᤀᤣᤃᤠᤱ ᤀᤠᤕᤠᤶᤛᤠᤶᤔᤡᤴ ᤁᤧᤖᤧᤰ ᤔᤏᤠᤜᤠ᤹ ᤛᤶᤎᤠᤱ ᤐᤠᤱᤄᤢᤱᤗᤥ. ᤂᤡᤏᤡ᤹ ᤕᤧᤶᤒᤡᤳᤇᤠ ᤔᤧᤴᤇᤢᤔᤠᤛᤠᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤖᤥ॥ ᤂᤡᤏᤡ᤹ ᤂᤍᤠᤰᤔᤡ ᤔᤏᤠᤜᤠ᤹ᤖᤧ ᤋᤠ᤹ᤍᤡᤃᤧᤴ ᤛᤧᤵᤔᤠᤱ ᤔᤧᤔᤠᤰᤋᤢᤖᤥ. ᤜᤧᤰᤁᤩᤠᤱ ᤂᤡᤏᤡ᤹ ᤏᤠᤗᤡᤃᤧᤴ ᤌᤠᤱᤒᤧᤴ ᤔᤏᤠᤜᤠ᤹ᤖᤧ ᤛᤢᤑᤥ ᤔᤧᤏᤡᤛᤢᤖᤥ॥ 29 ᤂᤧᤴ ᤕᤧᤴᤜᤠ᤹ᤀᤥ ᤁᤧᤖᤧᤰ ᤛᤧᤘᤠᤖᤥᤒᤠ ᤛᤧᤘᤠᤖᤥᤔᤠᤜᤠ᤹ᤀᤥᤀᤠᤱ ᤀᤠᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤐᤠᤱᤄᤢᤱ ᤕᤢᤛᤢᤱᤗᤥ॥ 30 ᤀᤠᤱᤃᤠ᤹ ᤋᤖ᤺ᤱᤍᤡᤱ ᤋᤠᤱᤛᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤀᤥ᤺ᤴᤎᤠᤰᤋᤢᤱᤛᤡᤱᤗᤥ. ᤔᤠᤰᤂᤡ᤹ᤛᤡᤘᤠ. ᤔᤡ ᤏᤢ ᤂᤠᤶᤍ᤺ᤶᤒᤠ ᤔᤡ᤺ᤰᤂᤢ᤹ ᤀᤡᤰᤛᤡᤱᤗᤥ॥ 31 ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤐᤕᤶ ᤕᤶᤒᤠ ᤏᤢ ᤁᤡᤵᤔᤠᤃᤧᤄᤢᤒᤠ ᤁᤢᤕᤧᤴᤏᤡᤴ ᤋᤠᤔᤠᤏᤢ᤺ᤸᤗᤧ ᤋᤃᤡ ᤏᤠᤶᤔᤡᤴ ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤐᤥᤱᤗᤥ ᤜᤧᤰᤁᤩᤠᤱ ᤗᤠᤒᤠᤴ ᤔᤖᤠ᤺ᤰᤁᤩᤠ᤺ᤵᤐᤠ ᤔᤠᤰᤂᤡ᤹ᤀᤥ ᤗᤧᤱᤗᤥ॥ 32 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤐᤣᤗᤡ ᤁᤧᤓᤠᤰᤐᤠᤜᤠ᤹ ᤁᤧᤖᤧᤰ ᤔᤧᤜᤡᤱᤗᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤢ᤺ᤳᤋᤢᤛᤡᤒᤠᤜᤠ᤹ ᤛᤡᤕᤥᤏ ᤁᤥ᤺ᤰᤔᤠᤀᤥ ᤋᤠᤱᤔᤧᤛᤧ᤺ᤵᤗᤥ. ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹ᤒᤠ ᤀᤡᤛᤡ᤺ᤰ ᤋᤠᤱᤛᤧ᤺ᤵᤔᤠ ᤁᤧᤄᤥᤒᤠᤜᤠ᤹ᤖᤧ ᤕᤖᤢᤛᤗᤧᤔᤀᤥ ᤛᤧ᤺ᤵᤛᤡᤱᤔᤠᤍᤧᤴ ᤔᤧᤄᤥᤛᤢᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.