ᤕᤥᤀᤣᤗ 1 - LIFOTNTᤏᤡ᤺ᤱᤄᤢᤰᤘᤠᤜᤠ᤹ᤖᤧ ᤁᤢᤈᤠᤜᤠ᤹ ᤔᤧᤈ 1 ᤐᤋᤢᤀᤣᤗᤖᤧ ᤁᤢᤛ᤻ᤛᤠ ᤕᤥᤀᤣᤗᤀᤥ ᤁᤧᤖᤧᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱ॥ 2 ᤗᤠᤶᤗᤥᤒᤠᤛᤣ. ᤂᤡᤏᤡ᤹ ᤁᤴ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ. ᤗᤠᤈᤣ᤹ᤀᤥᤒᤠ ᤕᤰᤕᤢᤱᤒᤠᤛᤣ. ᤏᤢᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ॥ ᤌᤣ ᤂᤡᤏᤡ᤹ ᤕᤧᤶᤔᤥ ᤀᤡᤃᤪ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤔᤥ ᤀᤰᤋᤱᤒᤠ ᤐᤠᤴ ᤀᤠᤵᤑᤠᤸᤗᤧ ᤐᤥ᤺ᤰᤂᤧᤀᤠᤱ ᤘᤕᤧᤒᤣ᥅ 3 ᤂᤡᤏᤡ᤹ ᤛᤠᤀᤣᤜᤠ᤹ ᤁᤴ ᤐᤠ᤺ᤴᤏᤡᤴ ᤔᤧᤳᤋᤧᤶᤛᤡᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤡᤏᤡ᤹ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹ ᤔᤧᤔᤧᤳᤋᤢᤛᤡᤖᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤀᤣᤜᤠ᤹ᤖᤧ ᤂᤧᤴ ᤀᤣᤃᤠᤱᤒᤠ ᤌᤠ᤺ᤰᤜᤠ᤹ ᤔᤧᤔᤧᤳᤋᤢᤛᤡᤖᤖᤥ॥ 4 ᤁᤢᤒᤴᤈᤩᤠᤱᤔᤠ ᤏᤡ᤺ᤱᤄᤢᤰᤘᤠ ᤆᤩᤠ᤺ᤰᤜᤠ᤹ᤖᤧ ᤔᤧᤗᤧᤖᤢ ᤔᤧᤎᤒᤠᤴ ᤂᤧᤴ ᤁᤧᤘᤧᤶᤒᤠ ᤏᤡ᤺ᤱᤄᤢᤰᤘᤠᤜᤠ᤹ᤖᤧ ᤔᤧᤈᤖᤥ. ᤁᤧᤘᤧᤶᤒᤠ ᤏᤡ᤺ᤱᤄᤢᤰᤘᤠᤜᤠ᤹ᤖᤧ ᤔᤧᤗᤧᤖᤢ ᤔᤧᤎᤒᤠᤴ ᤂᤧᤴ ᤕᤶᤒᤕᤶᤒᤠ ᤏᤡ᤺ᤱᤄᤢᤰᤘᤠᤜᤠ᤹ᤖᤧ ᤔᤧᤈᤔᤧᤍᤣᤛᤢᤖᤥ. ᤕᤶᤒᤕᤶᤒᤠ ᤏᤡ᤺ᤱᤄᤢᤰᤘᤠᤜᤠ᤹ᤖᤧ ᤔᤧᤗᤧᤖᤢ ᤔᤧᤎᤒᤠᤴ ᤂᤧᤴ ᤁᤢᤍᤢᤶᤛᤩᤠᤰ ᤏᤡ᤺ᤱᤄᤢᤰᤘᤠᤜᤠ᤹ᤖᤧ ᤔᤧᤈᤔᤧᤍᤣᤛᤢᤖᤥ॥ 5 ᤌᤡ᤺ᤸᤗᤧ ᤁᤧᤔᤛᤡᤱᤒᤠᤛᤣ. ᤛᤥᤖᤧᤶᤔᤧ᤹ᤀᤠᤱ ᤜᤠᤒᤧᤶᤔᤧ᤹ᤀᤥ. ᤂᤡᤏᤡ᤹ ᤁᤧᤖᤧᤰ ᤆᤧᤸᤗᤧᤰᤛᤣ᤹ ᤌᤡ ᤁᤧᤎᤢᤱᤒᤠᤛᤣ॥ ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤗᤠᤃᤡ ᤔᤧᤖᤡᤱ ᤌᤰᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤜᤠᤒᤠ ᤂᤡᤏᤡ᤹ ᤔᤢᤖᤠᤀᤥᤗᤠᤶᤒᤠᤀᤣ ᤂᤡᤏᤡ᤹ ᤁᤧᤶᤏᤠᤵᤋᤡ ᤁᤧᤶᤍᤣ᤹ᤖᤡᤀᤠᤱ ᤘᤠ᤹ᤖᤥ॥ 6 ᤏᤡ᤺ᤳᤔᤧᤴᤍᤧᤳ ᤂᤠᤏᤡ᤺ᤳ ᤁᤧᤘᤠ᤹ᤒᤠ ᤔᤢᤰᤛᤠᤶᤛᤠᤒᤠ ᤔᤧᤴᤇᤠᤶ ᤛᤢᤘᤠᤱᤅᤡᤸᤗᤧ ᤀᤠᤗᤠᤈᤣᤴ ᤑᤳᤋᤢᤀᤠᤱ ᤘᤠ᤹ᤖᤥ॥ ᤂᤧᤸᤗᤧ ᤁᤢᤜᤠᤒᤥ᤹ᤒᤠᤜᤠ᤹ ᤂᤡᤖᤡᤱᤒᤠᤸᤗᤧᤴ ᤜᤧᤰᤁᤣ ᤗ᤹ᤖᤥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤃᤣᤱᤜᤠ᤹ ᤌᤧᤖᤡᤱᤔᤧᤸᤗᤧᤴ ᤜᤧᤰᤁᤣ ᤗ᤹ᤖᤥ॥ 7 ᤂᤧᤴ ᤛᤢᤘᤠᤱᤅᤡᤸᤗᤧ ᤀᤠᤈᤧᤸᤗᤧᤰᤛᤣ᤹ᤜᤠ᤹ ᤔᤢᤖᤧᤰ ᤂᤠᤖᤧᤰ ᤆᤥᤃᤢᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤐ᤺ᤳᤇᤣᤸᤗᤧ ᤁᤢᤒᤢᤱᤜᤠ᤹ ᤌᤩ᤺ᤱ ᤔᤧᤈᤥᤃᤢᤀᤠᤱ ᤕᤢᤱᤗᤥ ᤂᤧᤱᤜᤠ᤹ᤖᤧ ᤁᤢᤒᤥᤖᤠᤰᤜᤠ᤹ ᤑᤛᤢ᤺ᤰᤕᤠ᤺ᤵᤐᤠ ᤐᤥ᤺ᤰᤂᤧᤖ ᤌᤠᤖᤡᤰ ᤜᤠᤷᤍᤡᤰ ᤜᤠᤷᤍᤡᤰ ᤔᤧᤎᤡᤰᤋᤢᤀᤠᤱ ᤕᤢᤱᤗᤥ॥ 8 ᤔᤧᤴᤇ᤻ᤕᤠ ᤘᤠ᤹ᤒᤠ ᤕᤧᤶᤔᤥ ᤁᤧᤛᤡᤒᤠ ᤁᤢᤕᤧᤶᤒᤠ᤺ᤸᤗᤧ ᤗᤠᤃᤡ ᤛᤠᤃᤡ ᤆᤠᤱ ᤁᤧᤈᤠᤰᤛᤡᤱᤔᤠᤀᤠᤱ ᤔᤧᤖᤡᤱ ᤁᤧᤎᤰᤔᤠ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤴ ᤁᤢᤀᤡᤛᤡᤰ ᤂᤡᤏᤡ᤹ ᤜᤠᤒᤧᤶᤔᤧ᤹ᤀᤥ॥ 9 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤏᤢ ᤆᤧᤸᤗᤧᤰᤛᤣ᤹ ᤌᤡ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤏᤠ᤹ᤖᤧᤀᤠᤱ ᤘᤠ᤹ᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤠᤱᤛᤧᤘᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤔᤧᤖᤡᤱ ᤔᤧᤎᤰᤗᤥ॥ 10 ᤀᤡᤰᤋᤠᤵᤜᤠ᤹ ᤔᤢᤖᤧ᤺ᤰ ᤂᤧᤖᤧ᤺ᤰ ᤐᤥ᤺ᤰᤂᤧᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤗᤠᤈᤣ᤹ ᤛᤡᤱᤒᤢᤱᤅᤡᤴ ᤔᤧᤖᤡᤱ ᤌᤰᤁᤠᤱ ᤏᤧᤖᤥ॥ ᤐᤥᤃᤢᤃᤧᤴ ᤁᤢᤈᤠᤜᤠ᤹ ᤌᤣᤏᤠᤎᤣ ᤆᤠᤛᤥ᤺ᤰᤋᤧᤀᤠᤱ ᤏᤧᤖᤥ. ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡᤴ ᤛᤷᤃᤧᤱ ᤜᤣᤖᤧᤒᤣᤖᤥ. ᤆᤤᤋᤢᤏ ᤏᤡ᤺ᤱᤃᤣ᤹ᤀᤡᤴᤏᤠᤱ ᤘᤖᤧᤱᤗᤧᤱ ᤆᤒᤧᤄᤧᤖᤧᤖᤥ॥ 11 ᤕᤠ᤺ᤶᤒᤢᤖᤡᤒᤠᤛᤣ. ᤂᤡᤏᤡ᤹ ᤏᤡᤱᤘᤠ᤹ ᤋᤢᤰᤂᤣ ᤆᤩᤧᤶᤔᤧ᤹ᤀᤥ. ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤁᤧᤗᤣ᤺ᤵᤐᤠᤛᤣ. ᤔᤧᤖᤡᤱ ᤌᤰᤋᤧᤶᤔᤧ᤹ᤀᤥ॥ ᤔᤠᤛᤡ ᤏᤢ ᤜ᤺ᤰᤛᤡ᤺ᤸᤗᤧ ᤗᤠᤃᤡ ᤏᤡᤱᤛᤠᤱ ᤐᤢᤰᤔᤥ ᤌᤩᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤡᤰᤋᤠᤵᤐᤥᤒᤠ ᤆᤠ᤺ᤴ ᤌᤩ᤺ᤱ ᤐᤥ᤺ᤰᤂᤧᤀᤠᤱ ᤏᤧᤖᤥ॥ 12 ᤆᤧᤸᤗᤧᤰᤛᤣᤸᤗᤧ ᤁᤢᤒᤢᤱᤅᤡᤴ ᤜᤣᤖᤧᤒᤣᤀᤠᤱ ᤕᤢᤱᤗᤥ. ᤜᤧᤰᤁᤩᤠᤱ ᤐ᤺ᤳᤇᤣᤸᤗᤧ ᤁᤢᤒᤢᤱᤜᤠ᤹ ᤀᤡᤛᤢ᤹ᤖᤢᤒᤣᤀᤠᤱ ᤕᤢᤱᤗᤥ॥ ᤑᤢ᤹ᤗᤧᤛᤣ᤹. ᤕᤠᤖᤢᤶᤛᤣ᤹ ᤏᤢ ᤏᤠᤱᤛᤣᤸᤗᤧ ᤁᤢᤒᤢᤱᤜᤠ᤹. ᤀᤡᤃᤪ ᤀᤡᤰᤋᤠᤵᤐᤥᤒᤠ ᤁᤧᤖᤧᤰ ᤛᤡᤱᤒᤢᤱᤜᤠ᤹ ᤜᤣᤖᤧᤒᤣᤀᤠᤱ ᤕᤢᤱᤗᤥ॥ ᤛᤧᤰᤂᤠᤛᤠᤱ ᤔᤧᤴᤇᤠᤶ ᤛᤢᤘᤠᤱᤅᤡᤸᤗᤧ ᤁᤢᤛ᤺ᤵᤔᤠᤴ ᤜᤥᤵᤗᤥ॥ 13 ᤏᤡᤱᤘᤠ᤹ᤑᤢᤛᤠᤶᤒᤠᤛᤣ. ᤛᤃᤡᤋᤣᤳ ᤆᤠᤰᤂᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤂᤡᤏᤡ᤹ ᤔᤧᤖᤡᤱ ᤌᤰᤋᤧᤶᤔᤧ᤹ᤀᤥ. ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤠᤱᤛᤧᤘᤠ ᤁᤧᤈᤥ᤺ᤰᤐᤠᤛᤣ. ᤜᤠᤒᤧᤶᤔᤧ᤹ᤀᤥ॥ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠᤛᤣ. ᤂᤡᤏᤡ᤹ ᤛᤃᤡᤋᤣᤳ ᤆᤠᤰᤂᤧᤶᤔᤧ᤹ᤀᤠᤱ ᤏᤠᤶᤍᤠ᤺ᤳᤇᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤜᤠ᤹ ᤏᤢ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤶᤔᤠ ᤔᤧᤗᤧᤖᤢᤀᤠᤱ ᤘᤠ᤹ᤖᤥ॥ 14 ᤛᤣᤛᤣ ᤋ᤺ᤰᤏᤧᤳ ᤕᤢᤱᤔᤠᤖᤧ ᤗᤠᤃᤡ ᤀᤢᤘᤠ ᤆᤥᤃᤧᤶᤔᤧ᤹ᤀᤥ. ᤛᤣᤛᤣ ᤆᤢᤶᤗᤢᤱ ᤕᤢᤱᤛᤧ ᤔᤏᤠᤜᤠ᤹ ᤀᤢ᤺ᤳᤋᤧᤶᤛᤡᤶᤔᤧ᤹ᤀᤥ॥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤗᤠᤈᤣ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤏᤢ ᤗᤠᤶᤗᤥᤒᤠᤜᤠ᤹ ᤛᤢᤵᤛᤧᤶᤛᤧ᤹ᤀᤥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤑᤠᤰᤋᤧᤶᤔᤧ᤹ᤀᤥ᥄ 15 ᤂᤧᤴ ᤕᤧᤴᤏᤡᤸᤗᤧ ᤗᤠᤃᤡᤃ. ᤏᤠ᤹ᤖᤠᤱᤛᤩᤠᤱᤗᤥ᥄ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤧᤴᤏᤡᤴ ᤏᤡ᤺ᤳᤋᤠᤱ ᤘᤠ᤹ᤖᤥ. ᤔᤢᤰᤛᤠᤶᤍᤠᤱᤒᤧᤴ ᤗᤠᤶᤒᤠ ᤂᤧᤴ ᤂᤠᤵᤐᤢᤌᤩ᤺ᤱ ᤐᤥᤱᤒᤠ ᤁᤢᤀᤡᤛᤡᤰ ᤋᤠᤖᤥ॥ 16 ᤆᤠᤔᤠ ᤁᤢᤈᤠᤴ ᤌᤣ ᤀᤠᤏᤡ᤹ ᤔᤡᤰ ᤋᤃᤡᤀᤣ ᤔᤧᤔᤧᤃᤣᤴᤒᤡ᥅ ᤛ᤺ᤵᤔᤠ ᤀᤣ᤺ᤵᤔᤠ ᤜᤧᤰᤁᤩᤠᤱ ᤜᤠᤱᤜᤠᤱ ᤗ᤹ᤔᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤔᤧᤛᤠᤰᤋᤢᤀᤠᤱ ᤔᤧᤘᤠ᤹ᤏᤧᤶᤒᤡ᥅ 17 ᤕᤠ᤹ᤖᤡ᤺ᤶᤒᤠᤜᤠ᤹ ᤂᤠᤶᤒᤠᤱᤅᤥᤒᤠ ᤂᤠᤶᤒᤢᤰᤏᤠ ᤛᤡᤃᤠᤱ ᤀᤡᤛᤢ᤹ᤖᤥ. ᤆᤠᤎᤠ᤺ᤱᤜᤠ᤹ ᤁᤢᤈᤠ ᤔᤣ᤺ᤴᤏᤣ ᤜᤱᤒᤧᤳ ᤔᤧᤈᤥᤃᤢᤖᤥ. ᤐᤥᤃᤢᤃᤧᤴ ᤁᤢᤈᤠ ᤕᤠᤱᤔᤠ ᤌᤠ᤺ᤱᤜᤠ᤹ ᤔᤧᤃᤧᤖᤥ ᤌᤣᤀᤠᤱᤓᤧᤸᤗᤧ ᤐᤥᤃᤢᤃᤧᤴ ᤁᤢᤈᤠᤜᤠ᤹ ᤜᤣᤖᤧᤒᤣᤖᤥ॥ 18 ᤌᤰᤛᤠᤗᤢᤵᤜᤠ᤹ ᤀᤠᤰᤂᤣᤗ᤹ᤖᤡᤰ ᤔᤧᤕᤠ᤺ᤵᤐᤣ᥄ ᤐᤡᤵᤔᤠ ᤐᤡᤳ ᤗᤢᤵᤜᤠ᤹ ᤋᤠᤰᤔᤧᤃᤴᤏᤠᤱ ᤔᤧᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤗᤠᤃᤡ ᤆᤠᤖᤠᤶᤍᤧᤴ ᤜᤥᤵᤗᤥ ᤔᤧᤸᤗᤢᤰ ᤗᤢᤵᤜᤠ᤹ᤖᤧᤀᤠᤱ ᤁᤧᤛᤠᤰᤐᤠ ᤔᤧᤍᤢᤔᤢᤀᤠᤱ ᤔᤧᤘᤠ᤹ᤖᤥ॥ 19 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤐᤣᤗᤡ ᤑᤠᤰᤏᤧᤖᤥ ᤌᤣᤀᤠᤱᤓᤧᤸᤗᤧ ᤆᤠᤖᤠᤶᤍᤧᤴᤜᤠ᤹ ᤔᤡ᤺ᤸᤗᤧ ᤌᤩ᤺ᤱ ᤆᤥᤃᤢᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤔᤡᤖᤠ᤺ᤰᤁᤧᤸᤗᤧ ᤀᤡᤰᤋᤠᤵᤐᤥᤒᤠ ᤛᤡᤱᤒᤢᤱᤜᤠ᤹ ᤔᤡᤍᤡᤃᤧᤀᤠᤱ ᤕᤢᤱᤗᤥ॥ 20 ᤋᤠᤶᤓᤢᤱᤅᤥᤒᤠ ᤌᤰᤛᤠᤜᤠ᤹ᤖᤧᤀᤠᤱ ᤂᤧᤏᤧ᤹ ᤐᤣᤗᤡ ᤁᤧᤶᤓᤠᤰᤗᤥ. ᤌᤣᤀᤠᤱᤓᤧᤸᤗᤧ ᤘᤜ᤺ᤱᤅᤥᤒᤠ ᤆᤫᤠ᤺ᤳᤜᤠ᤹ ᤜᤣᤖᤧ ᤆᤒᤧᤀᤠᤱ ᤏᤧᤖᤥ. ᤂᤶᤓᤩᤠᤱ ᤋᤠᤶᤍᤠᤶᤒᤠ ᤆᤠᤖᤠᤶᤍᤧᤴᤜᤠ᤹ ᤔᤡ᤺ᤸᤗᤧ ᤌᤩ᤺ᤱ ᤆᤥᤃᤢᤀᤠᤱ ᤏᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.