ᤀᤕᤢᤒ 9 - LIFOTNTᤀᤕᤢᤒᤖᤧ ᤐᤠ᤺ᤳᤋᤢ— 1-2 ᤀᤥᤖᤥ. ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤋᤃᤡᤀᤠᤱᤎᤥᤀᤣ ᤀᤠᤱᤃᤠ᤹ ᤂᤧᤵᤛᤢᤱ ᤛᤢᤖᤢᤱᤅᤠᤱ ᤘᤠ᤹ᤀᤠᤖᤥ॥ ᤁᤖ ᤔᤏᤠᤴ ᤀᤠᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤛᤠᤶᤕᤥᤒᤠ ᤗᤣ᤺ᤳᤇᤡᤱᤅᤡᤖᤥ᥅ 3 ᤀᤠᤳᤋᤡᤸᤗᤧᤀᤠᤱ ᤂᤢᤏᤧ᤹ᤏᤢ ᤐᤠ᤺ᤴᤎᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤴᤗᤥ. ᤂᤢᤏᤧ᤹ ᤜᤧᤴᤇᤡᤱ ᤜᤧᤴᤇᤡᤱ ᤛᤣ᤺ᤴᤍᤥᤜᤠ᤹ ᤛᤣ᤺ᤸᤗᤠᤵᤔᤠ ᤀᤠᤛᤢᤰᤗᤥ. ᤁᤖ ᤀᤠᤳᤋᤡᤸᤗᤧᤀᤠᤱ ᤗᤳᤇᤠ ᤏᤢᤃᤵ ᤐᤡᤔᤠ ᤔᤧᤛᤢᤰᤋᤢᤴᤗᤥ॥ 4 ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤛᤠ᤹ᤖᤡᤰ ᤛᤡᤰᤁᤢᤶᤛᤠᤒᤠ ᤏᤢ ᤔᤢᤰᤛᤠᤶᤛᤠᤒᤠ ᤆᤥᤰᤗᤥ ᤀᤠᤳᤋᤡᤴ ᤔᤏᤠ᤺ᤸᤗᤧ ᤂᤢᤏᤧ᤹ ᤀᤳᤋᤢᤀᤠᤱ ᤋᤠᤱᤛᤧ᤺ᤵᤛᤡᤱᤔᤠ ᤛᤢᤰᤐᤣ᥅ 5 ᤜᤠ᤺ᤳᤋᤠᤱ ᤏᤡᤱᤘᤠ᤹ ᤔᤧᤶᤒᤡᤀᤣ ᤂᤢᤏᤧ᤹ ᤏᤠᤱᤈᤱᤗᤢᤱᤜᤠ᤹ ᤂᤧᤳᤋᤢᤍᤣᤛᤢᤖᤥ ᤜᤧᤰᤁᤩᤠᤱ ᤁᤢᤛᤡᤰ ᤐᤥ᤺ᤰᤔᤥ ᤂᤢᤏᤧ᤹ ᤂᤧᤱᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ॥ 6 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤵᤗᤡ ᤌᤠᤱᤗ ᤕᤠ᤺ᤴᤍᤢᤖᤥ ᤜᤧᤰᤁᤩᤠᤱ ᤂᤠᤶᤒᤣ᤺ᤰᤔᤠᤴ ᤌᤢᤖᤢᤵᤗᤢᤵᤏᤠ ᤕᤰᤂᤢᤖᤥ॥ ᤂᤧᤶᤒᤩᤠᤱ ᤕᤥ᤹ᤒᤠᤗᤠᤈᤣ᤹ ᤁᤧᤍᤰᤐᤠ ᤛᤡᤳᤗᤠᤱᤜᤠ᤹ ᤂᤢᤏᤧ᤹ᤀᤣ ᤘᤠ᤺ᤴᤍᤢᤖᤥ॥ 7 ᤂᤢᤏᤧ᤹ ᤋᤠᤏᤠᤶ ᤏᤠᤶ ᤔᤧᤱᤃᤧᤵᤔᤠ ᤀᤡᤱᤈᤠᤱ ᤆᤥᤃᤢᤖᤥ ᤜᤧᤰᤁᤩᤠᤱ ᤛᤧᤴᤍᤡᤰ ᤂᤣᤛᤣᤔᤡᤰᤐᤠᤜᤠ᤹ ᤀᤥ᤺ᤵᤔᤠᤗᤠᤶ ᤛᤠᤰᤔᤠ ᤛᤢᤰᤋᤢᤛᤡᤖᤥ॥ 8 ᤂᤢᤏᤧ᤹ᤀᤣ ᤋᤠᤱᤛᤠᤰᤐᤠᤴ ᤑᤳᤇᤢᤒᤠᤖᤥ ᤂᤧᤒᤩᤠᤱ ᤘᤖ᤺ᤱ ᤘᤠᤓᤧᤸᤗᤧᤱ ᤛᤶᤎᤠᤱ ᤋᤥ᤹ᤖᤢᤖᤥ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤜᤠ᤺ᤳᤗᤧᤀᤠᤱ ᤁᤢᤓᤠ᤹ ᤔᤧᤶᤒᤡᤖᤢᤴᤗᤥ॥ 9 ᤂᤢᤏᤧ᤹ ᤔᤧᤴᤇ᤻ᤕᤠ ᤐᤢᤖᤢᤰᤔᤠ. ᤗᤡᤛᤢᤖᤡ ᤏᤢ ᤔᤠᤱᤕᤢᤰᤜᤠ᤹ ᤆᤥᤃᤢᤛᤡᤖᤥ ᤜᤧᤰᤁᤩᤠᤱ ᤋᤧᤔᤧᤴᤍᤡᤱ ᤗᤠᤱᤃᤧᤳᤐᤠ ᤂᤣᤛᤣ ᤂᤣ᤺ᤶᤛᤡᤰ ᤗᤢᤵᤜᤠ᤹ ᤋᤠᤱᤛᤠᤰᤐᤠᤀᤥ ᤑᤳᤇᤢᤛᤡᤖᤥ॥ 10 ᤂᤢᤏᤧ᤹ ᤆᤥᤃᤢᤒᤠ ᤐᤕᤶ ᤕᤶᤒᤠ ᤕᤠ᤺ᤶᤒᤰᤜᤠ᤹ ᤀᤠᤏᤡ᤹ ᤁᤢᤛᤡᤱ ᤏᤡ᤺ᤵᤔᤠ ᤀᤠᤴᤇᤢᤰᤋᤢᤶᤔᤡᤸᤗᤥ॥ ᤏᤡᤱᤘᤠ᤹ ᤁᤧᤔᤠᤒᤠ ᤂᤢᤏᤧ᤹ ᤁᤢᤕᤠ᤺ᤶᤒᤰᤜᤠ᤹ᤖᤧ ᤁᤢᤏᤢᤵᤔᤠ ᤜᤥᤵᤗᤥ॥ 11 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤱᤃᤠ᤹ ᤀᤠᤒᤣᤛᤠᤱᤗᤠᤶ ᤐᤥᤱᤅᤠᤱ ᤐᤣ᤺ᤰᤗᤥ. ᤁᤖ ᤀᤠᤱᤃᤠ᤹ ᤂᤢᤏᤧ᤹ ᤏᤡᤔᤠ ᤔᤧᤛᤢᤰᤁᤠᤴᤗᤥ॥ 12 ᤂᤢᤏᤧ᤹ ᤌᤣ ᤏᤠᤵᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤴ ᤂᤢᤏᤧ᤹ ᤏᤠᤵᤋᤢᤛᤡᤀᤣᤖᤥ. ᤜᤠ᤺ᤳᤗᤧᤀᤠᤱ ᤂᤢᤏᤧ᤹ ᤛᤠᤰᤔᤠ ᤔᤧᤛᤢᤰᤋᤢᤴᤗᤥ. “ᤁᤴ ᤂᤧᤏᤧ᤹ ᤌᤣ ᤁᤧᤈᤥᤃᤢᤒᤠ᥅” ᤑᤠ᤹ᤀᤠᤱ ᤜᤠ᤺ᤳᤗᤧᤀᤠᤱ ᤂᤢᤏᤧ᤹ ᤛᤣ᤺ᤴᤗᤠᤵᤔᤠ ᤔᤧᤴᤇᤢᤰᤋᤢᤴᤗᤥ॥ 13 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰ ᤐᤥ᤺ᤰᤔᤠᤴ ᤔᤧᤈᤡ᤺ᤰᤋᤢᤸᤗᤥ॥ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠ ᤂᤧᤴ ᤁᤡᤵᤔᤠᤃᤧᤄᤢᤒᤠ ᤘᤖ᤺ᤱᤅᤥᤒᤠ ᤌᤰᤛᤠ ᤖᤠᤜᤠᤒᤧᤴ ᤁᤧᤓᤠ᤹ᤒᤠᤜᤠ᤹ ᤁᤧᤖᤧᤰ ᤂᤢᤏᤧ᤹ ᤔᤧᤰᤂᤢᤛᤡᤖᤥ॥ 14 ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤀᤠᤓᤣᤗ᤹ᤖᤡᤰ ᤂᤣᤔᤠ ᤛᤢᤰᤁᤠᤒᤣ᥅ ᤀᤡᤃᤪ ᤀᤠᤱᤃᤠ᤹ ᤀᤠᤰᤂᤣᤗ᤹ᤖᤡᤰ ᤂᤢᤏᤧ᤹ ᤏᤢᤃᤵ ᤐᤡᤔᤠ ᤐᤠ᤺ᤴᤜᤠ᤹ ᤂᤥᤔᤠ ᤛᤢᤰᤋᤢᤱᤒᤣ᥅ 15 ᤀᤠᤱᤃᤠ᤹ ᤑᤥᤋᤩᤠ ᤔᤣ᤺ᤴᤏᤣᤒᤠ ᤆᤥ᤺ᤰᤁᤠᤖᤥ. ᤜᤧᤰᤁᤣᤛᤠᤱ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤁᤠᤴᤗᤥ. ᤂᤠᤛᤧᤴᤛᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤗᤢᤱᤃᤢᤶᤗᤧ ᤗᤠᤃᤡ ᤀᤠᤱᤃᤠ᤹ ᤐᤣᤗᤡ ᤑᤠᤰᤋᤢᤱᤗᤥ॥ 16 ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤢ᤺ᤳᤋᤢᤱᤅᤡᤸᤗᤧ ᤂᤢᤏᤧ᤹ ᤏᤢᤃᤵ ᤐᤡᤀᤠᤒᤡᤗᤠ. ᤜᤧᤰᤁᤣᤛᤠᤱ ᤂᤢᤏᤧ᤹ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤢᤒᤡ ᤔᤧᤗ᤹ᤀᤠᤴᤗᤥ॥ 17 ᤌᤣᤏᤠᤎᤣ ᤂᤢᤏᤧ᤹ ᤛᤢᤖᤡᤳ ᤁᤣᤈᤱ ᤐᤠᤱᤄᤢᤀᤠᤱ ᤀᤠᤱᤃᤠ᤹ ᤋᤴᤏᤠᤖᤥ. ᤂᤢᤏᤧ᤹ ᤀᤠᤱᤃᤠ᤹ ᤜᤏᤧ ᤜᤡᤵᤐᤠᤀᤠᤱ ᤂᤠ᤺ᤴᤏᤠᤖᤥ॥ 18 ᤂᤢᤏᤧ᤹ ᤛᤰᤔᤠ ᤛᤥ᤺ᤶᤔᤠᤀᤠᤱ ᤔᤧᤒᤠᤱᤅᤠᤴᤗᤥ. ᤂᤢᤏᤧ᤹ᤃ ᤀᤠᤱᤃᤠ᤹ ᤀᤠᤜᤡᤱᤔᤧᤴᤏᤣ ᤁᤢᤈᤠᤃᤧᤓᤧᤶᤒᤠ ᤆᤥᤃᤢᤀᤠᤱ ᤘᤠ᤹ᤖᤥ॥ 19 ᤜᤠᤳ ᤁᤧᤎᤢᤶᤒᤠ ᤆᤥᤰ ᤑᤠ᤹ᤀᤠᤱ ᤐᤠ᤺ᤵᤔᤤ ᤐᤥᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤔᤢᤰᤛᤠᤶᤛᤠᤒᤠ ᤆᤥᤰᤗᤥ. ᤀᤠᤱᤃᤠ᤹ ᤌᤣ ᤂᤢᤏᤧ᤹ ᤂᤠᤛᤧᤴ ᤗᤥ᤺ᤴᤍᤢᤱᤒᤠᤒᤡ᥅ ᤀᤠᤳᤋᤡᤸᤗᤧ ᤂᤢᤏᤧ᤹ ᤂᤠᤛᤧᤴᤗᤥᤶᤔᤠ ᤜᤡᤶᤔᤥ ᤋᤠ᤺ᤵᤔᤠ ᤛᤢᤰᤋᤢᤒᤠᤒᤣ᥅ 20 ᤑᤥᤋᤩᤠ ᤔᤣ᤺ᤴᤏᤣᤒᤠ ᤏᤢ ᤏᤛᤠ᤺ᤴᤛᤠᤒᤠ ᤘᤠ᤹ᤀᤠᤖᤥ ᤁᤖ ᤀᤠᤒᤠ᤺ᤴᤏᤡᤸᤗᤧ ᤑᤥᤋᤩᤠᤒᤠ ᤆᤥ᤺ᤰᤁᤠᤖᤥ. ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤸᤗᤧᤀᤣ ᤀᤠᤱᤃᤠ᤹ ᤁᤢᤓᤠᤱ ᤁᤧᤓᤣ᤺ᤶᤒᤠ ᤐᤥᤱᤅᤠᤖᤥ॥ 21 ᤀᤠᤱᤃᤠ᤹ ᤑᤥᤋᤩᤠ ᤔᤣ᤺ᤴᤏᤣᤒᤠ ᤆᤥ᤺ᤰᤁᤠᤖᤥ. ᤀᤠᤱᤃᤠ᤹ ᤀᤠᤒᤠᤅᤣ ᤌᤣᤀᤠᤱ ᤔᤧᤗᤣ᤺ᤳᤇᤡᤱᤅᤠᤸᤗᤥ. ᤀᤠᤱᤃᤠ᤹ ᤀᤠᤜᤡᤱᤔᤧᤴᤏᤢ ᤏᤠᤛᤠᤱᤗᤥ॥ 22 ᤀᤠᤱᤃᤠ᤹ᤃ ᤌᤧᤔᤠ᤺ᤴᤏᤠᤱ ᤏᤡᤏᤡ ᤂᤧᤶᤄᤧᤶ ᤔᤧᤗᤠᤵᤐᤠᤴᤗᤥ. ᤀᤠᤵᤋᤡᤰᤛᤠᤒᤠᤛᤠᤱ ᤀᤡᤃᤪ ᤀᤠᤵᤋᤡᤰᤛᤠᤒᤠ ᤔᤧ᤺ᤶᤒᤠᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤧᤵᤔᤠᤱ ᤔᤧᤰᤂᤢᤛᤡᤖᤥ॥ 23 ᤋᤢᤰᤔᤠ ᤗᤠᤰᤔᤠᤸᤗᤧ ᤑᤥᤋᤩᤠ ᤔᤣ᤺ᤴᤏᤣᤒᤠ ᤔᤏᤠᤴ ᤀᤠᤸᤗᤥᤄᤥᤖᤥ ᤛᤡᤖᤥ. ᤜᤧᤰᤁᤣ᤺ᤸᤗᤧ ᤂᤧᤴ ᤁᤧᤛᤡᤒᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤣ᤺ᤳᤋᤢᤖᤥ॥ 24 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥ ᤁᤧᤖᤧᤰ ᤂᤠᤛᤧᤴᤗᤥ᤺ᤶᤒᤠᤜᤠ᤹ᤖᤧ ᤂᤢᤏᤡ᤹ ᤔᤡᤰᤜᤠ᤹ ᤂᤢᤏᤧ᤹ ᤔᤡᤰᤑ᤺ᤶᤒᤠ ᤆᤥᤃᤢ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤜᤧᤰᤁᤣ ᤆᤥᤃᤢᤒᤠᤴ ᤔᤣ᤺ᤴᤏᤧᤓᤃᤪ ᤘᤣ᤹ ᤜᤠ᤺ᤳᤗᤧ ᤆᤥᤃᤢᤒᤣ᥅ 25 ᤀᤠᤱᤃᤠ᤹ ᤀᤠᤜᤡᤱᤔᤠ ᤌᤠ᤺ᤰᤁᤡᤴ ᤁᤧᤗᤥ᤺ᤰᤐᤠ ᤔᤏᤠᤏᤢ᤺ᤸᤗᤧ ᤜᤠᤖᤠ ᤔᤠ᤺ᤳᤗ ᤐᤳᤗᤥ. ᤁᤖ ᤗᤳᤇᤠᤀᤠᤱ ᤛᤢᤕᤧᤴ ᤏᤡᤔᤧᤴᤍᤧᤳᤋᤣ ᤗᤧᤰᤐᤣ᤺ᤰᤗ ᤐᤳᤗᤥ॥ 26 ᤛᤠ᤹ᤖᤡᤰ ᤜᤠᤖᤠ ᤁᤧᤈᤠᤵᤐᤠᤖ ᤁᤧᤒᤣ᤺ᤰᤐᤠ ᤂ᤺ᤱᤒᤣ ᤁᤢᤀᤡᤛᤡᤰ ᤂᤧᤴ ᤐᤣ᤺ᤰᤗᤥ. ᤀᤡᤃᤪ ᤛᤢᤒᤢᤒᤢᤏᤠ ᤛᤠ ᤁᤧᤓᤵᤐᤠ ᤔᤢᤕᤠ ᤜᤧᤰᤁᤣ ᤛᤢ᤺ᤰᤗ ᤐᤳᤗᤥ ᤂᤧᤴ ᤜᤧᤰᤁᤣ ᤀᤠᤜᤡᤱᤔᤴᤏᤡᤴ ᤗᤧᤰᤐᤣ᤺ᤰᤗ ᤐᤳᤗᤥ॥ 27 ᤀᤠᤀᤣ᤺ᤵᤔᤠᤀᤣ ᤔᤧᤕᤢᤏᤧᤴᤇᤠᤱ ᤀᤣ᤺ᤳᤋᤠᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤢᤰᤂᤣᤴ ᤏᤡᤱᤘᤠ᤹ᤑᤣ᤺ᤶᤔᤠ ᤋᤶᤛᤡᤱ ᤆᤥᤃᤢᤱᤗᤥ. ᤜᤧᤰᤁᤣᤛᤠᤱ ᤀᤠᤱᤃᤠ᤹ ᤋᤢᤔᤢᤱᤒᤠ ᤁᤧᤖᤧᤰ ᤕᤧᤳᤋᤢᤰᤂᤣᤜᤠ᤹ᤖᤧ ᤀᤧᤳᤗᤧᤱ ᤕᤠ᤺ᤶᤔᤠᤖᤥ॥ 28 ᤀᤠᤱᤃᤠ᤹ ᤋᤢᤶᤔᤠ ᤁᤧᤒᤥᤱᤒᤠ ᤋᤢᤰᤂᤣ ᤗᤠᤰᤂᤣᤜᤠ᤹ ᤁᤡᤖᤢᤱᤗᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤑᤥᤋᤩᤠᤒᤠ ᤗᤣ᤺ᤳᤋᤠ ᤑᤠ᤹ᤀᤠᤱ ᤏᤡᤛᤢᤱᤗᤥ॥ 29 ᤂᤢᤏᤧ᤹ᤃ ᤀᤠᤱᤃᤠ᤹ ᤑᤥᤋᤩᤠᤒᤠ ᤀᤡ᤺ᤳᤋᤠᤱ ᤛᤢᤖᤠᤱᤅᤠᤱ ᤘᤠ᤹ᤖᤥ॥ ᤜᤧᤰᤁᤣ᤺ᤸᤗᤧ ᤜᤏᤧ ᤀᤠᤱᤃᤠ᤹ ᤌᤣᤀᤠᤱ ᤏᤡᤱᤛᤠᤶ ᤆᤥ᤺ᤰᤔᤠᤒᤣ᥅ 30 ᤀᤠᤱᤃᤠ᤹ ᤔᤠᤰᤛᤧᤴᤏᤡᤸᤗᤧ ᤜᤢ᤺ᤳᤇᤡᤱᤅᤠᤀᤠᤱ ᤘᤠᤖᤢ᤺ᤶᤛᤡᤱᤅᤠᤛᤠᤱ. ᤀᤡᤃᤪ ᤑᤡ᤺ᤶᤓᤪᤡᤰᤐᤠᤸᤗᤧ ᤀᤠᤜᤢᤰᤜᤠ᤹ ᤛᤣᤛᤣ ᤗ᤹ᤖᤡᤰ ᤘᤠᤜᤵᤋᤢᤱᤛᤠᤱ. 31 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤗᤢᤶᤒᤠ᤺ᤳᤋᤥ ᤗᤠᤵᤑᤢᤀᤠᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤈᤠᤱᤅᤡᤸᤗᤧᤀᤠᤱ ᤁᤢᤕᤠᤶᤛᤡᤱᤅᤠᤖᤥ॥ 32 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤱᤃᤠ᤹ ᤜᤧᤰᤁᤣ ᤔᤧᤴᤇᤠᤶ ᤕᤠᤵᤔᤡ ᤐᤥ᤺ᤰᤂᤧᤸᤗᤧᤃ ᤀᤠᤱᤃᤠ᤹ ᤂᤢᤏᤧ᤹ ᤏᤢᤃᤵ ᤐᤡᤔᤠ ᤛᤢᤰᤋᤢᤱᤒᤠ ᤘᤕᤧᤖᤥ ᤀᤡᤃᤪ ᤂᤠᤛᤧᤴᤗᤥᤶᤔᤠ ᤜᤡᤶᤔᤥ ᤐᤣ᤺ᤰᤔᤠᤀᤠᤱ ᤀᤠᤴᤇᤡᤃᤣ ᤋᤢᤕᤧᤴᤏᤡᤴ ᤏᤠ᤺ᤵᤔᤠ ᤛᤢᤰᤋᤢᤱᤒᤠᤖᤥ॥ 33 ᤁᤖ ᤀᤠᤴᤇᤡᤃᤧᤗᤢᤶᤔᤥ ᤐᤠᤴ ᤁᤧᤍᤱᤒᤠ ᤁᤧᤒᤡᤒᤠ ᤜᤠ᤺ᤳᤋᤠᤱ ᤜᤥᤵᤗᤥ. ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤀᤠᤱᤃᤠ᤹ᤗᤢᤶᤔᤥ ᤂᤠᤛᤧᤴ ᤁᤧᤈᤥ᤺ᤰᤐᤠ ᤀᤣ᤺ᤴᤏᤠᤱ ᤜᤥᤵᤗᤥ॥ 34 ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤂᤢᤶᤍᤡᤱ ᤔᤧᤒᤡᤖᤠᤱᤅᤧᤴᤏᤧ᤹ᤀᤥ᥄ ᤂᤧᤏᤧ᤹ᤗᤠᤶ ᤁᤧᤍᤠᤒᤠ ᤕᤱᤔᤠ ᤁᤡᤔᤠᤜᤠ᤹ ᤀᤠᤱᤃᤠ᤹ᤀᤥ ᤔᤧᤴᤍᤠᤀᤣ ᤔᤠ᤺ᤱᤄᤠ ᤐᤥᤱᤗᤖᤥ᥄ 35 ᤂᤧᤒᤩᤠᤱ ᤀᤠᤱᤃᤠ᤹ ᤔᤧᤃᤡᤀᤠᤴᤗᤥ॥ ᤀᤠᤱᤃᤠ᤹ ᤂᤢᤏᤧ᤹ᤏᤢ ᤐᤠ᤺ᤳᤋᤠᤖᤥ ᤌᤣᤀᤠᤱᤓᤧᤸᤗᤧ ᤀᤠᤒᤠᤅᤣ ᤀᤠᤏᤡᤱᤘᤠ᤹ᤀᤡᤴ ᤀᤠᤱᤃᤠ᤹ ᤏᤡᤛᤢᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.