ᤀᤕᤢᤒ 8 - LIFOTNT

ᤛᤢᤜᤡ ᤒᤡᤸᤍᤍᤖᤧ ᤐᤠ᤺ᤳᤋᤢ—

^1-2 “ᤂᤧᤏᤧ᤹ ᤀᤠᤓᤧᤸᤗᤧ ᤌᤠᤖᤡᤰ ᤀᤰᤋᤱᤒᤠ ᤐᤠᤴ ᤁᤧᤒᤠ᤺ᤳᤋᤢᤀᤠᤱ ᤁᤧᤕᤢᤱᤒᤣ᥅ ᤌᤣ ᤛᤢᤖᤡᤳ ᤁᤣᤈᤱ ᤜᤧᤰᤁᤣ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤛᤢᤖᤢᤒᤡ᥅

³ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤵᤑᤠᤸᤗᤧᤀᤠᤱ ᤂᤠᤛᤧᤴᤏᤡᤴ ᤋᤠᤱᤃᤪᤠᤳᤆᤡ ᤘᤁᤪᤠᤳᤆᤡ ᤔᤧᤈᤥᤃᤢᤴᤗᤥ॥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤰ. ᤂᤧᤴ ᤆᤥ᤺ᤰᤔᤠ ᤔᤢᤰᤛᤠᤶᤍᤠᤱᤒᤧᤸᤗᤧ ᤀᤠᤓᤧᤸᤗᤧᤀᤠᤱ ᤔᤧᤗᤧᤖᤢᤴᤗᤥ॥

⁴ ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤔᤧᤈᤥᤃᤢᤀᤠᤱᤅᤣ ᤘᤠ᤹ᤔᤠ ᤐᤥᤱᤗᤥ. ᤂᤧᤸᤗᤧᤆᤥᤃᤢᤸᤗᤧᤀᤣ ᤂᤢᤏᤧ᤹ ᤂᤧᤱᤜᤠ᤹ ᤗᤠ᤹ᤖᤢᤛᤡᤒᤠ ᤂᤢᤶᤍᤡᤱ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥

⁵ ᤁᤖ ᤀᤠᤸᤗ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢᤖᤡᤰᤁᤠᤱ ᤁᤧᤃᤥᤳᤋᤢᤏᤧᤓᤃᤪ. ᤜᤧᤰᤁᤩᤠᤱ ᤐᤕᤶ ᤕᤶᤒᤠ ᤔᤢᤰᤛᤠᤶᤍᤠᤱᤒᤠᤴ ᤂᤧᤏᤧ᤹ ᤐᤣᤗᤡ ᤁᤣᤓᤠᤰᤋᤢᤏᤧᤓᤃᤪ.

⁶ ᤏᤛᤠ᤺ᤴᤛᤠᤒᤠ ᤏᤢ ᤑᤥᤋᤩᤠ ᤔᤣ᤺ᤴᤏᤣ ᤂᤧᤏᤧ᤹ ᤁᤧᤘᤠ᤹ᤏᤧᤓᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤥ᤺ᤰᤁᤠᤱ ᤁᤧᤓᤠ᤹ᤖᤥ ᤜᤧᤰᤁᤩᤠᤱ ᤁᤧᤜᤡᤶᤛᤕᤱ ᤁᤧᤜᤡᤶ ᤁᤧᤎᤠ᤺ᤱ ᤂᤢᤏᤧ᤹ ᤕᤠᤶᤔᤥ ᤁᤧᤒᤡᤖᤥ॥

⁷ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤌᤣᤛᤠᤱ ᤕᤠᤱᤛᤠᤁᤢᤴᤎᤣ ᤁᤧᤒᤡᤖᤥ. ᤂᤧᤴᤏᤢ ᤁᤢᤍᤱᤒᤠᤃ ᤂᤧᤏᤧ᤹ ᤋᤃᤡ ᤁᤧᤔᤠᤛᤢᤒᤠ ᤕᤠᤱᤛᤠᤁᤢᤴᤎᤣᤴ ᤌᤣᤀᤠᤱ ᤔᤣ᤺ᤴᤗᤥ॥

⁸ “ᤀᤢᤏᤠᤜᤢᤖᤡᤒᤠ ᤏᤧᤜᤡᤏᤡᤱᤘᤠ᤹ᤖᤧ ᤐᤠ᤺ᤴᤏᤡᤴ ᤛᤵᤑᤠᤎᤡᤰ ᤀᤥᤔᤧᤳᤋᤧ᤹ᤀᤥ. ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤜᤢ᤹ᤛᤡᤱᤒᤠ ᤛᤧᤰᤂᤠᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ॥

⁹ ᤀᤠᤏᤡ᤹ ᤜᤡᤱᤔᤴᤏᤡᤴ ᤋᤠᤱᤛᤠ ᤆᤥᤰ. ᤀᤠᤏᤡ᤹ ᤌᤣᤀᤠᤱ ᤀᤠᤴᤗᤧᤛᤢᤶᤔᤡᤴᤗᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤏᤡ᤹ᤃ ᤛᤠᤶᤔᤪᤡ᤺ᤵᤐᤠ ᤁᤢᤀᤡᤛᤡᤰ ᤀᤠᤍᤠᤖᤥ ᤜᤧᤰᤁᤩᤠᤱ ᤀᤠᤏᤡ᤹ ᤀᤠᤒᤣ᤺ᤰᤗᤥ॥

¹⁰ ᤁᤖ ᤀᤢᤴᤇᤣ᤺ᤴᤒᤠ ᤛᤡᤰᤁᤢᤶᤏᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤗᤢᤱᤔᤥᤗᤠᤶ ᤐᤠ᤺ᤴᤏᤡᤴ ᤁᤧᤶᤜᤢ᤹ᤖᤖᤥ.

¹¹ ᤌᤣ ᤘᤠᤈᤡ᤺ᤶᤒᤣ ᤁᤧᤜᤥᤵᤐᤠ ᤋᤧᤴᤏᤥ ᤛᤡᤍᤠᤰᤐᤠ ᤗᤡᤱᤒᤡ᥅ ᤌᤣ ᤌᤡᤱᤏᤧᤳᤋᤡᤴ ᤆᤫᤠ᤺ᤳ ᤔᤣ᤺ᤴᤏᤣ ᤜᤢᤖᤢᤶᤗᤢᤶᤏᤠ ᤗ᤹ᤌᤠᤱᤒᤡ᥅

¹² ᤂᤧᤱ ᤁᤢᤏ᤺ᤰᤁᤡᤴ ᤐᤥᤖ ᤐᤳᤋᤡᤸᤗᤧ ᤁᤢᤜᤧᤰᤔᤠ ᤕᤧᤶ ᤔᤧᤱᤃᤧᤳᤋᤣ ᤘᤠ᤹ᤛᤠᤱ. ᤆᤫᤠ᤺ᤳᤋᤡᤴ ᤜᤣ᤺ᤸᤗᤧ ᤘᤣ᤹ ᤕᤠᤴᤛᤢᤱᤜᤠ᤹ᤏᤢ᤺ᤸᤗᤧ ᤜᤠᤖᤠ ᤀᤡᤖᤧᤶᤒᤣ᤺ᤰᤗᤥ॥

¹³ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠ ᤔᤏᤠᤜᤠ᤹ ᤂᤧᤴ ᤛᤡᤍᤠᤰᤐᤠ ᤜᤧᤰᤁᤣ ᤔᤧᤒᤥᤱᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤌᤡᤰᤗᤧᤱ ᤔᤧᤗᤧᤖᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤛᤠᤱᤅᤡᤴᤏᤠᤱ ᤔᤠ᤺ᤒᤣᤰᤗᤥ॥

¹⁴ ᤂᤧᤱᤜᤠ᤹ᤖᤧ ᤏᤠᤔᤧᤛᤠ᤹ᤖᤢᤒᤠᤴ ᤐᤠ᤹ᤒᤠ᤺ᤴᤒᤠ ᤂᤡ ᤜᤧᤰᤁᤣ ᤗ᤹ᤖᤥ. ᤂᤧᤱᤜᤠ᤹ᤖᤧ ᤏᤡᤱᤛᤠᤱ ᤔᤧᤈᤥᤃᤢᤒᤠᤴ ᤋᤠ᤺ᤰᤂᤪᤡᤒᤠᤸᤗᤧ ᤁᤢ᤹ᤀᤡ ᤁᤢᤛᤡᤱ ᤗ᤹ᤖᤥ.

¹⁵ ᤋᤠ᤺ᤰᤂᤪᤡᤒᤠᤸᤗᤧ ᤁᤢ᤹ᤀᤡᤀᤥ ᤔᤧᤏᤠ᤺ᤶᤛᤡᤱᤅᤠᤱ ᤂᤧᤱᤜᤠ᤹ ᤀᤠᤳᤋᤠᤴ ᤌᤶᤔᤠ ᤛᤢᤰᤋᤢᤛᤡᤒᤣ᥅ ᤂᤧᤸᤗᤧ ᤁᤢᤀᤡ᤺ᤴ ᤋᤧᤶᤔᤠᤀᤠᤱ ᤕᤧᤵᤔᤠ ᤔᤧᤛᤢᤰᤋᤢᤒᤡ᥅”

¹⁶ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ ᤏᤠᤶᤗᤠ᤺ᤱᤔᤥ ᤕᤠ᤺ᤴᤛᤢᤱᤜᤠ᤹ ᤜᤢᤖᤢᤶᤗᤢᤶᤏᤠ ᤐᤥᤎᤠᤱᤒᤠ ᤜᤧᤰᤁᤣ ᤀᤥᤛᤣ᤺ᤴᤔᤧᤎᤠᤰᤛᤡᤱᤗᤥ॥ ᤁᤧᤖᤧᤰ ᤑᤢᤱᤀᤡᤰᤁᤡᤴ ᤋᤧᤵᤋᤢᤖ ᤁᤧᤍᤠᤵᤐᤠᤀᤠᤱ ᤁᤧᤏᤧᤒᤠ ᤕᤠᤴ ᤁᤢᤀᤡᤛᤡᤰ ᤂᤧᤱᤜᤠ᤹ ᤔᤧᤒᤥᤱᤗᤥ॥

¹⁷ ᤂᤧᤸᤗᤧ ᤁᤢᤛᤠ᤺ᤵᤜᤠ᤹ᤖᤧ ᤜᤰᤋᤰᤜᤠ᤹ ᤁᤡᤸᤗᤡᤰ ᤁᤡᤸᤗᤡᤰ ᤁᤡᤳᤋᤢᤖᤥ ᤂᤧᤒᤩᤠᤱ ᤕᤠᤰᤐᤣ᤹ᤀᤥ ᤗᤠ᤺ᤳᤋᤠᤱ ᤛᤠ᤹ᤖᤡᤰ ᤋᤧᤶᤛᤢᤀᤠᤱ ᤐᤳᤗᤥ॥

¹⁸ ᤁᤖ ᤂᤧᤴ ᤀᤠ᤺ᤰᤂᤧᤍᤣᤛᤧ᤹ᤀᤥ. ᤁᤢᤛᤠ᤺ᤵᤐᤥᤏᤢᤀᤣ ᤜᤠ᤹ᤕᤠᤰ ᤀᤠ᤺ᤰᤂᤧᤍᤣᤛᤧ᤹ᤀᤥ॥ ᤂᤧᤴ ᤀᤣᤃᤠᤱ ᤂᤧᤴ ᤀᤠᤳᤋᤡᤴᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤛᤢᤶᤔᤥᤀᤠᤱ ᤔᤧᤍᤠᤏᤧᤸᤗᤥ॥

¹⁹ ᤀᤥᤖᤥ. ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤛ᤺ᤵᤔᤧᤴ ᤂᤧᤶᤓᤩᤠᤖᤡᤰᤗᤰᤗᤥ॥ ᤀᤣᤕᤠᤱᤒᤠ ᤔᤏᤠᤜᤠ᤹ᤖᤧ ᤂᤧᤸᤗᤧ ᤁᤢᤕᤢᤱᤔᤠᤍᤧᤴᤜᤠ᤹ ᤔᤧᤕᤢᤰᤋᤢᤖᤥ॥

²⁰ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤖᤢᤴᤇᤡᤴᤗᤥ. ᤜᤧᤰᤁᤩᤠᤱ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ ᤀᤠᤓᤧᤸᤗᤧᤀᤠᤱ ᤁᤢᤓᤠ᤹ ᤔᤧᤒᤡᤖᤢᤴᤇᤡᤴᤗᤥ॥

²¹ ᤂᤢᤏᤧ᤹ ᤂᤧᤏᤧ᤹ ᤁᤧᤏᤠᤖᤠᤴ ᤕᤧᤕᤧ ᤁᤧᤗ᤹ᤒᤠ ᤆᤥᤃᤢᤖᤥ. ᤂᤧᤒᤩᤠᤱ ᤀᤣ᤺ᤵᤔᤠ ᤏᤢ ᤛ᤺ᤵᤔᤠ ᤀᤡᤰᤗᤠ ᤁᤧᤒᤡᤖᤥ॥

²² ᤁᤖ ᤂᤧᤏᤧ᤹ ᤁᤧᤈᤡ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤛᤶᤎᤠᤱ ᤆᤠ᤺ᤳᤌᤡ ᤐᤣ᤺ᤰᤔᤠ ᤋᤠᤖᤢ ᤐᤡᤖᤢᤛᤡᤖᤥ ᤜᤧᤰᤁᤩᤠᤱ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤜᤡᤶᤜᤠ᤹ ᤔᤧᤕ᤺ᤴ ᤔᤧᤗᤢ᤺ᤴᤗᤥ॥