ᤀᤕᤢᤒ 7 - LIFOTNT

¹ ᤌᤣ ᤔᤏᤠᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤠᤰᤗ ᤜᤡᤱᤔᤠ ᤔᤧᤒᤥᤱᤏᤧᤶᤒᤡ᥅ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤧᤴᤜᤠ᤹ ᤛᤠ᤹ᤖᤡᤰ ᤛᤠᤰᤗ ᤕᤠ᤺ᤶᤒᤢᤍᤡᤰ ᤁᤧᤈᤥ᤺ᤰᤐᤠᤸᤗᤧᤴ ᤜᤧᤰᤁᤣ ᤔᤧᤗ᤹ᤏᤧᤶᤒᤡ᥅

² ᤁᤴ ᤜᤡᤱᤔᤴ ᤛᤢᤛᤢᤒᤠ ᤕᤢᤱᤍᤧᤴ ᤁᤧᤃᤥ᤺ᤵᤐᤠ ᤕᤥᤃ᤻ᤒᤠ ᤜᤧᤰᤋᤱᤒᤠ ᤆᤥᤰᤗᤥ. ᤀᤡᤃᤪ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤸᤗᤧ ᤁᤢᤏᤠᤶᤕᤠᤰᤁᤡᤴ ᤂᤥᤔᤠᤖᤧ ᤗᤠᤃᤡ ᤜᤠᤱᤄᤢᤀᤠᤱ ᤘᤠ᤹ᤒᤠ ᤁᤢᤛᤡᤱ ᤗ᤹ᤖᤥ॥

³ ᤁᤧᤖᤧᤰ ᤗᤠᤜᤠ᤹ᤀᤥ ᤜᤏᤧᤖᤰ ᤜᤡᤱᤅᤠᤀᤠᤱ ᤘᤠ᤹ᤀᤠᤖᤥ. ᤛᤧᤴᤍᤡᤰ ᤌᤵᤔᤣ ᤀᤠᤗᤠᤃᤡ ᤕᤧᤳᤋᤢᤰᤂᤣᤖᤰ ᤘᤠ᤹ᤖᤥ॥

⁴ ᤀᤡᤶᤛᤧ ᤏᤧᤛᤡᤱᤅᤠᤀᤠᤱ ᤀᤠᤒᤥ᤺ᤰᤔᤠ ᤕᤧᤶᤔᤡᤴ ᤀᤠᤱᤃᤠ᤹ ᤏᤡ᤺ᤵᤔᤠ ᤜᤣ᤺ᤰᤋᤢᤱᤗᤥ. ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤏᤧᤳᤏᤠᤀᤥ ᤗᤧᤱᤛᤡᤱᤅᤠᤖᤥ ᤜᤧᤰᤁᤩᤠᤱ ᤋᤠᤏᤠᤶᤒᤠ ᤗᤠᤶᤔᤡᤴ ᤀᤥᤔᤧᤳᤋᤢᤱᤗ ᤏᤧᤀᤠᤖᤥ॥

⁵ ᤀᤠᤱᤃᤠ᤹ ᤀᤠᤎᤰᤁᤥ ᤑᤣ᤹ᤒᤠᤳ ᤔᤧᤎᤩᤧᤀᤠᤱ ᤔᤧᤕᤠᤰᤗᤥ ᤜᤧᤰᤁᤩᤠᤱ ᤛᤥᤔᤧᤸᤗᤧ ᤕᤠᤱᤄᤠᤱᤅᤠᤱ ᤘᤠ᤹ᤖᤥ. ᤀᤠᤱᤃᤠ᤹ ᤀᤠᤕᤠᤱᤄᤣ᤺ᤰᤜᤠ᤹ᤀᤥᤗᤠᤶ ᤏᤡ᤺ᤰᤘᤠ ᤗ᤺ᤴᤗᤥ॥

⁶ ᤀᤠᤱᤃᤠ᤹ ᤀᤠᤕᤧᤴᤜᤠ᤹ ᤏᤡᤱᤛᤠᤱ ᤐᤢᤰᤔᤥ ᤗᤧᤰᤐᤣ᤺ᤰᤗᤥ. ᤌᤠᤰᤌᤠᤰᤔᤠ ᤌᤥᤗᤡᤏᤢ᤺ᤸᤗᤧᤀᤠᤱ ᤜᤠᤖᤠ ᤗᤧᤰᤐᤣ᤺ᤰᤗᤥ॥

⁷ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤀᤠᤜᤡᤱᤔᤴᤏᤡᤴ ᤜᤧᤱᤃᤧ᤺ᤰᤐᤠ ᤛᤰᤔᤠᤖᤰ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ᤀᤠᤱᤃᤠ᤹ ᤀᤠᤛ᤺ᤵᤔᤠ ᤕᤧᤶᤔᤡᤴ ᤋᤃᤡᤀᤣ ᤗᤧᤰᤋᤧᤒᤣᤖᤥ॥

⁸ ᤂᤧᤏᤧ᤹ ᤀᤠᤸᤗᤥ ᤁᤧᤏᤡᤀᤠᤖ ᤁᤧᤘᤠ᤹ᤖᤥ. ᤁᤖ ᤕᤠᤶᤔᤥ ᤀᤠᤑᤠᤸᤗᤧᤀᤠᤱ ᤁᤧᤴᤏᤡᤀᤠᤴᤗᤥ. ᤂᤧᤏᤧ᤹ ᤀᤠᤱᤃᤠ᤹ ᤁᤧᤃᤥ᤺ᤳᤋᤠᤸᤗᤧ ᤐᤣ᤺ᤰᤁᤠ ᤆᤢ᤺ᤳᤋᤠᤀᤠᤱ ᤘᤠ᤹ᤀᤠᤖᤥ॥

⁹ ᤂᤠ᤹ᤔᤡ᤺ᤵᤐᤠᤴ ᤋᤢᤶᤒᤥᤱ ᤗ᤹ᤖᤡᤰ ᤐᤥ᤺ᤰᤁᤠᤱ ᤔᤠᤒᤣ᤺ᤰᤗᤥ ᤜᤧᤰᤁᤣᤗ᤹ᤖᤡᤰᤁᤣ ᤔᤧᤴᤇᤠᤶ ᤕᤠᤵᤔᤡᤴ ᤛᤡᤀᤠᤱ ᤔᤧᤏᤢ᤺ᤱᤏᤧᤴ ᤔᤧᤍᤠᤏᤧᤴᤗᤥ॥

¹⁰ ᤂᤧᤴ ᤀᤠᤓᤧᤸᤗᤧᤀᤠᤱ ᤜᤡᤶᤔᤥ ᤔᤧᤏᤢ᤺ᤱᤏᤧᤴ ᤔᤧᤍᤠᤏᤧᤴᤗᤥ. ᤂᤧᤒᤩᤠᤱ ᤁᤢᤛᤡᤱ ᤁᤧᤏᤡ᤺ᤵᤐᤠ ᤁᤧᤖᤧᤰᤗᤧ ᤂᤧᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤖᤥ॥

¹¹ ᤔᤣ᤺ᤴ. ᤛᤫᤠ᤺ᤳ ᤕᤢᤱᤔᤠᤃᤶᤔᤠ ᤔᤧᤛᤢᤰᤁᤠ᤺ᤴᤗᤥ᥄ ᤀᤠᤏᤡᤱᤘᤠ᤹ᤀᤥ ᤛᤡᤰᤐᤥ᤺ᤰᤔᤠ ᤏᤢ ᤏᤡᤱᤘᤠ᤹ᤖᤧ ᤕᤧ᤺ᤰᤂᤠᤱᤅᤠᤱ ᤀᤠᤱᤃᤠ᤹ ᤀᤠᤶᤒᤪᤠ ᤜᤶᤔᤠᤀᤣ ᤐᤥᤱᤗᤥ॥

¹² ᤂᤧᤏᤧ᤹ ᤀᤠᤱᤃᤠ᤹ ᤀᤠᤛᤶᤎᤠᤱ ᤌᤣᤀᤠᤱ ᤀᤡᤰᤁᤧᤃᤥᤒᤠ ᤁᤧᤕᤧᤵᤛᤢᤒᤠᤒᤣ᥅ ᤌᤣ ᤀᤠᤱᤃᤠ᤹ ᤘᤖ᤺ᤱᤅᤥ ᤁᤧᤕᤠᤰᤐᤠ ᤁᤡᤵᤔᤠᤃᤧᤄᤢᤒᤠ ᤌᤰᤛᤠᤀᤠᤒᤡ᥅

¹³ ᤀᤠᤱᤃᤠ᤹ ᤛᤥ᤺ᤴᤇᤡᤱᤅᤠᤖᤥ ᤜᤧᤰᤁᤩᤠᤱ ᤏᤠ᤺ᤶᤛᤡᤱᤔᤠ ᤋᤶᤛᤡᤱ ᤆᤥᤃᤢᤱᤗᤥ. ᤀᤠᤱᤃᤠ᤹ ᤋᤢᤰᤔᤠ-ᤋᤢᤰᤂᤣᤗᤠᤶᤒᤠ ᤛᤧᤴᤗᤵ ᤂᤥᤔᤠ ᤏᤡᤱᤛᤠᤱ ᤆᤥᤃᤢᤱᤗᤥ॥

¹⁴ ᤁᤖ ᤂᤧᤏᤧ᤹ ᤛᤧᤵᤔᤠᤱᤔᤥ ᤕᤱᤔᤠ ᤁᤧᤛᤧᤳᤋᤠᤖᤥ. ᤂᤧᤏᤧ᤹ ᤁᤧᤒᤠᤱᤄᤢᤒᤠ ᤀᤰᤋᤱᤒᤠ ᤋᤠᤵᤑᤧ᤺ᤶᤒᤠ ᤛᤢᤵᤑᤥ ᤏᤢ ᤛᤧᤵᤔᤠᤱᤜᤠ᤹ᤖᤧ ᤀᤠᤱᤃᤠ᤹ ᤕᤱᤔᤠ ᤛᤧᤳᤋᤠᤖᤥ॥

¹⁵ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤰᤋᤱᤒᤠ ᤀᤡᤏᤥᤃᤧᤴ ᤋᤢᤰᤂᤣᤘᤠ ᤜᤡᤱᤔᤴᤏᤥ ᤜᤡᤱᤔᤠᤏᤢ᤺ᤸᤗᤧᤃ ᤀᤠᤱᤃᤠ᤹ ᤀᤠᤈᤠᤒᤥ᤺ᤵᤔᤠᤴ ᤔᤧᤕ᤹ᤖᤢᤀᤠᤱ ᤔᤧᤛᤧᤳᤋᤠᤸᤗᤧ ᤏᤢᤒᤠ ᤐᤥᤱᤗᤥ॥

¹⁶ ᤀᤠᤱᤃᤠ᤹ᤃ ᤜᤠᤖᤡ ᤋᤩᤠᤱᤗᤥ. ᤜᤡᤱᤔᤴᤏᤢ ᤀᤠᤱᤃᤠ᤹ ᤏᤠᤛᤠᤱᤗᤥ॥ ᤀᤠᤱᤃᤠ᤹ ᤕᤠᤵᤔᤡ ᤀᤠᤗᤧᤖᤧ᤹ᤀᤥ. ᤀᤠᤱᤃᤠ᤹ ᤜᤡᤱᤔᤠᤖᤧ ᤁᤢᤒᤣ ᤌᤣᤀᤠᤱ ᤜᤥᤵᤗᤥ॥

¹⁷ ᤔᤧᤴᤇᤠᤶ ᤕᤠᤵᤔᤡᤴ ᤌᤧᤔᤠᤒᤣ᥅ ᤂᤧᤴ ᤌᤣᤀᤠᤱ ᤂᤧᤶᤔᤩᤠᤰ ᤛᤠ᤹ᤖᤡᤰ ᤂᤧᤏᤧ᤹ ᤁᤧᤕᤧ᤺ᤰᤐᤠ ᤁᤧᤗᤣ᤺ᤳᤋᤢᤒᤠᤒᤣ᥅ ᤌᤣᤀᤠᤱ ᤂᤧᤸᤗᤧ ᤁᤢᤕᤠ᤺ᤶᤒᤰᤁᤡᤴ ᤂᤧᤏᤧ᤹ ᤔᤡᤰᤆᤥ ᤁᤧᤔᤧᤳᤋᤢᤒᤠᤒᤣ᥅

¹⁸ ᤋᤠᤏᤠᤶ ᤌᤵᤔᤣ ᤂᤧᤴ ᤁᤧᤛᤠ᤹ᤖᤢᤖᤥ ᤜᤧᤰᤁᤩᤠᤱ ᤛᤵᤔᤠᤀᤠᤱ ᤂᤧᤴ ᤁᤢᤏᤡᤱᤘᤠ᤹ ᤁᤧᤛᤠ᤹ᤖᤢᤖᤥ॥

¹⁹ ᤌᤣ ᤂᤧᤏᤧ᤹ ᤛᤵᤔᤠᤎᤡᤰᤁᤠᤱ ᤀᤠᤱᤃᤠ᤹ ᤀᤥᤔᤧᤵᤔᤠ ᤁᤧᤸᤗᤧᤳᤋᤠᤴᤒᤡ᥅ ᤌᤧᤔᤠ ᤌᤫᤧ᤺ᤳᤋᤠᤱ ᤗᤵᤔᤠ ᤁᤧᤶᤒᤠᤱᤅᤠᤴᤒᤡ᥅

²⁰ ᤀᤠᤱᤃᤠ᤹ ᤗᤠᤕᤥ ᤆᤥᤃᤢᤱᤅᤠᤱ ᤘᤕᤠᤱᤛᤠᤱ ᤂᤧᤏᤧ᤹ ᤌᤣ ᤜᤠᤴᤋᤡ ᤆᤥ᤺ᤰᤏᤧᤴᤒᤣ᥅ ᤔᤧᤴᤇᤠᤶ ᤕᤠᤵᤔᤡ ᤀᤥᤃᤧᤔᤧᤵᤐᤠᤀᤣ. ᤌᤣᤀᤠᤱ ᤀᤠᤱᤃᤠ᤹ ᤛᤥ᤺ᤰᤔᤏᤠᤒᤠ ᤁᤧᤈᤥᤃᤠᤱᤒᤠᤒᤣ᥅ ᤌᤣ ᤀᤠᤱᤃᤠ᤹ ᤂᤧᤏᤧ᤹ ᤁᤧᤗᤠᤃᤡ ᤁᤶᤓᤩᤠᤖᤡᤰ ᤛᤠ᤹ᤖᤡᤰ ᤁᤧᤗᤡ᤺ᤵᤐᤠ ᤁᤰ ᤐᤥ᤺ᤰᤂᤠᤱᤒᤡ᥅

²¹ ᤌᤣᤀᤠᤱ ᤂᤧᤏᤧ᤹ ᤀᤠᤵᤑᤠᤸᤗᤧᤀᤠᤱ ᤀᤠᤱᤃᤠ᤹ ᤀᤠᤗᤠᤕᤥᤴ ᤗᤧᤵᤔᤡ ᤁᤧᤴᤈᤥᤃᤢᤶᤒᤠᤒᤣ᥅ ᤑᤧᤴᤕᤠ᤺ᤶᤒᤰ ᤆᤥᤃᤢᤱᤒᤠᤀᤥ ᤁᤧᤸᤗᤧᤳᤋᤠᤴᤒᤠᤒᤡ᥅ ᤀᤠᤸᤗ ᤜᤠᤖᤠᤀᤣ ᤀᤠᤱᤃᤠ᤹ ᤀᤡ᤺ᤵᤐᤢᤱᤅᤥ ᤁᤧᤳᤋᤠᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤱᤃᤠ᤹ ᤁᤧᤃᤥ᤺ᤳᤋᤠᤸᤗᤧ ᤐᤣ᤺ᤰᤁᤠ ᤆᤢ᤺ᤳᤋᤠᤀᤠᤱ ᤜᤥ᤺ᤵᤐᤠᤖᤥ॥