ᤀᤕᤢᤒ 6 - LIFOTNT

ᤀᤕᤢᤒᤖᤧ ᤐᤠ᤺ᤳᤋᤢ—

^1-2 ᤆᤡ᤺ᤳᤋᤧᤀᤠᤱ ᤛᤩᤧᤖᤥ. ᤀᤠᤱᤃᤠ᤹ ᤋᤢᤔᤢᤱᤒᤠ ᤕᤧᤳᤋᤢᤰᤂᤣᤜᤠ᤹ ᤐᤠᤛᤠᤱᤃᤠᤀᤥ ᤌᤠᤱᤔᤠ ᤂᤥᤛᤢᤱᤅᤡᤸᤗᤧᤃ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤢᤰᤂᤣᤴ ᤛᤡ᤺ᤰᤔᤠ ᤂᤥᤛᤢᤱᤅᤡᤸᤗᤧᤃ.

³ ᤘᤖ᤺ᤱᤅᤥᤒᤠ ᤕᤧ᤺ᤱᤄᤠᤏᤢ᤺ᤸᤗᤧᤀᤠᤱ ᤂᤧᤴ ᤗᤡ᤺ᤵᤋᤧᤒᤠᤖᤥ. ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤁᤧᤀᤠ᤺ᤶᤒᤠ ᤀᤠᤒᤠ᤺ᤴᤏᤥ ᤂᤧᤏᤡ᤹ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹ᤀᤥ॥

⁴ ᤐᤕᤶ ᤕᤶᤒᤠ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤍᤥ᤺ᤱᤅᤡᤴ ᤀᤠᤱᤃᤠ᤹ ᤀᤠᤎᤰᤁᤥ ᤗᤣ᤺ᤳᤋᤢᤀᤠᤱ ᤐᤳᤗᤥ॥ ᤂᤧᤸᤗᤧ ᤁᤢᤏᤡᤱᤅᤡᤴ ᤀᤠᤎᤰᤁᤥ ᤛᤧᤖᤧᤀᤠᤱ ᤕᤠᤰᤗᤥ. ᤀᤠᤱᤃᤠ᤹ ᤕᤱᤔᤠ ᤁᤧᤛᤧᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤡᤵᤔᤠᤃᤧᤄᤢᤒᤠ ᤁᤢᤒᤠ᤺ᤴᤜᤠ᤹ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤁᤧᤖᤧᤰ ᤐᤥᤃᤧᤀᤠᤱ ᤘᤠ᤹ᤖᤥ॥

⁵ ᤕᤠᤴ ᤆᤠᤔᤠ ᤂᤥᤛᤢᤸᤗᤧ ᤋᤠᤶᤓᤢᤱ ᤀᤍᤱᤅᤡᤴ ᤁᤢᤛᤡᤰᤀᤣ᤺ᤵᤋᤢᤖᤥ. ᤕᤠ᤹ᤗᤠᤱᤅᤡᤴ ᤕᤧ᤺ᤱᤔᤠ ᤂᤥᤛᤢᤸᤗᤧ ᤐᤡᤳᤋᤧᤴ ᤔᤧᤔᤠ᤺ᤱᤏᤧᤸᤗᤥ॥

⁶ ᤁᤖ ᤀᤠᤳᤋᤡᤸᤗᤧ ᤁᤧᤄ᤺ᤵᤐᤠ. ᤕᤢᤶ ᤔᤧᤸᤗᤡᤶᤔᤏᤠᤒᤠ ᤁᤢᤈᤠᤴ ᤆᤠᤔᤠ ᤛᤢᤰᤋᤢᤒᤣ᥅ ᤘᤠᤎᤡ᤺ᤴᤏᤥ ᤁᤧᤕᤠᤰᤐᤠ ᤑᤍᤠᤱᤒᤠᤴ ᤌᤣ ᤁᤢᤈᤠ ᤏᤢ᤹ᤒᤡ᥅

⁷ ᤜᤧᤰᤋᤱᤒᤠ ᤁᤢᤈᤠ ᤆᤠᤔᤠ ᤀᤠᤏᤡᤱᤘᤠ᤹ ᤜᤥᤵᤗᤥ. ᤀᤰᤋᤱᤒᤠ ᤁᤢᤈᤠ᤺ᤸᤗᤧ ᤀᤠᤱᤃᤠ᤹ᤃ ᤋᤢᤰᤁᤠᤖᤥ॥

⁸ ᤀᤠᤱᤃᤠ᤹ ᤏᤠ᤺ᤰᤋᤢᤱᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤣᤀᤠᤱ ᤔᤧᤒᤡᤀᤠᤴᤒᤠᤒᤣ᥅ ᤀᤠᤱᤃᤠ᤹ ᤆᤥᤃᤢᤱᤒᤠ ᤋᤢᤘᤠ᤺ᤸᤗᤧ ᤁᤢᤏᤢᤃᤵ ᤂᤢᤏᤧ᤹ ᤌᤣᤀᤠᤱ ᤔᤧᤒᤡᤀᤠᤴᤒᤠᤒᤣ᥅

⁹ ᤀᤠᤱᤃᤠ᤹ ᤂᤠᤵᤐᤢᤌᤩ᤺ᤱ ᤆᤥ᤺ᤰᤔᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤆᤥᤃᤢᤸᤗᤧ ᤏᤢᤖᤧᤒᤠᤖᤥ᥄ ᤂᤢᤏᤧ᤹ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤀᤠᤱᤃᤠ᤹ ᤛᤧᤖᤠᤱᤅᤡᤸᤗᤧ ᤐᤥ᤺ᤰᤂᤧᤒᤠᤖᤥ᥄

¹⁰ ᤜᤧᤰᤁᤣ ᤐᤥᤱᤅᤡᤸᤗᤧᤃ ᤀᤠᤰᤂᤩᤠᤰ ᤋᤢᤰᤛᤠᤱ ᤛ᤺ᤳᤋᤠᤀᤠᤱ ᤐᤡᤳᤆᤠᤰ ᤐᤡᤴᤍᤠᤱᤒᤠᤖᤥ॥ ᤛᤣᤛᤣᤒᤠᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤠᤱᤃᤠ᤹ ᤔᤧᤴᤏᤠ᤹ᤀᤣ ᤘᤠ᤹ᤀᤠᤖᤥ॥

¹¹ ᤀᤠᤸᤗ ᤀᤠᤱᤃᤠ᤹ ᤀᤠᤈᤧ᤺ᤳᤇᤡᤰᤁᤠᤱ ᤁᤧᤎᤢᤶᤒᤠ ᤔᤧᤈᤥ᤺ᤰᤁᤠᤴᤗᤥ. ᤀᤠᤱᤃᤠ᤹ ᤌᤣᤀᤠᤱ ᤜᤡᤱᤅᤠᤒᤠᤒᤣ᥅ ᤀᤠᤱᤃᤠ᤹ ᤌᤣᤀᤠᤱ ᤂᤥᤔᤠ ᤀᤠᤏᤡᤱᤘᤠ᤹ ᤜᤥᤵᤗᤥ. ᤀᤠᤱᤃᤠ᤹ ᤌᤣᤀᤠᤱ ᤏᤠᤛᤡ ᤌ᤺ᤳᤋᤢᤱᤒᤠᤒᤣ᥅

¹² ᤌᤣ ᤀᤠᤱᤃᤠ᤹ ᤗᤢᤱᤗᤠᤶᤒᤠ ᤐᤥ᤺ᤰᤂᤠᤱᤒᤠᤒᤡ᥅ ᤌᤣ ᤀᤠᤱᤃᤠ᤹ ᤀᤠᤎᤰᤁᤡᤴ ᤐᤡᤳᤋᤥ᤺ᤸᤗᤡᤒᤡ᥅

¹³ ᤀᤠᤒᤠᤅᤣ ᤋᤠᤱᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤁᤧᤎᤢᤶᤒᤠ ᤔᤧᤈᤥ᤺ᤰᤁᤠᤴᤗᤥ. ᤁᤢᤓᤠ᤹ ᤂᤥᤔᤠ ᤜᤡᤶᤒᤪᤠᤶ ᤀᤠᤳᤋᤠᤴᤏᤠᤱ ᤜᤥᤵᤗᤥ॥

¹⁴ ᤀᤰᤋᤱᤒᤠ ᤀᤡᤏᤥᤃᤧᤴ ᤀᤠᤍᤢᤰᤂᤣᤀᤥ ᤀᤠᤱᤃᤠ᤹ ᤋᤣ᤺ᤱᤈᤢᤶ ᤆᤠᤜᤠᤒ᤻ ᤆᤥ᤺ᤰᤁᤠᤖᤥ॥ ᤁᤖᤛᤠᤱ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤔᤧᤱᤃᤡᤀᤣ ᤂᤧᤏᤡ᤹ ᤕᤠᤵᤔᤡ ᤐᤠᤴ ᤁᤧᤎᤡᤰᤋᤡᤖᤥ॥

¹⁵ ᤁᤖ ᤀᤠᤱᤃᤠ᤹ ᤀᤠᤴᤍᤣᤱᤒᤠᤛᤣ. ᤐᤠᤱᤃᤧᤴᤍᤡᤱ ᤘᤠᤜᤡᤳ ᤔᤣ᤺ᤴᤏᤣ ᤕᤱᤄᤱᤜᤠ᤹ ᤜᤣᤒᤣ᤺ᤰᤗᤥ. ᤂᤧᤴ ᤜᤧᤰᤁᤣ ᤂᤡᤏᤡ᤹ ᤀᤠᤱᤃᤠ᤹ ᤕᤠᤵᤔᤡ ᤀᤡᤱᤃᤧᤗᤧᤰᤋᤡᤖᤥ॥

¹⁶ ᤛᤣ᤺ᤰᤘᤠ᤺ᤸᤗᤧ ᤆᤥᤃᤢᤸᤗᤧ ᤂᤧᤴ ᤕᤱᤄᤱᤜᤠ᤹ ᤔᤠᤰᤗ᤹ᤖᤥ. ᤂᤧᤱᤜᤠ᤹ᤖᤧ ᤁᤢᤛᤶᤎᤠᤱ ᤏᤠ᤺ᤱᤅᤡᤴ ᤗᤢᤶᤛᤡᤱᤗᤥ॥

¹⁷ ᤁᤖ ᤜᤠᤱᤘᤠᤔᤠ ᤕᤧᤶᤔᤥ ᤂᤧᤴ ᤕᤱᤄᤱᤜᤠ᤹ ᤜᤣᤒᤣ᤺ᤰᤁᤠᤱ ᤔᤠᤖᤥ. ᤜᤧᤰᤁᤩᤠᤱ ᤘᤜ᤺ᤱ ᤘᤠᤃᤢᤛᤧᤒᤠ ᤋᤧᤴᤏᤥ ᤁᤢᤄᤠᤗᤧᤶ ᤏᤢ ᤆᤡᤈᤡ ᤂᤰᤂᤰ ᤐᤥᤱᤗᤥ॥

¹⁸ ᤗᤠᤶᤍᤡ᤺ᤵᤐᤠᤱᤜᤠ᤹ ᤆᤫᤠ᤺ᤳ ᤔᤧᤃᤥ᤺ᤳᤋᤠᤱ ᤔᤧᤒᤳᤗ ᤂᤧᤱᤜᤠ᤹ ᤔᤧᤔᤠ ᤔᤧᤒᤣ᤺ᤰᤗᤥ. ᤂᤧᤱᤜᤠ᤹ ᤔᤢᤖᤧᤰ ᤂᤠᤖᤧᤰᤐᤠ ᤀᤣ᤺ᤰᤛᤠᤍᤧᤴᤏᤥ ᤏᤠ ᤏᤢ ᤁᤳᤏᤠ ᤗᤠᤱᤔᤧᤄᤣ᤺ᤰᤁᤠᤱ ᤔᤧᤒᤳᤗ ᤂᤧᤱᤜᤠ᤹ ᤔᤧᤛᤡ ᤔᤧᤒᤣ᤺ᤰᤗᤥ॥

¹⁹ ᤋᤣᤔᤠᤒᤠ ᤗᤠᤶᤍᤡ᤺ᤰᤐᤠᤜᤠ᤹ᤖᤧ ᤆᤫᤠ᤺ᤳᤋᤡᤴ ᤔᤧᤃᤥ᤺ᤳᤋᤢᤖᤥ. ᤗᤧᤱᤜᤱ ᤁᤧᤈᤥ᤺ᤰᤐᤠ ᤛᤣᤒᤠᤒᤠ ᤗᤠᤶᤍᤡ᤺ᤰᤐᤠᤜᤠ᤹ᤖᤧ ᤂᤧᤴ ᤂᤥᤔᤠ ᤏᤡᤱᤘᤠ᤹ ᤔᤧᤈᤥᤃᤢᤖ ᤀᤥᤔᤧᤔᤧᤳᤋᤢᤖᤥ॥

²⁰ ᤁᤖ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤕᤢᤰᤂᤢᤒᤠ ᤁᤧᤖᤧᤰ ᤐᤠ᤺ᤴᤏᤥ ᤏᤡᤱᤛᤠᤱ ᤐᤢᤰᤗᤥ. ᤂᤧᤴ ᤆᤫᤠ᤺ᤳ ᤁᤧᤜᤥᤵᤐᤠ ᤘᤜ᤺ᤱᤅᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤛᤠᤱᤅᤡᤴ ᤛᤡᤖᤥ॥

²¹ ᤂᤡᤏᤡ᤹ ᤀᤠᤱᤃᤠ᤹ ᤀᤠᤗᤠᤃᤡ ᤂᤧᤴ ᤕᤠᤱᤛᤠᤱᤘᤠᤴ ᤜᤧᤰᤁᤣ ᤁᤧᤗ᤹ᤖᤡᤖᤥ. ᤀᤠᤱᤃᤠ᤹ ᤋᤢᤔᤢᤱᤒᤠ ᤋᤢᤰᤂᤣᤴ ᤁᤧᤏᤡᤛᤢᤶᤔᤠᤱ ᤁᤡᤔᤠᤸᤗᤧ ᤁᤧᤄᤧᤳᤋᤠᤛᤡᤖᤥ॥

²² ᤀᤠᤱᤃᤠ᤹ ᤂᤡᤏᤡ᤹ᤏᤢ ᤌᤣ ᤏᤠ᤺ᤰᤏᤡᤱᤅᤠᤱ ᤘᤕᤧᤃ᥅ ᤀᤡ ᤀᤠᤱᤃᤠ᤹ ᤀᤠᤗᤠᤃᤡ ᤜᤠᤳ “ᤛᤢᤖᤢᤋᤩᤠᤱ ᤐᤡᤖᤧ ᤀᤠᤒᤡᤖᤧ᤹” ᤐᤠ᤺ᤳᤋᤢᤱᤅᤠᤱ ᤘᤕᤧᤃ᥅

²³ ᤀᤡᤃᤪ ᤀᤠᤏᤡᤱᤔᤡᤜᤠ᤹ᤗᤠᤶ ᤀᤠᤛᤧ᤺ᤵᤋᤧ᤹ᤀᤥ. ᤁᤢ᤹ᤀᤡᤃᤧᤓᤧᤶᤒᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥᤗᤠᤶᤒᤠ ᤀᤠᤛᤧᤴᤍᤧ᤹ᤀᤥ. ᤗ᤹ᤖᤡᤰ ᤀᤠᤱᤃᤠ᤹ ᤐᤠ᤺ᤳᤋᤢᤱᤅᤠᤱ ᤘᤠ᤹ᤒᤡ᥅

²⁴ ᤗᤢ. ᤀᤠᤱᤃᤠ᤹ ᤏᤡᤛᤠᤶ ᤀᤠᤜᤢ᤹ᤖᤧ᤹ᤀᤥ. ᤜᤧᤰᤁᤩᤠᤱ ᤀᤠᤀᤠᤵᤋᤡᤰᤁᤧᤴ ᤀᤥᤛᤣᤴ ᤀᤠᤎᤠᤰᤋᤧ᤹ᤀᤥ ᤜᤧᤰᤁᤩᤠᤱ ᤛᤫᤠ᤺ᤳ ᤕᤢᤱᤅᤠᤀᤠᤱ ᤂᤧᤵᤛᤢᤱᤗᤥ॥

²⁵ ᤛᤧᤰᤂᤠᤒᤠ ᤐᤠ᤺ᤴᤏᤡᤴ ᤏᤛᤠᤴ ᤆᤥ᤺ᤰᤔᤠ ᤛᤢᤰᤋᤧᤳᤗᤥ. ᤁᤖ ᤂᤧᤏᤡ᤹ ᤐᤠ᤺ᤴᤏᤡᤸᤗᤧ ᤌᤣᤀᤠᤱ ᤁᤢᤒᤣ ᤜᤥᤵᤗᤥ॥

²⁶ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤛᤢᤖᤡᤳ ᤜᤧᤰᤁᤣᤖᤰ ᤂᤡᤏᤡ᤹ ᤁᤧᤀᤡ᤺ᤳᤋᤢᤶᤗᤥ. ᤜᤧᤰᤁᤣᤏᤧᤓᤃᤪ ᤌᤣᤀᤠᤱ ᤂᤧᤴ ᤏᤡᤱᤛᤠᤱ ᤁᤧᤒᤢᤰᤐᤠ ᤀᤠᤒᤠ᤺ᤴᤏᤡᤸᤗᤧ ᤏᤢᤃᤵᤐᤡᤴ ᤕᤠᤵᤔᤡ ᤁᤧᤒᤡᤖᤡᤒᤠᤒᤣ᥅

²⁷ ᤕᤧᤳᤇᤠᤒᤠᤜᤠ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤁᤧᤈᤥᤃᤢᤶᤛᤡᤶᤔᤠᤱ ᤁᤧᤛᤱᤄᤢᤶᤛᤡᤶᤗᤥ ᤜᤧᤰᤁᤩᤠᤱ ᤂᤡᤏᤡ᤹ ᤕᤠᤱ ᤁᤧᤗᤧᤰᤋᤢᤶᤗᤥ॥ ᤀᤠᤒᤠᤅᤣ ᤐᤣᤛᤠᤱᤒᤠ ᤋᤣ᤺ᤱᤈᤢᤶᤜᤠ᤹ ᤗᤠᤶᤒᤠᤀᤠᤱ ᤕᤖᤡᤰ ᤀᤡᤴᤎᤠ ᤁᤧᤃᤥ᤺ᤳᤋᤢᤶᤗᤥ᥄

²⁸ ᤜᤧᤰᤁᤣ᤺ᤸᤗᤧ ᤀᤠᤸᤗ ᤀᤠᤱᤃᤠ᤹ ᤀᤥᤀᤠᤔᤧᤳᤋᤧᤶᤔᤧ᤹ᤀᤥ. ᤀᤠᤱᤃᤠ᤹ ᤀᤡᤱᤗᤧᤰ ᤔᤧᤒᤠ᤺ᤳᤋᤠᤴᤗᤥ॥

²⁹ ᤂᤧᤏᤡ᤹ ᤕᤖᤡᤰ ᤁᤧᤒᤠᤖᤡᤀᤠᤱ ᤁᤧᤘᤕᤡᤖᤥ. ᤀᤠᤗᤠᤃᤡ ᤛᤠ᤹ᤖᤡᤰ ᤔᤧᤴᤘᤠ᤹ᤔᤏᤠᤒᤠ ᤐᤥ᤺ᤰᤂᤧᤖᤥ॥ ᤀᤠᤱᤃᤠ᤹ ᤕᤠᤵᤔᤡ ᤐᤠᤴ ᤀᤠᤴᤎᤡᤰᤋᤧᤶᤔᤡᤴᤏᤧ᤹ᤀᤥ. ᤁ᤹ᤕᤥ ᤀᤠᤱᤃᤠ᤹ ᤏᤛᤠ᤺ᤴᤛᤠᤒᤠ ᤐᤥᤱᤅᤠᤒᤠ ᤐᤠ᤺ᤴᤏᤡᤸᤗᤧᤴᤏᤠᤱ ᤛᤣ᤺ᤴᤗᤠᤵ ᤘᤠ᤹ᤖᤥ॥

³⁰ ᤀᤠᤱᤃᤠ᤹ ᤀᤡᤱᤗᤧᤰ ᤐᤠ᤺ᤳᤋᤠᤖ ᤐᤳᤋᤠ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤀᤡ᤺ᤳᤋᤢᤶᤗᤥ॥ ᤌᤣ ᤛᤧᤰᤂᤠ ᤏᤢ ᤀᤡᤱᤗᤧᤰ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤛᤧᤶᤔᤠ ᤔᤧᤛᤢᤰᤁᤠᤴᤒᤡ᥅