ᤀᤕᤢᤒ 5 - LIFOTNT

¹ ᤀᤕᤢᤒᤣ. ᤂᤧᤏᤧ᤹ ᤑᤠ᤹ᤔᤠᤖᤧ ᤗᤠᤃᤡ ᤁᤢᤓᤠ ᤔᤏᤠᤎᤡᤰ ᤀᤢ᤺ᤳᤋᤧ᤹ᤀᤠᤱ ᤀᤥᤔᤧᤳᤋᤧ᤹ᤏᤠ. ᤂᤧᤏᤧ᤹ ᤀᤠᤳᤋᤡᤸᤗᤧ ᤏᤢᤃᤵ ᤐᤡᤔᤠ ᤁᤧᤛᤢᤰᤐᤣ᥅ ᤀᤠᤳᤋᤡᤴ ᤔᤠᤱᤗᤠᤀᤡᤱᤒᤠ ᤗᤧᤵᤔᤠᤱ ᤂᤧᤏᤧ᤹ ᤁᤧᤏᤢ᤺ᤱᤒᤣ᥅

² ᤛᤧᤰᤂᤠᤛᤠᤱ ᤛᤡᤰᤐᤥ᤺ᤰᤔᤠᤸᤗᤧ ᤀᤍᤱ ᤔᤏᤠᤴ ᤛᤩᤧᤖᤢᤖᤥ. ᤜᤧᤰᤁᤩᤠᤱ ᤏᤠᤜᤧᤶᤔᤠᤸᤗᤧ ᤏᤡᤱᤘᤠ᤹ ᤁᤧᤛᤢ᤺ᤶᤒᤠ ᤔᤏᤠᤴ ᤛᤧᤖᤢᤖᤥ॥

³ ᤀᤠᤱᤃᤠ᤹ ᤀᤍᤱ ᤔᤏᤠᤜᤠ᤹ ᤐᤡᤍᤡ᤹ ᤔᤧᤸᤗ᤹ᤀᤣ ᤔᤧᤕᤢᤅᤧᤒᤠ ᤏᤡᤛᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ. ᤁᤖ ᤜᤰᤆᤄᤳ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜᤡᤶᤜᤠ᤹ᤀᤥ ᤛᤠᤰᤔᤢᤖᤠ ᤔᤠᤱᤍᤣ ᤌᤠᤖᤥ॥

⁴ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤠᤀᤣᤜᤠ᤹ ᤀᤠᤵᤑᤠᤸᤗᤧᤀᤠᤱ ᤌᤣᤀᤠᤱ ᤔᤧᤸᤗ᤹ᤀᤣ ᤔᤧᤴᤘᤠ᤹ᤏᤧᤸᤗᤥ॥ ᤋᤢ᤺ᤴᤍᤣ᤹ ᤏᤠᤶᤗᤠ ᤔᤧᤍᤢᤔᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤧᤵᤔᤠᤱ ᤁᤧᤒᤠ᤺ᤵᤐᤠ ᤁᤧᤒᤡᤒᤠ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤶᤒᤥᤱᤏᤧᤸᤗᤥ॥

⁵ ᤂᤧᤸᤗᤧ ᤁᤢᤒᤥᤃᤢᤃᤧᤴ ᤁᤢᤈᤠᤴ ᤁᤢᤛᤧᤳᤁᤧᤗᤠ᤺ᤰᤐᤠᤜᤠ᤹ᤖᤧ ᤔᤧᤈᤖᤥ. ᤋᤡᤱᤃᤪᤣᤰᤗᤠ ᤗᤢᤶᤔᤥ ᤁᤧᤗᤡᤱᤒᤧᤴᤏᤠᤱ ᤔᤧᤍᤣ᤹ᤖᤢᤖᤥ. ᤜᤧᤰᤁᤩᤠᤱ ᤁᤢᤘᤠᤁᤧᤔᤡ᤺ᤰᤐᤠᤜᤠ᤹ᤖᤧ ᤂᤧᤸᤗᤧ ᤁᤢᤕᤠᤱᤛᤠᤁᤢᤴᤎᤣᤀᤥ ᤔᤡᤰᤔᤧᤃᤣ᤺ᤳᤋᤢᤖᤥ॥

⁶ ᤌᤣᤀᤠᤱᤓᤧᤸᤗᤧ ᤕᤧᤳᤋᤢᤰᤂᤣᤴ ᤂᤠᤶᤔᤥᤗᤠᤶ ᤔᤧᤗ᤺ᤴᤏᤧᤸᤗᤥ. ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤂᤠᤶᤒᤣ᤺ᤰᤔᤥᤗᤠᤶ ᤔᤧᤗᤡᤱᤏᤧᤸᤗᤥ॥

⁷ ᤁᤖ ᤔᤡᤀᤥᤗᤠᤶ ᤔᤡᤛᤣ᤺ᤰᤁᤡᤴ ᤌᤠ᤺ᤱ ᤗ᤺ᤴᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤔᤏᤠ᤺ᤸᤗᤧ ᤀᤠᤒᤠᤅᤣᤀᤣ ᤋᤢᤰᤂᤣ ᤗᤠᤰᤂᤣᤜᤠ᤹ ᤋᤠᤖᤢᤖᤥ॥

⁸ ᤀᤰᤋᤱᤒᤠ ᤐᤠᤴ ᤀᤠᤱᤃᤠ᤹ᤀᤥ ᤋᤩᤧᤒᤠ ᤁᤢᤛᤡᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤢᤕᤧᤱ ᤆᤥᤃᤢᤱᤒᤠ ᤘᤕᤧᤔᤧᤸᤗᤥ. ᤜᤧᤰᤁᤩᤠᤱ ᤀᤠᤒᤠᤅᤣ ᤀᤠᤍᤢ᤺ᤴᤍᤣ ᤀᤠᤏᤠᤶᤗᤠᤜᤠ᤹ ᤂᤢᤏᤧ᤹ ᤁᤢᤍᤃᤡ ᤋᤥ᤺ᤴᤍᤢᤱᤒᤠ ᤘᤕᤧᤔᤧᤸᤗᤥ॥

⁹ ᤂᤢᤏᤧ᤹ ᤐᤕᤶ ᤕᤶᤒᤠ ᤁᤢᤕᤠ᤺ᤶᤒᤰᤜᤠ᤹ ᤀᤠᤏᤡ᤹ ᤁᤢᤛᤡᤱ ᤏᤡ᤺ᤵᤔᤠ ᤀᤠᤴᤇᤢᤰᤋᤢᤶᤔᤡᤴᤗᤥ. ᤏᤡᤱᤘᤠ᤹ ᤁᤧᤔᤠᤒᤠ ᤁᤢᤕᤠ᤺ᤶᤒᤰᤜᤠ᤹ᤖᤧᤴ ᤀᤡ᤺ᤴᤍᤥ ᤜᤥᤵᤗᤥ॥

¹⁰ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤠᤱᤃᤧᤴᤍᤡᤱ ᤘᤠᤜᤡᤳ ᤌᤠᤖ ᤕᤠ᤺ᤴᤍᤢᤖᤥ ᤜᤧᤰᤁᤩᤠᤱ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤜᤠ᤹ ᤂᤢᤏᤧ᤹ ᤆᤫᤠ᤺ᤳᤋᤡᤸᤗᤧ ᤘᤠᤖᤰᤂᤢᤖᤥ॥

¹¹ ᤀᤥᤖᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠᤜᤠ᤹ ᤌᤠ᤺ᤱ ᤑᤥ᤺ᤰᤂᤢᤛᤡᤖᤥ. ᤂᤶᤒᤩᤠᤱ ᤔᤧᤖᤡᤱ ᤁᤧᤎᤰᤐᤠᤜᤠ᤹ ᤂᤢᤏᤧ᤹ ᤁᤶᤒᤪᤠᤱ ᤔᤧᤳᤋᤢᤛᤡ᤹ᤖᤥ॥

¹² ᤀᤡᤛᤫᤠᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤛᤣ᤺ᤰᤁᤡᤴ ᤂᤢᤏᤧ᤹ ᤜᤏᤧ ᤌᤣᤏᤠᤎᤣᤒᤠ ᤆᤥᤃᤢ ᤐᤡᤖᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤢᤛᤠᤱ ᤁᤧᤗᤒᤠ ᤔᤧᤶᤒᤥᤱᤏᤧᤸᤗᤥ॥

¹³ ᤂᤢᤏᤧ᤹ ᤛᤡᤰᤁᤢᤶᤛᤠᤒᤠᤜᤠ᤹ ᤂᤢᤏᤡ᤹ ᤆᤠ᤺ᤳᤆᤠ᤺ᤳ ᤗ᤹ᤔᤠᤀᤥ ᤋᤧᤶᤛᤢᤛᤡᤖᤥ. ᤜᤧᤰᤁᤩᤠᤱ ᤀᤡᤱᤗᤧᤰᤛᤫᤠᤒᤠᤜᤠ᤹ᤖᤧ ᤆᤥ᤺ᤰᤔᤠ ᤔᤧᤃᤥ᤺ᤳᤋᤢᤒᤠ ᤕᤠ᤺ᤶᤒᤰᤜᤠ᤹ ᤑᤥ᤺ᤳᤋᤢ ᤐᤡᤖᤢᤛᤡᤖᤥ॥

¹⁴ ᤗᤧᤴᤍᤡᤰ ᤔᤛᤣᤖᤠ ᤂᤧᤱᤜᤠ᤹ᤖᤧ ᤂᤠᤔᤠᤰᤔᤠᤴ ᤔᤧᤍᤢᤔᤢᤖᤥ. ᤜᤧᤰᤁᤩᤠᤱ ᤛᤧᤴᤍᤡᤰ ᤜᤧᤰᤁᤣ ᤛᤛᤵ ᤛᤛᤵ ᤗ᤹ᤖᤡᤰ ᤔᤧᤛᤵᤛᤢᤖ ᤗᤠᤱᤔᤧᤄᤣ᤺ᤰᤗᤥ॥

¹⁵ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤱᤃᤧᤛᤠ᤹ᤒᤠᤜᤠ᤹ ᤛᤡᤔᤧᤴᤗᤠᤶ ᤛᤧ᤺ᤵᤋᤢᤛᤡᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤌᤣᤀᤠᤱ ᤔᤧᤱᤃᤵᤔᤏᤠᤒᤠᤜᤠ᤹ ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤠᤜᤠ᤹ᤗᤠᤶ ᤋᤠᤱᤛᤧ᤺ᤵᤋᤢᤛᤡᤖᤥ॥

¹⁶ ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤕᤠᤱᤃᤧ᤹ᤛᤠᤒᤠᤜᤠ᤹ ᤗᤠᤶᤀᤥᤔᤧᤵᤔᤠ ᤏᤡᤱᤛᤠᤱ ᤐᤡᤖᤢᤛᤡᤖᤥ. ᤜᤧᤰᤁᤩᤠᤱ ᤔᤏᤠᤜᤠ᤹ ᤔᤧᤴᤘᤠ᤹ᤔᤏᤠᤒᤠ ᤐᤠᤴ ᤁᤧᤔᤧᤵᤐᤠᤜᤠ᤹ ᤐᤠ᤺ᤵᤔᤠ ᤔᤧᤓᤠ᤺ᤰᤋᤢᤛᤡᤸᤗᤥ॥

¹⁷ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤧᤴᤌᤡᤶ ᤕᤠᤰᤋᤢᤒᤠ ᤔᤏᤠ᤺ᤱᤃ ᤔᤢ᤹ᤀᤡᤛᤠᤒᤠᤖᤥ᥄ ᤐᤕᤶ ᤕᤶᤒᤠ ᤔᤢᤰᤛᤠᤶᤍᤠᤱᤒᤧᤸᤗᤧ ᤀᤠᤓᤧ᤺ᤰᤁᤡᤸᤗᤧ ᤀᤠᤳᤋᤡᤸᤗᤧᤀᤠᤱ ᤏᤡᤱᤘᤠ᤹ ᤋᤢᤰᤔᤠ ᤔᤣ᤺ᤴᤗᤥ॥

¹⁸ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤠ᤺ᤴᤍᤢᤒᤠ ᤕᤠᤱᤄᤣ᤺ᤰᤁᤥ ᤂᤢᤏᤧ᤹ᤀᤣ ᤛᤡᤍᤠ᤹-ᤐᤠ᤺ᤴᤍᤠ᤹ ᤔᤧᤳᤋᤢᤖᤥ॥ ᤜᤠᤒᤠ ᤂᤢᤏᤧ᤹ ᤁᤢᤜᤢᤰᤁᤡᤸᤗᤧᤀᤣ ᤂᤧᤏᤧ᤹ ᤁᤧᤄᤠ᤺ᤴᤇᤠᤱ ᤁᤧᤘᤣ᤺ᤴᤏᤠᤱᤗᤥ॥

¹⁹ ᤂᤧᤏᤧ᤹ ᤀᤧᤳᤗᤧᤱ ᤁᤧᤛᤠᤰᤐᤠ ᤋᤢᤰᤂᤣ ᤗᤠᤰᤂᤣ ᤁᤧᤍᤢᤔᤢᤛᤠᤱ ᤂᤢᤏᤧ᤹ ᤁᤧᤛᤧ᤺ᤵᤗᤥ. ᤏᤢᤛᤡᤗᤧᤱᤒᤠ ᤜᤠᤴᤋᤡ᤺ᤸᤗᤧᤀᤠᤱ ᤂᤧᤏᤧ᤹ ᤁᤧᤴᤇᤢᤏᤧᤸᤗᤥ॥

²⁰ ᤛᤠᤰᤘᤠᤴ ᤋᤠᤒᤠ ᤕᤧᤶᤔᤥ ᤂᤢᤏᤧ᤹ ᤂᤧᤏᤧ᤹ ᤁᤧᤜᤡᤱᤅᤠᤱ ᤁᤧᤃᤳᤗᤥ ᤜᤧᤰᤁᤩᤠᤱ ᤂᤧᤏᤧ᤹ ᤌᤱᤅᤥ ᤁᤧᤎᤠᤀᤠᤱ ᤁᤧᤘᤠ᤹ᤀᤡᤸᤗᤧ ᤛᤡᤔᤧᤴᤗᤠᤶᤒᤠ ᤂᤢᤏᤧ᤹ ᤋᤠᤱᤃᤧᤛᤧ᤺ᤵᤗᤥ॥

²¹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤆᤠ᤺ᤳᤌᤡ ᤐᤣ᤺ᤰᤔᤥᤗᤠᤶᤒᤠ ᤁᤧᤍᤠᤱᤗᤥ ᤜᤧᤰᤁᤩᤠᤱ ᤔᤧᤰᤔᤠᤛᤡᤔᤠ ᤋᤠ᤺ᤸᤗᤧ ᤋᤠᤱᤃᤧᤛᤧ᤺ᤵᤗᤥ॥

²² ᤔᤧᤰᤔᤠ ᤏᤢ ᤛᤠᤰᤔᤠᤱ ᤋᤠ᤺ᤸᤗᤧ ᤂᤧᤏᤧ᤹ ᤁᤧᤀᤣ᤺ᤳᤗᤥ. ᤂᤧᤏᤧ᤹ ᤋᤠᤶᤓᤢᤱ ᤌᤰᤛᤠᤜᤠ᤹ᤏᤢ ᤁᤡᤔᤠ ᤕᤱᤔᤠ ᤔᤧᤒᤥᤱᤏᤧᤴᤗᤥ॥

²³ ᤂᤧᤏᤧ᤹ ᤁᤧᤰᤆᤢ ᤁᤧᤎᤥᤱᤅᤡᤸᤗᤧ ᤀᤡᤰᤋᤠᤵᤐᤥ ᤗᤢᤱ ᤔᤧᤕᤠᤰᤏᤧᤴᤗᤥ. ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤂᤧᤏᤧ᤹ ᤜᤠᤴᤋᤡ ᤁᤧᤔᤧᤴᤈᤥ᤺ᤰᤏᤧᤸᤗᤥ॥

²⁴ ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤀᤠᤒᤠᤅᤣ ᤛᤠ᤺ᤱᤃᤠᤜᤡᤶᤔᤥ ᤌᤣᤀᤠᤱ ᤔᤧᤸᤗ᤹ᤀᤣ ᤕᤠᤱᤃᤧᤎᤥᤰᤁᤠᤱ ᤁᤧᤏᤧᤖᤥ. ᤜᤧᤰᤁᤩᤠᤱ ᤁᤧᤔᤧᤸᤗᤢᤰ ᤗᤢᤵᤜᤠ᤹ ᤀᤥᤃᤧᤔᤧᤳᤋᤢᤛᤡᤸᤗᤧ ᤁᤧᤖᤧᤰ ᤏᤢᤖᤡᤰ ᤔᤧᤘᤠ᤹ᤒᤠ ᤁᤧᤍᤢᤔᤢᤛᤡᤖᤥ॥

²⁵ ᤁᤧᤎᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ ᤕᤖᤡᤰ ᤔᤧᤒᤥᤱᤗᤥ. ᤂᤧᤏᤧ᤹ ᤁᤧᤛ᤻ᤛᤠ ᤁᤧᤀᤣᤜᤠ᤹ᤀᤠᤱ ᤂᤠᤶᤒᤠᤱᤅᤥ ᤁᤧᤕᤢᤱᤒᤠ ᤕᤠᤴ ᤁᤢᤛᤡᤱ ᤏᤡ᤺ᤳᤔᤧᤴᤍᤧᤳᤋᤣ ᤕᤖᤡᤰ ᤔᤧᤒᤥᤱᤗᤥ॥

²⁶ ᤐᤥᤃᤢᤃᤧᤴ ᤁᤢᤈᤠ ᤛᤡᤴ ᤋᤢᤶᤔᤠᤱ ᤁᤢᤜᤧᤰᤔᤠ ᤕᤧᤶ ᤌᤠᤖᤡᤰ ᤕᤧᤵᤗᤥ ᤜᤠᤒᤠᤜᤧᤰᤁᤣ ᤗ᤹ᤖᤡᤰ ᤂᤧᤏᤧ᤹ ᤁᤧᤎᤠ᤺ᤰ ᤆᤠ᤹ᤖ ᤁᤧᤜᤡᤱᤗᤥ॥

²⁷ ᤀᤕᤢᤒᤣ. ᤀᤠᤏᤡᤃᤣ ᤕᤖᤡᤰ ᤏᤡᤖᤢᤶᤒᤧᤀᤠᤱ ᤁᤴ ᤐᤠ᤺ᤴᤏᤡᤴ ᤜᤢ᤹ᤛᤡᤱᤅᤡᤃᤧᤒᤠᤖᤥ॥ ᤁᤴ ᤛᤧᤰᤂᤠᤒᤠ ᤆᤥᤰᤗᤥ. ᤁᤴ ᤐᤠ᤺ᤴᤏᤡᤴ ᤂᤧᤏᤧ᤹ ᤂᤧᤶᤔᤠ ᤋᤧᤴᤍᤧ᤹ᤀᤥ॥