ᤀᤕᤢᤒ 42 - LIFOTNT

¹ ᤂᤧᤒᤩᤠᤱ ᤀᤕᤢᤒᤖᤧ ᤕᤜᤘᤣ ᤍᤠᤱᤒᤠᤴ ᤏᤢᤃᤵ ᤐᤡᤖᤢ॥

ᤀᤕᤢᤒ—

² “ᤕᤜᤘᤣ ᤍᤠᤱᤒᤠᤀᤣ. ᤀᤠᤍᤠᤱᤒᤠ ᤔᤢᤰᤛᤠᤶᤍᤠᤱᤒᤠ ᤁᤧᤈᤥᤰᤐᤧᤴ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥ ᤀᤠᤍᤠᤱᤒᤠᤖᤧ ᤌᤣ ᤏᤡᤱᤘᤠ᤹ ᤁᤧᤀᤡ᤺ᤳᤋᤢ. ᤂᤧᤴ ᤆᤥ᤺ᤰᤔᤠ ᤁᤧᤛᤢᤰᤋᤢᤖᤥ॥

³ ᤂᤧᤏᤧ᤹ᤃ ᤀᤰᤂᤣᤗ᤹ᤖᤡᤰ ᤀᤠᤱᤃᤠ᤹ ᤐᤠᤴ ᤛᤧ᤺ᤴᤃᤧᤍᤥᤀᤠᤖᤥ. ‘ᤀᤍᤱᤐᤠᤴ ᤁᤧᤒᤠ᤺ᤵᤐᤠᤀᤠᤱ ᤀᤠᤏᤡᤱᤛᤣ᤺ᤰᤁᤡᤴ ᤜᤏᤧᤒᤠ ᤆᤥ᤺ᤰᤔᤠ ᤁᤧᤃᤥ᤺ᤵᤐᤠ ᤜᤠ᤺ᤳᤏᤧᤴᤒᤣ᥅’ ᤛᤧᤰᤂᤠᤀᤣ ᤀᤠᤱᤃᤠ᤹ ᤁᤢᤛᤡᤱ ᤔᤧᤏᤡ᤺ᤳᤋᤠᤴᤒᤠ ᤀᤡᤃᤪ ᤔᤧᤗᤧᤀᤠᤴᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥

⁴ “‘ᤀᤠᤱᤃᤠ᤹ ᤐᤠ᤺ᤳᤋᤠᤸᤗᤧ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤵᤛᤧ᤹ᤀᤥ ᤜᤧᤰᤁᤩᤠᤱ ᤏᤢᤃᤵ ᤐᤡᤔᤠ ᤕᤠᤖᤡᤵ ᤐᤥ᤺ᤰᤂᤧ᤹.’ ᤁᤧᤔᤧᤳᤋᤠᤱᤗᤥ॥

⁵ ᤂᤧᤴ ᤕᤧᤶᤔᤥ ᤀᤣᤕᤠᤱᤒᤠᤜᤠ᤹ᤖᤧ ᤁᤧᤕᤠ᤺ᤶᤒᤣᤀᤥ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤗᤰ ᤗᤧᤛᤢᤱᤅᤠᤱ ᤘᤕᤧᤖᤥ ᤁᤖ ᤀᤠᤸᤗᤃ ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤔᤡᤰᤁᤡᤸᤗᤧᤀᤣ ᤂᤧᤏᤧ᤹ ᤏᤡᤏᤧᤖᤥ॥

⁶ ᤀᤠᤸᤗ ᤀᤠᤱᤃᤠ᤹ ᤆᤩᤠ ᤐᤠ᤺ᤳᤋᤢᤱᤅᤠᤱ ᤘᤕᤠᤱ ᤂᤧᤸᤗᤧ ᤗᤠᤃᤡ ᤀᤠᤱᤃᤠ᤹ ᤛᤡᤖᤡᤱ ᤔᤀᤠᤖᤥ ᤜᤧᤰᤁᤩᤠᤱ ᤂᤠᤶᤜᤡ᤺ᤰ ᤏᤢ ᤂᤠᤵᤐᤢᤀᤥ ᤕᤢᤱᤅᤠᤀᤠᤱ ᤗᤠᤕᤥᤗᤠᤶᤒᤠ ᤜᤡ᤺ᤴᤇᤡᤱᤅᤠᤖᤥ॥”

ᤁᤢᤏᤢᤵᤔᤠ

⁷ ᤀᤕᤢᤒᤧᤴᤏᤢ ᤐᤠᤖᤧ ᤆᤢᤖᤧᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤣᤗᤡᤐᤈᤧᤴ ᤔᤧᤳᤋᤢ. “ᤂᤧᤏᤧ᤹ ᤜᤧᤰᤁᤩᤠᤱ ᤁᤧᤴᤍᤣ᤺ᤱᤒᤠ ᤏᤧᤳᤇᤡᤏᤢ ᤀᤠᤱᤃᤠ᤹ ᤀᤠᤛᤡᤰ ᤐᤥᤃᤧᤀᤠᤱ ᤘᤠ᤹ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤀᤕᤢᤒᤖᤧ ᤜᤧᤰᤁᤣ ᤂᤡᤏᤡ᤹ ᤀᤠᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤛᤧᤰᤂᤠ ᤐᤠᤴ ᤁᤧᤶᤒᤠ᤺ᤳᤋᤢᤶᤔᤡᤴ॥

⁸ ᤀᤠᤸᤗ ᤏᤢᤛᤡ ᤏᤢᤛᤡ ᤁᤢᤶᤒᤠᤒᤠ ᤐᤡᤳ ᤜᤧᤰᤁᤩᤠᤱ ᤔᤧᤸᤗᤢᤰᤜᤠ᤹ ᤋᤣ᤹ᤖᤧᤶᤛᤡᤶᤔᤧ᤹ᤀᤠᤱ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤀᤕᤢᤒᤖᤥ ᤐᤣᤃᤧᤶᤔᤧ᤹ ᤂᤧᤒᤩᤠᤱ ᤂᤧᤴ ᤌᤰᤛᤠᤜᤠ᤹ ᤀᤠᤒᤠᤅᤣ ᤂᤡᤏᤡ᤹ ᤗᤠᤃᤡ ᤛᤡᤍᤢᤱᤈᤓᤠ ᤆᤥᤃᤧᤶᤔᤧ᤹॥ ᤂᤡᤏᤡ᤹ ᤗᤠᤃᤡ ᤀᤕᤢᤒᤖᤧ ᤐᤣᤗᤡ ᤑᤠᤰᤋᤢ ᤁᤧᤒᤡᤖᤡ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤸᤗᤧ ᤐᤣᤗᤡ ᤑᤠᤰᤋᤢᤒᤠᤴ ᤂᤧᤵᤛᤢᤱᤅᤠᤱ ᤏᤢᤃᤵ ᤐᤡᤖᤢᤱ᤹ ᤜᤧᤰᤁᤩᤠᤱ ᤂᤡᤏᤡ᤹ ᤀᤍᤱᤐᤠᤴ ᤁᤧᤒᤠᤖᤡᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤔᤧᤗ᤹ᤀᤠᤴ॥ ᤀᤕᤢᤒᤖᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤀᤠᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤁᤧᤶᤒᤠᤖᤡᤴ॥”

⁹ ᤜᤧᤰᤁᤩᤠᤱ ᤀᤣᤗᤡᤐᤈ ᤋᤣᤔᤠᤏᤡ. ᤒᤡᤸᤍᤍ ᤛᤢᤜᤡ ᤏᤢ ᤛᤥᤐᤖ ᤏᤔᤠᤋᤡᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤜᤧᤰᤁᤣ ᤔᤧᤈᤥᤃᤢ ᤂᤧᤒᤩᤠᤱ ᤀᤕᤢᤒᤖᤧ ᤐᤣᤗᤡ ᤑᤠᤰᤋᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤵᤛᤢ॥

¹⁰ ᤀᤕᤢᤒᤖᤧ ᤁᤢᤴᤈᤢᤶ ᤛᤢᤶᤛᤡᤖᤧ ᤂᤢᤏᤡ᤹ ᤗᤠᤃᤡ ᤐᤣᤗᤡ ᤑᤠᤰᤋᤢᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤢᤏᤢ᤹ᤔᤠ ᤁᤢᤍᤠᤔᤠ ᤐᤠ᤺ᤴᤜᤠ᤹ ᤏᤢ᤺ᤰᤋᤢ ᤐᤡᤖᤢ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤠᤱᤛᤠᤁᤢᤴᤎᤣᤴ ᤋᤃᤡᤏᤢ᤺ᤸᤗᤧᤀᤠᤱ ᤏᤡᤗᤧᤱ ᤕᤠᤖᤡᤰ ᤕᤖᤡᤰ ᤑᤥᤛᤢ ᤐᤡᤖᤢ॥

¹¹ ᤀᤕᤢᤒᤖᤧ ᤁᤧᤖᤧᤰ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹. ᤁᤢᤴᤏᤧ᤹ ᤁᤢᤴᤛᤠ᤹ᤜᤠ᤹ ᤜᤧᤰᤁᤩᤠᤱ ᤋᤃᤡᤒᤠ ᤁᤢᤴᤍᤣᤱ ᤁᤢᤴᤈᤢᤶᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧ ᤂᤧᤒᤩᤠᤱ ᤁᤢᤜᤡᤶᤔᤥ ᤂᤢᤏᤧ᤹ᤏᤢ ᤛᤠᤓ᤺ᤱᤈᤠ ᤔᤧᤈ॥ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤢᤛᤶᤎᤠᤱ ᤋᤠᤖᤢᤒᤠ ᤁᤧᤖᤧᤰ ᤁᤢᤍᤢᤰᤂᤣ ᤁᤢᤗᤠᤰᤂᤣ ᤐᤠ᤺ᤴᤜᤠ᤹ᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤜᤠᤱᤜᤠᤱ ᤔᤧᤔᤧᤳᤋᤢᤖ ᤀᤠ᤺ᤴᤇᤡᤱᤔᤠ ᤔᤧᤒᤡᤖᤢ॥ ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤏᤧ᤹ ᤁᤢᤓᤠ ᤕᤢᤵᤐᤠ ᤏᤢ ᤗᤳᤇᤠ ᤗᤳᤇᤠ ᤛᤠᤶᤔᤩᤠᤱ ᤛᤫᤠᤃᤣᤵ ᤔᤧᤒᤡᤖᤢ॥

¹² ᤕᤜᤘᤣ ᤍᤠᤱᤒᤧᤸᤗᤧ ᤀᤕᤢᤒᤧᤴ ᤀᤣᤃᤠᤱᤛᤔᤠ ᤁᤢᤜᤡᤱᤔᤠ ᤕᤧᤶᤔᤥ ᤋᤃᤡᤒᤠ ᤕᤧᤶᤔᤡᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤔᤢ᤹ᤀᤡᤛᤠᤶ ᤐᤡᤖᤢ॥ ᤀᤕᤢᤒᤧᤴ ᥇᥊.᥆᥆᥆ ᤔᤧᤸᤗᤢᤰ. ᥌.᥆᥆᥆ ᤀᤢᤔᤣ. ᥇.᥆᥆᥆ ᤁᤢᤃᤠᤵ ᤐᤡᤳ ᤜᤧᤰᤁᤩᤠᤱ ᥇.᥆᥆᥆ ᤀᤍᤱ ᤌᤰᤛᤠᤜᤠ᤹ᤖᤧ ᤁᤢᤴᤍᤠᤱᤒᤠ ᤐᤥ᤺ᤰᤂᤧ॥

¹³ ᤂᤢᤏᤧ᤹ ᤏᤢᤛᤡ ᤕᤧᤶᤒᤡᤳᤇᤠ᤹ᤛᤠ ᤏᤢ ᤛᤢᤶᤛᤡ ᤔᤧᤴᤇᤢᤔᤠᤛᤠᤜᤠ᤹ᤖᤧ ᤂᤢᤏᤡ᤹ ᤐᤠ ᤐᤥ᤺ᤰᤂᤧ॥

¹⁴ ᤂᤢᤏᤧ᤹ ᤁᤢᤛ᤻ᤛᤠ ᤋᤢᤶᤔᤠᤸᤗᤧ ᤁᤢᤔᤡᤱ ᤕᤔᤡᤔᤠ. ᤛᤖᤢᤶᤔᤠᤸᤗᤧ ᤁᤢᤔᤡᤱ ᤁᤛᤡᤀᤠ ᤜᤧᤰᤁᤩᤠᤱ ᤑᤥ᤺ᤰᤘᤠᤔᤠᤸᤗᤧ ᤁᤢᤔᤡᤱ ᤁᤠᤖᤧᤏ-ᤜᤵᤐᤢᤁ ᤘᤠ᤺ᤳᤋᤢᤛᤡ॥

¹⁵ ᤗᤠᤈᤣ᤹ ᤁᤧᤖᤧᤰ ᤀᤕᤢᤒᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤜᤧᤰᤋᤱᤔᤠ ᤏᤢᤔᤠ ᤘᤣ᤹ ᤌᤡᤰᤁᤠᤱ ᤔᤧᤜᤥ᤺ᤵᤋᤧ॥ ᤁᤢᤶᤒᤠᤖᤧ ᤁᤢᤕᤠᤱᤛᤠᤁᤢᤴᤎᤣ᤺ᤸᤗᤧ ᤁᤢᤗᤰᤁᤡᤴ ᤂᤧᤱᤜᤠ᤹ ᤏᤢᤛᤠ᤹ᤑᤢ᤹ ᤜᤧᤰᤁᤣᤀᤣ ᤑ᤺ᤰᤂᤢ ᤐᤡᤖᤢᤛᤡ॥

¹⁶ ᤂᤧᤴ ᤀᤣᤃᤠᤱ ᤀᤕᤢᤒᤧᤴ ᤘᤣ᤹ ᥇᥊᥆ ᤋᤱᤒᤣ ᤌᤠᤖᤡᤰ ᤜᤡᤅᤧ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤔᤧᤴᤇᤠ᤹ ᤁᤢᤈᤰᤔᤧᤴᤇᤠ᤹ ᤏᤢ ᤁᤢᤒᤧᤴᤔᤣᤴᤇᤠ᤹ᤜᤠ᤹ ᤏᤡᤛᤢᤛᤡ॥

¹⁷ ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤕᤖᤡᤰ ᤋᤱᤒᤣ ᤌᤠᤖᤡᤰ ᤜᤡᤅᤧᤀᤠᤱ ᤔᤠᤛᤡᤱᤗᤥ॥