ᤀᤕᤢᤒ 4 - LIFOTNT

ᤌᤡᤰᤛᤡᤃᤣᤰᤐᤠ ᤋᤠ᤹ᤈᤧᤱ ( ᥊:᥇–᥇᥊:᥈᥈ ) ᤋᤣᤔᤠᤏᤒᤠ ᤀᤣᤗᤡᤐᤈᤖᤧ ᤐᤠ᤺ᤳᤋᤢ᤹

^1-2 ᤀᤕᤢᤒᤣ. ᤀᤠᤱᤃᤠ᤹ ᤐᤠ᤺ᤳᤋᤠᤒᤠᤀᤥ ᤂᤧᤏᤧ᤹ ᤜᤠᤱᤃᤧᤴ ᤛᤡᤰᤆᤠ ᤔᤧᤗᤥᤖᤧᤴᤏᤧ᤹ᤀᤥ. ᤀᤠᤸᤗ ᤀᤠᤱᤃᤠ᤹ ᤛᤫᤠ᤺ᤳ ᤕᤢᤱᤔᤠ ᤔᤧᤛᤢᤰᤁᤠᤴᤗᤥ॥

³ ᤀᤥᤔᤧᤳᤋᤧ᤹. ᤂᤧᤏᤧ᤹ ᤕᤖᤡᤰ ᤔᤏᤠᤜᤠ᤹ ᤏᤡᤛᤠᤶ ᤁᤧᤜᤢ᤹ᤖᤢᤛᤡᤖᤥ ᤜᤧᤰᤁᤩᤠᤱ ᤔᤧᤴᤎᤢᤶᤔᤏᤠᤒᤠᤜᤠ᤹ ᤛᤠ᤺ᤱᤃᤢ ᤛᤰᤔᤠ ᤁᤧᤒᤡᤖᤢᤛᤡᤖᤥ॥

⁴ ᤔᤧᤴᤎᤢᤶᤔᤏᤠᤒᤠ ᤏᤢ ᤁᤢᤛᤰᤔᤠ ᤔᤧᤴᤕᤠᤰᤔᤏᤠᤒᤠᤜᤠ᤹ ᤁᤧᤒᤠ᤺ᤴᤈᤠ᤺ᤰᤁᤡᤸᤗᤧ ᤋᤰᤋᤢᤛᤡᤖᤥ. ᤜᤧᤰᤁᤩᤠᤱ ᤁᤧᤏᤠᤒᤠ ᤁᤧᤄᤡ᤺ᤶᤒᤠ ᤕᤥ᤺ᤴᤈᤥ᤹ᤈᤥ᤹ᤒᤠᤜᤠ᤹ ᤁᤧᤒᤠ᤺ᤴᤏᤡᤸᤗᤧ ᤜᤠᤱᤜᤠᤱ ᤔᤧᤳᤋᤢᤛᤡᤖᤥ॥

⁵ ᤁᤴ ᤕᤧᤶᤔᤥ ᤋᤢᤰᤂᤣ ᤗᤠᤰᤂᤣᤜᤠ᤹ ᤁᤧᤗᤰᤁᤥ ᤀᤡᤖᤧᤍᤩᤧᤖᤥ॥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤠᤘᤧᤳ ᤕᤃᤧᤀᤠᤱ ᤘᤠ᤹ᤖᤥ ᤂᤧᤒᤩᤠᤱ ᤂᤧᤴ ᤌ᤺ᤵᤔᤠ ᤁᤧᤴᤇᤢᤰᤋᤢᤸᤗᤥ॥

⁶ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤛᤣ ᤔᤠᤱᤛᤧᤘᤠ ᤁᤧᤔᤧᤳᤋᤢᤖᤥ ᤜᤧᤰᤁᤩᤠᤱ ᤁᤧᤜᤡᤱᤔᤴ ᤑᤥᤋᤩᤠ ᤔᤣ᤺ᤴᤏᤣᤒᤠ ᤆᤥᤰᤗᤥ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗᤛᤠᤱ ᤂᤧᤏᤧ᤹ ᤏᤛᤠᤴ ᤏᤢ ᤏᤡᤱᤛᤠᤱ ᤁᤵᤔᤠ ᤐᤥᤱᤗᤥ॥

⁷ ᤀᤠᤸᤗ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ᤂᤧᤶᤒᤩᤠᤱ ᤐᤠ᤺ᤳᤋᤧᤛᤠ᤹ᤖᤧᤀᤥ᥄ ᤌᤣ ᤁᤢᤍᤥ᤺ᤵᤔᤠ ᤔᤏᤠᤴ ᤛᤩᤧᤒᤠ ᤘᤠ᤹ᤒᤡ᥅ ᤛᤠᤶᤕᤥᤒᤠ ᤔᤏᤠᤴ ᤔᤧᤃᤧᤒᤠ ᤘᤠ᤹ᤒᤡ᥅

⁸ ᤀᤠᤱᤃᤠ᤹ ᤔᤏᤠᤜᤠ᤹ᤖᤧ ᤁᤢ᤹ᤀᤡᤓᤧᤶᤔᤠᤖᤧ ᤗᤠᤃᤡ ᤀᤡᤰᤋᤠᤵᤐᤡᤴ ᤔᤧᤎᤥ᤺ᤰᤂᤢᤖ ᤔᤧᤕᤠᤃᤧᤒᤠ ᤀᤠᤱᤃᤠ᤹ ᤏᤡᤛᤢᤱᤅᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠ ᤕᤠ᤹ᤖᤡ᤺ᤶᤒᤠᤴ ᤔᤧᤜᤣ᤹ᤖᤢᤒᤠᤴ ᤀᤥᤔᤧᤳᤋᤢᤱᤅᤠᤱ ᤘᤠ᤹ᤖᤥ॥ ᤀᤠᤸᤗᤥ ᤂᤧᤱᤜᤠ᤹ᤖᤧ ᤂᤧᤴ ᤋᤠᤵᤑᤧ᤺ᤶᤒᤠ ᤏᤢ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤂᤧᤱᤜᤠ᤹ᤖᤧ ᤔᤧᤄᤥᤛᤢᤀᤠᤱ ᤔᤧᤘᤠ᤹ᤖᤥ॥

⁹ ᤕᤶᤒᤠ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤜᤧᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤰᤔᤠ᤺ᤸᤗᤧ ᤂᤧᤱᤜᤠ᤹ ᤔᤧᤰᤂᤢᤛᤡᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤠᤰᤁᤧᤴᤏᤡᤸᤗᤧ ᤂᤧᤱᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤛᤡᤖᤥ॥

¹⁰ ᤋᤠᤰᤁᤧᤓᤧ᤹ᤒᤠᤜᤠ᤹ ᤁᤣᤒᤠ ᤜᤧᤰᤁᤣ ᤔᤧᤜᤢ᤺ᤰᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤀ᤺ᤰ ᤔᤧᤓᤠ᤺ᤰᤋᤢᤛᤡᤸᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤁᤣ᤺ᤱᤜᤠ᤹ ᤀᤧᤰᤂᤢ ᤐᤡᤖᤢᤛᤡᤖᤥ॥

¹¹ ᤁᤢᤓᤠ ᤛᤠ ᤆᤠᤔᤠ ᤔᤧᤱᤄᤥᤶᤏᤠᤒᤠ ᤂᤡᤖᤡᤱᤒᤠ ᤁᤣᤒᤠ ᤜᤧᤰᤁᤣ ᤂᤧᤱᤜᤠ᤹ ᤔᤧᤛᤡᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤠᤜᤠ᤹ ᤑᤢᤳᤇᤡᤱᤈᤩᤠ᤺ᤱ ᤔᤧᤛᤧ ᤔᤧᤒᤣ᤺ᤰᤗᤥ॥

¹² ᤌᤡᤰᤗᤧᤱ ᤗᤳᤇᤠ ᤀᤡᤱᤄᤱᤎᤡᤰ ᤛᤫᤠ᤺ᤳᤋᤠᤱ ᤔᤧᤒᤠ᤺ᤳᤋᤢᤖᤥ. ᤂᤧᤴ ᤛᤠ᤹ᤖᤡᤰ ᤛᤫᤠ᤺ᤳᤋᤠᤱ ᤀᤠᤱᤃᤠ᤹ ᤂᤧᤶᤔᤠᤀᤣ ᤔᤧᤴᤇᤢᤰᤐᤠᤴᤗᤥ॥

¹³ ᤀᤠᤱᤃᤠ᤹ ᤔᤢᤖᤢᤰ ᤂᤠᤖᤢᤰ ᤀᤡᤵᤛᤠᤱᤅᤠᤱ ᤀᤡᤔᤠᤱᤗᤥ. ᤁᤖ ᤀᤠᤛᤧᤵᤔᤠᤱᤅᤡᤸᤗᤧ ᤋᤠᤍᤠᤵ ᤛᤥᤖᤠᤱᤗᤥ॥

¹⁴ ᤀᤠᤱᤃᤠ᤹ ᤁᤡᤔᤠᤸᤗᤧ ᤌᤧᤃᤰᤁᤰ ᤕᤰᤂᤠᤱᤗᤥ. ᤕᤱᤔᤠ ᤁᤧᤵᤔᤠᤸᤗᤧ ᤀᤠᤎᤰᤁᤡᤴ ᤁᤧᤖᤧᤰ ᤆᤡᤖᤡᤶᤗᤡᤶᤏᤠ ᤕᤰᤂᤧᤖᤥ॥

¹⁵ ᤛᤢᤛᤢᤒᤠ ᤛᤢᤖᤡ᤺ᤳᤔᤠᤸᤗᤧ ᤀᤠᤏᤠᤖᤠᤴ ᤔᤢ᤺ᤳᤋᤢᤖᤥ. ᤁᤡᤔᤠᤸᤗᤧ ᤀᤠᤱᤃᤠ᤹ ᤀᤠᤈᤢᤱᤔᤢᤖᤡᤰ ᤐᤥᤃᤧᤖᤥ॥

¹⁶ ᤀᤠᤱᤃᤠ᤹ ᤂᤧᤵᤔᤥ ᤌᤣᤎᤡᤰᤁᤡ ᤕᤧᤒᤧᤒᤠ ᤏᤡᤛᤢᤱᤗᤥ. ᤀᤠᤱᤃᤠ᤹ ᤂᤧᤴ ᤀᤍᤰᤋᤰ ᤗ᤹ᤖᤡᤰ ᤀᤥᤔᤧᤳᤋᤢᤱᤗᤥ ᤁᤖ ᤂᤧᤴ ᤌᤣᤀᤡ ᤐᤠ᤺ᤵᤔᤠ ᤔᤧᤴᤇᤢᤰᤐᤠᤖᤥ॥ ᤜᤧᤰᤁᤩᤠᤱ ᤂᤧᤴ ᤆᤡᤈᤡ ᤕᤧᤶᤕᤧᤶᤒᤠ ᤗᤢᤶᤔᤥᤗᤠᤶ ᤀᤠᤱᤃᤠ᤹ ᤛᤣ᤺ᤶᤛᤣ᤺ᤶᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱᤗᤥ—

¹⁷ “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤥ ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤴ ᤌᤣ ᤂᤢᤏᤧ᤹ ᤛᤠᤶᤕᤥᤒᤠ ᤗᤣ᤺ᤳᤇᤡᤱᤔᤠ ᤛᤢᤰᤐᤡ᥅ ᤔᤏᤠᤴ ᤀᤠᤒᤠᤅᤣ ᤏᤠᤘᤠᤃᤧᤴ ᤁᤢᤈᤀᤡ᤺ᤳᤍᤠᤱᤒᤠᤸᤗᤧ ᤁᤢᤍᤃᤡ ᤌᤣ ᤂᤢᤏᤧ᤹ ᤛᤢᤳᤌᤥᤒᤠ ᤐᤥᤱᤔᤠ ᤛᤢᤰᤐᤡ᥅

¹⁸ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤀᤠᤒᤠᤅᤣ ᤁᤢᤛᤧᤘᤠᤖᤥᤒᤠᤜᤠ᤹ ᤁᤢᤏᤠᤔᤧᤛᤠ᤹ᤖᤢᤛᤡᤴᤗᤥ. ᤂᤢᤏᤧ᤹ᤃ ᤔᤠᤱᤗᤠᤀᤡᤱᤒᤠᤜᤠ᤹ᤀᤠᤱ ᤀᤠᤵᤋᤡᤰᤛᤠᤒᤠ ᤔᤧᤈᤥ᤺ᤰᤐᤠ ᤂᤥᤛᤢᤛᤡᤖᤥ॥

¹⁹ ᤂᤠᤶᤔᤡᤸᤗᤧᤴ ᤜᤡᤶᤔᤥ ᤁᤧᤕᤢᤱᤒᤧᤸᤗᤥ ᤂᤧᤴᤏᤢ᤺ᤸᤗᤧ ᤕᤖᤡᤰ ᤀᤠᤵᤋᤡᤰ ᤔᤧᤄᤥᤛᤢᤴᤏᤠᤱ ᤒᤡ᥅ ᤂᤧᤱᤃ ᤂᤠᤶᤔᤥᤗᤠᤶᤔᤣ ᤐᤥ᤺ᤰᤂᤧᤒᤠᤛᤒᤠ. ᤂᤧᤱᤃ ᤆᤠᤷᤑᤣ᤺ᤶᤒᤠᤴ ᤜᤧᤰᤁᤣ ᤆᤡᤍᤥ᤹ ᤆᤡᤍᤥ᤹ ᤋᤥ᤹ᤔᤠ ᤛᤢᤰᤋᤧᤳᤗᤥ

²⁰ ᤁᤢᤓᤠ ᤔᤏᤠᤜᤠ᤹ ᤋᤠᤏᤠᤶ ᤔᤧᤒᤠ᤺ᤳᤗ ᤔᤧᤘᤠ᤹ᤖᤥ. ᤁᤖ ᤕᤢ᤺ᤴᤇᤡᤰ ᤌᤠᤖᤡᤰᤗᤧ ᤀᤠᤳᤋᤡᤸᤗᤧᤀᤠᤱ ᤏᤡᤱᤘᤠ᤹ ᤔᤧᤱᤄᤥᤀᤣ ᤔᤧᤛᤡᤔᤧᤄᤧᤳᤗᤥ॥

²¹ ᤂᤧᤱᤜᤠ᤹ᤖᤧ ᤔᤧᤃᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤏᤠᤵᤋᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤔᤣ᤺ᤴᤏᤣ ᤔᤧᤛᤡᤖᤥ॥”