ᤀᤕᤢᤒ 3 - LIFOTNTᤀᤕᤢᤒᤖᤧ ᤁᤢᤔᤧᤖᤡᤱ 1 ᤏᤢᤛᤡ ᤕᤧᤴᤜᤠ᤹ᤖᤧ ᤁᤢᤏᤢᤵᤔᤥ ᤀᤕᤢᤒᤖᤧ ᤁᤢᤶᤒᤪᤠ ᤜᤴᤍᤢᤀᤠᤱ ᤂᤢᤏᤧ᤹ ᤛᤠᤘᤠ᤺ᤴᤇᤡᤱᤒᤠ ᤕᤧᤴᤏᤡᤴ ᤛᤠᤱᤃᤪᤠ ᤔᤠᤱᤍᤣ ᤔᤧᤵᤔᤠ ᤜᤣ᤺ᤰᤋᤢ॥ ᤀᤕᤢᤒᤖᤧ ᤐᤠ᤺ᤳᤋᤢ᤹— 2-3 ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤛᤠᤘᤠ᤺ᤴᤇᤡᤱᤅᤠᤒᤠ ᤕᤧᤴᤏᤡᤴ ᤔᤠᤱᤍᤣ ᤛᤠᤱᤃᤪᤠᤖᤧ ᤋᤧᤳᤋᤢᤖᤖᤥ. ᤀᤠᤶᤔᤠᤖᤧ ᤀᤠᤱᤃᤠ᤹ ᤁᤢᤛᤠᤵᤐᤥ᤺ᤰᤁᤥ ᤁᤢ᤺ᤳᤇᤡᤱᤒᤠ ᤂᤧᤴ ᤛᤧᤴᤍᤡᤰᤁᤡᤴ ᤔᤠᤱᤍᤣ ᤌᤠᤖᤖᤥ᥄ 4 ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤴ ᤕᤧᤴᤏᤡᤴ ᤂᤠᤔᤠᤰᤔᤥ ᤗᤧᤱᤗᤖᤥ. ᤂᤧᤴ ᤕᤧᤴᤏᤡᤴ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ ᤔᤧᤴᤀᤡ᤺ᤳᤋᤢᤸᤗᤖᤥ. ᤂᤧᤴ ᤕᤧᤴᤏᤥ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤀᤥ᤺ᤳᤋᤡ ᤔᤧᤀᤥ᤺ᤳᤏᤧᤸᤗᤖᤥ॥ 5 ᤂᤧᤴ ᤕᤧᤴᤏᤡᤴ ᤏᤡᤱᤛᤠᤱ ᤐᤢᤰᤔᤠ ᤏᤢ ᤛᤠ᤹ᤖᤡᤰ ᤂᤠᤍᤠᤶᤔᤠᤸᤗᤧ ᤋᤧᤵᤋᤢᤖᤖᤥ. ᤂᤠ᤹ᤔᤡ᤺ᤳᤋᤡᤸᤗᤧ ᤂᤧᤴ ᤐᤴᤇᤢᤖᤖᤥ ᤜᤧᤰᤁᤩᤠᤱ ᤂᤧᤵᤔᤥ ᤏᤠᤶ ᤔᤧᤛᤧ᤺ᤰᤏᤧᤸᤗᤖᤥ॥ 6 ᤋᤱᤒᤣᤒᤠ ᤕᤧᤴᤜᤠ᤹ᤗᤠᤶᤒᤠ ᤂᤧᤴ ᤛᤧᤴᤍᤡᤰᤁᤡᤴ ᤔᤠᤖᤖᤥ ᤜᤧᤰᤁᤩᤠᤱ ᤀᤠᤳᤋᤡᤴ ᤗᤠᤀᤥᤀᤠᤱ ᤂᤧᤴ ᤕᤠᤶᤔᤥ ᤏᤡ᤺ᤵᤔᤠ ᤔᤧᤒᤥᤱᤏᤧᤸᤗᤖᤥ॥ 7 ᤁᤴ ᤛᤍᤠᤍᤡᤱᤗᤧ ᤗᤠᤃᤡ ᤛᤠᤀᤣ ᤔᤧᤶᤒᤥᤱᤔᤏᤠᤒᤠ ᤛᤧᤴᤍᤡᤰ ᤐᤥᤱᤗᤖᤥ. ᤂᤧᤵᤔᤥ ᤛ᤺ᤵᤔᤠ ᤀᤣ᤺ᤵᤔᤠ ᤀᤡᤰᤗᤠ ᤂᤧᤶᤔᤧᤍᤧᤳᤏᤧᤸᤗᤖᤥ॥ 8 ᤁᤡᤳᤆᤠᤰᤜᤠ᤹ᤖᤧ ᤂᤧᤴ ᤕᤧᤴᤏᤡᤴ ᤛᤠᤱᤃᤪᤠ ᤔᤧᤔᤧᤳᤋᤢᤖᤖᤥ. ᤆᤫᤠ᤺ᤳᤋᤥ ᤁᤧᤕᤠᤰᤐᤠ ᤁᤡᤵᤔᤠᤃᤧᤄᤢᤒᤠ ᤗᤡᤒᤩᤠᤋᤠᤏᤧᤴ ᤂᤧᤱᤜᤠ᤹ᤖᤧ ᤕᤢᤰᤁᤥ ᤔᤧᤃᤳᤋᤢᤖᤥ॥ 9 ᤋᤠᤏᤠᤶᤒᤠ ᤀᤠᤳᤋᤡᤴ ᤋᤠ᤺ᤴᤇᤥᤰᤐᤧᤴᤏᤠᤱ ᤂᤧ᤹ᤕᤥ ᤔᤧᤀᤥ᤺ᤳᤏᤧᤸᤗᤖᤥ॥ ᤋᤠᤏᤠᤶᤒᤠ ᤂᤠᤀᤥ᤺ᤵᤔᤠᤴ ᤌᤣᤏᤠᤎᤣ ᤜᤠᤱᤔᤠ ᤔᤧᤒᤥᤱᤏᤧᤸᤗᤖᤥ. ᤂᤧᤴ ᤕᤧᤴᤏᤥ ᤋᤠᤏᤠᤶᤒᤠ ᤏᤠᤶᤃᤧᤳᤇᤥᤴ ᤔᤧᤃᤧᤳᤏᤧᤸᤗᤖᤥ॥ 10 ᤂᤧᤴ ᤛᤧᤴᤍᤡᤰᤁᤡᤴ ᤔᤠᤱᤍᤣ ᤌᤠᤖᤖᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤱᤃᤠ᤹ ᤀᤠᤶᤔᤠᤖᤧ ᤁᤢᤛᤠᤖᤠᤓᤣ᤺ᤳᤋᤧᤴ ᤔᤧᤛᤠᤰᤋᤢᤴᤗᤥ ᤜᤧᤰᤁᤩᤠᤱ ᤋᤢᤰᤂᤣ ᤏᤢ ᤔᤡᤱᤘᤠᤖᤧ ᤗᤠᤶᤎᤣ᤺ᤵᤐᤠᤴ ᤀᤠᤱᤃᤠ᤹ ᤀᤠᤗᤠᤃᤡ ᤜᤱᤒᤧᤳ ᤑᤳᤇᤢᤖᤥ॥ 11 ᤀᤠᤶᤔᤠᤖᤧ ᤁᤢᤛᤠᤵᤐᤥ᤺ᤰᤐᤥ ᤀᤠᤱᤃᤠ᤹ ᤌᤣᤀᤠᤱ ᤔᤧᤔᤧᤃᤠᤱᤅᤡᤴᤒᤠᤀᤡ᥅ ᤀᤡᤃᤪ ᤛᤠᤘᤠ᤺ᤴᤇᤡᤱᤔᤠᤏᤢᤔᤧ᤺ᤴᤏᤣ ᤀᤠᤱᤃᤠ᤹ ᤜᤧᤏᤠᤱ ᤔᤧᤛᤩᤧᤀᤠᤱᤅᤡᤴᤒᤠᤀᤡ᥅ 12 ᤀᤠᤶᤔᤠᤖᤧ ᤀᤠᤱᤃᤠ᤹ ᤌᤣᤀᤠᤱ ᤁᤢᤓᤰᤋᤢᤱᤅᤥ ᤁᤳᤋᤠᤱᤒᤠᤒᤣ᥅ ᤜᤧᤰᤁᤩᤠᤱ ᤌᤣᤀᤠᤱ ᤏᤢᤎᤢᤰᤋᤠᤱᤒᤠᤒᤣ᥅ 13 ᤀᤠᤱᤃᤠ᤹ ᤂᤧᤴ ᤕᤧᤶᤔᤥᤀᤣ ᤛᤩᤧ᤹ᤀᤠᤱᤅᤡᤸᤗᤧᤃ ᤀᤡᤐᤢᤱᤅᤥ ᤆᤡᤈᤡ ᤗ᤹ᤖᤡᤰ ᤏᤧᤛᤠᤱᤔᤧᤴ. ᤜᤧᤰᤁᤩᤠᤱ ᤏᤠᤛᤡᤱᤔᤠ ᤂᤥᤛᤢᤱᤒᤠᤔᤧᤴ॥ 14 ᤜᤠᤱᤜᤠ᤹ ᤏᤢ ᤐᤕᤶ ᤜᤠᤱᤜᤠ᤹ ᤜᤧᤰᤁᤩᤠᤱ ᤔᤧᤈᤥᤃᤢᤒᤠ ᤜᤠᤱᤜᤡᤶᤜᤠ᤹ ᤗᤢ᤺ᤴᤍᤧᤀᤠᤱ ᤏᤧᤖᤥ. ᤂᤧᤴ ᤜᤧᤰᤁᤣ ᤀᤠᤸᤗᤥ ᤀᤠᤱᤃᤠ᤹ ᤀᤡᤵᤛᤠᤱᤅᤠᤱ ᤏᤧᤛ᤻ᤛᤠᤱᤒᤠᤔᤧᤸᤗᤥ॥ 15 ᤜᤠᤱᤛᤠᤜᤠ᤹ᤖᤧ ᤕᤖᤡᤰ ᤛᤠᤶᤔᤩᤠᤱ ᤔᤧᤃᤳᤋᤢᤀᤠᤱ ᤘᤕᤧᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤜᤡᤶᤜᤠ᤹ ᤕᤢᤵᤐᤠ᤺ᤸᤗᤧ ᤔᤧᤎᤡᤶᤛᤢᤀᤠᤱ ᤏᤧᤛ᤻ᤛᤧᤖᤥ. ᤂᤧᤱᤜᤠ᤹ ᤜᤧᤰᤁᤣ ᤀᤠᤱᤃᤠ᤹ᤀᤠᤱ ᤀᤡᤵᤛᤠᤱᤅᤠᤱ ᤏᤧᤛ᤻ᤛᤠᤱᤔᤧᤸᤗᤥ॥ 16 ᤀᤡᤃᤪ ᤁᤢᤛᤡᤘᤧᤳ ᤛᤠᤃᤧᤘᤠ᤺ᤴᤇᤡᤱᤒᤠ ᤀᤅᤧ᤺ᤰᤘᤠᤴ ᤁᤢᤀᤡᤛᤡᤰ ᤀᤠᤱᤃᤠ᤹ ᤂᤠᤶᤔᤥ ᤔᤧᤸᤗᤢᤵᤋᤠᤱᤅᤡᤸᤗᤧ ᤏᤢᤖᤧᤒᤠᤖᤥ. ᤀᤠᤶᤒᤪᤧ᤺ᤱᤘᤠ᤺ᤸᤗᤧ ᤂᤠᤀᤥ᤺ᤵᤔᤧᤴ ᤀᤠᤓᤧᤸᤗᤧᤀᤠᤱ ᤔᤧᤏᤡᤛᤢᤶᤒᤠ ᤜᤧᤰᤁᤣ ᤀᤠᤱᤃᤠ᤹ ᤀᤡᤵᤛᤠᤱᤅᤠᤱ ᤏᤧᤛ᤻ᤛᤠᤱᤒᤠᤖᤥ॥ 17 ᤀᤡᤐᤢᤱᤅᤥ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ᤖᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤗᤧᤖᤢᤖᤥ ᤜᤧᤰᤁᤩᤠᤱ ᤁᤧᤏᤠᤒᤠ ᤁᤧᤄᤡ᤺ᤶᤒᤠ ᤔᤏᤠᤜᤠ᤹ᤖᤧ ᤏᤠ᤺ᤶᤛᤡᤱᤔᤠ ᤔᤧᤄᤥᤛᤢᤖᤥ॥ 18 ᤐᤢᤱᤗᤠᤎᤠᤒᤠᤜᤠ᤹ᤖᤧᤀᤠᤱ ᤂᤧᤵᤔᤥ ᤛᤏᤠᤖᤢᤱ ᤔᤧᤄᤥᤛᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤧᤀᤠ᤺ᤵᤐᤠ ᤀᤡᤱᤈᤠᤱᤅᤡᤸᤗᤧ ᤕᤶᤒᤠ ᤀᤡᤰᤗᤠ᤺ᤴᤏᤠᤱ ᤔᤧᤱᤄᤧᤵᤛᤢᤴᤗᤥ॥ 19 ᤂᤧᤵᤔᤥ ᤆᤢᤰᤐᤠ ᤏᤢ ᤕᤶᤒᤠ ᤁᤧᤖᤧᤰ ᤔᤧᤘᤠ᤹ᤖᤥ. ᤜᤧᤰᤁᤩᤠᤱ ᤁᤢᤏᤢᤵᤔᤥ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ᤖᤧ ᤆᤥ᤺ᤰᤕᤢᤶᤓᤥ ᤔᤧᤄᤥᤛᤢᤖᤥ॥ 20 ᤔᤏᤠᤜᤠ᤹ ᤕᤧᤳᤋᤢᤰᤂᤣᤀᤥ ᤌᤣᤀᤠᤱ ᤔᤧᤜᤡᤱᤅᤠᤱ ᤔᤧᤘᤠ᤹ᤖ ᤕᤠ᤺ᤶᤔᤠᤛᤡᤒᤣ᥅ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤥ ᤁᤧᤎᤠᤒᤠᤜᤠ᤹ ᤜᤧᤏᤠᤱ ᤀᤥ᤺ᤳᤋᤡ ᤐᤡᤔᤠᤛᤡᤒᤣ᥅ 21 ᤂᤧᤱᤜᤠ᤹ᤖᤧ ᤛᤡᤔᤧᤴ ᤔᤧᤜᤠᤱᤄᤢᤖ ᤔᤧᤘᤠ᤹ᤖᤥ ᤁᤖ ᤂᤧᤴ ᤀᤠᤵᤑᤠᤸᤗᤧᤀᤠᤱ ᤔᤧᤍᤠᤏᤧᤸᤗᤥ॥ ᤆᤡᤱᤔᤏᤠ ᤕᤢᤱᤔᤏᤠᤒᤠ ᤕᤠᤱᤛᤠ ᤁᤢᤴᤎᤣᤏᤢ᤺ᤸᤗᤧᤀᤠᤱ ᤀᤡ᤺ᤵᤐᤢᤱᤅᤡᤴ ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤛᤡᤖᤠ᤹ᤎᤠᤱᤗᤥ॥ 22 ᤂᤧᤱᤜᤠ᤹ ᤔᤧᤛᤡᤀᤠᤱ ᤀᤡ᤺ᤵᤐᤢᤱᤅᤥ ᤔᤧᤃᤧᤳᤋᤡᤸᤗᤧ ᤔᤧᤛ᤺ᤳᤗᤥ. ᤜᤧᤰᤁᤩᤠᤱ ᤂᤧᤵᤔᤥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠᤖᤥ॥ 23 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤁᤧᤖᤧᤰ ᤐᤡᤛᤠᤱ ᤋᤢᤰᤂᤣ᤺ᤸᤗᤧ ᤁᤒᤪᤡᤱ ᤁᤒᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤠᤕᤧᤶᤔᤡᤴ ᤆᤡᤰᤂᤢ ᤐᤡᤖᤢᤛᤡᤖᤥ॥ 24 ᤀᤠᤛᤰᤔᤠ ᤐᤢ᤹ᤔᤧᤴ ᤀᤠᤱᤃᤠ᤹ ᤀᤠᤈᤠᤔᤠ ᤆᤠᤖᤥ ᤜᤧᤰᤁᤩᤠᤱ ᤕᤧᤳᤋᤢᤰᤂᤣ᤺ᤸᤗᤧ ᤀᤠᤀ᤺ᤰᤔᤠ ᤀᤠᤓᤡ᤺ᤰᤔᤧᤴ ᤀᤠᤱᤃᤠ᤹ ᤀᤠᤎᤢᤱᤔᤠ ᤆᤫᤠ᤺ᤳᤗᤥ॥ 25 ᤀᤠᤱᤃᤠ᤹ᤃ ᤁᤡᤔᤠ ᤐᤠ᤺ᤴᤜᤠ᤹ᤖᤧ ᤛᤧᤖᤠᤱᤅᤠᤱ ᤘᤠ᤹ᤀᤠᤖᤥ. ᤂᤧᤴ ᤐᤠ᤺ᤴᤜᤠ᤹ᤏᤢ ᤀᤠᤱᤃᤠ᤹ ᤐᤃᤡ ᤁᤡᤀᤠᤖᤥ. ᤜᤠᤒᤠ ᤂᤧᤱᤜᤠ᤹ᤀᤣ ᤀᤠᤱᤃᤠ᤹ ᤀᤠᤛᤶᤎᤠᤱ ᤀᤡᤖᤧ ᤋᤩᤧᤀᤠᤱ ᤘᤠ᤹ᤖᤥ॥ 26 ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤛᤏᤠᤖᤢᤱ ᤜᤥᤵᤗᤥ. ᤀᤠᤱᤃᤠ᤹ ᤏᤠ᤺ᤶᤛᤡᤱᤔᤠ ᤔᤧᤄᤥᤀᤠᤴᤗᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤡᤏᤥᤃᤧᤴ ᤀᤠᤍᤢᤰᤂᤣ ᤀᤠᤗᤠᤰᤂᤣᤜᤠ᤹ ᤔᤧᤏᤢᤵᤏᤧᤸᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.