ᤀᤕᤢᤒ 2 - LIFOTNT

¹ ᤌᤡᤰᤕᤠᤴ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤠᤱᤗᤠᤀᤡᤱᤒᤠᤜᤠ᤹ ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤧᤍᤩᤧ᤺ᤸᤗᤧ ᤔᤠᤑᤧᤴᤛᤠᤶᤔᤡᤴᤏᤠᤱ ᤂᤧᤱᤜᤠ᤹ᤏᤢ ᤁᤧᤖᤧᤍᤩᤧ॥

² ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤛᤣ᤺ᤴᤗᤠᤵᤋᤢ. “ᤂᤧᤏᤧ᤹ ᤀᤠᤳᤋᤠᤴ ᤁᤧᤒᤣᤀᤠᤱ ᤁᤧᤘᤕᤧ᥅” ᤔᤠᤑᤧᤴᤛᤠᤶᤔᤡᤸᤗᤧ ᤏᤢᤃᤵ ᤐᤡᤖᤢ. “ᤀᤠᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤖᤧᤰ ᤐᤡᤛᤠᤱ ᤗᤠᤱᤄᤣᤃᤠᤱᤗ ᤏᤠᤏᤠ ᤁᤳᤏᤠ ᤋᤠ᤺ᤰᤁᤴᤍᤠᤱᤅᤠᤱ ᤘᤕᤠᤱ॥”

³ ᤜᤧᤰᤁᤣ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤛᤣ᤺ᤴᤗᤠᤵᤋᤢ. “ᤌᤣ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤀᤕᤢᤒᤧᤴ ᤁᤧᤏᤡᤛᤢᤒᤡ᥅ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤧᤴ ᤜᤧᤰᤋᤱᤒᤠ ᤁᤢᤍᤥ᤺ᤵᤔᤠ ᤏᤢ ᤏᤢᤒᤠ ᤔᤧᤴᤇᤠᤶ ᤕᤠᤵᤔᤡ ᤜᤠ᤺ᤳᤋᤠᤱ ᤜᤥᤵ॥ ᤂᤧᤸᤗᤧ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤀᤠ ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤗᤠᤶ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤛᤧ᤺ᤵᤛᤡᤱᤅᤠᤱ ᤘᤠ᤹॥ ᤌᤣᤏᤠᤎᤣ ᤂᤧᤴ ᤔᤧᤱᤔᤠ ᤑᤠ᤺ᤰᤋᤠᤱᤅᤧ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤁᤧᤔᤧᤳᤋᤠᤱ॥ ᤁᤖ ᤀᤕᤢᤒᤧᤴ ᤀᤠᤖᤎᤠᤖᤡᤰ ᤁᤢᤍᤥ᤺ᤵᤔᤠᤀᤣ ᤐᤥ᤺ᤰᤂᤧᤀᤠᤱ ᤘᤠ᤹॥”

⁴ ᤔᤠᤑᤧᤴᤛᤠᤶᤔᤡᤸᤗᤧ ᤏᤢᤃᤵ ᤐᤡᤖᤢ. “ᤜᤥᤖᤡᤰᤐᤠᤸᤗᤧ ᤁᤢᤗᤧᤰᤘᤠ ᤜᤥᤖᤡᤰᤐᤠ᥄ ᤔᤏᤠ᤺ᤸᤗᤧ ᤀᤠᤒᤠᤅᤣ ᤁᤢᤜᤡᤱᤔᤴᤏᤡᤴ ᤛᤧ᤺ᤵᤔᤠᤖᤧ ᤗᤠᤃᤡ ᤂᤢᤏᤧ᤹ ᤁᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤗᤧᤖᤢᤍᤣᤛᤢ॥

⁵ ᤁᤖ ᤂᤢᤏᤧ᤹ ᤁᤢᤎᤰᤁᤧᤴ ᤂᤠ᤺ᤴᤍᤧᤛᤠ᤹ᤖᤧ॥ ᤂᤧᤸᤗᤧ ᤂᤧᤏᤧ᤹ ᤁᤧᤍᤃᤡᤀᤣ ᤔᤠᤱᤍᤣ ᤛᤠᤱᤃᤪᤠ ᤁᤧᤔᤧᤳ᥄”

⁶ ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤔᤠᤑᤧᤴᤛᤠᤶᤔᤡᤴ ᤀᤰᤂᤣ ᤔᤧᤳᤋᤢ. “ᤀᤥ᤺ᤰ ᤏᤢ᤹. ᤂᤧᤴ ᤂᤧᤏᤧ᤹ ᤁᤧᤜᤢᤰᤁᤥ ᤘᤠ᤹॥ ᤁᤖ ᤂᤧᤸᤗᤧ ᤁᤢᤜᤡᤱᤔᤴᤏᤡᤴᤗᤰ ᤌᤣᤀᤠᤱ ᤔᤧᤔᤧᤳᤋᤧᤴᤏᤧ᤹॥”

⁷ ᤔᤠᤑᤧᤴᤛᤠᤶᤔᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡᤗᤠᤶᤒᤠ ᤗ᤺ᤴᤍᤧᤀᤠᤱ ᤐᤣ॥ ᤜᤧᤰᤁᤩᤠᤱ ᤂᤧᤸᤗᤧ ᤀᤕᤢᤒᤖᤧ ᤁᤢᤎᤰᤁᤥ ᤌᤧᤃᤣ᤺ᤰᤁᤥᤏᤢ ᤗᤠᤱᤍᤠᤵᤐᤣ᤹ᤀᤥ ᤌᤠᤖᤡᤰ ᤕᤠᤱᤄᤣ᤺ᤰ ᤗ᤺ᤴᤍᤧᤖ ᤕᤠ᤺ᤴᤍᤢᤒᤡᤖᤢ॥

⁸ ᤀᤕᤢᤒᤧᤴ ᤐᤣᤀᤠᤱ ᤂᤠᤵᤐᤢ ᤛᤶᤍᤠᤱ ᤕᤢᤱᤛᤡᤱ ᤜᤧᤰᤁᤩᤠᤱ ᤕᤠᤱᤄᤣ᤺ᤰᤜᤠ᤹ ᤀᤢ᤺ᤰᤔᤠᤖᤧ ᤗᤠᤃᤡ ᤗᤳᤇᤠ ᤑᤢᤈᤡᤰ ᤂᤧᤸᤗᤧᤰ ᤌᤡᤰ ᤕᤠᤱᤛᤡᤱ॥

⁹ ᤂᤧᤸᤗᤧ ᤁᤢᤔᤣ᤺ᤳᤋᤡᤸᤗᤧ ᤂᤢᤏᤧ᤹ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤀᤠᤖᤛᤠᤱ ᤋᤃᤡ ᤜᤧᤰᤁᤣᤀᤣ ᤁᤢᤍᤥ᤺ᤵᤔᤠ ᤁᤧᤒᤥᤰᤂᤧᤀᤠᤱ ᤁᤧᤘᤠ᤹ᤒᤡ᥅ ᤔᤧ᤺ᤶᤒᤧ. ᤌᤣᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤍᤣ ᤛᤠᤰᤔᤢᤖᤠ ᤁᤧᤶᤔᤧᤳᤋᤢᤴᤏᤠᤱ ᤁᤧᤴᤇᤡᤏᤧᤶᤒᤠᤒᤣ᥅”

¹⁰ ᤀᤕᤢᤒᤧᤸᤗᤧ ᤏᤢᤃᤵ ᤐᤡᤖᤢ. “ᤂᤧᤏᤧ᤹ ᤀᤍᤱᤐᤠᤴ ᤁᤧᤒᤠ᤺ᤵᤔᤠ ᤔᤧᤴᤇᤢᤔᤠ᤹ ᤁᤢᤀᤡᤛᤡᤰ ᤁᤧᤒᤠ᤺ᤳ᥄ ᤌᤣ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤏᤢᤒᤠ ᤐᤠ᤺ᤴᤗᤰ ᤋᤠ᤺ᤰᤔᤠ ᤜᤧᤰᤁᤩᤠᤱ ᤀᤡᤏᤥᤃᤧᤴ ᤋᤢᤰᤂᤣᤴ ᤋᤠ᤺ᤰᤔᤠ ᤔᤣ᤺ᤶᤒᤡ᥅” ᤁᤴ ᤁᤧᤖᤧᤰ ᤐᤥ᤺ᤰᤂᤧᤛᤠᤱ ᤀᤕᤢᤒᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤠ᤺ᤴᤔᤧᤎᤡᤰᤋᤢᤴ ᤜᤧᤰᤁᤩᤠᤱ ᤗᤠᤕᤥ ᤔᤧᤈᤥᤃᤢᤴᤗᤥ॥

¹¹ ᤋᤣᤔᤠᤏ ᤕᤧᤰᤕᤰᤁᤥᤒᤠ ᤀᤣᤗᤡᤐᤈ. ᤛᤢᤜᤡ ᤗᤠᤈᤣ᤹ᤒᤠ ᤒᤡᤸᤍᤍ ᤜᤧᤰᤁᤩᤠᤱ ᤏᤠᤔᤠᤜ ᤗᤠᤈᤣ᤹ᤒᤠ ᤛᤥᤐᤖ ᤔᤧᤵᤔᤏᤠᤒᤠ ᤀᤕᤢᤒᤖᤧ ᤛᤢᤶᤛᤡ ᤁᤢᤴᤍᤣ᤺ᤱᤒᤠ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤀᤕᤢᤒᤖᤧ ᤋᤢᤔᤢᤒᤠ ᤕᤧᤳᤋᤢᤰᤂᤣᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤄᤧᤵᤛᤢ ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤠᤒᤠᤅᤣ ᤜᤡᤶᤗᤠᤶ ᤔᤧᤗ᤺ᤴᤍᤧᤀᤠᤱ ᤌᤡᤰᤋᤧᤴᤏᤥ ᤔᤧᤍᤢᤔᤧ॥ ᤜᤧᤰᤁᤩᤠᤱ ᤐᤣ᤺ᤰᤔᤠᤀᤠᤱ ᤂᤢᤏᤧ᤹ ᤜᤠᤱᤜᤠᤱ ᤔᤧᤵᤔᤠ ᤀᤡᤱᤔᤧᤍᤱᤄᤢ॥

¹² ᤕᤖᤡᤰ ᤔᤠ᤺ᤱᤄᤠ ᤗᤠᤶᤒᤠᤀᤣ ᤂᤧᤱᤜᤠ᤹ᤖᤧ ᤀᤕᤢᤒᤧᤴ ᤔᤧᤏᤡᤛᤢ ᤁᤖ ᤁᤢᤛᤡᤱ ᤏᤡ᤺ᤵᤔᤠ ᤔᤧᤴᤇᤢᤰᤋᤢᤴ॥ ᤀᤕᤢᤒᤧᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤂᤧᤱᤜᤠ᤹ ᤜᤠ᤺ᤵᤔᤠ ᤏᤢ ᤔᤧᤖᤡᤱ ᤌᤰᤔᤠ ᤔᤧᤜᤣ᤺ᤰᤋᤧ ᤜᤧᤰᤁᤩᤠᤱ ᤔᤡᤱᤘᤠ᤺ᤸᤗᤧ ᤁᤢᤎᤡᤶ ᤔᤧᤒᤥ᤺ᤰᤂᤧᤖ ᤀᤠᤒᤠᤅᤣ ᤂᤢᤴᤇᤡ᤹ ᤋᤣ᤺ᤳᤜᤠ᤹ ᤔᤧᤎᤧ᤺ᤰᤂᤢᤀᤠᤱ ᤌᤧᤃᤣᤰ ᤛᤶᤍᤠᤱ ᤂᤠᤶᤜᤡ᤺ᤰᤁᤡᤴ ᤔᤧᤛᤧᤛᤢ॥

¹³ ᤀᤕᤢᤒᤖᤧ ᤛᤠ᤹ᤖᤡᤰ ᤋᤢᤰᤂᤣ ᤗᤠᤰᤂᤣ ᤋᤢᤔᤢᤀᤠᤱ ᤕᤢᤅᤧ. ᤂᤧᤴ ᤂᤧᤱᤜᤠ᤹ᤖᤧ ᤔᤧᤏᤡᤛᤢ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤀᤕᤢᤒᤧᤴᤏᤢ ᤂᤠᤶᤒᤠᤱᤅᤥ ᤔᤧᤕᤢᤱᤛᤡᤱ ᤂᤧᤒᤩᤠᤱ ᤐᤠ᤺ᤴᤛᤢᤳᤗᤠᤎᤡᤰᤁᤠᤱ ᤔᤧᤶᤒᤠ᤺ᤳᤋᤣ ᤛᤧᤴᤍᤡᤰ ᤗᤧᤴᤍᤡᤰ ᤏᤢᤛᤡ ᤕᤧᤴ ᤌᤠᤖᤡᤰ ᤔᤧᤕᤢᤅᤧᤖᤥ॥